বনাক্কম!
ইনিয়া পোঙ্গল নলবালতুক্কাল! নুংঙাইরবা পোঙ্গল থৌরমদা য়াইফ পাউজেল পীজরি!
ঙসিদি, পোঙ্গল মালেমগী কুহ্মৈ অমা ওইরে। তামিলমচাশিংনা কুহ্মৈ অসি হরাওনা শরুক য়ারি অমসুং মসিদা মালেম শীনবা থুংবদা লৈরিবা শরুক য়াদুনা তামিলমচাশিং অমসুং তামিল চৎনবী পামজবশিংনা মসি হরাওনা থৌরম পাংথোক্লি অমসুং মখোয়গী মনুংদা ঐসু অমনি। অদোমগা লোয়ননা অখন্নবা কুহ্মৈ অসি শরুক য়াবা ফংবা অসি ঐগী লাইবক ফবনি। তামিলগী পুন্সিদা পোঙ্গল নুংঙাইরবা থৌরম অমনি, মহৌশা, ইমুং অমসুং খুন্নাইদা নুংঙাইনা হিংনবা ঐখোয় লমজিংলিবা লৌমীশিং, পৃথিবী অমসুং নুমিৎনা লৌখিবা থৌদাংশিং তৌবীমল খঙবা উৎলি। নুমিৎ অসি লৈবাক অসিগী মফম কয়াদা লোহরি, মকর সংক্রান্তি, মাঘ বিহু অমসুং অতোপ্পা কুহ্মৈশিং ওইনা থৌরম পাংথোক্নরি। পোঙ্গল থৌরম অসিদা ভারত অমসুং মপান লৈবাকশিংদা লৈরিবা তামিল ইনাওশিং অমসুং ইচলশিংদা ঐনা য়াইফ পাউজেল পীজরি।
মরুপশিং,
হৌখিবা চহিদা তামিল চৎনবীগা মরী লৈনবা থৌরম কয়া ঐ শরুক য়াবা ফংখিবা অসি ঐহাক হরাওনবগী মচাক অমা ওইখি। তামিল নাদুদা লৈবা চহি লিশিং অমা শুরবা গঙ্গাইকোন্দা চোলাপুরম লাইশঙদা ঐ লাই খুরুমখ্রে। বারানসীদা পাংথোকপা কাসি তামিল শঙ্গমমদা নাৎকী অপুনবগী থৌনা অদু ঐনা ফাওখি অমসুং লেপ্তনা শম্নখি। পাম্বাম থোঙ শঙ্গানবা ঐনা রামেশ্বরমদা চৎপা মতমদা, ঐনা অমুক হন্না তামিল পুৱারিগী মতিক ময়াই উবা ফংখি। তামিলগী নাৎ অমসুং চৎনবী অসি লৈবাক শীনবা থুংনা শরুক য়ারিবা হেরিতেচ অমনি অমসুং তশেংনা মসি মীওই খুন্নাই অপুনবগীনি। মহাক্না য়াম্না তোইনা পল্লিবা এক ভারত শ্রেস্থ ভারতকী ৱাখল্লোন অসি পোঙ্গলগুম্বা কুহ্মৈশিংনা মখা তানা মপাঙ্গল কনখৎহল্লে।
মরুপশিং,
মালেমগী সভ্যতা খুদিংমক্না মহৈ-মরোংশিংগা মরী লৈনবা কুহ্মৈ খর পাংথোক্লি। তামিলগী চৎনবীদা, লৌমীশিং পুন্সিগী হৌরকফমনি হায়না লৌনরি। তিরুক্কুরালদা লৌউ-শিংউ অমসুং লৌমীশিংগী মতাংদা মরিক চুম্না ইরি। লৈবাক অসি শেমগৎপদা লৌমীশিং মরুওইবা মরুপশিংনি অমসুং মখোয়গী থবকশিংনা অত্মনির্ভর ভারত অভিয়ানদা মপাঙ্গল হাপ্লে। লৌমীশিংগী ফিবম ফগৎনবা কেন্দ্র সরকারনা মখা তানা থবক কয়া পায়খৎলি।
মরুপশিং,
মহৌশাদা তৌবীমল খঙবা উৎপা অসি ৱাহৈ খক্তনা লোইবা নত্তে, মসি ঐখোয়গী পুন্সি মহিংগী শরুক অমা ওইনবা পোঙ্গল কুহ্মৈনা ঐখোয়দা ইথিল পীরে। পৃথিবীনা ঐখোয়দা অসুক্কী মতিক য়াম্না পীরি, মসি ঙাক-শেনবা হায়বসি ঐখোয়গী দাইত্বনি। লৈবাক-লৈহাও ফনা থম্বা, ঈশিং য়োকশিনবা অমসুং মহৌশাগী লনশিং ফজনা শীজিন্নবা অসি তুংগী মীরোলগীদমক তঙাইফদবনি। মিসন লাইফ, এক পের মা কে নাম অমসুং অমৃত সরোভরগুম্বা মিসনশিংনা মসিগী ৱাখল্লোন অসি খুমাঙচাউশিনহল্লে। লৌউ-শিংউগী থবক তুংকোইনা চৎনবা য়ানবা অমসুং মহৌশাগী অকোয়বগী ফিবম শোকহন্দনবা সরকারনা লেপ্তনা থবক পায়খৎলি। লাক্লিবা মতমশিংদা, তুংকোইনা চৎনবা য়াবা লৌউ-শিংউগী থবকশিং, ঈশিং ফজনা শীজিন্নবা- ঐনা য়াম্না তোইনা হায়রিবা ‘পর দ্রোপ, পর ক্রোপ’- মহৌশাগী লৌউ কাংলোন, এগ্রিতেক অমসুং ভেল এদিসন্না মরুওইবা থৌদাং অমা লৌগনি। হায়রিবা হিরমশিং অসিদা অনৌবা ৱাখলশিংগা লোয়নান নহারোলশিং মাঙলোমদা চঙশিল্লি। থা খরগী মমাঙদা মহৌশাগী ওইবা লৌউ শিংউগী মতাংদা তামিল নাদুদা পাংথোকপা মীফম অমা ঐনা শরুক য়াবদা, লৌবুক্ত থবক শুনবগীদমক অফবা শীনফম কয়া থাদোক্লম্বা তামিল নহারোলগী অফবা থবক কয়া উবা ফংখি। তুংকোইনা চৎনবা য়ারবা লৌউ-শিংউগী থবক্ত অওনবা অমা পুরক্নবা খোঙচৎ অসি পাকথোক-চাউথোক্নবা তামিল নহারোলশিং লৌউ-শিংউগী থবক শরুক য়াগদবনি হায়না ঐনা তকশিল্লি। ঐখোয়গী পুখম পীক থনহলবা, ঐখোয়গী ফুরিৎখাউ থন্না লৈহনবা অমসুং ঐখোয়গী মালেম অশোই-অঙাম থোকহন্দবা অসি ঐখোয়গী পান্দম ওইগদবনি।
মরুপশিং,
তামিলগী নাৎ অসি মালেমদা খ্বাইদগী লিরবা সভ্যতা অমনি। তামিল নাৎনা চহিচা কয়া শম্নহল্লি, পুৱারিদগী তম্লি অমসুং তুংগীদমক হৌজিক্কী মীরোল লমজিংলি। মসিনা ইথিল পীদুনা, ঙসিগী ভারতনা লৈবাক অসিগী হৌরকফমদগী মপাঙ্গল ফংলি অমসুং অনৌবা থাজবশিংগা লোয়ননা মাঙলোমদা চঙশিল্লি। ভারত অসি মসিগী নাঃকা শম্নবা, মসিগী লম ইকায়খুম্নবা অমসুং লৈবাক অসিগী তুংগীদমক থাজবনা থল্লবা মাঙলোমদা চঙশিল্লিবা ভারত শেংলবা পোঙ্গল থৌরমদা ঐখোয়না উবা ফংলে।
ইনিয়া পোঙ্গল নালবাজতুক্কাল? বালগা তামিল, বালগা ভারতম! অমুক হন্না, পোঙ্গল থৌরমদা ঐনা অদোমগী মফমদা ঐগী য়াইফ পাউজেল পীজরি। অদোম থাগৎচরি।
বনাক্কম!
