য়ু.কে. অমদি মাল্দিব্স খোঙচত্তগী হেক হল্লকপগা, প্রধান মন্ত্রী শ্রী নরেন্দ্র মোদীনা জুলাই ২৬গী নুমিদাংৱাইরম পুং ৮ লোম তাবা মতমদা তামিল নাদুনা তুতিকোরিন্দা মীয়াম তিনবা থৌরম অমদা লুপা করোর ৪৮০০ হেনবগী চাওখৎ থৌরাংগী প্রোজেক্ত কয়া উরেপ উয়ুং তমগনি, শঙ্গাগনি অমদি লৈবাক্কী মফমদা কত্থোক্কনি।
জুলাই ২৭তা, প্রধান মন্ত্রীনা তামিল নাদুনা তিরুচিরপ্পলিদা লৈবা গঙ্গাইকোন্দা চোলাপুরম লাইশঙদা নুমিৎয়ুংবা পুং ১২ রোম তারকপদা অথোয়বা চোলা নিংথৌরেল রাজেন্দ্র চোলা ১গী মপোক কুমওনগা লোয়ননা আদি তিরুবতিরাই কুমহৈ শরুক য়াগনি।
তুতিকোরিন্দা প্রধান মন্ত্রী
মাল্দিব্সতা মহাক্কী লৈবাক্কী থাক্কী ওইবা খোঙচৎ লোইরবা মতুংদা, প্রধান মন্ত্রীনা তুতিকোরিন্দা হকথেংননা চৎকনি অমদি তামিল নাদুগী রিজনেল কন্নেক্তিবিতী ফগৎহনগদবা, লোজিস্তিক্কী মতিং হেনগৎহনগদবা, ক্লীন ইনর্জী ইনফ্রাস্ত্রকচর মপাঙ্গল কনখৎহনগদবা, অমদি মীয়ামগী পুন্সি মহিং ফগৎহনগদবা মশক নাইবা প্রোজেক্ত কয়া শঙ্গাগনি অমদি লৈবাক্কী মফমদা কত্থোক্কনি।
মালেমগী থাক্কী এয়র ইনফ্রাস্ত্রকচর শেমগৎনবা অমদি কন্নেক্তিবিতী ফগৎহন্নবা মহাক্কী খোঙফম পরিংদা, প্রধান মন্ত্রীনা খাথংবা শরুক্কী হেনগৎলক্লিবা এভিএসন দিমান্দ ফংহন্নবা শেম শারবা, লুপা করোর ৪৫০ রোম চঙনা শাগৎখিবা তুতিকোরিন এয়রপোর্তকী অনৌবা তর্মিনেল বিল্দিং শঙ্গাগনি। প্রধান মন্ত্রীনা তুতিকোরিন এয়রপোর্তকী অনৌবা তর্মিনেল বিল্দিং মনুংদা চঙদুনসু য়েংগনি।
স্ক্বার মিতর ১৭,৩৪০ পাক শন্না লৈরিবা তর্মিনেল অসি পীক মতমদা পেসেঞ্জর ১,৩৫০ অমদি চহিদা পেসেঞ্জর লাখ ২০ চনবগা লোয়ননা, মশিং অসি পীক মতমদা পেসেঞ্জর ১,৮০০ অমদি চহিদা পেসেঞ্জর লাখ ২৫দা খুদোংচাবা পীবা য়াবগী চাংদা তুংদা পাকথোক চাউথোকহনবগী মফম লৈ। চাদা ১০০ LED লাইতিং, ইনর্জী ইফিসিএন্ত E&M সিস্তেম, অমদি মফমদুদা লৈবা সিৱেজ ত্রীতমেন্ত প্লান্তকীখুত্থাঙদা চুমথোক্লবা ঈশিং অমুক হন্না শীজিন্নবা য়ারবা তর্মিনেল অসি GRIHA-4 সস্তেনেবিলিতী রেতিং ফংবা ঙম্নবা শাখিবনি। মতমগা চুনরবা ইনফ্রাস্ত্রকচর অসিনা তামিল নাদুগী খা থংবা শরুক্তা রিজনেল এয়র কন্নেক্বিবিতী মশক থোক্না ফগৎহনগনি অমদি লল্লোন ইতিক, লম কোয়বা, অমসুং শেল থাদবা হেনগৎহনগনি হায়না পারি।
লম্বীগী ইনফ্রাস্ত্রকচর সেক্তরদা, প্রধান মন্ত্রীনা স্ত্রেতেজিক ওইবা মীৎয়েঙদা মরুওইবা হায়ৱে প্রোজেক্ত অনি লৈবাক্কী মফমদা কত্থোক্কনি। অহানবা অসিনা বিক্রাবন্দি-থঞ্জবুর কোরিদোরগী মখাদা লুপা করোর ২,৩৫০ হেন্না চঙনা শেমগৎখিববা NH-6 কী কিলোমিতর ৫০ শাংবা সেথিয়াথোপে-চোলাপুরম শরুক লেন ৪ ওইহনবনি। মসিদা বাইপাস অহুম, কোলিদাম তুরেল মথক্তা কিলোমিতর ১ শাংবা লেন মরিগী থোং, অচৌবা থোং মরি, ফ্লাইওবর তরেৎ, অমদি অন্দরপাস কয়া য়াওদুনা সোথিয়াথোপেদগী চোলাপুরম ফাওবা চৎপগী মতম মিনৎ ৪৫ তেনশিনহল্লে, অমদি দেল্তা রীজনগী কল্চর অমদি লৌউ-শিংউগী মফমদা কন্নেক্তিবিতী হেনগৎহল্লে। অনিশুবা প্রোজেক্ত অসিনা লুপা করোর ২০০ রোম চঙনা শেমগৎখিবা কিলোমিতর ৫.১৬ শাংবা NH-138 তুতিকোরিন হিথাংফম লম্বী লেন তরুক্তা শেমগৎপনি। অন্দরপাস অমদি থোং কয়া য়াওবা লম্বী অসিনা কার্গো ফ্লো কোমহনগনি, লোজিস্তিক কোস্ত হন্থহনগনি, অমদি ভি.ও. চিদম্বরম পোর্তকী অকোয়বদা পোর্ত-লেদ ইন্দস্ত্রিএল গ্রোথ পুরকপদা মতেং ওইগনি।
হিথাংফমগী ইনফ্রাস্ত্রকচর ফগৎহনবা অমদি ক্লীন ইনর্জীগী থৌশিলদা অচৌবা ইনোৎ অমা হাপ্পা ওইনা, প্রধান মন্ত্রীনা লুপা করোর ২৮৫ রোম চঙনা ভি.ও. চিদম্বরম পোর্ত্তা শেমগৎখিবা ৬.৯৬ MMTPA গী কার্গো হেনদ্লিং কেপাসিতী লৈবা নোর্থ কার্গো বর্থ-৩ শঙ্গাগনি। মসিনা লমদম অদুদা দ্রাই বল্ক কার্গো হেনদ্লিংগী মথৌ তাবা হেনগৎলক্লিবা অদু ফংহন্দুনা মপুং ওইবা হিথাংফমগী মতিং হেনগৎহনগনি অমদি কার্গো হেনদ্লিং লোজিস্তিক মওং মরিল নাইহনগনি।
প্রধান মন্ত্রীনা সস্তেনেবল অমদি ইফিসিএন্ত কন্নেক্তিবিতী ফগৎহন্নবা খা থংবা তামিল নাদুদা মরুওইবা রেলৱে ইনফ্রাস্ত্রকচর অহুম লৈবাক্কী মফমদা কত্থোক্কনি। কিলোমিতর ৯০ শাংবা মদুরাই-বোদিনয়াক্কনুর লাইন ইলেক্ত্রিফিকেসন তৌবনা ইকো ফ্রেন্দলী ত্রান্সপোর্ত য়োকখৎকনি, অমদি মদুরাই অমসুং থেনিদা লম কোয়বা অমদি চত্থোক চৎশিন তৌবদা মতেঙ ওইগনি। তিরুবনন্থপুরম-কনিয়াকুমারী প্রোজেক্তকী শরুক অমা ওইনা, লুপা করোর ৬৫০ চঙনা কিলোমিতর ২১ শাংবা নগরকোইল তাউন-কনিয়াকুমারী সেক্সন দব্লিং তৌবনা তামিল নাদু অমসুং কেরলাগী মরক্তা লৈরিবা লম্বী থোংগী ফীভম ফগৎহনগনি। মসিগী মথক্তা, অরালবেমোঝী-নগরকোইল জংসন (কিমি ১২.৮৭) অমসুং তিরুনেলবেলি-মেলাপ্পলায়ম (কিমি ৩.৬) সেক্সন দব্লিং তৌবনা চেন্নাই-কন্যাকুমারীনচিংবা মরুওইবা খা রোমগী লম্বীশিংদা চৎপগী মতম হন্থহনগনি অমদি পেসেঞ্জর অমসুং ফ্রৈত কেপাসিতী হেনগৎহন্দুনা রিজনেল ইকনমিক ইন্তিগ্রেসন হেনগৎহনগনি।
মখা তানা স্তেত অদুগী পৱার ইনফ্রাস্ত্রকচর মপাঙ্গল কনখৎহনবা ওইনা, প্রধান মন্ত্রীনা অচৌবা পৱার ত্রান্সমিসন প্রোজেক্ত অমা ওইরিবা – কুদনকুলম ন্যুক্লিয়র পৱার প্লান্তকী য়ুনিৎ ৩ অমসুং ৪ (MW 2x1000) দগী মৈ পুথোকখিনবা ইন্তর-স্তেত ত্রান্সমিসন সিস্তেম (ISTS) কী উরেপ উয়ুং তমগনি। লুপা করোর ৫৫০ রোম চঙনা শেমগৎকদৌরিবা প্রোজেক্ত অসিদা তুদনকুলমদগী তুতিকোরিন-২ GIS সবস্তেসন অমদি মরী লৈনবা তর্মিনেল ইকুইপমেন্তশিং ফাওবগী ৪০০ kV (ক্বাদ) দবল-সর্কিত ত্রান্সমিসন লাইন য়াওরি। মসিনা নেস্নেল গ্রিদ মপাঙ্গল কনখৎহনবদা মরুওইবা থৌদাং য়াদুনা, থাজনিংঙাই ওইবা ক্লীন ইনর্জী দিস্ত্রিব্যুসন ফংহনগনি, অমদি তামিল নাদু অমসুং অতৈ কান্নবা ফংগদৌরিবা স্তেতশিংগী হেনগৎলক্লিবা পৱার দিমান্দ ফংহনগনি।
প্রধান মন্ত্রী তিরুচিরপ্পলিদা
প্রধান মন্ত্রীনা গঙ্গাইকোন্দা চোলাপুরম লাইশঙদা মীয়ামগী ওইবা থৌরম অমদা আদি তিরুবতিরাই কুমহৈ শরুক য়াদুনা ভারতকী খ্বায়দগী অথোয়বা নিংথৌরেল অমা ওইরম্বা রাজেন্দ্র চোলা ১ বু ইকায়খুম্নবা ওইনা নীংশিং শেনয়েক অমা ফোঙগনি।
অখন্নবা থৌরম অসিনা রাজেন্দ্র চোলা ১ না খা নোংপোক এসিয়াদা মমিং লৈরবা মেরিতাইম এক্সপিদিসন চৎখিবা, অমদি চোলা য়ুমশারোলগী মশক নাইরবা খুদম অমা ওইরিবা গঙ্গাইকোন্দা চোলাপুরম লাইশঙ শাবা হৌখিবগী চহি ১০০০ ফারকপগী কুমওন থৌরমসু ওইগনি।
রাজেন্দ্র চোলা ১ (1014–1044 CE) ভারতকী খ্বায়দগী মতিক লৈবা অমদি মীৎয়েঙ শানবা লৈঙাকপশিংগী মনুংদা অমনি। মহাক্কী লুচিং মখাদা, চোলা এম্পাইয়রনা মখোয়গী ইথিল খা অমদি খা-নোংপোক এসিয়াদা শন্দোক্লমখি। মহাক্না গঙ্গাইকোন্দা চোলাপুরমবু মহাক্কী মায় পাক্লবা কেম্পেনগী মতুংদা নিংথৌ কোনুং ওইনা শেমগৎলম্মি, অমদি মফমদুদা মহাক্না শারম্বা লাইশঙ অদুনা চহি ২৫০ হেন্না সৈব লাইনিং, অচৌব আর্কিতেকচর, অমদি লৈঙাক্কী মতিক্কী মফম অমা ওইরম্মি। ঙসি, লাইশঙ অসি য়ুনেস্কো ৱর্ল্দ হেরিতেজ সাইত অমা ওইদুনা মশিগী মচা খায়না নুংদা হক্লিবশিং, চোলাগী পিথ্রাই অমদি অরিবা মতমগী খুৎয়েক্কীদমক মমিং চৎলি।
আদি তিরুবতিরাই কুমহৈনা চোলাশিংনা কন্না শৌগৎলম্বা অমদি তামিল সৈবিজমগী লম্বোইবা ৱাকম-নয়নমার ৬৩ না চঙনা থম্লম্বা তামিল সৈব ভক্তি চৎনবীবুসু হরাও তয়াম্না পাঙথোক্লি। পনবা য়াবদি, রাজেন্দ্র চোলাগী মপোক থৱানমিচাক, তিরুবতিরাই (অর্দ্র)গী মতম জুলাই ২৩ দগী হৌদুনা চহি অসিগী কুমহৈ অসি হেন্না ৱাহন্থোক লৈবা কুমহৈ ওইহল্লি।
