ময়ামগা ৱারি শানবদা, ঐখোয়গী লৈবাক্কী শান্নপোৎ শাবগী ইন্দস্ত্রিদা অচৌবা থৌনা লোত্তুনা লৈরি হায়বা খঙলে। মসিগী মপাঙ্গল অমসুং শক্তম কনখৎহনবা অসি অত্মানির্ভর ভারত কেম্পেনগী অচৌবা শরুক অমনি। লৈবাক অসিগী অহানবা শান্নপোৎকী মেলাদা ঙসি ঐখোয় শরুক য়াবা অসি ঐখোয় পুম্নমক্কী হরাওনিঙাই ওইবা ৱাফম অমনি। শান্নপোৎকী মেলা অসিদা শরুক য়ারিবা মন্ত্রীমন্দলগী ঐগী মরুপশিং, শান্নপোৎ শাবগী ইন্দস্ত্রিগী মীহুৎশিং, খুৎহৈবা ইনাওশিং অমসুং ইচলশিং, মমা-মপাশিং, ওজাশিং অমসুং নুংশিরবা অঙাংশিং!
মসিগী শান্নপোৎকী মেলা হৌদোকপা অসি শেন তান্নবা থৌরম অমা নত্তে। মসিনা লৈবাক অসিগী চহিচা কয়া কুইরবা শান্ন-খোৎনবশিং অমসুং হরাও-তয়াম্বা মপাঙ্গল কনখৎহনগনি। মেলা অসিদা খুৎহৈবশিং, স্কুলশিং, মল্তিনেসনেল কম্পেনিশিং য়াওনা রাজ অমসুং য়ু.তি ৩০গী একজিবিতর ১০০০ হেন্না শরুক য়ারি হায়বা ঐ খঙলে। মসি শান্নপোৎকী দিজাইন, ইন্নোবেসন, তেক্নোলোজি, য়োনফম অমসুং য়োম্বগী মতাংদা ৱা খন্নফম অমসুং অদোম্না খঙজবশিং শরুক য়াফম মফম অমনি। শান্নপোৎকী মেলা অসিদগী অদোম্নবা ভারত্তা লৈরিবা ওনলাইন গেমিং ইন্দস্ত্রি অমসুং ই-স্পোর্তকী মরমদা খঙনবগী খুদোংচাবা ফংলগনি। মফম অসিদা অঙাংশিংগীদমক পাংথোক্লিবা থৌরমশিং ঐশু য়েংবা পাম্মী। মসিগী শান্নপোৎকী মেলা অসিদা শরুক য়ারিবা পুম্নমক ঐনা থম্মোয় শেংনা থাগৎচরি।
শান্নপোৎশিংগা ভারতকা লৈনবা মরী অসি লৈবাক অসিগী পুৱারিগুম কুইরে। মালেম পুম্নমক্না ইন্দস ভেল্লি, মোহেঞ্জো-দারো অমসুং হারাপ্পান সভেত্যগী শান্নপোৎশিংগী মরমদা থিজিল্লে। থায়না মমাংঙৈদা লমকোয়বশিংনা ভারত্তা লাকপা মতমদা, মখোয়না ভারত্তা শান্ন-খোৎনবা তমখি অমসুং শান্নবা অদু মখোয়না পুদুনা চৎখি। হৌজিক মালেমদা মমিং চৎলবা চেস অসি থায়না ভারত্তা ‘চাতুরঙ্গা নত্রগা চাদুরঙ্গা’ হায়না শান্নরমখি। হৌজিক মতমগী লুদো অসি ‘পাচিসি’ হায়না মমাঙঙৈদা শান্নরমখি। ঐখোয়গী অরিবা লাইরিকশিংদা বাল রামগী শান্নপোৎ য়াম্না লৈরমখি হায়না ফোঙদোকখি। গোকুলদা, গোপাল কৃষ্ণনা মহাক্কী মরুপশিংগা লোয়ন্না য়ুমগী মপান্দা বেল্লুন অমদা শান্নখি। ঐখোয়গী অরিবা লাইশঙশিংদা গেমশিং, শান্নপোৎশিং অমসুং ক্রাফশিং হকলমখি। করিগুম্বা অদোম্না তামিল নাদুগী চেন্নাইদা লাইশঙশিং য়েংলবদি, ফক্লাংশিংদা তোঙান-তোঙানবা মশান্নশিং অমসুং শান্নপোৎশিং উগনি।
মরুপশিং,
চৎনবী অমদা, শান্ন-খোৎনবশিং অমসুং শান্নপোৎশিংনা লাইনিংগী শরুক অমা ওইরবদি, খুন্নাই অদু শান্ন-খোৎনবগী সাইন্স ফজনা খঙলে হায়বা তাক্লে। হিরম খুদিংমক্তা অঙাংশিং ফগৎহনবা অমসুং মখোয়গী ৱাখল খনবগী শক্তি ফগৎহনবদা মতেং পাংবা ঐখোয়গী শান্নপোৎশিং লৈরি। ঙসি ফাওবা, ভারতকী শান্নপোৎশিংনা অনৌবা মতমগী শান্নপোৎশিংদগী লাইবা অমসুং মমল হোঙবা হেল্লি অমসুং খুন্নাই, লম্মিৎ-তুমিৎ অমসুং অকোয়বগী ফিবমগা মরী লৈনরি।
মরুপশিং,
অমুক হন্না শীজিন্নবা অমসুং রিসাইক্লিং তৌবা অসি ভারতকী পু্ন্সি মহিংগী শরুক অমনি, মসি ঐখোয়গী শান্নপোৎশিংদশু উরে। ভারতকী শান্নপোৎ অয়াম্বা মহৌশাদা ফংবা অমসুং অকোয়বগী ফিবম কাইহন্দবা পোৎলমশিংনা শাবনি, মখোয় শাবদা শীজিন্নরিবা মচুশিং অসিশু মহৌশাদা ফংবা অমসুং হকচাং শোক্তবা ঙাক্তনি। হৌজিক ঐখোয়না বরানসীগী মীয়ামগা ৱারি শানরি। বরানসীগী উনা শাবা শান্নপোৎশিং অমসুং লাইধিশিং, রাজস্থানগী লৈবাক্না শাবা শান্নপোৎশিং, ইস্ত মেদিনিপুর, কুতচগী দিঙ্গলা অমসুং দিঙ্গলিগী লাইধি, অন্ধ্র প্রদেসকী ইতিকোপ্পাকা বোম্মুলা শান্নপোৎশিং অমসুং বুধনিগী উগী শান্নপোৎশিং য়েংউ। মফম অসিদা কর্নাতাকাগী চান্নপাতনা শান্নপোৎশিং, তেলঙ্গানাগী নিরমল শান্নপোৎশিং, চিত্রকুতকী উগী শান্নপোৎশিং অমসুং ধুব্রি-অসামগী তেরাকোত্তা শান্নপোৎশিং লৈরে। শান্নপোৎশিং অসি অকোয়বগী ফিবম শোকহন্দবা অমসুং কান্নবা ঙাক্তনি। হায়রিবা শান্নপোৎশিং অসিনা লৈবাক অসিগী নহারোলশিং ঐখোয়গী পুৱারি অমসুং চৎনবীগা শম্নহল্লি অমসুং খুন্নাইগী ৱাখল্লোল শেমগৎপদশু মতেং পাংলি।
মরম অদুনা ঙসি লৈবাক অসিগী শান্নপোৎ শারিবশিংনা ইকোলোজি অমসুং সাইকোলোজি অনিমক্তা কান্নবা শান্নপোৎশিং শানবা ঐনা হায়জরি। ঐখোয়না শান্নপোৎশিং শাবদা প্লাস্তিক খজিক্তং শীজিন্নবা য়াগদরা? রিসাইকল তৌবা য়াবা পোৎলমশিং শীজিন্নগদবনি। ঙসিদি ভারতকী মিৎয়েং অমসুং ভারতকী অনৌবা ৱাখলশিং মালেমগী মফম খুদিংমক্তা ৱারিনরে। মালেমদা উৎনবা ভারতকী অখন্নবা মিৎয়েং অমসু লৈরি। হায়রিবা খেন্নবশিং অসি ঐখোয়গী চৎনবীশিং, ফিজোলশিং অমসুং চাকচা-য়ুথকশিংদা উরে। ভারতকী শান্নপোৎ শাবগী ইন্দস্ত্রিনা অসিগুম্বা ভারতকী অখন্নবা মিৎয়েং অসি পুক্নিং থৌগৎকদবনি। মীরোল কয়া ঐখোয়না শান্নপোৎশিং চৎনবী অমা ওইনা ঙাক-শেন্দুনা থম্লক্লি। ইবোক্কী শান্নপোৎশিং ইমুং অমগী অহুমশুবা-মরিশুবা মীরোলশিংদা শীন্নরমখি। কুহ্মৈ মতমশিংদা, ইমুংশিংনা মখোয়গী শান্নপোৎশিং পুথোরক্তুনা অমনা অমদা য়েংহনখি। ভারতকী ফজবা গুনশিং য়াওরবা ঐখোয়গী শান্নপোৎশিংনা অঙাংশিংদা ভারতকী গুনশিং শেমগৎপা ঙমহল্লি। মসিদা লমদম অসিগী লৈবাক-লৈহাওগী মনম চেনগনি।
নুংশিরবা অঙাংশিং অমসুং মরুপশিং,
গুরুদেব তগোরনা মহাক্কী শৈরেং অমদা ইরমখি: “ঐনা অদোমগী মচু শঙলবা শান্নপোৎশিং পুরকপতা, ঐগী অঙাং, লৈচিলশিংদা, ঈশিংদা মচুশিংগী লিলা অমা শান্নরিবা অদু করিগীনো হায়বা ঐ খঙলে, ঐনা অদোমদা মচু কয়াগী শান্নপোৎশিং পীবা মতমদা করিগী লৈশিং মচু শঙলিবনো হায়বা খঙলে”। শান্নপোৎ অমনা অঙাংশিং হরাওবগী মপান নাইদ্রবা মালেম অমা ফংহল্লি। শান্নপোৎকী মচু অমমম্না অঙাংশিংগী পুন্সিদা মচু কয়া শঙহল্লি। শান্নপোৎশিং উবদা ঙসি অঙাংশিংনা ফাওরিবা নুংঙাইবা অসিনা ঐখোয় পুম্নমক্কী অঙাং ওইরিঙৈগী মতম নিংশিংহল্লে। চেগী এয়রপ্লেনশিং, খুংশিং, মার্বলশিং, তেলঙ্গাশিং, হুইসেলশিং, চেগী ফেনশিং, লাইধিশিং অসি অঙাং খুদিংমক্কী মরুপশিংনি। শান্নপোৎশিং শান্নবা নত্রগা শাবা মতমদা ঐখোয়না সাইন্সকী প্রিন্সিপালশিং হায়বদি উংবা, ওসিলেসন, প্রেসর অমসুং ফ্রিক্সনগী মরমদা খঙবা ঙম্মী। ভারতকী শান্ন-খোৎনবশিং অমসুং শান্নপোৎশিংগী খ্বাইদগী ফবা শরুক্তি মসিদা য়াওরিবা লৌশিং, সাইন্স, নুংঙাইবা অমসুং সাইকোলোজিনি। খুদম ওইনা হায়রবদা, অঙাংশিংনা খুং শান্নবা মতমদা মসিনা মখোয়দা গ্রেভিতি অমসুং বেলেন্সকী পারা তম্বী। মসিগা মান্নবা মওংদা, অঙাংশিংনা নাউরি কাপ্পা শান্নবা মতমদা, মশা খঙদনা পোতেন্সিএল অমসুং কাইনেতিক ইনর্জিশিংগী মরমদা তম্বা হৌখি। পজল তোইশিংনা অরুবা ৱাখল খনবা অমসুং অৱাবশিং কমদৌনা থেংনগনি হায়বগী লৌশিং ফংহনখি। পোকপতা ঙাইরিবা অঙাংশিংশু মখুৎশিং থেকতোক-থেকচিন তৌদুনা অমসুং লৈদুনা কোইনা চৎপগী মরমদা ইথিল পোকপা হৌখি। হায়রিবা চপ মান্নবা থবকশিং অসি মখোয়গী লাইরিকশিংদা তম্বা মতমদা মখোয়গী গেমশিংগা মখোয়না মরী লৈনহনবা ঙম্মী অমসুং থবক ওইনা খঙবা ঙম্মী। হায়রিবশিং অসি লাইরিক খক্তগী ফংবা লৌশিংনা খঙবা ঙম্লোই।
মরুপশিং,
কমদৌনা অফবা শান্নপোৎশিংনা অঙাংশিংগী ৱাখল-লৌশিং হেনগৎহনবগে অমসুং মখোয়গী মঙলানশিং মতেং পাংবগে হায়বা অদোম খঙলমগনি। মখোয়গী শান্নপোৎশিংদা কমদৌনা অঙাংশিংনা মখোয় মশাগী ওইবা ৱাখলশিং শাগৎপগে। খুদম ওইনা, অঙাং অমদা চাকশঙগী শান্নপোৎশিং পীবা মতমদা, মহাক্না চাকখুম অমা শেন্নবা অমসুং ইমুং অমা চাক পীজনবা মওংদা মহাক্না থৌরাং তৌরক্কনি। অঙাং অমদা শা-উচেকশিংগী শান্নপোৎশিং পীবা মতমদা, মহাক্কী ৱাখলদা উমং অমা শেমগৎলক্কনি অমসুং মহাক্না পামজবা খোঞ্জেলশিং মখোল থোকহনবা হৌরক্কনি। শান্নপোৎ অদু নোংশা ওইরবদি মহাক্না ঙংবা হৌরক্কনি। স্তেথেস্কোপ অমা পীবা মতমদা, মহাক মতম মাঙহন্দনা দোক্তর অমা ওইরকপা অদোম্না উগনি অমসুং ইমুং অমা লায়য়েংবা হৌরক্কনি। শুপ্নগী বোল অমা পীবা মতমদা, মখোয়না য়ুম মনুংদা ফুতবোল গ্রাউন্ত অমা শেমগৎকনি। মখোয়গী রোকেতকী শান্নপোৎ অমা ফংবা মতমদা মখোয়না স্পেসকী খোঙচৎ অমা চৎকনি। মখোয়গী মঙলানগী ঙমখৈ, অরোইবা লৈতে। মখোয়গী হরাওবা অমসুং অফবা মপুংফাহন্নবা মখোয়না শুপ্নগী অপীকপা শান্নপোৎ অমা খক দরকার ওই।
অফবা শান্নপোৎশিংগী ফজবা মুৎপা নাইদে অমসুং মতম কুইনা চৎলি। অদোম্না অঙাংশিংগা শান্নবা মতমদা, হায়রিবা শান্নপোৎশিং অসিগী খুৎথাংদা অদোম অদোমগী অঙাং ওইরিঙৈগী পুন্সিদা হল্লক্কনি। মরম অদুনা অদোমগী অঙাংশিং লাইরিক পাবদা অদোম্না শরুক য়াবা অদুগুম্না মখোয়না শান্নবা মতমদা মমা-মপাশিং শরুক য়ানবা ঐনা হায়জরি। ঐনা হায়রিবা অসি অদোমগী য়ুম অমসুং ওফিসকী থবকশিং থাদোক্কদবনি অমসুং পুং কয়া অঙাংশিংদা শান্নগদবনি হায়বা নত্তে। মখোয়গী শান্নবদা অদোম শরুক য়াগদবনি। হৌজিক্কী মতম অসিদা য়ুমশিংদা শান্নবগী মতম মহুৎ স্ক্রিন তাইমনা শীনখ্রে।
অদুবু অদোম্না শান্ন-খোৎনবা অমসুং শান্নপোৎশিংগী থৌদাং খঙগদবনি। শান্নপোৎশিংগী সান্তিফিক ওইবা ৱাফমশিং, লাইরিক তম্বদা অমসুং অঙাংশিং ফহনবদা শান্নপোৎশিংনা লৌরিবা থৌদাং মমা-মপাশিংনা খঙগদবনি অমসুং ওজাশিংশু স্কুলশিংদা শান্নপোৎশিং শীজিন্নগদবনি। মাইকৈ অসিদা হৌজিক লৈবাক অসি অফবা থবকশিং পায়খৎলে অমসুং দরকার ওইবা অহোঙবশিং পুরক্লে। মসিগী খুদম অমা ঐখোয়গী অনৌবা নেসনেল ইজুকেসন পোলিসি অসিনি। অনৌবা নেসনেল ইজুকেসন পোলিসি অসিদা শান্নবা অমসুং থবক ওইনা পাংথোকপদা য়ুম্ফম ওইবা লাইরিক তম্বগী খুদোংচাবশিং পাক-শন্না য়াওরে। মসি অঙাংশিং মরম চাবা অমসুং অনৌবা ৱাখল খনবা ঙম্নবা অখন্নবা পুক্নিং চঙবা ইজুকেসন সিস্তেম অমনি।
মরুপশিং,
শান্নপোৎশিংগী তাইবংদা, ভারতকীশু চৎনবী অমসুং তেক্নোলোজি লৈরি, ভারতকীশু ৱাখল্লোল অমসুং হৈশিংবা লৈরি। অকোয়বগী ফিবম শোকহন্দবা শান্নপোৎশিং শানবা ঐখোয়না মালেম মতেং পাংবা ঙমগনি। কম্পুতর গেমশিংগী খুৎথাংদা, ঐখোয়গী সোফৱায়র ইঞ্জিনিয়ারশিংনা মালেমদা ভারতকী ৱারিশিং লিবা ঙমগনি। পুম্নমক অসি লৈরবশু, হৌজিক দোল্লর বিল্লিয়ন ১০০গী মালেমগী শান্নপোৎকী কৈথেলদা ভারতকী চাকথুং অসি য়াম্না পীক্লি। লৈবাক অসিদা শীজিন্নরিবা শান্নপোৎশিংগী চাদা ৮৫ অসি মপান লৈবাকশিংগীনি। হৌখিবা চহি ৭০ রোম অসিদা ভারতকী খুৎহৈবশিং অমসুং হেরিতেচশিং মীরাইবদগী ভারতকী কৈথেলশিং অমসুং ইমুংশিংদা মপান লৈবাকশিংগী শান্নপোৎশিং ইচাউ থোকখিবনি অমসুং শান্নপোৎ অমা খক নত্তনা ঐখোয়গী য়ুমদা ৱাখল্লোন অমা চঙলকখি।
ঐখোয়গী অথৌবশিংদগী হেন্না ভারতকী অঙাংশিংনা অতোপ্পা লৈবাকশিংগী অথৌবশিংগী মরমদা ৱারি শান্নবা হৌরে। মপান্দগী পুশিল্লকপা শান্নপোৎশিং অসিনা ঐখোয়গী লমদম অসিগী ললোন-ইতিক্কী থবকশিংদা অকায়বা থোকহল্লে। মখোয়গী মচাশিং মসিগী ললোন-ইতিক অসিদা লাক্লরোই হায়না খনবদগী খুৎহৈবশিংনা মখোয়গী লৌশিং কয়া তুংগী মীরোলশিংদা তম্বীদবা হৌরক্লে। মসিগী ফিবম অসি অহোঙবা পুরক্নবা ঙসি ঐখোয় পুন্না থবক তৌমিন্নগদবনি। শান্ন-খোৎনবশিং অমসুং শান্নপোৎশিংদা লৈবাক অসি মশাগী ওক্নবা পুথোক্নবা ঐখোয়না হোৎনগদবনি অমসুং মখোয় ভোকেল ফোর লোকেল ওইহনগদবনি। মসিগীদমক ঙসিগী দরকার ওইরিবশিং ঐখোয়না খঙগদবনি। ঐখোয়না মালেমগী কৈথেল অমসুং দরকার ওইরিবশিং খঙগদবনি।
ঐখোয়গী শান্নপোৎশিং ঐখোয়গী গুনশিং, চৎনবীশিং য়াওগদবনি অমসুং অঙাংশিং তাকপী-তম্বীগদবনি অমসুং মালেমগী থাকশিং য়ৌনা মখোয়গী মগুনশিং লৈগদবনি। হিরম অসিদা লৈবাক অসিনা মরুওইবা ৱারেপ কয়া লৌরে। হৌখিবা চহিদগী হৌনা শান্নপোৎশিংগী ক্বালিতি তেস্ত অসি তঙাইফদবা অমা ওইহল্লে। মপান্দগী পুশিল্লকপা শান্নপোৎশিং সেম্পল তেস্ত তৌনবগী অয়াবা পীরে। শান্নপোৎশিংগী ৱারি খন্নবা দরকার ওইদে হায়না মমাঙগী সরকারশিংনা লৌখি। মসি অরুবা ৱাফম অমা ওইনা লৌখিদে। অদুবু হৌজিক লৈবাক অসিনা শান্নপোৎ শাবগী ইন্দস্ত্রি অসি মরুওইবা সেক্তর ২৪গী মনুংদা থম্লে। নেসনেল তোই এক্সন প্লান শেম্লে। হায়রিবা ইন্দস্ত্রিশিং অসি চাংদম্ননবা, লৈবাক অসিগী মশাগী ওক্নবা শান্নপোৎশিং পুথোক্নবা অমসুং ভারতকী শান্নপোৎশিং মালেমগী লৈবাকশিংদা য়ৌহন্নবা প্লান অসিদা মিনিস্ত্রি অমসুং দিপার্তমেন্ত ১৫ য়াওরে। শান্নপোৎশিং শাবা মফমশিং শেমগৎনবা রাজ্য সরকারশিংনা চপ মান্নবা থৌদাং লৌরে।
মসিগা লোয়ন্না, লৈবাক অসিদা শান্নপোৎকী তুরিজমশু মপাঙ্গল কনখৎহল্লে। শান্ন-খোৎনবদা য়ুম্ফম ওইবা ভারতকী শান্নপোৎশিং য়োকখৎনবা তোয়াথোন-২০২১শু শীল্লে। মসিগী তোইকাথোন অসিদা নহারোলশিং, ওজাশিং অমসুং অখঙ-অহৈশিং লাখ ১২ হেন্না মিংচল্লে হায়বা ঐ খঙলে অমসুং অনৌবা ৱাখল্লোল ৭,০০০ হেন্না পুথোরক্লে। চহি মীরাইদুনা লাক্লবশু, ভারতকী হৈশিংবা অমসুং লৌশিং হৌজিক ফাওবা মপুংফানা লৈরি হায়বা মসিনা উৎলে। থায়না মমাংঙৈদা মীওইবা খুন্নাইদা ভারতনা উৎখিবা থৌনা অদুগা চপ মান্নবা থৌনা ঙসি মপুংফানা লৈরি।
ঙসি শান্নপোৎকী মেলা অসিদা হায়রিবা তৌবা ঙম্বশিং অদু থবক ওইনা পাংথোক্নবা মসিগী থৌনা অসি অনৌবা শক্লোন অমা শেম্নবা ঐখোয়না থৌদাং লৌগদবনি। করিগুম্বা ভারত্তা শাবা পোৎথোকশিং পাম্নরবদি, ভারত্তা খুৎনা শাবা পোৎথোকশিং পাম্নবশু হেনগৎলক্কনি। ঙসিদি মীয়াম্না শান্নপোৎশিং পোৎশক অমা ওইনা লৈবা খক নত্তনা লৈরিবা শান্নপোৎ অদুগা মরী লৈনবা ৱাফমশিংশু খঙবা পাম্লে। মরম অদুনা ঐখোয়না ভারত্তা খুৎনা শাবা পুক্নিং থৌগৎকদবনি। ঐখোয়না শান্নপোৎ অমা শাবা মতমদা, ঐখোয়না অঙাং অমগী ৱাখল, অঙাং ওইবগী হরাওবা অমসুং মঙলান শাগৎপনি হায়বা ঐখোয়না নিংশিংগদবনি। মসিগী হরাওবা অসিনা ঐখোয়গী তুংগী পুন্সি শেমগনি।
ঙসি ঐখোয়গী লৈবাক্না মসিগী থৌদাং অসি খঙবদা ঐ হরাওই। ঐখোয়গী থবকশিংনা অত্মানির্ভর ভারত কেম্পেন অসিনা অঙাংশিংগী অনৌবা মালেম অমা শেম্নবা ইথিল পীগনি। মসিগী থাজবা অসিগা লোয়ন্না, ময়াম পুম্নমক ঐগী য়াইফ-পাউজেল পীজরি। অনৌবা মিৎয়েং অমা, সাইন্স অমসুং তেক্নোলোজিগী লোয়ন্না ভারতকী শান্নপোৎশিং মালেমদা য়ৌহন্নবা লেপ্তনা হোৎনবা অসি ঐখোয়গী থৌদাংনি। মদুগী মাইকৈ অদুদা ঐখোয় পুনবা মসিগী শান্নপোৎকী মেলা অসি অকনবা খোঙথাং অমা ওইগনি হায়না ঐনা থাজৈ। অমুক হন্না, অদোমগী মফমদা ঐগী য়াইফ-পাউজেল পীজরি।
থাগৎচরি!
