লাক্লিবা ওক্তোবর ১৬ তা প্রধান মন্ত্রী শ্রী নরেন্দ্র মোদী অন্ধ্র প্রদেসতা চৎকনি। চাউরাক্না অয়ুক্কী পুং ১১:১৫ রোম তাবদা, মহাক্না নন্দ্যাল জিলাদা লৈবা শ্রীসাইলামদা শ্রী ব্রাহমারম্বা মাল্লিকঅর্জুন শ্বামী ভারলা দেবাস্থানমদা পুজা অমসুং দর্শন পাংথোক্কনি। তুংদা, নুংথিলগী পুং ১২:১৫ রোম তাবদা, প্রধান মন্ত্রী শ্রীসাইলামদা লৈবা শ্রী সিবাজী শপুর্তি কেন্দ্রদা চৎকনি।
প্রধান মন্ত্রীনা কুরনুলদা চৎকনি অমসুং মফম অদুদা মহাক্না নুংথিলগী পুং ২:৩০ রোম তাবদা লুপা করোর ১৩,৪০০ রোমগী চাউখৎ-থৌরাংগী প্রোজেকশিং উরেপ-উয়ুং তমগনি, শঙ্গাগনি অমসুং মীয়ামদা কৎথোক্কনি। থৌরম অদুদা মহাক্না মীয়ামদা ৱা ঙাংগনি।
শ্রীসাইলামদা প্রধান মন্ত্রী
জয়তিরলিংশিং ১২ গী মনুংদা অমা ওইরিবা অমসুং শক্তি পীথ ৫২ গী মনুংদা অমা ওইরিবা, শ্রী ব্রাহমারম্বা মাল্লিকঅর্জুন শ্বামী ভারলা দেবাস্থানমদা প্রধান মন্ত্রীনা পুজা অমসুং দর্শন পাংথোক্কনি। লাইশঙ অসিগী অঙকপা শক্তম অমদি লাইশঙগী মফম অমতদা জয়তিরলিঙ্গ অমসুং শক্তি পীথ পুন্না লৈমিন্নবনি, মসিনা লৈবাক শীনবা থুংনা তোপ-তোপ্পা মখল অমা ওইহল্লে।
প্রধান মন্ত্রীনা মমিং লৈরবা লালবন্দ মরি- প্রাতাপগাদ, রাজগাদ, রাইগাদ অমসুং সিবনেরিগী নমুনাশিং কাচিন মরীদা থম্বা, ধ্যনা মন্দির অমা য়াওবা মেমোরিএল কমপ্লেক্স- শ্রী সিবাজী শপুর্তি কেন্দ্রদা চৎকনি। মসিগী ময়াইদা ধ্যান তৌদুনা লৈবা ছত্রপতি সিবাজী মহারাজগী মীতম অমা লৈরি। ১৬৭৭ দা ছত্রপতি সিবাজী মহারাজনা শেংলবা লাইফম অসিদা লাকখিবা পুৱারি ওইরবা খোঙচৎ নিংশিংদুনা লিংখৎখিবা শ্রী সিবাজী মেমোরিএল কম্মিতিনা কেন্দ্র অসি থবক ওইনা পাংথোকপনি।
কুরনুলদা প্রধান মন্ত্রী
প্রধান মন্ত্রী শ্রী নরেন্দ্র মোদীনা লুপা করোর ১৩,৪৩০ রোমগী চাউখৎ-থৌরাংগী প্রোজেকশিং উরেপ-উয়ুং তমগনি, শঙ্গাগনি অমসুং মীয়ামদা কৎথোক্কনি। প্রোজেকশিংগী য়াওরিবা হিরমশিংদি উদ্যোগ, পৱার ত্রান্সমিসন, লম্বীশিং, রেলৱেশিং, দিফেন্স মেনুফেকচরিং অমসুং পেত্রোলিয়ম অমসুং নেচরেল গ্যাসনি, মসিদা লমদম অসিগী ইনফ্রাষ্ট্রকচর চাউখৎনবা, উদ্যোগ লিংখৎপা য়াংশিন্নবা অমসুং রাজ্য অসিগী খুন্নাই অমসুং শেন-থুম চাউখৎনবা সরকারনা কন্না হোৎনবগী মমি তারে।
লুপা করোর ২,৮৮০ গী শেনফম অমা থাদদুনা, কুরনুল-৩ পুলিং ষ্টেসন্দা ত্রান্সমিসনগী থবকশিং ফগৎনবগীদমক প্রধান মন্ত্রীনা উরেপ-উয়ুং তমনি। প্রোজেক অসিদা কে.ভি ৭৬৫ দবল-সর্কুইত কুরনুল-৩ পুলিং ষ্টেসন-চিলাকালুরিপেতা ত্রান্সমিসন লাইন য়াওরি, মসিনা ত্রান্সফোর্মেসন কেপাসিতি ৬,০০০ এম.ভি.এ হেনগৎহনগনি অমসুং লৈবাক অসিগী চাউখৎপদা মতেং পাংনবা রিন্যুএবল ইনর্জি য়াম্না পুবা ঙমহনগনি।
প্রধান মন্ত্রীনা অপুনবা লুপা করোর ৪,৯২০ হেন্না চঙনা কুরনুলদা পায়খৎকদবা ওরভাকাল ইন্দষ্ট্রিএল এরিয়া অমসুং কাদাপাদা কোপ্পারতি ইন্দষ্ট্রিএল এরিয়াগী উরেপ-উয়ুং তমগনি। নেসনেল ইন্দষ্ট্রিএল করোরিদোর দিবলপমেন্ত এন্দ ইমপ্লেমেন্তেসন ত্রষ্ট (এন আই সি দি আই তি) অমসুং অন্ধ্র প্রদেস ইন্দষ্ট্রিএল ইনফ্রাষ্ট্রকচর কোর্পোরেসন লিমিতেদ ( এ পি আই আই সি) না পুন্না পায়খৎপা অনৌবা, হিরম কয়াগী ইন্দষ্ট্রিএল হবশিং অসিদা প্লগ-এন্দ-প্লে ইনফ্রাষ্ট্রকচর অমসুং ৱাল্ক-তু-ৱার্কগী খুদোংচাবশিং য়াওরি। হবশিং অসিদা লুপা করোর ২১,০০০ থাদরক্কনি অমসুং চাউরাক্না থবক লাখ ১ পীগনি, অন্ধ্র প্রদেসকী রায়ালাসিমা লমদমদা উদ্যোগ চাউখৎপা অমসুং মালেমগা চাংদম্নবা হেনগৎহনগনি হায়বগী থাজবা থম্লি।
লম্বীগী ইনফ্রাষ্ট্রকচর ফগৎনবা, প্রধান মন্ত্রীনা লুপা করোর ৯৬০ হেনবগী সভাবারামদগী সিলানগর ফাওবা লেন তরুক্কী গ্রিন ফিল্দ হায়ৱেগী উরেপ-উয়ুং তমগনি, মসিনা ভিশাখাপাত্নমদা মী চিনবা হন্থহনগনি অমসুং ললোন-ইতিক অমসুং থবক ফংবগী খুদোংচবা হেনগৎহনগনি। মসিগী মথক্ত, লুপা করোর ১১৪০ গী লম্বীগী প্রোজেক ৬ শঙ্গাগনি, মখোয়গী মনুংদা পিলেরা-কালুর সেক্সন লেন মরি ওইহনবা, কাদাপা/নেল্লোর বোর্দরদগী সি.এস পুরম ফাওবা পাকথোকপা, এন.ঐচ-১৬৫ দা গুদিবাদা অমসুং নুজেলা রেলৱে ষ্টেসনগী মরক্ত লেন মরিগী রেল ওভর ব্রিজ, এন.ঐচ-৭১৬ দা পাপাগনি তুরেল মথক্ত থোঙ, এন.ঐচ-৫৬৫ দা কানিগিরি বাইপাস অমসুং এন.ঐচ-৫৪৪দিদিদা এন.গুন্দলাপাল্লিদা বাইপাস সেক্সন ফগৎহনবা য়াওরি। প্রোজেকশিং অসিনা অন্ধ্র প্রদেস শীনবা থুংনা অশোই-অঙাম থোক্তবা, লম্বী চৎপগী মতম হন্থহনবা অমসুং লমদম অসিগী লম্বী-থোঙ ফগৎহনগনি।
প্রধান মন্ত্রীনা মখা তানা লুপা করোর ১,২০০ হেনবগী মরুওইবা রেলৱে প্রোজেকশিং উরেপ-উয়ুং তমগনি অমসুং মীয়ামদা কৎথোক্কনি। প্রোজেকশিং অদুগী মনুংদা য়াওরিবদি, কোত্তবালাসা-ভিজিয়ানগরমগী মরিশুবা লেন লাইন অমসুং পেন্দুরতি অমসুং সিমহাচালম নোর্থকী মরক্ত রেল ফ্লাইওভর উরেপ-উয়ুং তম্বা অমসুং লাইন অনিদা ওনখৎলবা কোত্তবালাসা-বোদাবারা সেক্সন অমসুং সিমিলিগুদা-গোরাপুর সেক্সন মীয়ামদা কৎথোকপনি। হায়রিবা প্রোজেকশিং অসিনা চিনবা হন্থহনগনি, চৎথোক-চৎশিন য়াংখৎহনগনি, পেসেঞ্জরশিং অমসুং পোৎ-চৈশিং নুংঙাইনা চৎহনগনি, লমদম অসি শীনবা থুংনা উদ্যোগ, ললোন-ইতিক অমসুং তুরিজম চাউখৎহনগনি অমসুং লমদম অসিগী মীয়াম থবক ফংবগী খুদোংচাবশিং পীগনি।
ইনর্জি সেক্তরদা, প্রধান মন্ত্রীনা লুপা করোর ১,৭৩০ রোম চঙনা পায়খৎপদা গেল ইন্দিয়া লিমিতেদকী শ্রীকাকুলম-অঙ্গুল নেচরেল গ্যাস পাইপলাইন মীয়ামদা কৎথোক্কনি, মসি অন্ধ্র প্রদেসতা কিমি ১২৪ অমসুং উরিসাদা কিমি ২৯৮ রোম শাংলি। প্রধান মন্ত্রীনা লুপা করোর ২০০ চঙনা পায়খৎপা অন্ধ্র প্রদেসকী চিত্তুরদা ইন্দিয়ান ওইলগী ৬০ তি.এম.তি.পি.এ (থাউজন্দ মেত্রিক তন পর এন্নম) এল.পি.জি বোত্তলিং প্লান্তসু শঙ্গাগনি। প্লান্ত অসিনা অন্ধ্র প্রদেসকী জিলা ৪, তামিল নাদুগী জিআল ২ অমসুং কর্নাতকাগী জিলা ১ দা দিষ্ট্রিব্যুতর ৮০ গী খুৎথাংদা কষ্টমর লাখ ৭.২ দা গ্যাস ফংহনগনি। মসিনা লমদম অসিগী য়ুমথোঙশিং অমসুং ললোন-ইতিক্কী মফমশিংদা এল.পি.জি ফংহনবদা মরুওইবা থৌদাং অমা লৌগনি।
দিফেন্স মেনুফেকচরিং চাউখৎনবা, লুপা করোর ৩৬০ রোম চঙনা ভারত ইলেক্ত্রোনিক্স লিমিতেদনা কৃষ্ণনা জিলাগী নিম্মালুরুদা লিংখৎপা এদভান্স নাইত ভিজন প্রদক্স ফেক্তরি প্রধান মন্ত্রীনা মীয়ামদা কৎথোক্কনি। ফেক্তর অসিদা ভারতকী দিফেন্স ফোর্সশিংগী অফবা মখলগী ইলেক্ত্রো-ওপ্তিকেল সিষ্টেমশিং পুথোক্কনি, মশাগী ওক্নবা ঙাক-শেনগী খুৎলায়শিং পুথোকপা হেনগৎহনগনি অমসুং লমদম অসিদা খুৎ-শা হৈবা মীওইশিং থবক ফংবা হেনগৎহনগনি।
