প্রধান মন্ত্রী, শ্রী নরেন্দ্র মোদীনা ঙসি ইন্তর্নেস্নেল ইনর্জী এজেন্সীগী মন্ত্রীশিংগী মীফমদা ৱা ঙাঙখ্রে।
প্রধান মন্ত্রীনা মীফম অসিদা ৱা ঙাঙবদা, ইন্তর্নেস্নেল ইনর্জী এজেন্সীনা চহি 50 মপুং ফারকপগীদমক্তা থাগৎপা ফোংদোকখিবগা লোয়ননা মীফম অসিবু লুচিংমিন্নবগীদমক্তা আইরলেন্দ অমসুং ফ্রান্সকী মফমদা তৌবীমল খঙবসু উৎখ্রে।
লেপ্তবা শাহৌ লৌবগী হীরমদা ইনর্জী সেক্যুরিতী অমসুং সস্তেনেবিলিতীগী তঙাই ফদবা লৈরিবা অসিদা মিৎয়েং চঙলদুনা, প্রধান মন্ত্রীনা ভারতনা 11শুবা খ্বাইদগী চাউবা শেন্মিৎলোন ওইরম্বদগী দিকেদ অমগী মনুংদা 5শুবা খ্বাইদগী চাউবা শেন্মিৎলোন ওইদুনা মালেমগী খ্বাইদগী খোঙজেল য়াঙনা শাহৌ লৌবা অচৌবা শেন্মিৎলোন অমা মতৌ করম্না ওইখিবগে হায়বগী মতাংদা পাউদমখি। চপ মান্নবা মতমসিগী মনুংদা ভারতকী সোলর ইনর্জী কেপাসিতীনা শরুক কুনতরুক্কী শাহৌ লৌখিবগা লোয়ননা লৈবাক্কী রিন্যুএবল ইনর্জী কেপাসিতী শরুক অনি হেনগৎহনখিবগী মতাংদা মহাক্না পাউদমখি। “ঐখোয়না হীরম অসিদা পেরিস কম্মিতমেন্তপু লেপ্নখিবা মতমগী মমাঙদা হেনবা ঙমখি”, পি.এম.না মখা তাখি।
ভারতনা ইনর্জী ফংহনবগী মালেমগী খ্বাইদগী চাউবা খোঙথাং কয়া চলায়বগা লোয়ননা মালেমগী অপুনবা মীশিংগী 17% লৈ হায়না পল্লদুনা, প্রধান মন্ত্রীনা ভারতকী কার্বন ইমিসনগী চাংনা মালেমগী অপুনবগী শুপ্নগী 4% ওই হায়খি। লৈবাক অসিনা কল্লেক্তিব অমসুং প্রোএক্তিব এপ্রোচ চৎনহন্দুনা ক্লাইমেত চেঞ্জকী মাইয়োক্তা লান্থেংননবা খোঙফম চেৎলিবা অসিবুসু মহাক্না অমুক্কা হন্না নীংশিংখি। “ভারতনা ইন্তর্নেস্নেল সোলর এল্লাইএন্সকুম্বা খোঙথাং কয়া হান্নদগী লুচিংলি। ঐখোয়গী মিসন লাইফনা কল্লেক্তিব ইম্পেক্ত অমগীদমক্তা প্রো-প্লানেত লাইফস্তাইল চোইস্তা মিৎয়েং চঙলি। ‘রিদ্যুস, রিয়ুজ অমসুং রিসাইকল’ অসিনা ঐখোয়গী নাৎকী ওইবা পুন্সি মহিংগী শরুক অমা ওইরি”, প্রধান মন্ত্রীনা হায়খি। ভারতকী G20 প্রসিদেন্সী মনুংদা গ্লোবেল বাইওফুএল এল্লাইএন্স হৌদোকখিবগী মতাংদা পল্লদুনা, প্রধান মন্ত্রী মোদীনা IEAবু খোঙথাং অসিবু শৌগৎপগীদমক্তা থাগৎপা ফোংদোকখি।
ইন্সতিত্যুসন অমা হেক্তগী ক্রেদিবিলিতী অমসুং কেপেবিলিতী হেনগৎহনবা ইনক্লুসিবিতীগী থৌওংদা মিৎয়েং চঙলদুনা, প্রধান মন্ত্রীনা পুম্নমক্কী মফমদা তেলেন্ত, তেক্নোলোজী অমসুং ইন্নোভেসন পুরকপা ঙম্বা ভারতকী মীওই বিলিয়ন 1.4গী মতাংদা পনখি। “ঐখোয়না মিসন খুদিংদা স্কেল অমসুং স্পীদ অমদি ক্বান্তিতী অমসুং ক্বালিতী পুরক্লি”, ভারতনা অচৌবা থৌদাং য়াবনা IEAদা কান্নবা য়াম্না পীগনি ফোংদোক্লদুনা প্রধান মন্ত্রীনা হায়খি। প্রধান মন্ত্রীনা মহাক্কী ৱারোল লোইশিনবা ওইনা, IEAগী মন্ত্রীশিংগী মীফম্না মায় পাকপা ওইনবা য়াইফ পাউজেল পীখি অমসুং হৌজিক লৈরিবা পার্ত্নরশিপকী মপাঙ্গল হাপ্পগা লোয়ননা অনৌবা পার্ত্নরশিপ শেম্নবা ফম্বাক অসি শিজিন্নসি হায়না ফোংদোকখি। “হান্নদগী হেন্না ক্লীন, গ্রীন অমসুং ইনক্লুসিব ওইবা মালেম অমা শেম্লসি”, শ্রী মোদীনা হায়খি।
