লুপা করোর ১৬,০০০গী শেনফম ওইবা পি.এম.-কিসানগী মখাদা ১৩শুবা ইন্সতোলমেন্ত থাদোকখ্রে
নৌনা শেমগৎলবা বেলগাবী রেলৱে স্তেসন বিল্দিং জাতিদা কত্থোকখ্রে
জল জীবন মিসনগী মখাদা মলতি-ভিলেজ স্কিম প্রোজেক্ত তরুক্কী উরেপ-উয়ুং তমখ্রে
“ঙসিগী হোংলক্লিবা ভারতনা শোত্থরবশিংদা মরু ওইবা মীৎয়েং চংবগা লোয়ননা চাউখৎ-থৌরাংগী প্রোজেক্তশিং মথং মথং লোইশিল্লক্লি”
“২০১৪গী মমাংদা লৈবাক্কী লৌউ-শিংউগী বজেৎ করোর ২৫,০০০ ওইরম্বা অদু হৌজিক করোর ১,২৫,০০০দা হেনগৎলক্তুনা শরুক মঙা হেনগৎপা ঙম্লে ”
“সরকারনা তুংলমচৎতা থেংনগদবা শীংনবশিং খঙদোকপগা লোয়ননা ভারতকী লৌউ-শিংউগী সেক্তর মপাঙ্গল কনখৎহনবদা মীৎয়েং থমখি”
“দবল-ইঞ্জিন সরকারনা খোঙজেল য়াংনা চাউখৎনবা গরেন্তী পীরি”
“খরগেজী অসি কোংগ্রেসকী প্রসিদেন্তনি অদুবু মহাকপু লোইনবীরিবা মওং অসিনা রিমোৎ কন্ত্রোল কনানা পাইবগে হায়বা অসি মালেম পুম্বনা খঙই”
“থমোয় শেংনা হোৎনরবা মতমদা চাউখৎ-থৌরাংগী তশেংবা থবক পাইখৎপা ঙম্মি”

ভারত ইমানা য়াইফরে‍।

ভারত ইমানা য়াইফরে‍।

নম্মা, সবকা সাথ সবকা বিকাস মন্ত্রদা, স্ফুর্তিয়াদা, ভগবান বসবেস্বর, অবরিগে, নমস্কারাগল্লু‍। বেলগাবিয়াকুন্দা, মত্তুবেলগাবিয়াজনারাপ্রীতী, এরদু, মরিয়লাজদাসিহি, বেলগাবিয়া, নন্নবন্ধুভগিনিয়রিগে, নমস্কারা গল্লু‍।

বেলগাবীগী মীয়ামগী মীনুংশি অমদি থৌজাল মমল নাইদে‍। হায়রিবা মীনুংশি অমদি থৌজাল অসি ফংজরগা, ঐখোয় পুম্নমকপু অদোমগী থৌগলগীদমক অহিং নুংথিল নাইদনা হোৎননিংবগী থৌনা হাপ্লি‍। অদোমগী থৌজালনা ঐখোয়গী পুক্নিং থৌগৎনবগী মচা ওইরি‍। বেলগাবীগী লৈমায়দা খোঙদারবা লাইফম অমদা চৎলুবদগী তাবা নত্তে‍। মফমসি কিত্তুরগী রানী চেন্নমা অমদি নীংতম লান্মী সঙ্গোল্লীরায়ন্নগী পোক্নফম্নি‍। লৈবাকসিনা মখোয়বু  ঙসিসু মখোয়গী থৌনা লিংজেল অমদি মীনায় নাইথাংগী মায়োক্তা খোঞ্জেল থোক্না লাউখিবগীদমক নীংশিংলি‍।

মরূপশিং, নীংতম লান ওইরবসু, নৎত্রগা মদুগী মতুংগী ভারত নৌনা শেমগৎলকপবু ওইরবসু, বেলগাবীনা মতম পুম্বদা মরুওইবা থৌদাং লৌদুনা লাক্লি‍। হন্দক্তি ঐখোয়গী লৈবাকসিদা, কর্নাতকাদা স্তার্ত অপশিং নীংথিনা থাগৎনরি‍। অদুবু মীৎয়েঙ অমরোমদা য়েংলুরবদি বেলগাবীদা চহি ১০০গী মমাঙদগী স্তার্ত অপশিং হৌখ্রে‍। চহি ১০০গী মমাঙদা‍। ঐনা ময়ামদা নৌহৌননা নীংশিংহনবা লাক্লিবনি‍। মফমসিদা বাবুরাও বুসালকর জীনা চহি ১০০গী মমাঙদা মফমসিদা অপীকপা য়ুনিৎ অমা হৌদোকখি‍। মতমদুদগী বেলগাবীদা মখল কয়াগী ইন্দস্ত্রীশিংগী অচৌবা মফম অমা ওইদুনা লাক্লি‍। বেলগাবীগী হায়রিবা শক্লোন অসিনা দবল ইঞ্জিন লৈঙাক অসিনা চৎলিবা দেকেদ অসিদা হেন্না মপাঙ্গল কলহনবা পাম্মী‍।

ইচিল ইনাওশিং, ঙসি মীয়ামদা কত্থোক্লিবা অমদি উরেপ উয়ুং তম্লিবা প্রোজেক্তশিং অসিনা বেলগাবীগী চাওখৎ লমজেলদা অনৌবা খোঙজেল হাপ্লগনি‍। লুপা করোর চা কয়াগী প্রোজেক্তশিং অসিদা কেন্নেক্তিবিতীগী য়াওরি, ঈশিংগী য়াওরি‍। হায়রিবা চাওখৎ থৌরাংগী স্কিমশিং অসিগীদমক, লমদম অসিগী খুমাঙ চাওশিন্নবগী লমদা অনৌবা খোঙজেল হাপকদৌরিবা তাঞ্জা অসিগীদমক ময়াম পুম্নমক্কী মফমদা নুংঙাইবা ফোঙদোকচরি‍।

ঙসি বেলগাবীদগী হিন্দুস্তান পুম্ববু তরাম্না ওকচনবগী তাঞ্জাসু ফংলি‍। হিন্দুস্তানগী লৌমী খুদিংমক্না ঙসি কর্নাতকাগী থৌরমসিদা শরুক য়ারি, বেলগাবীগী থৌরমদা শরুক য়ারি‍। ঙসি মফমসিদগী পি.এম. কিসান সম্মান নিধীগী ইন্সতোলমেন্ত অমা থাদোকখ্রে‍। বতন অমখক নম্লগা, ক্লিক অমখক্তনা লৈবাকসিগী লৌমী করোর কয়াগী বেঙ্ক একাউন্তশিংদা লুপা করোর লিশিং ১৬গী শেনফম থাজিল্লি‍।

মফমসিদগী ঐগী মরূপশিংনা মখোয়গী মোবাইলদা য়েংবা মতমদা মেসেজ লাক্লম্লগনি‍। মালেমগী মীয়াম্নসু ঙসি ঙক্না য়েংনরি‍। লুপা করোর লিশিং ১৬ কীয়ামখ্রবা শেনফম মীৎকুপ অমদা, খুজু মুজু তৌদনা, ককথোক ককশিন তৌদনা, শেঞ্জা থুমজা য়াওদনা, লৌমীশিংগী একাউন্ততা হকথেংননা চঙলি‍। করিগুম্বা কংগ্রেসকী লৈঙাক লৈরম্লবদি প্রধান মন্ত্রীনা লুপা অমা থাখিবদা পৈসা ১৫ য়ৌই হায়রমগনি‍। অদুবু ঙসি মখোয়না লুপা করোর লিশিং ১৬কী মতাঙদা ওইরম্লবদি অদোমসু খনবিয়ু লুপা করোর লিশিং ১২-১৩দি মরক্তা মাঙলমগনি‍। অদুবু মোদীগী লৈঙাক্নি‍। পৈসা খুদিংমক অদোমগীনি‍। ঐনা কর্নাতকা য়াওনা লৈবাক পুম্বগী লৌমী ইচিল ইনাওশিংগী মফমদা নুংঙাইবা ফোঙদোকচরি‍। হোলী কুমহৈগী মাঙওইননা ঐগী লৌমীশিংগী মফমদা হোলীগী য়াইফ-পাউজেলসু পীজরি‍।

ইচিল ইনাওশিং, ঙসি অওনবা লাক্লিবা ভারত শোত্থহৌবা হীরম খুদিংমক্তা খুমাঙ চাওশিনবা পুরক্তুনা চাওখৎ থৌরাংগী থবক পায়খৎলি‍। ঐখোয়গী লৈবাক্তা দেকেদ কয়া অপীকপা লৌমীশিংবু নাথৈদুনা লাক্লম্মী‍। ভারতকী লৌমীশিংগী মশিংগী চাদা ৮০-৮৫দি অপীকপা লৌমীশিংনি‍। হৌজিক্তি হায়রিবা অপীকপা লৌমীশিং অসিদা বি.জে.পি. লৈঙাক্না মরুওইবা মীৎয়েঙ থম্লি‍। পি.এম. কিসান সম্মান নিধীগী খুত্থাঙদা হৌজিক ফাওবদা লৈবাকসিগ অপীকপা লৌমীশিংগী বেঙ্ক একাউন্ততা চাউরাক্না লুপা করোর লাখ অমা মখায়গী শেনফম থাজিনখ্রে‍। অদোম্না হংলকপসু য়াই – লুপা করোর লাখ অমা মখায়? মসিদসু লুপা করোর লিশিং ৫০ গী শেনফমগী ঐখোয়গী লৌমী ইমা অমদি ইচে ইচলশিংগী একাউন্ততা চঙলিবনি‍। হায়রিবা শেনফম অসিনা লৌমীশিংগী মথৌ তাবা মচা মচাশিং মেনখৎনবা ঙমহল্লি‍। হায়রিবা চাদিংশিং অসিগীদমক মখোয়না কনাগুম্বা অমগী মফমদা মখুৎ তিংথোক্তুনা নিরুবগী মথৌ তাদ্রে, শেন্দোয় চাবা মীওইশিংগী মফমদা চৎপগী মথৌ তাদ্রে, শেন্দোয় চাওনা থিদুনা শেল পুরুবগী মথৌ তাহন্দ্রে‍।

মরূপশিং, ইং ২০১৪গী মতুংদা, লৈবাকসিদা লেপ্পা লৈতনা লৌউ-শিংউগী লম অফবা মওংগী অওনবা মায়কৈ অমদা চঙশিল্লক্লি‍। বি.জে.পি. লৈঙাক্তা ঐখোয়না লৌউ-শিংউগী লমদম মতমগা চুনবা ফীভম পুরক্লি, লৌউ-শিংউগী লমবু তুংলমচৎকীদমক শেম শারি‍। ইং ২০১৪দা ঐখোয়গী ইফমদা লৈবাকসিনা থৌগল তৌনবগী তাঞ্জা পীরকপা মতমদা, ভারতকী লৌউ-শিংউগী বজেৎ লুপা করোর লিশিং ২৫খক ওইরম্মি‍। হন্দক্কী চহিসিদা ঐখোয়গী লৌউ-শিংউগী বজেৎ... হায়রিবা শেনফম অসি অদোম নীংশিংদুনা লৈগদ্রা? নীংশিংগদ্রা? খরা হৌনা হায়বিয়ু নীংশিংগদ্রা‍? য়েংবিয়ু, ঐখোয়না ইং ২০১৪দা থৌগল তৌনবগী লাকপা মতমদা ভারতকী লৌউ-শিংউগী বজেৎ লুপা করোর লিশিং ২৫ ওইরম্মি‍। কয়া ওইরম্মি হায়বা? লুপা করোর লিশিং ২৫, হন্দক্না ঐখোয়গী লৌউ-শিংউগী বজেৎ লুপা করোর লাখ ১ লিশিং ২৫ হেল্লে‍। মসিনা তাকপদি শরুক মঙা হেন্না হেনগৎলে হায়বনি‍। মসিনা বি.জে.পি. লৈঙাক অসি লৌমীশিংগী মতেং পাংনবগীদমক কয়া য়াম্না খোঙফম চেৎনা লেপ্পগে হায়বা উৎলি‍। ঐখোয়না তেক্নোলোজীদা মীৎয়েঙ থম্লি, মদুগী কান্নবা লৌমীশিংনা ফংলি‍।

অদোম খন্দুনা য়েংবিয়ু, করিগুম্বা জনধন বেঙ্ক একাউন্ত হাংলমদ্রবা, মোবাইল কন্নেক্সন হেন্না চাওখৎলমদ্রবা, আধার লৈরমদ্রবা, অদু ওইরবদি করি ওইরমবগি? ঐখোয়গী লৈঙাক্না লৌমী মশিং য়াম্না কিসান ক্রেদিৎ কার্দ ফংহল্লি‍। লৌমীশিংদা বেঙ্ককী মতেং ফংনবগী খুদোংচাবা লেপ্তনা ফংহন্নবা ঐখোয়না হোৎনরি‍। মরূপশিং, হন্দক চহিগী বজেৎ অসিনা ঐখোয়গী লৌফমগী ঙসি ওইরিবা ফীভমসিগা লোয়ননা তুংলমচৎকী মথঔ তাবশিংগীসু পাম্বৈ পুরক্লি‍।

ঙসিগী মথৌ তারিবসি থম্ফম, স্তোরেজকীনি, লৌউ-শিংউদা চঙবা শেনফম হন্থহনবনি, অপীকপা লৌমীশিংবু পুনশিনবনি‍। মরম অসিনা বজেত্তা অনৌবা মহৈ মরোং থম্ফম চা কয়া শাননবগী মতাঙদা মীৎয়েঙ থম্লি‍। মসিগা লোয়ননা তেংবাং ফংহন্নবগী লমদা মরুওইবা মীৎয়েঙ থম্লি‍। মহৌশাগী লৌউ-পথাপ য়োকখৎনবগীদমকসু খোঙথাঙ কয়া লৌখৎলি‍। মহৌশাগী লৌউ-পথাপ্না লৌমীশিংগী পোত্থোক শেঞ্জং য়াম্না হন্থহল্লক্কনি‍। মহৌশাগী লৌউ-পথাপ্তা লৌমীশিংনা থেংনগদৌরিবা খ্বায়দগী চাউবা ৱাফমদি হার অমদি তিলহাৎ হিদাক শেম্বদা ওইগনি‍। হৌজিক মসিদা লৌমীশিংগী মতেং পাংনবগীদমক তেংবাং মফম লিশিং কয়া লিংখৎকদৌরি‍। লৌমীশিংগী শেঞ্জং হেনগৎহনবদা কেমিকেল ফর্তিলাইজরনা অচৌবা শক্লোন লৌরি‍। হন্দক ঐখোয়না পি.এম. প্রনাম য়োজনা হৌদোক্লে‍। মসিগী খুত্থাঙদা কেমিকেল ফর্তিলাইজর শীজিন্নবগী চাং হন্থহল্লিবা স্তেতশিংদা কেন্দ্র লৈঙাক্কী মায়কৈদগী অচৌবা মতেং ফংগনি‍। ইচিল ইনাওশিং, ঐখোয় লৈবাকসিগী লৌউ-শিংউবু, তুংলমচৎকী শিংনবশিং য়েংলগা ঐখোয়গী অপুনবা লৌমীশিংগী খুঙ্গংগী শেন্মিৎলোন্দা অনৌবা থৱায় হাপ্নবা কাঙলোন পুথোকপদা ঐখোয়না মীৎয়েঙ থম্লি‍।

অইং অশাগী খল হোংলকপনা মরম ওইরগা পরৈ চেনবা ৱাফম কয়া লাক্লি, মসিমক ঐখোয়গী লৌমীশিংনা থেংনরি‍। মরম অসিনা হৌজিক ঐখোয় অরিবা চৎনবীশিংবু মপাঙ্গল হাপ্তুনা অমুক নৌহৌননা নীংশিংবা তাই‍। ঐনা য়েংবদা ঐখোয়গী মোতা অন্নাজ য়াম্না ফজবা মতৌ উরি‍। ঐখোয়গী মোতা অন্নাজ থারুক খুদিংমক্তা, ফীভম খুদিংমক্তা খাঙবা ঙম্বগী মতিং য়াম্না লৈ অমদি মসি সুপরফুদসু ওইরি‍। মোতা অন্নাজ সুপরফুদনি, মসিদা মচি ওইবা মচল য়াম্নসু য়াওই‍। মরম অসিনা চহি অসিগী বজেত্তা ঐখোয়না মোতা অন্নাজপু শ্রী-অন্ন হায়বা মমিং পীদুনা শকখঙলি‍। অদুগা, কর্নাতকাদি শ্রী অন্নগী মরমদা মালেমগী অচৌবা মফম অমদি মপাঙ্গল কনবা মফম অমা ওইরি‍। মফমসিদদি শ্রী অন্নবু হান্নদগী হৌনা সিরী ধান্য হায়না কৌনরি‍। মখল কয়াগী শ্রী-অন্ন মফমসিগী লৌমীশিংনা লোক্লি‍। কর্নাতকাগী বি.জে.পি. লৈঙাক্কী ঐখোয়গী মুখ্যমন্ত্রী জীগী মীৎয়েঙ মখাদা মসিগীদমক লৌমীশিংদা মতেঙসু পীরি‍। রইতা বন্ধু য়েদিয়ুরপ্পাজীনা শ্রী অন্নবু য়োকখৎনবগীদমক অচৌবা থৌরাং অমা পায়খৎখিবা ঐ নীংশিংলি‍। হৌজিক ঐখোয়না হায়রিবা শ্রী অন্ন অসিবু মালেম পুম্বদা শিং থুংন ফংহনবা তাই‍। শ্রী অন্ন লোকপদা শেঞ্জংসু হন্থৈ অদুগা ঈশিংসু য়াম্না চঙদে‍। মরম অসিনা মসিনা অপীকপা লৌমীশিংদা শরুক অনি থোক্না কান্নবা পীগনি‍।

মরূপশিং,

মফম অসিদা চু মরাঙ কায়না থানরি‍। বি.জে.পি. লৈঙাক্না মতম পুম্বদা চু থারিবা লৌমীশিংগী য়াইফনবগীদমক অথোইবা মীৎয়েঙ চঙদুনা লাক্লি‍। চহি অসিগী বজেত্তা চু থাবা লৌমীশিংগা মরী লৈননা মরুওইবা ফিরেপ অমা লৌরি‍। সুগর কোওপরেতিবকী খুত্থাঙদা ২০১৬-১৭গী মমাঙদা তৌখিবা পেমেন্তশিংদা খাজনা কোক্লম্মী‍। মসিনা সুকর কোওপরেতিবশিংদা লুপা করোর লিশিং ১০গী পোৎলুম লৈরম্মী, মসি য়ু.পি.এ. লৈঙাক্না মখোয়গী কোকথক্তা থোঙ্গৎপিরম্বা পোৎলুম্নি‍। হায়রিবা লুপা করোর লিশিং ১০ অদু ঐখোয়গী সুগর কোওপরেতিবকী কান্নবা ওইরগনি‍। ময়ামসু খঙবিরমগনি ঐখোয়গী লৈঙাক্না ইথানোল পুথোকপদা কয়া য়াম্না মীৎয়েঙ থম্বগে হায়বদু‍। ইতানোল পুথোকপা হেনগৎলকপগা চু থারিবা লৌমীশিংগী শেন্থোকসু হেনগৎহল্লি‍। হৌখিবা চহি ৯সিদা পেত্রোলদা ইথানোল ব্লেন্দিংগী চাং চাদা অনি মখায় ওইরম্বদগী চাদা ১০ য়ৌহনখ্রে‍। হৌজিক লৈঙাক অসিনা পেত্রোলদা ইথানোল ব্লেন্দিং তৌবগী চাং চাদা ২০ য়ৌহন্নবগী পান্দম পুদুনা চৎলি‍। লৈবাকসিনা হায়রিবা হীরমসিদা খুমাঙ চাওশিল্লিবমখৈ ঐখোয়গী চু থারিবা লৌমীশিংদা কান্নবা পীগদৌরিবনি‍।

ইচিল ইনাওশিং, লৌ উববু ওইরো, ইন্দস্ত্রী, তুরিজম, হেন্না ফবা মহৈ মশিংবু ওইরো পুম্নমক অসি কন্নেক্তিবিতীনা মপাঙ্গল হেন্না হাপকদৌরিবনি‍। মরম অসিনা হৌখিবা চহিশিংদা ঐখোয়না কর্নাতকাগী কন্নেক্তিবিতীদা মীৎয়েঙ হেন্না চঙদুনা লাক্লি‍। ২০১৪গী মমাঙগী চহি ৫দা কর্নাতকাদা রেলৱেগী বজেৎ পুন্না লুপা করোর লিশিং ৪ ওইরম্মী‍। অদুগা চহি অসিগী কর্নাতকাগী রেলৱেগীদমক, লুপা করোর লিশিং ৭ খাক্লি‍। হৌজিক হৌজিক কর্নাতকাগী রেলৱেগী লুপা করোর লিশিং ৪৫রোমগী প্রোজেক্তশিংগী থবকসু পায়খৎলি‍। মসিনা মরম ওইরগা কর্নাতকাদা মীওই কয়া থবক পীরমগনি হায়বা অদোম খন্থবা ঙম্বিরমগনি‍।

বেলগাবীগী মতমগা চুনরবা রেলৱে স্তেসন উরগা মীপুম খুদিংমক ঙক্নরি, পুম্নমক্না চাওথোকচবা পোক্লি‍। হায়রিবা মতমগা চুনরবা রেলৱে স্তেসন অসিনা মফমসিদা খুদোংচাবা কয়াসু পুরক্লে, অদুগা রেলৱেদা থাজবসু হেনগৎলে‍। অসিগুম্বা ফজরবা স্তেসন, মমাঙদা মীয়াম্না মীরমদা উরম্বনি‍। হৌজিক্তি ভারত্তসু অসিগুম্বা স্তেসন শেমগৎলি‍। কর্নাতকাগী য়াম্লবা স্তেসনশিংগী, রেলৱে স্তেসনশিংগী অসিগুম্বা মতমগা চুনবা শক্লোন মীয়াম মাঙদা পুথোরক্লি‍। লোন্দা-ঘাতপ্রভা লাইন দব্লিং তৌবনা খোঙচৎ থুজিলহনবতা নত্তনা শাফবসু ওইহল্লে‍। অনৌবা রেল লম্বীশিংদা ঙসি পায়খৎলিবা থবক মওংশিং অসিনা লমদম অসিগী রেল নেৎৱর্কপুসু মপাঙ্গল কনখৎহনগনি‍। বেলগাবী মহৈ মশিং, হকশেল অমদি তুরিজমগী অচৌবা মফম অমা ওইরি‍। মসিদা রেল কন্নেক্তিবিতীনা হায়রিবা সেক্তরশিং অসিদা কান্নবা পীগনি‍।

ইচিল ইনাওশিং, বি.জে.পি.গী দবল ইঞ্জিন লৈঙাক খোঙজেল য়াঙবা চাওখৎপগী গরেন্তীনি‍। দবল ইঞ্জিন লৈঙাক্না কমদৌনা থবক তৌই হায়বগী খুদম জল জীবন মিসন্না ওইরি‍। ইং ২০১৯ ফাওবদা কর্নাতকাগী খুঙ্গংশিংদা শুপ্নতগী ইমুং মশিং চাদা ২৫খক য়ুমদা তোতি কন্নেক্সন ফংহলম্মী‍। ঙসি কর্নাতকাদা তোতি ঈশিংগী কভরেজ দবল ইঞ্জিন লৈঙাক্না মরম ওইরগা, ঐখোয়গী মুখ্য মন্ত্রীনা হোৎনবনা মরম ওইরগা ঙসি কবরেজ চাদা ৬০ হেল্লে‍। বেলগাবীসিদসু য়ুমথোঙ লাখ ২ য়ৌদনা তোতি ঈশিং ফংলম্মী‍। ঙসিদি মশিং অসি লাখ ৪ মখায় হেল্লে‍। ঐখোয়গী খুঙ্গংগী ইচে ইচলশিং ঈশিং থিবা কোয়চৎ চৎদনবা লুপা করোর লিশিং ৬০গী খাক্লি‍।

ইচিল ইনাওশিং, বি.জে.পি. লৈঙাক্না, মমাঙগী লৈঙাক্না থৌশাবিরমদ্রবা খুন্নাইগী কাঙলুপ মচা মচাশিংবু মপাঙ্গল কলহন্নবগীদমক পুক্নিং চঙলি‍। বেলগাবীদি খুৎশা হৈবা, ইয়োংগী ময়োল্লমনি‍। মফম অসি বেনুগ্রাম হায়বদি ৱাগী খুঙ্গং হায়না মমিং চৎলিবনি‍। অদোম নীংশিংবিয়ু, মমাঙগী লৈঙাকশিংনা মতম শাংনা ৱা য়ানবদা অথিংবা থম্লম্মি‍। ঐখোয়না কাঙলোন হোংদোকখি অমদি ৱা থানবা অমদি লল্লোন ইতিক তৌবা য়ানবা লম্বী য়াৎখি‍। মসিগী অচৌবা কান্নবা ৱাগী লমগী থবক তৌরিবা খুৎহৈবশিংনা ফংলি‍। ৱাগী মথক্তা মফমসিদা অতোপ্পা মখলগী ক্রাফ্তশিংসু নীংথিনা তৌনরি‍। চহি অসিগী বজেত্তা অহানবা ওইনা অসিগুম্বা ফীভমশিং য়োকখৎনবগীদমক, ঐখোয়না পি.এম. বিস্বকর্ম য়োজনা পুরক্লি‍। য়োজনা অসিনা অসিগুম্বা লম অসিদা থবক তৌরিবা মরূপ খুদিংক্তা মখল খুদিংমক্কী তেংবাং পীগদৌরি‍।

মরূপশিং, ঙসি ঐনা বেলগাবীদা লাকপসিদা, হীরম অমখক্তা ঐগী ওইবা ৱাফম খরা থমজগে‍। ঐনা ময়ামগী মফমদা নীংশিংজনিংবদি কংগ্রেসনা কমদৌনা কর্নাতকাবু তাথি তাওইনা তৌরম্বগে হায়বদুনি‍। কর্নাতকাগী লুচিংবশিংবু ইকায়বা পীবা হায়বসি কংগ্রেসকী থাইনদগী লৈরক্লবা মনাৎনি‍। কনাগুম্বা মীওই অমনা কংগ্রেসকী ইমুং মনুংদা খোঙলৌ পল্লৌবা থোকহল্লবদি মহাকপু কংগ্রেসতা ইকায়বা পীবা হৌরকই‍।

কংগ্রেস ইমুংগী মমাঙদা এস. নিজলিঙ্গপ্পা অমদি বিরেন্দ্র পাতিল জীবু লুচিংবশিংনা মতৌ কমদৌনা ইকায়বা পীখিবগে হায়বা পুৱারীনা খুদম্নি, কর্নাতকাগী মীপুম খুদিংনা খঙই‍। হন্দকসু কংগ্রেসকী মরুওইবা ইমুং অমগী মমাঙদা কর্নাতকাগী অতোপ্পা লুচিংবা অমবু ইকায়বা পীখি‍। মরূপশিং, লমদম অসিগী মপারী, চহি ৫০ পার্লিয়ামেন্তকী থবক থৌরমদা য়াওদুনা লাক্লবা শ্রীমান মল্লিকার্জুন খরগে জীবু ঐনা থাক ৱাংনা ইকায় খুম্নজৈ‍। মহাক্না মীয়ামগী থৌগলগীদমক মাগী মায়কৈদগী তৌবা য়াবা খুদিংমক তৌদুনা লাকখি‍। অদুবু নুমিৎ অদুদা থোকখিবা অদু উবদা ঐ নুংঙাইখিদে, কংগ্রেসকী থৌরম পাঙথোকপদা, ছত্তিসগরদা পাঙথোকখিবা থৌরম অদুদা খ্বায়দগী অহল, রাজনিতীদা খ্বায়দগী মকোক থোংবা খর্গে জী মফমদুদা শরুক য়াখি‍। মহাক পার্তী অদুগী প্রেসিদেন্তসু ওইরিবনি‍। নুংশা শাই, মফমদুদ লেপ্লিবা পুম্নমক নুংশা লাংবা হায়বসি মশানা তাবনি‍। অদুবু নুংশাদুদা কংগ্রেসকী খ্বায়দগী অহল ওইরবা, খ্বায়দগী সিনিয়র ওইরিবা, কংগ্রেসকী মকোক খরগে জী শাতিন তুপ্পা ফংখিদে‍। নাকনদা লেপখিবা কনাগুম্বা অমগীদমক শাতিন পুরকখি‍।

মসিনা তাকপদি খরগেনা কংগ্রেসকী প্রেসিদেন্ত ওইজরবসু, কংগ্রেসতা মাগী মফমদা উৎলিবা থৌগল্লোন অদু মালেম অসিনা উই, খঙই মদুদি রিমোৎ কন্ত্রোল কনাগী মখুত্তা লৈবগে হায়বদু‍। ইমুং মনুংগী ওইবা চৎনবী অসিদা ঙসি লৈবাকসিগী পার্তী কয়া অমা থোরকপা ঙমদনা লৈরি‍। হায়রিববা পল অসিদগী লৈবাক অসিবু ঐখোয়না মনীং তমহনবা তাই‍। মরম অসিনা কংগ্রেসকুম্বা পার্তীদগী কর্নাতকাগী মীয়াম্না চেকশিন্না লৈগদবনি‍। অদুগা কংগ্রেসকী মীওইশিংনা য়াম্না নীংবা কায়নরে, হৌজিক্তি মোদী হিংলিবমখৈ মখোয় হৌগৎপা ঙম্লরোই হায়না মখোয় খন্নরে‍। অদুগা মরম অসিনা পুম্নমক্না মোদী শিখ্রো, মোদী শিখ্রো হায়নরি, খোল্লাউ লাউনরি‍। কনাগুম্বা খরদি মংফম তৌবদা মথৌ চিল্লি‍। মোদী নহাক্কী মংফম তৌরগনি হায়না মখোয়না হায়রি‍। অদুবু লৈবাকসিনা হায়রিবনা মোদী নহাক্কী থম্বাল শাৎলগনি হায়বসিনি‍।

মরূপশং, পুকচেল শেংনা থবক তৌরবা মতমদা মওং চুম্না চাওখৎপা পুরকই‍। দবল ইঞ্জিন লৈঙাক্কী পুকচেলসু চুম্লি অদুগা চাওখৎপগী খোঙফমসু চেৎনা লেপ্লি‍। মরম অসিনা ঐখোয়না হায়রিবা থাজবা অসিবু মাঙহন্দনা থম্বা তাই‍। কর্নাতকাগী, লৈবাকসিগী চাওখৎ লমজেলদা খোঙজেল হাপ্নবগীমক, ঐখোয় মাঙদা অসুম্না চঙশিনগদবনি‍। পুম্নমক্না হোৎনমিন্নবনা ঐখোয়গী চাওখৎপা লৈবাক অমগী মঙলান মঙফাওনহনগদৌরিবনি‍। ঙসি ঐ মফমসিদা থৌরম অসি য়াওনবা খরা থেঙনা লাকপদা খরা থেঙখ্রে‍। হেলিকোপ্তরদগী বেলগাবী পুম্বদা তরাম্না ওকপিখিবা, থৌজাল পীবিখিবা ইমা, ইচে ইচলশিং, অহল লমনশিং, অঙাংশিং অঙকপা মওংদা তিনবিরম্লিবা অসিগীদমক থাগৎচরি‍।

ঐনা বেলগাবীগী, কর্নাতকাগী মীনুংশি অসিগীদমক ইকোক নোন্না খুরুমজরি, ইকোক নোন্না মখোয়গী তৌবিমল খঙবা উৎচরি‍। ঙসিগী ঐগী কর্নাতকাগী খোঙচৎ মরুওইবা খোঙচৎনি মরমদি ঙসি অয়ুক সিবমোগাদা এয়রপোর্ত্তা কর্নাতকাগী মীয়ামগা উননবগী খুদোংচাবা ফংজখি‍। অদুবু লোয়ননা ঐখোয়গী ইকায়খুম্নরবা লুচিংবা য়েদিয়ুরপ্পা জী গী মপোক নুমিৎকী য়াইফ-পাউজেল পীজনবগী তাঞ্জাসু ফংখি‍। অদুগা সিবমোগাদগী মফমসিদা লাকপদা ময়াম্না অঙকপা অমা উৎপিরে‍। হায়রিবা মীনুংসি, থৌজাল অসিগীদমক ঐনা ময়ামগী মফমদা থাজবা পীজরি, বেলগাবীগী ঐগী নুংশিজরবা ইচিল ইনাওশিং, কর্নাতকাগী ঐগী নুংশিজরবা ইচিল ইনাওশিং অদোম্না ঐঙোন্দা উৎপিরিবা মীনুংসি, অদোম্না ঐঙোন্দা পীরিবা থৌজাল ঐনা শেন্দোয় শেল্লেপ পুন্না লমন শিংজরক্কনি হায়না ঐনা থাজবা পীজরি‍। অদুগা কর্নাতকাদা চাওখৎপা পুরক্তুনা লমন শিংগনিই, বেলগাবীদা চাওখৎপা পুরক্তুনা লমন শিংগনি‍। ময়ামবু অমুক্কা হন্না থাগৎচরি‍। ঐগা লোয়ননা লাউবিয়ু – ভারত ইমানা য়াইফরে‍। ভারত ইমানা য়াইফরে‍। ভারত ইমানা য়াইফরে‍।

হন্না হন্না থাগৎচরি‍ !

 

Explore More
৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল

Popular Speeches

৭৭শুবা নিংতম্বা নুমিৎ থৌরমদা লাল কিলাদগী প্রধান মন্ত্রী শ্রী নরেন্দ্র মোদীনা ৱা ঙাংখিবগী মপুংফাবা ৱারোল
iPhone exports from India nearly double to $12.1 billion in FY24: Report

Media Coverage

iPhone exports from India nearly double to $12.1 billion in FY24: Report
NM on the go

Nm on the go

Always be the first to hear from the PM. Get the App Now!
...
সোসিয়েল মিদিয়াগী মফম 17 এপ্ৰিল, 2024
April 17, 2024

Holistic Development under the Leadership of PM Modi