Share
 
Comments
“Kingsway i.e. Rajpath, the symbol of slavery, has become a matter of history from today and has been erased forever”
“It is our effort that Netaji’s energy should guide the country today. Netaji’s statue on the ‘Kartavya Path’ will become a medium for that”
“Netaji Subhash was the first head of Akhand Bharat, who freed Andaman before 1947 and hoisted the Tricolor”
“Today, India’s ideals and dimensions are its own. Today, India's resolve is its own and its goals are its own. Today, our paths are ours, our symbols are our own”
“Both, thinking and behaviour of the countrymen are getting freed from the mentality of slavery”
“The emotion and structure of the Rajpath were symbols of slavery, but today with the change in architecture, its spirit is also transformed”
“The Shramjeevis of Central Vista and their families will be my special guests on the next Republic Day Parade”
“Workers working on the new Parliament Building will get a place of honour in one of the galleries”
“ ‘Shramev Jayate’ is becoming a mantra for the nation”
“Aspirational India can make rapid progress only by giving impetus to social infrastructure, transport infrastructure, digital infrastructure and cultural infrastructure as a whole”

ঙসিগী পুৱারী ওইরগদবা থৌরম অসি লৈবাক পুম্বগী মঙলান্নি, লৈবাক মীয়াম পুম্বনা মতম অমত্তদা থৌরম অসিগীদমক পুন্না লেপমিন্নরি‍। ঐনা অসিগুম্লবা পুৱারী ওইরবা তাঙ্কক অসিবু মীৎয়েঙ তারিবা লৈবাক মীয়ামবু থম্মোয়নুংদগী তরাম্না ওকচরি, ইকোক নোঞ্জরি‍। পুৱারী ওইরবা থৌরম অসিদা ঐগা লোয়ননা মন্ত্রীমন্দলগী ঐগী খোঙবু শ্রী হরদীপ পুরী জী, শ্রী জি কিসন রেদ্দী জী, শ্রী অর্জুন রাম মেঘৱাল জী, শ্রীমদি মিনাক্সী লেখী জী, শ্রী কৌসল, কিসোর জী, ঙসিগী ফম্পাকথকসিদা লেঙশিনবিরি‍। লৈবাকসিগী ইকয়াখুম্নরবা মীথুংশিংসু মফমসিদা লেঙশিনবিরি‍।

মরূপশিং,

ঙসি নীংতম্বগী অমৃৎ মহোৎসব অসিদা লৈবাকসিনা অনৌবা ইহুল, অনৌবা থৌনা অমা ফংলে‍। ঙসি ঐখোয়না হৌখ্রবা ঙরাংবু থাদোক্লম্লগা লাক্কদৌরিবা হয়েংগী শক্তমদা অনৌবা মচুশিং শঙলি‍। ঙসি মায়কৈ খুদিংদা উরিবা মঙালশিং অসি অনৌবা ভারতকী মশাবু থাজজবগী মঙালশিংনি‍। লোইলমগী খুদম ওইরিবা কিংসৱে হায়বদি রাজপথ, ঙসিদি পুৱারীগী ৱাফম ওইহৌরে, মতম পুম্বগী ওইনা মুৎখ্রে‍। ঙসি কর্তব্য পথকী শক্লোন্দা অনৌবা পুৱারী অমা ইরে‍। ঐনা লৈবাক মীয়াম পুম্বদা নীংতম্বগী অসিগুম্লবা অমৃকাল অসিদা লোইলমগী খুদম অমদগী নীংতম্বা ফংবসিদা নুংঙাইবা ফোঙদোকচরি‍।

মরূপশিং,

ঙসি ইন্দিয়া গেৎ মনাক্তা ঐখোয়গী লৈবাক্কী হীরো নেতাজী সুভাসচন্দ্র বোসকী চীং লেম্লবা মীতম অমা খিল্লে‍। লোইলম লৈঙাক্কী মতমদা মফমসিদা ব্রিতিস লৈঙাক্কী মীহুৎশিংগী মীতম খিল্লম্মি‍। ঙসি লৈবাকসিনা অদুগুম্বা মফমদুদা নেতাজীগী মীতম খিন্দুনা অনৌবা, মপাঙ্গল কনবা ভারতকী থৱায় অমা খিল্লে‍। তশেংনমক মীকুপ অসি পুৱারী ওইরবনি, মীকুপ অসি চাউথোকচনিংঙাইনি‍। ঙসিগী নুমিৎ অসিদা মসিবু উবা ফংজরিবা ঐখোয় পুম্নমক লাইবক ফরবনি, মসিগী শাখি ওইহৌরবনি‍।

মরূপশিং,

সুভাসচন্দ্র বোস ফম অমসুং মচাক্কী শিংনবগী ৱাংমদা থবক তৌখিবা অথোইবা মীশক অমনি‍। মহাকপু মীয়াম্না কয়াম য়াবগে হায়ববু মালেম পুম্বনা মহাকপু লুচিংবা ওইনা লৌরম্মি‍। মাগী মফমদা থৌনা, মশাবু ইকায়খুম্নজবা লৈরম্মি‍। মাগী মফমদা ৱাখল, মঙলান লৈরম্মি‍। মাগী মফমদা মীৎয়েঙ শান্না য়েংবগী মতিং, মওং মতৌ লৈরম্মি‍। নেতাজী সুভাসনা হায়বিরম্মি – ভারত মশাগী পাউথোকচনিংঙাই ওইরবা শক্তমবু কাউথোক্কদবা লৈবাক নত্তনে‍। ভারতকী চাউথোকচনিংঙাই ওইরবা পুৱারী ভারতকী ঈদা য়াওখ্রবনি, মাগী চৎনবীদা য়াওখ্রবনি‍। নেতাজী সুভাসনা ভারতকী অরিবা লনশিংদা চাউথোকচবা পোক্লম্মি, অমদি ভারতপু হেক য়ারিবমখৈ থুনা মতমগা চুনবা থাক্তা পুখৎপা পাম্লম্মি‍। করিগুম্বা নীংতম্লবা মতুংদা ঐখোয়গী ভারতনা সুভাস বাবুগী লম্বীদা চৎলম্লবদি ঙসি লৈবাক অসি কয়া য়াম্না চাওখৎলমগনি‍। অদুবু লাইবক থিবদি, নীংতম্লবা মতুংদা ঐখোয়গী অথোইবা হীরো অসিবু কাউথোকপিখি‍। মহাক্কী ৱাখল্লোন, মহাক্কা মরী লৈনবা খুদম চাংদমশিং ফাওবা হন্না য়েংবিরমদে‍। সুভাস বাবুগী ১২৫শুবা মপোক কুমওন হৌদোকপগী তাঞ্জাদা ঐ কোলকতাদা মহাক্কী ময়ুমদা চৎনবগী খুদোংচাবা ফংখি‍। নেতাজীগা মরী লৈনবা মফমশিংদা মহাক্কী পুক্নিংদা ফাওখিবা ইথিল মফমদুদা ঐঙোন্দসু ফাওখি‍। নেতাজীনা পামজরম্বশিং পাঙথোক্ননবা লৈবাকসিনা ঙসি হোৎনরি‍। কর্তব্য পথতা নেতাজীগী খুদম লৈবসিনা মদুগী পাম্বৈ ওইরগনি‍। লৈবাক্কী চৎন-কাঙলোন অমসুং ফিরেপশিংদা সুভাস বাবুগী ৱাখল্লোনগী মমি তাহনবনা মহাকপু ইকায়খুম্নবগী মতিক চাবা খুদম ওইগনি‍।

ইচিল ইনাওশিং,

হৌখিবা চহি ৮সিদা ঐখোয়না নেতাজীগী ফিদম অমসুং মঙলান মমি তাবা ফিরেপ কয়া অমগী মথংদা অমা লৌখি‍। নেতাজী সুভাস চন্দ্র, অপুনবা ভারতকী অহানবা প্রধান ওইদুনা ১৯৪৭গী মমাঙদা অন্দমানবু মনীং তমহন্দুনা মচু অহুমগী ফিরাল পাইহনখি‍। মতমদুদা মহাক্না লাল কিলাদা মচু অহুমগী ফিরাল পাইহন্নিংবগী ইথিল, মঙলান শাগৎলম্মি‍। মহাক্না নীংজরম্বা অদু ঐনা থবক ওইনা ওন্থোক্লে, ঐনা অজাদ হিন্দ লৈঙাক্কী ৭৫শুবা কুমওনদা লাল কিলাদা মচু অহুমগী ফিরাল পাইহন্নবগী খুদোংচাবা ফংখি‍। লাল কিলাদা নেতাজীগী অমদি অজাদ হিন্দ ফৌজকা মরী লৈনবা ম্যুজিয়ম অমা শেম্নবগীদমক ঐখোয়গী লৈঙাক্না থৌরাং তৌরি‍।

মরূপশিং,

২০১৯দা গনতন্ত্র নুমিৎকী পেরেদতা অজাদ হিন্দ ফৌজকী লান্মীশিংনা শরুক য়াখিবা নুমিৎ অদু ঐ কাউবা ঙমদে‍। মতৌ অদুগুম্না ইকায়খুম্নবিনবগীদমক মখোয়না চহি কয়া ঙাইজখিবনি‍। অন্দমানগী নেতাজীনা মচু অহুমগী ফিরাল পাইহনখিবা মফমদুদা ঐ চৎপগী খুদোংচাবা ফংখি, মচু অহুমগী ফিরাল পাইহন্নবা তাঞ্জা ফংখি‍। মীকুপ অদু লৈবাক মীয়াম পুম্বগী চাউথোকচনিংঙাইগী মীকুপনি‍।

ইচিল ইনাওশিং,

নেতাজীনা ইহান হানবা ওইনা মনীং তমহনখিবা অন্দমানগী ঈথৎ অদুদা মতম খরগী মমাঙ ফাওবা লোইলমগী খুদমশিং শেংদোক চামথোক্তুনা থমবা তারম্মি‍। নীং তম্লবা ভারত্তসু হায়রিবা ঈথৎশিং অদুবু অঙ্গ্রেজ লৈঙাকপশিংগী মমিং থোন্দুনা লৈরম্মি‍। ঐখোয়না লোইলমগী খুদমশিংবু মুত্থত্তুনা ঈথৎশিং অদুবু নেতাজী সুভাসকা মরী লৈনবা ভারতকী মমিং থোনখি, ভারতকী শক্তম পীখি‍।

মরূপশিং,

নীংতম্বগী চহি ৭৫ মপুং ফারকপসিদা লৈবাকসিনা মশাগীদমক থৱায় মঙাগী মঙলান মঙলি‍। হায়রিবা থৱায় মঙাসিদা চাওখৎপগী অচৌবা পান্দমগী ফিরেপ, থৌদাংগী ইহুল য়াওরি‍। মসিদা লোইলমগী ৱাখল্লোন থাদোকপগী পাউজেল য়াওরি, ঐখোয়গী পুৱারীদা চাউথোকচবা ফাওনবগী ৱাফম য়াওরি‍। ঙসি ভারতকী মশাগী ফিদম, মশাগী মায়ওন লৈজরে‍। ঙসি ভারত মশাগী ফিরেপ, পান্দম লৈজরে‍। ঙসি ঐখোয়গী পথ, খুদমশিং ঐখোয়গী ওইজরে‍। ঙসি রাজপথকী শক্তম লোইশিনখিদুনা কর্তব্যপথ শেম্লিবা, ঙসি জোর্জ পঞ্চমগী মীতমগী খুদম লৌথোক্তুনা নেতাজীগী মীতম খিল্লিবা, মীনাই নাইথাংগী ৱাখল্লোন থাদোক্লমবগী অহানবা খুদম নত্তে‍। মসি অহৌবসু নত্তে, অরোইবসু নত্তে‍। থৌওং অসি পুক্নিং অমসুং ৱাখলগী নীংতম্বগী পান্দম ফংদ্রিবা ফাওবা লেপ্পা লৈতনা চত্থগদবা খোঙচৎ অমনি‍। লৈবাকসিগী প্রধানমন্ত্রীনা লৈদুনা লাক্লিবা মফম অদুগী মমিং ঐখোয়না রেস কোর্স রোদকী মহুত্তা লোক-কল্য়ান মার্গ হায়না থোনখ্রে‍। ঐখোয়গী গনতন্ত্র নুমিৎকী থৌরমদা হৌজিক্তি ভারতকী ঈশৈ নোংমাইগী খুৎশু-খুৎলায়শিংগী খোঞ্জেল তাবা ফংলে‍। বীতিং দি রিত্রীত থৌরমদা হৌজিক্তি লৈবাক নীংবগী ঈশৈশিং তাবা মতমদা ভারত মচা পুম্নমক্তা অপেন্বা পোক্লি‍। হন্দক্তসু ভারতকী নেভীনা লোইলমগী খুদম লৌথোক্তুনা শত্রপতি সিবাজী মহারাজকী খুদমবু শীজিন্নখ্রে‍। নেস্নেল ৱার মেমোরিএল শেগত্তুনা লৈবাকসিনা লৈবাক মীয়ামগী চহি কয়াদগী মঙজরকপা মঙলান মঙফাওনহল্লে‍।

মরূপশিং,

পুরক্লিবা অহোংবশিং অসি খুদমশিংখক্তদা নত্তে, অহোংবশিং অসি লৈবাকসিগী মওং মতৌগী শরুক ওইখ্রবনি‍। ঙসি লৈবাকসিনা অঙ্গ্রেজশিংগী মতমদগী চৎনরকখিবা চৎন-কাঙলোন চা কয়া হোংদোকখ্রে‍। ভারতকী বজেৎ, চহি কয়াগী মমাঙদগী ব্রিতিস পার্লিয়ামেন্ত মতমগী মওং মতৌ লৌদুনা পুথোক্লম্বা, মদুগী মতম অমসুং তাংসু হোংদোক্লে‍। নেস্নেল এজুকেসন পোলিসীগী মখাদা হৌজিক্তি মীরমগী লোল তমদবা য়াদবগী ফীভমদগীসু নহাশিংবু মনীং তমহল্লি‍। মসিনা তাকপদি ঙসি লৈবাকসিগী ৱলখল্লোন অমদি মওং মতৌ অনিমক লোইলমগী ৱাখল্লোন্দগী মনীং তম্বা ফংলে হায়বসিনি‍। হায়রিবা নীংতম্বা অসিনা ঐখোয়বু চাওখৎলবা ভারতকী পন্থুং য়ৌনা পুদুপা চৎকদৌরিবনি‍।

মরূপশিং,

মহাকবি ভরতিয়ারনা ভারতকী চাউথোকচনিংঙাই ওইবা হীরমশিংগী মরমদা তামিল লোন্দা য়াম্না ফজবা শৈরেং অমা ইরম্মি‍। শৈরেং অসিগী মমিংদি – পারুকুল্লৈ নল্ল নাদঅ-য়িঙ্গল, ভারত নাদ-অ, হায়রিবা মহাকবি ভরতিয়ারগী শৈরেং অসি ভারত মচা পুম্নমকপু চাউথোকচবা ফাওহনগদবা শৈরেংনি‍। মহাক্কী শৈরেংগী ৱাহন্থোক্তি, ঐখোয়গী লৈবাক ভারত, মালেম পুম্বদা খ্বাইদগী অথোইবনি হায়বনি‍। ৱাখল লৌশিংদা, ফিদমদা, শক্তমদা, চান-থক্নবা পোত্থোকশিংদা, ঈশৈ নোংমাইদা, ইরম্বা শৈরেংশিংদা, ঐখোয়গী লৈবাক ভারত, মালেম পুম্বদা অথোইবনি‍। থৌনা ফবদা, লান্মীশিংগী লিংজেলদা, মিনুংসিদা, অতোপ্পগী থৌগলদা, পুন্সিগী অচুম্বা লম্বী থিবদা, কাঙলোনগী থিজিন হুমজিনবদা, ঐখোয়গী লৈবাক ভারত, মালেম পুম্বদা অথোইবনি‍। তামিল অইবা ভরতিয়ারগী, মহাক্কী শৈরেং অসিগী ৱাহৈ অমমমবু, ৱাখল্লোন অমমমবু পুক্নিংদা খন্থবিয়ু‍।

মরূপশিং,

লোইলমগী মতমদা মালেম পুম্বদা মসিনা ভারতকী খোল্লাউ ওইখি‍। মসি ঐখোয়গী নীংতম লান্মীশিংগী খোল্লাউ ওইরম্মি‍। ভরতিয়ারনা মাগী শৈরেংদা শৈথারম্লিবা ভারত অদুগুম্না অথোইবা ভারত ওইহন্নবগীদমক ঐখোয়না হোৎনবা তাই‍। অদুগা মদুগী খোঙহৌ কর্তব্য পথ অসিদগী ওইগদবনি‍।

মরূপশিং,

কর্তব্য পথ শুপ্নতগী চেক-নুংগী লম্বী নত্তে‍। মসি ভারতকী মীয়ামগী লৈঙাক্কী মমাঙগী অমদি তুংগী ফিদমশিংগী অহিংবা লম্বীনি‍। মফমসিদা লৈবাক মীয়াম্না লাকপদা, নেতাজীগী খুদম, নেস্নেল ৱার মেমোরিএল, হায়রিবশিং অসিনা কয়া য়াম্না পুক্নিং থৌগৎকনি, মখোয়দা থৌদাংগী পোৎলুম অমা থাঙ্গৎকদৌরিবনি‍। মফম অসিদা লৈবাকসিগী লৈঙাক্না থবক তৌরি‍। অদোমসু খনবিয়ু, লৈবাকসিনা মীয়ামগী থৌগল তৌনবগী থৌদাং শিন্নখিবশিংদুদা কমদৌনা রাজপথনা মীয়ামগী থৌগল তৌনবগী ইথিল পীগদৌরিবনো? লম্বী অসিনা রাজপথ ওইরবদি মফমসিদগী চৎকদৌরিবা খোঙচৎ অসি মীয়ামগী কমদৌনা ওইগদৌরিবনো? রাজপথ, ভারতকী মীয়াম্না মীনাই ওইনা লৈরম্বা ব্রিতিস লৈঙাক্কী ওইরম্মি‍। রাজপথকী ৱাখল্লোনসু লোইলমগী খুদম্নি, মসিবু ঙাক্তুনা থম্বসু মীনাই নাইথাংগী খুদম্নি‍। ঙসি মসিগী অর্কিতেকচরসু হোংদোক্লে, অমদি মসিগী থৱায়সু হোংদোক্লে‍। হৌজিক্তি লৈবাকসিগী এম.পি.শিং, মন্ত্রী, ফম্নাইবশিংনা লম্বী অসি ফাওদুনা চৎপা মতমদা মখোয়গী মফমদা কর্তব্যপথনা লৈবাক্কী থৌদাংগী ইথিল পীরগনি, মখোয়দা অনৌবা ইনোৎ হাপ্লগনি, পুক্নিং থৌগৎলগনি‍। নেস্নেল ৱার মেমোরিএলদগী হৌরগা কর্তব্যপথ ফাওরগা রাস্ত্রপতি ভবন ফাওবগী মফম অসিদা লৈবাক্না মাঙদা, লৈবাক্না অথোইবনি হায়বগী ৱাখল্লোনগী মমি তারগনি‍।

মরূপশিং,

ঙসিগী তাঞ্জা অসিদা কর্তব্য পথপু শেম্বখক নত্তনা মখোয়গী শিন্ফমগী হৈশিংবনা লৈবাক অসিবু চাউথোকচবগী লম্বী তাক্লিবা ঐখোয়গী শিন্মী মরূপশিংগী মফমদা অখন্ননবা ইকোক নোঞ্জরি‍। অদুগুম্বা শিন্মীশিং অদুগা উননবগী তাঞ্জাসু ঐনা ফংখি‍। মখোয়গা ৱারী শানবা মতমদা লৈবাকসিগী লায়রবা, শিন্মী অমসুং মীচম মীয়ামগী পুক্নিংদা ভারতকী মঙলান কয়া য়াম্না লৈবগে হায়বদু ঐঙোন্দা ফাওরকখি‍। মখোয়গী হুমাং শিন্থহন্দুনা অদুগুম্বা মঙলানশিং অদুবু মখোয়না মঙফাওনহল্লি অমদি ঙসিগী তাঞ্জা অসিদা লৈবাক্কী তুংগী চাওখৎ লমজেলদা খোঙজেল হাপ্লিবা লৈবাকসিগী লায়রবা শিন্মী খুদিংমকপু লৈবাক্কী মায়কৈদগী থাগৎচবা ফোঙদোকচরি, মখোয়দা ইকোক নোঞ্জরি‍। ঙসি ঐনা হায়রিবা শিন্মী ইচিল ইনাওশিংগা উনবা মতমদা, মফমসিদা থবক শুখিবা শিন্মীশিং অমসুং মখোয়গী ইমুং মনুংশিং হন্দক্কী ২৬ জনুৱারী অসিদা ঐগী অখন্নবা মীথুং ওইহনগনি হায়না হায়খি‍। অনৌবা ভারত অসিদা শিন্মীশিং অমসুং মখোয়গী থৌদাংবু ইকায়খুম্নবগী চৎনবী অমা লাকপসিদা ঐ নুংঙাইবা ফাওই, হায়রিবা চৎনবী অসি মতম পুম্বা হিংদুনা লৈহৌরসনু‍। অদুগা মরূপশিং, চৎন-কাঙলোন্দা হোংদোক হোংজিন তৌরকপা মতমদা শেমগৎ শাগৎপগী মতৌসু হোংদোক হোংজিল লাক্কনি‍। মরম অসিনা লৈবাকসিনা মাগী শিন্মীগী পাঙ্গলদা চাউথোকচবা ফাওরি‍। ‘শ্রম এব জয়তে’ হায়বসিনা ঙসি লৈবাকসিগী লাইৱা ওইহৌরসনু‍। মরম অসিনা, বনারসতা, কাসীদা, বিস্বানাথ ধাম মীয়ামগী মফমদা কত্থোকপগী তাঞ্জাদা শিন্মীশিংবু ইকায়খুম্নবগী মতৌ লৈখি‍। প্রয়াগরাজ কুম্ভকী শেংলবা থৌরমদা শিৎ-শেংলিবা শিন্মীশিংগী তৌবিমল খঙবা উৎখি‍। নুমিৎ খরনিগী মমাঙদা ইরমদমসিদা শাজবা ক্রুজ ৱারসিপ আই.এন.এস. বিক্রান্ত পুথোকখ্রে‍। মতমদুদসু আই.এন.এস. বিক্রান্ত শাবদা অহিং নুংথিল খঙদনা থবক শুবিখিবা শিন্মী ইচিল ইনাওশিং অমসুং মখোয়গী ইমুং মনুংশিং উনবগী তাঞ্জা ফংখি‍। মখোয়গা উনরগা মখোয়গী তৌবিমল খঙবা উৎচখি‍। শিন্মীশিংবু ইকায়খুম্নবগী চৎনবী অসি লৈবাকসিগী চৎনবগী থানবা য়াদ্রবা শরুক অমা ওইরক্লি‍। অনৌবা পার্লিয়ামেন্ত শঙ্গাখ্রবা মতুংদা মদুদা থবক য়াওখিবা শিন্মীশিংবুসু অখন্নবা গেল্লরী অমদা মফম পীখি‍। গেল্লরী অসিনা লাক্কদৌরিবা মীরোলশিংদা লোকতন্ত্রগী মরুমদা সংবিধান অমা লৈরগদি মদু অতোপ্পা মীওইশিং অমসুং শিন্মীশিংগী কত্থোকপগী থৌদাংদুনি হায়বা নীংশিংহল্লগনি‍। ৱাখল্লোন অসি লৈবাক মীয়াম পুম্বদা কর্তব্যপথনসু পোকহনগনি‍। মসিনা শিন্মীগী মায় পাকপগী লম্বী তাক্কদৌরিবনি‍।

মরূপশিং,

ঐখোয়গী থৌগল্লোন্দা, ঐখোয়গী মওং মতৌদা, ঐখোয়গী মচাক মথুমদা, ঐখোয়গী ইনফ্রাস্ত্রকচরদা অনৌবা মতমগী, অমৃৎকালগী মরুওইবা পন্থুং য়াওরি‍। অদুগা মরূপশিং, ঐখোয়না ইনফ্রাস্ত্রকচরগী মতাঙদা খন্নবদা মী অয়াম্বগী পুক্নিংদা লম্বী অমসুং ফ্লাইওভরগী মমি তারমগনি‍। অদুবু অনৌবা ভারতকী ইনফ্রাস্ত্রকচর শেমগৎপগী মওংদি মদুদগীসু হেন্না মীৎয়েঙ চাউই‍। ঙসি ভারতনা সোসিএল ইনফ্রাস্ত্রকচর, ত্রান্সপোর্ত ইনফ্রাস্ত্রকচর, দিজিতেল ইনফ্রাস্ত্রকচরগা লোয়ননা কলচরেল ইনফ্রাস্ত্রকচরদসু খোঙজেল য়াঙনা থবক পায়খৎলি‍। ময়ামগী মফমদা সোসিএল ইনফ্রাস্ত্রকচরগী খুদম পীজগে‍। ঙসি লৈবাকসিদা এইম্সকী মশিং হান্নদগী শরুক অহুম হেনগৎলে‍। মেদিকোল কলেজকী মশিং চাদা ৫০ হেনগৎলে‍। মসিনা ভারত ঙসিদি মীয়ামগী হকশেল ফগৎহন্নবগীদমক, মখোয়দা মেদিকেলগী মতমগা চুনবা খুদোংচাবা ফংহন্নবগীদমক করমবা মায়কৈদা থবক পায়খৎলিবগে‍ তাক্লি‍। ঙসি লৈবাকসিদা অনৌবা আই.আই.তি.শিং, ত্রিপল আই.তি., সাইন্তিফিক ইন্সতিত্যুসনশিংগী মতমগা চুনবা নেৎৱর্ক লেপ্পা লৈতনা শেমগৎলি‍। হৌখিবা চহি অহুমসিদা খুঙ্গংগী য়ুমথোঙ করোর ৬ মখায় হেনবদা পাইপগী ঈশিং ফংহনখ্রে‍। ঙসি লৈবাকসিগী দিস্ত্রিক্ত খুদিংদা অমৃৎ সরোবর ৭৫ শামগৎনবা অচৌবা মিসন অমা পায়খৎওই‍। হায়রিবা ভারতকী সোসিএল ইন্ফ্রাস্ত্রকচরশিং অসিনা খুন্নাইগী অচুম্বা ৱায়েলবু হেন্না চেৎশিনহল্লে‍।

মরূপশিং,

ত্রান্সপোর্ত ইন্ফ্রাস্ত্রকচর চাওখৎহন্নবগীদমক ঙসি ভারতনা পায়খৎলিবা থবকশিং মমাঙদা অমুক্তা উখিদ্রিবা মওংদনি‍। নাকল অমদা ঙসি লৈবাক পুম্বদা খুঙ্গঙগী লম্বীশিং রেকোর্দ ওইবা মওংদা শেমগৎলি, অদুগা নাকল অমদনা রেকোর্দ ওইবা মশিংদা এক্সপ্রেস ৱেশিং শেমগৎলি‍। ঙসি লৈবাকসিদা খোঙজেল য়াঙনা রেলৱে ইলেক্ত্রিফিকেসনগী থবক পায়খৎলি‍ অমদি হায়রিবা খোঙজেলদুদা তোঙান তোঙানবা ময়োল্লমশিংদা মেত্রোশিং শেমগৎলি‍। ঙসি লৈবাকসিদা মশিং য়াম্লবা অনৌবা এয়রপোর্তশিং শেমগৎলি অমদি ঈশিং লম্বীগী মশিংসু খোঙলৈ থুনা হেনগৎলক্লি‍। দিজিতেল ইন্ফ্রাস্ত্রকচর শেমগৎপদসু ঙসি ভারতনা মালেমগী মাঙজিল থাবা লৈবাকশিংগী মরক্তা মফম কনবা ঙম্লে‍। পঞ্চায়ত লাখ অমা মখায় হেনবদা ওপ্তিকেল ফাইবর য়ৌহন্দুনা দিজিতেল পেমেন্তকী অনৌবা রেকোর্দ থমদুনা ভারতকী দিজিতেলগী খোঙজেলবু মালেম পুম্বনা শোন্নরি‍।

ইচিল ইনাওশিং,

ইনফ্রাস্ত্রকচর শেমগৎপগী থবকশিং অসিগী মরক্তা ভারত্তা কলচরেল ইনফ্রাস্ত্রকচরগী লমদা পায়খৎলিবা থবকশিংগী মরমদদি কা হেন্না ঙাঙনবা তাদ্রি‍। প্রসাদ স্কীমগী মখাদা লাইফম কয়া শেমজিন শাজিনবগী থবক পায়খৎলি‍। কাসী-কেদরনাথ-সোমনাথতগী হৌরগা করতারপুর সাহিব কোরিদোর ফাওবগী পায়খৎলিবা থবকশিং অঙকপগী মওংনি‍। অদুগা মরূপশিং, ঐখোয়না কলচরেল ইনফ্রাস্ত্রকচরগী ৱা খন্নবা মতমদা লাইনিংগা মরী লৈনবা মফমগী ইনফ্রাস্ত্রকচর শেমগৎপখক্কী ৱাফম নত্তে‍। ঐখোয়গী পুৱারীগা মরী লৈনবা ইনফ্রাস্ত্রকচর, ঐখোয়গী লৈবাক্কী হীরো অমদি হীরোইনশিংগা মরী লৈনবা, ঐখোয়গী চৎনবীগা মরী লৈনবা মফমশিংসু চপ মান্ননা শেমগৎ শাগৎপগী থবক পায়খৎলি‍। সরদার পতেলগী স্তেচ্যু ওফ য়ুনিতী ওইরবসু নৎত্রগা ত্রাইবেল নীংতম লান্মীশিংগী মফমদা কৎচবা ম্যুজিয়ম ওইরবসু, পি.এম. ম্যুজিয়ম ওইরবসু নৎত্রগা বাবা সাহেব অম্বেদকর মেকোরিএল, নেস্নেল ৱার মেমোরিএল ওইরবসু নৎত্রগা নেস্নেল পুলিস মেমোরিএল ওইরবসু পুম্নমক অসি কলচরেল ইনফ্রাস্ত্রকচরগী খুদমশিংনি‍। লৈবাক অমগী শক্তমদা ঐখোয়গী চৎনবী, ঐখোয়গী মমল করিনো হায়বদু মখোয় ময়ামসিনা তাক্লি অমদি ঐখোয়না মসিবু শেমগৎ শাগৎপগী থবক পায়খৎলি‍। মঙলান চাওবা ভারত অমগীদমক সোসিএল ইনফ্রাস্ত্রকচর, ত্রান্সপোর্ত ইনফ্রাস্ত্রকচর, দিজিতেল ইনফ্রাস্ত্রকচরগা লোয়ননা কলচরেল ইনফ্রাস্ত্রকচরনা খোঙজেল হাপকদৌরিবনি‍। ঙসি লৈবাকসিনা কর্তব্যপথকী শক্তমদা ফজরবা কল্চরেল ইনফ্রাস্ত্রকচরগী খুদম অমা উবা ফংবসিদা ঐ নুংঙাইবা ফাওই‍। আর্কিতেকচরদগী হৌরগা ফিদম ফাওবদা মফমসিদা ভারতকী নাৎ চৎনবগী মমি উবা ফংগনি, অদুগা তমশিনবা য়াবা কয়াসু উবা ফংগনি‍। ঐনা লৈবাক মীয়াম পুম্বদা হায়জরি, পুম্নমক্কী মফমদা পাউকৎচরি, লেঙবিরকউ, নৌনা শেমদোক্লবা কর্তব্যপথ অসিদা লেঙবিরক্তুনা য়েংবিরু লাউ‍। মসিদা অদোম্না ভারতকী তুংগী শক্তমগী মমি উবা ফংজনি‍। মফমসিগী ইথিলনা অদোমবু অথোইবা লৈবাক অমগী অনৌবা মঙলান অমসুং অনৌবা থাজবগী ইথিল পোকহনগনি অমদি হয়েংদগী হৌরগা নুমিৎ হুম্নি হায়বদি ইরায়, থাঙজ অমসুং নোংমাইজিং নুমিত্তা মফমসিদা নেতাজী সুভাস বাবুগী পুন্সিদা য়ুম্ফম ওইবা দ্রোন সো নুমিদাংৱাইরমগী মতমদা উৎকদৌরি‍। অদোম মফমসিদা লেঙবিরকউ, অদোম অমদি অদোমগী ইমুং মনুংগী ফোতো নম্বিয়ু, সেল্ফী নম্বিয়ু‍। হায়রিবা ফোতোশিং অদু হেসতেগ কর্তব্যপথ হায়না থাদুনা সোসিএল মিদিয়াদা শোয়দনা থাগৎপিরকউ‍। মফম অসি দিল্লীগী মীয়ামগী থম্মোয়গী মিহুলনি হায়বা ঐ খঙই, মফমসিদা নুমিদাংৱাইরমদা মশিং য়াম্লবা মীয়াম্না ইমুং মনুং পুদুনা লাকই, মতম লেল্লি‍। কর্তব্য পথকী প্লানিং, দিজাইনিং অমসুং লাইতিং হায়রিবা ফীভম অসিবু মাঙদা থম্লগা শেমখিবনি‍। কর্তব্যপথকী ইথিল অসিনা লৈবাকসিদা থৌদাংগী ইথিল পীদুনা ঐখোয়বু অনৌবা অমদি চাওখৎলবা ভারতকী পন্থুং তম্না পুদুনা চৎপদা মতেং পাংলগনি হায়না ঐনা থাজৈ‍। থাজবা অসিগা লোয়ননা, ময়াম পুম্নমকপু অমুক্কা হন্না থাগৎচরি‍। ঐগা লোয়ননা লাউবিয়ু, ঐ নেতাজী হায়না লাউজরক্কে ময়াম্না অমর রহে! অমর রহে! হায়না লাউবিরকউ‍।

নেতাজী অমর রহে!

নেতাজী অমর রহে!

নেতাজী অমর রহে!

ভারত ইমানা য়াইফরে!

ভারত ইমানা য়াইফরে!

বন্দে মাতরম!

বন্দে মাতরম!

বন্দে মাতরম!

হন্না হন্না থাগৎচরি!

Explore More
পি.এম.না ৭৬শুবা নীংতম নুমিৎকী থৌরমদা লাল কিলাগী লানবন্দগী জাতি মীয়ামদা থমখিবা ৱারোল

Popular Speeches

পি.এম.না ৭৬শুবা নীংতম নুমিৎকী থৌরমদা লাল কিলাগী লানবন্দগী জাতি মীয়ামদা থমখিবা ৱারোল
Phone exports more than double YoY in April-October

Media Coverage

Phone exports more than double YoY in April-October
...

Nm on the go

Always be the first to hear from the PM. Get the App Now!
...
সোসিয়েল মিদিয়াগী মফম 28নবেম্বর, 2022
November 28, 2022
Share
 
Comments

New India Expresses Gratitude For the Country’s all round Development Under PM Modi’s Leadership