প্রধান মন্ত্রী, শ্রী নরেন্দ্র মোদীনা দিসেম্বর ২৭, ২০২১দা হিমাচল প্রদেশকী মন্দিদা চৎকনি। মহাক্না নুংথিলগী পুং ১২গী অদুৱাইদা লুপা করোর ১১,০০০ হেনবা শেনফমগী হাইদ্রোপাৱর প্রোজেক্ত শঙ্গাবগা লোয়ননা উরেপ উয়ুংসু তমগনি। থৌরম অসিগী মমাংদা, মহাক্না অয়ুক্কী পুং ১১.৩০গী অদুৱাইদাপি.এম.না হিমাচল প্রদেশ গ্লোবেল ইনভেস্তর্স মীতকী অনিশুবা গ্রাউন্দ ব্রেকিং থৌরমসু লুচিংগনি।
প্রধান মন্ত্রীনা লৈবাক অসিদা শিজিন্নদনা লৈরিবা রিসোর্সশিংবু মপুং ফানা শিজিন্নহন্নবা মতম পুম্বদা মিৎয়েং চঙদুনা লাক্লি। হীরম অসিগী মতুং ইনবা খোঙথাং অমদি হিমালয়া লমদমগী হাইদ্রোপাৱরগী মতিকপু নীংথিনা শিজিন্নবা অসিনি। প্রধান মন্ত্রীনা খোঙচৎ অসিদা শঙ্গাগদৌরিবা অমসুং উরেপ উয়ুং তমগদৌরিবা প্রোজেক্তশিং অসিনা মাইকৈ অসিদা থাংজিনবা মরু ওইবা খোঙথাং অমা ওইবগী মমি তারি।
প্রধান মন্ত্রীনা রেনুকাজী দাম প্রোজেক্তকী উরেপ উয়ুং তমগনি। চাউরাকপা দিকেদ মরিদগী পন্দুনা লাক্লিবা প্রোজেক্ত অসি প্রধান মন্ত্রীগী কোওপরেতিব ফেদেরেলিজমগী মঙলানগী মখাদা কেন্দ্র সরকারনা রাজ্য তরুক, মিং ওইনা পল্লবদা হিমাচল প্রদেশ, উত্তর প্রদেশ, হরিয়ানা, রাজস্থান, উত্তরাখন্দ অমসুং দিল্লীবু প্রোজেক্ত অসিগীদমক্তা অমত্তা ওইনা পুশিল্লকখিবা মতুংদা ওইথোকখিবনি। এম.দবল্যু. ৪০গী প্রোজেক্ত অসি চাউরাকপা শেনফম লুপা করোর ৭০০০ চঙদুনা শাগনি। মসিনা দিল্লীগীদমক্তা য়াম্না কান্নবা ওইগনি অমসুং মসিদগী দিল্লীনা চহি অমদা চাউরাকপা মিলিয়ন ক্যুনিক মীতর ৫০০গী ঈশিং ফংগনি।
প্রধান মন্ত্রীনা লুহরি স্তেজ ১ হাইদ্রো পাৱর প্রোজেক্তকী উরেপ উয়ুংসু তমগনি। এম.দবল্যু. ২১০গী প্রোজেক্ত অসি চাউরাকপা শেনফম লুপা করোর ১৮০০ চঙদুনা শাগনি। মসিনা চহিদা চাউরাকপা মিলিয়ন য়ুনিত ৭৫০গী মৈ পুথোকপা ঙমগনি। মতমগা চুনবা অমসুং থাজবা য়াবা গ্রিদ সপ্পোর্ত অসিনা লমদমসিগী য়ুম্লোন্নবা রাজ্যশিংদসু কান্নবা পীগনি।
প্রধান মন্ত্রীনা ধোলাসিধ হাইদ্রো পাৱর প্রোজেক্তকী উরেপ উয়ুংসু তমগনি। মসিনা হমিরপুর জিলাগী অহানবা হাইদ্রোপাৱর প্রোজেক্ত ওইগনি। এম.দবল্যু. ৬৬কী প্রোজেক্ত অসি চাউরাকপা শেনফম লুপা করোর ৬৮০ চঙদুনা শাগনি। মসিনা চহিদা চাউরাকপা মিলিয়ন য়ুনিত ৩০০গী মৈ পুথোকপা ঙমগনি।
প্রধান মন্ত্রীনা সাৱরা-কুদ্দু হাইদ্রো পাৱর প্রোজেক্ত শঙ্গাগনি । এম.দবল্যু. ১১১গী প্রোজেক্ত অসি চাউরাকপা শেনফম লুপা করোর ২০৮০ চঙদুনা শাবনি। মসিনা চহিদা চাউরাকপা মিলিয়ন য়ুনিত ৩৮০গী মৈ পুথোকপা ঙমগনি অমসুং রাজ্যসিদা চহিদা লুপা করোর ১২০ হেনবগী রেভেন্যু তানবদা তেংবাংগনি।
প্রধান মন্ত্রীনা লুচিংদুনা হিমাচল প্রদেশ গ্লোবেল ইনভেস্তর্স মীতকী অনিশুবা গ্রাউন্দ ব্রেকিং থৌরমসু পাংথোক্কনি। চাউরাকপা লুপা করোর ২৮,০০০গী শেনফমগী প্রোজেক্ত হৌবগা লোয়ননা মীফম অসিনা লমদম অসিদা লৈগদবা ইনভেস্তমেন্ত হেনগৎহনগনি হায়বগী থাজবা থম্লি।
