প্রধান মন্ত্রী শ্রী নরেন্দ্র মোদী মার্চ ১২দা কর্নাতকাদা চৎকনি অমসুং মফম অদুদা মহাক্না লুপা করোর ১৬,০০০ হেনবগী প্রোজেকশিং কৎথোক্কনি অমসুং উরেপ-উয়ুং তমগনি। নুমিৎ য়ুংবা পুং ১২ রোম তাবদা, প্রধান মন্ত্রীনা মন্দ্যাদা মরুওইবা লম্বীগী প্রোজেকশিং কৎথোক্কনি অমসুং উরেপ-উয়ুং তমগনি। তুংদা, নুংথিলগী পুং ৩:১৫ রোম তাবদা, মহাক্না হুবলি-ধারৱারদা তোঙান-তোঙানবা চাউখৎ-থৌরাংগী থবকশিং শঙ্গাগনি অমসুং উরেপ-উয়ুং তমগনি।
মন্দ্যাদা প্রধান মন্ত্রী
ইনফ্রাস্ত্রকচর প্রোজেকশিং শেমগৎপা খুমাঙ চাউশিল্লকপা অসি লৈবাক অসিদা মালেম থাক্কী লম্বী-থোঙ শেমগৎনবা প্রধান মন্ত্রীগী মঙলান থবক ওইনা পাংথোরকপগী খুদম অমনি। মাইকৈ অসিদা খুমাঙ চাউশিনবা ওইনা, প্রধান মন্ত্রীনা লৈবাক মীয়ামদা বেঙ্গালুরু-মাইসুর এক্সপ্রেসৱে কৎথোক্কনি।প্রোজেক অসিদা এন.ঐচ-২৭৫গী বেঙ্গালুরু-নিদাঘাত্তা-মাইসুর সেক্সন লেন ৬ ওনখৎপা য়াওরি। কিলোমিতর ১১৮ শাংবা প্রোজেক অসি চাউরাক্না লুপা করোর ৮৪৮০ চঙনা পায়খৎপনি। মসিনা বেঙ্গালুরু অমসুং মাইসুর অনিগী মরক্তা চৎথোক-চৎশিন তৌবদা চঙবা মতম চাউরাক্না পুং ৩দগী মিনিত ৭৫দা হন্থহনগনি। মসিনা লমদম অসিদা খুন্নাই অমসুং শেন-থুম চাউখৎহনবদা মতেং পাংগনি।
প্রধান মন্ত্রীনা মাইসুর-কুসালনাগর ৪-লেন হায়ৱেগী উরেপ-উয়ুং তমগনি। কিলোমিতর ৯২ শাংবা প্রোজেক অসি চাউরাক্না লুপা করোর ৪১৩০ চঙনা পায়খৎকদবনি। প্রোজেক অসিনা বেঙ্গালুরু অমসুং কুসালনাগর অনিগী মরক্তা চৎথোক-চৎশিন তৌবদা চঙবা মতম চাউরাক্না পুং ৫দগী পুং ২.৫ দা হন্থহনগনি।
হুবলি-ধারৱারদা প্রধান মন্ত্রী
প্রধান মন্ত্রীনা আই.আই.তি ধারৱার কৎথোক্কনি। হৌখিবা ফেব্রুৱারি ২০১৯দা প্রধান মন্ত্রীনা প্রোজেক অসি উরেপ-উয়ুং তমখিবনি। লুপা করোর ৮৫০ হেন্না চঙনা শেমগৎখিবা মহৈলোয়শঙ অসিদা হৌজিক চহি ৪গী বি.তেক প্রোগ্রামশিং, চহি ৫গী বি.এস.এম.এস প্রোগ্রামশিং, এম.তেক অমসুং পি.ঐচ.দি প্রোগ্রামশিং চৎথরি।
প্রধান মন্ত্রীনা শ্রী সিদ্ধারোধা শ্বামীজি হুবলি স্তেসন্দা মালেমদা খ্বাইদগী শাংবা রেলৱে প্লেতফোর্ম কৎথোক্কনি। রেকোর্দ অসি হন্দক জিনেস বুক ওফ ৱার্ল্দ রেকোর্দসনা শক খঙখিবনি। মিতর ১৫০৭ শাংবা প্লেতফোর্ম অসি লুপা করোর ২০ রোম চঙনা শেমগৎপনি।
প্রধান মন্ত্রীনা মৈ ফংহল্লবা হোসপেত-হুবলি-তিনাইঘাত সেক্স অমসুং নৌনা শেমগৎলবা হোসপেত স্তেসন মীয়ামদা কৎথোক্কনি। লুপা করোর ৫৩০ চঙনা পায়খৎপা ইলেক্ত্রিক ফংহনবগী প্রোজেক অসিনা ইলেক্ত্রিক ত্রেক্সন্দা ত্রেন চেনবা য়াহল্লগনি। নৌনা শেমগৎলবা হোসপেত স্তেসন অসিনা চৎথোক-চৎশিন তৌরিবশিংদা মতমগী অনৌবা খুদোংচাবা কয়া পীরগনি। স্তেসন অসি হাম্পি মোনুমেন্তশিং মান্নবা দিজাইন তৌবনি।
প্রধান মন্ত্রীনা হুবলি-ধারৱার স্মার্দ সিতিকী তোঙান-তোঙানবা প্রোজেকশিং শঙ্গাগনি অমসুং উরেপ-উয়ুং তমগনি। হায়রিবা প্রোজেকশিং অসিগী অপুনবা শেনফম চাউরাক্না লুপা করোর ৫২০ রোম্নি। মসিগী থবকশিং অসিনা মীয়াম লু-নানবা, অশোই-অঙাম থোক্তবা, মীয়ামগী অহাংবা মফম লৈবা হেনগৎহন্দুনা পুন্সি মহিং থাক ৱাংখৎহনগনি অমসুং তাউন অসি তুংদা সহর অমা ওইরক্কনি।
প্রধান মন্ত্রীনা জয়দেব হোস্পিতাল অমসুং রিছার্স সেন্তরগী উরেপ-উয়ুং তমগনি। হোস্পিতাল অসি লুপা করোর ২৫০ চঙনা শাগদবনি অমসুং লমদম অসিগী মীয়ামদা থম্মোয়গী লায়নাশিং লায়য়েংবগী অৱাংবা থাক্কী খুদোংচাবা পীগনি। প্রধান মন্ত্রীনা ধারৱার মল্তি ভিলেজ ৱাতর সপ্লাই স্কিমগী উরেপ-উয়ুং তমগনি অমসুং মসি লুপা করোর ১০৪০ চঙনা পায়খৎকদবনি। মহাক্না লুপা করোর ১৫০ রোম চঙনা পায়খৎকদবা তুপ্পারিহাল্লা ফ্লদ দেমেজ কন্ত্রোল প্রোজেকশু উরেপ-উয়ুং তমগনি। প্রোজেক অসিগী পান্দমদি ঈশিং ইচাউনা মরম ওইদুনা থোকহনবা অমাঙবশিংদগী ঙাকথোক্নবা রেতেন্নিং ৱালশিং শাবা অমসুং তোর্বানশিং শেমজিনবনি।
