ইকাই খুম্নরবা দিগনিতরীশিং…!
ময়াম পুম্নমক, ইরৈবাকচা পুম্নমক অমসুং মরু ওইনা মালেম অসিদা লৈরিবা খৃস্তিয়ন কাংলুপতা খৃস্তমাসকী য়াইফ পাউজেল পীজরি ‘মেরী খৃস্তমাস’ !!!
নুমিৎ হুমনি মরিনিগী মমাংদা, ঐহাক ভারত সরকারগী ঐহাক্কী মরুপ, মন্ত্রী জোর্জ কুরিয়ানজীগী ময়ুমদা খৃস্তমাস কুহ্মৈ য়াওবা চৎখি। হৌজিক, ঐহাক্না ঙসি নখোয়গী নরক্তা য়াওজবা অসিদা নুংঙাইবা ফাওই। কেথোলিক বিশোপ্স কনফরেন্স ওফ ইন্দিয়া - CBCIগী থৌরম অসি, খৃস্তমাসকী নুংঙাইরবা থৌরম অসিদা ময়াম পুম্নমক্কা শরুক য়াবগী খুদোংচাবা ফংবা অসি, নুমিৎ অসি ঐখোয় পুম্নমক্কী ওইনা নীংশিংদুনা লৈহৌরগদবা নুমিৎ অমা ওইরগনি। চহি অসিদা CBCIনা চহি 80শুবা মপোক কুমওন পাংথোক্লিবা অসিনা মসিগী থৌরম অসিসু অখন্নবা ওইহল্লি। মসিগী তাঞ্জা অসিদা, ঐহাক্না CBCI অমসুং মসিগা মরী লৈনবা মীওই পুম্নমকপু থম্মোয় শেংনা নুংঙাইবা ফোংদোকচরি।
মরুপশিং,
মমাংদা ঐহাক্না প্রধান মন্ত্রীগী য়ুমদা অদোম পুম্নমক্কা লোয়ননা খৃস্তমাস পাংথোকপগী খুদোংচাবা ফংখি। ঙসি ঐখোয় পুম্নমক CBCIগী য়ুমথোংদা পুল্লি। ঐহাক মমাংদা ইস্তরগী মতমদা সেক্রেদ হার্ত কেথদ্রেল চর্চতা লাকখি। অদোম পুম্নমকপু ঐহাক্না য়াম্না নকশিন্নবা ফংজবা অসি ঐহাক্কী নুংঙাইবা অমনি। ঐহাকপু পোপ ফ্রান্সিসকী মফমদগীসু চপ মান্নবা মীনুংশি অদু ফংজখি। চহি অসিদা, ইতালিদা পাংথোকপা G7 মীফম মনুংদা ঐহাক্না পোপ ফ্রান্সিসপু উনবগী খুদোংচাবা ফংখি। মসি হৌখিবা চহি 3 অসিদা ঐখোয়গী অনিশুবা মীফমনি। ঐহাক্না মহাকপু ভারত্তা লাক্নবা কৌখ্রে। মসিগা মান্ননা, সেপ্তেম্বর থাদা মহাক্না ন্যু য়োর্কতা চৎপা মতমদা ঐহাক্না কার্দিনেল পেত্রো পেরোলিনগা উনখি। ঐখোয়না অসিগুম্বা স্পিরিচুএল মীফমশিং, স্পিরিচুএলগী ওইবা ৱা ৱাতাইশিং অসিদগী ঐখোয়না ফংলিবা পাঙ্গল অসিনা ঐখোয়গী সেবা তৌবগী ৱারেপ অদু হেন্না চেৎশিলহল্লি।
মরুপশিং,
ঐহাক্না হন্দক্তা হিস ইমিনেন্স কার্দিনেল জোর্জ কৌবাকাদগা উন্নদুনা মহাকপু ইকায় খুম্নবা উৎপগী খুদোংচাবা ফংখি। চয়োল খরগী মমাংদা, হিজ ইমেনেন্স কার্দিনেল জোর্জ কৌবাকাদপু পোপ ফ্রান্সিসনা কার্দিনেলগী মিংথোল পীখি। থৌরম অসিদা ভারত সরকারনা কেন্দ্রগী মন্ত্রী জোর্জ কুরিয়াননা লুচিংবা অৱাংবা থাক্কী মীহুৎ কাংবু অমা ওফিসেল ওইনা থাখি। ভারতকী মচা অমনা মায় পাকপগী অসিগুম্বা অৱাংবা থাক্তা য়ৌরকপা মতমদা, লৈবাক পুম্বনা চাউথোকচবা ফাওবা অসি মহৌশানি। ঐহাক্না অমুক্কা হন্না কার্দিনেল জোর্জ কৌবাকাদপু থাগৎপা ফোংদোকচরি অমসুং য়াইফ-পাউজেল পীজরি।
মরুপশিং,
ঙসি, ঐহাক অদোমগী মরক্তা লৈরিঙৈদা, ঐহাক্না কয়া অমা নীংশিংলি। চহি তরাগী মমাংদা ঐখোয়না ফাদর এলেক্সিস প্রেম কুমারবু লাননা শোকহল্লবা অফগানিস্তানদগী তেক্তা কাইদনা পুরকপা মতমদা ঐহাক্কী মফমদা য়াম্না নুংঙাইবা ফাওখি। মহাক্না মফম অদুদা থা 8গী ওইনা য়াম্না অৱাবা কয়া মায়োক্নদুনা, হোস্তেজ ওইনা থমখি। ঐখোয়গী সরকারনা মহাকপু মফম অদুদগী লৌথোক্নবা হোৎনখি। অফগানিস্তানগী ওইরিবা ফীভমশিং অদুদা মসিনা কয়া য়াম্না অরুবা ওইরম্বা য়াবগে হায়বসি অদোম্না খনবীয়ু। অদুবু, ঐখোয়না মাই পাকখি। মতম অদুদা ঐহাক্না মহাক অমসুং মহাক্কী ইমুংগী মীওইশিংগা ৱারী শানখি। ঐহাক্না মখোয়গী ৱারী শাখিবা, মখোয়গী নুংঙাইবা অদু কৈদৌঙৈদা কাওবা ঙম্লরোই। মসিগা মান্ননা, ঐখোয়গী ফাদর তোমসু য়েমেনদা হোস্তেজ ওইনা থমখি। ঐখোয়গী সরকারনা মফম অদুদসু হোৎনখি, অমসুং ঐখোয়না মহাকপু য়ুমদা পুরকখি। ঐহাক্না মহাকপু ঐহাক্কী য়ুমদা লাক্নবা কৌজখি। গল্ফকী লৈবাকশিংদা ঐখোয়গী নর্স সিস্তরশিংনা অৱাবা কয়া মায়োক্নরকপা মতমদা, মতম অদুদসু লৈবাক শীনবা থুংনা মখোয়গীদমক ৱানখি। মখোয়বু য়ুমদা হলহন্নবা ঐখোয়না হোৎনখিবা অদুসু মহৈ ফংখি। ঐখোয়গীদমক্তদি, মসিগী হোৎনরিবশিং অসি দিপ্লোমেতিক মিসনশিং খক্তমক নত্তে। মসি ঐখোয়গী ইমোস্নেল ওইবা থৌদাং অমনি, মসি ইমুংগী মীওই অমা কন্নবগী মিসন অমনি। ঙসিগী ভারতনা ভারতকী অঙাংশিংবু মালেমগী মফম খুদিংমক্তা, মখোয়না থেংনরিবা খুদোংচাদবশিং অদুদগী কনবা হায়বসি মহাক্কী থৌদাংনি হায়না লৌই।
মরুপশিং,
ভারতনা মহাক্কী ফোরেন পোলিসীদা নেস্নেল ইন্তরেস্তকা লোয়ননা হ্যুমেন ইন্তরেস্ততা অহানবা মীৎয়েং থম্লি। কোরোনাগী মতম অসিদা মালেম পুম্বনা মসি উখি অমসুং ফাওখি। কোরোনাগুম্বা অচৌবা লায়চৎ অমা লাকপা মতমদা, মীওইবগী হকশিং অমসুং মীওইবা খুন্নাইগী মরমদা ৱা ঙাংলিবা মালেমগী লৈবাক কয়ানা, হায়রিবা ৱাফমশিং অসি দিপ্লোমেতিক্কী খুৎলাই ওইনা শীজিন্নরিবা লৈবাক কয়ানা, মথৌ তারকপা মতমদা লায়রবা অমসুং অপীকপা লৈবাকশিংদা মতেং পাংবদগী তুং হনখি। মতম অদুদা মখোয়না মখোয়গী মশাগী কান্নবখক্তদা পুক্নিং চঙখি। অদুবু, ভারতনা চেরিতীগী ৱাখল্লোনগা লোয়ননা, মাগী কেপাসিতীদগী হেন্দোক্তুনা লৈবাক কয়াদা মতেং পাংখি। ঐখোয়না মালেমগী লৈবাক 150 হেনবদা হিদাক-লাংথকশিং য়ৌহনখি, লৈবাক কয়াদা ভেক্সিনশিং থাখি। মসিনা মালেম পুম্বদা য়াম্না অফবা শাফু অমা পীখি। হন্দক্তা, ঐহাক গুয়ানাদা চৎখি, ঙরাং ঐহাক কুৱেত্তা লৈরম্মি। মফম অদুদা লৈরিবা মীওই অয়াম্বনা ভারতপু থাগৎপা ফোংদোকখি। ভারতনা মখোয়দা ভেক্সিনশিং পীরদুনা মতেং পাংখি অমসুং মসিগীদমক মখোয়না থাগৎপা ফোংদোকখি। গুয়ানা খক্তনা ভারতকীদমক্তা অসিগুম্বা ৱাখল্লোন অসি খনবা নত্তে। ইথৎ লৈবাক কয়া, পেসিফিক্কী লৈবাকশিং, কেরিবিয়নগী লৈবাকশিংনা ভারতপু থাগৎলি। ভারতকী ৱাখল্লোন অসিনা, মীওইবা খুন্নাইগীদমক ঐখোয়গী কত্থোকপা অসিনা, মীওইবগী মরীদা য়ুম্ফম ওইবা থৌওং অসিনা 21শুবা চহিচাগী মালেম অসিবু অনৌবা থাক্তা পুখৎকনি।
মরুপশিং,
লোর্দ খৃস্তকী পাউতাকশিংনা নুংশিবা, শান্তি অমসুং ইচিল ইনাওশিংগী মরীবু থাগৎলি। ঐখোয়না পুম্নমক্না মসিগী মঙলান অসিবু হেন্না মপাঙ্গল কনখৎহন্নবা হোৎনবা অসি য়াম্না মরু ওই। অদুবু, হিংসা শন্দোক্নবা অমসুং খুন্নাইদা অৱা-অনা থোকহন্নবা হোৎনবা কয়া লৈরকপা মতমদা ঐহাক্কী পুক্নিংদা নুংঙাইতবা ফাওই। নুমিৎ খরনিগী মমাংদা, ঐখোয়না জর্মনীগী খৃস্তমাস মার্কেত্তা থোকখিবা অদু উখি। 2019দা ইস্তর পাংথোকপা মতমদা, শ্রী লঙ্কাগী চর্চশিংদা এতেক তৌখি। বোম পোখাইবা অদুদা লৈখিদ্রবশিংগী মফমদা ইকায় খুম্নবা উৎনবা ঐ কোলম্বোদা চৎখি। অসিগুম্বা শীংনবশিং অসি থেংননবা পুন্না হোৎনমিন্নবা অসি য়াম্না মরু ওই।
মরুপশিং,
ময়াম পুম্নমক্না খঙনরবা, অখন্নবা মরুওইবা থম্লিবা জুবিলী চহি অসি হৌরকপগা লোয়ননা খৃস্তমাস অসি হেন্না অখন্নবা ওইরে। ঐহাক্না ময়াম পুম্নমকপু জুবিলী চহিগী তোঙান-তোঙানবা ইনিসিয়েতিবশিংগীদমক য়াইফ-পাউজেল পীজরি। মসিগী মতম অসিদা, জুবিলী চহিগীদমক্তা, অদোম্না থিম অমা খনখ্রে মদু আশাদা থম্মি। হোলী বাইবলনা থাজববু শক্তি অমসুং শান্তিগী হৌরকফম অমা ওইনা উরি। মসিদা অসুম্না হায়রি: "অদোমগী তুংলমচৎকীদমক থাজবা লৈ, অমসুং অদোমগী থাজবা অদু মাংহল্লোই।" ঐখোয়বু আশা অমসুং পোজিতিবিতীনা লমজিংলি। মীওইবা খুন্নাইগীদমক আশা, হেন্না ফবা মালেম অমগীদমক আশা অমসুং শান্তি, খুমাং চাউশিনবা অমসুং চাউখৎপগীদমক আশা তৌগনি।
মরুপশিং,
হৌখিবা চহি 10 অসিদা, ঐখোয়গী লৈবাক অসিদা মীওই করোর 25না লাইরবদগী থোরকপা ঙমখ্রে। মসিনা মরম ওইদুনা লাইরবশিংগী মরক্তা আশা অমা থোরকখি মদুদি, লায়রবগী মায়োক্তা চত্থবা লান অসি মায় পাকপা ঙমগনি। হৌখিবা চহি 10দা ভারত অসি খ্বাইদগী চাউবা ইকনোমী 10দগী খ্বাইদগী চাউবা ইকনোমী 5 ওইরকখি। মসি ঐখোয়না ঐখোয়দা থাজবা থমখিবদগী ওইখি, ঐখোয়না আশা মাংহন্দনা পান্দম অসি ফংবা ঙমখি। ভারতকী চহি 10গী চাউখৎ-থৌরাংগী খোঙচৎ অসিনা লাক্কদৌরিবা চহিশিং অমসুং ঐখোয়গী তুংলমচৎকীদমক অনৌবা আশা কয়া অমা পীরক্লি। চহি 10গী মনুংদা, ঐখোয়গী নহারোলশিংনা অসিগুম্বা খুদোংচাবা কয়া ফংলে। মসিগী মরমদি মখোয়গীদমক মাই পাকপগী অনৌবা লম্বী অমা হাংদোক্লে। স্তার্ত-অপদগী হৌরগা সাইন্স ফাওবা, স্পোর্তসতগী হৌরগা ওন্তপ্রিনোরশিপ ফাওবা, ঐখোয়গী থাজবা থম্বা নহারোলশিংনা লৈবাক অসিবু চাউখৎপগী অনৌবা লম্বীদা পুখৎলি। ঐখোয়গী নহারোলশিংনা ঐখোয়দা চাউখৎলবা ভারত অমগী মঙলান অসি মপুং ফাহনগনি হায়বগী থাজবা অসি পীরম্মি। হৌখিবা চহি 10 অসিদা, লৈবাক অসিগী নুপীশিংনা মপাঙ্গল হাপ্পগী অনৌবা ৱারী কয়া ইখ্রে। ওন্তপ্রিনোরশিপতগী হৌরগা দ্রোনশিং ফাওবা, প্লেনশিং পাইবদগী হৌরগা আর্মদ ফোর্সেসকী থৌদাং ফাওবা, নুপীশিংনা মখোয়গী ফিরাল পাইহনদবা লম অসি লৈতে। মালেমগী লৈবাক অমত্তনা নুপীশিংগী চাউখৎ-খোংজেল য়াওদনা চাওখৎপা ঙম্লোই। অমসুং মরম অসিনা, ঙসিদি ঐখোয়গী লেবর ফোর্সতা, থবক তৌরিবা প্রোফেস্নেলশিংদা নুপীশিংগী শরুক য়াবগী চাং হেনগৎলক্লিবা অসিনা ঐখোয়গী তুংলমচৎকীদমক ঐখোয়দা আশা কয়া অমা পীরক্লি, অনৌবা আশা অমা পোক্লি।
হৌখিবা চহি 10 অসিদা, লৈবাক অসিনা এক্সপ্লোর তৌদবা নৎত্রগা অন্দর-এক্সপ্লোর ওইবা সেক্তর কয়াদা খুমাং চাউশিল্লে। মোবাইল মেন্যুফেকচরিং ওইগেরা নৎত্রগা সেমিকন্দক্তর মেন্যুফেকচরিং ওইগেরা, ভারতনা মেনুফেকচরিংগী লমদা খোঙজেল য়াংনা মাগী মফম অমা শেমগৎলি। তেক্নোলোজী নৎত্রগা ফিনতেক ওইগেরা, ভারতনা মসিগী খুত্থাংদা লায়রবশিংবু শক্তি পীবতা নত্তনা মালেমগী তেক্নোলোজী হব অমা ওইনা মশাবু মশক তাক্লি। ঐখোয়গী ইনফ্রাস্ত্রকচর শেমগৎপগী খোঙজেল অসি মমাংদা অমুক্তা ওইখিদ্রি। ঐখোয়না কিলোমীতর লিশিং কয়া শাংবা এক্সপ্রেসৱে শেমগৎপতা নত্তনা খুঙ্গংশিংগা ঐখোয়গী খুঙ্গংগী লম্বীশিংগা শম্নহল্লি। হেন্না ফবা ত্রান্সপোর্তেসনগীদমক কিলোমীতর চাম্মরোম শাংবা মেত্রো রুতশিং শেমগৎলি। ভারতকী মাইপাকপশিং অসিনা ঐখোয়দা ভারতনা য়াম্না থুনা মাগী পান্দমশিং অদু ফংবা ঙমগনি হায়বগী আশা অমসুং অপেনবা পোকহল্লি। অমসুং ঐখোয়গী মাইপাকপশিং অসিদা আশা অমসুং থাজবা অসি ঐখোয়না খক্তনা উবা ফংদে, মালেম পুম্নমক্না ভারতপু চপ মান্নবা আশা অমসুং থাজবগা লোয়ননা মীৎয়েং থম্মি।
মরুপশিং,
বাইবলনা হায়রি- অমগা অমগা নুংশিনবা। হায়বদি, ঐখোয়না অমগ-অমগগী মরমদা খনবা তাই, অমগ-অমগগী য়াইফ-থৌরাংগী ৱাখল্লোন লৈগদবনি। ৱাখল্লোন অসিগা লোয়ননা, ঐখোয়গী ইন্সতিত্যুসনশিং অমসুং ওর্গনাইজেসনশিংনা খুন্নাইগী সেবাদা অচৌবা থৌদাং অমা লৌরি। এজুকেসনগী লমদা অনৌবা স্কুলশিং লিংখৎপা, এজুকেসনগী খুত্থাংদা কাংলুপ খুদিংমক, খুন্নাই খুদিংমকপু মাংলোমদা পুখৎনবা হোৎনবশিং, হকশেলগী লমদা মীচম প্রজাগী সেবা তৌনবা ৱারেপ লৌবশিং অসি ঐখোয়গী থৌদাংনি হায়না ঐখোয়না খল্লি।
মরুপশিং,
জেসস খৃস্তনা মালেমদা নুংশিবা অমসুং মশাগী ওইজবা য়াওদনা সেবা তৌবগী লম্বী তাক্লি। ঐখোয়না ঐখোয়গী পুন্সিদা হায়রিবা মগুনশিং অসিদা মীৎয়েং চংবা ঙম্নবা অমসুং মতম পুম্বদা ঐখোয়গী মথৌশিংবু মরুওইনা লৌনবা ঐখোয়না খৃস্তমাস পাংথোক্লি অমসুং জেজসবু নীংশিংলি। মসি ঐখোয়গী ইশাগী থৌদাংনি, ঐখোয়গী খুন্নাইগী থৌদাংনি অমসুং লৈবাক অমা ওইনা ঐখোয়গী থৌদাংনি হায়না ঐনা থাজৈ। ঙসিদি লৈবাক অসিনা 'সবকা সাথ, সবকা বিকাস অমসুং সবকা প্রয়াস'গী ৱারেপকী মওংদা মসিগী ৱাখল্লোন অসি মাংলোমদা পুখৎলি। মমাংদা খলমদবা হীরম কয়া অমা লৈরম্মি, অদুবু মখোয় অসি মীওইবগী মীৎয়েংদগী য়াম্না মরু ওই। ঐখোয়না মখোয়বু ঐখোয়গী প্রাইওরিতী ওইহল্লে। ঐখোয়না সরকারবু কাংলোনশিং অমসুং ফোর্মেলিতীশিংদগী লৌথোকখি। ঐখোয়না সেন্সিতিবিতীবু পেরামিতর অমা ওইনা লেপখি। লাইরবা খুদিংমক্না পক্কাগী য়ুম অমা ফংহনগদবনি, খুঙ্গং খুদিংমক্তা মৈ ফংহনগদবনি, মীওইবগী পুন্সিদগী অম্মবা লৌথোক্কদবনি, মীওইবনা থক্নবা ঈশিং ফংহনগদবনি, শেল লৈতবনা মরম ওইদুনা কনাগুম্বা অমত্তনা লায়েংবদা অৱাবা লৈহন্দবা ওইরোইদবনি, অসিগুম্বা সর্ভিস, অসিগুম্বা গবর্নান্সকী গেরেন্তী পীবা ঙম্বা অসিগুম্লবা সেন্সিতিব ওইবা সিস্তেম অমা ঐখোয়না শেম্লে।
লায়রবা ইমুং অমনা মসিগী গরেন্তী অসি ফংলবা মতমদা, মখোয়গী অৱাবা কয়াগী চৈথেং অদু লৌথোক্লে হায়বসি অদোম্না খনবা য়াই। পি.এম. আৱাস য়োজনাগী মখাদা ইমুং অমগী নুপী অমগী মিংদা য়ুম অমা শাবা মতমদা, মসিনা নুপীশিংদা কয়া য়াম্না শক্তি পীবগে। ঐখোয়না নুপীশিংদা শক্তি পীনবা নারী শক্তি বন্দন এক্ত পুথোক্তুনা পার্লিয়ামেন্ততা মখোয়গী শরুক য়াবা হেনগৎহনখ্রে। অসিগুম্বা মওংদা, নহাক্না দিসএবল কম্ম্যুনিতীনা মমাংদা থেংনখিবা অৱাবা কয়া অদু উবা ফংলমগনি। মীওইবগী ইকাই খুম্নবগী মায়োক্তা চৎপা অসিগুম্লবা মমিংশিংনা মখোয়বু কৌনরম্মি। মসি খুন্নাই অমা ওইনা ঐখোয়দা নুংঙাইতবা পোকহল্লি। ঐখোয়গী সরকারনা অশোয়বা অদু শেমদোক্লে। দিব্যাঙ্গগী আইদেন্তিতী পীদুনা ঐখোয়না মখোয়দা ইকায় খুম্নবা উৎলি। ঙসিদি লৈবাক অসিনা মীয়ামগী ইনফ্রাস্ত্রকচরদগী হৌরগা থবক পীবা ফাওবগী লম খুদিংমক্তা দিসএবলশিংদা অখন্নবা মীৎয়েং থম্লি।
মরুপশিং,
লৈঙাক্কী সেন্সিতিবিতী অসি লৈবাক অমগী শেন্মিৎলোন চাউখৎনবগীদমকসু চপ মান্ননা মরু ওই। খুদম ওইনা হায়রবদা, ঐখোয়গী লৈবাক অসিদা ঙামী অমসুং ঙা ফার্মর করোর 3 রোম লৈরি। অদুবু, মীওই করোর কয়া অসিগী মতাংদদি মমাংদা অমুক্তা খন্নখিদ্রি। ঐখোয়না ফিসরীজকী তোঙানবা মন্ত্রালয় অমা শেম্লে। ঐখোয়না ঙামীশিংদা কিসান ক্রেদিৎ কার্দকুম্বা খুদোংচাবশিং পীবা হৌখি। ঐখোয়না মেতস্য সাম্পাদা য়োজনা হৌদোক্লে। সমুদ্রদা ঙা ফাবা মীওইশিংবু ঙাক-শেন্দুনা থম্নবগীদমক্তা মোদর্ন ওইবা খোঙথাং কয়া লৌখৎলি। মসিগী হোৎনবা অসিনা মীওই করোর কয়াগী পুন্সিদা অহোংবা পুরকখি অমসুং লৈবাক অসিগী শেন্মিৎলোনসু মপাঙ্গল কনখৎহনখি।
মরুপশিং,
লাল কিলাগী লানবন্দগী ঐহাক্না সবকা প্রয়াসকী মতাংদা ঙাংখি। মসিদি পুন্না হোৎনমিন্নবা হায়বনি। ঐখোয় খুদিংমক্না লৈবাক্কী তুংলমচৎতা মরু ওইবা থৌদাং অমা লৌবা তাই। মীশিংনা অমত্তা ওইনা লাকপা মতমদা, ঐখোয়না অঙকপা কয়া অমা পাংথোকপা ঙম্মী। ঙসিদি, খুন্নাইগী ওইবা ৱাখল্লোন লৈবা ভারত মচাশিংনা মীয়ামগী খোঙজং কয়া অমা পাংথোক্লি। স্বচ্ছ ভারতনা ক্লিনর ইন্দিয়া অমা শেমগৎপদা মতেং পাংখি। মসিনা নুপী অমসুং অঙাংশিংগী হকশেলদা কান্নবা পীখি। ঐখোয়গী লৌমীশিংনা পুথোকপা মিল্লেৎ নৎত্রগা শ্রী অন্নানা অসি ঐখোয়গী লৈবাক অমসুং মালেম শীনবা থুংবনা তরাম্না ওক্লি। মীয়াম্না ভোকেল ফোর লোকেল ওইরক্লি, আর্তিসানশিং অমসুং ইন্দস্ত্রীশিং পুক্নিং থৌগৎলি। "এক পের মা কে নাম", হায়বদি "ইমাগী মীংদা উ অমা" অসিসু মীয়ামগী মরক্তা মমিং চৎলবা ওইরক্লি। মসিনা ঐখোয়গী ইমা ওইরিবা মহৌশা অমসুং ঐখোয়গী ইমাগী মফমদা ইকায় খুম্নবা উৎলি। খৃস্তিয়ন কম্ম্যুনিতীগী মীওই কয়া অমসু হায়রিবা থৌরাংশিং অসিদা থৌদাং লৌরি। ঐহাক্না ঐখোয়গী নহাশিংবু, খৃস্তিয়ন কম্ম্যুনিতীগী নহাশিং য়াওনা, অসিগুম্বা খোঙথাংশিং অসিদা মাংজিল থাখিবগীদমক থাগৎপা ফোংদোকচরি। চাউখৎলবা ভারত অমা শেমগৎনবা পান্দম অসি মপুং ফাহন্নবগীদমক অসিগুম্বা অপুনবা খোঙথাংশিং অসি য়াম্না মরু ওই।
মরুপশিং,
ঐহাক্না থাজবা থম্লি মদুদি ঐখোয়গী পুন্না হোৎনবনা ঐখোয়গী লৈবাক অসিবু মাংলোমদা পুখৎকনি। চাউখৎলবা ভারত অসি ঐখোয় পুম্নমক্কী পান্দমনি অমসুং ঐখোয় পুন্না থবক তৌমিন্নদুনা মদু ফংগদবনি। লাক্কদৌরিবা মীরোনশিংগীদমক্তা মখোয়গীদমক্তা ভারতকী মঙাল অমা থাদোকপা অসি ঐখোয়গী থৌদাংনি। ঐনা অমুক্কা হন্না ময়াম পুম্নমকপু হরাও-তয়াম্বা খৃস্তমাস অমসুং জুবিলী চহি অমগী য়াইফ-পাউজেল পীজরি।
হন্না-হন্না থাগৎচরি।
