ঙসি শ্রী গনপতি সচ্চিদানন্দ স্বামিজীগী ৮০শুবা মপোক কুমওন থৌরমদা ভিদিও পাউজেল অমগী খুত্থাঙদা প্রধান মন্ত্রী শ্রী নরেন্দ্র মোদীনা ৱা ঙাঙখ্রে। থৌরম অদুদা প্রধান মন্ত্রীনা শ্রী গনবতি সচ্চিদানন্দ স্বামিজী অমসুং মহাক্কী তুংইনবশিংগী মফমদা য়াইফ পাউজেল পীখি। লাইনিংবা অমদি অখন্নবা মীথুং কয়ানা ‘হনুমত দ্বার’ শঙ্গাখিববুসু শ্রী মোদীনা পনখি।
পুরানগী ৱারোল পল্লদুনা প্রধান মন্ত্রীনা লাইনীংবা অমা পোক্লকপা, মহাক্কী পুন্সি অসি মহাকখক্তগী খোঙচৎ নত্তে, মসিদা খুন্নাইগী চাওখৎনবা অমদি নুংঙাই য়াইফনবগী খোঙচৎ অমসু য়াওরি হায়বসিগী শ্রী গনপতি সচ্চিদানন্দ স্বামিজীগী পুন্সিনা অচঙবা খুদম অমা ওইরি হায়না ফোঙদোকখি। দত্ত পীথমনা থৱায়গী ওইবা লমজিংগা লোয়ননা মতমগী খোঙচৎপুসু য়াওহনবা অসিদা প্রধান মন্ত্রীনা অপেনবা ফোঙদোকখি। মফমসিদা লৈরিবা অচৌবা হনুমানগী লাইশঙ অসিদা ৩দি মেপ্পিং, খোঞ্জেল অমসুং মৈগী কুম্হৈ উৎপা য়াবগী মতিং লৈ মফমসিদা অচৌবা উচেকশিংগী লম্পাক অমা লৈবগা লোয়ননা মসিবু চলাইনবগী মতমগা চুনবা থৌওং অমা লৈরি হায়না মহাক্না হায়খি। দত্ত পীথম ঙসি ভেদ নৈননবা অচৌবা মফম অমা ওইবতা নত্তনা ইপা ইপুশিংনা থমবিরমবা ঈশৈ-নোংমাইবু মীওইবগী হকচাঙ ফনা থম্নবগীদমক কমদৌনা শীজিন্নগদগে হায়বা হীরমসিদা থবক পায়খৎলি হায়না প্রধান মন্ত্রীনা ফোঙদোকখি। “মহৌশাগীদমক কাঙলোন শীজিন্নবা, তেক্নোলোজীগা থৱায়গী ওইবা খোঙচৎপা পুনশিন্নবা, হায়রিবশিং অসিনা ইচঙ থৌরবা ভারতকী থৱায় ওইরিবনি। স্বামিজীগুম্বা লাইনীংবশিংগী হোৎনজমলগী মপালনা ঙসি লৈবাকসিগী নহাশিংনা মখোয়গী চৎনবীগী মতিং খঙবা ঙম্লিবা অমদি মদুবু মাঙদা পুখৎলিবসিদা ঐ নুংঙাইবা ফাওই,” হায়না শ্রী মোদীনা হায়খি।
নীংতমবগী ৭৫শুবা চহিগী কুমওন থৌরম পাঙথোক্লিবা মতমসিদা স্বামিজীগী ৮০শুবা মপোক কুমওন থৌরম পাঙথোক্লি হায়না ফোঙদোক্লদুনা প্রধান মন্ত্রীনা লাইনীংবশিংনা মতম পুম্নমক্তা ইশাগী হায়বা ৱাখল্লোনসিগী ৱাংম লান্দুনা পুম্নমক্কী হায়বা ৱাখল্লোনসিদা থবক তৌনবা পুক্নিং থৌগত্তুনা লাক্লি হায়বা ৱাফম থমখি। “ঙসি লৈবাক অসিনা ‘সবকা সাথ, সবকা বিকাস, সবকা বিস্বাস অমসুং সবকা প্রয়াস’ হায়রিবা লাইৱা অসিগা লোয়ননা অপুনবগী ফিরেপ অমা লৌমিন্ননবা কৌরক্লি। ঙসি লৈবাকসিনা মশাগী অরিবা মতমগী নাৎ-চৎনবীবু মাঙহন্দনা থম্লি, মসিবু য়োকখৎলি অমদি মসিবু অনৌবা মাইওন পীদুনা মতমগা চুনহন্নবা হোৎনরি,” হায়না মহাক্না মখা তাখি। প্রধান মন্ত্রীনা মখা তারদুনা ফোঙদোকখিবদা, “ঙসি ভারতকী মশক য়োগ অমসুং মসিগী নহাশিংনা তাক্লি। ঙসি মালেম অসিনা ঐখোয়গী স্তার্তঅপশিংদা তুংগীদমক মীৎয়েঙ থম্লি। ঐখোয়গী ইন্দস্ত্রী, ঐখোয়গী ‘মেক ইন ইন্দিয়া’ মালেমগী মঙলান কয়াগী মঙাল অমা ওইরক্লি। হায়রিবা ফিরেপশিং অসি ফংবা ঙম্নবগীদমক ঐখোয় হোৎনবা তাই। ঐখোয়গী থৱায়গী ওইবা মফমশিং অসিনা মায়কৈ অসিদা চঙশিনবদা পুক্নিং থৌগৎনবগী মফম অমা ওইহনবা ঐনা পাম্মি।”
মহৌশাগী শক্তম ঙাক্ননবা অমসুং উচেকশিংগী য়াইফনবগীদমক মখোয়না পায়খৎলিবা থবকশিং শিংথারদুনা প্রধান মন্ত্রীনা দত্ত পীথমবু ঈশিং অমসুং তুরেলশিং ঙাক শেন্দুনা থম্নবগী মায়কৈদসু থবক পায়খৎপিনবা ৱাফম থমখি। দিস্ত্রিক্ত খুদিংদা অমৃথ সরোবর ৭৫ শেমগৎনবগী কেম্পেন অসিদা থৌদাং য়ানগীদমকসু মহাক্না হায়খি। স্বচ্চ ভারত অভিয়ানগী লমদা মখোয়না লৌরিবা থৌদাংগীদমকসু প্রধান মন্ত্রীনা শিংথাখি।
