প্রধান মন্ত্রী শ্রী নরেন্দ্র মোদী অমসুং য়ুনাইতেদ কিংদমগী প্রধান মন্ত্রী দি রাইৎ ওনরেবল বোরিস জোনসনগা ঙসি ভর্চ্যুএল সম্মিৎ অমা পাঙথোকখ্রে।
ভারত অমসুং য়ু.কে.গী মরক্তা মতম শাংলবা মরুপ ওইবগী মরীশিং লৈরি অমসুং দেমোক্রেসী, ফন্দামেন্তেল ফ্রীদমশিং অমসুং রুল ওফ লো, অফবা কম্প্লিমেন্তরীশিং অমসুং কভর্জেন্স হেনগৎলক্লিবা অসিদা নাকল অনিমক্না হোৎনমিন্নরিবা স্ত্রেতেজিক পার্তনরশিপ অমা সিয়র তৌরি।
সম্মিৎ অসিদা বাইলেতরেলগী ওইবা মরীশিং ফগৎহন্নবা কান্নরবা ‘রোদমেপ ২০৩০’ অমা পাইখৎখি। রোদমেপ অসিনা মথংগী চহি তরাদা অসিদা পিপল তু পিপল কন্তেক্তশিং, ললোন-ইতিক অমসুং শেন্মীৎলোন, ঙাকশেল অমসুং সেক্যুরিতী, অইং-অশা অমসুং হকশেলগী মরু ওইবা লমশিং অসিদা হেন্না চেৎপা মরী থম্নবা লম্বী য়াৎলগনি।
লুচিংবা অনিনা কোবিদ১৯গী ওইরিবা ফীভম অমসুং বেক্সিনশিংদা মাই পাক্না পার্তনরশিপ থম্বা য়াওনা লাইচৎ অসিগী মায়োক্তা লান্থেংনবদা মতেং পীনরিবা অসিগী মতাংদা খন্নখ্রে। প্রধান মন্ত্রী মোদীনা ভারত্তা কোবিদ১৯গী শাথিরবা অনিশুবা ৱেব শন্দোরক্লিবা অসিদা য়ু.কে.না খুদক্কী ওইবা মেদিকেলগী তেংবাং পীরকখিবগীদমক প্রধান মন্ত্রী জোনসনু থাগৎপা ফোঙদোকখ্রে। প্রধান মন্ত্রী জোনসন্না ভারতনা ফার্মাকোতিকেলশিং অমসুং বেক্সিনশিং য়াওনা মমাংগী চহিদা য়ু.কে. অমসুং অতৈ লৈবাকশিংদা তেংবাংখিবা অদুগীদমক থাগৎপা ফোঙদোকখ্রে।
প্রধান মন্ত্রী অনিনা মালেমগী খ্বাইদগী চাউবা ৫শুবা অমসুং ৬শুবা ইকনোমীশিংগী মরক্তা লৈরিবা ললোন-ইতিক তৌবা ঙম্বগী মতিক-ময়াই অসি ফুদোক্নবা অমসুং ২০৩০ ফাওবদা বাইলেতরেল ত্রেদ শরুক অনি হেন্না ওইহন্নবা অচৌবা পান্দম অমা থমদুনা ‘এনহেন্স ত্রেদ পার্তনরশিপ’ (ই.তি.পি.) অমা হৌদোকখ্রে। ই.তি.পি.গী শরুক অমা ওইনা ভারত অমসুং য়ু.কে.না ঙন্না কান্নবশিং ফংনবা ইন্তেরিম ত্রেদ এগ্রীমেন্ত অমা খন্নবা য়াওনা কম্প্রিহেন্সিব অমসুং বেলেন্স ওইবা এফ.তি.এ. অমা খন্ননবা রোদমেপ অমদা য়ান্নপা পুরকখি। ভারত অমসুং য়ু.কে.গী মরক্তা ললোন-ইতিক তৌবগী মতিক-ময়াই ফগৎহনবনা লৈবাক অনিমক্তা হকথেংননা অমসুং নাকোইননা থবকশিং লিশিং কয়া পীবা ঙম্লগনি।
য়ু.কে. অসি রিসর্চ অমসুং ইন্নোভেসনগী লমদা ভারতকা চুংশিন্নরিবা খ্বাইদগী চাউবা অনিশুবা পার্তনর ওইরি। এফ্রিকাদগী হৌরগা অখন্নবা চাউখৎলক্লিবা লৈবাকশিংদা ইনক্লুসিব ইন্দিয়ন ইন্নোভেসনশিং ত্রান্সফর তৌবদা মতেং পাংনবা পান্দমদা ভর্চ্যুএল সম্মিৎ অসিদা অনৌবা ইন্দিয়া-য়ু.কে. ‘গ্লোবেল ইন্নোভেসন পার্তনরশিপ’ অমা লাউথোকখ্রে। নাকল অনিমক্না দিজিতেল অমসুং আই.সি.তি. প্রদক্তশিং য়াওনা অনৌবা অমসুং থোরক্লিবা তেক্নোলোজীশিংদা মতেং পীনবা হেনগৎহনবা অমসুং সপ্লাই চেন মপাঙ্গল কনখৎহন্নবা হোৎনবদা য়ান্নখি। মখোয়না মেরিতাইম, কাউন্তর-তেরোরিজম অমসুং সাইবরস্পেস দোমেনশিং য়াওনা ঙাকশেল অমসুং সেক্যুরিতীগী মরীশিং চেৎশিনহন্নবসু য়ান্নবা পুরকখি।
প্রধান মন্ত্রী অনিমক্না ইন্দো-পেসিফিক অমসুং জি৭দা মতেং পাংনবা য়াওনা নাকল অনিমক্তা কান্নগদবা রিজনেল অমসুং গ্লোবেলগী ওইবা সমস্যাশিংদা ৱাখল্লোন ফোঙদোক্নখি। মখোয়না অইং-অশাগীদমক পেরিস এগ্রীমেন্তগী পান্দমশিং ফংবা ঙম্নবা হোৎনগনি হায়না থাজবা পীনখিবা অদু নৌহৌনা নীংশিংনখি অমসুং চহি অসিগী অরোইবা শরুক্তা য়ু.কে.দা পাঙথোক্কদবা সি.ও.পি.২৬কীদমক পুন্না থবক তৌমিন্নবা হায়না য়ান্নখি।
লৈবাক অনিগী মরক্তা মহৈরোইশিং অমসুং প্রোফেস্নেলশিংগী মোবিলিতীদা চাউনা খুদোংচাবশিং পীগদবা মাইগ্রেসন অমসুং মোবিলিতীদা কম্প্রিহেন্সিব পার্তনরশিপ অমা লোঞ্চ তৌখ্রে।
প্রধান মন্ত্রীনা ফীভম অসি ফগৎলক্লবা মতুংদা প্রধান মন্ত্রী জোনসনগী খুদোংচাগদবগী মতুং ইন্না ভারত্তা লাকপদা তারম্না ওক্নিংবগী অপাম্বা ফোঙদোকখি। প্রধান মন্ত্রী জোনসন্না জি-৭ সম্মিৎকীদমক প্রধান মন্ত্রী মোদীনা য়ু.কে.দা লাক্নবা বর্তন তৌখিবা অদু নৌহৌনা নীংশিংখি।
