ইকাই খুম্নজরিবা অধ্যক্ষ, হাউস অসিগী মেম্বর খুদিংমক্কী ওইনা য়াম্না নুংঙাইনীংঙাই অমদি চাউথোকচনীংঙাই মিকুপনি। অদোম্না ফম অসি পায়বা উবদা। হাউস অসিদা লৈরিবা লীরবা মেম্বর খুদিংমক অদোম্না মশক মুন্না খঙলবা ঙাক্তনি। এম.এল.এ. অমা ওইনা অদোম্না রাজস্থানদা লৌখিবা থৌদাং অদুনসু রাজনিতীগী পুন্সিগা মরী লৈনবা মীওইশিং অদোম্না মশক খঙবীরি।
ঐখোয় পুম্নমক্কী ওইনা চাউথোকচনীংঙাই ৱাফম্নি মদুদি স্পিকরগী ফমগীদমক ঙসি শক্নাইরবা মীওই অমা অয়াবা পীরে, অমত্তা ওইনা অয়াবা পীরিবা মহাক অসি মহৈরোই ওইরিঙৈ মতমদগী মহৈরোইগী সস্থানশিংগা লোয়নদুনা লাক্লবা, য়ুনিবর্সিতীগী মহৈরোইশিংগী এক্তিবিতীশিংবু লমজিংদুনা লাক্লবা মীওইনি। ভারতিয়া জনতা পার্তীগী থৌমী অমা ওইনা মহৈরোইগী অন্দলোন্দগী থোক্লক্তুনা যুবা মোর্চা সঙ্গথন্দা চাউরাক্না চহী ১৫ ফাওবা জিলাগী থাক্তা, রাজ্যগী থাক্তা অমদি জাতিগী থাক্তা থবক তৌখি। ঐহাক্না চহী কয়া অমা সঙ্গথনগী থবক তৌনবগী তাঞ্জা ফংজখি, মদুনা মরম ওইরগা ঐহাক্কী মরূপ অমা ওইনা ঐখোয় অনি পুন্না থবক তৌমিন্নবগী তাঞ্জা ফংজখি। অদুগা কোতাগী লৈপাক লৈহাও ঙসিদি মহৈ-মশিংগী কাশী ওইরে। কেরিয়র শেম্নীংবা মীওইশিংনা কোতাদা মিৎয়েং থম্লি। কোতাদা লৈদুনা, কোতাদা তমদুনা, কোতাদগী মহাক্কী পুন্সি শেম্লি। রাজস্থানগী কাচিন্দা লৈরিবা অপীকপা সহর অসি ঙসিদি অপীকপা ভারত অমা ওইরে। কোতাগী অসিগুম্লবা অহোংবা পুরকপদা লুচিংদুনা থৌদাং লৌখিবা মীওই অদু শ্রী ওম বির্লাজীনি।
রাজনিতীগী পুন্সিদা ঐখোয়না অয়াম্বা মতমদা পুং কুনমরি রাজনিতী তৌদুনা লৈ, অমনা অমবু হুন্নদুনা কনানা থোইবা কনানা পোবা হায়বা অসিদা খন্দুনতা লৈ। হৌজিক হৌজিকমক চাউরাক্না হার্দকোর পোলিতিক্সকী মতম ওইনা চত্থরি। ওম বির্লাজী অসি মীয়ামগী মীহুৎ অমা ওইনা রাজনীতিগা শম্নরিবা অদুগুম্লবা মীওই অমনি, অদুবু মহাক্কী থবক থৌরম পুম্নমক খুন্নাইগী থবক্তা মিৎয়েং থম্মি। খুন্নাইগী পুন্সিদা অৱাবা তারকপা মতমদা খ্বাইদগী হান্না থুংলবা মীওইশিংগী মরক্তা মহাকসু অমা ওইদুনা লাক্লি। ঐহাক্না ঙসিসু নীংশিংলি, গুজরাত্তা তমথিরবা য়ুহা হাখি। মহাক্কী লোকেলিতীদগী নহা ওইরিবা মরূপশিং পুরক্তুনা মতম শাংনা মহাক কচ্ছতা লৈখি। লোকেল সিস্তেম শিজিন্নবা তৌদনা মহাক্কী সিস্তেমদা ফংবশিং অদুদা য়ুম্ফম ওইরগা মতম শাংনা মহাক্না মতেং পাংখি। কেদর্নাথকী লায়বক থিবা থৌদোক থোকপা মতম অদুদা উত্তরাখন্দা উবা ফংখি, মফম অদুদসু মহাক্কী খোংলোইশিং পুরদুনা খুন্নাইগীদমক থবক পাংথোকখি। মহাক্কী মরমদম কোতাদসু ইংথমথাগী মতমদা কম্বল লৈজদবা মীওইশিংগীদমক নুমিদাং চুপ্পা অমা কোতাগী লৈরক খুল্লকশিংদা চৎতুনা শরুক য়ারিবা মীওইশিংদগী কম্বলগুম্বশিং খোমগৎতুনা মদুবু য়েন্থোকখি। মহাক্না ব্রত অমা লৌখি অমদি মীচম-মীয়ামগী পুন্সিদা ঐখোয় এম.পি.শিংদা করিগুম্বা মতমদা পুক্নীং থৌগৎলি। মহাক্কী ব্রতশিংগী মরক্তা অমদি কনাগুম্বা অমত্তা কোতাদা চরা হেল্লগা তুমলোই হায়বসিনি, মসিগীদমক মহাক্না প্রসাদম কৌবা স্কিম অমা পায়খৎখি, ঙসিসু মদু মখা চত্থরি। অদুগুম্লবা প্রসাদম স্কিম অদুগী মখাদা মীয়াম্না শরুক য়াদুনা চরা হেল্লবা মীওইশিং থি থিদুনা মখোয়বু চাক পীজবা অসি মখোয়গী নোংমগী মথৌ ওইরে। মতৌ অদুম্না লাইরবশিংগীদমক, অৱা অনা তারবশিংগীদমক ফি-রোলগী অৱাৎপা লৈরগসু মখোয়গীদমক ফি-রোলগী স্কিম পায়খৎলি। খোংউপ লৈজদবা মীওইশিংগীদমক মীয়াম্না শরুক য়াদুনা খোংউপ খোমজিনবা, কালেনগী মতমদা মখোয়দা খোংউপ তোংহনবা। কনাগুম্বা অমা নারকপা মতমদা, ঈ পীবগী থবক য়াম্না মরু ওই, হোস্পিতাল কয়াদা সর্বিস পীরি। মতৌ অসুম্না মহাক্না মহাক্কী রাজনিতীগী মিৎয়েং অসি জনআন্দোলন্দগী হেন্না মীয়ামগী সেবাদা থম্লি। অসিগুম্লবা সেন্সেতিব ওইবা মীওই অমনা ঙসি স্পীকরগী ফমফমলাংদগী ঐখোয় পুম্নমকপু ৱারক-ৱাতেম্বীরনি, পুক্নীং থৌগৎপীরগনি অমদি মদুনা মরম ওইরগা কেতালিস্ত এজেন্ত অমা ওইনা, পোজিসন অমগীদমক মশক নাইবা থৌদাং লৌদুনা হাউস অসিদা খ্বাইদগী ফবা অদু পীবা ঙম্লগনি অমদি চহী কয়াদগী খুন্নাইদা কত্থোক্লবা পুন্সি মহিং অমা হিংলকপনা মরম ওইরবা খ্বাইদগী ফবা মওং মতৌদা থবক তৌবা ঙমগনি হায়না ঐহাক্না থাজবা থম্লি।
নোকপা মতমদসু ইংনা তপ্না নোকপা মহাক্কী মতৌ অদু হাউস্তসু ঐখোয়না উবা ফংলে। মহাক ৱা ঙাংবা মতমদসু খোংজেল মেংনা ঙাংই, মহাক্কী ইং তপ্পা, মোং হাদবা অদু কনাগুম্বশিংনা অরানবা মওংদা শিজিন্নখিগদ্রা হায়না ঐহাক্না হাউস অসিদা চিংনদবা ঙমদে। অদুবু হৌজিক্কী ওইনদি, মমাংদদি লোক সভাগী স্পীকর অসি অৱাবা কয়া মায়োক্নরম্মি, রাজ্য সভাগী চেয়রমেন্দি অৱাবা কয়া লৈরমদে, অদুবু হৌজিক্তি মদু ওন্ন তৈনরে। ঐখোয়না মমাংগী সেসন অদু নীংশিংলুবা তারগদি ঐখোয়গী মমাংগী ইকাই খুম্নরবা স্পীকর অদুদি মতম পুম্নমক্তা নোক্তুনতা লৈবনি, হরাও তয়াম্না লৈবা, চৈ থাংলবসু চৈ থাংলবা মতুং নোকপনি হায়না মীপুম খুদিংমক্কী চিনবান্দগী ৱাফম অসি তাবা ফংগনি। অদুবু মহাক্না খ্বাইদগী ফবা মওংদা অনৌবা ত্রেদিসন অমা শেমগৎখি। হাউস অসিগী মায়কৈদগী, ত্রেজরী বেঞ্চকী মায়কৈদগী, সরকার পায়রিবা কাউন্সিল ওফ মিনিস্তর্সকী মায়কৈদগী ঐহাক্না ইকাই খুম্নজরিবা স্পীকরদা থাজবা পীজরি মদুদি অদোমগী থবক থৌরমদা লাইথোকহন্নবা ঐখোয়না ঐখোয়গী ওইবা থৌদাং চাদা চামা পাংথোক্নবা হোৎনগনি অমদি অদোম্না অদোমগী হক অদু লেংদনা লৈগনি মদুদি বেঞ্চ অসিগী মায়কৈদসু করিগুম্বা চৎন-কাংলোন থুগাইরক্লবা, সিস্তেমদা অয়েৎ-অপনবা পীরকপা মতমদা ঐখোয়বুসু ঐখোয়গী থাক্তা লৈরিবশিংবুসু তকশিন্নবা অদোমগী হক অদু মপুং ফানা লৈগনি, মদু ঐখোয়না তরাম্না ওক্কনি, মরমদি হাউসকী মতিক মগুন ঙাক্তুনা থম্বা অসি ঐখোয় পুম্নমক্কী থৌদাংনি। ঐহাক্না থাজবা থম্লি মদুদি অহানবগী চহী অহুম মরি অসিদি ফজনা মওং তানা চত্থখি, মীখল পাংথোকপা চহীদা খরদি চয়েৎনখি, অদুবু হৌজিক থা অহুম-মরি খুদিংগী মতুং মীখল অমা লাকপা উবা মতমদা মদুনা পাওজেল অমা পীরগনি হায়না খল্লি, মরম অদুনা অসিগুম্বা ফিভম অসিদা অদোমগী মফমদসু তংদু লৈতাদবা খরা লৈগনি, অদুম ওইনমক নীংথিজনা খন্ন-নৈনরবা, অৱাংবা থাক্তা খন্ন-নৈনরবা, হিরম খুদিংমক্তা খন্ন-নৈনরবা, অমত্তা ওইনা পুল্লগা ৱারেপ লৌরগদি মদুদা অদোমগীদমক হাউস অসিনা মপুং ফানা থৌদাং লৌগনি। অসিগুম্লবা আশাগা লোয়ননা ঐহাক্কী মায়কৈদগী, হাউসকী মায়কৈদগী, ত্রেজরী বেঞ্চকী মায়কৈদগী অদোম্বু হন্না-হন্না য়াইফ-পাওজেল পীজরি, থাগৎচরি।
