প্রধান মন্ত্রী শ্রী নরেন্দ্র মোদীনা ওক্তোবর ৯ দা, নুংথিল পুং ১ রোম তাবদা, ভিদিও কনফরেন্সকী খুৎথাংদা মহারাস্ত্রাদা লুপা করোর ৭৬০০ হেনবগী তোঙান-তোঙানবা চাউখৎ-থৌরাংগী প্রোজেকশিং উরেপ-উয়ুং তমগনি।
প্রধান মন্ত্রীনা দোক্তর বাবাসাহেব অম্বেদকার ইন্তরনেসনেল এয়রপোর্ত, নাগপুর পাকথোক-চাউথোক্নবা লুপা করোর ৭০০০ রোম চঙগদবা প্রোজেক্কী উরেপ-উয়ুং তমগনি। মসিনা মেনুফেকচরিং, এভিএসন, তুরিজম, লোজিসতিক্স অমসুং অনা-লায়েং য়াওনা তোঙান-তোঙানবা হিরমশিং চাউখৎহনবদা মতেং পাংগনি অমসুং নাগপুর সহর অমসুং বিদরভা লমদমদা কান্নবা পীগনি।
প্রধান মন্ত্রীনা লুপা করোর ৬৪৫ চঙনা সির্দি এয়রপোর্তকী অনৌবা ইন্তিগ্রেতেদ তর্মিনেল বিল্দিং শানবা উরেপ-উয়ুং তমগনি। মসিনা সির্দিদা লাই খুরুম্বা লাকপা মীওইশিংদা মালেম থাক্কী খুদোংচাবশিং ফংহনগনি। সাই বাবাগী অধ্যাতিক ওইরবা নীম পাম্বীদা য়ুম্ফম ওইদুনা তর্মিনেল অসি শেমগৎকনি।
মীওই খুদিংমক্ত মমল হোংবা অনা-লায়েংগী খুদোংচাবা লাইনা ফংহন্নবা মহাক্না থাজবা পীখিবগী মতুংইন্না, মহারাস্ত্রাগী মুম্বাই, নাসিক, জলনা, অমরাবতি, গাদচিরোলি, বুলধানা, ৱাসিম, ভন্দারা, হিঙ্গোলি অমসুং থানেদা সরকারগী মেদিকেল কলেজ ১০ প্রধান মন্ত্রীনা শঙ্গাগনি। অন্দর গ্রেজুয়েত অমসুং পোস্ত গ্রেজুয়েত সিতশিং হেনগৎহনবগা লোয়ননা, কলেজশিং অসিনা মীয়ামদা অখন্নবা অৱাংবা থাক্কী অনা-লায়েংগী খুদোংচাবশু পীগনি।
ভারত অসি মালেমদা স্কিলগী কোনুং ওইনা শেমগৎনবা মহাক্কী পান্দম মতুংইন্না, অৱাংবা থাক্কী তেক্নোলোজি অমসুং হেন্দস-ওন ত্রেনিংগা লোয়ননা উদ্যোগকী থৌরাং তৌরবা শিন্মী শেমগৎনবা পান্দম অমগা লোয়ননা প্রধান মন্ত্রীনা ইন্দিয়ান ইন্সতিতুৎ ওফ স্কিলস, মুম্বাই শঙ্গাগনি। পব্লিক-প্রাইভেদ পার্তনরশিপ মোদেল অমগী মখাদা, তাতা ইজুকেসন এন্দ দিবলপমেন্ত ত্রস্ত অমসুং ভারত সরকারনা পুন্না ইন্সতিতুৎ অসি লিংখৎপনি। মেকাত্রোনিক্স, আর্তিফিসিএল ইন্তিলিজেন্স, দেতা এনালিতিক্স, ইন্দস্ত্রিএল ওতোমেসন অমসুং রোবোতিক্সগুম্বা হিরমশিংদা ত্রেনিং পীনবা ইন্সতিতুৎ অসিনা থৌরাং তৌরি।
মখা তানা, প্রধান মন্ত্রীনা বিদ্যা সমিক্ষা কেন্দ্র মহারাস্ত্রা শঙ্গাগনি। ভি.এস.কে অসিনা মহৈরোয়শিং, ওজাশিং অমসুং লৈঙাকপশিংদা স্মার্দ উপাসথিতি, শ্বাধ্যায়গুম্বা চাতবোতশিংগী খুৎথাংদা একাদেমিক অমসুং এদমিনিস্ত্রেতিপ দেতা ফংহনগনি। মসিনা স্কুলশিং য়েংশিন্নবা, মমা-মপাশিং অমসুং সরকারগী মরক্তা অচেৎপা মরীশিং থম্নবা অমসুং মতেং পীনবা অৱাংবা থাক্কী লৌশিং কয়া পীগনি। মসিনা লাইরিক তাকপী তম্বীবগী থবকশিং অমসুং মহৈরোয়শিং লাইরিক তম্বা ফগৎহন্নবা মরুওইবা পাউতাক কয়া পীগনি।
