প্রধান মন্ত্রী শ্রী নরেন্দ্র মোদীনা লৈবাক মীয়ামদা পুৱারী ওইরবা কোসি রেল মহাসেতু (মেগা ব্রিদজ) ভিদিও কনফরেন্সকী থোংদা সেপ্তেম্বর ৮, ২০২০গী নুমিৎ য়ুংবা পুং ১২দা খুৎশিন্নগদৌরি।
মসিগী মথক্তা প্রধান মন্ত্রীনা বিহার রাজ্যগী মীয়ামদা নুংঙাইনবগীদমক পেসেঞ্জরশিংগী খুদোংচাবশিং পীনবা রেল প্রোজেক্ত ১২সু শঙ্গাগনি। মসিদা কিউল তুরেল্গী মথক্তা অনৌবা রেলৱে ব্রিদজ শাগনি, অনৌবা রেলৱে লাইন অনী, মৈ ঙালহন্নবগী প্রোজেক্ত ৫, ইলেক্ত্রিক লোকোমোতিব সেদ অমা অমসুং বার-বাখতিয়ার্পুরগী মরক্তা অহুমশুবা লাইন প্রোজেক্ত য়াওরি।
কোসি রেল মহাসেতু খুৎশিন্নবসি বিহারগী পুৱারীদা নিংশিংনিঙাই ওইরবা মীকুপ অমা ওরগনি অমসুং মসিনা লমদম অসিবু অৱাং নোংপোক লমদমগা শম্নহল্লগনি।
১৮৮৭দা, নির্মালি অমসুং ভাপ্তিয়াহি (সরাইগর)গী মরক্তা মিতর গোজ লিঙ্ক অমা শাগৎখি। ১৯৩৪দা থোকখিবা অকনবা ঈচাউ অমসুং ইন্দো নেপাল য়ুহা হাবা মনুংদা রেল লিঙ্ক অমা চেন্থখি অমসুং মসিগী মতুংদা কোসি তুরেলনা খোংজেল হোংমনবনা রেল লিঙ্ক অসিবু মতম শাংনা অমুক হন্না শেমজিন্নবা হোৎনখিদ্রে। কোসি মেগা ব্রিদজ লাইন প্রোজেক্ত অসি ভারত সরকারনা ২০০৩-০৪গী মতমদা শেল কাইথখি। কোসি রেল মহাসেতু অসি কিলোমিতর ১.৯ শাংই অমসুং মসি শাবদা চঙ্গদবা শেলনা লুপা করোর ৫১৬নি। থোং অসি ইন্দিয়া-নেপাল ঙমখৈদা য়াম্না মরুওইবা শক্তম অমা লাংলি। প্রোজেক্ত অসি কোবিদ লাইচৎকী মনুংদা মাইগ্রেন্ত লেবরশিংনা শরুক য়াদুনা লোইশিনখি।
প্রোজেক্ত অসি খুৎশিন্নবনা চহী ৮৬কী মংলান অমসুং মতম শাংনা লমদম অসিগী মীয়াম্না ঙাইজরকপা অমা মংফাওনহল্লনি। মহাসেতু খুৎশিন্নখিবগা লোইননা প্রধান মন্ত্রীনা সহারসা-অসানপুর কুফা দিমো ত্রেন অমা সুপোল স্তেসন্দগী লম্থাগনি। রিগুলার ত্রেন সর্বিস হেক হৌবগা, মসিনা সুপোল, অরারিয়া অমসুং সহারসা জিল্লাদা চাউনা কান্নবা পীরগনি। মসিনা কোল্কতা, দিল্লী অমসুং মুম্বাইদা লমশাং চৎপদা লমদম অসিগী মীয়ামদা নুংঙাইহল্লগনি।
প্রধান মন্ত্রীনা অনৌবা লাইন প্রোজেক্ত অনী হজিপুর-ঘোস্বর-বাইশালি অমসুং ইস্লাম্পুর-নতেস্বর শঙ্গাগনি। শ্রী মোদীনা কর্নোতি-বাখতিয়ার্পুর লিঙ্ক বাইপাস অমসুং বার-বাখিয়ারপুরগী অহুমশুবা লাইনসু শঙ্গাগনি।
প্রধান মন্ত্রীনা মুজাফর্পুর-সিতামরি, কতিহার-ন্যু জল্পাইগুরি, সমস্তিপুর-দর্ভাঙ্গা-জয়ানগর, সমস্তিপুর-খাগারিয়া, ভগলপুর-শিবনরায়নপুর সেক্সনগী রেলৱে ইলেক্ত্রিফিকেসন প্রোজেক্তসু শঙ্গাগনি।
