ভারতকী G20 মীফমগা মরী লৈনবা চেফোঙ মরি ফোঙখ্রে
“নহারোলশিংনা তুংদা লেপ্পদগী অসিগুম্বা অচৌবা থৌরমশিং মাইপাকপা অমা ওইখিবনি”“হৌখিবা নুমিৎ ৩০দা হিরম খুদিংমক্তা মমাঙদা অমুক্তা পাংথোকখিদ্রিবা থবকশিং উখি। ভারতকী থবকশিং চাংদম্নবগী ৱাংমদা লৈখি”“অমতা ওইনা য়ানখিবা দিল্লি দিক্লারেসন মালেম শীনবা থুংনা হেদলাইনশিং ওইখ্রে”“অকনবা দিপ্লোমেতকী থবকশিংনা মরম ওইদুনা, ভারতনা অনৌবা খুদোংচাবশিং, অনৌবা মরুপশিং অমসুং অনৌবা কৈথেলশিং ফংলে, নহারোলশিংদা অনৌবা খুদোংচাবশিং পীরে”“ভারতনা G20 মীয়াম্না লমজিংবা লৈবাক্কী খোঙজং অমা ওইহনখ্রে”“ঙসিদি, পুকচেল শেংবশিং মনা ফংলে অদুগা পুকচেল শেংদবশিংনা চৈরাক ফংলে”“লৈবাক্কী চাউখৎপগী খোঙচত্তা পুকচেল শেংবা অমসুং তুংদু-লৈতাবা লৈঙাক লৈহনবা তঙাইফদে”“ঐগী থৌনা ভারতকী নহারোলশিংগী খুত্তা লৈরে”“মরুপশিং, ঐগা লোয়ননা চৎমিন্ননবা ঐনা অদোমগী মফমদা হায়জরি। ঐখোয়গী মাঙদা চহি ২৫ লৈরে, চহি ১০০গী মমাঙদা মখোয়না শ্বারাজগী খোঙজং চঙশিনখি, ঐখোয়না নুংঙাই-য়াইফনবা থবক পায়খৎলি”লৈবাক্কী তোঙান-তোঙানবা য়ুনিভর্সিতীশিংগী ভাইস চান্সেল্লর, প্রোফেসর, মখল কয়াগী ইন্সতিত্যুসনগী মীহুৎ অমসুং ঐহাক্কী নহা ওইরিবা মরুপশিং! ঙসি ভারত মন্দপম অসিদা ঐখোয়গা লৈমিন্নরিবা মীয়াম অসিদগী মশিং হেনবা মীয়াম অমনা ঐখোয়গা ওনলাইন্দা লৈমিন্নরি। ঐহাক্না পুম্নমকপু G20 য়ুনিভর্সিতী কন্নেক্ত হায়রিবা থৌরম অসিদা তরাম্না ওকচরি, অদুগা অদোম নহারোলশিংবু ঐহাক্না ইকায় খুম্নজরি।
মরুপশিং,
ঙসিদগী চয়োল অনিগী মমাংদা মসিগী ভারত মন্দপম অসিদা মীয়াম্না পুমথন থনখিবনি। মফম অসি তসেংবা ‘হেপ্পনিং প্লেস’ অমা ওইখিবনি। অদুগা ভারত মন্দপম অসিমক্তা তুংগী মতমগী ভারতনা শরুক য়াবসিদা ঐহাক্না নুংঙাইবা ফাওই। ভারতনা G20 থৌরম্বু অৱাংবা থাক অমদা থমখিবা অসিবু উরুবদা মালেম পুম্বনা ঙক্নরি। ঐহাক্তি মসিদা করিমত্তা অঙকপা ফাওদে হায়বা অদোম খঙবীবরা? অসুক য়াম্না চাউবা থৌরম অসিগীদমক্তা নুংঙাইবা, অঙকপা ফাওদ্রিবা করিগীনো হায়না অদোম খল্লমগনি। করিগীনো খঙবীবরা? মসিগুম্বা থৌরম্বু মায় পাকহন্নবগীদমক্তা অদোমগুম্বা নহারোল, নহা ওইরিবা মহৈরোইশিংনা থৌদাং লৌরবদা, থৌরম অসিনা করিগী মায় পাক্লোইদগে?
অদোম নহারোলশিংনা মরম ওইরগা, ঐখোয়গী ভারত অসি ‘হেপ্পনিং’ ওইরবনি। কয়া য়াম্না হেপ্পনিং ওইবগে হায়বসি ঐখোয়না মমাংগী নুমিৎ 30নিদা উখ্রবনি, ময়েক শেংনা উবা ঙমখ্রবনি। অদোমসু মমাংগী নুমিৎ 30 অসিবু অমুক্তা নীংশিংবীয়ু। ঐহাকপু ঙসিদি অদোম নহাশিংগী মাঙদা লাক্লবনিনা, নুমিৎ 30 অসিগী রিপোর্ত কার্দ অমুক্তা থমজগে। অনৌবা ভারতকী স্পীদ অমসুন স্কেল অনিমক মসিদা উবা ফংগনি।
মরুপশিং,
মীহুন্না খৌনাওদা চোংখিবা ওগস্ত 23গী নুমিৎ অদু অদোম্না ঙসি ফাওবা নীংশিংলমগনি। অশোয় অঙাম অমত্তা থোক্তনা মায় পাকপা ওইবীয়ু হায়না মীপুম খুদিংনা লাই খুরুম্নখিবনি। অদুদগীদি, পুম্নমক্কী মায়থোং মকা লাম্নখি অমসুং পাউজেল অমা তাবা ফংলকখি। “ভারতনা থা লৈমায়দা খোঙদারে”। ওগস্ত 23গী নুমিৎ অসিবু ঐখোয়গী লৈবাক্না নেস্নেল স্পেস দে হায়না অমর ওইহনখ্রে। মদুগী মতুংদা করি অমুক পাংথোকখি? শোমদনা থাগী মিসন মায় পাক্লে, অদুগা নাকল অমদনা নুমিৎকী মিসন অমা অমুক হৌদোক্লে। ঐখোয়গী চন্দ্রয়ান্না করিগুম্বা কিলোমীতর লাখ 3 চৎলবদি, নুমিৎকী মিসন অসিনা কিলোমীতর লাখ 15 ফাওবা চৎকনি। ঐহাক্কী ইফমদা অমুক্তা হায়বীরো, ভারতকী রেঞ্জকা চাংদম্নবা কনানা ঙমগদগে?
মরূপশিং,
মমাংগী নুমিৎ 30দা ভারতকী দিপ্লোমেসীনা অনৌবা অৱাংবা থাক্তা য়ৌখি। G20গী মমাংদা সাউথ অফ্রিকাদা BRICS সম্মিৎ পাংথোকখি। ভারতকী হোৎনজমন্দগী BRICS খুন্নাইদা অনৌবা লৈবাক 6 য়াওখি। সাউথ অফ্রিকাগী মতুংদা ঐহাক্না গ্রীস্তা চৎখি। খোঙচৎ অসি চহি 40গী মনুংদা ভারতকী প্রধান মন্ত্রী অমগী অহানবা খোঙচৎনি। অফবা থবক খুদিংমক পাংথোক্না অদোম্না ঐহাকপু ফম্বাক অসিদা থম্বীরিবনি। G20 সম্মিৎকী হেক মমাংদা ঐহাক্না ইন্দোনেসিয়াদা মালেমগী লুচিংবা কয়াগা উন্নখি। মদুগী মতুংদা, G20দা মসিগী মন্দপম অসিমক্তদগী মালেমগী অচৌবা ৱারেপ কয়া অমুক লৌনখি।
ঙসিগী মতমগী পোলারাইজ ইন্তর্নেস্নেল এতমোসফিয়র অসিদা লৈবাক কয়া অমনা অমত্তা ওইনা ফম্বাক অমদা লাকপা হায়বসি অপীকপা থবক্তি নত্তে মরুপশিং। অদোম্না পিক্নিক অমা শিনবা মতমদা কদাইদা চৎসিগে হায়না লেপ্পা ঙমদবনি। ঐখোয়গী নই দিল্লী দিক্লারেসন্দা 100% অয়াবা পীনরকপা অসিনা মালেমগী হেদলাইন ওইখিবনি। তাল্লক অসিদা, ভারৎনা মরু ওইবা খোঙথাং অমসুং ৱারেপ কয়াবু লুচিংখি। G20দা লৌখিবা ৱারেপশিং অসিদি 21শুবা চহি চাগী অপুনবা মাইকৈবু হোংদোকপা ঙম্বা ৱারেপনি। ভারতনা হোৎনবদগী G20দা অফ্রিকাগী য়ুনিয়নগী মফম ফংহনখি। ভারতনা গ্লোবেল বাইও ফুএল এল্লাইএন্সপু লুচিংখি। সম্মিৎ অসিমক্তদা ঐখোয়না পুন্দুনা ইন্দিয়া-মিদ্দল ইস্ত-য়ুরোপ কোরিদোর শেম্নবা ৱারেপ লৌখি। কোরিদোর অসিনা মহাদেশ কয়াবু অমত্তা ওইনা শম্নহনগনি। মসিনা মথংগী চহি চা কয়াদা কারবার অমসুং তুরিজম্বু খুমাং চাউশিলহনগনি।
মরুপশিং,
G20 হেক লোইখিবগা সাউদী অরাবিয়াগী ক্রাউন প্রিন্সকী খোঙচৎ অমা দিল্লীদা অমুক হৌখি। সাউদী অরাবিয়ানা ভারত্তা বিলিয়ন দোল্লর 100 থাদগদৌরি। ঐহাক্না লিরিবা ৱারি অসি মমাংগী নুমিৎ 30 খক্কী ৱারিনি। ঐহাক্না নুমিৎ 30 অসিদা মালেমগী লুচিংবা 85কা উন্নখি। মসি মালেমগী চাউরাকপা তংখায় অমনি। মসিদগী করি কান্নবা পুরকখি হায়না অদোম্না খল্লম্বা য়াই। ভারত অমসুং অতোপ্পা লৈবাক্কী মরী ফগৎলবা, অনৌবা লৈবাক কয়ানা ভারতকা পুল্লক্লবা, অদু ওইরবদি, ভারতকী ওইনসু অনৌবা খুদোংচাবা কয়া থোক্লকই, অনৌবা খোঙলোই ফংলকই, অনৌবা কৈথেল ফংলকই। অদুগা, মসিগী কান্নবা খুদিংমক ঐখোয়গী নহা ওইরিবা চারোন শুরোন্না ফংগনি।
মরুপশিং,
ঐহাক্না মমাংগী নুমিৎ 30গী রিপোর্ত কার্দ পীরিবসিদা, স্পেস সাইন্স অমসুং গ্লোবেল রিলেসনখক্কী ৱারি শারিবা করিগীনো অমসুং নুমিৎশিং অসিদা মসিগুম্বা থবক অসিখক পাংথোকপরা হায়না অদোম্না খল্লমগনি, অদুবু, মদু নত্তে। হৌখিবা নুমিৎ 30 অসিদা SC, ST, OBC, লাইরবা অমসুং মিদ্দল ক্লাসশিংগী মপাঙ্গল লৈহন্নবা খোঙথাং কয়া পায়খৎখি। বিশ্বকর্মা জয়ন্তী নুমিৎ, সেপ্তেম্বর 17দা পি.এম. বিশ্বকর্মা য়োজনা হৌদোকখি। স্কিম অসিদি ঐখোয়গী আর্তিসান, স্কিল লৈরবা আর্তিসান অমসুং নাৎকী ওইবা থবক তৌরিবা মীওইশিংগীনি। রোজগার মেলা পাংথোক্তুনা হৌখিবা নুমিৎ 30দা লাখ 1দগী হেনবা নহাশিংদা কেন্দ্র সরকারগী থবক কয়া পীখি। থৌরম অসিনা হেক হৌরকপদগী, মীওই লাখ 6 হেনবগী মফমদা থবক খনবগী চিথী খুৎশিন্নখ্রে।
হায়রিবা নুমিৎ 30নি অসিদা লৈবাক্কী অনৌবা পার্লিয়ামেন্তকী অহানবা সেসনশু ফমখ্রে। লৈবাক্কী অনৌবা পার্লিয়ামেন্ত হাউস্তা অহানবা বিল পাস তৌখ্রে, বিল অসিনা লৈবাক পুম্ববু চাউথোকহনখি। পার্লিয়ামেন্তনা নারিশক্তি বন্দন অভিয়ানগী মখাদা নুপীনা লুচিংদুনা চাউখৎপা পুরকপগী ৱাখল্লোনবু য়াখি।
মরুপশিং,
হৌখিবা নুমিৎ 30 অসিদা লৈবাক অসিদা ইলেক্ত্রিক মোবিলিতী চাউখৎহন্নবা অচৌবা ৱারেপ অমসু লৌখ্রে। ঐখোয়গী সরকারনা বেত্তরী ইনর্জী স্তোরেজ সীস্তেম্বু মপাঙ্গল হেন্না লৈহনবগী মাইকৈদা মশক নাইবা স্কিম অমগী অয়াবা পীখ্রে। নুমিৎ খরনিগী মমাংদা দ্বার্কাগী য়শোভুমী, ইন্তর্নেস্নেল কনভেন্সন সেন্তরবু লৈবাক মীয়ামদা খুৎশিন্নখি। নহাশিংনা শান্ন-খোৎনবগী হীরমদা অহেনবা খুদোংচাবা ফংহন্নবগীদমক্তা, ঐহাক্না ভরানসীদা ইন্তর্নেস্নেল ক্রিকেত স্তেদিয়মগী উরেপ উয়ুংসু তমখ্রে। ঐহাক্না নুমিৎ নিনিগী মমাংদা অনৌবা বন্দে ভারত ত্রেন 9 লম্থাখি। অসুক য়াম্বা ত্রেনশিংবু নোংমদা হৌদোকপা অসিমক ঐখোয়গী স্পীদ অমসুং স্কেলগী খুদম অমনি।
ভারতনা পেত্রোকেমিকেল সেক্তরদা মরোমদোম লেপচবা ঙম্বগী মতৌবু হেনগৎহন্নবগীদমক্তা অচৌবা খোঙথাং অমসু নুমিৎ 30নি অসিদা পায়খৎখি। মধ্য প্রদেশতা লৈবা রিফাইনরী অমদা পেত্রোকেমিকেল কমপ্লেক্স অমগী উরেপ উয়ুং তমখি। মধ্য প্রদেশমক্তদা রিন্যুএবল ইনর্জী, আই.তি. পার্ক, মেগা ইন্দস্ত্রীএল পার্ক অমা, অমসুং অনৌবা ইন্দস্ত্রীএল এরিয়া 6কী থবক হৌখ্রে। ঐহাক্না হায়খ্রিবা থবকশিং অসিগা নহাশিংগী স্কিলগা হকথেংনবা মরী লৈনৈ, নহাশিংদা থবক পীবগা মরী লৈনৈ। লিস্ত অসি য়াম্না শাংমনখিবনা মসি পনবখক্তদা মতম লোইনা চৎখ্রগনি। ঐহাক্কী নুমিৎ 30নিগী হিসাব পীরেকো, অদোমগী হিসাবতি কমদৌবা? ফিল্ম অনি য়েংখি হায়না অদোম্না হায়গনি। ঐহাক্না মসি হায়রিবসি, মালেম্না খোঙজেল য়াঙনা চৎলি, তোঙান-তোঙানবা হীরম কয়াদা থবক তৌরি হায়বা খঙহন্নীংবগীনি। ঐখোয়গী লৈবাক্কী নহাশিংনা মসিগী মতাংদা খঙফম থোকই।
মরুপশিং,
মশাদা থাজবা, খুদোংচাবা অমসুং ৱাখল চাউথোকপা মফমদা নহাশিংনা তুংলমচত্তা খোঙদাবা ঙম্মি। ভারতনা তুংলমচত্তা চঙশিল্লিবা মওং অসিদা অদোম্না নিং খা তম্না পাইনবা অতিয়া অসিবু অদোমগীদমক্তা হাংদোক্তুনা থম্লিবনি। ঐহাক্না অদোমদা হায়নীংবদি – চাউনা খল্লু। অদোম্না ফংবা ঙম্লোইদবা করিমত্তা লৈতে। অদোম্না পাংথোক্কে খনবদা লৈবাক্না মতেং পাংলোইদবা হীরম অমত্তা লৈতে। পুঙফম অমত্তবু লাইনা লৌথোক্কনু। পুঙফম অদুবু অনৌবা বেঞ্চমার্ক অমা ওইহন্নবা খল্লু। ৱাখল্লোন অসিগা লোয়ননা, ঐখোয়না G20বু অসুক য়াম্না নীংথিবা অমসুং অচৌবা ওইহল্লিবনি। ঐখোয়না G20 প্রসিদেন্সীবু শুপ্নগী দিপ্লোমেতিক অমসুং দিল্লীদখক মরু ওইবা থৌরম অমা ওইহল্লম্বা য়াই। অদুবু, ভারতনা মসিবু মীয়াম্না শাফু পীবা লৈবাক্কী ইহৌ অমা ওইহনখি। ভারতকী দাইবর্সিতী, দেমোগ্রাফী অমসুং দেমোক্রেসীগী পাঙ্গলনা G20বু অনৌবা অৱাংবা থাক্তা থম্বা ঙমখিবনি।
মশাদা থাজবা, খুদোংচাবা অমসুং ৱাখল চাউথোকপা মফমদা নহাশিংনা তুংলমচত্তা খোঙদাবা ঙম্মি। ভারতনা তুংলমচত্তা চঙশিল্লিবা মওং অসিদা অদোম্না নিং খা তম্না পাইনবা অতিয়া অসিবু অদোমগীদমক্তা হাংদোক্তুনা থম্লিবনি। ঐহাক্না অদোমদা হায়নীংবদি – চাউনা খল্লু। অদোম্না ফংবা ঙম্লোইদবা করিমত্তা লৈতে। অদোম্না পাংথোক্কে খনবদা লৈবাক্না মতেং পাংলোইদবা হীরম অমত্তা লৈতে। পুঙফম অমত্তবু লাইনা লৌথোক্কনু। পুঙফম অদুবু অনৌবা বেঞ্চমার্ক অমা ওইহন্নবা খল্লু। ৱাখল্লোন অসিগা লোয়ননা, ঐখোয়না G20বু অসুক য়াম্না নীংথিবা অমসুং অচৌবা ওইহল্লিবনি। ঐখোয়না G20 প্রসিদেন্সীবু শুপ্নগী দিপ্লোমেতিক অমসুং দিল্লীদখক মরু ওইবা থৌরম অমা ওইহল্লম্বা য়াই। অদুবু, ভারতনা মসিবু মীয়াম্না শাফু পীবা লৈবাক্কী ইহৌ অমা ওইহনখি। ভারতকী দাইবর্সিতী, দেমোগ্রাফী অমসুং দেমোক্রেসীগী পাঙ্গলনা G20বু অনৌবা অৱাংবা থাক্তা থম্বা ঙমখিবনি।
জি-20গী মীফম 200 হেন্না শহর 60দা ফমখি। জি-20গী থবক-থৌরমশিংদা মীয়াম করোর অমা মখায় হেনবনা মশাগী থৌদাং পাংথোকখি। মালেমগী থাক্কী থৌরম অমুক ফাওবা পাংথোকখিদ্রিবা তাইয়র 2 অমসুং 3গী শহরশিংগী মীয়াম্নসু মশক থোকপা পাঙ্গল উৎনখি। ঐহাক্না ঙসিগী থৌরমসিদা জি-20গীদমক্তা, ঐখোয়গী নহারোলশিংগী পুক্নিং থৌগৎপা পাম্মি। য়ুনিভর্সিতী 100 হেনবা অমসুং মহৈরোই লাখ 1না য়ুনিভর্সিতী কন্নেক্ত প্রোগ্রামগী খুত্থাংদা জি-20দা শরুক য়াবগীদমক্তা থাগৎপা পাম্মি। সরকারনা জি-20বু স্কুল, হাইয়র এজুকেসন অমসুং ইন্সতিত্যুসন অমদি স্কিল ইন্সতিত্যুসনগী মহৈরোই করোর 5গী মনাক্তা য়ৌহনখি। ঐখোয়গী মীয়াম্না চাউনা খনখি, অদুবু দেলিবর তৌখিবা মতৌ অদুনা মদুদগীসু হেন্না চাউখি।
মরুপশিং,
ভারতনা ঙসিদি মশাগী অমৃতকালগী মতমদা লৈরি। অমৃতকাল অসিদি অদোমগুম্বা অমৃত চারোন শুরোনগী মতম্নি। ঐখোয়গী লৈবাক্না ইং 2047দা নিংতম্বগী চহি 100 মপুং ফাগনি। মদুনা ঐখোয়গী পুৱারী ওইবা পুঙফম অমা ওইগনি। ইং 2047 ফাওবগী মতমসিদি অদোম্না ইশাগী তুংগী তুংগী পন্সি শেম্বগী মতম ওইগদৌরিবনি। হায়বদি, মথংগী চহি 25 অসিদি অদোমগী পুন্সিগী খ্বাইদগী মরু ওইবা মতম ওইগনি। মরম অদুনা, মসিগুম্বা মতমসিদি লৈবাক্কী চাউখৎ থৌরাংগা মরী লৈনবা হীরন কয়ানা অমত্তা ওইনা পুনবা মতম ওইরিবনি। মসিগুম্বা মতম অসি পুৱারীদা মমাংদা অমুক্তা লাকখিদ্রি অমসুং তুংদসু অমুক হন্না লাক্লরোই। ঙসিদি, ঐখোয়না মালেমদা খ্বাইদগী য়াঙনা চাউখৎলিবা শেন্মিৎলোন ওইরি, অদোম মসি খঙইকো? রেকোর্দ ওইবা তেল্লবা মতমদা ঐখোয়না 10শুবা থাক্তা লৈরম্বদগী 5শুবা থাক্তা লাকখি। মালেম্না ঙসি ভারত্তা থম্লিবা থাজবা অসি য়াম্না চাঊই, ভারত্তা ইনভেস্তমেন্ত তৌবগী চাং অসিদি রেকোর্দ ওইরবনি। ঙসিদি, ভারতকী মেন্যুফেকচরিং অমসুং সর্ভিস সেক্তরনা অনৌবা থাক্তা লেপ্লি, ঐখোয়গী এক্সপোর্তনা অনৌবা রেকোর্দ থম্লি। শুপ্নগী চহি 5গী মনুংদা, মীওই করোর 13 মখায়না লাইরবগী খয়াত্তগী মপান থোক্লকখি। মখোয়না ভারতকী অনৌবা মিদ্দল ক্লাস ওইরক্লে।
লৈবাক্কী সোসিএল ইনফ্রাস্ত্রকচর, ফিজিকেল ইনফ্রাস্ত্রকচর অমসুং দিজিতেল ইনফ্রাস্ত্রকচরনা অঙকপা খোঙজেলগা লায়ননা চাউখৎলক্লি। হন্দক্কী চহিসিদা, ফিজিকেল ইনফ্রাস্ত্রকচরদা লুপা করোর লাখ 10 হেনবগী ইনভেস্তমেন্ত তৌখি। ইনভেস্তমেন্ত অসিসু চহি খুদিংগী অদুম হেনগত্তুনা চৎলি। মসিনা ঐখোয়গী শেন্মিৎলোন্দা কয়া য়াম্না চাউবা শাফু পীগনি অমসুং অনৌবা খুদোংচাবা কয়া পীগনি হায়বা অদোমসু অমুক্তা খন্থবীয়ু।
মরুপশিং,
মসিদি অদোমগুম্বা নহারোলশিংগী খুদোংচাবশিংগী মতম্নি। ইং 2020গী মতুংদা চাউরাকপা মরুপ্লোই করোর 5না EPFO পেরোলগী মনুং চল্লকখি। মখোয়গী মনুংদগী মীওই করোর 3গা মখায়দি EPFOগী মনুংদা অহানবা ওইনা চঙলকপা অমসুং মমাংদা ফার্মগী থবক তৌরম্বা মীওইনি। মসিনা হায়বদি, অদোমগী নহারোলশিংনা ভারত্তা ফোর্মেল ওইবা থবক ফংবগী খুদোংচাবা হেনগৎলক্লি হায়বনি।
ইং 2014গী মমাংদা লৈবাক অসিদা স্তার্তঅপ 100দগী হন্থনা লৈরম্মি। ঙসিদি, মখোয়গী মশিংনা লাখ অমা হেল্লে, অমসুং স্তার্তঅপনা মতৌ অসিগুম্না চাউখৎলকপনা লৈবাক্কী মফমদা থবক্কী খুদোংচাবা কয়া শেমখি। ঙসিদি, ভারতনা মালেমগী খ্বাইদগী অনিশুবা চাউবা মোবাইল শাবা লৈবাক ওইরে। ঐখোয় অসি মোবাইল ফোনগী ইম্পোর্তর ওইরম্বদগী হৌজিক এক্সপোর্তর ওইরবনি। মসিনা মরম ওইরগা থবক কয়া অমসু লৈহনখি। দিফেন্স মেন্যুফেকচরিংগী সেক্তরদা লৈবাক অসিদা মমাংগী চহি খরদা চাউখৎ থৌরাং য়াম্না লাকখি। ইং 2014গা চাংদম্নবদা, দিফেন্স এক্সপোর্তনা শরুক 23 হেনগৎলে। মসিগুম্বা অচৌবা অহোংবা লাক্লবদি, দিফেন্স ইকোসীস্তেমগী অপুনবা সপ্লাই চেনগী মনুংদা থবক মশিং য়াম্না পীবগী খুদোংচাবসু অদুম লাক্কনি অমসুং লাকপসু লাকখি।
ঐখোয়গী নহা মরুপ কয়া অমদি থবক থীবা মীওই ওইবগী মহুত্তা থবক পীবা মীওই ওইবা পাম্মি হায়বা ঐহাক খঙই। সরকারগী মুদ্র য়োজনাগী মতেংদগী লৈবাক্কী অপীকপা কারবারশিংদা শেলগী মতেং পীখি। ঙসিদি, মীওই করোর 8না ফর্স্ত তাইম ওন্তোপ্রিনর ওইনা মশাগী কারবার কয়া হৌদোক্নরি। হৌখিবা চহি 9দা, কম্মন সর্ভিস সেন্তর লাখ 5 হাংদোকখ্রে। মখোয়শিং অসিদা মীওই অনিদগী মঙা ফাওবদা থবক পীরি।
মরুপশিং,
হায়রিবশিং অসি ভারত্তা ওইরক্লিবা রাজনীতিগী তংদু লৈতাবা, পোলিসী ময়েক শেংবা অমসুং ঐখোয়গী গনতন্ত্রগী ভেল্যুগী মরমদগী ওইথোক্লিবনি। হৌখিবা চহি 9দা শেঞ্জা থুমজা লাকশিন্নবা পুকচেল শেংনা হোৎনখি। ইং 2014দা মশাগী চহি তরা, তরামাথোই ওইবা মীওই কয়া অমা অদোমগী মরক্তা য়াওরমগনি। মতমদুগী পাউচেগী হেদলাইন্দা করি ইরম্মি হায়বা অদোম্না খঙলমদবসু য়াই। লৈবাক অসিবু শেঞ্জা থুমজানা পুম্মাং মাঙহল্লম্লবনি।
মরুপশিং,
লীকেজ অমসুং অরানবা খুদোংচাবা লৌবগী থৌওং থিংনবা তেক্নোলোজীদা য়ুম্ফম ওইবা পথাপ কয়া ঐখোয়না শেম্লে হায়বদা ঐহাক্না চাউথোকচবা ফাওজৈ। মখল কয়াগী রিফোর্ম পুরক্তুনা দলালীশিংবু তান্থোকপগী থৌরাং য়াৎখ্রে। পুকচেল শেংবশিংবু মনা পীরি, পুকচেল শেংদবশিংবুনা চৈরাক পীরি। মোদীনা মীওই কয়াবু জেলদা থাজিল্লে হায়না ঐহাক্কী ইফমদা হৌজিক্কা মরাল শীরিবা অসিদা ঐহাক্তি য়াম্না অঙকপা ফাওই। লৈবাক্কী পোৎ হুরাল্লবদি, মখোয় অদু কদাইদা লৈফম থোকপগে হায়বা ঐঙোন্দা অমুক্তা হায়বীয়ু। মখোয়বু কোইথী থিদুনা জেলদা থাজিনগদবা নত্ত্রো? অদোম্না পাম্বা থবক অদু ঐহাক্না তৌরিবনি। মসিদা মীওই খরদি য়াম্না ৱারে।
মরুপশিং,
চাউখৎ থৌরাংগী খোঙচৎ অসিবু মখা চত্থহন্নবা অমকপা লৈতবা, পুকচেল শেংবা অমসুং তংদু লৈতাবা লৈঙাকপগী মথৌ য়াম্না তারি। অদোম্না ভারতপু ইং 2047 ফাওবদা চাউখৎপা লৈবাক অমা ওইহনগনি লেপখ্রবনিনা, ইনক্লুসিব অমসুং মরোমদোম লেপচবা লৈবাক অমা ওইবদা কনামত্তা থিংবা ঙম্লরোই।
মরুপশিং,
ঐখোয়না নীংশিংগদবা ৱাফম অমসু লৈরি। অদোম্না অফবা তৌরক্কনি থাজবা থম্লিবসি ভারতখক নত্তে, মালেম পুম্বনা থাজবা থম্লিবনি। মালেম্না ভারত অমসুং ভারতকী নহাশিংগী মতিক মগুন অমসুং পরফোর্মেন্স অনিমক খঙলবনি। ভারতকী মচানুপা নত্ত্রগা মচানুপী ওইরবদি মহাক অদু করম্বা মীওই ওইরমগনি হায়বা মখোয়দা তাকপগী মথৌ তাদ্রে। মসি অচুম্বা ৱাফম ওইরবনি।
মালেম্না চাউখৎপা হায়বসিদা ভারত অমসুং ভারতকী নহাশিংনা চাউখৎপগী মথৌ য়াম্না তাই। লৈবাক অসিনা ওইথোক্লোই খনবা থৌওংশিংগী গেরেন্তী পীবা ঙম্লে, মসিগী মরমদি ঐখোয়গী নহাশিংগী পাঙ্গল অমসুং তৌবা ঙম্বগী মতিক খঙবননি। ঐহাক্না হৌজক্তি, মালেমগী ফম্বাক খুদিংদা ভারতকী ৱাফম থম্বদা ইখৌ পোঙনা থম্বা ঙম্লইবসিগী ইথিলসু ঐহাক্কী নহাশিংগী পাঙ্গলনি। মরম অদুনা, ভারতকী নহাশিং অসিদি ঐহাক্কী অশেংবা পাঙ্গল অমা ওইরিবনি, ঐহাক্কী পাঙ্গল খুদিং মসিদা লৈরিবনি। অদুগা, অদোমগী তুংগী অফবা মতমগীদমক্তা ঐহাক্না অহিং নুংথীল নাইদনা হোৎনগনি হায়বগী ঐহাক্না থাজবা পীজরি।
অদুবু, মরুপশিং,
ঐহাক্না অদোমগী মফমদগী থম্বা থাজবা খরসু লৈ। ঙসিদি, অদোমগী মফমদগী করিগুম্বা খরা নিজগে। লান্নদি খল্লোইকো? ঐখোয় নহাদগী নিরিবা অসিবু করম্বা প্রধান মন্ত্রীনো হায়না অদোম্না খনবসু য়াই। ঐহাকপু মীখলদা মায় পাখল্লু হায়বা নত্তেকো, মরুপশিং। ঐহাক্কী পার্তীদা য়াওরো হায়বসু ঐহাক্না হাইরোই।
মরুপশিং,
ঐহাক্কীদি ইশাগী হায়বা অমত্তা লৈতে, ঐহাক্কী খুদিংমক লৈবাক্কীনি। অদুনা, ঐহাক্না অদোমদা নিরিবসে লৈবাক্কীদমক্তনি। স্বচ্ছ ভারতপু মায় পাকহনবদা অদোম নহাশিংগী অচৌবা থৌদাং য়াওরি। স্বচ্ছগ্রহ হায়বসি নুমিৎ নিনি হুম্নিগী থৌরম নত্তে। মসি লেপ্তবা ইহৌনি। মসিবু ঐখোয়গী হৈনবী ওইহনগদবনি। অদুনা, নুংশিরবা বাপুগী মপোক কুমওন তারিবা ওক্তোবর 2গী হেক নোংমা মমাং, ওক্তোবর 1দা লৈবাক অসিদা লু-নানবগী অচৌবা থৌরম অমা পাংথোক্কনি। মসিদা অদোম নহা মশিং য়াম্বনা শরুক য়াবীয়ু হায়বা ৱাফম থমজরি। য়াগনিকো? অদোমগী য়ুনিভর্সিতীদসু পাংথোক্কনি। অদোম্না মফম অমা লেপথোক্তুনা, মদুবু মপুং ফানা লু-নালহনবীয়ুকো।
ঐহাক্কী অনিশুবা হায়জবা অসিদি দিজিতেল ত্রাঞ্জেক্সনগা মরী লৈনৈ, UPIগা মরী লৈনৈ। ঙসিদি, মালেম পুম্বনা ভারত অমসুং UPIবু থাগৎনরি। মসিসু অদোমগী চাউথোকচনীংঙাইনি। অদোম্না পথাপ অসিবু য়াম্না থুনা য়াখি, অমসুং মসিগা মরী লৈনবা ঙক্নিংঙাই ওইরবা ইন্নোভেসন কয়াসু ফিন্তেক্তা পাংথোকখি। মসিবু চাউখৎহনবা, অনৌবা মাইকৈদা পুবগী থৌদাংসু ঐহাক্কী নহা মরুপশিংগীনি। য়ামদ্রবদা চয়োল অমগী মনুংদা, মীওই তরেৎকী মফমদা UPI চলায়বা, দিজিতেল ত্রাঞ্জেক্সন তৌবা তম্বীগনি হায়না অদোম্না ৱারেপ লৌবীগদরা? অহোংবা অওনবা হায়বসি উনা-উনা লাকপনি মরুপশিং।
মরুপশিং,
ঐহাক্না অদোমদা অহুমসুবা ৱাফম অমসু হায়জনীংই, মসিদি ভোকেল ফোর লোকেলগা মরী লৈনবনি। মরুপশিং, মসিবুসু অদোম্না চাউথোকহনবা ঙমগনি। অদোম্না মসিগী থৌদাং হেক লৌবদা, চাউখৎ থৌরাং লাক্কনি হায়বসি অদোমসু থাজবীয়ু। ঐহাক্না অদোমগী পাঙ্গলদা থাজৈ, অদোম্না ইশাগী পাঙ্গলদা থাজৈ থাজদে হায়বা ঐহাক খঙদে, অদুবু ঐহাক্তি থাজৈ। হৌজিক্কী মতম অসিদি কুহ্মৈগী মতম্নি। কুহ্মৈ মনুংদা লৈবা পোত্থোক খুদিংমক ভারত্তা শাবা লৈনবা হোৎনবীয়ু। ভারতকী লৈহাওগী মনম চেনবা, ভারত মচাগী হুমাং মনম য়াওবা পোত্থোক লৈদুনা খুদোল তম্বীয়ু। অদুগা, ভোকেল ফোর লোকেল খোঙথাং অসিসু কুহ্মৈ খক্তদা অকক্নবা লৈহল্লোইসি।
ঐ থবক অমা হায়গে, অদোম্না তৌনিকো? হোমৱাক য়াওদনা ক্লাস তৌগদৌবা নত্তে, তৌনিকো? মীওইখরদি করিমত্তা হায়দে। অদোম্না ইশাগী ইমুং মনুংগা লোয়ননা চে-কোলোম পায়রগা য়ুমদা করি করি পোত্থোক শিজিন্নবগে হায়বগী পরিং শেম্বীয়ু। মদুগী মরক্তগী লৈবাক অসিদা শাবনা করম্বনো, মীরম লৈবাক্তা শাবনো করম্বনো খন্দোকপীয়ু। করম্বা পোৎলম্না মীরমদা শাবনো হায়বা ঐখোয় খঙদ্রবনি। লৈবাক কনগে হায়বরদি মসি খঙবগী মথৌ য়াম্না তারে। ঐখোয়না লৈবাক অসিদা শাবা পোৎলমশিং শিজিন্নবা হৌরকপা মতমদা, মদুনা লৈবাক্কী ইন্দস্ত্রী অমসুং কারবারশিংদা মতেং য়াম্না পাংগনি। কয়া য়াম্না পাংগনি হায়বা অদোম্না খল্লুবসু ঙম্লোই। অপীক অপীকপা পোৎলমশিংনা অচৌবা মঙলান মঙফাওনহনবনি।
মরুপশিং,
ঐখোয়গী কেম্পসশিংসু ভোকেল ফোর লোকেলগী অচৌবা ময়োল ওইবা য়াই। ঐখোয়গী কেম্পস অসি মহৈ তম্বখক্কী নত্তনা ফেশনগী ময়োলসু ওইবনি। অদুগী নুমিৎনি, অদাগী নুমিৎনি হায়বা য়াম্না পাংথোকইকো? খাদীসু ঐখোয়গী কেম্পসতা ফেশন স্তেতমেন্ত অমা ঐখোয়না ওইহনবা য়াদবরা? মসি ওইহনবগী পাঙ্গল অদোম নহাশিংগী নাক্তা লৈ। অদোম্না ব্রান্দ, মার্কেত অমসুং দিজাইনরশিংবু অদোমগী অপাম্বগী মাইকৈদা পুরকপা ঙম্বগী মতিক লৈ। কোলেজ অমসুং য়ুনিভর্সিতী মনুংদা কলচরগা মরী লৈনবা থবক থৌরম কয়া অমা পাংথোকপনি। মসিদা ঐখোয়না খাদীগী ফেশন শো পাংথোকপা য়াইনা।
ঐখোয়না ঐখোয়গী বিশ্বকর্মা মরুপ, ত্রাইবেল মরুপশিংগী ক্রাফকী পোত্থোকশিংগী একজিবিসন পাংথোকপা য়াই। ভারতপু মরোমদোম লেপচবা ঙমহন্নবা, চাউখৎপা লৈবাক অমা ওইহন্নবা পাম্বৈদি মসিনি। ঐখোয়না লম্বী অসিদা চত্তুনা থবক য়াম্না শেম্বা য়াই। ঐহাক্না হায়খিবা পীক্লবা ৱাফম অহুম অসিনা কান্নবা কয়া য়াম্না পুরক্কনি হায়বা অদোমসু অমুক্তা য়েংবীয়ু।
ঐহাক্কী নহা ওইরিবা মরুপশিং,
ঐখোয়গী নহারোল অমসুং হৌরক্লিবা চারোন শুরোনশিংনা তৌগেবু খনখ্রবদি, অপাম্বা মহৈদি অদুম ফংবনি। ভারত মন্দপমগী অদোম্না হনখ্রবা মতুংদা, ৱাখল্লোন অসিগা লোয়ননা হনখিগনি হায়না ঐহাক্না থাজৈ। মসিনা ৱারেপ্তা ওন্থোক্তুনা অদোমগী পাঙ্গল শোইদনা উৎপীয়ু।
মরুপশিং,
মিৎকুপ অমখক কাইথোক্লগা অমুক্তং খন্থসি। লৈবাক্কীদমক্তা থৱাই থাবগী খুদোংচাবদু ঐখোয়দি ফংদ্রবনি। মরাইবক ফবা ভগৎ সিংহ, শুখদেব, চন্দ্রসেখরদি ফংখি, ঐখোয়দি ফংদে। অদুবু, ভারতকীদমক্তা হিংবগী খুদোংচাবদি ফংইনা। ঙসিদগী চহি 100গী মমাংগী ফিভমদু অমুক্তা নীংশিংসি, চহি 19, 20, 22, 23, 25গী মমাংগী মতমদু অমুক্তা য়েংবীয়ু। মখোয়না লৈবাকপু নিংখা তমহনগনি খনখিবনি, মসিগীদমক্তা পাংথোকফম থোকপা খুদিংমক পাংথোক্কনি খন্নখিবনি। অসুম্না মখোয়না থোকখিবনি। লাইরিকশিং উপুদা থমজিন্নখি, জেলদা চৎপনা হেন্না পাম্নখিবনি। ফাঁসি মথক্তা কাবা ফাওবা পাম্নখিবনি। মাঙদা লৈবা মাইকৈদা অদুমক চৎনখিবনি। মতমদুগী অকোয়বগী ফিভমদি কত্থোকপগী ৱাখল্লোন্না থনখি, ইমা লৈবাক্কীদমক্তা হিংবা অমসুং শিবগী ৱাখল্লোন চেৎনখিবনি। অদুগা, উনা-উনা চহি 25গী মনুংদা লৈবাক্না নিংখা তমখি। তমখিকো মরুপশিং? মখোয়গী হোৎনজমন্দগী ফংখিবনিকো? মদুগী চহি 25 অদুদা লৈখিবা লৈবাক্কী ৱাখল্লোন অদুনা ঐখোয়বু ইং 1947দা নিংতম্বা ফংহনখিবনি।
মরুপশিং,
ঐহাক্কা লোয়ননা চৎমিন্নরসি। ঐখোয়গী মাঙদা চহি 25 লৈরি। চহি 100গী মমাংদা ওইখিবগুম্না, ঐখোয়সু মদুগুম্বা নিংতম্বা অমসুং নুংঙাই য়াইফবগীদমক্তা চৎমিন্নরসি। মথংগী চহি 25 অসিদা লৈবাকপু শোইদনা নুংঙাই য়াইফহল্লসি। মদুগীদমক্তা তৌফম থোকপা খুদিং ঐহাক্না তুং হন্দনা পাংথোক্কনি। মরোমদোম লেপচবা নুংঙাই য়াইফবা ভারতকী থোঙ হাংদোক্লসি। মরোমদোম লেপচবা ভারতনা ইশাগী থাজববু অদুক্কী মতিক ৱাংনা থম্বীগনি। পান্দম অসিগা লোয়ননা চঙশিল্লসি, ঐখোয়না অমত্তা ওইনা পুন্দুনা ইং 2047 ফাওবদা লৈবাক অসিবু চাউখৎপা অমসুং নুংঙাই য়াইফবা লৈবাক ওইহল্লসি। মদুগী মতমদুদা ঐখোয়না পুন্সিগী খ্বাইদগী ৱাংবা থাক্তা লৈগদৌরিবনি। চহি 25গী মতুংদা ঐখোয়না লৈগদৌরিবা থাক অদুদি পুন্সিগী খ্বাইদগী ৱাংবা থাক ওইগদৌরিবনি।
মরুপশিং অদোমসু অমুক্তা খন্থবীয়ু। ঐহাক্না ঙসি হোৎনরিবা, ঐহাক্না হয়েং হোৎনগদৌরিবা, মদুনা অদোম্বু কদাইদা থমগনি খন্থবীয়ু। অদোমগী মঙলান মঙফাওনবদা কনামত্তা থিংবা ঙম্লোই। ঐহাক্না অদোমগী মফমদা গেরেন্তী পীরি, ভারতনা মালেমগী খ্বাইদগী অহুমসুবা চাউবা শেন্মিৎলোন ওইহনগনি। মসিদা ঐহাক্না অদোমগী মতেং পামজৈ, অদোম্না শৌগৎপীয়ু। ইমা ভারতকী তেংবাং পামজৈ। লৈবাক মীয়াম করোর 140গীদমক্তনি ঐহাক্না মসি পাংথোক্কদৌরিবসি।
ঐহাক্কা লোয়ননা অমুক্তা হায়বীয়ু – ভারত ইমানা য়াইফরে, ইশাগী ইতিক পুম্নমক পুথোক্তুনা লাওবীয়ু – ভারত ইমানা য়াইফরে।
পুম্নমকপু থাগৎচরি।
