ভারত ইমানা য়াইফরে, ভারত ইমানা য়াইফরে, ভারত ইমানা য়াইফরে। হর-হর মহাদেব!
শাংলবা মতমগী মতুংদা ময়াম পুম্নমক্কা হকথেংননা উনবগী খুদোংচাবা অমা ফংজরে! কাশীগী মীয়াম পুম্নমকপু খুরুমজরি। ঐহাক্না মীয়াম পুম্বগী অৱাবা কোকহনবিরিবা ভোলেনাথ, ইমা অন্নপর্নাগী খুয়া খাদাসু ইকোক নোন্না খুরুমজরি!
য়ু.পি.গী রাজ্যপাল শ্রীমতি আনন্দি পতেলজী, মাই পাক্লবা, থৌনা লৈবা অমসুং হোৎনবা কনবা য়ু.পি.গী মুখ্য মন্ত্রী শ্রী য়োগী আদিত্যানাথজী, য়ু.পি. সরকারগী মন্ত্রীশিং, লেজিস্লেচরশং অমসুং বনারসকী ঐহাক্কী ইচিল ইনাওশিং,
ঙসি ঐহাক্না কাশীগী চাউখৎ-থৌরাংগা মরী লৈনবা লুপা করোর ১৫০০ হেনবা প্রোজেক্তশিংগী উরেপ-উয়ুং তম্বা অমসুং শঙ্গাবগী খুদোংচাবা অমা ফংজরে। বনারসকী চাউখৎ-থৌরাংগীদমক তৌরিবা পুম্নমক অসি মহাদেবকী থৌজালশিং অমসুং বনারসকী মীয়াম্না হোৎঞ্জমল ঙাক্তনি। অৱাবা মতমশিংদসু কাশীনা লেপ্পা লৈখিদে অমসুং চোকথবা লৈখিদে।
ইচিল ইনাওশিং
হৌখিবা থা খরা অসি ঐখোয় পুম্নমক্কী ওইনা য়াম্না অৱাবা ওইখি। কোরোনা ভাইরসকী অহোংবা অমদি তমথিরবা শক্লোন অসিনা অপুনবা শক্তিগী লোইননা লান্দারকখি। অদুবু কাশী য়াওনা য়ু.পি.না অপুনবা পাঙ্গল-থৌনাগা লোইননা অসুক চাউখ্রবা খুদোংথিবা অসি মায়োক্নখি। লৈবাক অসিগী খ্বাইদগী চাউবা রাজ্য ওইরিবা, মালেমগী অচৌবা লৈবাক কয়াগী মীশিংদগী দর্জন কয়া হেল্লিবা য়ু.পি.না কোরোনাগী অনিশুবা ৱেব অসি লাকশিনখিবগী মওং, য়ু.পি.না অনিশুবা ৱেবতা কোরোনা লাইচৎ অসি শন্দোকপদগী ঙাকথোকখিবগী মওং অসি অমুক্তা উবা ফংখিদ্রি। য়ু.পি.গী মীয়াম্না ইন্সেফ্লাইতিসকুম্বা লাইনাশিং থেংনবা মতমদা মায়োক্নখিবা অৱানশিং অদুসু উখ্রে।
মমাংদা হেল্থ ফেসিলিতীশিংগী অৱাৎপা লৈবা অমসুং অখাং কনবগী শক্তিগী অৱাৎপা লৈখিবনা য়ু.পি.দা অপিকপা সহর ফাওবনা খুদোংচাদবা মায়োক্নখি। অমসুং মসি চহি ১০০দা মালেম পুম্বদা থোকপা খ্বাইদগী অচৌবা খুদোংথিবা অমনি, মসি খ্বাইদগী চাউবা লাইচৎনি। মরম অসিনা কোরোনা থেংননবা উত্তর প্রদেশনা হোৎনখিবা অদু শীংথানীংঙাই ওই। ঐহাক্না কাশীগী ঐহাক্কী মরূপশিংদা, মসিদা এদমিনিস্ত্রেসন্দা লৈরিবশিংদগী হৌরগা কোরোনা লান্মীশিং ওইরিবা অপুনবা তিমবু অখন্ননা তৌবিমল খংবা উৎচরি। নখোয়না অয়ুক নুমিদাং খাইদনা কাশীদা মোবিলাইজ তৌরিবা মওং অসি য়াম্না চাউবা শেবা অমনি।
অথেংবা অহিংদা ঐহাক্না মসিগী শিল-লাংলিবদা য়াওবা মীওইশিংদা কোল তৌবা মতমদা মখোয়না মথৌ পাঙথোক্তুনা লৈরম্বা অদু ঐহাক্না নীংশিংলি। মদু য়াম্না ৱাবা তানফমনি অদুবু নখোয়না হোৎনবদা হনবা লৈখিদে। নখোয় পুম্নমক্না অসুম্না হোৎনবনা ঙসি য়ু.পি.গী ফীভম অমুক হন্না ফগৎলক্লিবনি।
ঙসি য়ু.পি. অসি কোরোনা তেস্ত খ্বাইদগী ৱাংনা তৌবা রাজ্য ওইরি। ঙসি য়ু.পি. অসি লৈবাক পুম্বগী ওইনা বেক্সিনেসনগী মশিং খ্বাইদগী ৱাংবা রাজ্য ওইরি। মীপুম খুদিংমক্তা লেম্না বেক্সিন ফংহন্নবা বেক্সিন কেম্পেনগী খুত্থাংদা সরকারনা লায়রবা, মিদল ক্লাস, লৌমীশিং অমসুং নহারোলশিংদা লেম্না বেক্সিন ফংহল্লি।
ইচিল ইনাওশিং
য়ু.পি.দা লুনানবা অমসুং হকশেলগা মরী লৈননা শেমগৎলিবা ইনফ্রাস্ত্রকচর অসিনা তুংদসু কোরোনা লান্থেংনবদা য়াম্না মতেং ওইরগনি। ঙসি য়ু.পি.দা মেদিকেল ইনফ্রাস্ত্রকচরদা, খুঙ্গংগী হেল্থ সেন্তরশিং, মেদিকেল কোলেজশিং, এম্স ওইরবসু অমুক্তা উখিদ্রিবা মওংদা খুমাং চাউশিল্লকপা উবা ফংলি। চহি ৪গী মমাংদা য়ু.পি.দা মেদিকেল কোলেজ দর্জন অমা লৈরম্বা অদু হৌজিক্তি মদুগী মশিং শরুক ৪গী ময়াদা হেনগৎহনখ্রে। মেদিকেল কোলেজ কয়া শাবগী তোঙান তোঙানবা তাঙ্ককশিংদা লৈরি। হৌজিক্কী ওইনা য়ু.পি.দা ওক্সিজেন প্লান্ত ৫৫০ শেমগৎপগী থবক খোঙজেল য়াংনা চত্থরি। ঙসি বনারসমক্তদা ওক্সিজেন প্লান্ত ১৪সু শঙ্গাখ্রে। য়ু.পি. সরকারনা জিলা খুদিংমক্তা অঙাংশিংগী অখন্নবা ওক্সিজেন অমসুং আই.সি.য়ু. শেমগৎপগী পাইখৎলিবা খোঙথাং অসিসু শীংথানীংঙাই ওই। হন্দক্তা কেন্দ্র সরকারনা কোরোনাগা মরী লৈনবা অনৌবা হেল্থ ফেসিলিতী শানবা লুপা করোর ২৩,০০০গী অখন্নবা পেকেজ অমা লাউথোকখি। য়ু.পি.না মসিদগী কান্নবা কয়া অমা ফংলগনি।
মরূপশিং,
কাশী সহর অসি ঙসি পুর্ৱনচলগী য়াম্না চাউবা মেদিকেল হব অমা ওইরক্লি। কনাগুম্বনা দিল্লী অমসুং মুম্বাইদা লায়েংবা চৎপা মথৌ তারম্বা লাইনাশিং অদু ঙসিদি মদু লায়েংবগী খুদোংচাবা কাশীদা ফংলে। ঙসি মফম অসিদা মেদিকেল ইনফ্রাস্ত্রকচরদা লিঙ্ক খরা হাপচিল্লক্লে। ঙসি কাশীদা নুপী অমসুং অঙাংগী মেদিকেলগী লায়েংগা মরী লৈনবা অনৌবা হোস্পিতালশিং লৈরে। মসিগীদমক বি.ঐচ.য়ু.দা ফমুং ১০০ অমসুং দিস্ত্রিক্ত হোস্পিতালদা ফমুং ৫০গী কেপাসিতী হাপচিনখ্রে। প্রোজেক্ত অনিমক্কী উরেপ-উয়ুং তম্বগী খুদোংচাবা অমদি ঙসি মসিবু শঙ্গাবগী খুদোংচাবা ঐহাক্না ফংজরে। মতম খরগী মতুংদা বি.ঐচ.য়ু.দা শেম্লিবা অনৌবা ফেসিলিতী অসিদা ঐহাক্না লাক্কনি। ঙসি বি.ঐচ.য়ু.দা রিজনেল আই ইন্সতিত্যুত অমসু শঙ্গাখ্রে। ইন্সতিত্যুত অসিদা মীয়াম্না মীৎকা মরী লৈনবা লাইনাশিংগী মতমগা চুনরবা লায়েংসু ফংলগনি।
ইচিল ইনাওশিং,
হৌখিবা চহি তরেৎতা কাশীনা মশাগী অশেংবা মশক ঙাক্তুনা চাউখৎ-থৌরাংগী লম্বীদা খোঙজেল য়াংনা চংশিল্লি। মফম পুম্নমক্তা নেস্নেল হায়ৱে, ফ্লাইওভর নত্ত্রগা রেলৱেজ ওভরব্রিদজ ওইরবসু নত্ত্রগা ৱায়রশিং লৌথোক্নবা অরিবা কাশীদা অন্দরগ্রাউন্দ ৱায়রিংগী সিস্তেম ওইরবসু, থক্নবা ঈশিং অমসুং সিৱরগী সমস্যা কোকহন্নবা, তুরিজম হেনগৎহন্নবা ওইরবসু পুম্নমক অসিদা অমুক্তা ওইখিদ্রিবা মওংদা থবক পাইখৎখি। হৌজিক্কী ওইনা মফম অসিদা লুপা করোর ৮,০০০রোমী প্রোজেক্তশিংদা থবক চত্থরি। অনৌবা প্রোজেক্তশিং, অনৌবা ইন্সতিত্যুসনশিংনা কাশীগী চাউখৎ-থৌরাংগী ৱারীদা থৱায় হাপ্লি।
মরূপশিং,
কাশীগী, ইমা গঙ্গাগী লুনানবা অমসুং নীংথিজনা থম্বা অসিনা ঐখোয় পুম্নমক্কী অনীংবসু অমসুং মরু ওইবসু ওইরক্লি। মসিগীদমক লম্বী ওইরবসু, সীৱেজ ত্রীৎমেন্ত ওইরবসু, পার্কশিং অমসুং ঘাতশিং নীংথিজনা থম্বা ওইরবসু অসিগুম্বা মাইকৈ পুম্নমক্তা থবক পাইখৎলি। পঞ্চকোশী মার্গ পাকথোকপগী থবক লোইশিল্লকপগা লোইননা ভক্তাশিংদা খুদোংচাহল্লগনি অমসুং লম্বী অসিদা লৈরিবা খুঙ্গং কয়াগী পন্সি হেন্না নুংঙাইহল্লগনি। বারানসী-ঘজিপুর রুৎতা থোং চৎপা য়ারকপা অসিগা লোইননা বারানসীগী মীয়ামগী মথক্তা প্রয়াগরাজ, গাজীপুর, বলিয়া, গোরখপুর অমসুং বিহারদগী চত্থোক-চৎশিন তৌরিবা মীয়ামদা হেন্না নুংঙাইহল্লগনি। গৌদৌলিয়াগী মল্তিলেবেল তু হ্বিলর পার্কিং শাবা অসিনা বনারসকী মীয়াম্না মী চিনবা কয়াম হন্থহনগনি হায়বা হেন্না খঙলম্লগনি। মসিগা লোইননা লহরতারাদগী চৌকা ঘাত ফ্লাইওভরগী মখাদা পার্কিংদগী হৌরগা অতৈ পব্লিক ফেসিলিতীশিং শাবা অসি অথুবদা লোইশিল্লগনি। বনারসতা, য়ু.পি.দা ইচে-ইচল, ইমুং মনুং অমত্তনা অফবা ঈশিংগী মরমদা অৱাবা থেংনররোই মসিগীদমক ‘হর ঘর জল অভিয়ান’গী থবক খোঙজেল য়াংনা পাইখৎলি।
মরূপশিং,
হেন্না ফবা ফেসিলিতীশিং, হেন্না ফবা কন্নেক্তিবিতী, নীংথিজরবা লম্বীশিং অমসুং ঘাতশিং, মসি কাশীগী চহি কয়াগী অরিবা পুৱারীগী অনৌবা শক্লোনশিংনি। সহরগী মফম ৭০০ হেনবদা এদভান্স সর্ভিলেন্স কেমেরাশিং ইনস্তোল তৌবগী থবক খুমাং য়াংনা চংশিল্লি। সহরগী মফম পুম্নমক্তা হাপ্লিবা অচৌ-অচৌবা এল.ই.দি. স্ক্রীনশিং অমসুং ঘাতশিংদা হাপ্লিবা তেক্নোলোজীগী ইনফোর্মেসন বোর্দশিংনা কাশীদা লাক্কদবশিংদা চাউনা মতেং ওইরগনি। কাশীগী পুৱারী, আর্কিতেকচর, খুৎশা হৈবা, কলা অসিগুম্বা ই-পাউ অসি পুক্নিং চিংশিন্নীংঙাই ওইবা মওং অমদা ফংহনগদৌরিবা ফেসিলিতীশিং অসিনা ভক্তাশিংদা চাউনা কান্নবা পীরগনি। অচৌবা স্ক্রীনগী খুত্থাংদা গঙ্গাজীগী ঘাত্তা অমসুং কাশী বিশ্বনাথ মন্দিরদা তৌগদবা আর্তীগী ব্রোদকাস্ত সহর পুম্বদা শন্দোকপা ঙম্লগনি।
ইচিল ইনাওশিং,
ঙসিদগী মথৌ তৌবা হৌরিবা রো-রো সর্ভিস অমসুং ক্রুজ বোত অসিনা কাশীগী তুরিজম সেক্তর মখা তানা খুমাং চাউশিল্লহল্লগনি। মসিদা নত্তনা ইমা গঙ্গাদা সর্ভিস পীবগী থবক তৌরিবা ঐখোয়গী হীহোনবশিংদা হেন্না খুদোংচাবসু পীরগনি। সিজল বোতশিং অসি সি.এন.জি. ওন্থোক্লি। মসিনা মখোয়গী চাদিং হন্থহল্লগনি অমসুং অকোইবগী ফীভমদা কান্নবা পীগনি অমদি তুরিস্তশিংগী পুক্নিং চিংশিনগনি। মসিগী মতুংদা ঐহাক্না রুদ্রক্ষকী শক্লোন্দা কাশীগী মীয়ামদা ইন্তরনেস্নেল কনভেন্সন সেন্তর খুৎশিন্নবা চৎকনি। কাশীদগী মালেমগী থাক্কী সাহিত্যশিং, ঈশৈ-নোংমাং অমসুং কলাকারশিং অমসুং অতৈ কলাশিং অসি মালেমগী থাক য়াওহল্লি। অদুবু কলাশিং অসি উৎথোক্নবা কাশীদা মালেমগী থাক্কী ফেসিলিতী লৈতে। ঙসি কাশীগী কলাকারশিংনা মখোয়গী হৈশিংবা অমসুং কলা উৎথোকচনবা অনৌবা ফম্পাক অমা ফংগদৌরিবা অসিদা ঐহাক্না নুংঙাইবা পোকই।
মরূপশিং,
কাশীগী মমল য়াম্লবা অরিবা চৎনবী অসি গঙ্গাগা শাগোন্নৈ। অসোগুম্বা ফীভম অমদা কাশীব মতমগা চুনরবা লৌশিং অমসুং সাইন্সকী সেন্তর অমা ওইনা লেপ্পা লৈতনা শেমগৎপা হায়বা অসিসু তঙাই ফদে। য়োগীজীগী সরকার লাক্লবা মতুংদা মাইকৈ অসিদা হোৎনবা অসি হেন্না হেনগৎলকখি। ঙসি কাশীদা মোদেল স্কুলশিং, আই.তি.আই.শিং. পোলীতেক্নিকশিং অসিগুম্বা অনৌবা ইন্সতিত্যুসনশিং অমসুং অনৌবা ফেসিলিতীশিং লৈরে। ঙসি উরেপ উয়ুং তম্লিবা সিপেৎকী সেন্তর ফোর স্কিলিং এন্দ তেক্নিকেল সপ্পোর্ত অসিনা কাশীদা নত্তনা পুর্বনচলগী ইন্দস্ত্রিএল দিবেলপমেন্তদা ইনোৎ পীরগনি। অসিগুম্বা ইন্সতিত্যুসনশিংনা আত্মনির্ভর ভারত ওইহন্নবা কাশীগী স্কিল লৈবা নহাশিং ত্রেন তৌবগী থৌদাং হেন্না মপাঙ্গল হাপ্লগনি। ঐহাক্না বনারসকী নহাশিং, সিপেৎ সেন্তরগী মহৈরোইশিংবু অখন্ননা থাগৎপা ফোঙদোকচনীংই।
ইচিল ইনাওশিং,
ঙসি মালেমগী অচৌবা ইনভেস্তর কয়ানা মহায়গ্যগা মরী থম্লি। মসিদসু উত্তর প্রদেশনা লৈবাক্কী মাংজিল থারিবা ইনবেস্তমেন্ত দেস্তিনেসন অমা ওইরক্লি। চহি খরাগী মমাং ফাওবদা য়ু.পি.দা লালোন-ইতিক তৌবা অসি অৱাবা ওই হায়না লৌনরম্মি, ঙসিদি য়ু.পি. অসি মেক ইন ইন্দিয়াগী খ্বাইদগী পাম্নরবা মফম ওইরক্লে
মসিগী অচৌবা মরমদা য়ু.পি.গী য়োগীজীগী সরকারনা ইনফ্রাস্ত্রকচরদা মীৎয়েং থম্বা অসিনি। অমুক্তা ওইখিদ্রিবা মওংদা লম্বী, রেল অমসুং নোংথক্কী কন্নেক্তিবিতী ফগৎহল্লকপা অসিনা মফম অসিদা পুন্সিবু লাইথোকহনবতা নত্তনা লালোন ইতিক তৌবদা হেন্না খুদোংচাহল্লি। য়ু.পি.গী কাচিন কোয়া খুদিংমক্তা লম্বী থোং শেম্বগী থবক লোইননা এক্সপ্রেসৱে চাউথোকপা অমসুং মতমগা চুনবা লম্বী শেম্বগী থবক খোঙজেল য়াংনা চত্থরি। দিফেন্স কোরিদোর, পুর্বনচল এক্সপ্রেসৱে নত্ত্রগা বুন্দেলখান্দ এক্সপ্রেসৱে, গোরখপুর লিঙ্ক এক্সপ্রেসৱং নত্ত্রগা গঙ্গা এক্সপ্রেসৱে ওইরবসু মসিনা দিকেদ অসিদা উত্তর প্রদেশকী চাউখৎ-থৌরাংদা অনৌবা পন্দোম লোমহনবা ঙম্লগনি। মসিদা গারী চেনবতা নত্তনা মসিগী অকোইবদা অনৌবা ইন্দস্ত্রিএল ক্লসস্তরশিং শেমদুনা আত্মনির্ভর ভারত্তা পাঙ্গল হাপ্লগনি।
ইচিল ইনাওশিং,
আত্মনির্ভর ভারত্তা ঐখোয়গী লৌউ-শিংউগী ইনফ্রাস্ত্রকচর অমসুং এগ্রো-বেজ ইন্দস্ত্রীশিংনা অচৌবা থৌদাং অমা লৌরগনি। হন্দক্তা কেন্দ্র সরকারনা লৌউ-শিংউগী ইনফ্রাস্ত্রকচর ফগৎহন্নবা অচৌবা ৱারেপ অমা লৌখি। লৈবাক অসিদা মতমগা চুনবা লৌউ-শিংউগী ইনফ্রাস্ত্রকচরগীদমক্তা শেমখিবা লুপা করোর লাখ ১গী অখন্নবা ফন্দ অসিনা ঐখোয়গী লৌউ-শিংউগী কৈথেলশিংদসু হৌজিক্তি কান্নবা ফংহল্লগনি। মসি লৈবাক অসিগী লৌউ-শিংউগী কৈথেলশিংগী সিস্তেম অসিবু মতমগা চুনবা অমসুং খুদোংচাহন্নবা মাইকৈদা চংশিনবা অচৌবা খোঙথাং অমনি।
মরূপশিং,
লৌউ-শিংউগা মরী লৈনবা ইনফ্রাস্ত্রকচরগী মতাংদা য়ু.পি.দা থবক লেপ্তনা চত্থরি। বারানসী, পুর্বনচল ওইরবসু পেরিসেবল কার্গো সেন্তর, ইন্তরনেস্নেল রাইস সেন্তর অসিগুম্বা মতমগা চুনবা এরেঞ্জমেন্তশিং অসি ঙসি লৌমীশিংগীদমক শিজিন্নরি। অসিগুম্বা খোঙথাং কয়ানা মরম ওইরগা ঐখোয়গী লঙ্গরা অমসুং দশাহরী হৈনৌশিংগী খোইথুম্লবা মহৌ অসি ঙসি য়ুরোপতগী গল্ফ লৈবাকশিং ফাওবা য়ৌহনবা ঙম্লে। ঙসি উরেপ-উয়ুং তমখিবা হৈনৌ অমসুং মনা-মশিংগী ইন্তিগ্রেতেদ পেক হাউস অসিনা লমদম অসিবু এগ্রো এক্সপোর্ত হব অমা ওইনা শেমগৎপদা মতেং ওইরগনি। মসিনা মরু ওইনা উহৈ-ৱাহৈ অমদি মনা মশিং থারিবা অপিকপা লৌমীশিংদা চাউনা কান্নবা পীরগনি।
মরূপশিং,
কাশী অমসুং অপুনবা য়ু.পি.গী চাউখৎ-থৌরাংগী থবক কয়াগী মতাংদা অসুক শাংনা খন্নরক্লি অদুবু লিস্ত অসি য়াম্না শাংবনা পাকহেক লোইশিল্লোইদৌরি। মতম য়াম্না লৈতবনা ঐহাক্না য়ু.পি.গী করম্বা চাউখৎ-থৌরাংগী থবকশিংগী মতাংদা খন্নশিগে, করম্বা থবক্কী মতাংদা পল্লোইশিগে হায়না কয়ারক হন্না খন্থবা তারি! পুম্নমক অসি য়োগীজীনা লুচিংবা অমসুং লিংজেল মান্নবা য়ু.পি. সরকরগী অঙকপা খুদোল ঙাক্তনি।
ইচিল ইনাওশিং,
২০১৭গী মমাংদা য়ু.পি.গীদমক্তা স্কিম লৈরমদবা নত্তে, শেল থারক্তবনি! মতম অদুদসু দিল্লীদগী খোঙজেল য়াংনা থবক কয়া পাইখৎখি। অদুবু মতম অদুদা লখনৌদা অপনবা থেংনখি। ঙসি য়োগীজী মশামক্না য়াম্না কান্না হোৎনরি। কাশী মীয়াম্না য়োগীজীনা করম্না অমমমতা ওইনা চাউখৎ-থৌরাংগী থবক অসি লেপ্তনা য়েংশিনবা লাকপগে, থবকশিং অসিদা মহাক মশাদা কয়াম মীৎয়েং চংবা অমসুং খুমাং চাউশিন্নবা হোৎনবা হায়বা অদু উরবা ঙাক্তনি। মখোয়না রাজ্য পুম্বগী চপ মান্ননা কন্না হোৎনৈ। মখোয় মশামক্না থবক খুদিংমক্কী জিলা খুদিংমক্তা চৎলি। মসিনা মরম ওইরগা য়ু.পি. হোংলক্লিবা অসিনা ঙসি মতমগা চুনরবা য়ু.পি. অমা ওইহন্নবা খুমাং চাউনা চংশিল্লি।
ঙসি য়ু.পি.দা রুল ওফ লো লৈরে।মাফিয়ারাজ অমসুং লালহৌবা অসি লাকশিনবা ঙমদনা লৈরম্বা অদু হৌজিক আইনগী মখাদা লাকশিনবা ঙম্লে। ইচে-ইচল অমসুং ইচানুপীশিংগী ঙাকশেলগী মতাংদা মমা-মপানা মতম পুম্বদা অকিবা অমসুং চীংনবশিং পোক্তুনা লৈরম্বা ফীভম অদুসু হৌজিক্তি হোংলে। ঙসি ইচে-ইচলশিং অমসুং ইচানুপীশিংদা অরানবা মীৎয়েং য়েংবশিনা মখোয় অসি আইনদগী নন্থোক্তুনা চেনবা ঙম্লোই হায়বা খঙলে। অতোপ্পা মরু ওইবা ৱাফম অমনা, য়ু.পি.দা ঙসি সরকার অসি শেঞ্জা-থুমজা অমসুং নেপোতিজমগী মহুৎ চাউখৎ-থৌরাংদা য়ুম্ফম ওইরগা চল্লাইরি। মরম অসিনা ঙসি য়ু.পি.দা মীয়াম্না স্কিমশিংগী কান্নবশিং হকথেংননা ফংলি। মরম অসিনা ঙসি য়ু.পি.দা অনৌবা ইন্দস্ত্রীশিংদা ইনবেস্ত তৌরি, থবক্কী খুদোংচাবশিং হেনগৎলক্লি।
মরূপশিং,
য়ু.পি.গী প্রজা খুদিংমক্না চাউখৎ-থৌরাংগী খোঙচৎ অসিদা শরুক তম্লি, মসিদা মীপুম খুদিংমক্না শরুক য়ারি। অদোমগী মতেং, অদোমগী থৌজালনা য়ু.পি.না খুমাং চাউশিনবগী অনৌবা পন্দোম লোম্বা ঙমগদৌরিবনি। নখোয়না কোরোনা অসিনা অমুক হন্না নমথবা ঙমহনদনবা অচৌবা থৌদাং অমা লৌফম থোকই।
কোরোনা শন্দোকপগী চাং অসি নেমথরক্লে অদুবু চেকশিনদবা হেনগৎলক্লবদি মসি অচৌবা ৱেব অমা ওইরকপসু য়াই। লৈবাক কয়াগী মসিগী এক্সপরিয়েন্স অসি ঙসি ঐখোয়গী মাংদা উবা ফংলে। মরম অসিনা ঐখোয়না চৎনা কাংলোনশিং চেকশিন্না ঙাক্না চৎপা তাই। মীপুম খুদিংদা বেক্সিন-লেম্না বেক্সিন ফংহনবা হায়বা কেম্পেন অসিদা য়াওশিনবা তাই। মীপুম খুদিংমক বেক্সিন কাপথোকপা তাই। বাবা বিশ্বনাথ অমসুং ইমা গঙ্গানা নখোয় পুম্নমক থৌকানবিবা ওইসনু। য়াইফ পাউজেল অসিগা লোইননা পুম্নমকপু হন্না-হন্না থাগৎচরি!
হর-হর মহাদেব !!
