কেরলাগী রাজ্যপাল রাজেন্দ্র অর্লেকর জী, মুখ্য মন্ত্রী শ্রী পি. বিজয়ন জী, কেন্দ্রগী মন্ত্রীমন্দলদা লৈরিবা ঐহাক্কী মরুপশিং, মফম অসিদা লৈরিবা অতৈ মীহুৎশিং অমসুং কেরালাগী ঐহাক্কী ইচিল-ইনাওশিং।
এল্লাভরক্কুম এন্দে নমস্কারাম। ওরিক্কল কোদী শ্রী অনন্তপদ্মনাভন্দে মন্নিলেক্কা বরান সদ্দিচহাদিল এনিক্কা অথিয়ায় সান্তোশমুন্দ।
মরুপশিং,
ঙসি অসি লোর্দ আদি শঙ্করচার্য়গী মপোক কুমওননি। চহি অহুমগী মমাংদা সেপ্তেম্বর থাদা ঐহাক্না মহাক্কী পোক্নফম মফম, কশেত্রমদা চৎপগী খুদোংচাবা ফংখি। ঐহাক্কী পার্লিয়ামেন্তরী কন্সতিত্যুসন কাশীদা লৈবা বিশ্বনাথ ধাম কমপ্লেক্সতা আদি শঙ্করচার্য়গী মীতম অমা ইন্তোল তৌখিবা অসিদা ঐহাক নুংঙাইবা ফাওই। উত্তরাখন্দগী কেদরনাথ ধামদা লৈবা আদি শঙ্করচার্য়গী মীতম মাইখুম হাংবগী খুদোংচাবা ঐহাক্না ফংখি। অমসুং ঙসি, দেবভুমি উত্তরাখন্দদা কেদরনাথ লাইশঙগী থোঙ হাংদোক্লে। অদি শঙ্করচার্য়না কেরালাদগী হৌদুনা লৈবাক অসিগী তোঙান তোঙানবা মফমশিংদা মোনাস্তরীশিং লিংখৎতুনা লৈবাক্কী ৱাখল্লোনবু খুমাং চাউশিলহনখি। য়াইফরবা থৌরম অসিদা ঐহাক্না মহাকপু ইকায় খুম্নবা উৎচরি।
মরুপশিং,
নাকল অমরোমদা মসিগী ওইথোকপা য়াবা কয়াগা লোয়ননা অচৌবা সমুদ্র অমা লৈ। অমসুং অতোপ্পা নাকলদা মহৌশাগী অঙকপা ফজবা অদু লৈ। পুম্নমক্কী মরক্তা, অনৌবা মতমগী চাউখৎপগী খুদম অমা ওইরিবা ভিঝিনজাম দীপ-ৱাতর সী পোর্ত অসি লৈরি। ঐনা কেরালাগী মীয়াম্বু, লৈবাক অসিগী মীয়াম্বু নুংঙাইবা ফোংদোকচরি।
মরুপশিং,
মসিগী সী পোর্ত অসি লুপা করোর লিশিং 88 চংনা শাখি। হৌজিক লৈরিবা ত্রান্স-শিপমেন্ত হব অসিগী কেপাসিতী অসিসু লাক্কদৌরিবা মতম অসিদা শরুক অহুম হেনগৎলগনি। মালেমগী অচৌবা কার্গো শিপশিং অসি মফম অসিদা য়াম্না লায়না লাকপা ঙমগনি। হৌজিক ফাওবদা ভারতকী ত্রান্স-শিপ্পমেন্তকী চাদা 75দি ভারতকী মপান্দা লৈবা পোর্তশিংদা পাংথোকই। মসিনা মরম ওইদুনা, লৈবাক অসিনা অচৌবা রিভেন্যু অমা মাংবগী খুদোংচাদবা মায়োক্নরি। হৌজিক ওইরিবা ফিভম অসি হোংগদৌরিবনি। হৌজিক লৈবাক অসিগী শেনফম অসি লৈবাক অসিগী কান্নবা ওইগনি। মপাল লমদা চেৎলম্বা শেনফম অসিনা কেরালা অমসুং ভিঝিনজামগী মীয়ামগীদমক অনৌবা শেন্মিৎলোনগী খুদোংচাবা পুরক্কনি।
মরুপশিং,
মীখা পোন্দ্রিঙৈ মমাংদা, ঐখোয়গী ভারতনা চহি লিশিং কয়াগী মমাংদগী চাউখৎপা উবা ফংখি। মতম অমদা, মালেমগী GDPদা ভারতনা অচৌবা শরুক অমা লৌরম্মি। মতম অদুদা ঐখোয়বু অতোপ্পা লৈবাকশিংদগী খেন্নহল্লিবা অসি ঐখোয়গী সমুদ্রগী ওইবা কেপাসিতী, ঐখোয়গী পোর্ত সিতীশিংগী ইকোনোমিক এক্তিবিতীনি! কেরলানা মসিদা অচৌবা থৌদাং লৌখি। কেরালাদগী অরাবিয়া সমুদ্রগী থোংদা মালেমগী তোঙান-তোঙানবা লৈবাকশিংগা ললোন-ইতিক তৌনরম্মি। মফম অসিদগী জহাজশিং অসি মালেমগী লৈবাক কয়াদা ললোন-ইতিক্কীদমক চৎনরম্মি। ঙসিদি, ভারত সরকারনা লৈবাক অসিগী শেন্মিৎলোনগী শক্তিগী চেনেল অসিবু হেন্না মপাঙ্গল কনখৎহন্নবা ৱারেপ লৌদুনা থবক তৌরি। ভারতকী কোস্তেল স্তেতশিং, ঐখোয়গী পোর্ত সিতীশিং অসি চাউখৎলবা ভারতকী চাউখৎপগী মরু ওইবা মফমশিং ওইগনি। ঐহাক পোর্ত অসিদা লাকলম্লগা অমুক হনখিবদা গুজরাতকী মীয়াম্না খঙলগনি মদুদি অদানীনা কেরালাদা অসিগুম্বা অচৌবা পোর্ত অমা শারে, মহাক্না গুজরাতকী পোর্ত অসিদা চহি 30দগী থবক তৌরি, অদুবু হৌজিক ফাওবদা মহাক্না পোর্ত অসি শাদ্রি, মদুগীদমক মখোয়না গুজরাতকী মীয়ামগী অশাওবা মায়োক্ননবা শেম-শারি। ঐহাক্না ঐখোয়গী মুখ্য মন্ত্রীবুসু হায়জনীংই, অদোম্না ইন্দিয়া এল্লাইন্সকী য়াম্না মপাঙ্গল কনবা য়ুম্বীনি, শশী থারুরসু মফম অসিদা লৈরি, অমসুং ঙসিগী থৌরম অসিনা মীওই কয়াদা অহিংবা তুম্বা কায়হল্লগনি। মেসেজ অদু মহাক্না চৎকদৌরিবা মফম অদুদা চৎখ্রে।
মরুপশিং,
ইনফ্রাস্ত্রকচর অমসুং ইজ ওফ দুইং বিজিনেস অনিমক প্রমোৎ তৌরকপা মতমদা পোর্ত ইকোনোমীগী মপুংফাবা পোতেন্সিএল শীজিন্নৈ। মসি হৌখিবা চহি 10দা ভারত সরকারগী পোর্ত অমসুং ৱাতরৱেজ পোলিসীগী ব্লুপ্রিন্ত ওইরি। ইন্দস্ত্রীএল এক্তিবিতীশিং অমসুং রাজ্য অসিগী অপুনবা চাউখৎ থৌরাংগীদমক ঐখোয়না খোঙজেল য়াংনা মাংলোমদা চংশিল্লি। ভারত সরকারনা রাজ্য সরকারগা খুৎশম্নদুনা সাগরমালা প্রোজেক্তকী মখাদা পোর্ত ইনফ্রাস্ত্রকচর অপগ্রেদ তৌখ্রে অমসুং পোর্ত কন্নেক্তিবিতীসু হেনগৎহনখ্রে। পি.এম.-গতিশক্তিগী মখাদা ঈশিং লম্বী, রেলৱেজ, হাইৱেজ অমসুং এয়রৱেজগী ইন্তর কন্নেক্তিবিতী অসি খোংজেল য়াংনা ফগৎলক্লি। ইজ ওফ দুইং বিজিনেসকীদমক পায়খৎলিবা রিফোর্মশিংনা পোর্তশিং অমসুং অতোপ্পা ইনফ্রাস্ত্রকচর সেক্তরশিংদা শেল থাদবা হেনগৎহনখ্রে। ভারত সরকারনা ভারতকী সীফিয়ররশিংগা মরী লৈনবা কাংলোনশিংদসু শেমদোক-শাদোকপা তৌখ্রে। অমসুং লৈবাক অসিনা মসিগী মহৈসু উবা ফংলি। 2014দা, ভারতকী সীফিয়ররশিংগী মশিং অসি লাখ 1.25দগী হন্থরম্মি। হৌজিক মখোয়গী মশিং অসি লাখ 3.25 হেনখ্রে। ঙসিদি ভারতনা সীফিয়ররশিংগী মশীংগী মতুং ইন্না মালেমগী খ্বাইদগী মকোক থোংবা লৈবাক অহুমগী মনুংদা লৈরে।
মরুপশিং,
শিপ্পিং ইন্দস্ত্রীগা মরী লৈনবা মীওইশিংনা চহি 10গী মমাংদা ঐখোয়গী জহাজশিংনা পোর্তশিংদা কয়া কুইনা ঙাইদুনা লৈখিবগে হায়বদু খঙই। মখোয়শিং অদু অনলোদ তৌবদা মতম শাংনা চঙখি। মসিনা ললোন-ইতিক, ইন্দস্ত্রী অমসুং শেন্মিৎলোনগী খোঙজেলদা অকায়বা পীখি। অদুবু হৌজিক্তি ফিভম অসি হোংখ্রে। হৌখিবা চহি 10 অসিদা, ঐখোয়গী মরুওইবা পোর্তশিংদা শিপ তর্ন-অরাউন্দ তৌবগী মতম অসি চাদা 30 হন্থখ্রে। ঐখোয়গী পোর্তশিংগী ইফিসিএন্সীসু হেনগৎলক্লি, মসিনা মরম ওইদুনা ঐখোয়না কার্গো কয়া অমা অতেনবা মতমগী মনুংদা হেন্দল তৌবা ঙমহল্লি।
মরুপশিং,
ভারতকী মাইপাকপগী থৌওং অসিগী মখাদা হৌখিবা চহি তরাগী খুজিং কয়াগী কন্না হোৎনখিবা অমসুং মীৎয়েং থমখিবা অদু লৈরি। হৌখিবা চহি 10 অসিদা, ঐখোয়না ঐখোয়গী পোর্তশিংগী কেপাসিতী শরুক অনি হেনগৎহনখ্রে। ঐখোয়গী নেস্নেল ৱাতরৱেজসু শরুক 8 হেনগৎলে। ঙসি ঐখোয়গী ভারতকী পোর্ত অনি মালেমগী খ্বাইদগী ফবা পোর্ত 30গী মনুংদা লৈরে। লোজিস্তিক্স পর্ফোমেন্স ইন্দেক্সতা ঐখোয়গী রেঙ্কিংসু ফগৎলক্লি। ঐখোয়না মালেমগী শিপ বিল্দিংদা খ্বাইদগী মকোক থোংবা লৈবাক 20গী মনুংদা য়াওরে। ঐখোয়গী বেসিক ইনফ্রাস্ত্রকচর ফগৎহনখ্রবা মতুংদা, ঐখোয়না হৌজিক মালেমগী ত্রেদতা ভারতকী স্ত্রেতেজিক পোজিসনদা মীৎয়েং থম্লি। মসিগী মাইকৈ অসিদা, ঐখোয়না মেরিতাইম অমৃত কাল ভিজন হৌদোক্লে। চাউখৎলবা ভারতকী পান্দম ফংনবগীদমক ঐখোয়গী মেরিতাইম স্ত্রেতেজী করম্না ওইগদগে হায়বগী রোদমেপ অমা ঐখোয়না শেমখ্রে। G-20 সম্মিৎতা ঐখোয়না অচৌবা লৈবাক কয়াগা লোয়ননা ইন্দিয়া মিদল ইস্ত য়ুরোপ কোরিদোরগী মতাংদা য়ানখিবা অদু অদোম্না নীংশিংগনি। কেরালানা হায়রিবা লম্বী অসিদা য়াম্না মরু ওইবা মফম অমা কল্লি। কেরালানা মসিদগী কান্নবা কয়া অমা ফংগনি।
মরুপশিং,
লৈবাক অসিগী মেরিতাইম সেক্তরবু অনৌবা অৱাংবা থাক্তা পুখৎপদা প্রাইবেৎ সেক্তরসু অচৌবা থৌদাং লৌরি। হৌখিবা চহি 10দা পব্লিক-প্রাইবেৎ পার্তনরশিপকী মখাদা লুপা করোর লিশিং কয়া ইনভেস্ত তৌখ্রে। মসিগী পার্তনরশিপ অসিনা ঐখোয়গী পোর্তশিং অসি মালেমগী থাক্তা পুখৎপা খক নত্তনা তুংলমচৎকীদমক শেম শারে। প্রাইবেৎ সেক্তরনা শরুক য়াবনা ইনোবেসন অমসুং ইফিসিএন্সী অনিমক হেনগৎহনখি। ঐখোয়গী পোর্ত মন্ত্রীনা মহাক্কী ৱারোল অদু পীরকপা মতমদা, অদানীগী মতাংদা পল্লদুনা মহাক্না হায়খি মদুদি ঐখোয়গী সরকারগী পার্তনর, কম্ম্যুনিস্ত সরকারগী মন্ত্রী অমনা প্রাইবেৎ সেক্তরগী মরমদা ঙাংলি, মসিনা ভারত অসি হোংলক্লি।
মরুপশিং,
ঐখোয়না কোচিদা শিপ বিল্দিং অমসুং রিপিয়র তৌবগী ক্লস্তর অমা লিংখৎনবগী মায়কৈদসু চংশিল্লি। হায়রিবা ক্লস্তর অসি লিংখৎপগা লোয়ননা মফম অসিদা অনৌবা থবক ফংহন্নবগী খুদোংচাবা কয়া অমা লৈরগনি। কেরালাগী লোকেল তেলেন্ত, কেরালাগী নহারোলশিংনা মাংলোমদা চংশিন্নবগী খুদোংচাবা ফংলগনি।
মরুপশিং,
লৈবাক অসিনা হৌজিক ভারতকী শিপ বিল্দিং তৌবা ঙম্বশিং হেনগৎহন্নবা অচৌবা পান্দমগা লোয়ননা চংশিল্লি। চহি অসিগী বজেত্তা, ভারত্তা অচৌবা জহাজশিং শাবা হেনগৎহন্নবা অনৌবা পোলিসী অমা লাউথোকখ্রে। মসিনা ঐখোয়গী মেন্যুফেকচরিং সেক্তরসু হেনগৎহনগনি। মসিনা ঐখোয়গী MSMEদা হকথেংননা কান্নবা পীগনি অমসুং মসিনা থবক ফংহন্নবা অমসুং ওন্তপ্রিন্যুওরশিপকী খুদোংচাবা কয়া অমা লৈহল্লগনি।
মরুপশিং,
ইনফ্রাস্ত্রকচর শেমগৎলকপা, ললোন-ইতিক হেনগৎলকপা অমসুং মীচম প্রজাগী তঙাই ফদবশিং ফংলকপা মতমদা অশেংবা দিবেলপমেন্ত লাকই। কেরালাগী মীয়াম্না খঙই মদুদি ঐখোয়গী হোৎনবশিংগী মতুং ইন্না হৌখিবা চহি 10 অসিদা কেরালাদা হাইৱেজ, রেলৱেজ অমসুং এয়রপোর্তকী পোর্ত ইনফ্রাস্ত্রকচর অসি করম্না য়াম্না থুনা চাউখৎলকখিবগে। ভারত সরকারনা কোল্লাম বাইপাস অমসুং আলাপ্পুজা বাইপাসকুম্বা চহি কয়া লেপখিবা প্রোজেক্তশিং মাংলোমদা পুখৎলে। ঐখোয়না কেরালাদা মোদর্ন ভন্দে ভারত ত্রেনশিংসু পীখ্রে।
মরুপশিং,
ভারত সরকারনা কেরালাগী চাউখৎ থৌরাংগী খুত্থাংদা লৈবাক অসিগী চাউখৎ থৌরাংগী মন্ত্র অসিদা থাজবা থম্লি। ঐখোয়না কোওপরেতিব ফেদরেলিজমগী ৱাখল্লোন্দা থবক তৌরি। হৌখিবা দিকেদতা, ঐখোয়না কেরালাবু চাউখৎপগী সোসিএল পেরামিতরশিংদা মাংলোমদা পুখৎনবা হোৎনখি। কেরালাগী মীয়াম্না জল জীবন মিসন, উজ্জ্বলা য়োজনা, আয়ুশ্মান ভারত, প্রধান মন্ত্রী সুর্য় গার ফ্রী ইলেক্ত্রিসিতী স্কিমগুম্বা স্কিম কয়াদগী কান্নবা কয়া ফংলি।
মরুপশিং,
ঐখোয়গী ঙামীশিংগী কান্নবা অসিসু ঐখোয়গী প্রাইওরিতীনি। ব্লু রিভোলুসন অমসুং প্রধান মন্ত্রী মতস্য সম্পাদা য়োজনাগী মখাদা কেরালাগীদমক লুপা করোর চাম্মরোমগী প্রোজেক্তশিং অয়াবা পীখ্রে। ঐখোয়না পোন্নানি অমসুং পুথিয়াপ্পাগুম্বা ফিশিং হরবরশিংসু মোদর্নাইজ তৌখ্রে। কেরলাদা লৈরিবা ঙামীগী ইচিল-ইনাও লিশিং কয়াদা কিসান ক্রেদিৎ কার্দসু পীরকখ্রে। মসিনা মরম ওইদুনা মখোয়দা লুপা করোর চাম্মরোমগী তেংবাং ফংহনখ্রে।
মরুপশিং,
ঐখোয়গী কেরালা অসি নুংশি-চান্নবা অমসুং অখাং কনবা লৈবাক্নি। মফম অসিদা, চহি চা কয়াগী মমাংদা, লৈবাক অসিগী অহানবা চর্চ অমসুং মালেমগী খ্বাইদগী অরিবা চর্চশিংগী মনুংদা অমা, সেন্ত. থোমাস চর্চ শাখি। নুমিৎ খরনিগী মমাংদা, ঐখোয় পুম্নমক্কী মফমদা অৱাবা তাঞ্জা অমা লাকখি হায়বসি ঐখোয় খুদিংনা খঙই। নুমিৎ খরনিগী মমাংদা, পোপ ফ্রান্সিস লৈখিদে। ঐখোয়গী রাস্ত্রপতি, রাস্ত্রপতি দ্রৌপদী মর্মুজীনা মফম অদুদা ভারতকী মহুৎ শিন্দুনা মহাক্কী লৈখিদবা থৌরমদা শরুক য়াখি। কেরালাগী ঐখোয়গী মরুপ, ঐখোয়গী মন্ত্রী শ্রী জোর্জ কুরিয়েন্না মহাক্কা লোয়ননা চৎখি। ঐহাকসু, কেরালাগী লমদম অসিদগী অমুক্কা হন্না, অৱাবা অসিদা শরুক য়ারিবা পুম্নমক্তা ঐহাক্কী অৱাবা ফোংদোকচরি।
মরুপশিং,
পোপ ফ্রান্সিসপু মহাক্কী সেবা তৌবগী ৱাখল্লোন অমসুং খৃস্তিয়নগী চৎনবীশিংদা মীপুম খুদিংমক্তা মফম অমা পীবগী মহাক্কী হোৎনবা অদুগীদমক মালেম অসিনা মতম পুম্নমক্তা নীংশিংদুনা লৈহৌরগনি। ঐহাক্না মহাক্কা উন্নবগী খুদোংচাবা ফংবা মতম খুদিংদা, হীরম কয়াদা মহাক্কা কুপ্না ৱারী শানবগী খুদোংচাবা ফংখিবা অসি ঐহাক্কী নুংঙাইবা অমনি হায়না লৌই। অমসুং ঐহাক্না মতম পুম্নমক্তা উখি মদুদি মহাক্না ঐঙোন্দা অখন্নবা মীনুংশি ফংজখি। মীওইবা, সেবা অমসুং শান্তিগুম্বা হীরমশিংদা মহাক্কা ৱারী শানখিবা, মহাক্কী ৱাহৈশিংনা ঐঙোন্দা মতম পুম্নমক্তা ইথিল পীরগনি।
মরুপশিং,
ঙসিগী থৌরম অসিগীদমক্তা ঐহাক্না অমুক্কা হন্না ময়াম পুম্নমকপু য়াইফ-পাউজেল পীজরি। ভারত সরকারনা কেরালাবু মালেমগী মেরিতাইম ত্রেদকী মরুওইবা মফম অমা ওইহন্নবা অমসুং অনৌবা থবক লিশিং কয়া ফংহন্নবা রাজ্য সরকারগা লোয়ননা মখা তানা থবক তৌমিন্নগনি। ঐহাক্না থাজবা থম্লি মদুদি কেরালাগী মীয়ামগী শক্তিগা লোয়ননা ভারতকী মেরিতাইম সেক্তরনা অনৌবা অৱাংবা থাক্তা চঙশিনগনি।
ঐনা কেরালাবু হেন্না চাউখৎহনবা পাম্মি, ঐনা কেরালাবু হেন্না চাউখৎহনবা পাম্মি, ঐনা ভারতপু হেন্না চাউখৎহনবা পাম্মি।
থাগৎচরি
.
