ভারত ইমানা য়াইফরে.
থৌরম অসিদা শরুক য়াবীরিবা য়ু.পি.গী থৱাব য়াওবা অমদি কর্ময়োগী মুখ্য মন্ত্রী শ্রীমান য়োগী আদিত্যনাথজী, প্রয়াগরাজকী লমদম অসিগী মশক নাইরবা লুচিংবা, উপ মুখ্য মন্ত্রী কেশব প্রসাদ মোর্য়জী, কেন্দ্রগী মন্ত্রী-মন্দলদা ঐহাক্কী মরুপ ওইরিবা সাধবী নিরঞ্জন জ্যোতি জী, শ্রীমতি অনুপ্রিয়া পতেলজী, উত্তর প্রদেশ সরকারগী মন্ত্রী দা. মহেন্দ্র সিংহজী, রাজেন্দ্র প্রতাপ সিংহ মোতীজী, শ্রী সিদ্ধার্থনাথ সিংহজী, নন্দগোপাল গুপ্তা নন্দীজী, শ্রীমতী স্বাতি সিংহজী, শ্রীমতী গুলাবো দেবীজী, শ্রীমতী নীলিমা কতিয়ারজী, পার্লিয়ামেন্তদা ঐহাক্কী মরুপ ইচল রীতা বহুগুনাজী, শ্রীমতী হেমা মালিনীজী, শ্রীমতী কেশরী দেবী পতেলজী, দা. সংঘমিত্রা মোর্য়জী, শ্রীমতী গীতা শাখ্যজী, শ্রীমতী কান্তা কর্দমাজী, শ্রীমতী সীমা দ্বিবেদীজী, দা. সরেশ চন্দ বিন্দজী, প্রয়াগরাজকী মেয়র শ্রীমতী অভিলাসা গুপ্তাজী, জিলা পঞ্চায়ত অধ্যক্ষ দা বে.কে. সিংহজী, এম.এল.এ. অমসুং অতোপ্পা মীয়ামগ মীহুৎশিং, অমসুং য়ু.পি.গী শক্তিগী খুদম ওইরিবা মফম অসিদা তিনবীরিবা ঐহাক ইমা-ইবেল অমসুং ইচে-ইচলশিং! ঐহাক্না পুম্নমকপু খুরুমজরি। শেংলবা ইমা গঙ্গা, য়মুনা, সরস্বতীগী তুরেল মপান্দা লৈরিবা প্রয়াগরাজকী লমদম অসিদা ঐহাক্না ইকো নোন্না খুরুমজরি। মসি ধর্মগী. লৌশিংগী অমসুং অচুম্বগী ত্রিবেনী চেল্লিবা লমদমনি। প্রয়াগরাজকুম্বা তীর্থগী খুমভম অসিদা মতম চুপ্পদা লম্বা লৈত্রবা অশেংবা অমদি শক্তি লৈ। হৌখিবা চহিগী ফেব্রুৱারীদা ঐখোয়না কুম্ভ ইমাগী শেংলবা লৈবাক অসিদা লেপখি, ইতিনফম অসিদা ইরুপখি অমসুং তাইবং মপুগী থৌজাল ফংজখি। ঐহাক্না অদুগুম্বা তীর্থরাজ প্রয়াগকী লমদম অসিদা খুৎ লোন্নদুনা খুরুমজরি। ঙসি অসি হিন্দী সাহিত্যগী আচার্য়, মহাবির প্রসাদ দ্বিবেদীজীগী লৈখিদবগী কুমওনসু তারি। প্রয়াগরাজদগী সরস্বতী বহীগী সাহিত্য, দ্বিবেদীজী অসি মতম শাংনা ইদিতরসু ওইরমখি, ঐহাক্না মঙোন্দা ইকাই খুম্নবসু উৎচরি।
ইমা-ইবেল অমসুং ইচে-ইচলশিং,
প্রয়াগরাজ অসি চহি লিশিং কয়া ঐখোয়গী ইমাগী শক্তি অদু মশক তাক্লিবা গঙ্গা-য়মুনা-সরস্বতীগী ইতিনফম ওইরিবা লমদমনি। ঙসি মসিগী লাইফমলেন ওইরিবা শহর অসিদা নুপী অমদি শক্তি নীংথিজনা পুনশিনবা উবা ফংলি। অদোমগী মীনুংশি অমসুং অদোমগী থৌজালশিং পীবীনবা ময়াম্না মসিদা লাকপীবা হায়বা অসি ঐখোয়গী ওইনা য়াম্না লাইবক ফবনি। ইমা-ইবেল অমদি ইচে-ইচলশিং ঐহাক্না ফম্পাক অসিদা কাখৎত্রিঙৈ মমাংদা ঐহাক্না বঙ্কিংগী মরুপশিং, সেল্ফ-হেল্প গ্রুপশিং অসিগা মরী লৈনবা ইচে-ইচলশিং অমসুং কন্যা সুমঙ্গলা য়োজনাগী ইচানুপী বেনিফিসরীশিংগা লোয়ননা ৱারী শাখি। অদুগুম্বা উৎলিবা মওং, থাজবা! ইমা-ইবেল অমদি ইচে-ইচলশিং ঐখোয়গী মফম অসিদা হায়নবা অমা লৈ – “প্রত্যক্ষে কিম প্রমানম”।
হায়বরি, ময়েক শেংলবদা প্রমানগী মথৌ তাদে। উত্তর প্রদেশতা চাউখৎ-থৌরাংগী, নু্পীদা শক্তি পীনবগী পাইখৎখিবা থবক অদু লৈবাক পুম্বনা উবা ফংলি। হৌজিক ঐহাক্না মুখ্য মন্ত্রী কন্যা সুমঙ্গলা য়োজনাগী বেনিফিসরী ইচানুপী লাখ অমা হেনবগী একাউন্তশিংদা লুপা করোর কয়া ত্রান্সফর তৌবগী খুদোংচাবা ফংজখি। য়োজনা অসিনা খুঙ্গংগী লায়রবা অমদি নুপীমচাশিংনা থাজবা পোক্নবা অচৌবা পাম্বৈ অমা ওইরি। য়ু.পি.দা হৌদোকখিবা ‘বেঙ্ক সখী’ কেম্পেন অসিনা নুপীশিংগীদমক থবক্কী খুদোংচাবশিং পীবগা লোয়ননা মখোয়গী পুন্সিশিংদা অচৌবা অহোংবশিংসু পুরক্লি। দাইরেক্ত বেনিফিত ত্রান্সফর (দি.বি.তি.)গী খুত্থাংদা তোঙান-তোঙানবা সরকারগী স্কীমশিংদগী মখোয়গী একাউন্তদা চংলকপা শেল অদু লৌথোক্নবা বেঙ্কতা চৎনবগী মথৌ তাহনদ্রে। মখোয়না ‘বেঙ্ক সখী’গী মতেংগা লোয়ননা খুঙ্গংশিংদা মখোয়গী য়ুমশিংদা মখোয়না শেল ফংলি। হায়বদি, ‘বেঙ্ক সখী’না খুঙ্গংশিংদা বেঙ্ক অসি পুরকখি। মসি অপীকপা থবক্নি হায়না খল্লিবা মীওইশিংদা ‘বেঙ্ক সখীশিং’গী থৌদাং অসি কয়াম মরু ওইবগে হায়বা মখোয়দা ঐহাক্না খঙহন্নীংই। য়ু.পি. সরকারনা ‘বেঙ্ক সখীশিং’দা লুপা করোর ৭৫,০০০রোম ত্রাঞ্জেক্সনশিং তৌবগী থৌদাং অদু শীন্নখি। খুঙ্গংশিংদা লৈরিবা ঐহাক্কী ইচে-ইচলশিং অমদি ইচানুপীশিংনা লুপা করোর ৭৫,০০০রোমগী বিজিনেস তৌরি। ত্রাঞ্জেক্সনশিং হেন্না তৌবনা ইনকম হেন্না ফংহল্লি! ‘বেঙ্ক সখীশিং’ অসি অয়াম্বনা ইচে-ইচলশিংনা ওইরি, চহি খরগী মমাংদা মখোয়গী মশাগী বেঙ্ক একাউন্তশিং ফাওবা লৈরমখিদে। অদুবু ঙসিদি দিজিতেল বেঙ্কিংগী শক্তি অসি নুপীশিং অসিগী মখুৎতা পাইরি। অসুম্না লৈবাক অসনা য়ু.পি.দা করম্না থবক পাঙথোকপগে হায়বা উরি। অমসুং ঐহাক্না অসুম্না হায়রি: “প্রত্যক্ষে কিম প্রমানম”
ইমা-ইবেল অমসুং ইচে-ইচলশিং,
য়ু.পি.না নুপীশিংদা অঙাংশিংগী অমসুং মীরোনবী অমদি খোমজিংলিবী নুপীশিংগীদমক তেক হোম রেসনগী থৌদাংসু শিন্নখি। মসিগী মচি ওইবা চিঞ্জাক অসি হৌজিক নুপীশিংগী সেল্ফ-হেল্প গ্রুপশিংনা শারগনি। মসি চহি অমদা লুপা করোর লিশিং কয়া য়াওবা অচৌবা থবক অমসু ওইরি। ঙসি উরেপ-উয়ুং তমখিবা সপ্লিমেন্তরী ন্যুত্রিসন মেন্যুফেকচরিং য়ুনিৎ ২০২ অসিদগী সসেল্ফ-হেল্প গ্রুপশিং অসিগী নুপীশিংনসু ইনকম ফংলগনি অমদি খুঙ্গা অসিগী লৌমীশিংনসু চাউনা কান্নবা ফংলগনি। মখোয়গী ফেক্তরীশিং অসিদা মচি ওইবা চিঞ্জাকশিং শানবা নুপীশিং অসিনা খুঙ্গংশিং অদুমক্তগী মহৈ-মরোং অমসুং চেং-চাক লৈরগনি। মসিগী শক্তি পীনবা খোঙথাংশিং অসিনা য়ু.পি.দা লৈরিবা নুপীশিংগী পুন্সিশিংদা অহোংবা পুরকপা হৌখি। ঙসি ঐহাক্না তোঙান-তোঙানবা সেক্তরশিংদা এসিস্তেন্স ওইনা লৈরিবা সেল্ফ-হেল্প গ্রুপশিং অসিদা সরকারনা ইনস্তোলমেন্ত অমা ওইনা পীবা লুপা করোর ১,০০০গী শেনফম ত্রন্সফর তৌনবগী খুদোংচাবা ফংজখি। হৌজিক্তি য়ু.পি.দা চাউখৎ-থৌরাংগী ইচেল অসি কনাগুম্বা অমত্তনা অথিংবা পীবা ঙম্লরোই। উত্তর প্রদেশকী নুপীশিং, ইমাশিং-ইচে-ইচলশিং-ইচানুপীশিংনা ৱারেপ লৌখ্রে – হৌজিক মমাংগী সরকারগী মতম অদু অমুক হন্না হল্লকহল্লরোই। দবল-ইঞ্জিন সরকার অসিনা য়ু.পি.গী নুপীশিংগীদমক ঙাকশেল পীরিবা, ইজৎ লৈনা হিংহল্লিবা অমসুং ইকাই খুম্নবা হেনগৎহল্লিবা অসি মমাংদা অমুক্তা থোকখিদ্রি।
ইচিল-ইনাওশিং,
ইমাশিং, ইচে-ইচলশিং অমদি ইচানুপীশিংগী পুন্সিনা মীরোন কয়াদা ইথিল পীরি অমসুং মীরোন কয়া শেম্লি। ইচানুপী অমগী মতিক-ময়াই, মহাক্কী মহৈ-মশিং অমসুং মহাক্কী স্কিলশিংনা ইমুং-মনুংগী খক্তা নত্তনা খুন্নাইগী অমদি জাতিগী মাইকৈ তাকই। মরম অসিনা ঐখোয়না ২০১৪দা মা ভারত্তিগী অচৌনা মঙলানশিং অমদি অনীংবশিং মঙফাওননবা থৌরাং পাইখৎপা হৌখিবা মতমদা ঐখোয়না লৈবাক অসিগী ইচানুপীশিংদা অনৌবা ইনোৎকী থাজবা পীবা হৌখি। মরম অসিনা ঐখোয়না ইচানুপী অমগী পোকপদগী হৌনা মহাক্কী পুন্সিগী তাঙ্কক খুদিংমক্তা নুপীবু শক্তি পীনবা প্লান অমদি কেম্পেনশিং হৌদোকখি।
মরুপশিং,
নুপীমচাশিং পুক্নুংদা হাতোকপীবা তোক্নবা, মখোয়বু তাইবং ফাওহন্নবা, মসিগীদমক ঐখোয়না ‘বেতি বচাও বেতি পরাও’ কেম্পেনগী খুত্থাংদা খুন্নাই অসিদা ৱাখল তাহন্নবা হোৎনখি। মসিগী ফল ওইনা ঙসি লৈবাক অসিগী রাজ্য কয়াদা ইচানুপীশিংগী মশিংদা চাউনা হেনগৎলকখি। অঙাং উনরবা মতুংদা মখোয়গী অঙাংগী অহৌবগী য়েংশিনবা মতমদা মখোয়গী থবক্কী অৱাবা অদুক পোকহনদনবা মমা ওইবীশিংদা চাপোকপীগী শুতি অসি থা তরুক শাংদোকখি।
মরুপশিং,
মীরোল্লিঙৈ মনুংদা মীরোল্লিবী অদুগী হকশেল অসি লায়রবা ইমুং-মনুংশিংগী ওইনদি অচৌবা সমস্যা অমা ওইনবগী মরম ওই। মরম অদুনা ঐখোয়না মীরোনবী নুপী তীকা থাদোকপা, হোস্পিতালশিংদা অঙাং উন্নবা অমসুং মীরোল্লিঙৈ মনুংদা মচি ওইবা চিঞ্জাক পীজবা হায়বা অসিদা মীৎয়েং চংখি। প্রধান মন্ত্রী মাত্রু বন্দনা য়োজনাগী মখাদা মচি ওইবা চিঞ্জাক নীংথিনা চানবা মীরোল্লিঙৈগী মনুংদা নুপীশিংগী বেঙ্ক একাউন্তদা লুপা ৫০০০ হাপখি। হৌজিক ফাওবদা ইচে-ইচল করোর অনি হেনবদা লুপা করোর ১০,০০০রোম পীখ্রে।
মরুপশিং,
ঐখোয়না ইচানুপীশিংনা নীংথিনা মহৈ তম্নবা অমসুং মরক্তা স্কুল তোকখিদনবা লেপ্তনা হোৎনদুনা লাকখি। ঐখোয়গী সরকারনা স্কুলশিংদা নুপীমচাশিংগী তোখাইবা তোইলেৎশিং শাবা নত্ত্রগা লায়রবশিংদগী খ্বাইদগী লায়রবদা সেনিতরী পেদশিং ফংহনবা ওইরবসু খোঙথাং অমতদা শোত্থবা লৈতে। সুকন্যা সমৃদ্ধি য়োজনাগী মখাদা নুপীমচা করোর ২.৫গী একাউন্তশিং হাংখ্রে। মখোয়না চাউরক্লবা মতমদা মখোয়গী মঙলানশিং থুংহনবা ঙম্নবা শেল অসিগী শেন্দোইগী চাং অদুমক ৱাংনা থমখি। স্কুল অমদি কোলেজতা মখোয়গী কেরিয়র শেম্বদগী হৌনা মখোয়গী ইমুং-মনুংগী থবক ফাওবগী খোঙথাং খুদিংদা নুপীশিংগী খুদোংচানবা অমদি হকশেলদা মীৎয়েং চংলি। স্বচ্ছ ভারত মিশনগী মখাদা অমাংশঙ করোর কয়া শাখিবগা লোয়ননা, উজ্জ্বলা য়োজনগী মখাদা খ্বাইদগী লায়রবশিংগী মনুংদা লায়রবা ইচে-ইচলশিংদা গ্যাস কন্নেক্সনগী খুদোংচাবা ফংবদগী, য়ুমমক্তদা তোতি ঈশিং য়ৌরকপগা লোয়ননা, ইচে-ইচলশিংগী পুন্সিদা খুদোংচাবাসু ফংলি অমসুং মখোয়গী ইকাই খুম্নবসু হেনগৎহনখি।
মরুপশিং,
আয়ুশ্মান ভারত স্কীমদগী খ্বাইদগী চাউনা কান্নবা ফংখিবা অসি ঐখোয়গী ইচে-ইচলশিনা ওইরি। হোস্পিতালশিংদা অঙাং উনবা নত্ত্রগা অতোপ্পা লায়েংবগী ওইরবসু ইচে-ইচলশিংগী পুন্সিশিং অসি শেল লৈতবনা মরম ওইরগা খুদোংথিরমখি। লুপা লাখ ৫ ফাওবগী লেম্না লায়েংবা য়াবগী খুদোংচাবা অসিগী লোয়ননা মসিগী অৱাবসু কোকহনখ্রে। ভারতকী খুন্নাই অসিদা ইমা অমদি ইচে-ইচলশিংবু খ্বাইদগী থাক ৱাংনা লৌই। অদুবু ঙসি ৱাফম অমদা ঐহাক্না লৈবাক পুম্বগী মীৎয়েং অসি চীংশিনজবা পাম্মি। চহি দিকেদ কয়াদগী য়ুম অমসুং লন-থুম অসি নুপা খক্তগী হক্নি হায়বগী চৎনবী অমা লৈরমখি। য়ুম লৈরবদি মদু কনাগী মমিংদা লৈ? নুপাশিংগী মমিংদা। লৌবুক লৈরবদি কনাগী মমিংদা? নুপাশিংগী মমিংদা। থবক, দুকানদা কনাগী হক লৈ? নুপাশিংগী ওইরমখি। ঙসি, ঐখোয়গী সরকারগী য়োজনাশিং অসিনা খেন্নবা লৈরম্বা অদুসু মুত্থৎলি। প্রধান মন্ত্রী আৱাজ য়োজনা মসিগী অচৌবা খুদম অমনি। প্রধান মন্ত্রী আৱাজ য়োজনাগী খাদা পীথরিবা য়ুমশিং অসি, অহানবা খুদোংচাবা পীদুনা নুপীশিংগী মমাংদা শারি। করিগুম্বা ঐহাক্না য়ু.পি. খক্তগী মতাংদা হায়বা তারগদি পি.এম. আৱাজ য়োজনাগী মখাদা য়ুম লাখ ৩০ হেন্না শাখ্রে। মসিগী মনুংদা য়ুম লাখ ২৫রোমদি নুপীশিংগী মমিংদা লৈরি। অদোম্না খন্দুনা য়েংবীয়ু অহানবা ওইনা য়ু.পি.দা নুপী লাখ ২৫না মখোয়গী ময়ুম ফংজখি। য়ুমগী লন-থুম অসি মীরোম কয়া নুপী অমতগী মমিংদা লৈরমদবা অদু অহানবা ওইনা নুপী অমগী মমিংদা লৈবা ফংজখ্রে। মসি তশেংনা নুপীদা শক্তি পীবা অমসুং চাউখৎপা হায়বা অদুনি।
ইমা-ইবেল অমসুং ইচে-ইচলশিং,
ঙসি ঐহাক্না অতোপ্পা স্কীম অমগী মতাংদা অদোমদা পাউদমজগে। মসি কেন্দ্র সরকারগী স্বামিত্ব য়োজনা কৌই। স্বামিত্ব স্কীমগী মখাদা লৈবাক শিনবা থুংবদা লৈরিবা খুঙ্গংশিংদা লৈরিবা য়ুম অমদি লমশিং অসি দ্রোনশিংগী খুত্থাংদা মেপ তৌরি অমসুং মপুশিংদা প্রোপর্তীগী চে-চাংশিং পীরি। ‘গরৌনী’ পীবদা নুপীশিংদা অহানবা খুদোংচাবা পীরি। মথংগী চহি খরা অসিদা য়োগীজীগী সরকারনা উত্তর প্রদেশকী খুঙ্গংশিংদা লৈরিবা য়ুম খুদিংমক মপুং ফানা মেপিং তৌবা লোইশিল্লগনি অমসুং ‘গরৌনী’ খুৎশিন্নবা ঙম্লগনি। মতম অদুদা য়ুমশিংগী চে-চাংশিং অসি নুপীশিংগী মমিংদা লৈরগনি, ইমাশিংগী মমিংদা লৈরগনি।
মরুপশিং,
থবক পীনবা অমসুং ইমুংগী শেন্থোক হেনগৎনবা পাইখৎখিবা স্কিমশিংদা নুপীশিংবু মান্নবা পার্তনরশিং ওইহল্লি। ঙসি মুদ্রা য়োজনা খুঙ্গং-খুঙ্গংদা, লায়রবা ইমুংশিংদা ফাওবা অনৌ-অনৌবা নুপী ওন্তপ্রিনোরশিংবু পুক্নিং থৌগৎলি। মসিগী স্কিম অসিগী মখাদা পীথখিবা অপুনবা শেন্থংগী চাদা ৭০দি নুপীশিংদা পীখি। নুপীশিং অসি দীনদয়াল অন্ত্যোদয় য়োজনাগী খুত্থাংদা লৈবাক শিনবা থুংবদা লৈরিবা সেল্ফ-হেল্প গ্রুপশিং অমসুং রুরেল ওর্গনাইজেসনশিংগা লিঙ্ক তৌরি। ঐহাক্না সেল্ফ-হেল্প গ্রুপশিংগী ইচে ইচলশিং অসি আত্মনির্ভর ভারতকী চেম্পিয়ন্নি হায়না লৌই। মসিগী সেল্ফ হেল্প গ্রুপশিং অসি তশেংনমক নেস্নেল হেল্প গ্রুপশিংনি। মরম অদুনা ২০১৪গী মমাংগী চহি ৫দা নেস্নেল লাইবলিহুদ মিসনগী মখাদা পীরম্বা শেলগী তেংবাং অদু হৌখিবা চহি ৭ অসিদা শরুক ১৩মুক হেনগৎখ্রে। মমাংদদি মসিগী সেল্ফ-হেল্প গ্রুপশিং অসিনা গরেন্তী য়াওদনা লুপা লাখ ১০ ফাওবগী শেন্থংশিং ফংলম্মি অদুবু হৌজিক্তি মসিগী লিমিৎ অসি শরুক অনি হেনগৎহন্দুনা লুপা লাখ ২০ ওইখ্রে।
ইমাশিং অমসুং ইচে-ইচলশিং,
শহর ওইগেরা খুঙ্গং ওইগেরা নুপীশিংগী অপীকপা অমসুং অচৌবা অৱাবা খুদিংমক খন্নরগা ঐখোয়গী সরকারনা ৱারেপ লৌরি। মসিগী কোরোনাগী মতম অসিদা ঐখোয়গী সরকারনা অদোমগী চাকখুমগী মৈ মুত্তনবা লেম্না রাসন পীনবা শিল-লাংখি। ঐখোয়গী সরকার অসিনা নুপীশিংবু নাইত শিফ্ততা থবক তৌবা য়ানবা রুলশিং কোমথোক্নবা থবক পাইখৎখি। মাইনশিংদা নু্পীশিংনা থবক তৌবদা লৈরম্বা অথিংবা খুদিংমক ঐখোয়গী সরকারনা লৌথোকখ্রে। ঐখোয়গী সরকারনা লৈবাক শিনবা থুংনা নুপীমচাশিংগী সাইনিক স্কুল হাংদোক্নবা থবক পাইখৎখি। নমদুনা ফম্লানবা গুম্বা তমথীরবা ক্রাইমশিংগী অথুবা মতমদা ৱায়েল চত্থনবা ঐখোয়গী সরকারনা লৈয়াক শিনবা থুংনা ফাস্ত ত্রেক কোর্ত ৭০০ লিংখৎখি। মুস্লিম ইচে ইচলশিংবু ওৎ নৈবদগী কন্নবা ঐখোয়গী সরকারনা ত্রিপল তলাক্কী মায়োক্তা লো অমা শেমখ্রে।
মরুপশিং,
দবল ইঞ্জিন-সরকার অসিনা অচান-মীরাই নাইদনা, খেন্নবা থমদনা, ইচানুপীশিংগী তুংলমচৎপু এম্পাৱর তৌনবা লেপ্পা লৈতনা হোৎনরি। নুমিৎ খরনিগী মমাংদা, কেন্দ্র সরকারা অতোপ্পা ৱারেপ অমগা লৌখি। মমাংদদি নুপাশিংগী আইন্না য়ারবা লুহোংবগী চহিনা ২১ ওইরম্মি অদুগা নুপীমচাশিংগীনা চহি ১৮খক ওইরম্মি। ইচানুপীশিংসু মখোয়না লাইরিক তমথনবগী মতম অমসুং মান্নবা খুদোংচাবশিং ফংবা পামখি। মরম অদুনা ইচানুপীশিংগী লুহোংবগী চহি অসি ২১দা ওইহন্নবা থবকশিং পাইখৎখি। লৈবাক অসিনা মসিগী ৱারেপ অসি ইচানুপীশিংগী য়াইফনবা লৌখিবনি, অদুবু মসিনা কনাদা চৈথেং পীরি, মসি পুম্নমক্না উরি!
ইচিল ইনাওশিং,
চহি ৫গী মমাংদা য়ু.পি.গী লম্বী-শোরোক্তা মাফিয়ারাজ চত্থরমখি! য়ু.পি. গুন্দাশিংনা শক্তি পাইরমখি! মসিদগী কনানা খ্বাইদগী চাউনা চৈথেং ফংলমখিবগে? ঐহাক্কী য়ু.পি.গী ইচে-ইচলশিংনা ওইখি। মখোয়না লম্বীদা থোকপদা অৱাবা ওইরমখি। স্কুল, কোলেজশিং চৎপদা অৱাবা ওইরমখি। অদোম্না করিগুম্বা অমত্তা হায়বা ঙমখিদে, ঙাংবা ঙমখিদে। মরমদি ঐখোয়না থনাদা চৎপা মতমদা ক্রিমিনেল, রেপিস্ত অদুগীদমক কনাগুম্বা অমগী ফোন হেক্তা লাকলমখি। য়োগীজীনা গুন্দাশিং অসি মখোয়গী ফংফম থোকপা দন্দি পীখি। ঙসি য়ু.পি.দা ঙাকশেলসু লৈরে লোয়ননা হকসু ফংলে। ঙসি য়ু.পি.দা ওইথোকপা য়াবশিং লোয়ননা বিজিনেসসু লৈরে। ঐখোয়গী ইমা-ইবেল অমদি ইচে-ইচলশিংগী থৌজালশিং ফংলবা মতমদা কনা অমত্তনা অনৌবা য়ু.পি. অসি অমম্বদা থম্বা ঙম্লোই হায়না ঐহাক্না থাজৈ। ইচিল ইনাওশিং লাকও ঙসিদি প্রয়াগরাজগী শেংলবা মফম অসিদগী ঐখোয়গী য়ু.পি. অসি মাংলোমদা চংশিল্লগনি, ঐখোয়গী য়ু.পি. অসি অনৌবা পন্দোলশিং ফংলগনি হায়না ৱাশক লৌমিন্নরসি। ইমাশিং ইচিল ইনাওশিংবু অদোমগী থৌজালগীদমক, অদোম্না শৌগৎপীবা অমসুং য়ু.পি.গী খুমাং চাউশিন্নবদা অদোম্না শরুক য়াবীবগীদমক ঐহাক্না পুচেল শেংনা থাগৎপা ফোঙদোকচরি। ঐহাক্কা লোয়ননা হায়বীয়ু, ভারত ইমা য়াইফরে, ভারত ইমানা য়াইফরে, পুম্নমকপু থাগৎচরি!
