জিনোমইন্দিয়া প্রোজেক্না লৈবাক অসিগী বাইওতেক্নোলোজিগী লমদা অচৌবা অওনবা অমা পুরকপা হৌরে, প্রোজেক অসিগী থবক তৌরিবশিংদা ঐগী য়াইফ-পাউজেল পীজরি: প্রধান মন্ত্রী
২১শুবা চহিচাদা, বাইও-তেক্নোলোজি অমসুং বাইওমাসকী অপুনবা অসি বাইও ইকোনোমি ওইনা বিকসিত ভারতকী য়ুম্ফমগী মরুওইবা শরুক অমনি: প্রধান মন্ত্রী
বাইও ইকোনোমিনা তুংকোইনা চৎনগদবা চাউখৎপা অমসুং অনৌবা থবকশিং য়াংখৎহল্লে: প্রধান মন্ত্রী
ঙসি লৈবাক অসিগী শক্তমদা অনৌবা মশক অমা তাক্তুনা ভারত মালেমদা অচৌবা ফার্মাগী মফম অমা ওইনা শেমগৎলে: প্রধান মন্ত্রী
মালেমগী খুদোংচাদবশিং কোকহন্নবা পাম্বৈশিংগীদমক মালেম্না ঐখোয়দা য়েংলক্লে, মসি ঐখোয়গী তুংগী মীরোলশিংগীদমক থৌদাং অমা অমসুং খুদোংচাবা অমনি: প্রধান মন্ত্রী
ঐখোয়গী মীয়ামগী খনবা লৈঙাক, ঐখোয়গী দিজিতেল পব্লিক ইনফ্রাস্ত্রকচরনা মালেমদা অনৌবা নমুনা অমা পীরে, মসিগা চপ মান্নবা মওংদা, জিনোমইন্দিয়া প্রোজেক্না জেনেতিক রিছার্সকী লমদা মখা তানা ভারতকী মিংচৎ হেনগৎহনগনি: প্রধান মন্ত্রী
কেন্দ্রগী মন্ত্রীমন্দলগী ঐগী মরুপ দোক্তর জিতেন্দ্র সিংহ জি, লৈবাক্কী মফম কয়াদগী লাকপা সাইন্তিস্তশিং, অতোপ্পা শক্নাইরবশিং, ইবেম্মাশিং অমসুং ইবুংঙোশিং !
ঙসি ভারতনা থিজিনবগী লমদা পুৱারি ওইরবা খোঙথাং অমা থাংজিল্লে। চহি মঙাগী মমাঙদা জিনোমইন্দিয়া প্রোজেক অয়াবা পীখিবনি অমসুং কোবিদ লাইচৎকী খুদোংচাদবা কয়া মায়োক্নরবশু ঐখোয়গী সাইন্তিস্তশিংনা নিংথিনা থবক তৌখি অমসুং প্রোজেক অসি লোইশিল্লে। মসিগী থিজিনবা অসিদা আই.আই.এস, আই.আই.তিশিং অমসুং দি.বি.তি-বি.আর.আই.সিগুম্বা মমিং লৈরবা থিজিনবগী মহৈলোয়শঙ ২০ হেনবনা মরুওইবা থৌদাং অমা লৌবদা ঐ হরাওই। ভারতমচা ১০,০০০ গী জিনোম সিক্বেন্সশিংগী দেতা হৌজিক ইন্দিয়ান বাইওলোজিকেল দেতা সেন্তরদা ফংলে। মসিগী প্রোজেক অসিনা বাইওতেক্নোলোজিগী লমদা খুমাঙচাউশিনবা অমা ওইরগনি হায়না ঐনা থাজৈ। প্রোজেক অসিদা শরুক য়ারিবা মীওইশিং খুদিংমক ঐনা থাগৎপা ফোঙদোকচরি।
মরুপশিং,
জিনোমইন্দিয়া প্রোজেক অসি বাইওতেক্নোলোজিগী য়াওলদা মরুওইবা খুমাঙচাউশিনবা অমনি। তোঙান-তোঙানবা ফুরুপশিংগী লনাই মীওই ১০,০০০ গী জিনোমশিং সিক্বেন্সিং তৌদুনা প্রোজেক অসিনা মখল কয়াগী জিনেতিক রিছোর্স শেমগৎলে হায়বা ঐ খঙলে। দেতা অসি হৌজিক সাইন্তিস্তশিং অমসুং থিজিল্লোয়শিংদা ফংহল্লগনি অমসুং মসিনা ভারতকী জিনেতিক্কী ফিবমশিং খঙবদা মতেং পাংলগনি। মসিগী ই-পাউ অসিনা লৈবাক অসিগী থৌশিল শেম্বা অমসুং থৌরাং তৌবদা য়াম্না চাউনা মতেং পাংলগনি।
মরুপশিং,
ময়াম পুম্নমক অদোমগী হিরমশিংদা অখঙ-অহৈশিং ঙাক্তনি অমসুং শক্নাইরবা সাইন্তিস্তশিংনি। ভারতকী পাক-চাউবা অমসুং খেন্নবশিং অসি, চীঞ্জাক, লোল অমসুং লম্মিৎ-তুমিৎ খক নত্তনা, লৈবাক অসিগী মীয়ামগী জিনেতিকশু ওইরি। লায়নাশিংগী মখল কয়া লৈরি, মখোয় মপুংফানা লায়েংনবা অপুনবা মীশিংগী জিনেতিক্কী মশক খঙদোকপা অসি তঙাইফদে। ত্রাইবেলশিংনা সিক্কল সেল এনেমিয়াগী খুদোংচাদবা মায়োক্নরি অমসুং মসি থেংননবা ঐখোয়না নেসনেল মিসন পায়খৎলে। তোঙান-তোঙানবা মফমশিংগী খুদোংচাদবশিং খেন্নগনি অমসুং ভারতকী অপুনবা মীশিংগী তোপ-তোপ্পা জিনোমিক পেতর্নশিং মশক খঙদোক্নবা মপুংফানা জিনেতিক্কী লমদা থিজিনবা অমা পাংথোকপা দরকার ওইরে। মসিনা অকক্নবা পাম্বৈশিং পুথোকপা অমসুং অকক্নবা কাংলুপশিংগী অফবা হিদাক-লাংথকশিং পুথোকপদা মতেং পাংগনি। সিক্কল সেল এনেমিয়া অসি খুদম অমনি। মীরোল অমদগী মীরোল অমদা থংথবা জিনেতিক লায়না কয়াগী মরমদা ভারত্ত মীয়াম্না খঙবা ৱাৎলি অমসুং ভারত্ত অসিগুম্বা লায়নাশিং মপুংফানা লায়েংবদা জিনোমইন্দিয়া প্রোজেক্না মতেং পাংগনি।
মরুপশিং,
২১শুবা চহিচাদা, বাইও-তেক্নোলোজি অমসুং বাইওমাসকী অপুনবা অসি বাইও ইকোনোমি ওইনা বিকসিত ভারতকী য়ুম্ফমগী মরুওইবা শরুক অমনি। বাইও ইকোনোমিগী পান্দমদি মহৌশাগী লনশিং মপুংফানা শীজিন্নবা, বাইও-বেজ পোৎথোকশিং অমসুং থবকশিং শীজিন্নবা পুক্নিং থৌগৎপা অমসুং হিরম অসিদা অনৌবা থবকশিং ফংহনবনি। বাইও ইকোনোমিনা তুংকোইনা চৎনগদবা চাউখৎপা অমসুং অনৌবা থবকশিং য়াংখৎহল্লে। হৌখিবা চহি ১০ অসিদা, ভারতকী বাইও ইকোনোমি য়াংনা চাউখৎপদা ঐ হরাওই। বাইও ইকোনোমি অসি ২০১৪ দা দোল্লর বিল্লিয়ন ১০ দগী ঙসিদি দোল্লর বিল্লিয়ন ১৫০ হেল্লে। ভারতনা লৈবাক অসিগী বাইও ইকোনোমি অনৌবা থাকশিংদা পুখৎনবা হোৎনরি অমসুং হন্দক বাইও ই-৩ থৌশিল হৌদোক্লে। থৌশিল অসিনা ভারতনা মালেমগী বাইও লেন্দস্কেপতা লুচিংবা অমা ওইবা ঙমগনি অমসুং মসি আই.তিগী য়াওলগা মান্নৈ। থবক অসিদা সাইন্তিস্তশিংগী মরুওইবা থৌদাং অমা লৈরি অমসুং মসিগীদমক ঐনা অদোমগী মফমদা য়াইফ-পাউজেল পীজরি।
মরুপশিং,
ভারত মরুওইবা ফার্মা হব অমা ওইরক্লে অমসুং হৌখিবা চহি ১০ দা, মীয়ামগী অনা-লায়েংগী থবকশিংদা ভারতনা শিংথাবা য়াবা থবকশিং পায়খৎলে, ভারতমচা মিল্লিয়ন কয়াদা লেম্না লায়েংবগী খুদোংচাবা ফংহল্লে, জিন ঔশাধি কেন্দ্রশিংগী খুৎথাংদা হিদাক-লাংথকশিং চাদা ৮০ মমল তানা ফংহল্লে। কোবিদ-১৯ লাইচৎ মনুংদা ভারতকী ফার্মাগী থবকশিংনা লৈবাক অসিগী মপাঙ্গল উৎখ্রে। ভারত মনুংদা হিদাক-লাংথক শুংবগী অফবা সপ্লাই অমসুং ভেলু চেন অমা লিংখৎনবা থবকশিং পায়খৎলে। হায়রিবা থবকশিং অসি জিনোমইন্দিয়া প্রোজেক্না মখা তানা য়াংখৎহনগনি অমসুং থৌনা পীগনি।
মরুপশিং,
তুংগী মীরোলশিংগীদমক থৌদাং অমা লৌদুনা অমসুং খুদোংচাবা অমা পীদুনা, মালেমগী খুদোংচাদবশিং কোকহন্নবা পাম্বৈশিংগীদমক মালেম্না ঐখোয়দা য়েংলক্লে। হৌখিবা চহি ১০দা, লাইরিক তম্বগী থাক খুদিংমক্ত থিজিনবা অমসুং অনৌবা থবকশিংদা অকনবা মীৎয়েং অমা থমদুনা ভারতনা পাক-চাউরবা থিজিনবগী থবকশিং শেমগৎলি। অতল তিনকরিং লেব ১০,০০০ হেনবনা মহৈরোয়শিংদা নুমিৎ খুদিংগী অনৌবা চাংয়েংশিং পাংথোকপা ঙমহল্লে। নহা ওইরিবা ইন্নোবেতরশিং শৌগৎনবা লৈবাক শীনবা থুংনা অতল ইনকুবেসন সেক্তর চা কয়া লিংখৎলে। পি.ঐচ.দি তম্বদা মনুংদা থিজিনবগী থবকশিংদা মতেং পাংনবা প্রাইম মিনিস্তর রিছার্স ফেল্লোসিপ স্কিম হৌদোক্লে। হিরম কয়াদা অমসুং মালেমগী ওইনা থিজিন্নবা নেসনেল রিছার্স ফন্দ শেম্লে। অনুসান্ধান নেসনেল রিছার্স ফাউন্দেসন্না সাইন্স, ইঞ্জিনিয়ারিং, ইনভাইরোনমেন্ত অমসুং হকশেলগুম্বা হিরমশিংদা মতেং পাংগনি। অনৌবা তেক্নোলোজিশিংদা থিজিনবা অমসুং শেন থাদবা হেনগৎহন্নবা লুপা করোর লাখ অমগী কোর্পস ফন্দ অমা শেম্নবা ৱারেপ লৌরে অমসুং মসিনা বাইওতেক্নোলোজি সেক্তর চাউখৎহনবদা মতেং পাংগনি অমসুং নহা ওইরিবা সাইন্তিস্তশিংনা শৌগৎকনি।
মরুপশিং,
হন্দক সরকারনা “ৱান নেসন ৱান সবস্ক্রিপসন” হৌদোক্তুনা ভারতকী মহৈরোয়শিং অমসুং থিজিল্লোয়শিংদা মমিং লৈরবা মালেমগী চেফোঙশিং লাইনা অমসুং লেম্না ফংহল্লগনি। হায়রিবা থবকশিং অসিনা ভারত ২১শুবা চহিচাদা লৌশিং অমসুং ইন্নোবেসনগী মফম অমা ওইহনগনি।
মরুপশিং,
ঐখোয়গী মীয়ামগী খনবা লৈঙাক, ঐখোয়গী দিজিতেল পব্লিক ইনফ্রাস্ত্রকচরনা মালেমদা অনৌবা নমুনা অমা পীরে, মসিগা চপ মান্নবা মওংদা, জিনোমইন্দিয়া প্রোজেক্না জেনেতিক রিছার্সকী লমদা মখা তানা ভারতকী মিংচৎ হেনগৎহনগনি হায়না ঐনা থাজৈ। জিনোমইন্দিয়া প্রোজেক মাইপাক্নবগীদমক ঐনা অমুক হন্না য়াইফ-পাউজেল পীজরি।
অদোম থাগৎপা ফোঙদোকচরি।
