ভারত গ্রামিন মহোৎসবতা প্রধান মন্ত্রীনা ৱা ঙাংখিবগী মপুংফাবা ৱারোল

ফাইনান্স মিনিস্তর নিরমালা সিতারমন জি, ফাইনান্সকী রাজ্য মন্ত্রী পঙ্কজ চৌধুরি জি, নাবার্দকী সেনিয়র মেনেজমেন্তগী মেম্বরশিং, সেল্ফ-হেল্প গ্রুপশিংগী মেম্বরশিং, কোওপরেতিপ বেঙ্কশিংগী মেম্বরশিং, ফার্মরস প্রদুসর এসোসিএসনশিংগী মেম্বরশিং, শক্নাইরবশিং, ইবেম্মাশিং অমসুং ইবুংঙোশিং,

ময়াম পুম্নমক অনৌবা চহি ২০২৫ গী য়াইফ পাউজেল পীজরি। ভারত গ্রামিন মহোৎসবকী অচৌবা থৌরম অসি ২০২৫ হৌরকপদা পাংথোকপা অসিনা ভারতকী চাউখৎপগী খোঙচৎ মশক তাক্লে। মহোৎসব অসি পাংথোকপগীদমক নাবার্দ অমসুং অতোপ্পশিং ঐনা থাগৎপা ফোঙদোকচরি।

মরুপশিং,

খুঙ্গংদা পোকপা অমসুং খুঙ্গংদা চাউরকপা মীওইশিংনা ভারতকী খুঙ্গংশিংগী খুদোংচাবশিং খঙই। খুঙ্গং অমদা লৈবা মীওই অমনা খুঙ্গং অদুগী থৌনা য়াওরি। খুঙ্গং অমদা লৈবা মীওই অমনা, কমদৌনা খুঙ্গং অমদা হিংগনি হায়বা খঙই। ঐ অচম্বা ফিবম অমদা অপীকপা তাউন অমদগী ঐগী অঙাং ওইরিঙৈগী পুন্সি হৌরকখি। তুংদা ঐ য়ুম থাদোকখি, ঐগী মতম অয়াম্বা ভারতকী খুঙ্গংশিংদা লেনখি। মরম অদুনা, ঐ খুঙ্গংশিংগী খুদোংচাদবশিং মরক্ত হিংলকখি অমসুং খুঙ্গংশিংগী খুদোংচাবশিংশু খঙখি। খুঙ্গংশিংদা কমদৌনা মীয়াম কয়া য়াম্না কন্না থবক শুবগে হায়বা ঐনা অঙাং ওইরিঙৈদগী উরকখ্রে, শেন-থুম ৱাৎপদগী মখোয় খুদোংচাবশিং মরাংকাইনা ফংবা ঙমখিদে। খুঙ্গংশিংদা লৈরিবা মীওইশিংগী তৌবা ঙম্বশিং কয়া য়াম্না লৈবগে হায়বা ঐ উরে। অদুবু মখোয়গী পাঙ্গল অদু পুন্সিগী তঙাইফদবা মচাকশিং ফংনবা লানফমদা শীজিন্নখি। করিগুম্বদা মহৌশাগী ওইবা অমাং-অতানা মহৈ-মরোং হৌখিদে, করিগুম্বা মতমদা য়োনফম লৈতবদগী মহৈ-মরোংশিং লংথোকখি, হায়রিবা খুদোংচাদবশিং অসি হকথেংননা উবদগী, খুঞ্জাশিংনা থেংনরিবা অৱাবশিং কোকহন্নবা লায়রবশিংগী থবক তৌনবা ঐনা ৱাশক অমা শকখি। খুঙ্গংশিংদা থেংনখিবশিং অদুনা ঙসি লৈবাক অসিগী খুঙ্গংগী থবক তৌবদা থৌদাং অমা লৌরে। ২০১৪ দগী ঐনা ভারতকী খুঙ্গংশিংদগীদমক লেপ্তনা থবক তৌরক্লি। খুঙ্গংদা হিংলিবা মীওইশিংদা চিংলেম্বা পুন্সি অমা ফংহনবা হায়বসি সরকার অসিগী মরুওইবনি। ভারতকী খুঙ্গংশিংগী মীয়ামগী ফিবম ফগৎহনবা, মখোয় য়ুম হোংহনখিবদা, খুঙ্গংগী মীয়ামগী পুন্সি হিংবদা লাইহনবা অসি ঐখোয়গী পান্দমনি অমসুং মরম অদুনা খুঙ্গং খুদিংমক্ত তঙাইফদবশিং ফংহন্নবা খোঙজং অমা ঐখোয়না হৌদোক্লিবনি। শ্বাছ ভারত অভিয়ানগী মখাদা, ঐখোয়না য়ুমথোং খুদিংদা তোইলেতশিং শারে। প্রধান মন্ত্রী অৱাস য়োজনাগী মখাদা, ঐখোয়না খুঙ্গংশিংদা ইমুং করোর কয়াদা পাক্কাগী য়ুমশিং শাবীরে। ঙসি, জল জিবন মিসনগী খুৎথাংদা, খুঙ্গংশিংগী য়ুম লাখ কয়াদা অফবা থক্নবা ঈশিং ফংহল্লে।

মরুপশিং,

ঙসি, অয়ুস্মান অরোগ্যা মন্দির লাখ ১.৫ হেনবদা মীয়ামদা অফবা অনা-লায়েংগী খুদোংচাবশিং ফংহল্লে। দিজিতেল তেক্নোলোজিগী মতেংনা, ঐখোয়না লৈবাক অসিগী খ্বাইদগী ফবা দোক্তরশিং অমসুং হোস্পিতালশিংগা খুঙ্গংশিংগা শম্নহল্লে। ঐখোয়না তেলিমেদিসিনগী খুদোংচাবা লৌরে। খুঙ্গংগী মীওই করোর কয়া ই-সঞ্জিবানিগী খুৎথাংদা তেলিমেদিসিনগী খুদোংচাবা ফংলে। কোবি মনুংদা, কমদৌনা ভারতকী খুঙ্গংশিংনা লাইচৎ অসি থেংনখিবগে হায়বগী মতাংদা মালেম্না অঙকপা পোক্নখি। অদুবু ঐখোয়না খুঙ্গং খুদিংমক্কী মীওই খুদিংমক তিকা থাবগী খুদোংচাবা ফংহনখি।

মরুপশিং,

খুঙ্গংগী শেন্মিৎলোন ফগৎহন্নবা শেন-থুমগী থৌশিলশিং শেম্বদা মতমদা খুঙ্গংগী কাংলুপ খুদিংমক খঙবা অসি য়াম্না মরুওই। হৌখিবা চহি ১০ অসিদা, ঐখোয়গী সরকারনা খুঙ্গংগী কাংলুপ খুদিংমক্কী অখন্নবা থৌশিলশিং শেম্বা অমসুং ৱারেপশিং লৌবদা ঐ হরাওই। নুমিৎ ২-৩ গী মমাঙদা, পি.এম ফাসাল বিমা য়োজনা চহি অমা শাংদোকপা মন্ত্রীমন্দলনা অয়াবা পীখ্রে। মালেমদা দি.এ.পিগী মমল লেপ্তনা হেনগৎলক্লি, মসি অতিয়া পক্না ৱাংলে। করিগুম্বা ঐখোয়গী লৌমীশিংনা করিগুম্বা মালেমগী হৌজিক লৈরিবা মমল অসিদা দি.এ.পি লৈরবদি, লৌমীশিংদা অচৌবা পোৎলুম অমা ওইরগনি, লৌমীশিং কৈদৌঙৈদা হৌগৎপা ঙম্লরোই। মালেমগী ওইনিংবা ফিবম অমা হেক্ত ওইজরবশু, লৌমীশিংগী কোকথক্ত পোৎলুম নন্দনবা ঐখোয়না ৱারেপ লৌরে। করিগুম্বা দি.এ.পিগী সবসিদি হেনগৎপা তারবশু, মসিগী থবক অসি লেংদনা লৈহনগনি। ঐখোয়গী সরকারগী পান্দমশিং, থৌশিলশিং অমসুং ৱারেপশিংনা ভারতকী খুঙ্গং অনৌবা থৌননা থল্লে। ঐখোয়গী পান্দমদি খুঙ্গংশিংগী মীয়াম খুঙ্গং মশামক্ত শেন-থুমগী মতেং খ্বাইদগী য়াম্না ফংহনবা অদুনি। মখোয় খুঙ্গংশিংদা লৌউ-শিংউ পাংথোকপা ঙমগদবনি অমসুং খুঙ্গংশিংদা থবক ফংনবা অমসুং মশানা মশাবু থবক পীজনবা অনৌবা খুদোংচাবশিং শেমগদবনি। মসিগী ৱাখল্লোন অসিদা, পি.এম কিষান সম্মান নিধিগী খুৎথাংদা লৌমীশিংদা লুপা করোর লাখ ৩ রোমগী শেন্থং ফংহনখ্রে। হৌখিবা চহি ১০ দা, লৌউ-শিংউগী লোন শরুক ৩.৫০ হেনগৎলে। হৌজিক শা-ষন লোইবা অমসুং ঙা য়োকপা লৌমীশিংদা কিষান ক্রেদিদ কার্দশু পীরে। লৈবাক অসিগী ফার্মরস প্রদুসর ওর্গনাইজেসন লিশিং ৯ হেনবদা শেন্থং পীরে। হৌখিবা চহি ১০ দা ঐখোয়না মখা তানা মহৈ-মরোং কয়াগী এম.এস.পিশু হেনগৎলে।

মরুপশিং,

ঐখোয়না শ্বামিতভা য়োজনা হৌদোক্তুনা খুঞ্জাশিংনা মখোয়গী লৌ-ইংখোলগী চে-চাংশিং পায়রে। হৌখিবা চহি ১০ দা, এম.এস.এম.ইশিং য়োকখৎনবা থৌশিল কয়া পায়খৎলে। মখোয়দা ক্রেদিদ লিঙ্ক গরেন্তি স্কিমগী কান্নবা ফংহল্লে। মসিদগী খুঙ্গংগী এম.এস.এম.ই করোর অমা হেন্না কান্নবা ফংলে। ঙসিদি, খুঙ্গংশিংগী নহারোলশিং মুদ্রা য়োজনা, স্তার্দ অপ ইন্দিয়া অমসুং স্তেন্দ অপ ইন্দিয়াগুম্বা স্কিমশিংদগী মতেং হেন্না ফংলে।

মরুপশিং,

খুঙ্গংশিংদা অহোংবা পুরকপদা কো-ওপরেতিপশিংনা অচৌবা থৌদাং অমা লৌরি। কো-ওপরেসনগী খুৎথাংদা ঙসি ভারত নুংঙাই-য়াইফবগী লম্বী অমদা চৎলি। পান্দম অসিগীদমক, ২০২১ দা কো-ওপরেসনগী তোখায়বা মিনিস্ত্রি অমা শেম্লে। হৌজিক লৈবাক অসিগী পি.এ.সি.এস লিশিং ৭০ কম্পুতরাইজ তৌরে। মসিগী পান্দমদি লৌমীশিং অমসুং খুঙ্গংগী মীয়াম মখোয়গী পোৎথোকশিং মমল ওইজনা য়োনবা ফংহনবা অমসুং খুঙ্গংগী শেন্মিৎলোন মপাঙ্গল কনখৎহনবনি।

মরুপশিং,

লৌউ-শিংউগী মথক্ত, ঐখোয়গী খুঙ্গংশিংদা মীওই কয়া মমাংঙৈগী শীনফম কয়া শুরি। খুদম ওইনা, খুঙ্গংশিংদা য়োৎশুবশিং, উশুবশিং অমসুং চফু শাবশিং লৈরি। মখোয়না খুঙ্গংগী শেন্মিৎলোন্দা য়াম্না চাউনা মতেং পাংলি। অদুবু মমাঙদা মখোয়না মীরাইখি। মখোয়দা অনৌবা স্কিলশিং ফংহন্নবা, অনৌবা পোৎথোকশিংগী শেম-শানবা, মখোয়গী থবক শুবগী থৌনা হেনগৎনবা অমসুং শেন্দোই য়াম্না পীক্না শেন্থং পীনবা ঐখোয়না বিশ্বাকর্মা য়োজনা পায়খৎলে। লৈবাক অসিগী বিশ্বাকর্মা মরুপ লাখ মাঙলোমদা চঙশিন্নবা স্কিম অসিনা খুদোংচাবা অমা পীরে।  

মরুপশিং,

পুকচেল শেংনা থবক তৌরবদি মদুগী ফলশিং অপেনবা ওই। হৌখিবা চহি ১০দা লৈবাক অসিনা থবক কন্না শুবগী মহৈ চারে। নুমিৎ খরনিগী মমাংদা, লৈবাক অসিদা অচৌবা সর্ভে অমা পাংথোকখ্রে অমসুং সর্ভে অসিদগী মরুওইবা অচুম্বা ৱাফম কয়া খঙলে। ২০১১ গা চাংদম্নবদা, হৌজিক ভারতকী খুঙ্গংদা মীয়াম্না পোৎ-চৈ লৈবা ঙম্বগী শক্তি অসি শরুক অহুম হেনগৎলে। মসিনা তাকপদি, খুঙ্গংগী মীয়াম হান্নদগী হেন্না মখোয়গী অপাম্বা পোৎ-চৈশিং লৈরে হায়বনি। মমাঙদা, খুঙ্গংগী মীয়াম্না মখোয়গী শেন্থোক্কী চাদা ৫০ হেন্না চান-থক্নবা পোৎলমশিং লৈখি। অদুবু নিংতম্লবা মতুংদা অহানবা ওইনা, খুঙ্গংগী লমশিংদা চানবা অমসুং থক্নবা লৈবদা চাদিং তৌবা চাদা ৫০  হন্থখি অমসুং পুন্সিগী দরকার ওইবা অতোপ্পা পোৎলমশিং লৈবদা চাদিং তৌবা হেনগৎলকখি। মসিনা তাকপদি মীয়াম্না মখোয়গী হৈনবীশিং, মখোয়গী অপাম্বশিং, মখোয়গী দরকার ওইবশিংগী পোৎ-চৈ হেন্না লৈরে, মখোয়গী পুন্সিগী হিংবগী থাক ৱাংখৎনবা হেন্না চাদিং তৌরে হায়বনি।

মরুপশিং,

সর্ভে অসিদগী অতোপ্পা মরুওইবা ৱাফম অমা খঙবা ঙম্লে। সর্ভেগী মতুংইন্না, সহরশিং অমসুং খুঙ্গংশিংগী মরক্ত পোৎ-চৈ লৈদুনা শীজিন্নবগী খেন্নবা লৈরম্বা অদু হন্থরে। মমাঙদা, সহরগী ইমুং অমনা চাদিং তৌবা অমসুং খুঞ্জা অমনা চাংদিং তৌবা অনিগী মরক্ত অচৌবা খেন্নবা অমা লৈরমখি। হৌজিক, খুঞ্জাশিং তপ্না তপ্না সহরগী মীওইশিংগী থাক য়ৌরক্লে। ঐখোয়না লেপ্তনা পায়খৎলিবা থবকশিংনা মরম ওইদুনা, খুঙ্গংশিং অমসুং সহরশিংগী মরক্ত লৈনবা খেন্নবশিং হন্থরকপনি। ভারতকী খুঙ্গংদা অসিগুম্বা ঐখোয়দা ইথিল পীবা মাইপাকপগী ৱারি কয়া লৈরি।

মরুপশিং,

ঙসি, ঐনা হায়রিবা মাইপাকপশিং অসি উবদা, হায়রিবা থবকশিং অসি মমাঙগী সরকারশিংগী মতমদা পাংথোক্লম্বা য়াবা ঙাক্তনি হায়না ঐশু খনখি, অদুবু মখোয়না মোদী ঙাইরমখি। নিংতম্লবা মতুং চহি কয়া, লৈবাক অসিগী খুঙ্গং লাখ কয়া তঙাইফদবা পোৎলমশিং ফংদনা লৈখি। লৈবাক অসিগী এস.তি. এস.সি অমসুং ও.বি.সি মীওইশিং অয়াম্বা খুঙ্গংশিং লৈ। হৌখিবা সরকারশিংনা মীওই কাংলুপশিং অসিগী দরকার ওইবশিংদা পুক্নিং চঙখিদে। মসিদগী মখোয় খুঙ্গংশিংদগী য়ুম হোঙখি, লায়রবা হেনগৎলকখি, খুঙ্গং অমসুং সহর অনিগী মরক্ত খেন্নবশু হেনগৎলকখি। ঐনা অদোমদা অতোপ্পা খুদম অমা পীগে। অদোম্না খঙলে, মমাঙদা ঐখোয়গী ঙমখৈগী খুঙ্গংশিংগী মরমদা করি খল্লম্বগে? মখোয় লৈবাক অসিগী অরোইবা খুঙ্গংশিং হায়না খঙনখি। মখোয় অরোইবা খুঙ্গংশিং হায়না কৌবা ঐখোয়না তোকহল্লে, নুমিৎ থোক্লকপগী অহানবা মঙাল, অহানবা খুঙ্গংদা তাখি, মসি অরোইবা খুঙ্গং নত্তে অমসুং নুমিৎ তাবা মতমদা, নুমিৎগী অরোইবা মঙাল অদু খুঙ্গং অসিদা তাই, মরম অদুনা হিরম অসিদা মখোয় ঐখোয়গী অহানবা খুঙ্গংনি হায়না ঐখোয়না ফোঙদোকখি। মরম অসিনা ঐখোয়গী ওইনা খুঙ্গং অসি অরোইবা নত্তে, মসি ঐখোয়গী অহানবা খুঙ্গংনি। ঐখোয়না মসিদা অহানবা খুঙ্গংনি হায়না লাউথোক্লে। ঙমখৈগী খুঙ্গংশিং শেমগৎনবা ভাইব্রেন্ত ভিলেজ স্কিম হৌদোক্লে। ঙসি ঙমখৈগী খুঙ্গংশিং শেমগৎপদগী মফম অদুদা লৈরিবা মীয়ামগী শেন্থোকশু হেনগৎলে। কনা অমতনা হংবীদ্রবা মীওইশিং মোদীনা লাৎলে। ত্রাইবেলশিংগী লমদমশিং চাউখৎহন্নবা ঐখোয়না পি.এম জনমন য়োজনাশু হৌদোক্লে। চহি কয়া চাউখৎতনা লৈরম্লবা মফমশিং হৌজিক চপ মান্নবা হকশিং ফংলে। হৌখিবা চহি ১০ দা, মমাঙগী সরকারশিংনা পাংথোক্লম্বা অরানবা থবকশিং ঐখোয়গী সরকারনা চুমথোক্লে। খুঙ্গংশিং চাউখৎহন্দুনা লৈবাক অসি চাউখৎনবা লাইৱাগা লোয়ননা হৌজিক ঐখোয় মাঙলোমদা চঙশিল্লে। হৌখিবা চহি ১০দা পায়খৎখিবা থবকশিংগী ফলশিং ওইনা, লৈবাক অসিগী মীওই করোর ২৫ লায়রবা কোক্লে। মখোয়গী মনুংদা ঐখোয়গী খুঙ্গংশিংগী মশিং য়াম্লবা মীওইশিং য়াওরি। ঙরাং, স্তেৎ বেঙ্ক ওফ ইন্দিয়ানা থিজিনবা অমগী মরমদা খঙলে। মখোয়না মরুওইবা অমা থিজিনখি অমসুং রিপোর্ত অমা ফোঙলে। স্তেৎ বেঙ্ক ওফ ইন্দিয়াগী রিপোর্ত অদুনা হায়রিবদি ২০১২ দা ভারতকী খুঙ্গংগী লায়রবা চাউরাক্না চাদা ২৬ রোম ওইখি। ২০২৪ দা, ভারতকী খুঙ্গংগী লায়রবা চাদা ৫ দা হন্থরে। ঐখোয়গী লৈবাক অসিদা চহি কয়া মীওই খরনা লায়রবা কোকহন্নবা খোল্লাউ লাউদুনা লাক্লি। অদোমগী খুঙ্গংগী চহি ৭০-৮০ শুরবা মীওইশিংদা হংবদা, মখোয়না চহি ১৫-২০ শুরকপা মতমদগী লায়রবা কোকহনবা, লায়রবা কোকহনবা হায়বসি তাদুনা লাক্লি, মখোয় চহি ৮০ শুরে। ঙসিদি ফিবম অসি হোংলে। হৌজিক লৈবাক অসিদা তশেংনা লায়রবা কোকহনবা হৌরে।

মরুপশিং,

নুপীশিংনা ভারতকী খুঙ্গংগী শেন্মিৎলোন্দা মরুওইবা থৌদাং অমা লৌরি। ঐখোয়গী সরকারনা মসিগী থৌদাং অসি মখা তানা পাকথোক-চাউথোকহল্লে। খুঙ্গংশিংদা বেঙ্ক শখিশিং অমসুং ইন্সুরেন্স শখিশিং ওইনা নুপীশিংনা খুঙ্গংগী পুন্সি নৌহৌননা মশক তাকপা ঐখোয়না উরে। ঐনা নোংমা বেঙ্ক শখি অমা উনখ্রে, ঐনা বেঙ্ক শখিশিংগা ৱারি শানখ্রে। মহাক্না খুঙ্গংদা নোংমদা লুপা লাখ ৫০, লাখ ৬০, লাখ ৭০ গী বেঙ্কগী থবক তৌখি হায়না বেঙ্ক শখি অমনা হায়খি। কমদৌনা পাংথোকপনো হায়না ঐনা হংখি। মহাক অয়ুক্ত লুপা লাখ ৫০ গা লোয়ননা থোক্লকখি হায়না মহাক্না পাউখুম পীরকখি। ঐগী লৈবাক্কী খুঙ্গংশিংদা, ইচানুপী অমনা মহাক্কী খাউদা লুপা লাখ ৫০ হাপ্লগা কোইচৎ চৎলে, মসি ঐগী লৈবাক্কী অনৌবা মওং অমনি। খুঙ্গং খুদিংমক্ত, সেল্ফ-হেল্প গ্রুপশিংগী খুৎথাংদা নুপীশিংনা অওনবা অমা পুরক্লে। ঐখোয়না খুঙ্গংশিংগী নুপী করোর ১.১৫ লাখপতি দিদি ওইহল্লে। লাখপতি দিদি হায়বদি ঐগী লাখপতি দিদিনা অমুক খক লুপা লাখ অমা তানবা নত্তে, চহি খুদিংগী লুপা লাখ ১ হেন্না তাল্লে। ঐখোয়না লাখপতি দিদি করোর ৩ শেম্বা অসি ঐখোয়গী পান্দমনি। ঐখোয়না দলিত নুপীশিং, তোল্লবশিং অমসুং ত্রাইবেলশিংগী অখন্নবা স্কিমশিংশু পায়খৎলি।

মরুপশিং,

ঙসি, লৈবাক অসিদা খুঙ্গংগী ইনফ্রাস্ত্রকচরগী লমদা মীৎয়েং চঙলিবা অসি মমাঙদা অমুক্ত ওইখিদ্রি। ঙসিদি, লৈবাক অসিগী খুঙ্গং অয়াম্বা হায়ৱেশিং, এক্সপ্রেসৱেশিং অমসুং রেলৱেশিংনা শম্নরে। প্রধান মন্ত্রী গ্রাম সরক য়োজনাগী মখাদা, হৌখিবা চহি ১০ দা কিমি লাখ ৪ রোমগী লম্বীশিং শেমগৎলে। দিজিতেল ইনফ্রাস্ত্রকচরগী মতাংদশু, ঐখোয়গী খুঙ্গংশিং ২১শুবা চহিচাগী অনৌবা খুঙ্গংশিং ওইরক্লে। খুঞ্জাশিংনা দিজিতেল তেক্নোলোজি শীজিন্নবা হৈরোই হায়খিবা মীওইশিং অদু ঐখোয়গী খুঙ্গংশিংগী মীয়াম্না অরানবা তাহল্লে। মফম অসিদা তিল্লিবা খুঞ্জাশিং মখোয়গী মোবাইল ফোনশিংদা ভিদিওশিং নম্বা ঐনা উরে। ঙসি, লৈবাক অসিদা খুঙ্গংগী ইমুংশিংগী চাদা ৯৪ হেন্না তেলিফোন নত্ত্রগা মোবাইলগী খুদোংচাবশিং লৈরে। খুঙ্গংশিংদা বেঙ্কগী থবকশিং অমসুং য়ু.পি.আইগুম্বা মালেম থাক্কী তেক্নোলোজি ফংলে। ২০১৪ গী মমাঙদা লৈবাক অসিদা কম্মন সর্বিস সেন্তর লাখ অমা য়ৌদনা লৈরমখি। ঙসি, মখোয়গী মশিং লাখ ৫ হেল্লে। হায়রিবা সেন্তরশিং অসিদা ওনলাইন্দা সরকারগী থবক কয়া পাংথোকপা য়ারে। হায়রিবা ইনফ্রাস্ত্রকচর অসিনা খুঙ্গংশিং চাউখৎহল্লে, থবক ফংনবগী খুদোংচাবশিং পীরে অমসুং লৈবাক অসিগী চাউখৎপদা ঐখোয়গী খুঙ্গংশিং শরুক অমা ওইরে।

মরুপশিং,

মফম অসিদা নাবার্দকী সেনিয়র মেনেজমেন্ত লৈরে। সেল্ফ হেল্প গ্রুপশিংদগী হৌরগা কিষান ক্রেদিদ কার্দগী থবকশিং মাইপাকপদা অদোম্না মরুওইবা থৌদাং অমা লৌরি। তুংদা লৈবাক অসিগী মঙলানশিং মঙফাওনহনবদা অদোম্না মরুওইবা থৌদাং অমা লৌগনি। অদোম্না এফ.পি.ওশিংগী শক্তি খঙলে। এফ.পি.ওশিং লিংখৎপদগী, ঐখোয়গী লৌমীশিং মখোয়গী মহৈ-মরোংশিংগী মমল মতিক চানা ফংলে। অসিগুম্বা এফ.পি.ওশিং মশিং য়াম্না লিংখৎনবা ঐখোয়না খনগদবনি। ঙসি, শঙ্গোম পুথোকপনা লৌমীশিংদা শেন্দোং খ্বাইদগী য়াম্না ফংহল্লে। ভারত শীনবা থুংনা অমুলগুম্বা কোওপরেতিপ ৫-৬ লিংখৎনবা ঐখোয়না থবক তৌগনি। হৌজিক লৈবাক অসি মিসনগী মওংদা মহৌশাগী লৌউ পাথাপ পায়খৎলে। খোঙজং অসিগা লোয়ননা ঐখোয়না ঙমলিবমখৈ লৌমীশিং মহৌশাগী ওইবা লৌউ মখল অসিদা শরুক য়াহনগনি। ঐখোয়না ঐখোয়গী সেল্ফ-হেল্প গ্রুপশিং, অপীকপা অমসুং মাইক্রো ইন্দস্ত্রিশিং এম.এস.এম.ইশিংগা শম্নহনগনি। মখোয়গী পোৎথোকশিং লৈবাক শীনবা থুংনা দরকার ওইরে, অদুবু মখোয়গী ব্রান্দ শেমগৎনবা, মখোয় মফম চানা য়োন্নবা ঐখোয়না থবক তৌগনি। ঐখোয়গী জি.আই পোৎথোকশিংগী মগুন হেনগৎনবা, মখোয় য়োম্বা অমসুং ব্রান্দ শেমগৎনবা থবকশিং পুক্নিং চঙগনি। 

মরুপশিং,

খুঙ্গংগী শেন্থোক লম্বী মশিং য়ামগৎনবা ঐখোয়না থবক তৌগনি। কমদৌনা খুঙ্গংশিংদা শেন য়াম্না চঙদনা ঈশিং ফংহনগনি, কমদৌনা মাইক্রো ইরিগেসন খ্বাইদগী য়াম্না শীজিন্নগনি, কমদৌনা ‘ৱান দ্রোপ মোর ক্রোপ’ থবক ওইনা পাংথোক্কনি, কমদৌনা খুঙ্গংগী অচম্বা ইন্তরপ্রাইজশিং থবক ওইনা পায়খৎকনি, কমদৌনা খুঙ্গংগী শেন্মিৎলোন মহৌশাগী লৌউ মখলদগী খুদোংচাবশিং ফংগনি, মাইকৈ অসিদা অদোম অকক্নবা মতমগী মনুংদা থবক তৌগদবনি।

মরুপশিং,

অদোমগী খুঙ্গংদা লৈরিবা অমৃত সরোভরশিং খুঙ্গং হুপ্না চেকশিন্না শেন্নগদবনি। হৌজিক লৈবাক অসিদা ‘এক পের মা কে নাম’ কেম্পেন অমা চৎথরি। খুঙ্গংদা লৈরিবা মীওই খুদিংমক খোঙজং অসিদা শরুক য়াগদবনি, ঐখোয়গী খুঙ্গং ঙম্লিবমখৈ উ থাগদবনি হায়বা ৱাখল্লোন অমা পোকহনবা য়াম্না মরুওই। অতোপ্পা মরুওইবা ৱাফম অমনা, ঐখোয়গী খুঙ্গং নুংশিন্না লৈমিন্নবদা মশক তাক্কদবনি। হৌজিক মীওই কয়ানা কাস্তকী মিংদা খুন্নাইদা হু চাইশিনবা পাম্লি। মখোয়না ঐখোয়গী খুন্নাই অসি মপাঙ্গল শোন্থহনবা পাম্লি। হায়রিবা লৌতুনবা থবকশিং অসি অরেম্বা তাহন্দুনা ঐখোয়না ঐখোয়গী খুঙ্গংশিংগী নাত অমসুং চৎনবীশিং হিঙ্গৎহনগদবনি, ঐখোয়না মসি মপাঙ্গল কনখৎহনগদবনি।

মরুপশিং,

ঐখোয়গী ৱাশক খুঙ্গং খুদিংমক্ত য়ৌনবা ঐখোয় পুন্না থবক তৌমিন্নগদবনি, ভারত গ্রামিন মহোৎসব অসি খুঙ্গং খুদিংমক্ত য়ৌহনগদবনি, ঐখোয়গী খুঙ্গংশিং লেপ্তনা ফগৎহনগদবনি। খুঙ্গংশিং চাউখৎলবা মতমদা বিকসিত ভারত অমগী মঙলান শোইদনা মঙফাওনবা ঙমগনি হায়না ঐনা থাজৈ। লৌমীশিংনা পুরকপা জি.আই তেগ ফংলবা পোৎথোকশিং ঐ উরে। ঙসি, থৌরম অসিগী খুৎথাংদা, ঐনা দিল্লিগী মীয়ামদা হায়জরি মদুদি অদোম খুঙ্গং অমদা চৎনবগী খুদোংচাবা ফংদবা য়াই, অদুবু অদোম অমুক্তং মফম অসিদা লাক্তুনা ঐগী খুঙ্গংগী খুদোংচাবশিং য়েংনবা ঐনা হায়জরি। খেন্নবা কয়া লৈরি অমসুং পুন্সিদা খুঙ্গং অমা উদ্রিবা মীওইশিংনা, মসি অচৌবা অঙকপা অমা ওইগনি। অদোম্না মসিগী থবক অসি পাংথোকপগীদমক ঐনা থাগৎপা ফোঙদোকচরি। মীয়াম পুম্নমক ঐনা ঐগী য়াইফ পাউজে পীজরি। অদোম ঙমখৈ লৈতনা থাগৎপা ফোঙদোকচরি।