ভারত ইমানা য়াফরে, ভারত ইমানা য়াইফরে, সমেস্ত গোয়ঙ্কর ভাৱা-ভয়নিঙ্ক মায়েমোগাচে য়েবকর! ঙসিগী পুৱারী ওিরবা থৌরম অসিদা শরুক য়াবীরিবা গোৱাগী রাজ্যপাল শ্রী পি.এস. শ্রীধরন পিল্লাইজী, গোৱাগী ইচঙ-থৌবা মুখ্য মন্ত্রী প্রমোদ সাৱন্তজী, হান্নগী মুখ্য মন্ত্রী চন্দ্রকান্ত কাৱলেকরজী, মনোহর অজগাওঙ্করজী, কেন্দ্রগী কেবিনেৎকী ঐহাক্কী মরুপ শ্রীপদ নায়কজী, গোৱা বিধান সভাগী স্পীকর রাজেশ পত্নেকরজী, গোৱা সরকারগী মন্ত্রী খুদিংমক, মীয়ামগী মীহুৎ, লৈঙাক্লোই অমসুং ঐহাক্কী গোৱাগী মরুপশিং!
মহ্যজ্যা মোগাথ গোয়ঙ্কারনো, গোন্য মুক্তিচা, হিরক মহোৎস্বি বর্সা নিমতান, তুমকা সগথ্যাঙ্ক, মনা কাথজাসাৱন পর্বী! সেমান নতলেলয়া, মোগাথ মনশাঞ্চ্যা, হয়া, ভঙ্গ্রাথ্যা গোয়ান্ত, য়েৱন মহাকা খুপ খোস ভোগতা! গোৱাগী লমদম, হৱা- নুংশিৎ, সমুদ্র অসি মহৌশাগী নীংথরবা খুদোলনা থৌজাল্লি। অদুগা ঙসিদি, গোৱা মীয়ামগী থৱাই য়াওবগী ইথিলনা গোৱানা নিং-খা তম্লিবা অসিদা হেন্না চাউথোকচবা পোকহল্লি। অদোমগী মাইথোংদা ঙসি গোৱাগী নীংথিরবা পুৱারীগীদমক্তা চাউথোকচদুনা নুংঙাইবগী শক্তম উবা ফংই। মফম অসি য়াম্না পিক্লে হায়না ঐহাক্কী ইফমদা পাউদম্বীরে। মরম অদুনা থংনবদা মসিগা চপ মান্নবা পন্দাল অনি শারি অমসুং অসিদসু মীয়াম পুম্বনা পীক থন্না ফম্বীরি।
মরুপশিং,
ঙসিদি গোৱানা নিং-খা তম্বগী দাইমন্দ জুবিলী পাংথোকপদা নত্তনা, শাংলবা খোঙচৎ অসিগী নীংশিংনিংঙাই ওইরবা থৌদোক কয়াসু ঐখোয়গী মাংদা লৈরে। ঐখোয়গী কত্থোকপা অমসুং হোৎনখিবশিং ঐখোয়গী মাংদা লৈরে। ঐখোয়গী মাংদা উরিবা গোৱাগী মীয়ামগী অখাঙ-কনবা অমসুং হোৎনবা কনবগী মহৈশিং অসিনা ঐখোয়বু তেল্লবা মতমদা শাংলবা খোঙচৎ অসি চৎপা ঙমহল্লিবনি। চাউথোকচনীংঙাই ওইরবা থৌওং কয়া মাংদা লৈরবনিনা, তুংগী ওইনসু অনৌবা ৱারেপ মথন্তনা অদুমক লেপ্লগনি। অনৌবা মঙলান অদুমক থোক্লক্লগনি। অদুগা গোৱাগী নিং-তম্বগী দাইমন্দ জুবিলীগা ঐখোয়গী নিং-তম্বগী অমৃত মহোৎসবকা পুন্না তাবসিসু য়াম্না নুংঙাইরবা তান চান্নবা অমনি। মরম অদুনা, গোৱাগী মঙলান অমসুং ৱারেপশিংনা ঙসিদি লৈবাক্তা অনৌবা পাঙ্গল হাপ্লে।
ঐহাক্না মফমসিদা লাক্ত্রিঙৈদা অজাদ মৈদান্দা লৈরিবা শহীদ মেমোরিএলদা অথৌবশিংগী মফমদা ইকায় খুম্নবা উৎপগী খুদোংচাবা ফংজখি। অথৌবশিংগী মফমদা কোক নোঞ্জরবা তুংদা ঐহাক্না মিরামারদা সেল পেরেদ অমসুং ফ্লাই পাস্তপুসু য়েংলক্লে। মফমসিদা লাকপদসু, ঐহাক্না ‘ওপরেসন বিজয়’গী অথৌবা অমসুং ভেতেরেনশিংগী মফমদা ইকায় খুম্নবা উৎপসু অমুক ফংজরে। অসিগুম্বা থৱাই নুংঙাইহনবা খুদোংচাবা কয়া অমুক্তদা ফংজরে। মসিমক্তবু, খিঙ-খিঙ লাওবা অমসুং মতিক লৈবা গোৱাগী থৌওংনি। ঐহাক্না অসিগুম্বা ইকায়-খুম্নবা অমসুং নুংশিবীবগীদমক্তা গোৱাগী মীয়াম খুদিংবু থাগৎচরি।
মরুপশিং,
ঙসি ঐখোয়না গোৱাগী নিং-তম্বগী নুমিৎ পাংথোক্লি অদুগা নাকল অমদনা গোৱাগী চাউখৎ-থৌরাংগী মাইকৈদা খোঙথাং অমা থাংজিল্লি। ঙসি, মফমসিদা গোৱা সরকারগী তোঙানবা বিভাগ অমসুং এজেন্সীশিংবু আত্মানির্ভর ভারত অমসুং স্বয়মপুর্না গোৱা মাই পাক্না পাংথোকপগীদমক্তা শকখঙলি। মথৌ নীংথিনা পাংথোকপা গোৱাগী পঞ্চায়ত, ম্যুনিসিপালিতীশিংদসু মনা পীরি। মসিগা লোয়ননা, নৌনা শেমজিল্লবা ফোর্ত অগুৱাদা জেল ম্যুজিয়ম, গোৱা মেদিকেল কোলেজগী সুপর স্পিসিএলিতী ব্লোক, খা গোৱাগী অনৌবা দিস্ত্রিক্ত হোস্পিতাল, মোপা এয়রপোর্ত্তা লৈবা এভিএসন স্কিল দিভেলপমেন্ত সেন্তর অমসুং মারগাওগী দাবোলিম-নাভেলিমদা লৈবা গ্যাস ইন্স্যুলেতেদ সবস্তেসন য়াওনা চাউখৎ-থৌরাংগী প্রোজেক্ত কয়াসু শঙ্গারি। ঐহাক্না অসিগুম্বা চাউখৎ-থৌরাংগী থৌওংশিং অসিগীদমক্তা খ্বাই পুম্নমকপু অমুক্কা হন্না থাগৎলি।
মরুপশিং,
অমৃত মহোৎসবনা লৈবাক মীয়াম খুদিংদা ‘সবকা প্রয়াস’কী মতাংদা খঙহল্লি। গোৱাগী নিং-তম ইহৌ অসি মন্ত্রা অসিগী খুদম অমনি। ঐহাক্না হৌজিক অজাদ মৈদানগী শহীদ মেমোরিএল য়েংলম্বনি। মসিদা খুৎ মরিগী শক্তম লাংলি। গোৱাগী নিং-তম্বগীদমক্তা ভারতকী নাকল মরিদগী শৌগৎখি হায়বগী মসিনা খুদম ওইনা তাক্লিবনি। ভারতকী অয়াম্বা মফম্না মুঘলশিংগী মখাদা লৈখিবা মতমদা গোৱানা পোর্তুগীজশিংগী মখাদা লৈখিবনি। ভারতনা মসিগী মতুংদগী ইহৌ কয়া অমসুং সরকার শিন্দোক শিঞ্জিন তৌবা কয়া উবা ফংখি। শক্তি শিনখ্রবা মতুংগী চহি চা কয়াদা গোৱানা ভারতকী শরুক ওইবগী ইথিল কৈদৌনুংদা কাওখিদে অমসুং ভারতকী অতোপ্পা লমদমশিংনসু গোৱাবু কৈদৌনুংদা কাওখিদে। মসিদি মতমগী মতুং ইন্না মপাঙ্গল অদুমক কনখৎলকখিবা মরী অমনি। গোৱাগী নিং-তম ইহৌ অসিদি পুৱারী ওইবা খুদোংথীবা কয়া থেংনরবা মতুংদা মৈরী হৌখিবা মুৎনাইদ্রবা মৈরা অমনি অমসুং ঙসিসু চাক্তুনা লৈরিবনি। কুঙ্কল্লি ইহৌদগী হৌদুনা ছত্রপতি সিবাজী মহারাজ অমসুং সংভাজীগী লুচিং মখাদা থৌনা লৈরবা মথাশিংনা হৌখিবা ইহৌ ফাওবদা লৈবাক মীয়াম্না গোৱাগীদমক্তা তেংবাংখি অমসুং মীপুম খুদিংনা মসিদা শরুক য়াখি।
মরুপশিং,
ঐখোয়গী লৈবাক্না গোৱাদগী হান্না নিংতম্বা ফংখি। লৈবাক মীয়াম অয়াম্বনা মখোয়গী হক ফংনখি। মখোয়গী মঙলান মঙফাওনবা য়াবগী মতম লৈরকখি। মখোয়না শক্তি তানবা, ওফিস্তা ফম্বা অমসুং ইজৎ তানবগী অপাম্বা খনবা ফংনখি। অদুবু মীওই কয়ানা অসিগুম্বা নুংঙাইবা থাদোক্লগা গোৱাগী নিংতম্বগীদমক্তা কত্থোকপগী লম্বী খনখি। গোৱাগী মীয়াম্নসু ইহৌশিং অসিবু কৈদৌনুংদা তপথখিদে, লেপহনখিদে। মখোয়না নিংতম্বগী মৈরীবু ভারতকী পুৱারীদা খ্বাইদগী শাংনা চাকহন্দুনা থমখি। মসিগী মরমদি, ভারত অসি রাজনিতীগী শক্তিখক ওইবনা নত্তে। ভারত হায়বসিদি মীওইবা খুন্নাইগী অনীঙবা-অপাম্বা ঙাক শেন্নবগীদমক্তা লৈবা ৱাখল্লোন অমসুং ইমুং-মনুং অমনি। ভারত অসি ‘ইশাগী হায়বা ৱাফম”দগী লৈবাক্না হেন্না ৱাংনা থম্বা ইথিল অমনি অমসুং মসিবু খ্বাইদগী মরু ওইনা লৌই। মসিদা “লৈবাক্না অহানবদা” হায়বা মন্ত্রা অমখক লৈ। মসিদা ৱারেপ অমখক লৈ – এক ভারত, শ্রেস্থ ভারত। লুইস দি মিনেক্সিস ব্রঘঙ্গা, ত্রিস্তাব ব্রঘঙ্গা দি কুনহা, জুলিও মিনেক্সিসকুম্বা মমিং খরা লৈ, কুরুশোত্তম কোকোদকর, লক্ষ্মীকান্ত ভেম্ব্রেগুম্বা লান্মী লৈ, নত্ত্রগা বালা রাই মাপারীগুম্বা নহাশিংগী কত্থোকপশিংনা ইহৌ অসিবু কৈদৌনুংদা লেপহনখিদে। নিংতম্বা ফংবগী হেক মমাংদা, রাম মনোহর লোহিয়াজীদগী হৌদুনা নিংতম্বা ফংলবা মতুং ফাওবদা নেতা কয়ানা লমজিংদুনা ইহৌ অসিবু মখা তানা চত্থখি। গোৱাগী নিং-তম ইহীঊদা শরুক য়াবগীদমক্তা জেল চঙখিবা মোহন রানাদেবু অমুকা নীংশিংসি। মহাক্না চহি কয়া ফাদোক ওইনা লৈবা তাখি। গোৱাগী নিংতম্বা মতুংদসু মহাক্না মতম শাংনা জেলদা লৈবা তাখি। মহাক্কুম্বা নিংতম লান্মীগী মতাংদা অতলজীনা পার্লিয়ামেন্ততা ৱাফম কয়া ফোংদোকখি। অজাদ গোমন্তক দলগা মরী লৈনবা নেতা কয়ানা গোৱাগী ইহৌগীদমক্তা মশাগী মপুন্সি কত্থোকখি। প্রভাকর ত্রিবিক্রম বৈদ্যা, বিশ্বনাথ লবান্দে, জগন্নাথরাও জোশী, নানা কাজরেকর, সুধির ফরকেগুম্বা নেতা কয়ানা গোৱা, দামন দ্যু, দদ্রা অমসুং নগর হবেলীগী নিংতম্বগীদমক্তা ইহৌ হৌখি, ইহৌগী মপাঙ্গল হাপখি।
মরুপশিং,
গোৱা মুক্তি বিমোচন সমিতীগী সত্যগ্রহদা সত্যগ্রহী ৩১না মশাগী মপুন্সি লোমখি।
লৈবাক অসিনা নিংতম্বা ফংলবা ফাওবা পঞ্জাবকী বীর কর্নেল সিংহ বেনিপালগুম্বা মীওইনা করিগুম্বা খরা পাংথোক্তবা য়াদে খন্দুনা অসিগুম্বা কত্থোকপগী থৌওং পাংথোকখিবনি, মসিগী মতাংদা অদোমসু অমুক্তা খনথবীয়ু। অদুগা ঙসি থৌরম অসিদা ঐহাক্না সর্দার পতেলনা করিগুম্বা চহি খরা হেন্না শাংথনা হিংলম্লবদি, গোৱানা নিং-খা তম্বগীদমক্তা মতম শাংনা ঙাইরম্লোই হায়নসু ফোংদোকচনীংই।
মরুপশিং,
গোৱাগী নিং-তম ইহৌগী পুৱারী অসি ভারতকী ৱারেপকী খুদম অমখক ওইবা নত্তে, মসিদি ভারতকী অমত্তা ওইবা অমসুং নুংশি-চান্ননা লৈবগী হৌজিক-হৌজিক লৈরিবা ইথিলনি। জাত-বিজাত অমসুং ধর্মা খায়দনা ‘এক ভারত, শ্রেস্থ ভারত’কী মচু শংবগে হায়বসি গোৱানা থবক ওইনা পাংথোক্লি। গোৱা অসি সেন্ত ক্বীন কেতেভানগী শেংলবা অরিবা মতমগী পোৎলমশিংবু জোর্জিয়া সরকারদা খুৎশম্নখিবা লমদমনি। সেন্ত ক্বীন কেতেভানগী শেংলবা অরিবা মতমগী পোৎলম অসি ইং ২০০৫দা মফমসিগী সেন্ত ওগস্তিন চর্চতগী ফংখিবনি।
মরুপশিং,
গোৱাগী নিংতম ইহৌ হৌখিবা মতমদা, মীয়াম পুন্দুনা মসিগী লান থেংনখি, অমত্তা ওইনা ইহৌ হৌখি। লোইলম লৈঙাক্কী মাইয়োক্তা হৌখিবা পিন্তো ইহৌ অসিদা মফমসিগী য়েলহৌমী খৃস্তিয়নশিংনা লুচিংদুনা হৌখিবনি। মসি ভারতকী শক্তাক্নি। মফমসিগী মীওই খুদিংগী পান্দম অমা লৈ – মীওইবা খুন্নাইগী তেংবাংবা। ভারতকী অসিগুম্লবা অমত্তা ওইবগী শক্তাকপু মালেম শিনবা থুংবনা খঙই। ঐহাক্না মতম খরগী মমাংদা ইতালী অমসুং ভেতিকান শহরদা চৎখিবা মতমদা পোপ ফ্রান্সিসকা উন্নবগী খুদোংচাবা ফংখি। পোপ্না ভারতকী মতাংদা লৈবা ৱাখল্লোন অসি খঙবদা য়াম্না নুংঙাইনীংঙাই ওইখি। ঐহাক্না মহাক্কী মফমদা ভারত্তা লাক্নবা পাউজেল পীখি। মদুদা পোপ্না অসুম্না হায়বীরকখি, “মসিদি অদোম্না ঐহাক্কী মফমদা পীবা খ্বাইদগী চাউবা খুদোলনি”। পোপ্না ভারতকী তোঙানবগী মগুন চেনবা অমসুং মতিক লৈবা গনতন্ত্রবুসু পামজৈ হায়না ফোংদোরকখি।
মরুপশিং,
গোৱাগী মহৌশাগী ফজবা অসিনা মফমসিগী তোঙানবা শক্তাক অমা মতম পুম্বদগী ওইদুনা লাক্লি অমসুং লমদমসিগী সরকারনা হৌজিক্তি গোৱাগী অনৌবা মশক্তাক অমবু মরা চেৎহল্লি। হায়রিবশিং অসিনা থবক খুদিংমক নীংথিজনা পাংথোকপা অমসুং খ্বাইদগী মথক্তা লৈবা রাজ্যগী শক্তাক অমনি। মফম খরদা থবক হৌবা নত্ত্রগা থবক চত্থদুনা লৈবা মতমদা, গোৱানা থবকশিং লোইশিল্লি। লমকোয়বশিংগী খ্বাইদগী পামজবা পন্থুংফমদি হান্ননা ওইদুনা লৈরে, অদুগা হৌজিক্তি, অফবা লৈঙাক্কী মতাংদসু মসিনা খ্বাইদগী মকোক্তা লৈরে। পর কেপিতা ইনকম ওইরো, মদুদসু গোৱানা মকোক্তা লৈরি। ওপন দিফিকেসন ফ্রীগী মতাংদসু গোৱানা ১০০%গী চাংদা পাংথোক্লি। নুপীমচাশিংগী স্কুলদা অমাংশঙ থম্বগী মতাংদসু গোৱানা খ্বাইদগী মকোক্তা লৈরি। য়ুম্থোং খুদিং চত্তুনা ফত্ত-হৌদি খোম্বদসু গোৱানা ১০০%কী চাংদা পাংথোক্লি। “য়ুম্থোং খুদিংদা ঈশিং ফংহনবা”, আধার এনরোলমেন্ত, ফুদ সেক্যুরিতী, প্রধান মন্ত্রী গ্রাম সরক য়োজনাগী খুত্থাংদা ওল বোর্দর রোদ কন্নেক্তিবিতী অমসুং বর্থ অমদি দেথ রেজিস্ত্রেসন্দসু গোৱানা খ্বাইদগী মকোক ওইদুনা ১০০%গী চাংদা পাংথোক্লি। লিস্ত অসি য়াম্না শংলি, মশিং থীবদা অদুমক ৱাৎকনি। প্রমোদজী অমসুং অদোমগী কাঙবুশিংবু ঐহাক্না থাগৎচরি। গোৱানা মাই পাক্লিবশিং অসি য়াম্না শীংথানীংঙাইনি। অদোমগী মীয়াম্না পাংথোক্লিবশিং অসি তসেংনা থাগৎফম থোকই। অদোমগী হৌজিক্কী মাই পাকপা অসিগীদমক্তা ঐহাক্না গোৱাগী মীয়াম খুদিংগী মফমদা ইকায় খুম্নবা উৎচরি, মসিগী মাই পাকপা অসিদি ১০০% ভেক্সিনেসন য়ৌবগীনি। ভেক্সিন কাপ্পা য়ারবা গোৱাদা লৈবা মীওই খুদিংনা ভেক্সিন কাপ্লে। অনিশুবা দোজকী ওইনসু হৌজিক য়াম্না কন্না চত্থরি। অদোমগী রাজ্যসু লৈবাক্কী অসিগুম্বা থবক পাংথোকপা রাজ্যশিংগী মরক্তগী অমা ওইরে। ঐহাক্না মসিগীদমক্তা অদোম্বু থাগৎচরি।
ইচিল ইনাওশিং,
ঐহাক্না গোৱাগী মাই-পাকপশিং উবা মতমদা, অসিগুম্বা অনৌবা শক্তাক অসি মপাঙ্গল হেন্না লৈবা উবা ফংই। ঐহাক্না মরুপ মনোহর পরিকারবুসু নীংশিংলি। মহাক্না গোৱাবু চাউখৎপগী অনৌবা থাক্তা পুখৎলম্বতা নত্তনা, গোৱাগী তৌবা ঙম্বগী মতিকপুসু পাকথোক চাউথোকহল্লমখি। লৈবাক অসিনা মনোহর পরিকারদা গোৱাগী পুকচেল শেংবা, হৈ-শিংবা অমসুং নিংহন্নবা লৈতবগী মগুনগী মমি তাবা উবা ফংই। মহাক্কী অরোইবা মিৎকুপ ফাওবদা রাজ্যগীদমক্তা অমসুং মসিগী মীয়ামগীদমক্তা লেপ্তুনা করম্না লৈবা ঙম্লম্লিবনো খনবদা ঐহাক্না ঙকচৈ। ঐহাক্না ঙসিগী থৌরম অসিদা ঐহাক্কী নুংশিরবা মরুপ অমসুং গোৱাগী শক্নাইরবা মচা, মনোহরজীগী মফমদা ইকায় খুম্নবা উৎচরি।
মরুপশিং,
গোৱাগী চাউখৎপগীদমক্তা গোৱাগী তুরিজমগী চাউরবা মতিকপু খুমাং চাউশিলহন্নবগীদমক্তা পরিকরজীনা হৌদোক্লম্বা অদু ঙসিসু নীংথিনা অমসুং খোংজেল য়াঙনা পাংথোক্লি। কোরোনাগুম্বা শাথীরবা লাইচৎ অসিদগী গোৱানা মতৌ করম্না থোরক্লিবা মতৌসিদসু মহাক্কী থৌরাংগী মমি তাবা ফংলি। কেন্দ্র সরকারগী মাইকৈদগীসু তুরিজম চাউখৎহন্নবা খোংথাং কয়া অমা লেপ্তনা পায়খৎলি। ভিজাগী কাঙলোন শেমদোকপা, ই-ভিজাগী লৈবাক মশিং য়ামখৎহনবা, তুরিজম ইন্দস্ত্রীবু মাইকৈ খুদিংদগী শৌগৎলি। রাজ্যসিনা হন্দক্তা লোইশিনখিবা ইন্তর্নেস্নেল ফিল্ম ফেস্তিবেল ওফ ইন্দিয়াবু মাই পাক্না পাংথোকখিবনা তুরিজম্না কয়া য়াম্না চাউখৎলক্লি হায়বা তাক্লি।
মরুপশিং,
গোৱা সরকারনা অফবা লম্বী-শোরোক শারিবা, ইনফ্রাস্ত্রকচর অমসুং সর্ভিসশিংবু মপাঙ্গল লৈহল্লিবা অসিনা লমদমসিগী ল্মকোয়বশিংদসু য়াম্না কান্নবা পীরি অমসুং ঙসিদি, লৈবাক শিনবা থুংবগী হাইৱে, এক্সপেসৱে অমসুং হাইতেক ইনফ্রাস্ত্রকচর খুদিংবু মতমগা চুনহল্লিবা, রেলৱে শেমদোরক্লিবা, লৈবাক্কী শহর কয়াদা এয়রপোর্ত শারিবা অসিদগী মীয়াম্না চত্থোক-চৎশিন তৌবদসু লায়থোকহল্লে। মখোয়না গোৱা চৎকে খল্লকপা মতমদা, লম্বীগীদমক্তা খন্দুনা থৌরাং শিনবশিং তোকপগী থৌওং লৈত্রে। হায়রিবা থবকশিং অসিবু হেন্না খুমাং চাউশিলহন্নবগীদমক্তা, পি.এম. গতিশক্তি নেস্নেল মাস্তর প্লান্দা থবক পায়খৎপা হৌখ্রে। লাক্কদৌরিবা মতমশিংদা, হায়রিবা মিসন অসিনা লৈবাক্কী ইনফ্রা অমসুং তুরিজমদা অনৌবা য়ুগ অমা হৌদোক্লগনি।
মরুপশিং,
গোৱাদা সমুদ্র অমা লৈরিবা অসিগুম্না গোৱাগী মীয়ামগী ৱাখল অমসুং মঙলান্সু সমুদ্রগুম্না পাক-চাওই। মঙলানশিং অসিবু মঙাফাওনহন্নবগীদমক্তা ৱাখল চাউথোকপগী তঙাই ফদবসু লৈ। প্রমোদ সাৱন্তজীনা অসিগুম্বা ৱাখল্লোনগা লোয়ননা থবক পায়খৎলি হায়বা ঐহাক্না খঙই। ঙসিদি, গোৱাগী স্কুলশিংদা তুংগীদমক্তা শেম-শাবা এজুকেসনগীদমক্তা কোদিং অমসুং রোবোতিক্সপু পুক্নিং থৌগৎলি। তেক্নিকেল এজুকেসনবু সবসিদাইজ তৌরি। সরকারনা হাইয়র এজুকেসনগীদমক্তা ফীগী ৫০% তাহনবগী থৌওংসু পাংথোক্লি। ঙসি শঙ্গারিবা এভিএসন স্কিল দিভেলপমেন্ত সেন্তর অসিনা নহাশিংদা থবক্কী অনৌবা খুদোংচাবা কয়া পীগনি। মতৌ অসুম্না, লৈবাক্না ঙসি ‘আত্মানির্ভর ভারত অভিয়ান’গী ৱারেপ লৌদুনা ইশাগী পাঙ্গলনা লেপচবা ঙম্নবা হোৎনরিবা অসিদা ‘স্বয়ম্পুর্না গোৱা’ মিসন অসিনা লৈবাক্কী মপাঙ্গল হাপ্লি। ঐহাক্না মিসন অসিগী ‘স্বয়ম্পুর্না মিত্র’শিংগা ৱারী শাবগী তাঞ্জাসু ফংজরে। অদোম খুদিংনা অমত্তা ওইদুনা গোৱাবু আত্মানির্ভর ওইহন্নবা মাং থানা চঙশিল্লিবা, সরকারনা য়ুম্থোং খুদিং চত্তুনা সেবা তৌরিবা, সরকারগী স্কিমশিংনা ওনলাইন ওইদুনা নাগ্রিকশিংবু তেংবাংলিবা, শেঞ্জা থুমজাগী মাইয়োক্তা গোৱানা থিংজিল্লক্লিবা অসিমক্নি ‘সবকা সাথ, সবকা বিকাস, সবকা বিশ্বাস অমসুং সবকা প্রয়াস’কী ৱারেপ্নি। গোৱানা ৱারেপ অসিবু মপুং ফারকপগী ফিভম উরি।
মরুপশিং,
ঙসি, লৈবাক্না নিংতম্বগী অমৃত মহোৎসব অসিদা লৈবাক্কী নিংতম্বগী চহি ১০০গীদমক্তা ৱারেপ লৌরি। অদুগা ঐহাক্না মতাং অসিদা হায়জনীংবদি, গোৱানা ইং-তম্বগী চহি ৭৫ ফারকপা মতমদা করম্বা থাক্তা পুরকসিগে হায়বগী অনৌবা ৱারেপ লৌনবা অমসুং পান্দম থম্নবা হায়জনীংই। ঐহাক্না হৌজিক উরিবা গোৱাগী চাউখৎ-থৌরাংগী থৌওংসি অসি লেপহল্লোইসি, মখা তানা চত্থসি। ঐখোয়না লেপ্পোইদবনি, খোঙজেল তপথরোইদবনি। মীয়াম্বু অমুক্কা হন্না থাগৎচরি। ভারত ইমানা য়াইফরে।
