ভগবান শ্রী নাথজীগী জয়!
রাজস্থানগী গোবর্নর, শ্রী কলরাজ মিশ্রা জী, মুখ্য মন্ত্রী ঐগী মরুপ, শ্রীমান অশোক গেহলোত জী, ৱিধান সভাগী স্পীকর, শ্রীমান সি.পী. জোশী জী, রাজ্য সরকারগী মন্ত্রী, শ্রী ভজন লাল জাদৱ জী, কিবিনেত্তা ঐহাক্কা থৌ পুমিন্নরিবা অমসুং রাজস্থান ভাজপাগী অধ্যক্স, শ্রী চন্দ্র প্রকাশ জোশী জী, কেবিনেত্তা ঐহাক্কা থৌ পুমিন্নরিবী, ইচন্নুপী দিয়াকুমারি জী, কেবিনেত্তা ঐহাক্কা থৌ পুমিন্নরিবা শ্রীমান কনকমল কতারা জী, শ্রী অর্জুন লাল মীনা জী, লোইননা থৌরম অসিদা শরুক য়ারিবা অতোপ্পা মীথুংলেনশিং অমসুং রাজস্থানগি ঐগী নুংশিজরবা ইচিল-ইনাওশিং, ইচে-ইচলশিং।
ভগবান শ্রি নাথজী অমসুং মেৱারগী অসিগুম্বা অথৌবশিংগী পোক্নফম লমদম অসিদা অমুক হন্না নকোয়গী মরক্তা তিন্ননবগী তাঞ্জা অমমুক পীনবীরে। মফম অসিদা লাক্ত্রিঙৈগী মাংওইননা ভগবান শ্রীনাথ জীবু খুরুমজবগী লাইবক ফবা অদু ফংজরে। ঐহাক্না শ্রীনাথ জীদা নিংখা তম্বগী অমৃত কাল অসিদা মপুং ফানা চাউখৎলবা ভারত অমা ওইহন্নবগী ফিরেপ অসিবু মপুং ফাবা ঙম্ননবা থৌজাল নিজখি।
মরুপশিং,
ঙসি রাজস্থানগী চাউখৎ-খোংথাংগা মরি লৈনবা করোর লিশিং ৫দগীসু হেনবা প্রোজেক্ত কয়া অমগী উরেপ-উয়ুং তমখ্রে অমসুং হৌদোকখ্রে। মসিগী প্রোজেক্তশিং অসিনা রাজস্থানগী কনেক্তিবিতীবু অনৌবা অৱাংবা থাক অমদা পুখৎলগনি। উদয়পুর অমসুং সাম্লাজীগি মরক্তা নেস্নেল হাইৱে ৮গী সিক্স লেন ওন্থোকপনা উদয়পুর, দুঙ্গরপুত অমসুং বান্সৱারাগী মফমশিংদা য়াম্না কান্নহল্লগনি। মসিনা সাম্লাজী অমসুং কায়াগী মরক্তা লৈরিবা অরাপ্পা অদু হন্থহল্লগনি। বিলারা অমসুং জোধপুর সেক্সন শেমগৎপনা জোধপুর অমসুং বোর্দর এরিয়াশিংদা য়ৌশিনবদা বাম্না খুদোংচা্ল্লগনি। মসিগী খ্বাইদগী কান্নবা অমনা জয়পুরদগী জোধপুরগী আরাপ্পা অদুসু পুং ৩ হন্থহল্লগনি। চারভুজা অমসুং মখাতাবা ওদনগী প্রোজেক্তনা ৱার্ল্দ হেরিতেজ সাইতশিং খুদম ওইনা কুম্বলগর, হল্দিঘাতি অমসুং শ্রীনাথজীবু খুরুম্বা চ৭পদা বাম্না কোমহল্লগনি। শ্রী নাথদ্বারারাদগী দেৱগর মদারিয়াগী রেলৱে লাইন, মেৱারদগী মারৱারবু শমজিন্নহল্লগনি। মসিনা মার্বল, গ্রেনাইত অমসুং মাইনিং ইন্দস্ত্রীশিংগী অমসুং লাল্লো-ইতিক তৌবশিংদা য়াম্না মতেং ওইগনি। ঐহাক্না রাজস্থানগী প্রজা খুদিংমক্তা মসিগি চাউখৎ-থৌরাংগী থবকশিং অসিগীদমক্তা নুংঙাইবা ফোংদোক্লি।
ইচে-ইচল, ইচিল-ইনাওশিং
ভারত সরকারনা, রাজ্য সরকারগী চাউখৎপনা লৈবাক অসিগী চাউখৎপনি হায়বা মন্ত্রদা থাজবা থম্লি। রাজস্থান লৈবাক অসিগী খ্বাইদগী চাউবা রাজ্যশিংগী মনুংদা অমনি। রাজস্থান ভারতকী থৌনা , ভারতকী হেরিতেজ অমসুং ভারতকী সংস্কৃতীগী কেরিয়রনি। রাজস্থান্না চাউখৎলিবমখৈ ভারতকী চাউখৎ-খোংধাংদা খোংজেল আপকদৌরিবনি। অমসুং মরম অদুনা ঐকোয়গী সরকার অসিনা রাজস্থানদা মতম অসিগী অনৌবা ইনফ্রাস্ত্রকচরদা খ্বাইদগী হেন্না মিৎয়েং চংলি। অমসুং ঐহাক্না মতম অসিগী অনৌবা ইনফ্রাস্ত্রকচর হায়বা মতমদা মসিদা ফোংদোক্লিবসি রেল অমসুং লম্বি খক্তা নত্তে। মতম অসিগী অনৌবা ইনফ্রাস্ত্রকচরনা সহরশিং অমসুং খুঙ্গংশিংদ আকনেক্তিবিতী হেনগৎহল্লি, অরাপ্পা হন্থহল্লি। মতম অসিগী অনৌবা ইনফ্রাস্ত্রকচরনা খুনাই অসিদা ফেসিলিতীশিং হেনগৎহল্লি, খুনাই অসিবু শমজিন্নহল্লি। মতম অসিগী অনৌবা ইনফ্রাস্ত্রকচরনা দিজিতেল ফেসিলিতীশিং হেনগৎহল্লি, মীয়ামগী পুন্সিবু কোমহল্লি। মতম অসিগী অনৌবা ইনফ্রাস্ত্রকচরনা এরিতেজপি য়োকখৎপদা নত্তনা চাউখৎ-খোংথাংদা কোংজেল য়াংখৎহল্লি। ঐখোয়না লাক্কদবা চহি ২৫ অসিগী মনুংদা চাউখৎলবা ভারত অমগী ফিরেপ লৌবগী মতাংদা পনবা মতমদা মপুং ওইনা মসিগী ইনফ্রাস্ত্রকচর অসিনা অনৌবা পাঙ্গল ওইনা ইনোৎ হাপ্লি। ঙসি লৈবাক অসিদা মখল-মখা কয়াগী ইনফ্রাস্ত্রকচরদা হায়নিংঙাই লৈতনা শেল থাধরি, হায়নিংঙাই লৈতনা খোংজেল য়াংনা থবক পাইখৎলি। রেলৱেবু ওইরো, হাইৱেবু ওইরো, এবরপোর্তপু ওইরো, হিরম খুদিংমক্তা ভারত সরকারনা করোর লিশিং কয়া অমা থাধরি। হন্দক্কী চহি অসিগী বজেত্তসু ভারত সরকারনা ইনফ্রাস্ত্রকচরদা লুপা করোর লাখ ১০ থাধনবা হায়দুনা লেপখ্রে।
মরুপশিং,
ইনফ্রাস্ত্রকচর অসুক বাম্না শেল থাধবা মতমদা, মসিগী হকথেংননা মফম অদুগী চাউখৎ-থৌরাংদা অহোংবা পুরকই, মফম অদুদা থবক ফংনবগী খুদোংচাবা পী। অনৌবা লম্বি-থোং শাবা মতমদা, অনৌবা রেল লাইনশিং শেম্বা মতমদা, খুঙ্গংশিংদা পি.এম. আৱাজ য়োজনাগী বুম করোর কয়া অমা শাবা মতমদা, তোইলেত করোর কয়া অমা শাবা মতমদা, খুঙ্গংদা কিলোমিতর করোর লাখ কয়া অমা ওপইতকেল ফাইবর তিংবা মতমদা, উমথোং খুদিং ঈশিং ফংহন্নবগীদমক্তা পাইপ ফুম্বা মতমদা মসিগী কান্নবা অসি অপিক-অপিকপা দুকান্দারশিংনা ফংঙি, অসিগুম্বা মখলগী পোৎলমশিং অসি সপ্লাই তৌবা, অপিকপা দুকান্দারশিংসু, মফম অদুগী শিন্মীশিংসু মসিদগী য়াম্না কান্নবা ফংই। ভারত সরকারগী অসিগুম্বা য়োজনাশিং অসিনা শেন্মিৎলোনদা অনৌবা খোংজেল অমা হাপ্পীরে।
অদুবু মরুপশিং, ঐখোয়গী লৈবাক অসিদা অসিগুম্বা মথোং হুক্তবা ৱাখল্লোনশিং অসিগী ভিক্তিম ওইখিবা লৈখ্রে। য়াম্না ফত্তবা ৱাখল্লোনতনা পিক থল্লে। লৈবাক অসিদা অফবা অমত্তা থোকপা মখোয়না পামদে। অমসুং মখোয়না চয়েৎনবা মরি-মরাংবা ৱাফম খক্তমক থোকপা পাম্লি। হৌজিক্তি নখোয়নসু খরা তারম্লগনি খুদম ওইনা মীওই খরা অমনা আতানা হানব্রা নত্রগা দেতানা হানব্রা, লম্বি-থোংনা হানব্রা নত্রগা সেতলাইৎনা হানব্রা হায়বা ৱাফম অসি শন্দোক্লি। অদুবু পুৱারিনা শখি ওইরি মদুদি তুংকোইনা চৎকদবা চাউখৎ-থৌরাং , খোংজেল য়াংনা চাউখৎনবা তঙাইফদনা মথৌতাবশিং অদুগা লোইন-লোইননা মতম অসিগী অনৌবা ইনফ্রাস্ত্রকচর অসিসু শেমগৎপা হায়বসি বাম্নমক তাঙাইফদে। কোংথাং খুদিংগী ভোতকি কল্লগা থবক তৌবা তারবদি, মখোয়না কৈদৌনুংদা লৈবাক অসিগী তুংগীদমক্তা খল্লগা বোজনা অমত্তা শেম্লোই।
ঐখোয়না কয়ারক হন্না উরে মদুদি খুঙ্গংদা ঈশিংগী তেঙ্কী শাই অদুবু মদু চহি ৪-৫খক্তদা য়াম্না পিকপগুম্না তৌরকই। অসিগুম্বা লম্বি-থোং, ফ্লাইওভর কয়া চহি ৪-৫গী মনুংদা হেক্তা কোন্নরক্তে। ঐখোয়গী লৈবাক অসিদা অসিগুম্বা ৱাখল্লোন অসিগী মরম্না ইনফ্রাস্ত্রকচরবু মরু ওইনা লৌদে। মসিনা মরম ওইরগা লৈবাক অসিদা য়াম্না মাংহল্লি। করিগুম্বা মাংজৌননা মেদিকেল কোলেজশিং মতিক চানা শারম্বা তারবদি লৈবাক অসিদা দোক্তরশিংগী অৱাৎপা অসুম্না লেরম্লোইদবনি। করিগুম্বা মাংজৌননা রেলৱে লাইনশিং মৈ শম্লম্বা তারবদি ঙসি লুপা করোর কবা চংনা থবক তৌহল্লিবা অসি মথৌ তারম্লোই। করিগুম্বা হান্নদগী হৌনা য়ুমথোং খুদিংগী তোতিদগী ঈশিং ফংলম্লবদি, ঙসি লুপা করোর লাখ অহুম মখাই থাধদুনা জল জীৱন মিসন অসি হৌদোকপগী মথৌ তারম্লোই। ফত্তবা ৱাখল্লোনদনা থল্লবা মীওইশিংদা মিৎয়েং শান্না উবা ঙমদে অমসুং রাজনিতিগী ওইবা অপিকপা ৱাখল্লোনগী ৱাংমদা করিগুম্বা অমত্তা খনবা ঙমদে।
নখোয়না খন্দুনা য়েংঙু, করিগুম্বা নাথদ্বারাগী লাইফ-লাইননি হায়না হায়নরিবা নন্দসমন্দ দাম নত্রগা তান্তোল দাম অসি সারমদবা তারবদি করি ওইরমগনি? আমসুং ঐহাক্তি রাজস্থান অমসুং গুজরাতকী মীয়ামগী মচিনদা লাখা বঞ্জারাগী মতাংদা তত্তনা পল্লি ঐখোয়না লাখা বঞ্জারাগী মতাংদা খন্নৈ। ঈশিংগীদমক্তা লাখা বঞ্জারানা মহাক্কী পুন্সি কত্থোকখি। হায়রিবা ৱাফম অসি করিগুম্বা ঈশিংগীদমক্তা থবক অসুক য়াম্না তৌবা অমসুং অকোইবা মফম কয়া অমদা স্তেপৱেল কনানা শাখি হায়বা মতমদা লাখা বঞ্জারা হায়রকই, অসিগী মফম অসিদা কনানা পুখ্রি শেমখিবগে হায়বা মতমদসু লাখা বঞ্জারা হায়না অদুম হায়নৈ, মসি গুজরাত্তসু অদুমক হায়নৈ, রাজস্থানদসু অদুমক হায়নৈ। মসিনা হায়বদি মীপুম খুদিংমক্না খল্লি মদুদি করিগুম্বা ঈশিংগা মরি লৈনবা অৱাবা কোকহন্নবা থবক তৌবা তারবদি মদু লাখা বঞ্জারানা তৌরম্মি। অদুবু হৌজিক্তি হায়রিবা লাখা বঞ্জারা অসিনা মীখলদা মীরেপ ওইনা লেপ্পা তারবদি ৱাখল ফত্তনা খনবশিংনা মহাকপুসু মাইথিবা পীনবা লম্বা তৌরক্কনি। মসিগীদমক্তসু পোলিতিকেল পার্তীশিংনা পুনশিন্নরক্কনি।
মরুপশিং,
তুংগীদমক খল্লগা মিৎয়েং শান্না থমদুনা ইনফ্রাস্ত্রকচর শেমদবগী অমাংবা অদু রাজস্থান্নসু য়াম্না ময়োক্নখি। মসিগী লৈকংলা অসিদা কনেক্তিবিতী ফত্তবনা মরম ওইরগা চত্থোক-চৎশিন তৌবদা অৱাবা কয়া ময়োক্নখি, নখোয়না মসি য়াম্না হেন্না ফজনা খঙলিবনি। অমসুং মসিগী অৱাবা অসি চত্থোক-চৎশিন খক্তদা লোইবা নত্তে, মসিনা লৌউ-শিংউ, লাল্লোল-ইতিক খুদিংমক্তা য়াম্না অৱাবা পী। নখোয়না খন্দুনা য়েংউ, প্রধান মন্ত্রী গ্রামিন সরক য়োজনা চহি ২০০০দা অতল জীগী সরকারনা হৌদোকখি। মদুগী মতুংদা ২০১৪ ফাওবদা খুঙ্গংগী লম্বি চাউরাক্না কিলোমিতর লাখ ৩গা লিশিং ৮০ শেমখি। মসি ওইজরবসু লৈবাক অসিগী খুঙ্গং লাখ কয়া অমদা লম্বি-থোং য়ৌদদুনা লৈখি। ২০১৪দা ঐখোয়না খুঙ্গং খুদিংমক্তা কোইলা থাবা লম্বি শোইদনা য়ৌহনগনি হায়না অচেৎপা ফিরেপ অমা লৌখি। হৌখিবা চহি ৯দা ঐখোয়না খুঙ্গংশিংদা অনৌবা লম্বি চাউরাক্না কিলোমিতর লাখ ৩ মখাই শেমখি। মসিদা কিলোমিতর লিশিং ৭০দি কোইলা থাবা লম্বিশিংগা শম্নখ্রে। নখোয়না খন্দুনা য়েংউ, করিগুম্বা অসিগী থবক অসি হান্না তৌরম্বা তারবদি খুঙ্গংশিং তাউনশিংদা লৈবা ঐখোয়গী ইচিল-ইনাওশিংগীদমক্তা কয়াদা য়াম্না কোম্লগদবা।
মরুপশিং,
ভারত সরকারনা ঙসি খুঙ্গং ফাওবা লম্বি য়ৌহনবগা লোইননা সহরশিংদা মতম অসিগী অনৌবা হাইৱেগা শম্নহন্নবা কন্না হোৎনরি। ২০১৪গী মমাংদা লৈবাক অসি নেস্নেল হাইৱে শেমলম্বগী খোংজেল অদুগী শরুক অনি হেন্না য়াংনা, দবল স্পীদতা থবক তৌরক্লি। মসিগী কান্নবদুসু রাজস্থানগী জিলা কয়া অমদা ফংখ্রে। মতম খরগী মমাংদতা ঐহাক্না দৌশাদা দিল্লী-মুম্বাই এক্সপ্রেসৱেগী য়াম্না মরু ওইবা সেক্সন অমা মীয়ামদা খুদোল তমখি।
ইচে-ইচলশিং অমসুং ইচিল-ইনাওশিং,
ঙসি ভারতকী খুনাই অসি য়াম্না পুক্নিং থৌগৎনিংঙাই ওইবা, এস্পিরেস্নেল সোসাইতী অমা ওইরে। ঙসি ২১শুবা সতাবদিগী দিকেদ অসিদা মীশিংনা, অতেনবা মতমদা য়াম্না থাপ্না য়ৌবা পাম্লে, ফেসিলিতী য়াম্না ফংবা পাম্লে। সরকারদা লৈবা মরম্না, ভারতকী মীয়ামগী থাজবা অসিবু, রাজস্থানগী মীয়ামগী থাজবা অসিবু ঐখোয় ময়াম পুন্না মপুং ফাহনবা হায়বসি ঐখোয় পুম্নমক্কী থৌদাংনি। ঐখোয় পুম্নমক্না খঙই মদুদি লম্বি-থোংগা লোইননা, মফম অমদা চত্থোক-চৎশিন তৌনবগীদমক্তা রেলৱে অসি য়াম্না মরু ওই। মরম অদুনা ভারত সরকারনা দিকেদ কয়া লিরবা রেল নেতৱার্ক্তা অহোংবা অমা পুরক্লি, মতম অসিগা চুনবা অনৌবা মওংদা ওন্থোরক্লি। মতম অসিগী ওইবা অনৌবা ত্রেনশিংবু ওইরো, মতম অসিগী ওইবা অনৌবা রেলৱে স্তেশনবু ওইরো, মতম অসিগী ওইবা অণৌবা রেলৱে ত্রেকশিংবু ওইরো, ঐখোয়না থাক খুদিংমক্তা অমুক্তদা মাইকৈ খুদিংমক্তা থবক তৌরি। ঙসি রাজস্থানসু মখোয়গী অহানবা ৱন্দে ভারত এক্সপ্রেস ফংখ্রে। মফম অসিদা মাওলি-মারৱার গেজতা অহোংবা পুরক্নবগী দাবীদুসু মতম কয়াদগী তৌরক্লি। হৌজিক্তি মদু নিংবা থুংলে। অসুম্না এহ্মদাবাদ-উদয়পুরগী মরক্তা রুত পুম্বা ব্রোদগেজতা ওইনা ওন্থোক্নবগী থবকসু খরগী মমাংদা লোইশিনখ্রে। মসিগী অনৌবা রুত অসিদা চেল্লিবা ত্রেন অদুগী কান্নবা অদু উদয়পুর অমসুং অকোইবদা লৈরিবা মীশিংনা ফংলি।
মরুপশিং,
রেল নেতৱার্ক পুম্বা য়েংশিনদবা ক্রোসিং লৈহন্দ্রবা মতুংদা, হৌজিক ঐখোয়না নেতৱার্ক পুম্বা মৈ ফংহন্নবা খন্না হোৎনরি। ঐখোয়না উদয়পুর রেলৱে স্তেশনগুম্না লৈবাক অসিগী রেলৱে স্তেশন কয়া অমবু মতম অসিগা চুনবা অনৌবা মওংদা পুম্নমক অনৌবা অনৌবা ওন্থোক্লগনি, মখোবগী কেপাসিতী হেনগৎহল্লগনি। অমসুং মসিগা লোইননা এখোয়না মালগারিশিংগীদমক্তা অখন্নবা ত্রেক, দেদিকেতেদ ফ্রেত কোরিদোর শেম্লি।
মরুপশিং,
হৌখিবা চহি ৯দা রাজস্থানগী রেল বজেতসু ২০১৪গা চাংদম্নবদা শরুক ১৪ হেন্না হেনগৎখ্রে। হৌখিবা চহি ৯দা রাজস্থানগী চাউরাক্না চাদা ৭৫ রেল নেতৱার্ক মৈগী ওইহনখ্রে। মফম অসিদা গেজ ওন্থোকপা অমসুং দব্লিং তৌবগী কান্নবা অসি খুদম ওইনা দুঙ্গারপুর, উদয়পুর, চিত্তোর, পালি, সিরোই অমসুং রাজসমন্দগুম্বা জিলাশিং অসিদা ফংখ্রে। রাজস্থানসু রেল লাইনশিংদা চাদা চামা মৈগী ওইবা রাজ্যশিংগী মনুং চনবা হায়বসি কুইররোই।
ইচে-ইচলশিং অমসুং ইচিল-ইনাওশিং,
রাজস্থানগী ফগৎলক্লিবা কনেক্তিবিতী অসিনা মফম অসিগী তুরিজমগী, ঐখোয়গী পিলগ্রিমেজ সাইতশিংদা য়াম্না কান্নবা পীরগনি। মেৱারগী লমদম অসি হল্দিঘাতিগী লমদম্নি। লৈবাক অসিবু কন্নবা রানা প্রতাপকী থৌনা, ভামাশাহগী খোংফম হোংদবা অচেৎপা ফিরেপ অমসুং ৱীর পন্নাধায়গী কত্থোকপগী ৱারিশিং অদু লৈবাক অসিগী লৈহাও খুদিংমক্তা চুশিন্দুনা লৈহৌররে। ঙরাং খক্তদা লৈবাক অসিনা মহারানা প্রতাপ জীগী জয়েন্তিদা ইকাইখুম্নবা পীবগা লোইননা হৈকৎ-লৈকৎ তমখি। ঐখোয়গী হেরিতেজকী ফজবা অসিবু মালেম অসিগী মফম খুদিংমক্তা য়ৌহনবা হায়বসি য়াম্না তঙাইফদে। মরম অদুনা ঙসি ভারত সরকার অসিনা ঐখোয়গী হেরিতেজ চাউখৎহন্নবগীদমক্তা তোঙান-তোঙানবা সর্কুইৎশিংদা থবক তৌরি। কৃষ্ণা সর্কুইৎকী খুত্থাংদা ভগবান শ্রী কৃষ্ণগা মরি লৈনবা লাইফমশিংবু মহাক্কা মরি লৈনবা থাজনবীগী মফমশিংগা শম্নহল্লি। রাজস্থানদসু গোৱিন্দ দেব জী, খাদু শ্যাম জী অমসুং শ্রীনাথ জীবু খুরুম্বা লাকপদা হেন্না লাইহন্নবগীদমক্তা কৃষ্ণা সর্কুইৎপু চাউখৎহল্লক্লি।
ইচে-ইচলশিং অমসুং ইচিল-ইনাওশিং
ভারত সরকারনা সেবা তৌববু লাইনিং অমগুম্না লৌদুনা অয়ুক-নুংথিল খাক্তনা থবক তৌরি। প্রজা মীয়ামগী পুন্সি মহিংবু কোম্না হিংহনবা হায়বসি ঐখোয়গী সরকারগী গোবর্নেন্সকী খ্বাইদগী হেন্না মরু ওইনা লৌই। নাগরিক খুদিংমক্কী পুন্সিদা হরাও-তয়াম্বা, ফেসিলিতীশিং অমসুং সেক্যুরিতীবু করম্না চাউথোকহনগনি হায়না লেপ্তনা থবক তৌরি। শ্রীনাথ জীগী থৌজালনা ঐখোয় খুদিংমক্তা মতম পুম্বদা থৌজানবীবা ওইসনু, মসিগী থৌনিজবা অসিগা লোইননা নখোয় পুম্নমকপু চাউখৎ-থৌরাংগী থবক-থৌরমশিংগীদমক্তা অমুক্কসু হন্না নুংঙাইবা ফোংদোক্লি। হন্না-হন্না থাগৎচরি।
ভারত মাতাকী জয়।
ভারত মাতাকী জয়।
ভারত মাতাকী জয়।
থাগৎচরি!
