প্রধান মন্ত্রী, শ্রী নরেন্দ্র মোদীনা ঙসি ভিদিও মেসেসকী থোংদা বেঙ্গলুরুদা পাঙথোকপা G20 দিজিতেল ইকনোমী মিনিস্তর্স মীত্তা ৱা ঙাংখ্রে।
থৌরম অদুদা ৱা ঙাংবদা প্রধান মন্ত্রীনা সাইন্স, তেক্নোলোজী, অমসুং ওন্তপ্রিনোর্শিপকী ৱাখল্লোন হৌরকফম ওইরিবা লমদম – বেঙ্গলুরু সহরদা দিগনিতীশিংবু তরাম্না ওকখ্রে অমসুং হায়খি মদুদি দিজিতেল ইকনোমীগী মরমদা খন্ননবা মসিদগী হেন্না ফবা মফম অমা লৈররোই।
প্রধান মন্ত্রীনা হৌখিবা চহি 9 অসিদা ভারত্তা অমুক্তা ওইখিদ্রিবা মওংদা দিজিতেল ত্রান্সফোর্মেসন পুরক্নবা 2015দা দিজিতেল ইন্দিয়া ইনিসিএতিব হৌদোকখিবা অদুবু থাগৎখ্রে। মহাক্না হায়খি ভারতকী দিজিতেল ত্রান্সফোর্মেসন অসি ইন্নোবেসন্দা লৈরিবা লেংদ্রবা থাজবা অমসুং খোঙজেল য়াংনা ইমপ্লিমেন্ত তৌবা অসিনা শক্তি পীখি অমরোমদনা কনাগুম্বা অমত্তা তুংওইনদুনা থনমদবা ইনক্লুসিব ওইবা ৱাখল্লোন্না ইথিল পীরি।
ত্রান্সফোর্মেসন অসিগী পাকচাউবা, খোঙজেল অমসুং লমগী মতাংদা পল্লদুনা প্রধান মন্ত্রীনা হায়খি ভারতকী ইন্তর্নেৎ য়ুজর মিলিয়ন 850না মালেমদা খ্বাইদগী হোংবা দেতা শীজিন্নবা মীওইশিংগী মরক্তা চল্লি। শ্রী মোদীনা গভর্নান্সতা অওনবা পুরক্নবা অমসুং হেন্না ইফিসিএন্ত, ইনক্লুসিব ওইহন্নবা, খোঙজেল য়াংহন্নবা অমসুং মনুং মপান ফাওনা উবা ঙমহন্নবা তেক্নোলোজী শীজিন্ননবা ফোঙদোকখি অমসুং খুদম ওইনা মীওই বিলিয়ন 1.3 কোনশিল্লিবা আধার – ভারতকী য়ুনিক দিজিতেল আইদেন্তিতী প্লেৎফোর্ম অসি পীখি। মহাক্না ফাইনান্সিএল ইনক্লুজন রিভোল্যুস্নাইজ তৌখি JAM ত্রিনিতী – জন ধন বেঙ্ক একাউন্তশিং, আধার অমসুং মোবাইল অমদি থা খুদিংগী ত্রাঞ্জেক্সন বিলিয়ন 10গী ময়াদা তৌরিবা UPI পেমেন্ত সিস্তেম অমসুং গ্লোবেল রিএল-তাইম পেমেন্তশিংগী 45% ভারত্তা তৌরিবা অসিগী মতাংদা পাউদমখি। প্রধান মন্ত্রীনা সিস্তেমদা লীকেজ লৈহন্দ্রিবা দাইরেক্ত বেনিফিৎ ত্রান্সফর প্লগ্গিং অমসুং দোলর বিলিয়ন 33 হেন্না তুংশিনবা ঙমহনখিবা অসিগী মতাংদসু ফোঙদোকখ্রে। ভারতকী কোবিদ ভেক্সিনেসন দ্রাইব থৌগৎখিবা CoWIN পোর্তেলগী মতাংদা পল্লদুনা প্রধান মন্ত্রীনা মসিনা দিজিতেল্লী ভেরিফাইএবল সর্তিফিকেৎশিংগা লোয়ননা ভেক্সিন দোজ বিলিয়ন 2 হেন্না দেলিবরী তৌবদা মতেং পাংখি হায়না ফোঙদোকখ্রে। শ্রী মোদীনা ইনফ্রাস্ত্রকচর অমসুং লোজিস্তিক্স মেপ তৌনবা তেক্নোলোজী অমসুং স্পাসিএল প্লান্নিং শীজিন্নরিবা গতী-শক্তি প্লেৎফোর্মগী মতাংদসু পনখি মদিনা প্লান্নিংদা মতেং পাংলি, শেল চংবা হন্থহল্লি অমসুং দেলিবরীগী খোঙজেল য়াংখৎহল্লি। প্রধান মন্ত্রীনা মখা তারদুনা ওনলাইন পব্লিক প্রোক্যুর্মেন্ত প্লেৎফোর্ম, গভর্নমেন্ত ই-মার্কেৎপ্লেসনা প্রোসেস তৌবদা ত্রান্সপরেন্সী অমসুং প্রোবিতী লৈহনখি অমসুং ই-কম্মর্স দিমোক্রেতাইজ তৌরিবা দিজিতেল কম্মর্সকী ওপন নেৎৱার্ক্কী মতাংদা ফোঙদোকখি। মহাক্না মখা তারদুনা হায়, “মপুং ফানা দিজিতাইজ তৌবা তেক্সেসন সিস্তেমশিংনা ত্রান্সপরেন্সী অমসুং ই-গভর্নান্স প্রমোৎ তৌরি”। প্রধান মন্ত্রীনা ভারতকী লোল কয়ামরুমদা দিজিতেল ইনক্লুজনগী সপ্পোর্ত পীগদবা AI-পাৱর্দ লেংগ্বেজ ত্রান্সলেসন প্লেৎফোর্ম, ভাসিনি দিবেলপ তৌখিবগী মতাংদসু ফোঙদোকখ্রে।
প্রধান মন্ত্রীনা হায়খি, “ভারতকী দিজিতেল পব্লিক ইনফ্রাস্ত্রকচরনা মালেমগী শীংনবশিংগীদমক স্কেলেবল, সেক্যুর অমসুং ইনক্লুসিব সোল্যুসনশিং পীরি”। লৈবাক্কী পাকচাউরবা দাইভর্সিতীগী মতাংদা পল্লদুনা প্রধান মন্ত্রীনা ভারত্তা লোল দোজন কয়া অমসুং দাইলেক চমা হেন্না লৈ ফোঙদোকখ্রে। মহাক্না মখা তারদুনা হায় মদুদি মসি ধর্ম খুদিংমক্কী অমসুং মালেম শিনবা থুংবদগী মশিং লাকঙমদ্রবা কলচরেল প্রেক্তিসশিংগী লমদম ওইরি। প্রধান মন্ত্রীনা হায়খি, “অরিবা চৎনবীশিংদগী হৌরগা খ্বাইদগী নৌবা তেক্নোলোজীশিং ফাওবদা ভারত্তা মীপুম খুদিংমক্কীদমক করিগুম্বা খরদি অদুমক লৈ”। অসিগুম্বা দাইভর্সিতী অসিগা লোয়ননা ভারতনা সোল্যুসনশিংগী মতিক চারবা তেস্তিং লেব ওইরি। ভারত্তা মাইপাক্লবা সোল্যুসন অদু মালেমদা লৈবা মফম অমা হেক্তদা লাইনা এপ্লাই তৌবা য়াগনি। প্রধান মন্ত্রীনা ভারতনা মালেমদা মাগী এক্সপরিয়েন্সশিং শিয়র তৌনবা শেম শাদুনা লৈ হায়বা তাক্নবা কোবিদ লাইচৎ মনুংদা মালেমগী য়াইফনবা ফংহনখিবা CoWIN প্লেৎফোর্ম অসি খুদম ওইনা পীখি। মহাক্না হায়খি ভারতনা কনাগুম্বা অমত্তা তুংওইননা থনমদনবা, মরু ওইনা গ্লোবেল সাউথকীদমক ওনলাইন গ্লোবেল পব্লিক দিজিতেল গুদস রিপোজিতরী – দি ইন্দিয়া স্তোক শেমখি।
প্রধান মন্ত্রীনা ৱার্কিং গ্রুপনা G20 ভর্চুএল দিজিতেল পব্লিক ইনফ্রাস্ত্রকচর রিপোজিতরীঅমা শেম্মিবা অসিদা অপেনবা ফোঙদোকখি অমসুং কম্মন ফ্রেমৱার্ক ফোর দিজিতেল পব্লিক ইনফ্রাস্ত্রকচরদা খুমাং চাউশিনবনা পুম্নমক্কীদমক ত্রান্সপরেন্ত, একাউন্তেবল, অমসুং ফীয়র দিজিতেল ইকোসিস্তেম অমা শেম্বদা মতেং পাংখি হায়না ফোঙদোদকখি। মহাক্না ক্রোস কন্ত্রী কম্পেরিজন ওন দিজিতেল স্কিল্স মতেং পাংনবা অমসুং ভর্চুএল সেন্তর ওফ এক্সিলেন্স ওন দিজিতেল স্কিল্লিং অমা লিংখৎনবা রোদমেপ অমা দিবেলপ তৌনবা লৌখৎলিবা খোঙথাংশিংবু তরাম্না ওকখ্রে। মহাক্না হায়খি মদুদি মসি ফ্যুচর-রেদী ৱার্কফোর্স অমগী মথৌ তাবশিং থুংহন্নবা মরু ওইবা খোঙথাংশিংনি। দিজিতেল ইকনোমীনা মালেমদা শন্দোরকপগা ইরোইননা সেক্যুরিতীগী অকিবা অমসুং শীংনবশিং মায়োক্নগনি হায়না ফোঙদোক্লদুনা প্রধান মন্ত্রীনা হায়খি সেক্যুর, ত্রস্তেদ, অমসুং রেজিলিএন্ত দিজিতেল ইকনোমী অমগীদমক G20 হায়-লেবেল প্রিন্সিপলশিংদা অমত্তা ওইনা য়ান্নবা পুরকপা মরু ওই।
G20 লৈবাকশিংদা ইনক্লুসিব ওইবা, খুমাং চাউশিনবা অমসুং সেক্যুর ওইবা গ্লোবেল দিজিতেল ফ্যুচর অমগী য়ুম্ফম থোন্নবা অখন্নবা খুদোংচাবা অমা লৈ হায়রদুনা প্রধান মন্ত্রীনা হায়খি, “তেক্নোলোজীনা ঐখোয়বু মমাংদা অমুক্তা ওইখিদ্রিবা মওংদা শম্নহনখি। মসিনা পুম্নমক্কী ইনক্লুসিব অমসুং সস্তেনেবল দিবেলপমেন্তগী ৱাশক শকখি”। মহাক্না হায়খি ফাইনান্সিএল ইনক্লুজন অমসুং প্রদক্তিবিতী অসি দিজিতেল পব্লিক ইনফ্রাস্ত্রকচরগী খুত্থাংদা খুমাং চাউশিনবা ঙমগনি। মহাক্না লৌমী অমসুং অপীকপা বিজিনেসশিংনা দিজিতেল তেক্নোলোজী শীজিন্নবা থৌগৎতুনা গ্লোবেল দিজিতেল হেল্থ ইকোসিস্তেম অমা শেমগৎনবা ফ্রেমৱার্ক শেম্নবা অমসুং আর্তিফিসিএল ইন্তেলিজেন্স শাফনা অমসুং রেস্পোন্সিবল ওইনা শীজিন্ননবা ফ্রেমৱার্ক শেম্নবগী মতাংদা ফোঙদোকখি। শ্রী মোদীনা হায়খি মদুদি মীওইবনা মায়োক্নরিবা শীংনবশিং কোকহন্নবা তেক্নোলোজী-বেজ সোল্যুসনশিংগী অপুনবা ইকোসিস্তেম শেম্বা য়াই। “ঐখোয়দগী মথৌ তারিবা অসি C মরিনি – কনভিক্সন, কম্মিৎমেন্ত, কোওর্দিনেসন অমসুং কোল্লাবোরেসন” হায়না ফোঙদোক্লদুনা প্রধান মন্ত্রীনা ৱার্কিং গ্রুপনা মাইকৈ অসিদা ঐখোয়বু মাংদা পুখৎকনি হায়রদুনা ৱারোল পীবা লোইশিনখি।
