প্রধান মন্ত্রী, শ্রী নরেন্দ্র মোদীনা ওগস্ত 12, 2023দা মধ্য প্রদেশতা চৎকনি। মহাক্না নুমিৎ অসিমক্কী নুংথিলগী পুং 2:15 তাবা মতমদা সাগর জিলাদা থুংগনি, মহাক্না মফমসিগী সন্ত শিরোমনী গুরুদেব শ্রী রবিদাসজী মেমোরিএল স্থলদা ভুমী পুজন পাংথোক্কনি। মখা তারকপা ওইনা, প্রধান মন্ত্রীনা নুংথিলগী পুং 3:15 তারকপা মতমদা ধানাদা পাংথোকপা মীয়ামগী মীফমদা শরুক য়াদুনা সন্ত শিরোমনী গুরুদেব শ্রী রবিদাসজী মেমোরিএলগী উরেপ উয়ুং তমগনি।
শক্নাইরবা লাইনীংবা অমসুং খুন্নাইদা অহোংবা পুরকপা মীওইশিংবু ইকায় খুম্নবনা প্রধান মন্ত্রীনা পাংথোকপা থবকশিংগী অখন্নবা শক্তাক অমা ওইদুনা লাক্লি। মসিগুম্বা মিৎয়েং অসিনা লমজিংদুনা, সন্ত শিরোমনী গুরুদেব শ্রী রবিদাসজী মেমোরিএল অসি একর 11.25 হেন্না পাক চাউবা মফম অমদা লুপা করোর 100 হেন্না চঙদুনা শাগদৌরিবনি। নীংথিরবা মেমোরিএল অসিদা সন্ত শিরোমনী গুরুদেব রবিদাসজীগী পুন্সি, ৱাখল্লোন অমসুং পাউতাকশিং উৎপা পুক্নিং হুনীংঙাই ওইরবা আর্ত ম্যুজিয়ম অমসুং গেল্লরী লৈগনি। মসিদা লাকপা মীওইশিংগীদমক্তা ভক্ত নিৱাস, ভোজনালয়নচিংবা ফেসিলিতী কয়াসু মফমসিদা লৈগনি।
থৌরম অসিগী মনুংদা, প্রধান মন্ত্রীনা লুপা করোর 4000 হেনবা শেনফমগী রেল অমসুং রোদ সেক্তর প্রোজেক্ত কয়া মীয়ামদা খুৎশিন্নবগা লোয়ননা উরেপ উয়ুংসু তমগনি।
কোতা-বিনা রেল লম্বী দব্লিং তৌবগী থবক লোইশিনখিবগা লোয়ননা প্রধান মন্ত্রীনা মসিবু লৈবাক মীয়ামদা খুৎশিন্নগনি। চাউরাক্না লুপা করোর 2475 হেন্না চঙখি হায়না পানরিবা প্রোজেক্ত অসিনা রাজস্থানগী কোতা অমসুং বারন জিলা, অমসুং মধ্য প্রদেশকী গুনা, অশোকনগরমসুং সাগর জিলা ফাওদুনা চেনগনি। মসিগী অহেনবা রেল লম্বী অসিনা হান্নদগী হেন্না ফগৎলবা মোবিলিতীগী কেপাসিতী হেনগৎহনগনি অমসুং লম্বী অসিদা চেল্লিবা ত্রেনশিংগী খোঙজেল হেনগৎহনবদসু তেংবাংগনি।
লুপা করোর 1580 হেন্না চঙনা পায়খৎকদবা রোদ প্রোজেক্ত অনিগী উরেপ উয়ুংসু প্রধান মন্ত্রীনা তমগনি। মসিগী মনুংদা মোরিকোরী-বিদিশা-হিনোতিয়া শম্নহনবা লম্বীবু লেন মরিদা ওন্থোকপা অমসুং হিনোতিয়াগা মেহলুৱাগা শম্নহনগদবা রোদ প্রোজেক্ত য়াওরি।
