প্রধান মন্ত্রী শ্রী, নরেন্দ্র মোদীনা ঙরাং লোক কল্যান মার্গ 7, ন্যু দিল্লীদা ভারতকী ব্লাইন্দ ৱিমেনস T-20 ৱার্ল্দ কপ চেম্পিয়নশিংগা ৱারী শাখ্রে। শ্রী মোদীনা শান্নরোইশিংগা লোইননা নুংশিনা ৱারী শানখি, মখোয়গী থৌনা অমসুং ফিরেপ অদুবু শিংথাখি অমসুং মখোয়বু থাজবা অমসুং অখাং কনবগা লোয়ননা মখোয়গী খোঙচৎ মখা চত্থনবা পুক্নিং থৌগৎখি। মহাক্না হায়খি মদুদি কন্না হোৎনদুনা মাংলোমদা চংশিনবশিংনা শান্ন-খোৎনবগী লমদা নত্তনা পুন্সিদসু কৈদৌনুংদা মাইথিদে। শান্নরোইশিংনা মশাগী ওইবা মশক অমা শেমগৎলে, মসিনা মখোয়গী মশাদা থাজবা হেনগৎহল্লে হায়না মহাক্না পনখি।
বন্দে মাতরমগী চহি 150 শুবগী মরুওইবা অদু পল্লদুনা শ্রী মোদীনা হায়খি মদুদি তীমগী স্পিরিত অসিনা অপুনবা অমসুং লৈবাক্কী চাউথোকচবগী মগুনশিং অদুবু উৎলি। মহাক্না কাশীগা মহাক্কী মরীগা মরী লৈননা লাইশোল ঈশৈ শকখিবা শান্নরোইশিংগী মরক্তগী অমনা শকপা ম্যুজিকেল তেলেন্তপু মহাক্না থাগৎখি। মহাক্না তীম অসিগী শান্নরোইশিংগী মরক্তগী অমনা ভক্তিগী ঈশৈ শকপা অদুবু থাগৎপা ফোংদোকখি অমসুং কাশীগা লৈনরিবা মহাক্কী মরী অদুবুসু নিংশিংখি।
নুংঙাইবা ফাগি ওইনা ৱারী শানবদা, প্রধান মন্ত্রীনা তীম অসিগী মওং মতৌবু রাজনিতীগা চাংদম্নখি। রাজনিতীদা মীওই অমনা মন্ত্রী, এম.এল.এ. নৎত্রগা এম.পি.গুম্বা তোঙান তোঙানবা থৌদাং লৌবগুম্না, শান্নরোয়শিং অসিসু ওল-রাউন্দর ওই হায়না মহাক্না ফোংদোকখি।
শান্নরোইশিংনা খুন্নাইগী মীপাইবা অমসুং ইমুংগী অৱাবা য়াওনা শিংনবশিং মায়োক্নবগী মশাগী ৱারীশিং শান্নখি। শান্নরোই অমনা মহাক্কী লৈখিদ্রবা মপাবুংনা মহাক্কী মাইপাকপা উনিংবগী মঙলান অদু নিংশিংখি অমসুং প্রধান মন্ত্রীগা উনদুনা মহাক্কী মঙলান অদু মঙফাওনহনখি হায়না ফোংদোকখি।
প্রধান মন্ত্রীনা তীম অদুদা মখোয়গী মাইপাকপা অসি ময়ামগা মীমান্নদ্রবশিংগীদমক্তা নত্তনা ভারতকী নাগরিক পুম্নমক্কী পুক্নিং থৌগৎলগনি হায়না থাজবা পীখি। মখোয়গী মাইপাকপশিং অসিনা ভারতকী নহাশিংগী শক্তি অমসুং অখাং কনবা অদু উৎলি হায়না মহাক্না য়াম্না মরুওইনা পনখি। লৈবাক অসিনা মখোয়গী অঙাংশিংদা অসিগুম্বা থৌনা অমসুং ফিরেপ অমগা লোয়ননা মাংলোমদা চংশিল্লিবা অসিদা চাউথোকচবা পোকই হায়না মহাক্না ফোংদোকখি।
শ্রী মোদীনা তীম অসিদা য়াইফ-পাউজেল পীদুনা ৱারী শানবগী ৱারোইশিন পীখি, মালেমগী থাক্তা ভারতকী মিংচৎ হেনগৎহনবদা মখোয়না লৌরিবা থৌদাং অমসুং মখোয়গী খত্থোকপা অমসুং মখোয়গী ৱাখল্লোন অদুগী খুত্থাংদা অতোপ্পা কয়া অমসু পুক্নিং থৌগৎলি হায়না থাগৎখি।
