প্রধান মন্ত্রী, শ্রী নরেন্দ্র মোদীনা ঙসি লোক সভাদা নো কনফিদেন্স মোসনগী পাউখুম পীখ্রে।
প্রধান মন্ত্রীনা হাউস্তা ৱা ঙাঙবদা, ভারতকী মীয়াম খুদিংনা সরকার অসিদা লেপ্পা লৈতনা উৎলিবা থাজবা অসিগীদমক্তা থাগৎচগে হায়দুনা মহাক লাক্লিবনি হায়খ্রে। মসিদি সরকারগী ফ্লোর তেস্ত নত্তে, মসিদি ইং 2018দা ওপোজিসন্না নো-কনফিদেন্স মোসন পুখৎলকখিবা মতমদা হাউস্তা হৌদোকখিবা মীওইশিংগী ফ্লোর তেস্তনি। “ঐখোয়না ইং 2019দা মীখল থেংনখিবা মতমদা, মীয়াম্না অকনবা খোল্লাওগা লোয়ননা মখোয়গী মাইয়োক্তা নো-কনফিদেন্স হায়না লাওখিবনি”, প্রধান মন্ত্রীনা NDA অমসুং BJP অনিমক্না সীত হেন্না ফংখি হায়না পল্লদুনা হায়খি। ওপোজিসন্না নো-কনফিদেন্স মোসন অমা পুখৎলক্লিবা অসিদি সরকারগী ওইনা মাইকৈ অমদা লাইবক ফবনি হায়না প্রধান মন্ত্রীনা হায়খি। NDA অমসুং BJPনা ইং 2024দা রেকোর্দ খুদিংমক থুগায়গনি অমসুং মীয়ামগী থৌজালগা লোয়ননা মায় পাক্কনি হায়বগী থাজবা লৈ হায়না মহাক্না ফোংদোকখি।
ওপোজিসন্না সেসন অসি হেক হৌবদগী থৱাই য়াওনা শরুক য়াবা ওইরম্লবদি হেন্না ফরমগদবনি হায়না প্রধান মন্ত্রীনা হায়খি। মমাংগী নুমিৎ খরদা মরু ওইবা আইন খরগী অয়াবা পীখি অদুগা আইনশিং অসিদগী রাজনীতি শান্নবনা হেন্না মরু ওই খনবা ওপোজিসন্না মসিগী মতাংদা খন্নরম্বা য়াবনি হায়না মহাক্না মখা তাখি। “ঙামী, দেতা, লাইরবা, শোত্থরবা অমসুং ত্রাইবেলগা মরী লৈনবা বিল কয়া অমা লৈ, অদুবু ওপোজিসন্না মখোয়শিং অসিদা থৱাই অমত্তা চঙদে। মসিদি মীয়ামগী থাজবগী মাইয়োক্তা চৎপনি। পার্তীনা লৈবাক্তগী হেল্লি হায়না মখোয়না খুদম ওইনা তাকচরে”, মহাক্না হায়খি। লৈবাক অসিনা ওপোজিসন্দা মিৎয়েং থম্লি, অদুবু মখোয়না মতম পুম্বদা মীয়ামগী থাজবা মাঙহল্লি হায়না প্রধান মন্ত্রীনা হায়খি।
লৈবাক অমগী পুন্সিদা অরিবা অয়েৎপা কয়াদগী নান্থোক্তুনা অনৌবা শক্তিগা লোয়ননা তুংলমচত্তা চঙশিনবগী মতম অমা লাকই হায়না প্রধান মন্ত্রীনা হায়খি। “21শুবা চহি-চাগী হৌজিক্কী মতমসিদি ঐখোয়গী অপাম্বা খুদিংমক মঙফাওনবগী মতম্নি। মতমসিদা শেমখিবা থৌওং খুদিংনা মথংগী চহি লিশিং অমগী চৈথেং ওইগদৌরিবনি। মরম অদুনা, ঐখোয়গী অচৌবা থৌদাং লৈরি অমসুং ঐখোয়না লৈবাক চাউখৎপগীদমক্তা অমত্তা ঙাইবা মিৎয়েং থমগদবনি অমসুং লৈবাক মীয়ামগী মঙলান মঙফাওনহন্নবগীদমক্তা মপুং ফানা কত্থোক্কদবনি”, মহাক্না মখা তাখি। ঐখোয়গী মীয়াম অমসুং নহাশিংগী পাঙ্গলনা ঐখোয়গী পন্থুংফমদা য়ৌহনগনি হায়না মহাক্না হায়খি।
হান্নগী ত্রেক রেকোর্দকী মরমদগী ইং 2014 অমসুং মতুং তারকপদা, লৈবাক অসিনা মপুং ফানা মেজোরিতী ওইবা সরকার অমা খনখি, মসিদি মখোয়গী মঙলান ফংবা ঙমগনি হায়বগী মখোয়দা থাজবা লৈবগীনি হায়না প্রধান মন্ত্রীনা হায়খি। “ঐখোয়না ভারতকী নহাশিংদা ৱাথোক লৈতবা সরকার অমা পীরবনি। অহাঙবা অতিয়াদা মকা ফংনা পাইবা ঙম্বগী খুদোংচাবা অমা ঐখোয়না মখোয়দা পীরবনি। মালেমদা লৈবা ভারতকী থাকপু ঐখোয়না চুম্থোক্লবনি অমসুং অনৌবা অৱাংবা থাক্তা থম্লবনি”, মহাক্না হায়খি। “ওপোজিসন্না নো কনফিদেন্স মোসনগী মওংদা মীয়ামগী থাজবা থুগায়নবা মায়থীরবা থৌওং অমা পাংথোক্লে”, মহাক্না হায়খি। স্তার্তঅপ ইকোসীস্তেমদা শাহৌ লৈবা, রেকোর্দ ওইরবা ফোরেন ইনভেস্তমেন্ত অমসুং এক্সপোর্তকী অনৌবা থাক্কী মতাংদা শ্রী মোদীনা পল্লদুনা হায়খি, “ঙসিদি, লাইরবশিংগী থম্মোইদা মশাগী মঙলান মঙফাওনরগনি হায়বগী থাজবা লৈরে”। মহাক্না মীওই করোর 13.5না লাইরবগী খয়াত্তগী থোক্লক্লে তাকপা নিতি আয়োগকী রিপোর্তকী মতাংদসু পনখি।
প্রধান মন্ত্রীনা ভারতনা খম থেংনা লাইরবগী মতৌবু মুত্থৎলে হায়না পনবা IMFকী ৱর্কিং পেপরগী মতাংদা পনখি। IMFকী ৱাফম পল্লদুনা, প্রধান মন্ত্রীনা ভারতকী DBT স্কিম অমসুং সোসিএল ৱেলফিয়রগী অতোপ্পা স্কিমশিং অসিদি ‘লোজিস্তিকেল মার্ভেল’ অমনি হায়খি। জল জীবন মিসন্না লৈবাক্কী মীওই লাক্ষ 4 অমসুং স্বচ্ছ ভারত অভিয়ান্না মীওই লাক্ষ 3গী পুন্সি কনবদা তেংবাংখি হায়বা WHOগী রিপোর্ত অমসু মহাক্না পনখি। “মখোয়শিং অসিদি অর্বান স্লমদা লৈবা লৈবাক্কী লাইরবশিংনি”, মহাক্না মখা তাখি। প্রধান মন্ত্রীনা UNICEFকী ৱাফম পল্লদুনা, স্কিম অসিনা লাইরবা ইমুংশিংদা চহিদা লুপা 50,000 কনবদা তেংবাংলি হায়খি।
ওপোজিসনগী ওস্ত্রিচকী মতৌ চেনবা থৌওংবু য়ানীংদবা ফোংদোক্লদুনা, প্রধান মন্ত্রীনা ওপোজিসনশিংনা থাজদবা য়াম্না হেনমনবনা মীয়ামগী মসিগুম্বা থাজবা অসি উবা ঙমদ্রে হায়খি। ওপোজিসনগী অথীবা ৱাহৈ অমসুং লেপ্তনা হুনবগী থৌওংশিং অসিদি ‘কালা তিকা’ (ফত্তবা ঙাকথোক্নবা) অদুগুম্না মথৌ তৌই হায়না মহাক্না হায়খি।
ওপোজিসন্না মমায় থীহনগে পান্দম থম্লিবা ইন্সতিত্যুসন খুদিংনা মায় পাকপা ওই হায়না প্রধান মন্ত্রীনা পল্লদুনা মসিবু “ওপোজিসনগী অরোৎপা থৌজাল” হায়না কৌখি। “মখোয়না ফত্তবা ওইসনু খনবা খুদিংনা, মমৈথংদা মায় পাকপা লোয়না ওই”, মহাক্না হায়খি।
বেঙ্কিং সেক্তরনা চাউখৎলকপদা ওপোজিসন্না লৈবা ৱাখল্লোনবু প্রধান মন্ত্রীনা নীংশিংলদুনা, মখোয়না অরানবা পাউ শন্দোক্নবা অমসুং মীয়াম্বু চমম্নহন্নবা কন্না হোৎনখিবনি হায়খি। অদুবু, পব্লিক সেক্তরগী অপুনবা শেন্দোংনা শরুক অনি থোক্না হেনগৎখি হায়না প্রধান মন্ত্রীনা মরম থত্তুনা হায়খি। লৈবাকপু NPA ক্রাইসিস অমগী মাইকৈদা পুখিবা ফোন বেঙ্কিংগী ৱাথোক্কী মতাংদসু প্রধান মন্ত্রীনা পনখি অমসুং লৈবাক্না মসিদগী থোক্লক্লে, তুংলমচত্তা খোঙদারী হায়না মখা তাখি। ওপোজিসন্না য়াম্না কন্না য়েংশিনখিবা HALগী খুদমসু প্রধান মন্ত্রীনা পীখি। HALনা হৌজিক্তি অৱাংবা থাক্তা মায় পাক্লে অমসুং খ্বাইদগী ৱাংবা রেভেন্যুসু ফংখ্রে হায়না মহাক্না হায়খি। LICগী মতাংদা ওপোজিসন্না ঙাঙখিবা ফত্তবা ৱাফম কয়া নীংশিংলদুনা, প্রধান মন্ত্রীনা LICনা নোংম-নোংমগী চাউখৎপা হেনগৎলক্লি হায়খি।
প্রধান মন্ত্রীনা মহাক্কী অহুমশুবা তর্মদা মালেমগী খ্বাইদগী অহুমশুবা শেন্মিৎলোন ওইরগনি হায়না নুমিৎ খরনিগী মমাংদা হায়খিববু নৌহৌননা নীংশিংলদুনা “ওপোজিসন্না লৈবাক্কী তৌবা ঙম্বগী মতিক্তা থাজবা থমদে” হায়না প্রধান মন্ত্রীনা হায়খি। থৌদাং খঙবা ওপোজিসন অমা ওইনা, পান্দম অসি ফংনবগীদমক্তা য়াৎলিবা থৌরাংগী মতাংদা ওপোজিসন্না ৱাহং হংবা য়াবনি নত্ত্রগা মদুমক তৌদ্রবসু, পাউতাক খরদি পীবা য়াবনি হায়না প্রধান মন্ত্রীনা ফোংদোকখি। মালেমগী খ্বাইদগী অহুমশুবা চাউবা শেন্মিৎলোন ওইনবা করিসু তৌবগী মথৌ তাদে হায়বা ঙম্বা ওপোজিসনগী থৌৱা শাদবগী মতৌবু প্রধান মন্ত্রীনা য়ানিংদবা উৎখি। ওপোজিসনগী মসিগুম্বা মতৌনা মখোয়গী পান্দম লৈতবা, করিগুম্বা অমা পাংথোক্কে হায়বগী ইথিল লৈতবা, মালেমগী শেন্মিৎলোনগী মতাংদা খঙদবা অমসুং ভারতকী মতিক খঙবা ঙমদবগী মতৌ ময়েক শেংনা তাক্লে হায়না মহাক্না মখা তাখি।
ভারতনা ইং 1991দা লাইরবগী খয়াত্তা মতৌ করম্না তাখিবা অমসুং বেংক্রপ ওইগে খিত্তং ঙাইবগী মতাংদা প্রধান মন্ত্রীনা মিৎয়েং চঙখি। অদুবু, ইং 2014গী মতুংদা, ভারতনা মালেমগী মকোক থোংবা শেন্মিৎলোন মঙাগী মনুং চনবা ঙমখি। মসিদি ‘রিফোর্ম, পরফোর্ম অমসুং ত্রান্সফোর্ম’গী মন্ত্রগা লোয়ননা নীংথিনা থৌরাং য়াৎপা অমসুং হোৎনবা কনবদগী ওইথোকপনি হায়না মহাক্না হায়খি। থৌওং অসিমক মখা চত্থখিগনি অমসুং তঙাই ফদবা রিফোর্মসু পাংথোকখিগনি হায়না মহাক্না মখা তাখি। “ইং 2028তা অদোম্না নো কনফিদেন্স মোসন পুখৎলকপা মতমদদি, লৈবাক অসিনা মকোক থোংবা 3গী মনুংদা লৈরগনি”, মহাক্না হায়খি।
প্রধান মন্ত্রীনা ওপোজিসনগী থাজবা ৱাৎপা থৌওংগী মতাংদা মখা তারদুনা, মখোয়না স্বচ্ছ ভারত, জন ধন একাউন্ত, য়োগ, আয়ুর্বেদ, স্তার্তঅপ ইন্দিয়া, দিজিতেল ইন্দিয়া অমসুং মেক ইন ইন্দিয়াগুম্বা কেম্পেন্দা থাজদবগী মতাংদসু পাউদমখি।
কংগ্রেসকী লৈঙাক মনুংদা কশ্মীরদা লালহৌবশিং চঙলকখিবা অমসুং মতমদুগী সরকারনা পাকিস্তানগী ৱাফম য়াদুনা শান্তিগী ৱারী লেপ্তনা শান্নখিবগী মতাংদসু প্রধান মন্ত্রীনা পনখি। কশ্মীর মীয়ামগা মরী লৈনবগী মহুত্তা মখোয়না হুরিয়াৎকা মরী লৈনখিবগী ৱাফম অদুসু মহাক্না পনবদা য়াওখি। সর্জিকেল স্ত্রাইক্কী মতাংদা ৱাফম থম্লদুনা, হীরম অসিগী মতাংদা ওপোজিসন্না লৈবাক্কী সরকারদা থাজবগী মহুত্তা য়েক্নবনা থম্বা ৱাফমদা মতৌ করম্না থাজখিবগে হায়বগী মতাংদসু প্রধান মন্ত্রীনা পাউদমখি।
“লৈবাক্কী ফত্তবা ঙাংবশিংদা ওপোজিসন্না য়াম্না থুনা থাজবা থমগল্লি”, প্রধান মন্ত্রীনা হায়খি অমসুং ফোরেন এজেন্সী অমনা ফুদ সেক্যুরিতীগী হীরমদা অৱাবা মাইয়োক্নরিবা লৈবাক অমবু অখন্নবা পেরামীতর খরগী মতাংদা ভারত্তগী হেন্না ৱাংনা থম্বা অরানবা পাউদম অমগী মতাংদা পনখি। ওপোজিসন্না মসিগুম্বা অরানবা পাউদা য়াম্না থাজগল্লি অমসুং খুদোংচাবা হেক ফংবগা লৈবাক্কী মিংচৎ থীহন্নবা হোৎনৈ হায়না মহাক্না হায়খি। মহাক্না ভারত্তা শাবা কোরোনাগী ভেক্সিনগী খুদম পীরদুনা, ওপোজিসন্না মসিদা থাজবা থমদে, মদুগী মহুত্তা মীরমদা শাবা ভেক্সিন্দা ওইনা মিৎয়েং চঙখিবগী থৌওংগী খুদম পীখি। ওপোজিসন্না ভারত অমসুং ভারতকী মীয়ামগী তৌবা ঙম্বগী মতিক্তা থাজবা লৈতবা মতৌ অসিগা মান্ননা, লৈবাক মীয়াম্নসু মখোয়গী মফমদা থাজবা য়াম্না নেম্মি হায়না মহাক্না মিৎয়েং চঙখি।
মপান্থোংদা চুংশিন্নবা শাবগী মতৌনা লৈবাক মীয়াম্বু নম্থাক তৌবা খক ওইথোক্লোই হায়না প্রধান মন্ত্রীনা হায়রদুনা মিং অমখক হোংদোকপা খক্তনা ওপোজিসনগী চুংশিন্নবা অসিগী মরাইবক হোংদোকপা য়াবা নত্তে হায়না মখা তাখি। “মখোয়না হিংনবা NDAগী মতেং লৌখি, অদুবু ‘I’ অনি হাপচিনখি। অহানবনা, পার্তী 26কী ইগোগী, অমসুং অনিশুবা ‘I’ অমনা, ইমুং অমগী ইগোগী। মখোয়না Indiaবু I.N.D.I.A. হায়না মচোয় তাহল্লে”, মহাক্না হায়খি। “ওপোজিসন্না মিং হোংদোকপদদি থাজবা থম্মি, অদুবু মখোয়না মশাগী থবক অমসুং চৎনবীদি হোংদোকপা ঙমদ্রি”, মহাক্না মখা তাখি। তমিল নাদু সরকারগী মন্ত্রী অমগী তোখায়বা ৱাখল্লোন চেনবা কম্মেন্ত অমগী মতাংদা হায়রদুনা, প্রধান মন্ত্রীনা রাজ্যসিদা থম্লিবা থাজববু অমুক হন্না নীংশিংখি অমসুং রাজ্যসিদি লৈবাক নিংবগী ইথিল লেপ্তনা চেনবা রাজ্যনি হায়খি। ওপোজিসনগী মিংগী মতাংদা থৱাই য়াওরিবা অসিদা মিৎয়েং চঙলদুনা, স্কিম অমসুং মরু ওইবা মার্কর খুদিংগী মিংবু ইমুং অমগী মীওইগী মিংদা থোনবগী মতাংদা মহাক্না ৱাফম থমখি। প্রধান মন্ত্রীনা I.N.D.I.A.বু ‘ঘমন্দিয়া’ কোলিএসন (মী উইশিত্তবা কোলিএসন) কৌখি অমসুং পার্ত্নরশিংগী মরক্তা পুকচেল মান্নদবা লৈরিবা অসিদা মিৎয়েং চঙখি।
লৈবাক্কী নিংতম লানমী অমসুং হৌদোক্লম্বা ইপা-ইপুশিংনা শাগৈগী রাজনীতিগী মাইয়োক্তা মতম পুম্বদা লৈখিবনি হায়না প্রধান মন্ত্রীনা ফোংদোকখি। শাগৈ নাতৈগী পথাপ্না মীয়ামদা অকায়বা শাগৈ নাতৈগী রাজনীতিনা মরম ওইরগা মরু ওইবা লুচিংবশিংনা অৱাবা মাইয়োক্নৈ, মহাক্না হায়খি। মসিগুম্বা থৌওংগী অৱাবা নংখিবা শক্নাইরবা মীওইশিংগী ফোতোশিং অসি কংগ্রেসনা পান্দবা মতমগী মতুংদতা পার্লিয়ামেন্ততা থেৎলকই হায়না মহাক্না হায়খি। মহাক্না স্তেচ্যু ওফ য়ুনিতী অমসুং প্রধানমন্ত্রী সংগ্রালয়গী মতাংদসু পনখি। ম্যুজিয়ম অসিদি প্রধান মন্ত্রী খুদিংগী মফমদা ইকায় খুম্নবনি অমসুং পার্তী পোলিতিক্সকী মথক্তগী লৈবনি।
ভারত মীয়াম্না চহি 30গী মতুংদা মপুং ওইনা মেজোরিতী ওইবা সরকার অনিরক খনখ্রবসু, ওপোজিসনশিংদি প্রধান মন্ত্রীগী চৌক্রিদা ফম্লিবা ’লাইরবগী মচানুপা’ অসিগী মফমদা হৈনদবা ফাওরি হায়না প্রধান মন্ত্রীনা হায়খি। ওপোজিসনশিংনা মমাংগী মতমদা এয়রক্রাফ অমসুং নেভেল ভেসেল লান্না শিজিন্নখিবশিং অদু হৌজিক্তি ভেক্সিন পুথোক পুশিন তৌনবা অমসুং মীরমদা পন্দুনা লৈরবা লৈবাক মীয়াম পুরক্নবা চুম্থোক্লে হায়বা ৱাফমদা মহাক্না মীয়ামগী পুক্নিং চীংশিনখি।
অরেম-অচারমগী রাজনীতিগী মাইয়োক্তা প্রধান মন্ত্রীনা চেকশিনৱা থমখি অমসুং য়ুম্লোন্নবা লৈবাকশিংনা থেংনরিবা তংদু লৈতাদবগী মতৌবু মসিগুম্বা রাজনীতিনা পুরকপা ফিভমগী খুদম ওইনা পীখি। মীয়ামদা লান্নবা থাজবা পীদুনা মীখল মায় পাকপা পাম্বগী মতৌবু মহানা নুংনাংবা ফোংদোক্লদুনা চাউখৎ থৌরাংগী প্রোজেক্তশিং পন্দুনা লৈখিবা মতমদা মীয়াম্না থেংনবা অৱাবা কয়াগী মতাংদা মহাক্না ফোংদোকখি।
ওপোজিসন্না মনিপুরগী ফিভমগী মতাংদা কৈদৌনুংদা খন্নবা পামখিদে হায়না প্রধান মন্ত্রীনা হায়খি। কেন্দ্রগী গৃহ মন্ত্রীনা অখাঙবা কনবগী মতৌগা লোয়ননা অমসুং রাজনীতি অমত্তা তৌদনা ফিভম অসিবু মনুং হুৎনা তাকখ্রে হায়না মহাক্না হায়খি। গৃহ মন্ত্রীনা শন্দোক্না তাকখ্রিবা অদুদি লৈবাক্না থৱাই চঙলিবা অসিবু উৎনবা হোৎনবগী থৌওংনি, মসিদি হাউসনা মনিপুরদা থাজবা থম্মি হায়বা উৎনবা হোৎনবা থৌওংনি। মসিদি পুকচেল শেংনা খন্ন-নৈনদুনা ৱারোইশিন পুরক্নবা হোৎনবগী থৌওংনি।
প্রধান মন্ত্রীনা মনিপুরগী মতাংদা পল্লদুনা, মনিপুরদা থোক্লিবা মীশি মীনা অসি থম্মোই শোকই হায়খি। “নুপীগী মাইয়োক্তা ক্রাইম তৌবা হায়বসি য়াবা ঙম্লোই অমসুং কেন্দ্র অমদি রাজ্য সরকারনা মরাল লৈবশিংবু শোইদনা চৈরাক পীগনি। ঐখোয়না হৌজিক হোৎনরিবা কয়া অসিনা মরম ওইরগা লাক্কদৌরিবা মতমশিংদা মনিপুরদা শান্তি অমুক্কা হন্না লৈরক্কনি হায়বগী ঐহাক্না থাজবা পীরি”, প্রধান মন্ত্রীনা হায়খি। মনিপুরগী মীয়াম, ইমা অমসুং ইচানুপীশিংগী মফমদা লৈবাক্না মখোয়গীদমক্তা লেপ্লি অমসুং হাউসনা মখোয়গীদমক্তা লেপ্লি হায়বগী মহাক্না থাজবা পীখি। মনিপুরনা চাউখৎ থৌরাংগী লম্বীদা অমুক হন্না লাকহন্নবা সরকারনা থবক অমত্তা চিত্থদনা পাংথোক্কনি হায়বগী থাজবসু মহাক্না পীখি।
হাউসতা ইমা ভারতীগী মতাংদা পামদবা লোন্দা শিজিন্নববু প্রধান মন্ত্রীনা য়াম্না অহকপা মওংদা য়ানিংদবা উৎখি অমসুং মসিগুম্বা মীওই অসিনা পার্তিসন থোকহনবনি অমসুং মখোয়না বন্দে মাতরম ফাওববু থওই উইশিত্তে হায়না মহাক্না মখা তাখি। শ্রী মোদীনা কচ্চাথীবু হীরম্বু ওপোজিসন্না মায়থীবগী খুদম ওইনা পীখি।
প্রধান মন্ত্রীনা অৱাং নোংপোক্কা মরী লৈনবা থৌদোক অহুমগী মতাংদা পনখি। অহানবা, মার্চ 5, 1966, মসিদা মিজোরমদা মীয়ামদা লান্দানবা এয়রফর্স শিজিন্নখি। অনিশুবা, চাইনানা লান্দারকপা মতমদা, অৱাং নোংপোক্কী মীয়াম্বু মশানা মশা ঙাকথোকচরো হায়না থাদোকখিবগী ইং 1962দা প্রধান মন্ত্রী নেহরুনা রেদিওদা ৱাফম থমখিবা। লমদম অসিদা মিৎয়েং চঙদে হায়না রাম মনোহর লোহিয়ানা থমখিবা ৱাফমসু মহাক্না পনখি। হৌজিক্কী সরকারগী মতমদা, মন্ত্রীশিংনা অৱাং নোংপোক্কী তোঙান-তোঙানবা হেদক্বারতরশিংদা অহিং 400 লেকখি অমসুং মহাক মশামকসু লমদমসিদা 50রক চৎলে হায়না প্রধান মন্ত্রীনা পাউদমখি। “অৱাং নোংপোক লমদমগা ঐহাক্কা থম্মোইগী মরী লৈনৈ। পি.এম. ওইদ্রিঙৈগী মমাংদসু, ঐহাক্না লমদমসিদা চৎলুরে”, শ্রী মোদীনা হায়খি।
মনিপুরগী ইরাং অসি হন্দক্তা হৌরকপগী মওংদা উৎলি অদুবু মসিগী মপুং ওইবা মরমদি কংগ্রেস অমসুং মখোয়গী রাজনীতিনি হায়না প্রধান মন্ত্রীনা হায়খি। “মনিপুর অসি ভারতকী নীংথিরবা নাৎ অমসুং চৎনবীনা থল্লি। মনিপুর অসি মশিং থীঙমদ্রবা কত্থোকপগী লমদম্নি”, মহাক্না হায়খি। কংগ্রেসনা রাজ্যসিদা পাল্লিঙৈ মতমদা রাজ্যসিগী ইন্সতিত্যুসন খুদিংমক লালহৌবগী মখা পোন্না চৎলম্বা অমসুং সরকারগী ওফিসশিংদা মহাত্মা গান্ধীগী ফোতো থেৎপদা অথিংবা থম্লবগী মতম মহাক্না নীংশিংখি। মোইরাংদা লৈবা আজাদ হিন্দ ফাউজ ম্যুজিয়মগী নেতাজী সুভাস চন্দ্র বোসকী মীতমদা বোম্ব লংশিনবগী থৌদোকপুসু মহাক্না নীংশিংখি। মনিপুরগী স্কুলশিংদা নেস্নেল এন্থেম শকপা থিংবা অমসুং লাইব্রেরীশিংদগী লাইরিক কয়া মৈ থাবগী কেম্পেন অমা হৌদোকখিবগী মতাংদসু মহাক্না নীংশিংখি। কংগ্রেসকী মতমদা রাজ্যসিদা চত্থখিবা লালহৌবগী থৌওংগী খুদম কয়া মহাক্না পীরদুনা মন্দিরশিংনা নুমিদাং ৱাইরমগী পুং 4 তাবগা থোং লোনবা, ইস্কোন লাইশঙদা বোম্ব লংশিনবদা মীওই কয়াগী পুন্সি মাঙখিবা অমসুং সরকারগী ওফিসরশিংনা লালহৌবগী মফমদা ঙাক শেনবগী শেল পীবগী থৌদোকশিংগী খুদমসু পীখি।
প্রধান মন্ত্রীনা হৌজিক লাক্কদৌরিবা মতমশিংদা অৱাং নোংপোক্না চাউখৎ থৌরাংগী ময়োল ওইরক্কনি হায়না পাউদমখি। মালেমগী পথাপশিংদা ইহৌ লাকপনা খা নোংপোক এসিয়া অমসুং ASEAN লৈবাকশিংদা অওনবা পুরক্কনি অমসুং মসিনা অৱাং নোংপোক লমদমদা করম্বা শাফু পীগনি হায়বা মহাক খঙই হায়না ফোংদোকখি। প্রধান মন্ত্রীনা হায়খি, “মরম অদুনা, ঐখোয়গী সরকারনা অৱাং নোংপোক্কী চাউখৎ থৌরাংদা অহানবা মিৎয়েং থম্লিবনি”। শ্রী মোদীনা অৱাং নোংপোক্কী ইনফ্রাস্ত্রকচরদা ইনভেস্তমেন্ত তৌবগী মতাংদা ৱাফম থমখি অমসুং মোদর্ন হাইৱে, রেলৱে, অমসুং এয়রপোর্তনা অৱাং নোংপোক্কী শক্তাক ওইরে হায়না ফোংদোকখি। “অগরতালাদা অহানবা ওইনা রেলগা শম্নরে, পোৎলম পুবা ত্রেন্না মনিপুরদা অহানবা ওইনা য়ৌখ্রে, বন্দে ভারতকুম্বা মোদর্ন ত্রেন লমদমসিদা অহানবা ওইনা চেনবা হৌরে, অরুনাচল প্রদেশতা খ্বাইদগী অহানবা গ্রীনফিল্দ এয়রপোর্ত শাখ্রে, সিক্কিমদা এয়র ত্রাভেল লৈরে, অৱাং নোংপোক্তা অহানবা ওইনা এমস হাংদোক্লে, মনিপুরদা নেস্নেল স্পোর্ত য়ুনিভর্সিতী হাংলে, মিজোরমদা ইন্দিয়ন ইন্সতিত্যুত ওফ মাস কম্ম্যুনিকেসন অহানবা ওইনা হাংলে, কাউন্সিল ওফ মিনিস্তরদা অৱাং নোংপোক্না শরুক য়াবগী চাং হেনগৎলে, অদুগা খ্বাইদগী অহানবা ওইনা, নুপী অমনা রাজ্য সভাদা নাগালেন্দগী মীহুৎ ওইরে। অৱাং নোংপোক্কী মশিং য়াম্লবা মীওই কয়াবু খ্বাইদগী অহানবা ওইনা পদ্ম এৱার্দ পীদুনা ইকায় খুম্নখ্রে অমসুং লচিত বোর্ফুকানগুম্বা হেরোবু গনতন্ত্র দিবস নুমিত্তা ইকায় খুম্নদুনা মহাক্কীদমক্তা হরাওবা ফোংদোক্লে অমসুং রানি গাইদিনল্যুগী মিংদা ম্যুজিয়ম অমসু শাখ্রে”, মহাক্না হায়খি।
“ঐখোয়গীদি, সবকা সাথ সবকা বিকাস অসি শুপ্নগী খোল্লাও অমা নত্তে, মসিদি থাজবা অমসুং খোঙফম চেৎপগী ৱাফম অমনি”, প্রধান মন্ত্রীনা হায়খি অমসুং “ঐহাক্না ইশাগী হকচাংগী পোৎলম খুদিংমক লৈবাক সেবাগীদমক্তা কত্থোক্কনি হায়না ঐহাক্না লৈবাক মীয়ামগী মফমদা থাজবা পীজরি” হায়না মখা তাখি।
প্রধান মন্ত্রীনা অসুম্না মিৎয়েংসু চঙখি, “পার্লিয়ামেন্ত অসি পার্তী অমগী ফম্বাক নত্তে। মসিদি লৈবাক্কী খ্বাইদগী ইকায় খুম্ননীংঙাই ওইবা বোদীনি। মরম অদুনা, পার্লিয়ামেন্তকী মীপুম খুদিংনা মসিগীদমক্তা অখন্নবা থৱাই য়াওফম থোকই। রিসোর্স কয়া অমা মফমসিদা থাদরি। মফমসিগী সেকেন্দ খুদিংমক লৈবাক্কীদমক্তা শিজিন্নগদবনি”। থৱাই য়াওবগী মতৌ লৈত্রগসু, রাজনীতি তৌবদি য়াগনি, অদুবু লৈবাক চলায়বদি ওইথোক্লোই হায়না মহাক্না হায়খি।
মমাংগী চহি 9দা, মীচম মীয়ামগী থাজবা অসি য়াম্না হেনগৎলক্লি অমসুং ভারত মচা খুদিংনা থাজবনা থল্লে হায়না প্রধান মন্ত্রীনা হায়খি। “ঙসিগী ভারতনা প্রেসরগী মমাংদা কিন্থদে। ঙসিগী ভারত্তি নাথৈদুনা চত্তে, ৱাবা নাইদে, লেপ্পা নাইদে”, শ্রী মোদীনা হায়খি। মীয়াম্না থাজবা অমসুং ৱারেপ অমগা লোয়ননা তুংলমচত্তা খোঙদাবীয়ু অমসুং মীচম মীয়ামগী থাজবা লৈবা অসিনা মালেম্না ভারত্তা থাজবা থম্লিবনি হায়না মহাক্না হায়খি। মালেম্না ভারত্তা থাজবা হেনগৎলক্লিবা অসিসু মীচম মীয়াম্না মশাদা থাজবা লৈবদগীনি হায়না মহাক্না পাউদমখি।
মমাংগী চহি খরসিদা, সরকার অসিনা চাউখৎপা ভারত অমগী মপাঙ্গল কনবা ফম্বাক শেম্বদা মায় পাকখ্রে হায়না প্রধান মন্ত্রীনা হায়খি। ফম্বাক অসিনা ভারতপু ইং 2047 ফাওবদা চাউখৎপা লৈবাক অমা ওইহনগদৌরিবনি হায়না মহাক্না হায়খি। লৈবাক অসিনা লুরবা ফিভম কয়াদগী অমত্তা ওইনা মায় পাক্না থোক্লকখ্রে হায়না ফোংদোক্লদুনা, মহাক্না রাজনীতি দলশিংনা মনিপুরবু রাজনীতি তৌনবা হীরম অমা ওইনা শিজিন্নবীগনি হায়না ফোংদোকখি। “ঐখোয়না অৱা অনা কয়াবু খঙগদবনি অমসুং হান্নগী ফিভমদা হঞ্জিল্লক্নবা পুন্না হোৎনমিন্নগদবনি। তুংলমচৎকী লম্বী হায়বদু মসিনি”, প্রধান মন্ত্রীনা হায়খি।
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
— PMO India (@PMOIndia) August 10, 2023
