ভারত মাতা কি জয়, ভারত মাতা কি জয়, ভারত মাতা কি জয়, হর হর মাহাদেব! মাতা অন্নপুর্ন কি জয়! গঙ্গা মমায়া কি জয়! উত্তর প্রদেশকী রাজ্যপাল, অনন্দিবেন পতেল, মুখ্য মন্ত্রী শ্রী য়োগী অদিত্যনাথ জি, কেন্দ্রগী মন্ত্রী মন্দল পুমিন্নরিবা ঐহাক্কী মরুপশিং, য়ু. পি. সরকারগী মন্ত্রী খুদিংমক, এম.পি.শিং অমসুং এম.এল.এ.শিং স্কিম কয়ামরুমগী বেনিফিসরীশিং অমসুং ঐহাক্কী নুংশিজরবা কাশিগী ইচিল ইনাওশিং।
সাৱনগী থা হৌরকপা অসিগা লোয়ননা ….. বাবা বিশ্বানাথ অমসুং ইমা গঙ্গা অমসুং বনারসকী মীয়ামগী থৌজালদগী পুন্সি অসি থৌজাল ফংবা ওইজরে। কাশিদা মীয়াম অসি হৌজিক মতম অসিদা য়াম্না থবক চিল্লে হায়বসি ঐহাক্না খংজরে অমসুং কাশিদা মী চিনবগী চাং অসি নোংম-নোংমগী অসুম হেনগৎলক্লি। লৈবাক পুম্বা অমসুং মালেমদগী শিবগী তুং ইনবা লিশিং কয়ামরুম্না বাবাদা ইশিং হৈথনবা মফম অসিদা নুমিৎ খুদিংগী থুংলরে অমসুং হন্দক্তি সাৱনগী মতম অসিসু হান্নদগী শাংলে। মসিগা লোয়ননা বাবাগী ‘দর্শন’ পাংথোক্নবা লাইনীংবা মশিং থীঙমদনা লাক্লগনি হায়বসি খংলে। মসিগী লোয়ননা করিগুম্বা অমদি শোইদ্রে। হৌজিক বনারসতা লাকপা মীওই খুদিংমক হরাউ তয়াম্না হল্লগনি। মীওই কয়ামরুম লাক্লিবা অমসুং মসি পুম্নমক অসি বনারসতা করম্না শিল্ল লাংগনি হায়বা অসিগী মতাংদা ঐহাক্না নুংনাংবা পোক্তে। কাশি মীয়াম্না তম্বীরে মদুদি; ঐহাক্না মখোয়দা করিগুম্বা অমত্তাআ তম্বীবা ঙমদে। জি-২০ সম্মিৎকী মনুংদা মালেম পুম্বদগী মীওই কয়ামরুম বনারাসতা লাকখি। কাশিগী মীয়াম্না মখোয়বু হরাউ তয়াম্না ওকখিবা অমসুং নীংথিনা শিল-লাংখিবা অদুগীদমক ঙসিদি নখোয় অমসুং কাশি অসি মালেম পুম্বদা থাগৎনরি। মরম অসিনা ঐহাক্না কাশি মীয়াম্না খুদিংমক শি-লাংগনি হায়বসি ঐহাক্না খংই। নখোয়না কাশি বিশ্বানাথ ধাম অমসুং মসিগী অকোইবা অসি নীংথিনা শেমগৎলিবা অসিদা মসিদা লাক্লম্বা মীয়াম্না মথ্বাই পেন্না হনখি। বাবাগী থৌজালদগী মসিগী মংলান অসি মংফাওনহনবদা মতেং ওইখ্রে। মসি ঐখোয় পুম্নমক্কী লাইবক ফবনি।
ইচিল ইনাওশিং,
ঙসিদি কাশি য়াওনা উত্তর প্রদেশতা লুপা করোর ১২,০০০ রোমগী প্রোজেক্ত খুদোল তম্লবনি। মসি ঐখোয়না কাশিগী মফম অসিবু তেক্তা কাইদনা থমদুনা মপুং ফানা অওনবা পুরক্নবা লৌখিবা ৱারেপ অদুগী শরুক অমনি। মসিগী মনুংদা রেলৱেজ, লম্বী, ঈশিং, এজুকেসন অমসুং তুরিজমগী প্রোজেক্তশিংগা লোয়ননা ঘাতশিং (তুরেল তোরবানগী স্তেপশিং)গা মরী লৈনবা প্রোজেক্তশিং য়াওরি। মসিগী চাউখৎ থৌরাংশিং অসিগীদমক নখোয় পুম্নমক থাগৎপা ফোঙদোকচরি।
মরুপশিং,
মীকুপ খরাগী মমাংদা ঐহাক্না প্রাধান মন্ত্রী অৱাস য়োজনা অমসুং আয়ুশ্মান ভারত য়োজনাগী বেনেফিসিয়রিশিংগা ঐহাক্না ৱারী শান্নখি। মীয়াম্না মমাংগী সরকারশিংগী মায়োক্তা তৌরকপা খ্বাইদগী পেন্দবা ৱাকৎশিং অদুদি মখোয়না এয়র-কন্দিসন্দ রুমশিংদা ফমদুনা প্লানশিং শেম্বা অদুনি। মসিগী স্কিমশিং অসিগী গ্রাউন্দা লৈরিবা ফলশিং অদু মতম অদুগী সরকারনা খংলমদে। অদুম ওইনমক বি.জে.পি. সরকারনা অনৌবা চৎনবী অমা হৌদোক্তুনা বেনিফিসিয়রিশিংগা ৱারী শান্নবা, পাউ ফাওনবা অমসুং উনবা হোদোকখি। মসিনা তাকপদি হৌজিক্তি কান্নবা অসি হকথেংননা ফংলে অমসুং মদিগী ফীদবেক অদুসু হকথেংননা ফংলে হায়বনি। মসিগী খুদোংচাবা অসিদি সরকারগী দিপার্তেমেন্ত খুদিংমক অমসুং ওফিসর খুদিংমক্না মখোয়গী থৌদাং খংবা হৌরে হায়বনি। হৌজিক্তি স্ক্রুতনীদগী নান্থোক্তুনা চেনগদবা কনাসু লৈত্রে।
মরুপশিং,
হৌখিবা মতমদা করপ ওইবা অমসুং কান্নবা ফংহন্দবা সরকারশিং চলাইরম্বা পার্তীশিংনা বেনিফিসিয়রিশিংগী মমিং তাবদা অঙকপা ফাওখি। নীখা-তম্লবা মতুং চহি কয়ামরুম অসিগী মতুংদা তশেংবা বেনিফিসিয়রিশিংদা অচুম্বা মওংদা হৌজিক্তি তশেংনা কান্নবশিং ফংহল্লে। অমরোমদা মমাংদা দেমোক্রেসীগী মীংদা মীওই খরা খক্তগী অপাম্বশিং ফংহল্লম্মি অদুগা লাইরবশিংনা মীরাইবীরম্মি। বেনিফিসিয়রী ক্লাস অসি বি.জে.পি. সরকারগী ওইনা সোসিএল জস্তিস অমসুং অশেংবা সেক্যুলরিজমগী অশেংবা খুদম অমা ওইরে। স্কিম খুদিংমক্কী অশেংবা বেনিফিসিয়রিশিং খংদোক্নবা, মখোয়দা য়ৌহন্নবা অমসুং স্কিম খুদিংমক্কী কান্নবশিং ফংহন্নবা ঐখোয়না কন্না হোৎনরি। মসিগী খ্বাইদগী কান্নবা অসি করিনো হায়বা নহাক্না খংবরা? সরকার মশামক্না মীয়াম মনাক্তা লাক্লবদি করি ওইরকই হায়বসি খংবরা? কম্মিসন লৌরম্বা মীওইশিং অদুগী দুকানশিং অদু হৌজিক্তি থোং লোনখ্রে। মিদলমেনশিংগী দুকান অদু হৌজিক্তি থোং লনখ্রে। করপ্সনদা শরুক তম্লম্বা মীওইশিং অদুগী দুকানশিং অদু হৌজিক্তি থোং লোনখ্রে। অতোপ্পা লোন অমদা হৌজিক্তি হন্থনা য়েংবা অমসুং করপ্সন লৈত্রে।
মরুপশিং,
হৌখিবা চহি মাপন অসিদা ঐখোয়না ইমুং অমখক্কী নত্ত্রগা চারোল অমখক্কী স্কিমশিং শেমখিদে অদুবু ঐখোয়না তুংগী চারোলশিংগী খন্দুনা থবক তৌখি অমসুং মখোয়গী তুংগী প্রোস্পেক্তশিং ফগৎহনখি। খুদম ওইনা হায়রবদা লাইরবশিংগী হাউজিং স্কিম অমা লৈরে। হৌজিক ফাওবদা লৈবাক অসিদা য়ুমথোং করোর মরি হেনবনা প্রধান মন্ত্রী আৱাস য়োজনাগী মখাদা পক্কা য়ুম অমমম ফংখ্রে। ঙসি ফাওবদা উত্তর প্রদেশকী লাইরবা ইমুং লাখ ৪.৫ রোমদা পরমনেন্ত ওইবা য়ুমশিং খুৎশিন্নখ্রে। মসি সাৱনগী থা অসিদা প্রভু মহাদেবগী অচৌবা থৌজাল অমনি।
মরুপশিং,
মসিগী য়ুমশিং অসি লাইরবশিংদা পীবা মতমদা মখোয় অচৌবা অৱাবা অমা কোকহনখ্রে অমসুং মখোয়গী মরক্তা তংদু লৈতাবগী ৱাখল্লোন অমা ফংওরকখি। মসিগী য়ুমশিং অসি ফংখিবা মীওইশিং অদুদা চাউথোকচবা অমসুং থৌনাগী ৱাখল্লোন অমা ফাওরকখি। মসিগুম্বা য়ুম অমদা অঙাং অমনা চাউরকপা মতমদা মহাক্কী অপাম্বা অনিংবশিং অদুসু তোঙাল্লগনি। অদুগা ঐহাক্না নখোয়দা হন্না নিংশিল্লি মদুদি, প্রধান মন্ত্রী অৱাস য়োজনাগী মখাদা শারিব য়ুমশিং অসিগী মনুংদা অয়াম্বদি নুপীশিংদা রিজিস্তর তৌরি। ঙসিদি মসিগী য়ুমশিং অসিগী মমল অসি লুপা লাখ কয়া ওইরে। অহানবা ওইনা মখোয়গী মমিংদা লনথুম রেজিস্তর তৌবা ইচে-ইচল করোর কয়ামরুম লৈরে। মসিগী লাইরবা ইমুংশিং অসিদগী ইচেল ইচলশিং অসিনা মখোয়না ফংলিবা শেল-থুমগী সিক্যুরিতী অসিগী গরেন্তী নীংথিনা খংবা ঙম্মি।
মরুপশিং,
আয়ুশ্মান ভারত য়োজনা অসি লুপা লাখ ৫ ফাওবগী লেম্না লায়েংবা অসি খক্তনা লোইদ্রি। মসিগী কান্নবশিং অসি চারোল কয়াদা শন্দোক্লি। করিগুম্বা লাইরবা ইমুং অমদা তমথিবা অনাবা অমা থেংনবা মতমদা ইমুং অদুগী কনাগুম্বা অমগী মহৈ মশিং তম্বদা অকাইবা থোকহল্লি, চহি নৌরিঙৈদা থবক শুবা হৌবা তারম্মি অমসুং ইমুং অদুগী নুপী অদু শেল তান্নবা য়ুমদগী মপান থোকপা তারম্মি। তমথিরবা অনাবা অদুগী চৈথেং অসিনা মরম ওইদুনা ইমুং অদুগী মীওইশিং অদু লুহোংবা ঙমদবা ফাওবা য়াওই। মসিনা মরম ওইদুনা লায়রবা অদুদা ওপ্সন অনিখক লৈ। মখোয়গী নুংশিজরবা অনাবা অদু পুন্সি লোম্বা ঙাইবা নত্ত্রগা মখোয়গী মরল মথুম অদু কনাগুম্বা অমদা বন্ধোপ থম্বা হাববসিনি।
ইচিল-ইনাওশিং,
লৈবাক্কী রিসোর্সশিংদা শোত্থরবা অমসুং লায়রবশিংনা খ্বাইদগী চাউবা হকশিং লৈ। মমাংদা বেঙ্কশিংদা এক্সেস তৌবা হায়বা অসি ইনাক খুনবা মীওইশিং খক্তগী ওইরমখি। লায়রবগীদমক্তা ওইনদি মখোয়দা শেল লৈতবা তারবদি মখোয়না বেঙ্ক একাউন্ত অদুবু কৈদৌনগনি হায়না থাজনখি। মীওই খরনা খল্লি গরেন্তী অমত্তা লৈতনা মখোয়না করম্নবা বেঙ্ক লোন লৌগনি? বি.জে.পি. সরকারনা মসিগী ৱাখল্লোন অসিসু হৌখিবা চহি মাপন্দা অহোংবা পুরকখি। ঐখোয়না মীপুম খুদিংমক্কীদমক বেঙ্কশিংগী থোং হাংখি। ঐখোয়না জন ধন বেঙ্ক একাউন্ত করোর ৫০গী ময়াদা হাংখি। মুদ্রা য়োজনাগী মখাদা লুপা ৫০,০০০দগী লাখ ১০ ফাওবগী লোনশিং কোল্লাতরেল য়াওদনা ফংহনখি। উত্তর প্রদেশতসু বেনিফিসরী করোর কয়াদা মুদ্রা য়োজাগী কান্নবশিং ফংহন্দুনা মখোয়গী বিজিনেসশিং হৌহনখি। লায়রবা, দলিৎ, শোত্থরবা ফুরুপশিং, ত্রাইবেল ফুরুপশিং, মশিং য়ামজদবা ইমুংশিং অমসুং নুপী ওন্তপ্রিনোরশিংদা মসিনা অয়াম্বা কান্নবা ফংহনখি। মসি বি.জে.পি. সরকারনা গরেন্তী পীরিবা সোসিএল জস্তিস অদুনি।
মরুপশিং,
থেলা, স্তোলশিং অমসুং ফুৎপাথশিংদা অপীকপা বিজিনেসশিং তৌরিবা অয়াম্বা ঐখোয়গী ইচিল-ইনাওশিং অসি শোত্থরবা খুন্নাইগী মনুং চনবা ঙাক্তনি। অদুবু মমাংগী সরকারশিংনা মখোয়বু নাথৈদুনা থম্বীখি অমসুং মখোয়বু ইকাইবা পীবা অমসুং ওৎপী নৈবীবগী শরুক্তা ওইদুনা লাকখি। থেলা, স্তোলশিং অমসুং ফুৎপাথশিংদা অপীকপা বিজিনেসশিং তৌরিবশিংদা মীওই অমা হেক্তা চৈথাংবী। অদুবু মোদীদি লায়রবা মমাগী মচানুপা ওইবনা অসিগুম্বা ইকাইবা পীবীবা অসি খাংদুনা লৈবা ঙমলোই। মরম অসিনা ঐহাক্না স্ত্রীৎ ভেন্দরশিংগীদমক্তা পি.এম.-স্বানিধি স্কিম লোঞ্চ তৌখি। ঐখোয়না মখোয়দা ইকাই খুম্নবা পীবগা লোয়ননা বেঙ্কশিংদা পি.এম. –স্বানিধি স্কিমগী মখাদা মখোয়বু তেংবাং পীনবা হায়খি। হৌজিক ফাওবদা পি.এম.-স্বানিধি স্কিমগী মখাদা বেনিফিসরী লাখ ৩৫ হেনবদা শেলগী তেংবাং পীনবা অয়াবা পীখ্রে। বানারস মক্তদা বেনিফিসরী ১.২৫ হেনবদা ঙসি স্কিম অসিগী মখাদা লোনশিং পীথখ্রে। লোন অসিগা লোয়ননা মখোয়গী থবক্তা খুমাং চাউশিনবা ঙম্লগনি অমসুং মখোয়গী বিজিনেসশিং পাকথোক চাউথোকহনবা ঙম্লগনি। মখোয়দা কনাগুম্বা অমত্তনা হন্থনা য়েংবা অমসুং ইকাইবা পীবা ঙম্লরোই। লায়রশিংদা ইকাই খুম্নবা পীবা হায়বা অসি মোদীগী ফিরেপনি।
মরুপশিং,
দিকেদ কয়াদগী লৈবাক অসিবু লৈঙাক্তুনা লাকখিবা সরকারশিংনা মখোয়গী এদমিনিস্ত্রেসন অসিদা শেঞ্জা-থুমজানা থমহৎহনখি। অমসুং অসুম্না তৌবা মতমদা শেল য়াম্না এল্লোকেৎ তৌরবসু মসিগী অৱাৎপদি অদুমক লৈগনি। ২০১৪গী মমাংদগী মমাংগী সরকারশিংগী মখাদা শেঞ্জা-থুমজা অমসুং নেপোতিজমনা থনখি। বজেৎতা মসিগী মতাংদা লাকপা মতমদা দেফিসিৎ অমসুং অমাংবশিংগী মরমদা লৈথোকপা নত্তনা পাম্বৈ লৈখিদৈ। ঙসি, লায়রবগী য়াইফনবা নত্ত্রগা ইনফ্রাস্ত্রকচর চাউখৎহন্নবা ওইরবসু বজেৎকী অৱাৎপা লৈতে। তেক্সপেয়রশিং অমসুং সিস্তেম অসি চপ মান্নৈ। অদুবু সরকারদি হোংলে, ফিরেপ হোংলে অমসুং ফলশিং ময়েক শেংনা উবা ফংলে। মমাংদা পাউচেশিং অসিদা শেঞ্জা-থুমজা অমসুং স্কেমশীংগী রিপোর্তশিংনা থল্লমখি। হৌজিক হেদলাইনশিং অসি অনৌবা প্রোজেক্তশিং শঙ্গাবগী পাউনা থল্লে। ইন্দিয়ন রেলৱেজ অসি হৌখিবা চহি মাপন্দা পুরকখিবা অহোংবগী অচৌবা খুদম অমা ওইরি। ইস্তর্ন দেদিকেতেদ ফ্রৈৎ কোরিদোর, ফ্রৈৎ ত্রান্সপোর্তেসনগীদমক দেদিকেতেদ ত্রেকশিংগী থৌরাং অসি ২০০৬তা হৌদোকখি। অদুবু ২০১৪ ফাওবদা কিলোমিতর অমগী ত্রেক ফাওবা শেমলমখিদে। প্রোজেক্ত অসিগী অচৌবা শরুক অমা হৌখিবা চহি মাপন্দা লোইশিনখি। ত্রেকশিং অসিদা অফবা ত্রেনশিং চেলহল্লি। ঙসিসু দীন দয়াল উপাধ্যায় জঙ্কসনদগী ন্যু সন নাগর সেক্সন ফাওবা শঙ্গাখি। মসিনা অফবা ত্রেনশিংগী খোঙজেল হেনগৎহনবা খক্তা নত্তনা পুর্ভঞ্চল অমসুং নোংপোক ভারত্তা থবক্কী খুদোংচাবা কয়ামরুমসু পীরি।
মরুপশিং,
ফিরেপ অদু ময়েক শেংলবা মতমদা থবক করম্না তৌবগে হায়বগী ঐহাক্না অতোপ্পা খুদম অমগা পীজগে। লৈবাক অসিনা মতম চুপ্পদা হায়-স্পীদ ত্রেনগী অপাম্বা লৈদুনা লাকখি। অহানবা ওইনা রাজধানি এক্সপ্রেস অসি চহি ৫০গী মমাংদা হৌদোকখি, মসিদগী রাজধানি এক্সপ্রস চেনবা হৌখি। অদুম ওইনমক চহি কয়াগী মতুংদা ফাওবা রাজধানি এক্সপ্রেস অসি রুৎ ১৬ খক্তদা ওপরেস্নেল ওইহনখি। মতৌ অসুম্না চহি ৩০-৩৫গী মমাংদা শতাবদি এক্সপ্রেস লোঞ্চ তৌখি অদুব চহি কয়াগী মতুংদা ফাওবা মসি রুৎ ১৯ খক্তদা চেনবা ঙমখি। অসিগী মনুংদা ভন্দে ভারত এক্সপ্রেস য়াওরি অমসুং লৈবাক্কী অহানবা ভন্দে ভারত ফংজবদা বানারসনা চাউথোকচবা পোকই। ত্রেন অসি চহি মরিগী মনুংদা রুৎ ২৫দা ওপরেসন তৌবা হৌখ্রে। ঙসি অসিমক অনৌবা ভন্দে ভারত এক্সপ্রেস অনি গোরাখপুরদগী লমথাখি – অমনা গোরাখপুরদগী লখনৌ ফাওবা অমসুং অতোপ্পা অমনা অহমদাবাদতগী জোধপুর ফাওবনি। ভন্দে ভারত এক্সপ্রেস ত্রেন অসি লৈবাক্কী মিদল ক্লাসকী মীওইশিংনা য়াম্না পাম্নৈ অমসুং মসিগী দিমান্দশিং লৈবাক শিনবা থুংবদগী লাক্লি। লৈবাক্কী কাচিন-কোয়া খুদিংমক ভন্দে ভারতনা শম্নহনগদবা নুমিৎ অদু পংলাপ লাপত্রে।
ইচিল-ইনাওশিং,
হৌখিবা চহি মাপন অসিদা কাশিদা কন্নেক্তিবিতী হেনগৎহন্নবা শীংথানীংঙাই ওইনা থবক তৌখি। মফম অসিগী চাউখৎ থৌরাংগী প্রোজেক্তশিংনা অনৌবা থবক্কী খুদোংচাবা কয়ামরুম পীরি। খুদম ওইনা তুরিস্ত অমসুং লাইফমলেন চৎপা মীওই মিলিয়ন ৭০ হেনবনা মমাং চহিদা কাশিদা লাকখি। শুপ্নগী চহি অমগী মনুংদা কাশিদা লাকপা তুরিস্তশিংগী মশিং শরুক ১২ হেনগৎলকখি। তুরিস্তনা লাকপা শরুক ১২ হেনগৎলকপগা লোয়ননা মসিনা রিক্ষো থৌবা, দুকানদার অমসুং অপীকপা অচাপোৎ চাফম অমসুং হোতেলশিং চল্লাইরিবশিংনা দাইরেক্ত বেনিফিসরীশিং ওইরি। বানারসি সারী নত্ত্রগা বানারসি পানগী বিজিনেস তৌবদা য়াওবা ওইরসু ঐহাক্কী ইচিল-ইনাওশিংনা মসিদগী চাউনা কান্নবা ফংলি। তুরিজমদা হেনগৎলকপা অসিনা ঐখোয়গী হীরোইশিংদা চাউনা কান্নবা অমা ওইখি। গঙ্গা আর্তি তৌবগী নুমিদাংগী মতমদা হীশিং তোংনবা মীয়াম্না মশিং য়াম্না তিনখি। অসিগুম্বা মওংদা মখা তানা বানারসপু থৌজানবীয়ু।
মরুপশিং,
বাবা (ভগবান শিবা)গী থৌজালশিংগা লোয়ননা বারানসিগী লেপ্পা লৈতবা চাউখৎ খোঙথাংগী খোঙচৎ অসি মখা চত্থখিগনি। ঐহাক্না কাশি মীয়ামদা থমোয় শেংনা তৌবীমল খঙবা উৎচরি। হন্দক্তা কাশিদা ম্যুনিসিপাল মীখলশিং পাঙথোকখি। নখোয় পুম্নমক্না চাউখৎ থৌরাংগী খোঙচৎপু শৌগৎখি, চাউখৎ থৌরাংদা থাজবশিংবু মাইপাকপা ঙমহনখি, অমসুং নখোয়ন কাশিদা গুদ গভর্নান্স থম্নবা মাইকৈদা শরুক তমখি। পার্লিয়ামেন্তদা নখোয়গী মীহুৎ ওইনা ঐহাক্না নখোয়গী সপ্পোর্ত ফংবদা থমোয় শেংনা তৌবীমল খঙবা উৎচরি। অমুক হন্না ঐহাক্না চাউখৎ থৌরাংগী থবকশিংদা খুমাং চাউশিনবা ঙম্বদা থমোয় শেংনা থাগৎপা ফোঙদোকচরি অমসুং সাৱনগী শেংলবা থা অসিদা ঐহাক্না পুম্নমক্তা য়াইফ পাউজেল পীজরি। হর হর মহাদেব!
