প্রধান মন্ত্রী: শুভনশু খুরুমজরি!
শুভানশু শুক্লা: খুরুমজরি!
প্রধান মন্ত্রী: ঙসিদি অদোম্না ইমা লৈবাক, ভারত ভুমিদগী অরাপ্পা মফম অমদা লৈরি, অদুবু ভারতকী মীওইশিংগী থম্মোয়দা অদোম অসি য়াম্না নক্না লৈরি। অদোমগী মিংদা অফবা মগুন অমা লৈরি অমসুং অদোমগী খোঙচৎ অসি অনৌবা য়ুগ অমগী হৌরকফমসু ওইরি। অসিগুম্বা মতম অসিদা, ঐখোয় অনিনা ৱারী শানরি, অদুবু ভারত মচা করোর ১৪০গী সেন্তিমেন্তসু ঐগা লোয়ননা লৈরি। ঐগী ৱাঙাং অসিদা ভারত মচা খুদিংমক্কী পুক্নিং থৌগৎপা অমসুং নুংঙাইবা অদু উৎলি। স্পেসতা ভারতকী ফিরাল পাইহনখিবগীদমক ঐহাক্না অদোমবু থম্মোয় শেংনা নুংঙাইবা ফোংদোকচরি অমসুং য়াইফ-পাউজেল পীজরি। ঐহাক্না মতম কুইনা লৌজরোই, মরম অদুনা অহানবদা ঐঙোন্দা হায়বিয়ু, মফম অদুদা কৈসু থোইদোকপা তৌদব্রা, নহাক্কী হকচাং অসি ফনা লৈব্রা?
শুভানশু শুক্লা: হোয়, প্রধান মন্ত্রী জী! অদোমগী য়াইফ-পাউজেল অমসুং ঐহাক্কী লৈবাক মীয়াম করোর ১৪০গী য়াইফ-পাউজেলগীদমক্তা অদোমবু থাগৎচরি। মফম অসিদা ঐহাক কৈসু থোইদোকপা তৌদে অমসুং শাফনা লৈরি। অদোমগী য়াইফ-পাউজেল অমসুং নুংশিবা অসিনা মরম ওইদুনা... ঐহাকপু য়াম্না নুংঙাইহল্লি। মসি য়াম্না অনৌবা এক্সপরিয়েন্স অমনি অমসুং মফম অমা নৎত্রগা অমদা, অসিগুম্বা থৌওং কয়া অমা থোক্লি মসিনা ঐহাক অমসুং ঐহাকগুম্বা মীওই কয়ানা ঐখোয়গী লৈবাক অমসুং ভারত অসি করম্বা মাইকৈদা চংশিল্লিবগে হায়বদু উৎলি। ঐগী খোঙচৎ অসি, পৃথিবীদগী ওর্বিৎ ফাওবা কিলোমীতর ৪০০গী অপীকপা খোঙচৎ অসি ঐগী খক্তগী নত্তে। মফম খরদা মসি ঐখোয়গী লৈবাক অসিগী খোঙচৎনি হায়না ঐনা ফাওই মরমদি ঐহাক নহা ওইরিঙৈদা, ঐহাক এস্ত্রোনোত অমা ওইরকপা ঙমগনি হায়না খল্লুদে। অদুবু ঐহাক্না থাজৈ মদুদি ঙসিগী ভারত অসি অদোমগী লুচিং মখাদা মসিগী খুদোংচাবা অসি পীরি অমসুং মসিগী মংলানশিং অসি মংফাওনহন্নবগী তাঞ্জাসু পীরি। অসুম্না, মসি ঐহাক্কীদমক অচৌবা এচিবমেন্ত অমনি অমসুং ঐহাক্না মফম অসিদা ঐহাক্কী লৈবাক অসিগী মহুৎ শিন্দুনা লাকপা অসিদা য়াম্না চাউথোকচৈ। প্রধান মন্ত্রী জী, অদোমবু থাগৎচরি!
প্রধান মন্ত্রী: শুভ, অদোম স্পেসতা লৈরি, মফম অদুদা গ্রেভিতী অসি য়াম্না হন্থৈ, অদুবু ভারত মচা খুদিংমক্না অদোম নোলুকপা নতৌ উৎপগে হায়বদু উরি। নহাক্না নহাক্কী মরুপশিংদা পুদুনা লাকখিবা গাজর কা হালৱা অদু পীজব্রা?
শুভানশু শুক্লা: হোয়, প্রধান মন্ত্রীজী! ঐহাক্না ঐহাক্কী লৈবাক অসিদগী গাজর কা হালৱা, মুং দাল হালৱা অমসুং আম রাসকুম্বা চিঞ্জাক খরা পুরকখি। অমসুং ঐহাক্না অতোপ্পা লৈবাকশিংদগী লাকপা ঐহাক্কী মরুপশিংনসু মসি মহাও তংখি অমসুং ভারতকী পাক চাউরবা কুলিনরী হেরিতেজ অসি এক্সপরিয়েন্স তৌবা পাম্মি। অসুম্না, ঐখোয় পুম্নমক্না পুন্না ফম্মিনদুনা মদুগী মহাও তংখি অমসুং মীপুম খুদিংমক্না মদু য়াম্না পামখি। মীওই খরনা মখোয়না করম্বা মতমদা ঐখোয়গী লৈবাক অসিদা লাক্কনি অমসুং ঐখোয়গা লোয়ননা চাবা ফংগনি হায়না হংখি...
প্রধান মন্ত্রী: শুভ, পরিক্রম অসি ভারতকী চহি চা কয়াগী চৎনবী অমনি। অদোম্না ইমা পৃথিবী অসিগী পরিক্রমা পাংথোক্নবগী খুদোংচাবা ফংলে। হৌজিক্তি পৃথিবীগী করম্বা মফম লানদুনা চৎকদগে?
শুভানশু শুক্লা: হোয়, প্রধান মন্ত্রী জী! হৌজিক ঐঙোন্দা হায়রিবা ই-পাউ অসি লৈতে, অদুবু মতম খরগী মমাংদা ঐনা থোঙনাউদগী য়েংলি, ঐখোয়না হাৱাইগী মথক্তা চৎলি, অমসুং ঐখোয়না নোংমদা ১৬ হন্না ওর্বিৎ তৌরি। ঐখোয়না নুমিৎ থোকপা ১৬রক অমসুং নুমিৎ তাবা ১৬রক উবা ফংই অমসুং মসিগী থৌওং অসি য়াম্না নুংঙাইবা অমনি। হায়রিবা ওর্বিৎ অসিদা খোঙজেল য়াংনা, ঐখোয়না হৌজিক অদোমগা ৱারী শানরিঙৈদা পুং অমদা চাউরাক্না কিলোমীতর ২৮,০০০গী খোঙজেল য়াংনা চংশিল্লি অমসুং হায়রিবা খোঙজেল অসি ঐখোয়না খঙদে মরমদি ঐখোয়না মসিগী মনুংদা লৈরি, অদুবু মফম খরদা হায়রিবা খোঙজেল অসিনা ঐখোয়গী লৈবাক অসিনা কয়া য়াম্না খুমাং চাউশিল্লিবগে হায়বদু ময়েক শেংনা উৎলি।
প্রধান মন্ত্রী: য়াম্না ফৈ!
শুভানশু শুক্লা: মীকুপ অসিদা ঐখোয়না মফমসিদা য়ৌরে অমসুং হৌজিক্তি ঐখোয়না মফমসিদগী মখা তানা চৎকদবনি।
প্রধান মন্ত্রী: অদু ওইরবদি, অহাংবা মফমশিং অদু উরবা মতুংদা নহাক্কী ৱাখলদা লাকখিবা অহানবা ৱাখল্লোন অদু করি ওইবগে?
শুভানশু শুক্লা: প্রধান মন্ত্রীজী, অচুম্বা ৱাফম অমা হায়রবদা, ঐখোয়না অহানবা ওইনা ওর্বিৎতা চঙলকপা মতমদা, স্পেসতা চঙলকপা মতমদা, অহানবা উবা ফংলিবসি পৃথিবীনি অমসুং পৃথিবী অসি মপান্দগী উরবা মতুংদা অহানবা খল্লকখিবা অদুদি পৃথিবী অসি মপুং ফানা য়ুনিফোর্ম ওইনা উবা ফংই, হায়বদি ঙমখৈ লৈতে, ঙমখৈ অমত্তা মপান্দগী উদে। ঐখোয়না ভারতপু অহানবা ওইনা উবদা য়াম্না পুক্নিং চিংশিন্নিংঙাই ওইবা অনিশুবা ৱাফমদি, ঐখোয়না ভারতপু মেপতা উবা মতমদা, অতোপ্পা লৈবাকশিং অসি কয়া য়াম্না চাউবগে হায়বদু ঐখোয়না উবা ফংই, ঐখোয়গী পাক চাউবদু করিনো হায়বদু ঐখোয়না মেপতগী উবা ফংই, অদুবু মসি চুমদে মরমদি ঐখোয়না 3Dগী পোৎশক অমা 2Dগী ওইনা, হায়বদি, পেপরদা য়েকপনি। ভারত অসি তশেংনা য়াম্না চাউবা, য়াম্না চাউবা ওইনা উরি। মসি ঐখোয়না মেপতা উরিবা অদুদগী হেন্না চাউই অমসুং অমত্তা ওইবগী ৱাখল্লোন, মালেমগী অমত্তা ওইবগী ৱাখল্লোন, মসি ঐখোয়গী মোতোসু ওইরি মদুদি মখল কয়াদা অমত্তা ওইবগী ৱাখল্লোন, মসিগী মরুওইবা অসি মপান্দগী য়েংবদা ঙমখৈ লৈতে, রাজ্য লৈতে, লৈবাক লৈতে, অরোইবদা ঐখোয় পুম্নমক মীওইবা খুন্নাইগী শরুক অমনি অমসুং মালেম অসি ঐখোয়গী য়ুম্নি অমসুং ঐখোয় পুম্নমক মসিগী নাগরিকশিংনি।
প্রধান মন্ত্রী: শুভানশু, নহাক অসি স্পেস স্তেসনদা চৎখিবা অহানবা ভারত মচানি। অদোম্না য়াম্না কন্না হোৎনখি। অদোম্না শাংনা ত্রেনিং ফংখি। হৌজিক্তি অদোম অশেংবা ফিভম অমদা লৈরে, অদোম তশেংনা স্পেসতা লৈরে, মফম অদুদা লৈরিবা ফিভমশিং অদু কয়া য়াম্না খেন্নবগে? অদোম্না মতৌ করম্না এদাপ্ত তৌবগে?
শুভানশু শুক্লা: মফমসিদা পুম্নমক অসি তোঙানবা ওইরে, প্রধান মন্ত্রী জী, ঐখোয়না হৌখিবা চহি অমা ত্রেনিং তৌখি, ঐহাক্না সিস্তেম পুম্নমক্কী মরমদা খঙজৈ, থৌওং পুম্নমক্কী মরমদা খঙজৈ, এক্সপরিমেন্তশিংগী মরমদা খঙজৈ। অদুবু ঐহাক মফমসিদা লাকপা মতমদা, খুদক্তা পুম্নমক হোংখি, মরমদি ঐখোয়গী হকচাং অসি গ্রেভিতীগী মখাদা হিংবদা হৈনখি, মরম অদুনা পুম্নমক্না মসিগী মখাদা লেপখি, অদুবু মফমসিদা লাক্লবা মতুংদা, গ্রেভিরী অসি মাইক্রোগ্রেভিতী ওইবনা অমসুং লৈত্রবনিনা, অপীকপা থবকশিং ফাওবা য়াম্না লুবা ওইরকখি। হৌজিক, অদোমগা ৱারী শানরিঙৈদা, ঐহাক্না ঐহাক্কী খোঙ্গুলশিং অদু পুনশীন্দুনা থম্মি, মদু নৎত্রবদি ঐহাক মথক্তা পাইখৎখিনি অমসুং মাইকসু পাইখৎখিনি, মসি অপীকপা পোৎশকশিংনি, হায়বদি, ঐহাক্না মসি অসুম্না থাদোক্লবসু, মসি অসুম্না পাইদুনা লৈগনি। ঈশিং থকপা, খোঙচৎ চৎপা, তুম্বা অসি অচৌবা শিংনবনি। নহাক্না য়ুমথক, ফক্লাং, লৈমায়দা চত্থোক-চৎশিন তৌবা য়াই।
মরম অদুনা, প্রধান মন্ত্রী জী, পুম্নমক অসি থোকই, ত্রেনিং অসি অফবনি, অদুবু অকোয়রোন অসি হোংলকই, মরম অদুনা মসিদা হৈননবা হোৎনবদা নুমিৎ অমা নৎত্রগা অনি চংই, অদুবু মদুদগী ফরকই মদুদগী নোর্মেল ওইরকই।
প্রধান মন্ত্রী: শুভ, ভারতকী শক্তি অসি সাইন্স অমসুং স্পিরিচুএলিতি অনিমক্তা লৈ। অদোম্না স্পেসকী খোঙচৎ অমদা চংশিল্লি, অদুবু ভারতকী খোঙচৎ অসিসু লেপ্পা লৈতনা চংশিনগদবনি। অদোমগী নুংদা ভারত লৈরম্বা তাই। অসিগুম্বা অকোয়বগী ফিভম অসিদা মেদিতেসন অমসুং মাইন্দফুলনেসকী কান্নবা অসি অদোম্না ফংব্রা?
শুভানশু শুক্লা: হোয়, প্রধান মন্ত্রী জী, ঐহাক্না মপুং ফানা য়াজরি। ঐহাক্না থাজৈ মদুদি ভারত অসি হান্ননা মাংদা চংশিল্লি অমসুং মসিগী মিসন অসি অচৌবা রেস অসিগী অহানবা খোঙথাং অমনি অমসুং ঐখোয়না তশেংনা মাংলোমদা চংশিল্লি অমসুং ঐখোয়না স্পেসতা ঐখোয়গী ইশাগী স্তেসনশিং লৈরগনি অমসুং মীওই কয়া অমা মফম অদুদা য়ৌরগনি অমসুং মাইন্দফুলনেসনা য়াম্না খেন্নবা অমা পুরক্লগনি। মহৌশানা ত্রেনিং তৌরিঙৈদা নৎত্রগা লোঞ্চ তৌদ্রিঙৈদা, য়াম্না স্ত্রেস লৈগদবা ফিভম কয়া অমা লৈ অমসুং মাইন্দফুলনেসকা লোয়ননা অদোম্না ফিভমশিং অদুদা ইশানা ইশাবু ফাথবা ঙম্মি অমসুং করিগুম্বা অদোম্না ফাথনা লৈরবদি, অদোম্না অফবা ৱারেপশিং লৌবা ঙম্মি। কনাগুম্বা অমত্তনা চেল্লিঙৈদা চাবা ঙমদে হায়না হায়নৈ, মরম অদুনা নহাক্না হেন্না পুক্নিং ফাথনা লৈরিবমখৈ, নহাক্না হেন্না ফবা ৱারেপশিং লৌবা ঙমগনি। অসুম্না, ঐহাক্না খল্লি মদুদি মাইন্দফুলনেস হায়বসিনা য়াম্না মরুওইবা থৌদাং অমা লৌই, মরম অদুনা করিগুম্বা পোৎশক অনি অসি অমত্তা ওইনা শিজিন্নরবদি, অসিগুম্বা অরুবা অকোয়রোন নত্ত্রগা অরুবা নুংশিৎকী ফিভম অমদা, মসি য়াম্না কান্নগনি অমসুং মসিনা মীওইবদা য়াম্না থুনা এদাপ্ত তৌবদা মতেং পাংগনি।
প্রধান মন্ত্রী: নহাক্না স্পেসতা এক্সপেরিমেন্ত কয়া পাংথোক্লি। তুংলমচৎতা লৌউ-শিংউ অমসুং হকশেলগী সেক্তরদা কান্নবা পীগদবা এক্সপেরিমেন্ত অমা লৈব্রা?
শুভানশু শুক্লা: হোয়, প্রধান মন্ত্রীজী, ঐহাক্না চাউথোকচবা পোকচৈ মদুদি ভারতকী সাইন্তিস্তশিংনা অহানবা ওইনা অখন্নবা এক্সপরিমেন্ত ৭ দিজাইন তৌখ্রে। ঐহাক্না মখোয়শিং অসি ঐহাক্কা লোয়ননা স্তেসন অসিদা পুরক্লি। ঙসি ঐহাক্না পাংথোক্কদৌরিবা অহানবা এক্সপরিমেন্ত অসি স্তেম সেলশিংদা ওইগনি। অসুম্না, স্পেসতা চৎপদা থোকপা অসিদি গ্রাইভেতী লৈতবনা মরম ওইদুনা, লোদ অদু মাংই অমসুং মসিনা মরম ওইদুনা মসল লোস থোকই। মরম অদুনা, ঐগী চাংয়েং অসিনা ঐখোয়না সপ্লিমেন্ত খরা পীরগা মসল লোস অসি লেপহনবা নত্ত্রগা থিন্থহনবা ঙম্বা য়েংবা অসিনি। মসিদা মালেমগী ওইনসু হকথেংননা মরী লৈনৈ মদুদি হায়রিবা সপ্লিমেন্তশিং অসি চহি য়াম্লবা মতুংদা মসল হন্থরকপা মীওইশিংদা শিজিন্নবা য়াই। মরম অদুনা, ঐহাক্না মসি মফম অদুদা তশেংনা শিজিন্নবা য়াগনি হায়না খল্লি। মসিগা লোয়ননা, অতোপ্পা এক্সপেরিমেন্ত অসি মাইক্রোএলগেগী গ্রোথতা ওইরি। হায়রিবা মাইক্রোএলগেশিং অসি য়াম্না পিকপা অদুবু য়াম্না মচি ওইবা মওংদা লৈ। মরম অদুনা ঐখোয়না মফম অসিদা মখোয়শিং অসিবু চাউখৎপা উবা ঙম্লবদি অমসুং ঐখোয়না মখোয়শিং অসিবু মশিং য়াম্লবা মওংদা চাউখৎহন্নবা অমসুং মচি ওইবা চিঞ্জাক ফংহন্নবা থৌওং অমা পুথোকপা ঙম্লবদি, মদুদি মফম খরদা মালেমগী ওইবা ফুদ সেক্যুরিতীগীদমক য়াম্না কান্নবা ওইগনি। স্পেসকী খ্বাইদগী চাউবা কান্নবা অসি মফম অসিদা থৌওং অসি য়াম্না থুনা থোকপনি। মরম অদুনা, ঐখোয়না থা কয়া নৎত্রগা চহি কয়া ঙাইদুনা লৈবগী মথৌ তাদে, মরম অদুনা ঐখোয়না ফংলিবা মহৈশিং অসি ঐখোয়না শিজিন্নবা য়াই অমসুং...
প্রধান মন্ত্রী: শুভানশু, চন্দ্রয়ানগী মায় পাক্লবা মতুংদা, লৈবাক অসিগী অঙাংশিং অমসুং নহাশিংগী মরক্তা সাইন্সকী মতাংদা অনৌবা পুক্নিং চিংশিনবা অমা পোক্লকখি, স্পেস এক্সপ্লোর তৌবগী অপাম্বা অদু হেনগৎলকখি। হৌজিক অদোমগী পুৱারী ওইরবা খোঙচৎ অসিনা মদুগী ৱারেপ অদু হেন্না মপাঙ্গল কনখৎহল্লি। ঙসিদি অঙাংশিংনা অতিয়াদা য়েংবতা নত্তনা, মখোয়না খল্লি, ঐহাকসু মফমদু য়ৌবা ঙমগনি। অসিগুম্বা ৱাখল্লোন, ৱাখল্লোন অসি ঐখোয়গী তুংগী স্পেস মিসনশিংগী তশেংবা য়ুম্ফম্নি। ভারতকী নহা ওইরিবা মীরোলশিংদা অদোম্না করি পাউজেল পীবা পাম্বিবগে?
শুভানশু শুক্লা: প্রধান মন্ত্রীজী, ঙসি ঐখোয়গী নহা ওইরিবা মীরোলশিংদা ঐনা পাউজেল অমা পীবা পাম্লবদি, অহানবদা ঐনা অদোমদা হায়জনীংই মদুদি ভারতনা চংশিল্লিবা মাইকৈ অসিদা ঐখোয়না য়াম্না চাউরবা অমসুং অৱাংবা থাক্কী মংলানশিং উবা ফংলে। মংলানশিং অদু মপুং ফাহন্নবগীদমক, ঐখোয়না অদোম পুম্নমকপু মথৌ তাই। মরম অদুনা মথৌ তাবশিং অদু মপুং ফাহন্নবগীদমক ঐনা হায়জনীংই মদুদি মাই পাকপগী লম্বী অমত্তা লৈতে মদুদি করিগুম্বা মতমদা অদোম্না লম্বী অমা চঙই, করিগুম্বা মতমদা কনাগুম্বা অমনা অতোপ্পা লম্বী অমা চঙই। করিগুম্বা অদোম্না মসিগী মরুওইবা মন্ত্র অসিবু শিজিন্নরবদি, অদোম লম্বী অমা হেক্তদা চৎলবসু, অদোম মফম অমা হেক্তদা লৈরবসু, অদোম্না কৈদৌঙৈদা তোকপা তৌরোই, মদু ওইরবদি মায় পাকপা অসি ঙসি নৎত্রগা হয়েং লাকপা য়াই, অদুবু মসি তশেংনা লাক্কনি।
প্রধান মন্ত্রী: ঐহাক্না থাজৈ মদুদি লৈবাক অসিগী নহাশিংনা অদোমগী ৱাহৈশিং অসি পামগনি অমসুং অদোম্না ঐহাকপু য়াম্না ফজনা খঙই। ঐহাক্না কনাগুম্বা অমগা ৱারী শারকপা মতমদা, ঐহাক্না মখোয়দা হোমৱার্ক পীজরি। ঐখোয়না মিসন গগনয়ান অসি মাংলোমদা চংশিনবা তাই, ঐখোয়না ঐখোয়গী স্পেস স্তেসন শেমগদবনি, অমসুং থাদা ভারতকী এস্ত্রোনোতশিং থুংহনগদবনি। অদোমগী এক্সপিরিয়েন্সশিং অসি মিসনশিং অসিদা য়াম্না কান্নবা ওইগনি। ঐনা থাজৈ মদুদি অদোম্না মফম অদুদা অদোমগী এক্সপরিয়েন্সশিং অদু রেকোর্দ তৌরি।
শুভানশু শুক্লা: হোয়, প্রধান মন্ত্রী জী, তশেংনা, ত্রেনীং তৌরিঙৈ অমসুং মিসন অসিগী মপুংফাবা এক্সপরিয়েন্স তৌরিঙৈদা, ঐহাক্না তমশিনবা পারাশিং, ঐহাক্না তমশিনখিবশিং, ঐহাক্না মখোয় পুম্নমকপু লোশিল্লি অমসুং ঐহাক্না থাজৈ মদুদি হায়রিবা ৱাফম পুম্নমক অসি ঐহাক হল্লকপা মতমদা ঐখোয়গীদমক য়াম্না মরু ওইগনি অমসুং ঐখোয়না মসিগী পরাশিং অসি ঐখোয়গী মিসনশিংদা ইফেক্তিব ওইনা শিজিন্নবা ঙমগনি অমসুং মখোয়বু অথুবা মতমদা মপুং ফাহনগনি। মরমদি ঐহাক্কা লোয়ননা লাকখিবা ঐহাক্কী মরুপশিংনসু কদাইদা গগনয়ানদা চৎকদগে হায়না হংলকখি, মদু ঐহাক্না তাবদা য়াম্না নুংঙাইবা ফাওখি অমসুং মদু ঐহাক্না অথুবা মতমদা পাউখুম পীগনি। মরম অদুনা, ঐহাক্না খল্লি মদুদি মসিগী মঙলান অসি য়াম্না থুনা মপুং ফাহনগনি অমসুং ঐহাক্না মফম অসিদা তম্লিবা মহৈশিং অসি ঐহাক্না হল্লক্লবা মতুংদা ঐহাক্কী মিসন অসিদা ১০০% শিজিন্ননবা অমসুং মদু অথুবা মতমদা মপুং ফাহনবা হোৎনগনি।
প্রধান মন্ত্রী: শুভাংশু, ঐহাক্না থাজৈ মদুদি অদোমগী পাউজেল অসিনা ইথিল পীরগনি অমসুং অদোম্না চৎত্রিঙৈ মমাংদা ঐখোয়না উন্নখিবা মতমদা, ঐহাক্না অদোমগী ইমুং মনুংগী মীওইশিংগা উনবগী খুদোংচাবা ফংখি অমসুং অদোমগী ইমুং মনুংগী মীওই পুম্নমক অসি নুংঙাইবা অমসুং পুক্নিং নুংশিবা ফাওবা অদু ঐহাক্না উখি। শুভানশু, ঙসি ঐহাক্না অদোমগা ৱারী শানবদা য়াম্না নুংঙাইবা ফাওখি। ঐনা খঙই মদুদি অদোমগী থবক য়াম্না লৈ অমসুং অদোম্না কিলোমীতর ২৮০০০গী খোঙজেল য়াংনা চৎপা মথৌ তাই, মরম অদুনা ঐহাক্না অদোমগী মতম য়াম্না লৌরোই। ঙসি ঐহাক্না থাজবগা লোয়ননা হায়জবা ঙম্মি মদুদি মসি ভারতকী গগনয়ান মিসনগী মাইপাকপগী অহানবা চেপ্তরনি। অদোমগী পুৱারী ওইরবা খোঙচৎ অসি স্পেস খক্তদা অকক্নবা ওইদে, মসিনা চাউখৎলবা ভারতকী মায়কৈদা ঐখোয়গী খোঙচৎ অসিদা খোঙজেল য়াংখৎহল্লগনি অমসুং অনৌবা শক্তি পীরগনি। ভারতনা মালেমগীদমক স্পেসকী অনৌবা ওইথোকপা য়াবশিংগী থোঙ হাংদোক্লগনি। হৌজিক ভারতনা ফ্লাই তৌবতা নত্তনা, তুংগী অনৌবা ফ্লাইৎশিংগীদমক প্লেৎফোর্ম শেমগনি। ঐহাক্না অদোমগী ৱাখল্লোনদা করিগুম্বা খরা হেন্না খঙবা পাম্মি মরমদি ঐহাক্না ৱাহং অমা হংবদি পামদে। করিগুম্বা অদোম্না অদোমগী ৱাখলদা লৈরিবা ৱাখল্লোনশিং অদু ফোংদোক্লবদি, লৈবাক অসিগী নহা ওইরিবা মীরোলনা অদোমগী ৱারোলশিং অদু তাবা ফংগনি, অদুগা ঐহাক্না অদোমদগী অতোপ্পা ৱারোল খরসু তাবা পাম্মি।
শুভানশু শুক্লা: প্রধান মন্ত্রী জী, থাগৎচরি! স্পেসতা লাকপা অমসুং মফম অসিদা ত্রেনিং পীবা অমসুং মফম অসিদা য়ৌরকপগী খোঙচৎ অসি, ঐহাক্না মসিদা য়াম্না তমজখি, প্রধান মন্ত্রী জী, অদুবু মফম অসিদা য়ৌরক্লবা মতুংদা, মসি ঐহাক্কী ওইবা এচিবমেন্ত অমনি, অদুবু মফম খরদদি মসি ঐখোয়গী লৈবাক অসিগী ওইনা য়াম্না চাউবা অপুনবা এচিবমেন্ত অমনি হায়না ঐহাক্না ফাওই। অমসুং ঐহাক্না মসি য়েংলিবা অঙাং খুদিংদা, মসি য়েংলিবা নহা খুদিংদা পাউজেল অমা পীবা পাম্মি মদুদি করিগুম্বা অদোম্না হোৎনরবদি অদোমগী তুংলমচৎ অসি অফবা ওইহল্লবদি, অদোমগী তুংলমচৎ অদু অফবা ওইরগনি অমসুং ঐখোয়গী লৈবাক্কী তুংলমচৎ অদুসু অফবা ওইরগনি অমসুং অদোমগী ৱাখলদা করিগুম্বা অমখক্তমক খল্লবদি, মদুদি অতিয়াগী ঙমখৈ লৈতে, অদোমগীদমকসু নত্তে, ঐগীদমক্তসু নত্তে, ভারতকীদমক্তসু নত্তে অমসুং করিগুম্বা অদোম্না মসি মতম পুম্নমক্তা অদোমগী ৱাখলদা খল্লবদি, অদোম্না মাংলোমদা চংশিল্লগনি, অদোম্না অদোমগী তুংলমচৎ অদু মঙাল পীগনি অমসুং অদোম্না ঐখোয়গী লৈবাক্কী তুংলমচৎ অদু মঙাল পীগনি অমসুং মসি ঐহাক্কী পাউজেলনি, প্রধান মন্ত্রী অমসুং ঐহাক য়াম্না নুংঙাইবা ফাওই মদুদি ঙসি ঐহাক্না অদোমগা ৱারী শানবা ফংবা অসিদা ঐহাক য়াম্না ইমোস্নেল ওইহল্লি অমসুং ভারতনা ঙসি ইন্তর্নেস্নেল স্পেস স্তেসনদা য়ৌরকপা উবদা ঐহাক য়াম্না নুংঙাইবা ফাওই।
প্রধান মন্ত্রী: শুভানশু, ঐহাক্না অদোম অমসুং অদোমগী মরুপ পুম্নমকপু অদোমগী মিসন অসি মাই পাক্না পাংথোক্নবা য়াইফ-পাউজেল পীজরি। শুভানশু, ঐখোয়না অদোম হল্লকপা ঙাইরি। অদোম ইশাবু য়েংশিনবিয়ু, মা ভারতীগী ইকায় খুম্নবা হেনগৎহনবিয়ু। ময়াম পুম্নমকপু য়াইফ-পাউজেল পীজরি, লৈবাক অসিগী মীওই করোর ১৪০গী য়াইফ-মঙ্গোল পীজরি। থবক কন্না তৌবগীদমক্তা অমসুং মসিগী অৱাংবা থাক্তা য়ৌরকপগীদমক্তা ঐহাক্না অদোমবু থাগৎচরি। ভারত মাতা কী জয়!
শুভানশু শুক্লা: থাগৎচরি প্রধান মন্ত্রীজী, থাগৎচরি, ইরৈবাকচা করোর ১৪০বু থাগৎচরি, স্পেসতগী মীওই খুদিংমক্কীদমক ভারত মাতা কী জয়!
