ইকাই খুম্নরবা মেদাম স্পীকর,
ইকাই খুম্নরবা প্রধান মন্ত্রী,
ইকাই খুম্নরবা উপ প্রধান মন্ত্রী,
ইকাই খুম্নরবা দিপুতী স্পীকর,
ইকাই খুম্নরবা পার্লিয়ামেন্তগী মেম্বরশিং,
ঐগী নুংশিরবা ইচিল-ইনাওশিং,
ওমৱা উহালা পো নাৱা?
গুদ অফতরনুন!
ওগস্ত হাউস – দেমোক্রেসীগী লাইশঙ অসিদা ৱা ঙাংবা ফংজবা অসি য়াম্না চাউবা ইকাই খুম্নবা অমনি । ঐহাকপু মসিগী ইকায় খুম্নবা অসি পীনবিবগীদমক্তা ঐহাক্না অদোমগী মফমদা থাগৎপা ফোংদোকচরি।
ঐহাক্না অদোমগী মমাংদা দিমোক্রেসীগী মমাগী মীহুৎ অমা ওইনা লেপ্লি। অমসুং, ঐহাক্না ভারতকী মীওই বিলিয়ন 1.4গী য়াইফ পাউজেলশিংগা লোয়ননা লাক্লি।
অদোম খুদিংমকপু থাগৎচবা ফোংদোকপগা লোয়ননা ঐহাক্না হৌদোকচরি। মীয়াম্না অদোমবু লৈবাক অসিবু সেবা তৌনবা থৌদাং পীখ্রে। রাজনিতীদা, অদোম্না খংবগুম্না, মসি ইকাই খুম্নবা অমসুং অচৌবা থৌদাং অমনি। ঐহাক্না অদোমগী মীয়ামগী অপাম্বশিং মপুং ফাহন্নবদা মায় পাকপা ওইরসনু হায়জরি।
মরুপশিং,
থা খরগী মমাংদা, অদোম্না পুৱারী ওইরবা তাঙ্কক অমা পালন তৌখি। নামিবিয়ানা মাগী অহানবা নুপী রাস্ত্রপতি খনখ্রে। ঐখোয়না অদোমগী চাউথোকচবা অমসুং নুংঙাইবা অদু খঙই অমসুং শরুক য়াজরি, মরমদি ভারত্তা ঐখোয়না চাউথোকচবা পোকই - মেদাম রাস্ত্রপতি।
ভারতকী সম্বিধান্না মরম ওইদুনা, লাইরবা ত্রাইবেল ইমুং অমগী মচানুপী অমা ঙসি মালেমগী খ্বাইদগী চাউবা দেমোক্রেসীগী রাস্ত্রপতি ওইরে। সম্বিধানগী শক্তি অসিনা মরম ওইদুনা ঐগুম্বা লায়রবা ইমুং অমদা পোকখিবা মীওই অমনা অহুমশুবা ওইনা প্রধান মন্ত্রী ওইবগী খুদোংচাবা ফংলে। করিসু লৈতবা মীওই অমনা সম্বিধানগী থাজবা পীরি!
ভারতকী সম্বিধানগী শক্তিনা মরম ওইদুনা লাইরবা ত্রাইবেল ইমুং অমগী মচানুপী অমা ঙসি ভারতকী রাস্ত্রপতি ওইরক্লি। সম্বিধান অসিনা ঐগুম্বা মীওই অমদা প্রধান মন্ত্রী ওইবগী খুদোংচাবা পীখি। অমুক্তং নত্তে, অনিরকসু নত্তে, অদুবু অহুম্মক ওইখি। করিগুম্বা নঙোন্দা করি অমত্তা লৈত্রবদি, সম্বিধান্না নঙোন্দা পুম্নমক পী।
ইকাই খুম্নরবা মেম্বরশিং,
ঐহাক্না মফম অসিদা লৈরিঙৈদা, চহি অসিগী অঙনবা শরুক্তা লৈখিদ্রবা নামিবিয়াগী অহানবা রাস্ত্রপতি অমসুং ফাউন্দর ফাদর, রাস্ত্রপতি সেম নুজোমাবু ইকায় খুম্নবা উৎচরি। মহাক্না মতম অমদা হায়রম্মি, ঐহাক্না মদু হায়জরি:
"ঐখোয়না নীংতম্বা ফংলকপা অসিনা ঐখোয়গী অৱাবা কয়া মায়োক্নদুনা ফংলকপা নীংতম্বা ঙাক্নবা খক্তা নত্তনা, জাৎ-বিজাৎ নত্ত্রগা মচুগী খেন্নবা লৈতনা, মীপুম খুদিংমক্তা চপ মান্নবা, অচুম্বা ৱায়েল অমসুং খুদোংচাবা ফংহন্নবগী হেন্না ৱাংবা স্তেন্দর্দশিং থম্নবা ঐখোয়দা অচৌবা থৌদাং অমা পীরি।"
অচুম্বা অমসুং নীংতম্বা লৈবাক্কী মহাক্কী ৱাখল্লোন অসিনা ঐখোয় পুম্নমকপু ইথিল পীরি। ঐখোয়না অদোমগী নীংতম লানগী অথৌবশিং - হোসেয়া কুতাকো, হেন্দ্রিক ৱিৎবোই, মন্দুমে ইয়া নদেমুফায়ো অমসুং অতোপ্পা কয়াবুসু ইকায় খুম্নবা উৎচরি।
ভারতকী মীয়াম্না নামিবিয়াগী নীংতম লানগী মতমদা চাউথোকচবা ফাওদুনা মতেং পাংখি। ঐখোয়গী নীংতম্বা ফংদ্রিঙৈগী মমাংদসু, ভারতনা য়ুনাইতেদ নেসন্সতা সাউথ ৱেস্ত আফ্রিকাগী ইসু পুখৎখি।
ঐখোয়না অদোমগী নীংতম্বা ফংনবা হোৎনবদা SWAPOবু শৌগৎখি। তশেংনমক, ন্যু দিল্লীদা মখোয়গী মপান্দা লৈবা অহানবা দিপ্লোমেতিক ওফিস হাংদোকখি। অমসুং, মসি ইন্দিয়ন, লেফতেনেন্ত জেনরেল দিৱান প্রেম চান্দনা ওইখি, মহাক্না নামিবিয়াদা য়ু.এন. পিসকীপিং ফোর্সপু লুচিংখি।
ভারতনা অদোমগা লোইননা লেপমিন্নবদা চাউথোকচরি - ৱাহৈ খক্তদা নত্তনা থবক ওইনা পাংথোকপদসু। মমিং লৈরবা নামিবিয়ান কবি মুভুলা য়া নাঙ্গোলোনা ইরম্বা অদুগুম্না, ঐহাক্না হায়জরি:
"ঐখোয়গী লৈবাক অসিদা নীংতম্বা লাক্লবা মতমদা, ঐখোয়না ইকাই খুম্ননবগীদমক অচৌবা মোন্যুমেন্ত অমা চাউথোকচবগা লোয়ননা য়ুংগনি।"
ঙসিদি, মসিগী পার্লিয়ামেন্ত অসি, অমসুং মাগী নীংতম্বা অমসুং চাউথোকচনীংঙাই ওইরবা নামিবিয়া অসি, হিংলিবা মোন্যুমেন্তশিংনি।
ইকাই খুম্নরবা মেম্বরশিং,
ভারত অমসুং নামিবিয়াগী মান্নবা কয়া লৈ। ঐখোয় অনিমক্না কোলোনিএল রুলগী মায়োক্তা লান্থেংনখি। ঐখোয় অনিমক্না ইকাই খুম্নবা অমসুং নীংতম্বাবু ইকাই খুম্নৈ। ঐখোয়গী কন্সতিত্যুসনশিংনা ঐখোয়বু ইক্বেলিতি, লিবর্তী, অমসুং জস্তিস ঙাক্নবা লমজিংলি। ঐখোয়না গ্লোবেল সাউথকী শরুক অমনি, অমসুং ঐখোয়গী মীয়াম্নসু মান্নবা আশা অমসুং মঙলানশিং লৈ।
ঙসি, ঐহাক্না ঐখোয়গী মীয়ামগী মরক্তা মরুপ-মপাং ওইবগী খুদম অমা ওইনা নামিবিয়াগী খ্বাইদগী ৱাংবা সিবিলিয়ান এৱার্দ অসি ফংজবা অসিদা য়াম্না নুংঙাইবা ফাওই। নামিবিয়াগী অরুবা অমসুং ফজরবা পাম্বীশিংগুম্না, ঐখোয়গী মরুপ-মপাং ওইবগী মরী অসি মতমগী চাংয়েংদা থেংনদুনা লাক্লি। মসিনা খ্বাইদগী শাথীবা মতমদসু য়াম্না নীংথিনা হিংবা ঙম্মি। অমসুং, অদোমগী নেস্নেল প্লান্ত ৱেল্বিৎসিয়া মিরাবিলিসগুম্না, মসিনা চহি অমসুং মতমগী মতুং ইন্না হেন্না মপাঙ্গল কনখৎলকই। ভারতকী মীওই বিল্লিয়ন 1.4গী মায়কৈদগী, ঐহাক্না অমুক হন্না ইকাই খুম্নবা উৎপগীদমক রাস্ত্রপতি, সরকার অমসুং নামিবিয়াগী মীয়ামদা থাগৎপা ফোংদোকচরি।
মরুপশিং,
ভারতনা নামিবিয়াগা লোইননা লৈবা পুৱারী ওইরবা মরীশিংদা য়াম্না মরুওইবা পীরি। ঐখোয়না মমাংদগী লৈরক্লবা ঐখোয়গী মরীশিংবু শিংথানবতা নত্তনা, ঐখোয়গী অপুনবা তুংলমচৎকী ওইথোকপা য়াবশিংবু মপুং ফাহন্নবদা ঐখোয়না মীৎয়েং থম্লি। ঐখোয়না নামিবিয়াগী ভিজন 2030 অমসুং হারাম্বি প্রোস্পরিতী প্লানদা পুন্না থবক তৌমিন্নবদা অচৌবা কান্নবা অমা উরি।
অমসুং, ঐখোয়গী পার্তনরশিপ অসিগী ময়াইদা ঐখোয়গী মীওইশিং লৈরি। নামিবিয়াগী মীওই 1700 হেনবনা ভারত্তা স্কোলারশিপ অমসুং কেপাসিতী বিল্দিং প্রোগ্রামশিংদগী কান্নবা ফংখ্রে। নামিবিয়ন সাইন্তিস্ত, দোক্তর অমসুং লুচিংবশিংগী মথংগী চারোন-শুরোনবু মতেং পাংবদা ঐখোয়না নুংঙাইবা ফাওই। ITদা সেন্তর ওফ এক্সিলেন্স, নামিবিয়া য়ুনিভর্সিতীগী JEDS কেম্পসতা ইন্দিয়া ৱিং অমসুং দিফেন্স অমসুং সেক্যুরিতীদা ত্রেনিং - মখোয় খুদিংমক্না কেপাসিতী অসি খ্বাইদগী ফবা করেন্সীনি হায়বা ঐখোয়গী মান্নবা থাজবা অদু উৎলি।
করেন্সীগী মতাংদা ঐখোয়না হায়নীংবদি, নামিবিয়ানা ভারতকী UPI - য়ুনিফাইদ পেমেন্ত ইন্তরফেস শিজিন্নবা লমদম অসিগী অহানবা লৈবাকশিংগী মনুংদা অমা ওইবদা ঐখোয়না নুংঙাইবা ফাওই। অথুবা মতমদা, মীওইশিংনা "তঙ্গি উনেনে" হায়বগী চাংদগী হেন্না থুনা শেল থাবা ঙম্লগনি। অথুবা মতমদা, কুননেদা লৈবা হিম্বাগী অবোক অমা, নৎত্রগা কাতুতুরাদা লৈবা দুকান মপু অমনা, স্প্রিংবোক অমদগী হেন্না থুনা, তেপ অমখক্তনা দিজিতেল ওইরকপা ঙম্লগনি।
ঐখোয়গী বাইলেতরেল ত্রেদ অসি দোল্লর মিলিয়ন 800 হেনখ্রে। অদুবু, ক্রিকেৎ ফিল্দদা তৌবগুম্না, ঐখোয়না ৱার্মিং অপ তৌরি। ঐখোয়না হেন্না থুনা অমসুং হেন্না স্কোর তৌগনি।
অনৌবা ওন্তপ্রিন্যুওরশিপ দিবেলপমেন্ত সেন্তরগী খুত্থাংদা নামিবিয়াগী নহারোলশিংবু মতেং পাংলিবা অসিদা ঐখোয়না ইকায় খুম্নৈ। মসি ললোন-ইতিক্কী মঙলানশিংবু মেন্তরশিপ, ফন্দিং অমসুং মরুপ-মপাং ফংহনগদবা মফম অমা ওইরগনি।
হকশেল অসি ঐখোয়গী অপুনবা প্রাইওরিতিগী অতোপ্পা য়ুম্বীনি। ভারতকী হেল্থ ইন্সুরেন্স স্কিম আয়ুশ্মান ভারতনা মীওই মিলিয়ন 500 রোম কোনশিল্লি। অদুবু ভারতকী হকশেলগী মতাংদা খনবা অসি ভারত মচা খক্তদা য়ুম্ফম ওইদে।
ভারতকী মিসন - "ৱান আর্থ, ৱান হেল্থ"না হকশেলবু মালেমগী ওইবা থৌদাং অমনি হায়না লৌই।
লাইচৎ মনুংদা, ঐখোয়না ভেক্সিন অমসুং হিদাক-লাংথকশিং পীনবা আফ্রিকাগা লোইননা লেপখি, অতোপ্পা মীওই কয়ানা শিয়র তৌবদা য়াখিদ্রবসু। ঐখোয়গী "আরোগ্য মৈত্রী" ইনিসিয়েতিব অসিনা আফ্রিকাদা হোস্পিতালশিং, ইক্বিপমেন্ত, হিদাক-লাংথকশিং অমসুং ত্রেনিং পীদুনা মতেং পাংলি। ভারতনা নামিবিয়াদা এদভান্স কেন্সর কেয়রগীদমক্তা ভাভাত্রোন রেদিওথেরাপী মেছিন অমা পীনবা শেম-শারি। ভারত্তা পুথোকখিবা মেছিন অসি লৈবাক 15দা শীজিন্নখ্রে অমসুং তোঙান তোঙানবা লৈবাকশিংদা কেন্সরগী অরুবা ফিভমদা লৈবা অনাবা মিলিয়ন মঙাগী মতেং পাংখ্রে।
মমল হোংবা অমসুং মগুন লৈবা হিদাক-লাংথকশিং ফংহন্নবা জন ঔশধী প্রোগ্রামদা নামিবিয়াবুসু শরুক য়ানবা ঐখোয়না হায়জরি। মসিগী প্রোগ্রাম অসিগী মখাদা ভারত্তা হিদাক-লাংথকশিংগী মমল অসি চাদা 50দগী 80 ফাওবা হন্থহনখ্রে। মসিনা নোংমদা ভারত মচা মিলিয়ন 1 হেনবদা মতেং পাংলি। অমসুং হৌজিক ফাওবদা মসিনা অনাবশিংদা হেল্থকেয়র কোস্ততা US দোল্লর বিল্লিয়ন 4.5 রোম কনবা ঙমখ্রে।
মরুপশিং,
ভারত অমসুং নামিবিয়াগী মরক্তা তেংবাং পীনবগী, ৱারী শাবা অমসুং নুংশিনবগী মপাঙ্গল কনবা ৱারী অমা লৈরি। অদোম্না ঐখোয়গী লৈবাক অসিদা চিতাশিং অমুক হন্না পুশিল্লকপদা মতেং পাংবীরকপদা ঐহাক্না অদোমগী থাগৎপা ফোংদোকচরি। অদোমগী খুদোল অদুগীদমক ঐখোয়না অদোমবু থাগৎচরি। ঐহাক্না মখোয়বু কুনো নেস্নেল পার্কতা থাদোকপগী খুদোংচাবা ফংখি।
মখোয়না অদোমগীদমক পাউজেল অমা থারক্লি: ইনিমা আইশে ওইলী নাৱা পুম্নমক নীংথিজনা লৈরি।
মখোয় অসি নুংঙাইনা অমসুং মখোয়গী অনৌবা য়ুমদা ফজনা চুশিল্লি। মখোয়গী মশীংসু হেনগৎলক্লি। মখোয়না ইন্দিয়াদা নুংঙাইনা লৈরি হায়বসি ময়েক শেংলে।
মরুপশিং,
ঐখোয়না ইন্তরনেস্নেল সোলর এলাইন্স, অমসুং কোলিসন ফোর দিজাস্তর রেসিলিয়েন্ত ইনফ্রাস্ত্রকচরগুম্বা ইনিসিয়েতিবশিংগী খুত্থাংদা পুন্না থবক তৌমিন্নরি। ঙসি নামিবিয়া অসি গ্লোবেল বাইওফুএলস এলাইন্স অমসুং ইন্তর্নেস্নেল বিগ কেৎস এলাইন্সতা য়াওখ্রে।
তুংলমচৎতা ঐখোয়না য়েংলিঙৈদা, নামিবিয়াগী নেস্নেল উচেক, অফ্রিকান ফিস ইগলনা ঐখোয়বু লমজিংবিয়ু। মীৎয়েং শানবা অমসুং চিং লেম্না পাইবগীদমক শকখঙনরিবা, মসিনা ঐখোয়দা তাকপীরি:
পুন্না পাইখৎমিন্নৌ,
হোরাইজোন স্কেন তৌবীয়ু,
অমসুং, খুদোংচাবশিং ফংনবগীদমক্তা থৌনা লৈনা চংশিল্লু!
মরুপশিং,
2018দা, ঐহাক্না আফ্রিকাগা লোইননা ঐখোয়গী এঙ্গেজমেন্তকী প্রিন্সিপল 10 থমখি। ঙসি, ঐহাক্না মখোয়শিং অসিগা লোইননা ভারতকী মপুংফাবা কমিৎমেন্ত অদু অমুক হন্না থাজবা পীজরি। মখোয় অসি ইকায় খুম্নবা, মান্নবা অমসুং অমনা অমবু কান্নহনবদা য়ুম্ফম ওই। ঐখোয়না চাংদম্নবা নত্তে, মতেং পীনবা পাম্মি। ঐখোয়গী পান্দমদি পুন্না শেমগৎপনি। লৌথোক্নবা নত্তে, পুন্না চাউখৎনবনি।
আফ্রিকাদা ঐখোয়গী দিবেলপমেন্ত পার্তনরশিপ অসি দোল্লর বিল্লিয়ন 12 হেনবগী শেনফম ওইরি। অদুবু মসিগী অশেংবা ভেল্যু অসি শরুক য়ামিন্নদুনা চাউখৎপা অমসুং শরুক য়ামিন্নদুনা পান্দম থম্বা অসিনি। ঐখোয়না লোকেল স্কিলশিং শেমগৎপা, লোকেল থবকশিং শেমগৎপা অমসুং লোকেল ইনোবেসনদা মতেং পাংবা মখা চত্থরি।
ঐখোয়না থাজৈ মদুদি আফ্রিকা অসি রো মেতরিএলগী সোর্স খক্তমক ওইগদবনি। আফ্রিকা অসিনা ভেল্যু শেম্বদা অমসুং তুং কোইনা চৎনগদবা গ্রোথতা মকোক থোংগদবনি। মসিনা মরম ওইদুনা ঐখোয়না ইন্দস্ত্রিএলাইজেসনগীদমক আফ্রিকাগী এজেন্দা 2063পু মপুং ফানা শৌগৎলি। ঐখোয়না দিফেন্স অমসুং সেক্যুরিতীদা ঐখোয়গী কোওপরেসন হেঙ্গৎহন্নবা শেম-শারি। ভারতনা মালেমগী থৌদাংশিংদা আফ্রিকাগী থৌদাংবু শিংথানরি। ঐখোয়না G20 প্রসিদেন্সীগী মতমদা আফ্রিকাগী ৱা ঙাংখি। অমসুং G20গী পর্মিনেন্ত মেম্বর অমা ওইনা আফ্রিকান য়ুনিয়নবু ঐখোয়না চাউথোকচবগা লোইননা তরাম্না ওকখি।
মরুপশিং,
ঙসি ভারতনা মালেমগী অপাম্বশিংগা লোইননা চাউখৎপগী মায়কৈদা খোঙজং চংশিল্লি। অমসুং মসিদসু ঐখোয়না গ্লোবেল সাউথতা মীৎয়েং থম্লি।
20শুবা চহিচাদা, ভারতকী নীংতম্বা অসিনা মালেম শীনবা থুংনা, মফম অসিদা অফ্রিকা য়াওনা, নীংতম লান্মীশিংবু পুক্নিং থৌগৎলকখি। 21শুবা চহিচাদা, ভারতকী চাউখৎপা অসিনা মালেমগী খা থংবা শরুক্না মশাগী তুংলমচৎ শেমগৎপা, লুচিংবা অমসুং মশক তাকপা ঙম্বগী লম্বী অমা তাক্লি। পাউজেল অদুদি - নহাক্না মায় পাকপা ঙম্মি - নহাক্কী নশাগী তর্মশিংদা, নহাক্কী আইদেন্তিতী মাংহনবা তৌদনা।
ভারতকী পাউজেলদি, নহাক্না নহাক্কী চৎনবী অমসুং ইকাই খুম্নবগা লোয়ইননা নহাক্কী লম্বীদা চৎলগা মায়পাকপা ফংগনি হায়বসিনি।
মসিগী পাউজেল অসি হেন্না ময়েক শেংহন্নবা ঐখোয়না পুন্না থবক তৌমিন্নবা তাই। ঐখোয়না তুংলমচৎ অমা শেমজিনসি:
- শক্তিগী খুত্থাংদা নত্তে, পার্তনরশিপকী খুত্থাংদা।
- দোমিনেসনগী খুত্থাংদা নত্তে, দাইলোগকী খুত্থাংদা।
- এক্সক্লুজননা নত্তে, ইক্বিতীনা।
মসি ঐখোয়গী অপুনবা মীৎয়েং অদুগী স্পিরিৎ ওইগনি –
"ফ্রীদম তু ফ্যুচর"দগী - স্বতন্ত্রতাদগী সমৃদ্ধি, সংকল্পদগী সিদ্ধি।
ইন্দিপেন্দেন্সীগী স্পার্কতগী শম্নবা প্রোগ্রেসকী মঙাল ফাওবা। ঐখোয় পুন্না চৎমিন্নসি। নীংতম্বগী মৈনা শাগৎলকপা লৈবাক অনিগুম্না, ঐখোয় হৌজিক ইকাই খুম্নবা, চপ মান্নবা অমসুং খুদোংচাবা লৈবা তুংলমচৎ অমগীদমক মঙলান শেমগৎসি। ঐখোয়গী মীয়ামগীদমক্তা নত্তনা, মীওইবা খুন্নাই পুম্বগীদমক্ত।
ঐখোয়না শান্তি, খুমাং চাউশিনবা অমসুং চাউখৎপা পুরক্নবা মপাং ওইদুনা মাংলোমদা চংশিনসি। ঐখোয়গী অঙাংশিংনা ঐখোয়না লান্থেংনখিবা নীংতম্বা অদুগী মনা ফংবতা নত্তনা, ঐখোয়না পুন্না শেমগৎকদবা তুংলমচৎ অদুসু ফংহল্লসি। ঙসি ঐহাক মফম অসিদা লৈরিঙৈদা, ঐহাক অপেনবা পোকচৈ। ভারত-নামিবিয়া মরীগী খ্বাইদগী নুংঙাইবা নুমিৎশিং অসি ঐখোয়গী মাংদা লৈরি।
মরুপশিং,
2027কী ক্রিকেৎ ৱার্ল্দ কপ কো-হোস্ত তৌবদা নামিবিয়াদা চাউনা মায় পাকপা ওইরসনু হায়না ঐহাক্না য়াইফ-পাউজেল পীদুনা লোইশিনজরি। অমসুং, করিগুম্বা অদোমগী ইগল্সনা ক্রিকেৎকী তিপশিং মথৌ তারবদি, কনাদা ফোন তৌগদগে হায়বদু অদোম্না খঙলি!
মসিগী ইকাই খুম্নবা অসিগীদমক্তা অমুক্কা হন্না থাগৎচরি।
তাঙ্গী উনে!
