উপাধিশিং,
মেরিতাইম সেক্যুরিতীগী মতাংদা পাঙথোকপা খন্ন-নৈনবা অসিদা ময়াম পুম্বনা শরুক য়াবীবা অসিগীদমক ঐহাক্না থাগৎপা ফোঙদোকচরি। ঐহাক্না সেক্রেতরী জেনরেলবু অফবা পাউজেল পীবীবগী অমসুং য়ু.এন.ও.দি.সি.গী এগজিক্যুতিব দিরেক্তরনা ব্রিফিং তৌবীবগীদমক থাগৎপা ফোঙদোকচরি। রিপব্লিক ওফ কোঙ্গোগী রাস্ত্রপতিনা অফ্রিকন য়ুনিয়নগী অধ্যক্ষ ওইনা মহাক্কী পাউজেল পীবীখ্রে। মহাকপু তৌবীমল খঙবা উৎচরি। ঐহাক্না রুসিয়াগী রাস্ত্রপতি, কেন্যাগী রাস্ত্রপতি, অমসুং বিয়তনামগী প্রধান মন্ত্রীবু শরুক য়াবীবগীদমক ধমোই শেংনা তৌবীমল খঙবা উৎচরি।
উপাধিশিং,
সমুদ্র অসি ঐখোয়গী অমত্তা ওইবা লননি। ঐখোয়গী সমুদ্রগী লম্বী অসি মালেমগী ললোন-ইতিক্কী কী লাইফ লাইন ওইরি। অমসুং খ্বাইদগী মরু ওইরিবা ৱাফমদি সমুদ্র অসি ঐখোয়গী গ্রহগী তুংলমচৎকীদমক য়াম্না মরু ওই। অদুবু ঙসি ঐখোয়গী অমত্তা ওইরিবা সমুদ্রগী লান অসি শীংনবা কয়া মায়োক্নবা তারি: পাইরেসী অমসুং তেরোরিজমগীদমক্তা সমুদ্রশিংগী লম্বীশিং অসি লান্না শীজিন্নরি। লৈবাক কয়াগী মরক্তা সমুদ্রগী ওইনা নুংঙাইনদবশিং লৈরি। অমসুং অইং-অশাগী খলদা কাইরকপা অমসুং মহৌশাগী ওইবা খুদোংথিবশিংসু মেরিতাইল দোমেনগা মরী লৈনৈ। হীরম অসিদা ঐখোয়গী অপুনবগী লন ওইরিবা সমুদ্র অসি ঙাকশেল পীনবা অমসুং শীজিন্ননবা পুম্নমক্না ভাব তামিন্নদুনা অমসুং মতেং পীনদুনা ফ্রেমৱর্ক অমা শেম্বা তাই। লৈবাক অমত্তনা ফ্রেমৱর্ক অসি মথন্তা শেম্বা ঙম্লোই। মসি পুন্না হোৎনরবা মতমদতা ওইথোকপা ঙমগনি। ৱাখল্লোন অসিগা লোইননা ঐখোয়না সেক্যুরিতী কাউন্সিলদা মরু ওইবা ৱাফম অসি পুখৎলকখিবনি। ঙসিগী অৱাংবা থাক্কী খন্ন-নৈনবা অসিনা মালেমবু মেরিতাইম সেক্যুরিতীদা থেংনরিবা সমস্যা অসি কোকহন্নবা মাইকৈদা লমজিংগনি হায়না ঐহাক্না থাজবা থম্লি।
উপাধিশিং,
খন্না-নৈনবা অসিদা স্ত্রকচর পীনবা ঐহাক্না তঙাই ফদবা ৱাফম মঙা মাংদা থমজগে। অহানবা ৱাফম: ঐখোয়না আইন্না য়াবা সমুদ্রগী ওইবা ললোন-ইতিক তৌবদা থম্লিবা অথিংবশিং লৌথোকফম থোকই। ঐখোয় পুম্নমক্কী চাউখৎপা হায়বা অসি সমুদ্রগী ওইবা ললোন-তিক্কী এক্তিব ফ্লোগী মখা পোল্লি। মসিদা লাকপা অপনবশিং অদুনা অপুনবা মালেমগী শেন্মীৎলোন্দা শীংনবা অমা ওইরকপা য়াই। সমুদ্রগী ওইবা ললোন-ইতিক মনীং তম্না তৌবা হায়বা অসি ঙল্লিঙৈ মতমদগী হৌদুনা ভারতকী সভ্যতাগা মরী লৈনদুনা লাক্লি।চহি লিশিং কয়াগী মমাংদা, ইন্দস ভেলী সিবিলাইজেসনগী লোথলগী হীথাংফম অসি সমুদ্রগী ওইবা ললোন-ইতিক্কা মরী লৈনখি। ঙল্লিঙৈ মমদা সমুদ্রদা মনীং মখা তম্না চৎপা য়ারিঙৈ মতমদা মবুঙো বুদ্ধনা মালেমদা শান্তিগী পাউজেল পীবা ঙমখি। ঙসিগী ওইরিবা মওং অসিদা ভারতনা মসিগী অপনবা লৈতবা অমসুং পুম্নমক য়াওহনবগী চৎনবীশিং অসিদা বুম্ফম ওইরগা সাগর – সেক্যুরিতী এন্দ গ্রোথ ফোর ওল ইন দি রিজনগী ভিজন অসি পুথোকখিবনি। ভিজন অসিগী খুত্থাংদা ঐখোয়গী মফমদা মেরিতাইম সেক্যুরিতীগী ইনক্লুসিব স্ত্রকচর অমা ঐখোয়না শেমগৎপা পাম্মি। ভিজন অসি শাফবা, সেক্যুর ওইবা অমসুং তংদু লৈতাবা মেরিতাইম দোমেন অমগীদমক্তনি। সমুদ্রদা মনীং তম্না ললোন-ইতিক তৌহনবগীদমক্তা ঐখোয়না অমনা অমগী হীরোইশিংগী হকশিং মপুং ফানা ইকাই খুম্নবা মথৌ আই। অনিশুবা ৱাফম: সমুদ্রগী ওইবা নুংঙাইনদবা অসি শান্তি ওইনা অমসুং মালেমগী লৈরিবা আইন খক্তদা য়ুম্ফম ওইরগা ৱারোইশিনবা পুরক্কদবনি। মসি থাজনবা অমসুং কন্ফিদেন্সকীদমক্তা য়াম্না মরু ওই। মসিগী খুত্থাংদা ঐখোয়না মালেমদা শান্তি অমসুং তংদু লৈতাবা পুরকপা ঙমগনি। ৱাখল তানা অমসুং মেচ্যুরিতী অসিগা লোইননা ভারতনা মাগী য়ুম্লোন্নরিবা লৈবাক বাংলাদেশকা লোইননা সমুদ্রগী ঙমখৈগী মরমদা লৈরম্বা নুংঙাইনদবা অদু ৱারোইশিন পুরকখি। অহুমশুবা ৱাফম: ঐখোয়না মহৌশাগী ওইবা খুদোংথিবশিং অমসুং নন-স্তেৎ এক্তরশিংনা পীরকপা সমুদ্রগী ওইনা অকি-অখাং অসি পুন্না মায়োক য়ামিন্নগদবনি। হীরম অসিদা রিজনেল কোওপরেসন হেনগৎহন্নবা ভারতনা খোঙথাং কয়া লৌখৎখ্রে। সাইক্লোন, সুনামী অমসুং পোলুসনগা মরী লৈনবা সমুদ্রগী খুদোংথিবশিং অসিগী ফর্স্ত রেসপোন্দর ভারতনা ওইদুনা লাকখি। প্রাইরেসী তৌবদগী ঙাকথোক্নবা ২০০৮দগী হৌদুনা ইন্দিয়ন নেভীনা ইন্দিয়ন ওসীন্দা পেত্রোলিং তৌদুনা লাককি। ভারতকী হ্বাইত শিপ্পিং ইনফোর্মেসন ফ্যুজন সেন্তরনা ঐখোয়গী রিজন্দা অপুনবগী ওইরিবা মেরিতাইম দোমেন্দা এৱের্নেস পীরি। ঐখোয়না লৈবাক কয়াদা হাইদ্রোজেনিক সর্ভে সপ্পোর্ত অমসুং মেরিতাইম সেক্যুরিতীগী ত্রেনিং পীরি। ভারতনা নেৎ সেক্যুরিতী প্রোভাইদে অমাগুম্না ইন্দিয়ন ওসীনদা থৌদাং লৌরি। মরিশুবা ৱাফম: ঐখোয়না অকোইবগী ফীভম অমসুং সমুদ্রগী রিসোর্সশিং ঙাক-শেন্দুনা থম্বা তাই। সমুদ্রনা অইং-অশাদা হকথেংননা শাফু পী হায়বা ঐখোয়না খঙলে। অমসুং মরম অসিনা ঐখোয়না সমুদ্রগী অকোইনগী ফীভম অসি প্লাস্তিকশিং অমসুং থাও য়ুবা অসিগুম্বা পোলুসন থোকহন্দনবা হোৎনবা তাই। অমসুং কা হেন্না ঙা ফাদোকপা অমসুং সমুদ্রদা আইন্না য়াদবা মওংদা সমুদ্রগী শা অমসুং ঙা ফবগী মায়োক্তা পুন্না খোঙথাং লৌখৎমিন্নসি। মসিগা ইরোইননা, ঐখোয়না ওসীন সাইন্সতা মতেং পীনবসু হেনগৎহনবা তাই। ভারতনা অচৌবা “দীপ ওসীন মিসন” অমা হৌদোকখ্রে ঐখোয়না তুংকোইনা ঙা ফবা থৌগৎনবা থৌরাং কয়াসু পাইখৎখ্রে। মঙাশুবা ৱাফম: ঐখোয়না রেস্পোন্সিবল মেরিতাইম কনেক্তিবিতী থৌগৎপা তাই। সমুদ্রগী ললোন-ইতিক হেনগৎহন্নবা ইনফ্রাস্ত্রকচর শেমগৎপা মথৌ তাই হায়বা অসি ময়েক শেংলে। অদুবু, অসিগুম্বা ইনফ্রাস্ত্রকচর প্রোজেক্তশিংগী চাউখৎ-থৌরাংদা লৈবাকশিংগী ফিস্কল সস্তেনেবিলিতী অমসুং অবজোর্প্সন কেপাসিতীশিং মুন্না খন্থাবা চুমগনি। মসিগিদমক ঐখোয়না অফবা কাংলোনশিং অমসুং স্তেন্দর্দশিং শেম্বা তাই।
উপাধিশিং,
মরু ওইবা ৱাফম মঙা অসিদা য়ুম্ফম ওইরগা মেরিতাইম সেক্যুরিতী কোওপরেসনগী গ্লোবেল রোদমেপ অমা শেম্বা ঙমগনি। ঙসিগী ওপন দিবেৎ অসিদা থৱাই য়াওনা শরুক য়াবা অসিনা সেক্যুরিতী কাউন্সিলগী মেম্বর পুম্নমক্না হীরম অসি মরু ওইনা লৌই হায়বা উৎখ্রে। মসিগা লোইননা ঙসি শরুক য়াবীরিবশিংবু ঐহাক্না অমুক্কা হন্না থাগৎপা ফোঙদোকচরি।
থাগৎচরি।
