অসামগী ইনফ্রাস্ত্রকচর ফগৎলকপনা মরম ওইরগা আত্মানির্ভর ভারতকী মরু ওইবা সেন্তর অমা ওইরক্লি
ভারত ইমানা য়াইফরে! ভারত ইমানা য়াইফরে!
মমিং লৈরবা অসামগী মুখ্য মন্ত্রী শ্রী সর্বানন্দ সোনোৱালজী, য়ুনিয়ন কাউন্সিল ওফ মিনিস্তরসকী ঐগী মরুপ শ্রী রামেশ্বর তেলিজী, অসাম সরকারগী মন্ত্রী দা. হেমন্তা বিস্বাসরমাজী, ইনাও ইবুঙো অতুল বোরা জী, শ্রী কেশব মহান্তজী, শ্রী সঞ্জে কিশানজী, মিস্তর জোগন মোহনজূ, হাউস-ফেদকী চীয়রমেন, মিস্তর রঞ্জিৎ কুমার দাস, অতোপ্পা এম.পি.শিং, এম.এল.এ.শিং অমসুং অসামগী ঐগী নুংশিরবা ইচিল-ইনাওশিং!
ঐহাক্না অসামগী ইচিল-ইনাওশিংদা ইংলিশকী চহি হৌবা অমদি ভোগলি বিহুগী য়াইফ পাউজেল পীজরি! লাক্কদৌরিবা নুমিৎশিং অসি মীপুম খুদিংমক্কী ওইনা হরাও-তয়াম্বা অমসুং য়াইফবা ওইরসনু!
মরুপশিং,
অসামগী মীয়ামগী থৌজাল অমসুং ঐবু মশক খঙবিবা অসিদা ঐনা নুংঙাইবা পোকই। নখোয়গী মীনুংশিবা অমসুং অচেৎপা মরী অসিনা ঐবু অসামদা হন্না-হন্না চিংশিল্লি। হৌখিবা চহিশিংদা ঐহাক্না অসামগী তোঙান তোঙানবা শরুকশিং চৎপগী থৌদোক কয়া লৈখ্রে অমসুং ঐগী ইচিল-ইনাওশিংগা ৱারী শাখি অমদি চাউখৎ থৌরাংগী থবক্তা মখোয়গা পুন্না য়েংশিন্নবা খুদোংচাবশিং ফংজখি।
হৌখিবা চহিদা ঐহাক্না কোকরাজারদা ইতিহাসিক ওইরবা বোদো একোর্দ মতুংদা নুংঙাইবা ফোঙদোকপা অদু শরুক য়াখি। হৌজিক্না ঐহাক্না অসামগী য়েলহৌমীগী ইকাই খুম্নবা অমসুং ঙাকশেলগা মরী লৈনবা অচৌবা থৌরম অসিদা শরুক য়ারি। ঐহাক্না নখোয়গী নুংঙাইবদা শরুক য়ান্নবা মসিদা লাকখিবনি। ঙসি ঐখোয়গী অসাম সরকারনা নখোয়গী পুন্সিদগী অচৌবা সমস্যা অমা কোকহন্নবা শিংথানিংঙাই ওইবা থবক অমা পাঙথোকখ্রে। য়েলহৌমীগী ইমুং লাখ ১ হেনবনা লমগী মপু ওইবগী হক ফংবা অসিনা নখোয়গী পুন্সিদগী য়াম্না অচৌবা সমস্যা অমা কোকহনবা ঙমখ্রে।
ইচিল-ইনাওশিং,
ঙসিগী নুমিৎ অসিদা ইশাগী ইকাইখুম্নবা, নীংখা-তম্বা অমসুং ঙাকশেলগী খুদম অহুমনা অমত্তা ওইবা মওংদা পুনশিল্লি।
অহানবদা অসামগী অশেংবা মপারী ওইরিবা য়েলহৌমীশিংনা মখোয় মশাগী লম ঙাক শেঞ্জনবা আইনগী ওইবা ঙাকশেল ফংলে। অনিশুবদা জরেঙ্গা প্লেতুগী লম ওইরিবা পুৱারীগা শাগোন্নরিবা সিবসাগরনা মাই পাকপা অসি উবা ফংখ্রে। লম অসিনা অসামগী তুংলমচৎকীদমক্তা মহাসতি জয়মতিনা তৌরম্বা অচৌবা কত্থোকপগী খুদম ওইরি। ঐহাক্না মহাক্কী লম্বা লৈত্রবা মথৌনা অদু ইকোক নোননা খুরুমজরি অমসুং লম অসিদা ইকাই খুম্নবা উৎচরি। সিবসাগরগী মরু ওইবা অসি য়েংলগা সরকারনা লৈবাক অসিগী আর্কিওলোজিকেল সাইৎ ৫গী মনুংদা সিবসাগর য়াওহন্নবা খোঙথাংশিং লৌখৎলি।
ইচিল-ইনাওশিং,
ঙসি লৈবাক অসিদা ঐখোয়গী নুংশিজরবা অমসুং ইকাই খুম্নরবা নেতাজী সুভাস চন্দ্র বোসকী ১২৫শুবা মপোক কুমওন পাঙথোক্লি। লৈবাক অসিনা নুমিৎ অসি পরাক্রম দিৱা – অথৌবাগী নুমিৎ হায়না পাঙথোক্নবা হৌজিক্তি ৱারেপ লৌখ্রে। নেতাজীআ ভারত ইমাগী ইকাই খুম্নবা অমসুং নীংখা তম্বা ফংনবা হোৎরম্বা অদু নীংশিংদুনা ঐখোয়বু ইথিল পীরি। পরাক্রম দিৱসকী থৌরম অসিদা ঙসি লৈবাক শিনবা থুংনা প্রোগ্রাম কয়া লাউথোকখ্রে। অমরোমদা ঙসি অসি প্রজা মীয়ামগী অনীংবশিং থুংহনবগা লোইননা ঐখোয়গী লৈবাক্কী ৱাশকশিং থুংহন্নবা ইথিল লৌনবা অমসুং হোৎননবা খুদোংচাবা অমনি।
মরুপশিং,
ঐখোয়গী পৃথিবী, ঐখোয়গী লম অসি নাপী, লৈবাক, নুং খক্তা ওইনা উদবা চৎনবী অমগী ঐখোয় পুম্নমক ফীরাল পাইরিবা ঙাক্তনি। পৃথিবী অসি ঐখোয়গী ইমা ওইনা ইকাই খুম্নৈ। অসামগী মশক নাইরবা মপারী ভারত রতনা ভুপেন হজারিকানা হায় -
“ও মুর ধরিত্রি আই,
চোরোনোতে দিবা থাই,
খেতিয়োকোর নিস্তার নাই,
মতী বিনে ওহোহাই ।”
মসিগী অর্থদি মালেম ইমা, অদোমগী খুয়াদা ঐহাক্কী মফম অমত্তা পীবিয়ু। লৌমী অমনা নহাক য়াওদ্রবদি করি তৌগনি? লম য়াওদ্রবদি মহাক্তি পাঙ্গল থোক্লরোই।
মরুপশিং,
নীংখা তমখিবা চহি কয়া শুরবসু অসামগী ইমুং কয়ানা লম লৈতনা হিংলমখি খঙবদা তশেংনা নুংঙাইতবা পোকই, মরম খরদগী অসামগী ইমুং লাখ কয়ানা মখোয়গী লমগী আইনগী ওইবা হকশিং ফংদনা লৈরমখি। মসিনা মরম ওইরগা অকক্ননা ত্রাইবেলগী মফমশিংগী য়াম্লবা মীয়াম্না লম লৈরমদে অমসুং মখোয়গী পুন্সিদা অৱাবা কয়া মায়োক্নখি। ঐখোয়না শক্তি পাইবা মতমদা অসামদা ত্রাইবেল লাখ ৬ হেনবনা মখোয়গী লম ক্লেম তৌনবা চে অমত্তা পাইরমদে। হান্নগী সরকারনা মসি করিগুম্বা মত্তা তৌবিরমদে। অদুম ওইনমক হৌজিক পাল্লিবা সরকার অসিদা সর্বানন্দ সোনোৱালজীগী লুচিং মখাদা পুকচেল শেংনা নখোয়গী অৱাবা কোকহন্নবা হোৎনখি। ঙসিদি মখোয়গী লমগা মরী লৈনবা হকশিং ফংহনগা লোইননা অসামগী অশেংবা য়েলহৌমীশিংগী লোল অমদি নাৎ য়োকখৎনবা অখন্নবা মীৎয়েং চংখ্রে। ২০১৯দা চৎনহনখিবা অনৌবা লেন্দ পোলিসী অসিনা সরকারনা ৱাশকখিবা অদু থুংহন্নবা হোৎনরি হায়বা উৎখ্রে। মসিনা মরম ওইরগা হৌখিবা চহিশিং অসিদা য়েলহৌমীগী ইমুং লাখ ২.২৫তা লেন্দ লীজ খুৎশিন্নখ্রে। হৌজিক্তি মসিগী ইমুং লাখ ১ হেন্না কান্নবা ফংহনখ্রে। মসিগী পান্দমদি অসামদা অসিগুম্বা ইমুং খুদিংমক্তা মখোয়গী লমগী হকশিং অথুবদা ফংহনবনি।
ইচিল ইনাওশিং,
লমগী লীজনা মরম ওইরগা অসামগী অশেংবা য়েলহৌমীশিংনা মতম শাংনা দাবী তৌরকপা অদু থুংহনবা ঙমখ্রে অদুবু মসিনা মীওই মিলিয়ন কয়াগী হিংবগী পুন্সি মহিং ফগৎহন্নবা লম্বীসু ফাৎখ্রে। হৌজিক্তি মখোয়দা কেন্দ্র অমসুং রাজ্য সরকারগী অতোপ্পা স্কীম কয়াগী কান্নবা হান্না ফংদবা অদু ফংলগনি।
হৌজিক্তি ইচিল-ইনাওশিং অসিনা পি.এম. সম্মান নিধিগী মখাদা লুপা লিশিং কয়া ফংলিবা অসামগী লৌমীগী ইমুং লাখ কয়াশিং অদুগী মরক্তা য়াওরগনি। হৌজিক্তি মখোয়না লৌমীশিংগী ওইবা কিসান ক্রেদিৎ কার্দ, ক্রোপ ইন্সুরেন্স পোলিসী অসিগুম্বা অতোপ্পা স্কীম কয়াগী কান্নবসু পীবা ঙম্লগনি। মসিদা নত্তনা মখোয়না লম অসিগী খুত্থাংদা মখোয়গী ললোন-ইতিক তৌনবা বেঙ্কশিংদগী লোনশিংসু লৌবা য়ারগনি।
ইচিল ইনাওশিং,
অসামগী অপীকপা অমসুং অচৌবা ত্রাইব ৭০রোমদা ঙাকশেল পীবা অমসুং মখোয়বু খোঙজেল য়াংনা চাউখৎহনবা হায়বা অসি ঐখোয়গী সরকারগী ৱাশক্নি। অতলজীনা সরকার পাইবা মতমদা নত্ত্রগা এন.দি.এ.না কেন্দ্র অমসুং রাজ্যদা সরকার পাইবা মতমদা অসামগী নাৎ, ইকাই খুম্নবা অমসুং ঙাকশেল অসি ঐখোয়না মরু ওইনা লৌখি। অসামগী লোল অমসুং সহিত্যা য়োকখৎনবা খোঙথাং কয়া লৌখৎখ্রে। মসিগা মান্না অসামগী কাংলুপ খুদিংমক্কী মশক নাইবা মীওইশিংবু হৌখিবা চহি খরা অসিদা ফংফম থোকপা ইকাই খুম্নবা ফংহনখ্রে। স্রিমন্তা শঙ্করদেবজীগী ৱাখল্লোন অসি লৈবাক পুনবগী, অপুনবা মীওইবা খুন্নাইগী লোইননা অসামগী ওইনা য়াম্না অতাংবা লন অমনি। অসিগুম্বা পুৱারীগী ওইবা লন অসি য়োকখৎপা অমসুং থৌগৎপা অসি সরকার খুদিংমক্কী থৌদাংনি। অদুবু বতাদ্রবাস্তরা অমসুং স্ক্রিপচর কয়া অসিগুম্না তৌখিবা অসি অসাম মীয়ামদগী লোৎপা য়ারোই। হৌখিবা চহি মরি মখাই অসিদা অসাম সরকারনা ধর্মগী অমসুং লাইনিংগী মফমশিং ওইহন্নবা অমসুং অসিগুম্বা অতাংবা পুৱারীগী আর্তিফেক্তশিং অসি কোকখৎনবা খোঙথাং কয়া লৌখৎখ্রে। মসিগা চপ মান্না কাজিরঙ্গা নেস্নেল পার্কতা লম খোপচিনবা থিংনবা অমসুং মসি চাউখৎহন্নবা খোঙথাং কয়া লৌখৎখ্রে।
ইচিল ইনাওশিং,
মরোমদোম লেপচবা ভারত অমা ওইহন্নবা অৱাং নোংপোক অমসুং অসামগী চাউখৎ থৌরাং খোঙজেল য়াংনা পাইখৎপা মথৌ তাই। অসামগী মরোমদোম লেপচনবা লম্বী অসি অসাম মীয়ামগী থাজবগী খুত্থাংদা চৎকনি। থাজবা হায়বা অসি তঙাই ফদবা ফেচিলিতীশিং অমসুং অফবা ইনফ্রাস্ত্রকচর লৈরবা খক্তদা হেনগৎলক্কনি। হৌখিবা চহিশিং অসিদা লমশিং অসিদা অসামদা অমুক্তা ওইখিদ্রিবা মওংশিংদা থবক পাইখৎখ্রে। অসামদা জন ধন বেঙ্ক একাউন্তশিং অসি লাইরবা করোর ১.৭৫কী হাংখ্রে। একাউন্তিশিং অসিনা মরম ওইরগা কোরোনাগী মতমদা ইমুং লিশিং কয়াগী বেঙ্ক একাউন্তশিংদা হকথেংননা ত্রান্সফর তৌখ্রে। অয়ুশমান ভারত স্কীমনা অসামগী মীশিংগী চাদা ৪০গী ময়াদা কোনশিনবা ঙমখ্রে। মসিগী মনুংদা লাখ ১.৫না লেম্না লায়েংবগী খুদোংচাবা ফংখ্রে। হৌখিবা চহি ৬ অসিদা অসামদা তোইলেৎ কভরেজ চাদা ৩৮তগী চাদা ১০০ হেনগৎহনখ্রে। চহি মঙাগী মমাংদা য়ুমথোং চাদা ৫০দগী তাবা খক্তনা মৈ ফংলমখি হায়রিবা অসি হৌজিক্তি য়ুমথোং চাদা ১০০দা য়ৌবা ঙমখ্রে। হৌখিবা চহি ১.৫ অসিদা অসামদা জল জীবন মিসনগী মখাদা য়ুম লাখ ২.৫ হেনবদা তোতি ঈশিংগী কন্নেক্সন ফংহনখ্রে। কেন্দ্র অমসুং রাজ্য সরকারগী ইঞ্জিন অনিনা অসামগী য়ুমথোং খুদিংদা চহি ৩-৪ অসিদা তোতি ঈশিং ফংহন্নবা লেপ্তনা হোৎনরি।
ইচিল ইনাওশিং
মসিগী খুদোংচাবশিং অসিগী কান্নবশিং অসি ঐখোয়গী ইচে-ইচলশিং অমসুং ইচানুপীশিংনা ফংলি। মখোয়না উজজ্বালা স্কিমদগীসু কান্নবশিং ফংলি। ঙসিগী অসামগী লাইরবা ইচে-ইচল লাখ ৩৫গী ইমুং মনুংদা উজজ্বালা গ্যাস কন্নেক্সন লৈরে। মসিগী মনুংদা এস.সি./এস.তি. লাখ ৪ ওইরি। ২০১৪দা ঐখোয়গী সরকার শেম্বা মতমদা এল.পি.জি. গ্যাস কভরেজ অসি চাদা ৪০ ওইরম্মি। হৌজিক্তি অসামদা উজজ্বালা এল.পি.জি. কভরেজ অসি চাদা ৯৯ ওইরে। সরকার অসিনা অসামগী মনুং হঞ্জিনবা মফমশিংদা গ্যাস ফংহনবদা অৱাবা লৈতনবা দিস্ত্রিব্যুতরশিংগীমশিং অঙকপা ফংনা হেনগৎহল্লে। এল.পি.জি. দিস্ত্রিব্যুতরগী মশিং অসি ২০১৪দা অসামদা ৩৩০ ওইরম্মি অদুবু হৌজিক্তি মখোয়গী মশিং অসি ৫৭৬তা হেনগৎখ্রে। কোরোনাগী মতমদা উজজ্বালানা মীয়ামদা করম্না মতেং পাংখিবগে হায়বা ঐখোয়না উরে। মতম অসিদা অসামগী উজজ্বালা বেনিফিসরিশিংদা ফ্রী সিলিন্দর লাখ ৫০ হেন্না য়েন্থোকখ্রে। উজজ্বালানা মফম অমগী নুপীশিংগী পুন্সি মহিংদা অহোংবা কয়া পুরক্লে অমসুং অনৌবা দিস্ত্রিব্যুসন সেন্তরশিং হাংদোকখ্রে। মসিনা নহা কয়াদা অনৌবা থবকশিং ফংহল্লে।
মরুপশিং
ঐখোয়গী সরকারগী পুন্না চৎমিন্নবগী মন্ত্রা সবকা সাথ, সবকা ভিকাস, সবকা, ভিস্বাসকী অসিনা অসামগী সেক্সন খুদিংমক্তা লেপ্পা লৈতনা চাওখৎপগী কান্নবশিং ফংলি। চাই ত্রাইবশিং কম্ম্যুনিতীগী অৱাবা অসি মমাংগী পোলিসীদা খন্নরমদে। হৌজিক্তি চাই ত্রাইব অসিগী ইমুংশিংদা তঙাইফদবা য়ুম অমসুং অমাঙশঙশিং শাবীরে। মসিগী ইমুং কয়ামরুমদা মখোয়গী লমগী আইনগী ওইবা হক পীরগনি। সরকার অসিনা মখোয়গী অঙাংশিংদা মহৈ তম্বা ফংহন্নবা অমসুং হকশেলগী খুদোংচাবশিং শিল লাংনবগা লোইননা ইম্প্লোইমেন্ত ফংহন্নবা কন্না হোৎনরি। অহানবা ওইনা মখোয়দা বেঙ্কিং ফেসিলিতীশিং ফংহল্লে। হৌজিক্তি মসিগী ইমুং মনুংশিং অসিনা মখোয়গী একাউন্তশিংদা স্কিম কয়ামরুমগী কান্নবশিং হকথেংননা ফংবা ঙম্লে। শিন্মী লুচিংবা সন্তোশ তোপনো য়াওনা অতোপ্পা চাই ত্রাইবকী মমিং লৈরবা লুচিংবশিংগী মীতম খিন্দুনা চাই ত্রাইবকী কন্ত্রিব্যুসন অদু সরকারনা মশক খংলে।
মরুপশিং
অসামগী মফম খুদিংমক্তা ত্রাইব খুদিংমক পুনশিনবনা মরম ওইদুনা অসাম অসি শান্তি লৈবা অমসুং খুমাং চাওশিনবা মাইকৈদা চংশিল্লি। পুৱারী ওইরবা বোরো এগ্রিমেন্তনা অসামগী চাওরবা মফম অমা হৌজিক্তি শান্তী অমসুং চাওখৎপা মাইকৈদা চংশিল্লে। এগ্রিমেন্ত অসিগী হেক মতুংদা বোরোলেন্দ তেরিতোরিএল কাউন্সিলগী রিপ্রজেন্তেতিবশিংগী মীখল পাংথোকখ্রে। হৌজিক্তি বোরো তেরিতোরিএল কাউন্সিলনা চাওখৎপগী অনৌবা পেরাদাইম অমা পুরক্লগনি হায়না ঐহাক্না আশা তৌরি।
ইচিল ইনাওশিং
ঙসিদি ঐখোয়গী সরকারনা অসামগী মথৌ তাবশিংগী মতুং ইন্না মরুওইবা প্রোজেক্ত খুদিংমক্তা লেপ্পা লৈতনা থবক পাইখৎলি। হৌখিবা চহি তরুক্কী মনুংদা অসাম য়াওনা অৱাং নোংপোক লমদম খুদিংমক শম্ননবা থবক পাইখৎখ্রে অমসুং অতোপ্পা ইনফ্রাস্ত্রকচর খুদিংমকসু চাওথোকখ্রে অমসুং মোদর্নাইজ তৌখ্রে। ঙসিদি অসাম অমসুং অৱাং নোংপোক লমদমগী এক্ত পোলিসীনা এসিয়াগী নোংপোকথংবা লৈবাকশিংগা ভারতকা শম্নহন্নবা হেনগৎলক্লি। অসাম অসি ইফ্রাস্ত্রকচর ফগৎলকপনা মরম ওইদুনা আত্মানির্ভর ভারতকী মরুওইবা সেন্তর অমা ওইরক্লি। হৌখিবা চহিশিংদা অসামগী খুঙ্গংশিংগী কিলোমিতর লিশিং ১১ শাংবা লম্বীশিং শেমখ্রে। দা. ভুপেন হজারিকা সেতু, বোগিবীল থোং, সরাইঘাত থোং অমসুং শাবা লোইখ্রবা নত্রগা শারিবা থোংশিংনবু ওইরো অসামগা অতোপ্পা ভারতকী রাজ্যশিং অমসুং য়ুমথংনবা লৈবাকশিংগা মরক্তা কন্নেক্তিবিতী ফগৎহল্লি। মসিগী মথক্তা বাঙ্গলাদেশ, নেপাল, ভুতান অমসুং ম্যান্মারগা শাম্নগদবা ঈশিংগী লম্বীশিংসু মীৎয়েং চংলি।
মরুপশিং
অসামগী রেল অমসুং এয়র কন্নেক্তিবিতী হেনগৎহনবনা লোজিস্তিজক্কা মরী লৈনবা খুদোংচাবশিং হেনগৎহন্দুনা অসামদা ইন্দস্ত্রীগী অমসুং থবক্কী খুদোংচাবশিং হেনগৎহল্লি।
লোকপ্রিয় গোপিনাথ বোর্দোলোই ইন্তরনেস্নেল এয়র্পোর্তকী অনৌবা তর্মিনেল অমসুং কস্তম ক্লিয়রেন্স মোর্দনাইজ তৌবা, কোক্রাঝারদা লৈবা রুপসি এয়র্পোর্ত মোদর্নাইজ তৌবা, বোঙ্গাইগাউনদা লৈবা মল্তী মোদেল লোজিস্তিক্সনা অসামগী ইন্দস্ত্রী ফগৎহনবদা অনৌবা শাফু অমা পীরগনি।
ইচিল-ইনাওশিং
ঙসি ঐখোয়গী লৈবাক অসিনা গ্যাস-বেজ ইকনোমীগী মাইকৈদা খোংজেল য়াংনা চংশিনবদা অসাম অসি কেম্পেন অসিগী মরুওইবা শরুক অমনি। অসামদা ওইল অমসুং গ্যাস ইনফ্রাস্ত্রকচরদা লুপা করোর লিশিং ৪০দগী হেন্না চাদিং তৌরি। গুৱাহাতী বারাওনি পাইপ লাইন অসিনা অৱাং নোংপোক লমদম অমসুং নোংপোক থংবা ভারত শম্নহনবদা মাপঙ্গল কনখৎহনবগা লোইননা অসামদা থবক্কী খুদোংচাবা কয়ামরুম ফংহল্লগনি। নুমালিগর রিফাইনরী অসি বাইও-রিফাইনরী ফেসিলিতীগা লোইননা হৌদোকখ্রে অমসুং মসিনা অসাম অসি ইথানোলগুম্বা বাইও-রিফাইনরী মরাং কাইনা পুথোকপা লমদম অমা ওইহল্লগনি।
ইচিল ইনাওশিং
অসাম অসি হৌজিক হকশেল অমসুং এজুকেসনগী হব অমা ওইনা দিবেলপ তৌরক্লি। এম্স অমসুং ইন্দিয়ন এগ্রিকলচরেল রিসর্চ ইন্সতিত্যুত লিংখৎখিবা অসিনা অসামগী নহাশিংদা মোর্দর্ন এজুকেসনগী অনৌবা খুদোংচাবশিং ফংহল্লগনি। কোরোনা লাইচৎ অসি অসামনা মাইয়োক্নখিবা মওং অসিসু থাগৎনিংঙাইনি। ঐহাক্না অখন্ননা অসামগী মীয়ামগা লোইননা সোনোৱালজী, হেমন্তজী অমসুং মহাক্কী তীমবু থাগৎপা ফোঙদোক্লি। অসামনা হৌজিক ভেক্সিনেসন কেম্পেন অসি মাই পাক্না চংশিনগনি হায়না ঐহাক্না থাজবা থম্মি। ঐহাক্না অসামগী মীয়ামনা কোরোনাদগী ঙাকথোক্নবা ভেক্সিন কাপ্নবা আপীল তৌরি। ভেক্সিন অসি দোজ অনি কাপ্পা মরুওই দোজ অমখক কাপ্পনা কান্নবা ফংলোই হায়বসি নিংশিংবিয়ু।
মরুপশিং,
ভারতনা শাবা ভেক্সিনশিং অসি মালেম পুম্বনা দিমান্দ তৌরি। হৌজিক ফাওবদা ভারত্তা মীওই করোর কয়া ভেক্সিন কাপখ্রে। ঐখোয়না ভেক্সিন কাপকদবনি অমসুং চেকশিন থৌরাং লৌখৎকদবনি। অরোইবদা লমশিংগী আইনগী ওইবা হকশিং ফংলবা মীওই খুদিংমকপু ঐহাক্না থাগৎপা ফোঙদোকচরি। নখোয় পুম্নমক হকচাং ফনা অমসুং নুংঙাই য়াইফনা লৈবা ওইরসুনু হায়না থৌনিজরি। মসিগী য়াইফ পাওজেল অসিগা লোইননা ময়াম পুম্নমকপু থাগৎপা ফোঙদোকচরি! ঐহাক্কী খোলাও অসি হায়বিয়ু! ভারত ইমানা য়াইফরে! ভারত ইমানা য়াইফরে! ভারত ইমানা য়াইফরে! পুম্নমকপু থাগৎপা ফোঙদোকচরি।
