প্রধান মন্ত্রী, শ্রী নরেন্দ্র মোদীনা জনুৱারী 19দা মহারাস্ত্রা, করনাতকা অমসুং তমিল নাদুদা চৎকনি। নুমিৎ অসিগী অয়ুক্কী পুং 10.45 তাবা মতমদা, প্রধান মন্ত্রীনা মহারাস্ত্রগী সোলাপুরদা চাউখৎ খোঙথাংগী প্রোজেক্ত কয়া শঙ্গাগনি অমসুং উরেপ উয়ুংসু তমগনি। নুংথিলগী চাউরাকপা পুং 2.45 তাবা মতমদা, প্রধান মন্ত্রীনা করনাতকাগী বেঙ্গালুরুগী বোইং ইন্দিয়া ইঞ্জিনিয়রিং অমসুং তেক্নোলোজী সেন্তর অমা শঙ্গাগনি অমসুং বোইং সুকনয়া প্রোগ্রাম হায়বা অমসু হৌদোক্কনি। মখা তারকপা ওইনা নুমিদাংগী পুং 6 তাবা মতমদা, প্রধান মন্ত্রীনা তমিল নাদুগী চেন্নৈদা পাংথোকপা খেলো ইন্দিয়া য়ুথ গেম্স 2023 হৌদোকপগী থৌরমদা শরুক য়াগনি।
সোলাপুরদা প্রধান মন্ত্রী
প্রধান মন্ত্রীনা মহারাস্ত্রগী সোলাপুরদা পাংথোকপা মীয়ামগী থৌরম অমদা চাউরাক্না লুপা করোর 2000গী AMRUT (অতল মিসন ফোর রিজুবিনেসন অমসুং অর্বান ত্রান্সফোর্মেসন)কী প্রোজেক্ত 8কী উরেপ উয়ুং তমগনি।
মহারাস্ত্রদা PMAY-অর্বানগী মখাদা শাবা লোইশিনখ্রবা য়ুম 90,000 হেনববু প্রধান মন্ত্রীনা মীয়ামদা খুৎশিন্নগনি। মখা তারকপদা, মহাক্না সোলাপুরগী রাইনগর হাউজিং সোসাইতীগী য়ুম 15,000 অমগসু মীয়ামদা খুৎশিন্নগনি, হায়রিবা য়ুমশিং অসিগী বেনেফিশরীশিংগী মনুংদা হেন্দলুম শিন্মী, ভেন্দর, পাৱর লুমগী শিন্মী, ফত্ত-হৌদি খোম্বা মীওই, বিরিগী শিন্মী, দ্রাইভর অমসুং অতোপ্পা মীওই লিশিং কয়া য়াওরি।
প্রধান মন্ত্রীনা থৌরম অসিগী মনুংদা মখা তারকপা ওইনা, মহারাস্ত্রগী PM-SVANIDHIগী বেনেফিশরী 10,000দা অহানবা অমসুং অনিশুবা ইন্সতোলমেন্ত থাদোকপা হৌগনি।
বেঙ্গালুরুদা প্রধান মন্ত্রী
প্রধান মন্ত্রীনা বেঙ্গালুরুদা লৈবা স্তেত ওফ দি আর্ত বোইং ইন্দিয়া ইঞ্জিনিয়রিং অমসুং তেক্নোলোজী সেন্তর (BIETC) অমা শঙ্গাগনি। লুপা করোর 1,600 থাদদুনা শাবা একর 43 চাউবা কেম্পস অসিনা বোইংনা USAগী মপান্দা খ্বাইদগী চাউনা ইনভেস্ত তৌবা খোঙথাং অমা ওইগনি। বোইংগী ভারতকী অনৌবা কেম্পস অসিনা ভারতকী মতিক লৈবা স্তার্তঅপ, লন্নাই অমসুং সরকারগী ইকোসীস্তেম অসিগা লৈনবা মরীগী মশক নাইবা খুদম অমা ওইরগনি। মসিনা মালেমগী এরোস্পেস অমসুং দিফেন্স ইন্দস্ত্রীগী নেক্স জেনেরেসন প্রদক্ত অমসুং সর্ভিস কয়া শেম্বদা মতেং পাংগনি।
প্রধান মন্ত্রীনা লৈবাক্কী শাহৌ লৌখৎলক্লিবা এভিএসন সেক্তর অসিদা নুপীমচাশিংনা মশিং য়াম্না শরুক য়াহনবদা তেংবাংবগী পান্দম থম্বা বোইং সুকনয়া প্রোগ্রাম অমা হৌদোক্কনি। প্রোগ্রাম অসিনা ভারত শিনবা থুংবগী নুপীমচাশিংগী মফমদা সাইন্স, তেক্নোলোজী, ইঞ্জিনিয়রিং অমসুং মেথ (STEM)কী হীরমগী ক্রিতিকেল স্কিল তম্বগী খুদোংচাবা পীগনি অমসুং এভিএসন সেক্তরদা থবক ফংহন্নবা ত্রেনিংসু পীগনি। নুপমচাশিংগী ওইনদি, প্রোগ্রাম অসিনা STEMদা কেরিয়র শেম্বা পামহন্নবা ইথিল পীনবগীদমক্তা হান্নদগী থৌরাং য়াত্তুনা থম্লবা মফম 150দা STEM লেব শাগনি। প্রোগ্রাম অসিনা পাইলোত ওইনবা ত্রেনিং তৌরিবী নুপীশিংদা স্কোলার্শিপ পীগনি।
খেলো ইন্দিয়া য়ুথ গেম্স 2023দা প্রধান মন্ত্রী
প্রধান মন্ত্রীনা গ্রাসরুত স্পোর্ত দিভেলপমেন্তপু খুমাং চাউশিলহনবা অমসুং হৌগৎলক্লিবা স্পোর্তকী তেলেন্তশিংবু য়োকখৎপদা খোঙফম চেৎলিবা অসিনা খেলো ইন্দিয়া য়ুথ গেম্স হৌদোকহনখি। প্রধান মন্ত্রীনা চেন্নৈগী জৱাহর্লাল নেহরু স্তেদিয়মদা পাংথোক্কদৌরিবা 6শুবা খেলো ইন্দিয়া য়ুথ গেম্স 2023 অসিগী থৌরম মপু ওইগনি। খেলো ইন্দিয়া য়ুথ গেম্স অসি খা ভারত্তা পাংথোকপসি মসিনা অহানবা ওইগনি। গেম্স অসি তমিল নাদুগী মরু ওইবা শহর মরি, মিং ওইনা পল্লবদা, চেন্নৈ, মদুরাই, ত্রিচী অমসুং কোইম্বতোরদা জনুৱারী 19-24, 2024 ফাওবা পাংথোক্কনি।
গেম্স অসিগী মাস্কোতনা বীর মঙ্গাই ওইগনি। বীর মঙ্গাই হায়না নুংশিনা কৌনবা রানী বেলু নচিয়র অসিদি ব্রিতিশকী লোইলম লৈঙাক্কী মাইয়োক্তা লান হৌখিবী ভারতকী মহারানী অমনি। মাস্কোত অসিনা নুপীগী পাঙ্গলগা শাগোন্নবা ভারত নুপীশিংগী মথৌনা অমসুং ইথিলগী খুদম ওইরি। গেম্স অসিগী লোগোদা কবি থিরুবল্লুবরগী শক্তম য়াওরি।
নুমিৎ 13গী মনুংদা য়াম্লবা মফম 15দা শন্দোক্তুনা মশান্না 26তা কম্পিতিতিব ইভেন্ত 275 অমসুং দেমো স্পোর্ত 1গা লোয়ননা পাংথোক্কদৌরিবা খেলো ইন্দিয়া য়ুথ গেম্সকী হন্দক্কী তাঙ্কক অসিদা শান্নরোই 5600 হেনবনা শরুক য়াগনি। মশান্না 26 অসিদি ফুতবোল, ভোল্লীবোল, বেদমিন্তন্নচিংবা কনভেনস্নেল স্পোর্ত অমসুং কলারিপায়ত্তু, গতকা, থাং তা, কবদ্দী অমসুং য়োগাসনগুম্বা নাৎকী তোঙান-তোঙানবা মশান্না কয়ানা শেম্বনি। তমিল নাদুগী ত্রেদিস্নেল স্পোর্ত অমা ওইরিবা সিলম্বম অসিবু খেলো ইন্দিয়া য়ুথ গেম্সকী পুৱারীদা দেমো স্পোর্ত অমা ওইনা খ্বাইদগী ইহান হান্না হৌদোক্লি।
প্রধান মন্ত্রীনা হৌদোকপগী থৌরমদা ব্রোদকাস্তিং সেক্তরগা মরী লৈনবা লুপা করোর 250গী প্রোজেক্তশিং হৌদোকপগা লোয়ননা উরেপ উয়ুংসু তমগনি। মসিগী মনুংদা নৌনা শক্তাক পীরবা দি.দি. পোধিগাইবু দি.দি. তমিল হায়না হৌদোকপা; রাজ্য 8তা আকাশবানী FM প্রোজেক্ত 12 হৌদোকপা; অমসুং জম্মু অমসুং কশ্মিরদা দি.দি. ত্রান্সমিত্তর 4 হৌদোকপা য়াওরি। পুম্নমক অসিগা লোয়ননা, প্রধান মন্ত্রীনা রাজ্য 12তা অনৌবা FM ত্রান্সমিত্তর প্রোজেক্ত 26কী উরেপ উয়ুংসু তমগনি।
