ইকায়খুম্নরবা রাস্ত্রপতি রামাফোসা,
ইকায়খুম্নরবা রাস্ত্রপতি লুলা দি সিল্পা,
ইকায়খুম্নরবা রাস্ত্রপতি পুতিন
ইকায়খুম্নরবা রাস্ত্রপতি সী,
ইবুংঙো অমসুং ইবেম্মশিং,
১৫শুবা ব্রিক্স মীফম পাংথোকপগীদমক অমসুং ঐখোয় তরাম্না ওকপগীদমক ঐগী নুংশিরবা মরুপ রাস্ত্রপতি রামাফোসা ঐনা অমুক হন্না থাগৎচরি।
ফজরবা সহর জোহেন্সবার্গতা অমুক হন্না লাকপা অসিদা ঐ অমসুং ঐগী মীহুৎ কাংবু য়াম্না হরাওই।
সহর অসি ভারতকী মীয়াম অমসুং ভারতকী পুৱারিদা অচেৎপা মরী অমা লৈনরি।
চহি ১১০গী মমাঙদা মহাত্মা গান্ধীনা শেমগৎলম্বা তোলসতোই ফার্ম মফম অসিদগী খর চৎলগা লৈরি।
ভারত, য়ুরেসিয়া অমসুং অফ্রিকাগী অচৌবা ৱাখল্লোনশিং পুনশিন্দুনা, মহাত্মা গান্ধীনা ঐখোয়গী অপুনবা অমসুং নুংশিননা হিংমিন্নবগী অকনবা য়ুম্ফম অমা থোল্লমখি।
ইকায়খুম্নরবশিং,
হৌখিবা চহি ২০ অসিদা, শাংলবা অমসুং য়াইফরবা খোঙচৎ অমদা ব্রিক্স লাক্লে।
মসিগী খোঙচৎ অসিদা ঐখোয়না মাইপাকপা কয়া পুরকখ্রে।
গ্লোবেল সাউথকী লৈবাকশিং চাউখৎহনবদা ঐখোয়গী নিউ দিবলপমেন্ত বেঙ্কনা মরুওইবা থৌদাং অমা লৌরি।
কন্তিনজেন্সি রিজার্ব এরেঞ্জমেন্তগী মখাদা শেন-থুমগী ঙাক্লৌ অমা ঐখোয়না শেম্লে।
ব্রিক্স সেতেল্লাইত, ভেক্সিন রিছার্স অমসুং দিবলপমেন্ত সেন্তর, লৈবাক অমনা লৈবাক অমগী ফার্মাগী পোৎথোকশিং শক খঙনদুনা ঐখোয়গী ব্রিক্স লৈবাকশিংগী মীচম মীয়ামগী পুন্সিদা অফবা অহোংবশিং পুরক্লে।
য়ুথ সম্মিৎ, ব্রিক্স গেমস, থিঙ্ক তেঙ্ক কাউন্সিএলগুম্বা থবকশিংগী খুৎথাংদা, লৈবাকশিংগী মরক্তা মীগা মীগা লৈনবা মরীশিং ঐখোয়না মপাঙ্গল কনখৎহল্লে।
ব্রিক্সকী পান্দমশিংদা অনৌবা মাইওন অমা পীনবা ভারতনা পীখিবা পাউতাকশিংগী মনুংদা রেলৱে রিছার্স নেতৱার্ক, এম.এস.এম.ইশিংগী মরক্তা মতেং পীনবা হেনগৎহনবা, ওনলাইন ব্রিক্স দেতাবেজ, স্তার্দঅপ ফোরম য়াওরি।
হায়রিবা হিরমশিং অসিদা শিংথাবা য়ানা চাউখৎপদা ঐ হরাওই।
শক্নাইরবশিং,
ঐখোয়গী মতেং পাংনবা হেনগৎহন্নবা পাউতাক খর থম্বা ঐনা পাম্মী।
অহানবা অসি স্পেসকী লমদা মতেং পীনবনি। ব্রিক্স সেতেল্লাইত কন্সোরতিয়ম শেম্নবা ঐখোয় থবক পায়খৎলি।
মসি মখা তানা থবক পায়খৎতুনা, ব্রিক্স স্পেস এক্সপ্লোরেসন কন্সোরতিয়ম অমা শেম্নবা ঐখোয় খন্নরি।
মসিগী মখাদা, স্পেস রিছার্স, নোং-চিংগী ফিবম য়েংশিন্নবা হিরমশিংদা মালেমগী য়াইফনবা ঐখোয় থবক তৌবা য়াই।
ঐগী অনিশুবা পাউতাক অসি ইজুকেসন, স্কিল দিবলপমেন্ত অমসুং তেক্নোলোজিগী লমদা মতেং পীনবা অসিনি।
ব্রিক্স তুংগী থৌরাং তৌবা লুপ অমা ওইহন্নবা, ঐখোয়না ঐখোয়গী সাইন্তিস্তশিং তুংগী থৌরাং তৌদুনা লৈহনগদবনি। মসিদা তেক্নোলোজিনা মরুওইবা থৌদাং অমা লৌগনি।
ভারত্তা, মনুং-হুঞ্জিনবা অমসুং খুঙ্গংগী মফমশিংগী অঙাংশিং লাইরিক তম্নবা লৌশিং পীথোক-পীশিন তৌনবা দিজিতেল ইনফ্রাস্ত্রকচরগী মফম দিক্ষা ঐখোয়না শেমগৎলে।
স্কুলগী মহৈরোয়শিং অনৌবা থবক পাংথোকপা পুক্নিং থৌগৎনবা, লৈবাক শীনবা থুংনা ঐখোয়না অতল তিনকরিং লেব ১০,০০০ লিংখৎলে।
লোলগী খুদোংচাদবশিং লৈহন্দনবা ভারত্তা এ.আইদা য়ুম্ফম ওইবা লোলগী প্লেতফোর্ম ভাসিনি শীজিন্নরে।
তিকা থানবা কোৱিন প্লেতফোর্ম শেমগৎলে।
দিজিতেল পব্লিক ইনফ্রাস্ত্রকচরগী খুৎথাংদা মীয়ামগী থবকশিং পাংথোকপদা অওনবা পুরক্লে।
খেন্নবশিং অসি ভারতকী অচৌবা মপাঙ্গল অমনি।
ভারত্তা খুদোংচাদবা অমা থেংনবা মতমদা মদু কোক্নবা পাম্বৈ অদু মসিগী খেন্নবশিং অসি চাংয়েং তৌবদগী থোরকই।
মরম অদুনা হায়রিবা পাম্বৈশিং অসি মালেমগী মফম অমদা হেক্তা লাইনা থবক ওইনা পায়খৎপা য়াগনি।
হীরম অসিদা, ভারত্তা শেমগৎলিবা প্লেতফোর্মশিং অসি ব্রিক্স লৈবাকশিংদা পীবদা ঐখোয় হরাওগনি।
লৈবাক অমগী মপাঙ্গলশিং খঙদোক্নবা অপুনবা ওইনা ঐখোয়না স্কিল মেপ্পিং পাংথোকপা য়াগনি হায়বা অসি ঐগী অহুমশুবা পাউতাক্নি।
মসিগী খুৎথাংদা চাউখৎপগী খোঙচত্তা ঐখোয় অমনা অমগী মতেং পাংনবা ঙমগনি। ঐগী মরিশুবা পাউতাক অসি অচৌবা হৌদোংশিংগী মতাংদনি।
ব্রিক্স লৈবাক মঙাদা তোঙান-তোঙানবা মখলগী মশিং য়াম্লবা কৈশিং ফংলি।
ইন্তরনেসনেল বিগ কেত এল্লাইন্সকী মখাদা, মখোয় ঙাক-শেন্নবা ঐখোয়না অপুনবা থবক পায়খৎপা য়াগনি।
ঐগী মঙাশুবা পাউতাক অসি মহৌশাগী হিদাক-লাংথকশিংগী মতাংদনি।
ঐখোয়গী লৈবাকশিংদা মহৌশাগী হিদাক-লাংথকশিং শীজিন্নবগী ঐখোয়গী চৎনবীশিং লৈরি।
ঐখোয়না অপুনবা ওইনা মহৌশাগী লায়য়েং-কাংলোনগী পুক্কৈ অমা শেম্বা য়াগদরা?
শক্নাইরবশিং,
খা অফ্রিকানা চিয়ারমেন ওইদুনা গ্লোবেল সাউথকী লৈবাকশিংদা ব্রিক্সতা অখন্নবা মফম অমা পীরে।
মসি ঐখোয়না তরাম্না ওক্লি।
মসি হৌজিক্কী মতম অসিদা থাজবা থম্বা খক নত্তনা, মসি দরকার ওইরিবনি।
খা অফ্রিকানা চিয়ারমেন ওইবা অসিগী মখাদা হিরম অসিদা ভারতনা মরুওইবা মীৎয়েং চঙলি।
“মালেম অমা, ইমুং অমা, তুংলমচৎ অমা” হায়বা পান্দম অসিদা লৈবাক খুদিংমক পুন্না চাউখৎমিন্ননবা ঐখোয়না হোৎনরি।
চহি অসিগী জনুৱারিদা পাংথোকখিবা ভোইস ওফ গ্লোবেল সাউথ সম্মিৎতা লৈবাক ১২৫ শরুক য়াখি অমসুং মখোয়গী মরুওইবা থবকশিং খন্নখি।
অফ্রিকান য়ুনিয়নদা জি-২০গী লেংদবা মেম্বর ওইহন্নবা ঐখোয়না খন্নরে।
ব্রিক্স লৈবাকশিং জি-২০দা য়াওরি হায়না ঐনা থাজবা থম্লি। লৈবাক পুম্নমক্না ঐখোয়গী ৱাফম শৌগৎকনি।
হায়রিবা থবকশিং অসি ব্রিক্সতা অখন্নবা মফম অমা পীবা অসিনা গ্লোবেল সাউথকী লৈবাকশিংদা মশানা মশাবু থাজবা হেনগৎহনগনি।
শক্নাইরবশিং,
ব্রিক্স মেম্বর হেনগৎহনবদা ভারতনা মপুংফানা শৌগৎলি। হিরম অসিগী মতাংদা থবক পায়খৎপদা তরাম্না ওক্লি।
২০১৬দা, ভারতনা চিয়ারমেন ওইবা মতমদা, ব্রিক্স অসি ঐখোয়না বিল্দিং রেন্সপোন্সিপ, ইনক্লুসিপ অমসুং কল্লেক্তিপ সোলুসন্স হায়না মশক তাকখ্রে।
চহি ৭গী মতুংদা, ঐখোয়না ব্রিক্স অসি-ব্রিক্কিং বেরিয়রস, রিভিতালাইজিং ইকোনোমিস, ইন্সপাইরিং ইন্নোবেসন, ক্রিয়েতিং ওপোর্চুনিতি, সেপ্পিং ফিউচর হায়না খঙবা য়ারে।
ব্রিক্স লৈবাকশিং অপুনবা ওইনা, মসিগী অনৌবা দিফিনিসন অসি ৱাহন্থোক লৈহন্নবা ঐখোয় মখা তানা থবক তৌগনি।
অদোম থাগৎচরি।
