স্পেস অসি চুম্নগী লমথুংফম অমখক নত্তে খঙনিংবনা লাংতক্নবা, থৌনা, অমদি অপুনবগী খোঙজেলগী খোল্লাউ: প্রধান মন্ত্রী
ভারতকী রোকেতশিংনা পেলোদশিংখক্তা নত্তনা, মখোয়না ভারত মচা বিলিয়ন ১.৪ গী মঙলানশিংসু পুরি: প্রধান মন্ত্রীভারতকী অহানবা মী তোংবা স্পেফ্লাইত মিসন – গগনয়ান্দা স্পেস তেক্নোলোজীগী লমদা লৈবাক অসিগী অনিংবা অপামবা হেনগৎলক্লিবা অসি মমি তারি: প্রধান মন্ত্রীভারতকী স্পেস মিসন কয়া অমা নুপী সাইন্তিস্তশিংনা লমজিংলি: প্রধান মন্ত্রীভারতকী স্পেস ভিজন অসি ‘বসুদৈব কুতুম্বকম’ হায়রিবা অরিবা মতমগী ৱাখল্লোন অসিদগী হৌরকপনি: প্রধান মন্ত্রীপ্রধান মন্ত্রী শ্রী নরেন্দ্র মোদীনা ঙসি গ্লোবেল কন্ফরেন্স ওন স্পেস এক্সপ্লোরেসন (জি.ই.এল.এক্স.) ২০২৫ দা ভিদিও কন্ফরেন্সিংগী খুত্থাঙদা ৱা ঙাংখ্রে। মালেমগী মফম পুম্নমক্তগী মশক নাইরবা মীথুংশিং, সাইন্তিস্ত, অমদি এস্ত্রোনোতশিংবু তরাম্না ওক্লদুনা, মহাক্না জি.ই.এল.এক্স. ২০২৫ দা ভারতকী শিংথানিংঙাই ওইরবা স্পেস খোঙচৎকী মরমদা পাউদম্লদুনা, “স্পেস হায়বসি চুম্নগী লমথুংফম অমখক নত্তে, মসি খঙনিংবনা লাংতক্নবা, থৌনা, অমদি অপুনবগী খোঙজেলগী খোল্লাউ অমখক্নি” হায়খি। ভারতকী স্পেসকী লমদা মায় পাক্লবশিং অসিদা, ১৯৬৩ দা অপিকপা রোকেৎ অমা থাগৎখিবদগী থাগী খা থংবা পোল মনাক্তা খোঙদাখিবা অহানবা লৈবাক ওইরকপা ফাওবদা, হায়রিবা ৱাখল্লোন অসি মমি তারি হায়খি। ভারতকী স্পেসকী লমদা খুমাঙ চাওশিল্লিবা অসি মশক থোকপা সাইন্তিফিক মাইলস্তোন্নি অমদি মীওইবগী ৱাখলনা গ্রেভিতীবু মায়থিবা পীবা ঙম্মি হায়বগী খুদম্নি হায়রদুনা, “ভারতকী রোকেতশিংনা পেলোদশিংখক্তা নত্তনা, মখোয়না ভারত মচা বিলিয়ন ১.৪ গী মঙলানশিংসু পুরি,” হায়না মহাক্না হায়খি। মহাক্না ইং ২০১৪ দা অহানবা হোৎনবদা মার্স য়ৌখিবা ভারতকী পুৱারী ওইরবা মায় পাকপবু নীংশিংখি। চন্দ্রয়ান-১ না থাদা ঈশিং ফংই হায়বা খঙদোকপদা মতেঙ পাংখি, চন্দ্রয়ান-২ না থাগী লৈমায়গী খ্বায়দগী রিজোলুসন ৱাংবা মমি ফংহনখি, অদুগা চন্দ্রয়ান-৩ না থাগী খাথংবা পোলগী মরমদা হেন্না খঙবা ঙমহনখি হায়না মহাক্না ফোঙদোকখি। “ভারতনা রেকোর্দ ওইবা মতমদা ক্রাইওজেনিক ইঞ্জিন পুথোকখি, মিসন অমখক্তদা সেতলাইত ১০০ থাগৎখি, অমদি ভারতকী লোঞ্চ ভেহিকল শীজিন্নদুনা লৈবাক ৩৪গী সেতলাইত ৪০০ হেন্না মায় পাক্না থাগৎখি,” হায়না মহাক্না ফোঙদোক্লদুনা, ভারতকী খ্বায়দগী নৌনা মায় পাকখিবা – চহি অসিদা স্পেসতা সেতলাইত অনি দোকিং তৌখিববু স্পেস এক্সপ্লোরেসনগী লমদা অচৌবা খোঙথাং অমনি হায়খি।
শ্রী মোদীনা ভারতকী স্পেস খোঙচৎ অসি অতৈগা চাংদম্নবগী ৱাফম নত্তে, পুন্না হেন্না ৱাংবা পন্দোল লোম্মিন্নবগী ৱাফম্নি হায়খি। মহাক্না মীওইবা খুন্নাইগী কান্ননবা স্পেসকী লমদা থিজিনবগী অপুনবগী পান্দমগী মরমদা ৱাফম কয়া থমখি। খা এসিয়ন লৈবাকশিংগী ওইবা সেতলাইত অমা মায় পাক্না থাগৎখিববু নীংশিংলদুনা, মহাক্না রিজনেল কোওপরেসন্দা ভারতনা লেপ্লিবা খোঙফম পুখৎখি। ভারতকী প্রেসিদেন্সী মনুংদা হৌদোকখিবা জি২০ সেতলাইত মিসন অসিনা মালেমগী খাথংবা শরুক্কী ওইনা মশক থোকপা ৱাফম অমা ওইগনি হায়না মহাক্না লাউথোকখি। ভারতকী অনৌবা থাজবগা লোয়ননা মাঙদা লেপ্তনা চঙশিল্লি, সাইন্তিফিস এক্সপ্লোরেসনগী ঙমখৈ লেপ্তনা পাকথোকহল্লি হায়খি। “ভারতকী অহানবা হ্যুমেন স্পেসফ্লাইত মসন, ‘গগনয়ান’ অসিদা লৈবাক অসিগী স্পেস তেক্নোলোজীগী লমদা হেনগৎলক্লিবা অনিংবা অপাম্বগী মমি তারি হায়খি। লাক্কদৌরিবা চয়োল খরসিদা, ভারতকী এস্ত্রোনোত অমনা অপুনবা ইস্রো-নাসা মিসনগী মনুং চন্না ইন্তরনেস্নেল স্পেস স্তেসন্দা চৎকদৌরি হায়না শ্রী মোদীনা ফোঙদোকখি। মহাক্না মখা তানা ভারতকী অশানবা মীৎয়েঙগী মরমদা হায়রদুনা, ২০৩৫ ফাওবদা, ভারতিয় অন্তরিক্স স্তেসন্না মমাঙদা অমুক্তা ওইখিদ্রিবা রিছর্চ অমসুং মালেমগী ওইনা খুৎশম্ননা চৎমিন্নবগী ফীভম পুরক্কনি হায়খি। ২০৪০ ফাওবদা, ভারতকী এস্ত্রোনোত অমনা থাগী লৈমায়দা খোঙ্গুল তারুগনি হায়না মহাক্না লাউথোকখি, অমদি ভারতকী তুংগী স্পেসকী অনিংবা অপাম্বশিংগী মনুংদা মার্স অমসুং ভিনসনা মরুওইবা পান্দম ওইরি হায়না মখা তাখি।
ভারতকীদমক্তদি, স্পেস হায়বসি থিজিন্নবখক্কী নত্তে, মসি মপাঙ্গল হাপ্নবা খুৎলায় অমনি হায়রদুনা, প্রধান মন্ত্রীনা স্পেস তেক্নোলোজীনা কমদৌনা লৈঙাক্লোন ফগৎহনগনি, পুন্সি মহিং ফগৎহনগনি অমদি মীরোল কয়াবু পুক্নিং থৌগৎকনি হায়বা ৱাফমশিং থমখি। মহাক্না ভারত মচা খুদিংগী পুন্সিদা নুংঙাই য়াইফবা পুরকপদা সেতলাইতনা লৌরিবা মরুওইবা থৌদাংশিং শিংথাখি, অমদি ঙামীশিংদা চেকশিন পীবদা লৌরিবা থৌদাং, গতিশক্তি প্লেতফোর্ম, রেলৱে সেফ্তি, অমদি ৱেদর ফোর্কাস্তিংনচিংবা ৱাফমশিং পনখি। ভারতনা মাগী স্পেস সেক্তরবু স্তার্তঅপশিং, ওন্ত্রপ্রিন্যুরশিং, অমদি নহাশিংগী মফমদা শীজিন্নহন্নবা লেপ্লিবা খোঙফমবুসু পুথোক্তুনা থমখি। ভারত্তা হৌজিক স্পেস স্তার্তঅপ ২৫০ হেন্না লৈদুনা, সেতলাইত তেক্নোলোজী, প্রোপলসন সিস্তেম, ইমেজিং, অমদি অতৈ মাঙজিল থাবা হীরমশিংদা খুমাঙ চাওশিলহনবদা থৌদাং য়ারি হায়না মহাক্না ফোঙদোকখি। “ভারতকী স্পেস মিসন ময়াম অমদি নুপী সাইন্তিস্তশিংনা লমজিংবনি,” হায়না মহাক্না চাউথোকপগা লোয়ননা ফোঙদোকখি।
“ভারতকী স্পেসকী মঙলান অসি ‘বসুদৈব কুতুম্বকম’ হায়রিবা অরিবা মতমগী ৱাখল্লোন অসিদগী হৌরকপনি,” হায়রদুনা, শ্রী মোদীনা ভারতকী স্পেসকী খোঙচৎ অসি মশাগী চাওখৎপখক্কী নত্তে, মালেমগী ৱাখল লৌশিং হেনগৎহন্নবনি, পুম্নমক্না থেংনরিবা শিংনবশিংগী পাম্বৈ পুথোক্নবনি, অমদি তুংগী মীরোলশিং পুক্নিং থৌগৎনবনি হায়খি। লৈবাক অসিনা পুন্না মঙ মঙমিন্ননবা, পুন্না শেমগৎমিন্ননবা, অমদি থৱানমিচাকশিংদা পুন্না য়ৌমিন্ননবা লেপ্লি হায়রদুনা মহাক্না খুৎশম্ননা চৎমিন্নবগী মতাঙদা ভারতকী খোঙফম ফোঙদোকখি। মহাক্কী ৱারোল লোইশিল্লকপদা, মহাক্না সাইন্স অমসুং হেন্না ফবা তুংলমচৎ অমগীদমক পুন্না হোৎনমিন্নবনা লমজিংবা স্পেস এক্সপ্লোরেসনগী অনৌবা পন্দুপ অমা হাংদোক্নবা ৱাফম থমখি।
