রাস্ত্রপতি বাইদেন, উপ-রাস্ত্রপতি হেরিস, এক্সলেন্সীশিং, নমস্কার!
কোবিদ লাইচৎনা মীয়াম পুন্সি, সপ্লাই চেন্দা মখা তানা পামদবা চৈথেং পীরি অমসুং মথৌনা লৈবা খুন্নাইগী নীংহন্নবা নাইদবা মতৌবু লেপ্তনা চাংয়েং তৌরি। লাইচৎ অসিগা মাইয়োক্নবা ঙম্নবগীদমক্তা ঐখোয়না ভারত্তা মীয়ামদা হেন্না মরু ওইবা পীবা থৌরাং চত্থখি। ঐখোয়গী হেল্থকেয়র বজেত্তা ঙসি ফাওবগী খ্বাইদগী চাউবা শেনফম কাইথোক্লি।
ঐখোয়গী তীকা থাবগী খোঙজংনা মালেমগী খ্বাইদগী চাউবা ওইরি। ঐখোয়না লৈবাক্কী অহলগী মীশিংগী চাউরাকপা ৯০% অমসুং অঙাংগী মিলিয়ন ৫০ হেনবদা ভেক্সিন কাপ্পা ঙমখ্রে। ভারতনা দবল্যু.ঐচ.ও.না অয়াবা পীবা ভেক্সিন মরি শারি অমসুং হন্দক্কী চহসিদা বিলিয়ন দোজ মঙা পুথোকপা ঙম্বগী মতিক লৈরি।
ঐখোয়না লৈবাক্কী নক্নবা মরী লৈবগী খুত্থাংদা কোভেক্স দোজ মিলিয়ন ২০০ হেনববু চাউরাকপা লৈবাক ৯৮দা পীখ্রে। ভারতনা কোবিদ তেস্ত তৌবা, লাইয়েংবা অমসুং মরী লৈনবা দেতা শেন্নবগী শেল চঙদবা কোবিদ মিতিগেসন তেক্নোলোজী পুথোকখ্রে। ঐখোয়না মসিগুম্বা তেংবাংশিংবু অতোপ্পা লৈবাকশিংদা পীখ্রে।
ভারতকী জীনোমিক্স কন্সোর্তিয়ম্না ভাইরস অসিগী ওইনা থম্বা মালেমগী দেতাবেজতা মশক থোকপা শরুক তম্লি। অসিগুম্বা নেতৱর্ক অসিবু ঐখোয়গা য়ুম্লোন্নবা লৈবাকশিংদা পীরগনি ফোংদোকপদা ঐহাক্না নুংঙাইবা ফাওরি।
ঐখোয়না ভারত্তা, নাৎকী হিদাক লাংথক্কী পথাপ্পু কোবিদকী মাইয়োক্তা লান্থংনবদা পাক শন্না শিজিন্নখি অমসুং মীওই কয়াগী পুন্সি কন্নবগীদমক্তা মখোয়গী ইম্ম্যুনিতী হেনগৎহনখি।
অসিগুম্বা চহি চা কয়া লিরবা লৌশিংবু মালেমদা পীনবগীদমক্তা ঐখোয়না ভারত্তা দবল্যু.ঐচ.ও. সেন্তর ফোর ত্রেদিস্নেল মেদিসিনগী উরেপ উয়ুং মমাংগী থাদা তমখ্রে।
এক্সেলেন্সীশিং,
তুংগী মতমদা লাক্কদবা হকশেলগী শিংনবা কয়া থেংনবা ঙম্নবগীদমক্তা মালেম পুম্বনা অমত্তা ওইনা হোৎনমিন্নবগী মথৌ তাই। ঐখোয়না নীংহন্নবা লৈতবা মালেমগী সপ্লাই চেন অমা শেমগদবনি অমসুং ভেক্সিন অমসুং হিদাক লাংথক কয়াবু পুন্না শিজিন্নবা ঙমগদবনি।
দবল্যু.তি.ও.গী কাংলোন, মরু ওইনা তি.আর.আই.পি.এস.না হেন্না ফ্লেক্সিবল ওইবগী মথৌ তারি। দবল্যু.ঐচ.ও. অসি নৌনা শীন্দোক্কদবনি অমসুং মপাঙ্গল হেন্না হাপকদবনি, মদু ওইরবদি, নীংহন্নবা নাইদবা মালেমগী হেল্থ সেক্যুরিতী আর্কিতেকচর অমা শেম্বা ঙমগনি।
সপ্লাই চেনবু তংদু লৈতানা লৈহন্নবা অমসুং হেন্না থাজবা য়াহন্নবগদীমক্তা দবল্যু.ঐচ.ও.গী ভেক্সিন অমসুং লাইয়েংবগী থৌওংদা অয়াবা পীবগী থৌওংবু হেন্না মওং-মরিল নাইহন্নবা ঐখোয়না ৱাফম হৌদোক্লি। মালেমগী খুন্নাইগী মথৌদাং খঙবা মেম্বর অমা ওইনা, ভারতনা হায়রিবা থৌওংশিং অসিদা মরু ওইবা থৌদাং য়ানবা শেম-শাদুনা লৈরি।
থাগৎচরি, মীয়াম্বু হন্না হন্না থাগৎচরি।
