ভিদিও কনফরেন্সকী থোংদা প্রধান মন্ত্রীনা থগলক মেগাজিনগী ৫০শুবা কুমওন থৌরমদা শরুক য়াবা

প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী থোংদা চেন্নাইদা পাংথোকপা তমিল মেগাজিন থগলক্কী ৫০শুবা কুমওনদা শরুক য়াখ্রে।

মীয়াম তিনখিবা অদুদা ৱা ঙাংলদুনা প্রধান মন্ত্রীনা হৌখিবা চহী ৫০দা মেগাজিন অসিনা মওং তানা খুমাং চাউশিনখিবা অদু থাগৎপা ফোংদোকখি। অদুম ওইনমক মহাক্না মসিগী ফাউন্দর চো রামাস্বামিনা লৈখিদবদা নুংঙাইতবা ফোংদোকখি।
প্রধান মন্ত্রীনা হায়খি মদুদি মেগাজিন অসি থাংগৈ শেংবা, ইন্তেলিজেন্ত আর্গুমেন্তশিং অমসুং অরাল অহুই পুথোক্নবা করেম্নবাদা য়ুমফম ওইরি।

তমিল নাদুগী দাইনামিজম

তমিল নাদুগী দাইনামিজমদা ঙাংলদুনা প্রধান মন্ত্রীনা হায়খি মদুদি রাজ্য অসিনা চহী চা কয়াদগী জাতি অসিগীদমক লমজিং মৈরা ওইরি।

মহাক্না হায়খি, “তমিল নাদু অমসুং তমিল মীয়ামগী দাইনামিজম অসিনা ঐহাকপু অঙকপা ফাওহল্লি। তমিল নাদু অসি চহী চা কয়াদগী জাতি অসিগীদমক লমজিং মৈরা ওইরি। লমদম অসি মালেমগী খ্বাইদগী লীরবা লোনগী য়ুমনি। মমাং চহীগী সেপ্তেম্বরদা, য়ুনাইতেদ নেসন্সতা পীখিবা ঐহাক্কী ৱারোল মনুংদা তমিলদা ৱাহৈ পরেং খরা হায়বগী ইকায় খু্ম্নবা অদু ঐহাক্না ফংজখি।”

তমিল নাদুগীদমক দিফেন্স কোরিদোর

রাজ্য অসিগী দিবেলপমেন্তদা ঙাংলদুনা প্রধান মন্ত্রীনা হায়খি মদুদি কেন্দ্র সরকারনা তমিল নাদুদা দিফেন্স কোরিদোর অনিগী মনুংদা অমা লিংখৎপা অসিনচিংবা খোংথাং কয়া লৌখৎলি।

“হৌখিবা চহী খরগী মমাংদগী তমিল নাদুগী প্রোগ্রেসকীদমক মমাংদা ওইখিদ্রিবা মওংদা হোৎনরি। ঐখোয়না দিফেন্স কোরিদোর অনি লিংখৎনবা ৱারেপ লৌখিবা মতম অদুদা তমিল নাদু অসি মদুগী মনুংদা অমা ওইখি। কোরিদোর অসিনা রাজ্য অসিদা অহেনবা ইন্দস্ত্রী পুরক্লগনি অমদি তমিল নহাশিংগীদমক এম্প্লোইমেন্তকী খুদোংচাবশিং হেঙ্গৎহল্লগনি।”

তেক্সতাইলস অমসুং ফিসরিজ সেক্তরদা ইনোৎ পীবা

প্রধান মন্ত্রীনা হায়খি মদুদি রাজ্য অসিদা তেক্সতাইল সেক্তর মোদর্নাইজ তৌনবগীদমক অখন্নবা খোংথাং লৌখৎলি।
“তমিল নাদুগী প্রোগ্রেসতা তেক্সতাইল সেক্তরনা য়াম্না চাউবা থৌদাং অমা লৌরি। কেন্দ্র সরকারনা নাগরিকশিংবু মতেং পাংনবা সেক্তর অসি মোদর্নাইজ তৌরি। নেস্নেল হেন্দলুম দিবেলপমেন্ত প্রোগ্রামগী মখাদা শেলগী তেংবাং পীরি। মেগা হেন্দলুম ক্লস্তর অনি লিংখৎকদৌরে।”

শ্রী নরেন্দ্র মোদীনা হায়খি মদুদি সরকার অসিনা ফিসরিজ সেক্তরদা ইনোৎ পীনবগীদমক অখন্নবা খোংথাংশু লৌখৎলি।
ফিসরিজ অসি ঙসিদি খ্বাইদগী মতোল লোমখৎলক্লিবা সেক্তর অমা ওইরে। ঐখোয়না ফিসরিজ সেক্তরবু হেন্না মপাঙ্গল কনখৎহল্লি।

“ঐখোয়না তেক্নোলোজী, শেলগী তেংবাং অমসুং হ্যুমেন রিসোর্স দিবেলপমেন্তদা মীৎয়েং থম্লি। নুমীৎ খরনিগী মমাংদা তমিল নাদুদগী লাকপা ঙামীশিংদা দীপ সী ফিশিং বোতশিং অমসুং ত্রান্সপোন্দরশিং খুৎশিন্নখ্রে। ঐখোয়গী ঙামীশিং অসি কিসান ক্রিদিৎ কার্দকা লিঙ্ক তৌরে। ঙামীশিংগীদমক্তা অনৌবা ফিশিং হার্বরশিং শেমগৎলে। হিগী মোদর্নাইজেসনদসু মতেং পীরি।”
তুরিজমদা ইনোৎ

প্রধান মন্ত্রীনা মীপুম খুদিংমকপু মথংগী চহী অনিদা ভারত্তা লৈবা মফম ১৫দা চৎনবা তকশিনখি। মহাক্না হায়খি, সরকার অসিনা তুরিজম সেক্তরদা মীৎয়েং থম্লি মদুনা ভারতপু ৱার্ল্দ ইকোনোমিক ফোরমগী ত্রাবেল এন্দ তুরিজম কম্পিতিতিবনেস ইন্দেক্সতা ৩৪শুবা থাক্তা য়ৌহল্লে। চহী মঙাগী মমাং, ২০১৪দা এন.দি.এ. সরকারনা থবক পায়বা হৌরকপদা মসি ৬৫শুবা থাক্তা লৈরম্মি হায়না মহাক্না হায়খি।

মহাক্না হায়খি, “ঐহাক্না মসি সেয়র তৌবদা নুংঙাইবা ফাওই মদুদি হৌখিবা চহী মঙাদা ভারত্তা লাকপা মীরৈবাক্কী লমকোইবশিংগী মশিং য়াম্না হেঙ্গৎলে।”

“কেন্দ্র সরকারগী স্বদেশ দর্শন অমসুং প্রশাদ স্কিম্না মরম ওইদুনা তমিল নাদুনা চাউনা কান্নবা ফংলে খংবদা অদোম নুংঙাইবা ফাওগনি। চেন্নাইদগী কন্যকুমারী, কাঞ্চিপুরম, অমসুং ভেলানকালি ফাওবগী কোস্তেল সর্ক্যুইত অসি তুরিস্ত ফ্রেন্দলী হেন্না ওইহন্নবা শেমগৎলগনি।”

অনৌবা ভারত – অনৌবা চহী তরাগী খুজিং

প্রধান মন্ত্রীনা হায়খি, “হৌজিক ভারতনা অনৌবা চহী তরাগী খুজিং অমদা চংলকপা অসিদা ভারতপু চাউখৎহনগদবা অমসুং অনৌবা থাক্তা পুখৎকদৌরিবা অসি ভারতকী প্রজাশিংনি। ভারতকী প্রজাশিংনা করিগুম্বা খরা তৌগে খনখিবা মতমদা মখোয়বু থিংবীনবা শাফু অমত্তা লৈতে।”

মসিগী স্পিরিৎ অসি ইকায় খুম্ননবা অমসুং পুন্না চৎমিন্ননবা মহাক্না মীদিয়াদা তকশিনখি।

মহাক্না হায়খি, “সরকার নত্রগা মীদিয়া হাউসশিং ওইনা ঐখোয়না মসিগী স্পিরিৎ অসি ইকায় খুম্নগদবনি অমসুং পুন্না চৎমিন্নগদবনি। মসিদা মীদিয়াগী থৌদাংবুসু ঐহাক্না থাগৎচবা ফোংদোকচরি।”