লোক সভাগী মতিক মগুন লৈরবা স্পিকর শ্রীমান ওম বিরলাজী, রাজ্য সভাগী উপসভাপতি শ্রী হরিবংশজী, মন্ত্রীমন্দলদা ঐহাক্কী মরূপলোয় শ্রীমান প্রহলাদজী, শ্রী হরদীপ সিংহ পুরীজী, হাউস কমিতীগী অধ্যক্ষ সি.আর. পাতিলজী, শ্রীমান ওমজী মাথুরজী, তিনবীরিবা সংসদগী মীহুৎশিং মন্ত্রীপরিসদকী মরূপশিং অমসুং শক্নাইরবশিং।
মহৌশানা অনৌবা মীফম হৌরকপা মতমদা এম.পি.শিংগী লৈফম চাফমদা খুদোংচাদবা য়াম্না থেংনরি। মতম শাংনা হোতেলদা বুক তৌদুনা লৈবা তানখি। অদুগা লৈফমশিং হাংলকপগী মতুং ইন্না মদু শেমজিন শাজিন্দুনা লৈবগী থৌওং অসি চত্থদুনা লাক্লি। মতমগী মতুং ইন্না মতিক চাবা সিস্তেমশিং মতৌ করম্না দিবেলপ তৌগনি, অমরোমদা এম.পি.শিংনা মশাগী ওইনা কা অমদগী হেন্না দরকার ওইদে অদুবু এম.পি.শিংগী য়াম্না চাউবা থবক অমা ওইরিবদি মহাক্কী কেন্দ্রগী মীওই কয়া অমা লাক্লি। থাপ্ল-থাপ্লবা মফম কয়াদগী লাক্লি অমদি লাক্লিবা মীওই খুদিংমক্কী ৱাখলদা ঐখোয়গী মফম অসিদা অহিং লেক চানবা থৌরাং তৌগনি হায়না খল্লি, মফম লৈগেরা নত্ত্রগা লৈতগেরা ঐখোয়না মখোয়বু ইন্থোকপা ঙমদে।
অদুবু সমস্যা অসি মপানগী মীয়ামগীদমক এক্সপিরিয়েন্স তৌবা অসি য়াম্না অরুবা ওইরি অমদি খুদোং কয়া য়াম্না চাদবগে হায়বদু এম.পি.শিংনা খঙই। মরম অদুনা মমাংগী মীফমদগী মওং তানা হোৎনরক্লি। অনিশুবা এক্সপিরিয়েন্স অমনা ভবন খরদি য়াম্না লীরে অমদি মতমগী মতুং ইন্না অমা নত্ত্রগা অমা শেমজিন শাজিনবগী থবক চত্থরি। মদুনা মরম ওইরগা শিল্লি লাংলিবদসু খুদোংচাদবা থোকহল্লি, লৈরিবশিংদসু খুদোংচাদবা থোকহল্লি। মদু মতম পুম্নমক্কী ওইনা ৱারোইশিন পুরক্নবগী মায়কৈদসু হোৎনরি। লাক্কদৌরিবা মতম খরা অসিদা অহেনবা ভবনশিং শাবগী থবক অথুবা মতমদা পায়খৎলগনি। থবক অসিবু পাংথোক্লিবা বিভাগকী মীপুম খুদিংমকপু থাগৎপা ফোংদোকচরি। মহৌশানা সরকারগী ওইবা থবক থৌরম হায়বদি পীরিবা মতম অদুদগী থেংথনা পাংথোকপনি, মীয়াম্না মতম পুম্নমক্তা হংনরিবা অদুদি মতম কয়া য়াম্না চোন্থরগে, করম্বা মতম ফাওবদা লোইগনি, লোইরনিদি হায়রগা মতম কয়া য়াম্না অমুক চংখিগনি। থবক অসিদি লেপ্নখিবা মতমগী মাংওইননা মপুং ফানা পায়খৎপা লোইশিনখি। লেপখিবা বজেৎতগী চাদিং হন্থনা পায়খৎখি অমদি ক্বালিতীদসু কমপ্রমাইজ তৌখিদে, অদুনা মতমসু মাংদ্রে, লন-থুমসু তুংশিল্লে, মতৌ অসুম্না ভবন অসি শাবদা থৌদাং লৌখিবা মরূপশিং, থৌদাং লৌখিবা সরকারগী ওফিসিয়েলশিং অদুবু তৌবীমল খঙবা উৎচরি।
হন্দক্তি পর্লিয়ামেন্ত অসি খ্বাইদগী ফবা মওংদা চত্থবা অদু ঐখোয়না উবা ফংলে অমদি মদুগী ক্রেদিৎ অদু রাজনিতী দল খুদিংমক্না ফংফম থোকই, এম.পি. খুদিংমক্না ফংফম থোকই অমদি চিয়রদা ফম্লিবা শক্নাইরবশিংনসু ফংফম থোকই। চৎনা হাউস অনিমক্তগী খোংজেল অমা লাকখি, স্পিকরজীনা তাকপীরে, অমদি উপ-রাস্ত্রপতিনসু হাউস্তা হায়বীরে মদুদি ২০২২দা নীংতম্বগী ৭৫শুবা চহী পালন পাংথোক্কদৌরিবা অসিদা পর্লিয়ামেন্তকী ফিভমদসু অহোংবা খরা পুরকপা ফৈ।
ৱাফম অসি অচুম্বনি মদুদি ঐহাক্না হৌখিবা চহী মঙাদগী ৱাফম অসি এম.পি.শিংগী মফমদগী লেপ্পা লৈতনা তারক্লি, মীদিয়া জগৎকী মরূপশিংনসু হঞ্জিন-হঞ্জিন হায়দুনা লাক্লি মদুদি হৌজিক্তি মসি য়াম্না লীরে করিগুম্বা খরদি হোংদোকপীরো। মোদর্ন সিস্তেমশিংনা দিবেলপ তৌরসি হায়না হাউসকী মায়কৈদগী হায়রকপা মতমদা সরকারনা মসিবু লুম্না লৌরে। মতৌ অসুম্না পর্লিয়ামেন্ত অসিগী বিলদিং অসি শিজিন্নদুনা মনুংদা সিস্তেমশিংবু মতৌ করম্না অনৌবা থাক্তা পুখৎপা য়াবগে হায়বা অমদি অতোপ্পা মফম অমদা বিলদিং শাবা তারগদি… মদুদা ওফিসিয়েলশিংনা মখোয়গী ৱাখল্লোন পুথোক্লি অমদি য়ারগদি অথুবা মতমদা নীংতম্বগী ৭৫শুবা চহী পালনগা লোয়ননা থবক অসি পাংথোক্নবা ঐহাক্না মখোয়দা তকশিল্লি, অদুবু মতম য়াম্না শাংনদি লৈত্রে অদুম ওইনমক হোৎনবদি হোৎনগদবনি। ঐহাক্না অমুক হন্না এম.পি. পুম্নমকপু দিবেলপ তৌরিবা অনৌবা সিস্তেম অসিগীদমক ময়াম পুম্নমকপু হন্না-হন্না নুংঙাইবা ফোংদোকচরি, য়াইফ-পাউজেল পীজরি।
ঐহাক্না ফম্বাকথক্তা ফম্বীরিবা থৌদাং অমা নত্ত্রগা অমা লৌখিবা শক্নাইরবা পুম্নমকপুসু হায়নীংঙায় লৈতনা থাগৎপা ফোংদোকচরি।
মরূপশিং থাগৎচরি…
