ভারত অমসুং মপান লমদগী ইকায়খুম্নরবা মীথুংশিং, খুরুমজরি!
রেজ রেসপোন্সিবল এ.আই. ফোর সোসিএল এমপৱারমেন্ত মীফমদা তরাম্না ওকচরি। আর্তিফিসিএল ইন্তলিজেন্সকী মতাঙদা খন্ন-নৈনবা পুক্নীং থৌগৎপা হায়বসি চাউনা হোৎনবা ৱাফম অমনি। অদোম পুম্নমক্না মরীক চুম্না তেক্নোলোজী অমসুং মীওইবা মপাঙ্গল কনখৎহনবগা মরী লৈনবা ৱাফমশিং থমখ্রে। তেক্নোলোজীনা ঐখোয়গী থবক মফমদা অহোংবা পুরক্লে। তাঞ্জা কয়াদা তেক্নোলোজীনা মরুওইবা শীংনবা কয়াগী পাম্বৈ পুথোকপদা মতেং পাংখ্রে। খুন্নাইগী থৌদাং অমসুং এ.আই. পুনশিনবা অসিনা এ.আই.দা মীওইবগী মচৎ হেন্না য়াওহন্দুনা মপুং ফাহনগনি হায়না ঐনা থাজৈ।
মরূপশিং,
আর্তিফিসিএল ইন্তলিজেন্স হায়বসি মীওইবগী লৌশিংগী পাঙ্গলগী চাউথোকচনিংঙাই ওইবা ৱাফম অমনি। ৱাখল খনবা ঙম্বগী পাঙ্গলনা মীওইববু খুৎলায় অমসুং তেক্নোলোজী শেমবা ঙমহল্লি। ঙসিদি হায়রিবা খুৎলায় অমসুং তেক্নোলোজী অসিদা তমবা অমসুং খনবা ঙম্বগী পাঙ্গল অদু লৈরে। ৱাফম অসিগী মতাঙদা মাঙজিল থানা চৎখৎলক্লিবা তেক্নোলোজী অমা হায়রগদি এ.আই.নি। এ.আই. অমসুং মীওইবা পুল্লগা তৌবা অপুনবা থবকশিং অসিনা ঐখোয়গী গ্রহ অসিদা অঙকপা কয়া তৌবা ঙম্লি।
মরূপশিং,
পুৱারীগী খোঙথাঙ খুদিংদা, ভারতনা মালেমবু লৌশিং অমসুং তমবগী লমদা লমজিংদুনা লাক্লি। ঙসিগী আই.তি.গী মতমসিদসু, ভারতনা শিংথানিংঙাই ওইরবা থৌদাং য়ারি। খ্বাইদগী মশক নাইবা তেক লুচিংবা খরদি ভারত্তা লৈরি। ভারতনা মালেমগী আই.তি. সর্ভিস ইন্দস্ত্রীগী পৱার-হাউস অমা ওইনা লেপ্লি। ঐখোয়না দিজিতেলগী লমদা মশক নাইনা চঙশিন্দুনা মালেমবু মখা তানা নুংঙাইহনখিগনি।
মরূপশিং,
ভারত্তা তেক্নোলোজীনা লৌথুপ লৌকোই লৈতবা অমসুং দেলিভরী সর্ভিসপু হেন্না ফগৎহনবা ঐখোয়না থেংনরে। ঐখোয় মালেমগী খ্বাইদগী চাউবা য়ুনিক আইদেন্তিতী সিস্তেম – আধারগী মফমনি। ঐখোয়গী মালেমগী খ্বাইদগী অনৌবা মওংগী ওইবা দিজিতেল পেমেন্ত সিস্তেম – য়ু.পি.আই.সু লৈরি। মসিনা লায়রবা অমদি নাথৈদুনা থম্বীরবা মীওইশিংদা দাইরেক্ত কেস ত্রান্ফর তৌবগুমবা শেনথুমগী সর্ভিসশিং য়াওনা দিজিতেল সর্ভিসশিং ফংহনবা ঙমহল্লে। লাইচৎকী মনুংসিদা ভারতকী দিজিতেলগী শেম শাহৌবা অসিনা কয়াম চাউনা মতেং ওইখিবগে হায়বদু ঐখোয়না উখ্রে। ঐখোয়না ঙন্না অমদি খ্বাইদগী মতিক চাবা মওংদা মীয়ামদা মতেং পীবা ঙমখি। ভারতনা মসিগী ওপ্তিকেল ফাইবর নেতৱর্ক খোঙজেল য়াঙনা পাকথোক চাউথোকহল্লি। মসিগী পান্দমদি খুঙ্গঙ খুদিংদা অয়াঙবা ইন্তরনেত শমবনি।
মরূপশিং,
হৌজিক ঐখোয়না ভারতপু এ.আই.গী মালেমগী মকোন অমা ওইহনবা পাম্মী। ভারত মচা কয়ানা লম অসিদা থবক তৌরি। কয়া অমসু লাক্কদৌরিবা মতমশিংসিদা হীরম অসিদা থবক তৌরক্কনি হায়না ঐনা থাজৈ। মায়কৈ অসিদা ঐখোয়না চঙশিল্লিবা অসি কাঙবু ওইবা, থাজনবা, পুন্না চঙশিনমিন্নবা, থৌদাং য়াবা অমদি পুম্নমক কোনশিনবা হায়বা নুংগী ওইবা ৱাখল্লোন অদুনা থৌদুনা চৎপনি।
মরূপশিং,
ভারতনা হন্দক্তা নেসনেল এজুকেসন পোলিসী ২০২০ চৎনহনখ্রে। মসিনা তেক্নোলোজীদা য়ুম্ফম ওইদুনা তমবা অমসুং হৈশিংবা হেনগৎহনবা হায়বসিদা মহৈ মশিং তমবগী অচৌবা শরুক অমা ওইনা মীৎয়েঙ থম্লি। তোঙান তোঙানবা লমগী লোনশিং অমসুং দাইলেক্তশিংদা ই-কোর্সশিংসু শেমগৎকনি। হায়রিবা হোৎনগদৌরিবা পুম্নমকসিনা এ.আই. ফম্পাক্কী নেচরেল লেঙ্গুএজ প্রোসেসিং (এন.এল.পি.)গী তৌবা ঙম্বশিংদগী কান্নবা ফংগনি। ঐখোয়না চহীসিগী এপ্রিল থাদা রেসপোন্সিবল এ.আই. ফোর য়ুথ প্রোগ্রাম হৌদোকখ্রে, প্রোগ্রাম অসিগী মখাদা স্কুলগী মহৈরোয় ১১০০০ হেনবনা বেসিক কোর্স লোইশিনখ্রে। মখোয়না হৌজিক মখোয়গী এ.আই. প্রোজেক্তশিং শাগৎলি।
মরূপশিং,
নেসনেল এজুকেসনেল তেক্নোলোজী ফোরম (এন.ই.তি.এফ.) শেমগৎলি। মসিনা দিজিতেল ইনফ্রাস্ত্রকচর, দিজিতেল কন্তেন্ত অমসুং কেপাসিতী হেনগৎহন্নবা ই-এজুকেসনগী য়ুনিত শেমগৎকনি। তম্লিবশিংদা হকথেংনবা এক্সপিরিএন্স পীননবা ভর্চুএল লেবশিং শেমগৎলি। ইনোভেসন অমসুং ওন্ত্রপ্রিন্যুরসিপকী চৎনবী অমা য়োকখৎননবা ঐখোয়না অতল ইনোভেসন মিসনসু হৌদোকখ্রে। হায়রিবা খোঙথাঙশিং অসিগী খুত্থাঙদা ঐখোয়না মীয়ামগী কান্ননবগীদমক নৌনা থোক্লক্লিবা তেক্নোলোজীশিংগা চাং মান্ননা চৎননবা পান্দম থম্লি।
মরূপশিং,
ঐনা নেসনেল প্রোগ্রাম ওন আর্তিফিসিএল ইন্তলিজেন্সিকী মতাঙদসু পনবা পাম্মী। মসি এ.আই.বু খুন্নাইগী খুদোংচাদবা ৱাফমশিংগী পাম্বৈ পুথোক্ননবগীদমক্তা মওং চুম্না শীজিন্নবদা কত্থোক্কনি। মসি স্তেকহোল্দরশিংগী ঙাক্লৌগা লোয়ননা পায়খৎকনি। রেজনা হীরম অসিগী মতাঙদা খন্ন-নৈননবগী ফম্পাক অমা ওইবা য়াগনি। হায়রিবসিগী মতাঙদা হোৎনরিবা অসিদা অদোমসু শরুক য়ারনবা ঐনা পাউকৎ পীজরি।
মরূপশিং,
ঐনা চীংলেম্লবা মীয়ামসিদা পীজনিংবা শীংনবা খরা লৈরি। ঐখোয়না আর্তিফিসিএল ইন্তলিজেন্সপু ঐখোয়গী লন অমদি মচাক মথুমশিংবু মওং চুম্না নীংথিনা মেনেজ তৌনবগীদমক্তা শীজিন্নবা য়াগদ্রা? মফম খরদা মচাক মথুমশিং মচী লেঙদনা তাদুনা লৈরি। অদুগা মফম খরদনা মচাক মথুম ৱাৎপগী ফীভম লৈরি। ঐখোয়না মখোয়শিংদু নীংথিনা শীজিন্ননবা মওং মরিল নাইনা য়েন্থোক য়েনশিন তৌবা য়াগদ্রা? ঐখোয়না সর্ভিসশিং ইচঙ থৌনা অমদি পন্থদনা ফংহন্দুনা ঐখোয়গী মীয়ামবু পেলহনবা ঙমগদ্রা?
মরূপশিং,
তুংগী পুন্সি অসি নহাশিংগীনি। অদুগা নহা খুদিংমক মরু ওই। অঙাঙ খুদিংমক্তা তোপ তোপ্পা হৈ-শিংবা, তৌবা ঙমবা অমদি মওং মতৌ লৈ। করিগুম্বা মতমদা অফবা মীশক অমা চুনদবা মফম অমদা তারুবা য়াওই।
মদু ঐখোয়না হোংদোকপা য়াবা লম্বী অমা লৈ। অঙাঙ খুদিংমক মখোয়না চাউখৎলকপা মতমদা মখোয় মশানা য়েংশিনজবা য়াহল্লবদি? মমা মপাশিংনা, ওজাশিংনা অমদি মরূপশিংনা অঙাঙশিংবু নীংথিনা য়েংশিন্দুনা লৈবা য়াগদ্রা? মখোয়গী অঙাঙ ওইরিঙৈ মতমদগী অহল মতম চঙলকপা মতম ফাওবা য়েংশিন্দুনা মখোয়গী রেকোর্দ অমা থম্বিবনা অঙাঙশিংবু মখোয়গী মহৌশানা পীথোকচরকপা খঙদোকচবদা চাউনা মতেং ওইগনি। অদুগুম্না য়েংশিনবদুনা নহাশিংবু লমজিংনবগী শাফু অমা ওইগনি। অঙাঙ খুদিংমক্কী মওং মতৌগী মমুৎ তানা নৈনরবা রিপোর্ত অমা পীবা সিস্তেম অমা ঐখোয়না শেমগৎপা ঙমগদ্রা? মসিনা নহা কয়াগীদমক্তা খুদোংচাবা কয়াগী থোঙশিং হাংদোক্কনি। অসিগুম্না হ্যুমেন রিসোর্স খঙদোকপসিনা লৈঙাক অমসুং লল্লোন ইতিক্তা তুং কোইনা কান্নবা পীগনি।
মরূপশিং,
লৌউ-শিংউ, হকশেলগী ফীভম ফগৎহনবদা, তুংগী মীরোলগী ময়োল্লমগী মচাক মথুমশিং শেমগৎপদা, অমদি ত্রাফিক জাম হন্থহনবা, ইরম নলাগী ফীভম ফগৎহনবা অমসুং ইনর্জী গ্রীদ থমবগুম্বা ময়োল্লমগী খুদোংচাদবা ৱাফমশিং কোকহনবদা এ.আই.না লৌরিবা অচৌবা থৌদাং ঐনা উই। মসি ঐখোয়গী দিজাস্তর মেনেজমেন্ত সিস্তেম মপাঙ্গল কলহনবদা শীজিন্নবা য়াগনি। মসি অইং-অশাগী ফীভম হোংলকপগী ৱাফমশিংগী ৱারোইশিন পুরকপদসু শীজিন্নবা য়াগনি।
মরূপশিং,
ঐখোয়গী গ্রহ অসিদা লোন কয়া লৈরি। ভারত্তসু ঐখোয়গী লোন অমসুং লোন্থৈ কয়া লৈরি। অসিগুম্বা খেন্নবা কয়াসিনা ঐখোয়বু হেন্না ফবা খুন্নাই অমা ওইহল্লি। হৌজিক্তা প্রোফেসর রাজ রেদ্দীনা হায়রমবগুম্না, অপনবা লৈতনা লোনগী পলবু শম্নহন্নবা করিগীদমক্তা এ.আই. শীজিন্নরোইদৌরিবনো। শোইনাইরবা ইচিন ইনাউশিংগী ফীভম ফগৎহনবদা এ.আই.বু কমদৌনা নীংথিনা শীজিন্নবা য়াগদগে হায়বদু ঐখোয় খনসি।
মরূপশিং,
করিগুদমক্তা এ.আই.বু লৌশিং তাথোক তাশিন তৌবদা শীজিন্নরোইদৌরিবনো? ৱাখল লৌশিং, ঈ-পাউ অমসুং হৈশিংবশিং লায়না ফংহনবগুম্না মপাঙ্গল কলহনগদবা পোৎশক খরখক্তনি লৈরিবা।
মরূপশিং,
এ.আই. শীজিন্নবা মতমদা থাজনবা ফীভম থমবা হায়বসি ঐখোয় অপুনবগী থৌদাং ওইরি। অলগোরিথম ত্রান্সপেরেন্সীনা হায়রিবা থাজবা ফীভম অসি পুরকপগী মরুওইবা ৱাফম্নি। মসিগা মান্ননা একাউন্তেবিলিতী অসিসু মরুওই। নন-স্তেত এক্তরশিংনা এ.আই.বু খুৎলায় ওইনা শীজিন্নরকপদগী মালেম অসি ঐখোয়না ঙাকথোকপা মথৌ তাই।
মরূপশিং,
ঐখোয়না এ.আই.গী মতাঙদা খন্নবা মতমদা, মীওইবগী ক্রিএতিভিতী অমসুং মীওইবগী পুক্নীংগী ইহুল অসিনা ঐখোয়গী খ্বাইদগী চাউবা থৌনানি হায়বসিদা ঐখোয়না চিংনবা লৈরোইদবনি। মখোয়শিং অসিনা মেচিনশিংগা য়েংনবদা ঐখোয়গী তোপ তোপ্পা খুদোংচাবনি। খ্বাইদগী হৈথোই শিংথোইরবা এ.আই.না ঐখোয়গী হৈশিংবা অমদি মীনুংশি য়াওদনা মীওইবগী খুদোংচাদবা ৱাফমশিংগী পাম্বৈ পুরকপা ঙম্লোই। ঐখোয়না অসিগুম্লবা হৈশিংবগী খুদোংচাবশিং অসি মেচিনশিংগদগী লাপথোক্না থমগদগে হায়বদু ঐখোয়না খনগদবনি। মতম পুম্নমক্তা এ.আই.দগী খোঙকাপ খরা মাঙজিন থানা লৈননবা ঐখোয়না হোৎনবা মথৌ তাই। কমদৌনা এ.আই.না মীওইবগী তৌবা ঙমবগী চাং হেনগৎহনগদগে হায়বসিসু ঐখোয়না খনগদবনি। ঐনা অমুক্কা হন্না হায়নিংই:- মীপুম খুদিংমক্কী তোপ তোপ্পা মতিং এ.আই.না পুথোকপা ঙমগনি। মসিনা মখোয়বু খুন্নাইদা হেন্না মতিক চানা থৌদাং লৌহনবা ঙমহনগনি।
মরূপশিং,
রেজ ২০২০সিদা, ঐখোয়না মালেমগী মাঙজিন থাবা স্তেকহোল্দরশিংগী ওইবা মালেমগী ফোরম অমা শেম্লে। ঐখোয় ৱাখল্লোনশিং পুথোক্তুনা নৈনসি অমদি আর্তিফিসিএল ইন্তলিজেন্স শীজিন্ননবগী মান্নবা লম্বী অমা পুথোকসি। মসিগীদমক্তা ঐখোয় পুম্নমক্না খোঙবু ওইনা চৎমিন্নবা য়াম্না মরু ওই। অসিগুম্লবা তশেং তশেংনা মালেমগী থৌরম অমা ওইরিবা অসিদা শরুক য়াননবা পুনশিনবগীদমক্তা ঐনা অদোমবু থাগৎচর। গ্লোবেল সম্মিত অসি মায় পাকপা ওইরসনু হায়না ঐনা নিজরি। লাক্কদৌরিবা নুমিৎ মরিনিসিদা খন্ন-নৈনগদৌরিবা অসিনা থৌদাং চাউবা এ.আই.গী এক্সন রোদমেপ, মালেম শিনবা থুংনা পুন্সি অমসুং পুন্সি লম্বীদা অহোংবা পুরক্কদবা রোদমেপ অমা শেমবদা মতেং ওইগনি হায়না ঐনা থাজৈ। অদোম পুম্নমক্তা ঐনা য়াইফ পাউজেল পীজরি।
অদোম্বু থাগৎচরি।
অদোম্বু য়াম্না থাগৎচরি।
