প্রধান মন্ত্রী শ্রী নরেন্দ্র মোদীগা এস্ত্রোনোত সুভান্সু সুক্লাগা ঙরাং নই দিল্লীীদা ৱারী শানখ্রে। স্পেস খোঙচৎকী অওনবা পুরক্নিংঙাই ওইবা মওংদা থেংনরকপশিংগী মতাঙদা, প্রধান মন্ত্রীনা অসিগুম্বা মশক নাইরবা খোঙচৎ অমা চৎলুরবা মতুংদা, মীওই অমদা অহোংবা অমা ফাওরমগনি হায়খি অমদি হায়রিবা অওনবা অসিবু এস্ত্রোনোত অমনা কমদৌনা খল্লি অমদি উবগে হায়বা খঙনিংবগী ৱাফম থমখি। প্রধান মন্ত্রীগী ৱাফমগী পাউখুমদা, সুভান্সু সুক্লানা স্পেসতা লৈরিবা ফীভম গ্রেভিতী লৈতবনা মরুওইবা ৱাফম অমা ওইরগা তোপ তোপ্না খেন্নৈ।
প্রধান মন্ত্রীনা খোচৎ মনুংদা ফম্ফম হোংদনা লৈবরা হংখি। ৱাফম অসিদা “হোয় সর, হোংদনা লৈ” হায়না সুক্লানা পাউখুম পীখি। শ্রী মোদীনা মখা তানা এস্ত্রোনোত অমনা চপ মান্নবা ফীভমদা পুং ২৩-৪ লৈবা তাইই হায়খি। মদুদা সুক্লানা অচুম্বনি হায়রদুনা, স্পেস য়ৌরবা মতুংদা, এস্ত্রোনোতনা মখোয়গী সীত অমদি হার্নেস থাদোক্তুনা কেপসুল মনুংদা মনিং তম্না চত্থোক চৎশিন তৌবা য়াই হায়খি।
এস্ত্রোনোত সুভান্সু সুক্লাগা ৱারী ৱাতায় অদু মখা চত্থরদুনা, স্পেস খোঙচৎকী হকচাঙদা অমদি পুক্নিং ৱাখলদা পীবা ইথিলগী মতাঙদা চঙশিল্লদুনা, প্রধান মন্ত্রীনা কেপ্সুল অদুদা মফম মরাঙ কায়না ফংবরা হংখি। সুভান্সু সুক্লানা মফম মরাঙ কায়দ্রবমকসু মফম খরদি অদুমক ফংই হায়খি। প্রধান মন্ত্রীনা কেপ্সুল অদু ফাইতর জেত কোকপিত অমদগীদি হেন্না নুংঙাইরমগনি হায়খি। মদুদা সুক্লানা খুমখি, “মদুদগীদি য়াম্না হেন্না ফৈ সর।”
মখা তানা, শ্রী মোদীগী মফমদা স্পেসতা য়ৌরবা মতমদা পুক্নিং ৱাখলদা লাকপা অহোংবশিংগী মরমদা পাউদমখি। সুক্লানা মিহুলগী চাং মশক থোক্না হন্থখি, অমদি হকচাঙদা ফীভমদুদা চুশিন্ননবা অওনবা কয়া লাকখি হায়খি। অদুম ওইনমক, নুমিৎ মরি মঙানিগী মনুংদা, হকচাঙনা মফমদুদা হৈনরক্তুনা স্পেস এনভাইরনমেন্ততা নোর্মেল ওইরকখি। মালেমদা হল্লকপা মতমদা, হকচাঙদা চপ মান্ননবা অহোংবা থেংনখি। মশা ফবা ফত্তবগী খেন্নবা লৈতনা, অহানবদা চৎপা ফাওবা নীংথিনা ঙমখিদে। মঙোন্দা থেংনখিবশিং পাউদম্লদুনা, মশাদা করিসু থোইদোকপা লৈত্রবসু অহানবা খোঙ থাংবদা তুগে তৌখি অমদি অতৈনা মহাকপু শৌগৎপা তাখি হায়না মহাক্না হায়খি। কমদৌনা চৎকনি হায়না খঙলবসু, থোপ্নদি হান্নগী ফীভমদা হঞ্জিল্লক্নবা অমদি অনৌবা এনভাইরনমেন্তপু অমুক হন্না খঙননবা হোৎনবদা মতম খরা লৌই। প্রধান মন্ত্রীনা স্পেসকী খোঙচৎ অসি ফীজিকেল ত্রেনিংখক্তনা নত্তনা পুক্নিং ৱাখলসু শেম শাবা মথৌ তাই হায়খি। সুক্লানা য়ানিংবা ফোঙদোক্লদুনা, হকচাঙ অমদি মসলশিংদা মপাঙ্গল লৈজরবসু, পুক্নিং ৱাখলদা অনৌবা এনভাইরনমেন্ত অদুদা চুশিন্ননবা অমদি অহানবা খোঙ থাংনবা অমসুং মওং চুম্না থবক তৌননবা হোৎনবা মথৌ তাই হায়খি।
স্পেস মিসন মনুংদা থেংনরকখিবশিং খন্নরদুনা, শ্রী মোদীনা এস্ত্রোনোতশিংনা স্পেসতা খ্বায়দগী শাংন লৈবা মতমগী মরমদা হংখি। সুভান্সু সুক্লানা, হৌজিক্কী ওইনা মীওই কয়ানা অমুক্তা থা নিপান ফাওবা লৈনরি, মসিমক হৌজিক্কী মিসন অসিনা হৌদোকখিবা পন্দোল অমনি। প্রধান মন্ত্রীনা সুক্লাদা মিসন মনুংদা মহাক্না থেংনরকপা এস্ত্রোনোতশিংগী মরমদা হংখি। সুক্লানা মখোয় খরদি দিসেম্বরদা হল্লক্কনি হায়খি।
শ্রী মোদীনা স্পেস স্তেসন্দা মুং অমসুং মেথী থাবগী চাংয়েংগী মতাঙদা ৱা হংখি। সুক্লানা মীওই কয়া অমদি ওইরক্লিবা ৱাফমশিং অসিগী মরমদা খঙনদে হায়না অঙকপা ফোঙদোকখি। অকক্নবা মফম অমদি কার্গোগী শেল য়াম্না চঙবা মরম্না চীঞ্জাক্না স্পেস স্তেসন্দা অচৌবা শিংনবা অমা ওইরি হায়খি। মসিদা থম্লিবা মীৎয়েঙ অসি য়ারিবমখৈ মফম কন্দনা কেলোরী অমদি ন্যুত্রিসন হেক য়ারিবমখৈ য়াম্না হাপ্পনি। চাংয়েং কয়া চত্থরি, অমদি স্পেসতা অকক্নবা চীঞ্জাক খরা থাবসি তশেংনা য়াম্না লায় হায়খি। মচাক য়াম্না চঙদনা, খুদম ওইনা পুখম অমদি ঈশিং খরদা নুমিৎ নিপান্নিগী মনুংদা ময়োল চয়োংলকই হায়না সুক্লা মশানা থেংনরকপা চাংয়েং অমগী মরমদা পাউদমখি। ভারতকী তোপ তোপ্পা লৌউ-শিংউগী ইনোভেসন্না হৌজিক্তি মাইক্রোগ্রেভিতী রিছর্চ প্লেতফোর্ম য়ৌরে হায়খি। মহাক্না অসিগুম্বা চাংয়েংশিং অসিনা এস্ত্রোনোতশিংখক্তগী নত্তনা মালেমগী চীঞ্জাক মরাং কায়না ফংদ্রবা মীওইশিংগী চীঞ্জাক্কী সিক্যুরিতীগী শিংনবশিং থেংননবা মতিং লৈ হায়খি।
প্রধান মন্ত্রীনা মালেমগী এস্ত্রোনোতশিংনা ভারতকী এস্ত্রোনোত অমা থেংনবা মতমদা কমদৌনা রিএক্ত তৌরকই হংখি। সুক্লানা, হৌখিবা চহি অদুদা, মহাক্না চৎলুবা মফম খুদিংদা মহাক্কা থেংনবদা মীয়াম্না তশেংনা নুংঙাইবা উৎলকই হায়খি। মখোয়না ভারতকী স্পেসকী থবক থৌওংশিংগী মরমদা তোয়না হংখি অমদি লৈবাক অসিগী খোঙজেলগী মরমদা মমুৎ তানা খঙলম্মি হায়খি। কয়া অমদি গগনয়ান মিসনগী মরমদা পুক্নিং লাংতক্ননা লৈহৌই অমদি মসিগী তাইমলাইনগী মরমদা হংহৌই। সুক্লাগী ক্রুমেতশিংনা খুৎয়েক য়াওবা নোৎশিং লৌরদুনা, লোঞ্চ তৌবা মতমদা য়াওনিংবগী অমদি ভারতকী স্পেসক্রাফ্ততা তোংদুনা চৎনিংবগী অপাম্বা ফোঙদোকহৌই হায়খি।
শ্রী মোদীনা মীওই অতৈনা সুক্লাবু জিনিয়স অমগুম্না করিগী লৌরিবনো হংখি। সুক্লানা লু লুক্না মীওইশিং অদু মখোয়না ফোঙদোক্লিবা ৱাহৈ ৱাতাশিংদা পুকচেল চাউবা উৎপিবনি হায়খি। মহাকপু মখোয়না থাগৎপিরক্লিবা অদু মহাক্কী অকনবা ত্রেনিং—অহানবদা ইন্দিয়ন এয়র ফোর্সতা অদুগা তুংদনা স্পেস পাইলোত অমা ওইনা তৌখিবা ত্রেনিং অদুগী মপান্ননি হায়খি। হৌরকপদা একাদমিক স্তদী য়াম্না চঙলোই খল্লম্লবসু, লম্বী অসিদা য়াম্না পাক শন্না তমদবা য়ারমদ্রে হায়না সুক্লানা ফোঙদোকখি। স্পেস পাইলোত অমা ওইবা হায়বসি ইঞ্জিনিয়রিং দিসিপ্লিন অমা মাস্তর তৌবগুম্বনি হায়না মহাক্না ফোঙদোকখি। মহাক্না ভারতকী সাইন্তিস্তশিংগী মখাদা চহি কয়া ত্রেনিং তৌখি অমদি মিসন অসিগীদমক শেম শারে হায়বা মশাদা ফাওখি হায়না ফোঙদোকখি।
প্রধান মন্ত্রী শ্রী নরেন্দ্র মোদীনা এস্ত্রোনোত সুভান্সু সুক্লাদা মহাক্না মমাঙদা শিন্নখিবা “হোমৱর্ক” অদুগী খোঙজেল নৈনখি। সুক্লানা খোঙজেল নীংথিনা লৈ হায়খি। পীরক্লিবা থৌদাং অদু তশেংনা য়াম্না মরু ওই হায়রদুনা মহাক্কী খোঙচৎ অসি মীয়াম্না পাক শন্না খঙহন্নবা পান্দমদনি হায়খি। মিসন অদু মায় পাকপা ওইখি অমদি তীম অদু শাফনা হল্লক্লে, অদুবু মসিনা অরোয়বদি নত্তে, মসিদি খোঙহৌনি হায়না মহাক্না ফোঙদোকখি। প্রধান মন্ত্রীনসু মসিনা অহানবা খোঙথাংনি হায়খি। সুক্লানা ৱাফম অদুমক হল্লদুনা, “হোয় সর, মসিনা অহানবা খোঙথাংনি” হায়খি। থৌশিল অসিগী নুংদা লৈরিবা পান্দমদি হেক ঙম্লিবমখৈ তমশিনবা অমদি মনুং থিৎবা ৱাখল্লোনশিং পুদুনা হল্লকপনি হায়খি।
প্রধান মন্ত্রীনা ভারত্তা এস্ত্রোনোতশিংগী অচৌবা পুল অমা শেমগৎপগী মথৌ তাবা ৱাফম ফোঙদোক্লদুনা, অসিগুম্বা মিসনশিংগীদমক মীওই ৪-৫০ শেম শাদুনা থম্বা য়াই হায়খি। হৌজিক ফাওবদা অঙাং খরখক্তনা এস্ত্রোনোত অমা ওইনিংবগী অপাম্বা লৈ, অদুবু সুক্লাগী খোঙচৎ অসিনা থাজবা অমদি অপাম্বা হেনগৎহল্লগনি হায়খি।
সুক্লানা মহাক্না অঙাং ওইরিঙৈগী পুন্সিগী মতাঙদা নীংশিংলদুনা, রাকেস শর্মনা ১৯৮৪ দা স্পেসতা চৎখিব মতমদা নেস্নেল প্রোগ্রাম অমা লৈতবা মরম্না এস্ত্রোনোত অমা ওইবগী ৱাখল্লোন মঙোন্দা ফাওখিদে। অদুম ওইনমক, হন্দক্কী মিসন মনুংসিদা, মহাক্না অঙাংশিংগা থৌরম অহুমদা ৱারী শানখি—অমুরক্না লাইব ওইনা অদুগা অনিনা রেদিওগী খুত্থাঙদা। থৌরমশিংদুগী মনুংদা অমদা, অঙাং অমনা মঙোন্দা “সর ঐ কমদৌনা এস্ত্রোনোত অমা ওইবা য়াগনি” হংলকখি। এস্ত্রোনোত সুক্লানা এচিবমেন্ত অসি লৈবাক অসিগী ওইনা অচৌবা মায় পাকপা অমনি হায়রদুনা, ঙসিগী ভারতনা মঙখক্তমক মঙদুনা লৈবগী মথৌ তাদ্রে, লৈবাক অসিনা স্পেসফ্লাইত অসি ওইথোকপা য়াই, পাম্বৈ লৈ, অমদি এস্ত্রোনোত অমা ওইবা য়াই হায়খি। “স্পেসতা ভারতপু মহুৎ শিন্দুনা চৎপা হায়বসি অচৌবা তাঞ্জা অমনি, অমদি অতৈ মীওইশিংবু পন্দোল অসি লোমহন্নবা মতেং পাংবনা মহাক্কী থৌদাং ওইরে,” হায়না সুক্লানা মখা তাখি।
প্রধান মন্ত্রী শ্রী নরেন্দ্র মোদীনা ভারতকী মাঙদা হৌজিক মিসন অনি—স্পেস স্তেসন অমদি গগনয়ান তাদুনা লৈরি হা্যরদুনা, সুক্লানা থেংনরক্লিবশিং অসিনা মতুং তারকপা থৌরাংশিংদা চাউনা কান্নবা পীরগনি হায়না ফোঙদোকখি।
সুক্লানা য়ানিংবা ফোঙদোক্লদুনা, মরুওইনা প্রধান মন্ত্রী মোদীগী লুচিং মখাদা লৈঙাক অসিনা লেপ্লিবা হনবা লৈতবা খোঙফম অসিনা মরম ওইরগা মসি লৈবাক অসিগী অচৌবা খুদোংচাবা অমনি হায়খি। চন্দ্রয়ান-২ গুম্বা মায় পাকখিবদবা মিসনশিংনা খোঙফম মনিং হনহল্লবসু, লৈঙাক অসিনা হনবা লৈতনা চাং মান্নবা বজেৎকা লোয়ননা স্পেস প্রোগ্রামদা ঙাক্লৌ পীবনা, চন্দ্রয়ান-৩ মায় পাকহনখি হায়খি। মায় পাক্ত্রবা মতুংদসু অসুম্না ঙাক্লৌ পীবা অসিবু মালেম পুম্বনা উনখি, অমদি ভারতকী মতিং অমদি স্পেস দোমেন্দা লৈরিবা মাগী মফমগী মমি তাখি হায়না মহাক্না ফোঙদোকখি। সুক্লানা ভারতনা লুচিংবগী শক্লোন লৌবা ঙমগনি অমদি ভারতনা লমজিংবা অতোপ্পা লৈবাকশিংনা শরুক য়াবা স্পেস স্তেসন অমা থম্বনা মতিক লৈবা খুৎলায় অমা ওইগনি হায়খি।
সুক্লানা মখা তানা নীংতম নুমিত্তা স্পেস মেনুফেকচরিংগী লমদা আত্মনিরভর্তাগী মতাঙদা প্রধান মন্ত্রীনা ফোঙদোকখিবা ৱাফমগী মতাঙদা, গগনয়ানগী মঙলান, স্পেস স্তেসন, অমদি থাদা খোঙদাবা হায়রিবশিং অসি অমগা অমগা মরী লৈনবা মচাকশিংনি অমদি অচৌবা মঙলান অমা ওইরি হায়খি। প্রধান মন্ত্রী মোদীনা করিগুম্বা ভারতনা মসিবু মরোমদোম লেপচবগী পান্দমগা লোয়ননা চঙশিনবা তারবদি শোয়দনা মায় পাক্কনি হায়খি।
