মীদিয়াগী ইচিল ইনাওশিং,
নমস্কার!
ঐহাক্না খ্বাইদগী অহানবদা রাস্ত্রপতি রামাফোসাবু হন্দক্কী BRICS সম্মিত অসিবু মায় পাক্না শিনবগীদমক্তা থাগৎপা ফোংদোকপগা লোয়ননা ইকায় খুম্নজরি।
নুমিৎ হুম্নিগী মীফম অসিদা অপাম্বা মহৈ কয়া ফংবসিদা ঐহাক্না নুংঙাইবা ফাওই।
ঐখোয়না ব্রিক্সকী 15শুবা মীফম অসিদা, মসিবু হেন্না পাকথোক চাউথোকহনবদা অহেনবা মিৎয়েং চঙখি।
ঐহাক্না ঙরাংসু হায়খিবা অদুনি, ভারতনা ব্রিক্সকী মেম্বর মশিং হেনগৎহনবগী থৌওংবু মপুং ফানা শৌগৎলি।
অনৌবা মেম্বর য়াওরকপা মতমদা ব্রিক্সনা ওর্গনাইজেসন অমা ওইনা মপাঙ্গল হেন্না কনখৎলক্কনি হায়বগী ৱাখল্লোন ভারত্তা লৈ, অদুগা ঐখোয়না হোৎনমিন্নরিবশিংদা অহেনবা শাফু অমসু পীগনি।
মসিগুম্বা খোঙথাং অসিদগী লৈবাক কয়া অমনা মলতিপোলর ৱর্ল্দ ওর্দরদা থাজবা হৌরক্কনি।
ঐখোয়গী তীমশিংনা পুন্দুনা পাকথোক চাউথোকপগী গাইদিং প্রিন্সিপল, স্তেন্দর্দ, ক্রাইতেরিয়া অমসুং প্রোসিজরশিংদা য়ানবা পুরকপা অসিদা ঐহাক্না য়াম্না নুংঙাইবা ফাওই।
হায়রিবা অসিদা য়ুম্ফম ওইদুনা, ঐখোয়না ঙসিদি অর্জেন্তিনা, ইজিপ্ত, ইরান, সৌদি অরাবিয়া, ইথিওপিয়া অমসুং UAEবু ব্রিক্সতা তরাম্না ওক্নবা য়ানবা পুরকখি।
ঐহাক্না অহানবমক্তদা, লৈবাকশিং অসিগী লুচিংবা অমসুং মীয়াম্বু থাগৎচরি।
লৈবাকশিং অসিগা পুন্দুনা ঐখোয়না অনৌবা মায় পাকপা পুরক্কনি হায়বগী ঐহাক্না থাজবা থম্মি।
লৈবাকশিং অসিগা ভারতকা অনকপা মরী লৈনৈ, পুৱারী ওইবা মরী লৈনৈ।
ব্রিক্সকী মতেংদগী, ঐখোয়গী বাইলেতরেল মরীশিংদা অনৌবা মাইকৈ অমসু পুরক্লগনি।
ব্রিক্সতা পার্ত্নর লৈবাক ওইনা য়াওনিংবগী অপাম্বা ফোংদোক্লকখিবা অতোপ্পা লৈবাকশিংগী ৱাহৌদোক্কী অয়াবা পুরক্নবা হোৎনবদা ভারতনা থৌদাং য়াগনি।
মরুপশিং,
মতম্না পুরকপা অহোংবগা চুননা মালেম্না চৎকদবনি হায়বা ৱাফম অমা BRICSনা পাকথোক চাউথোকপা অমসুং মোদর্নাইজেসন তৌবগী থৌওংনা পীরি।
মসিনা কুনশুবা চহি-চাদা মালেমদা শেমখিবা ইন্সতিত্যুসনশিংদা রিফোর্ম পাংথোকপগী ইথিল অমসু খোঙথাং অসিনা পীগনি।
মরুপশিং,
ঐহাক্কী মরুপ রামাফোসানা ভারতকী থাগী মিসন্না মায় পাকপগীদমক্তা থাগৎপা ফোংদোকপীরকখি, ঐহাক্না ঙরাংদগী হৌনা মসিগুম্বা পাউজেল কয়া ফংখ্রে। মীপুম খুদিংনা নুংঙাইবগী মতৌ উৎপীরকখি।
মায় পাকপা অসি শুপ্নগী লৈবাক অমখক্কী মায় পাকপা নত্তে, মসিগী মীওইবা খুন্নাইগী মায় পাকপনি হায়না মালেম পুম্বনা খন্নরি।
মসি ঐখোয় পুম্নমক্কী ওইবা য়াম্না চাউথোকচনীংঙাই ওইবা থৌওংনি। ভারতকী সাইন্তিস্তশিংবু মালেম পুম্বনা থাগৎনবগী খুদোংচাবা অমসু ফংলে।
মরুপশিং,
ঙরাং নুমিদাং ৱাইরমদা, চন্দ্রয়ান্না থাগী সাউথ পোলদা সোফ লেন্দিং তৌখি।
মসিদি ভারতখক্কী নত্তনা, মালেমগী সাইন্তিফিক খুন্নাই অপুনবগী মায় পাকপনি।
মমাংদা অমুক্তা পাংথোকখিদ্রিবা লম অমদা ভারতনা পান্দম থমখি। মসিগী হোৎনজমন অসি মায় পাক্লে। খুদোংচাদবা মফমদা সাইন্সনা য়ৌবা ঙমখ্রে।
থৌওং অসিমক সাইন্সকী মশক থোকপা মায় পাকপা অমনি।
মসিগী পুৱারী ওইরবা পুংফম অসিদা, অদোম্না ঐহাক, ভারতকী মীয়াম, ভারতকী সাইন্তিস্ত, মালেমগী সাইন্তিফিক খুন্নাইনা য়াইফ পাউজেল কয়া ফংলি। মসিগীদমক্তা ঐহাক্না ঐহাক ইশা, লৈবাক মীয়াম অমসুং ঐখোয়গী সাইন্তিস্তশিংগী মাইকৈদগী পুম্নমক্কী মফমদা থাগৎপা ফোংদোকচরি।
থাগৎচরি।
