হিজ এক্সেলেন্সী, প্রাইম মিনিস্তর বেঞ্জামিন নেতনয়াহু,
হিজ এক্সেলেন্সী, মিস্তর অমির ওহানা, নেসেতকী স্পীকর,
হিজ এক্সেলেন্সী, মিস্তর য়াইর লপিদ, ওপোজিসনগী লুচিংবা,
ইকায়খুম্নজরবা নেসেতকী মেম্বরশিং,
ঐগী নুংশিজরবা ইচে-ইচল অমদি ইচিল ইনাওশিং,
শলোমঃ
নমস্তে!
ইকায়খুম্নরবা মেম্বরশিং,
চীং লেম্লবা হাউস অসিদা লেপ্পা ফংজবা ঐগীদমক্তদি লাইবক ফবনি। ঐনা ভারতকী প্রধান মন্ত্রী ওইনা, অমদি অরিবা খুন্থোক অমগী মীহুৎ অমা ওইনা অরিবা খুন্থোক অমগা মফমদা ৱাফম খরা থমজরি। ঐহাক্না ভারত মচা বিলিয়ন ১.৪ গী পাউজেল অমদি মরুপ মপাঙ ওইবা, ইকায়খুম্নবা, অমদি খোঙবুগী পাউজেল অমা পুদুনা লাকচরি।
ঐহাক্না মিস্তর স্পীকরগী মফমদা পাউজেল পীবিরকপগীদমক থাগৎচরি। নেসেতবু ভারতকী মচুদা ঙালহনবিবগীদমকসু থাৎচরি। অদোম্না চহি অহুমগী মমাঙদা ভারত্তা লাকপিরম্বা নেসেতকী স্পীকর অমগী অহানবা খোঙচৎ ওইখি। অদুগা চীং লেম্লবা মীতিন অসিদা ৱা ঙাংবা ঐহাক্না অহানবা ভারতকী প্রধান মন্ত্রী ওইবগীদমক্তসু অদোমবু থাগৎচরি।
চহি মাপলগী মমাঙদা, ঐহাক্না ইজ্রেলদা চৎপা ভারতকী অহানবা প্রধান মন্ত্রী ওইবগী তাঞ্জা ফংখি। ঐ মফমসিদা অমুক হল্লকপগীদমক, ঐবু মতম পুম্বদা চীংশিনবগুম ফাওরিবা লমদম অসিদা অমুক হল্লকপসিদা ঐহাক য়াম্না নুংঙাই। পুম্নমকসিগী মথক্তা ঐহাক ভারতনা ইজ্রেলবু ফোর্মেল ওইনা শকখঙখিবা নুমিৎ - সেপ্তেম্বর ১৭, ১৯৫০ দা পোকখিবনি।
ইকায়খুম্নরবা মেম্বরশিং,
ঐহাক্না “ওক্তোবর ৭” তা হমাসকী তমথিরবা লান্দাদা পুন্সি মাঙখিবা অমদি ইমুং কয়া কায়খিবদুগীদমক ভারতকী মীয়াম্না অৱাবা ফোঙদোকপগী পাউজেলসু পুদুনা লাক্লি। ঐখোয়না অদোমগী অৱাবদা শরুক য়াজরি। ভারতনা মীৎকুপ অসিদা অমদি তুংদসু অচেৎপা খোঙফমগা লোয়ননা ইজ্রেলগীদমক লেপ্লি।
মীচম মীয়াম হাৎপা হায়বসি হীরম অমত্তনা মরম চাই হায়না হায়বা য়ারোই। তেরোরিজমবু করিগুম্বা অমত্তনা মরম চাহনবা য়ারোই।
ভারতনা মতম শাংনা তেরোরিজমগী চৈথেঙ ফংদুনা লাক্লি। ঐখোয়না ২৬/১১ গী মু্ম্বাইগী লান্দা অমদি ইজ্রেলগী মীওইশিং য়াওনা মীচম মীয়াম কয়াগী পুন্সি পীখম্নখিবা নীংশিংলি। অদোমগুম্না ঐখোয়গী ইফমদসু মরৈ অনি লোঙদনা তেরোরিজমবু খাঙদুনা খক লৈথোক্লোই হায়বা লেঙদবা অমদি খোঙফম হন্দবা ফিরেপ অমা লেপ্লি।
তেরোরিজম্না খুন্নাইবু মরা চেৎহন্দনবা, চাওখৎপা থিন্থহন্নবা, অমদি থাজবা মাঙহন্নবা পান্দম থমই। তেরোরিজম থেংনবদা হনবা লৈতবা অমদি মালেমগী ওইবা অপুনবা খোঙথাঙ চঙই, মরমদি তেররনা মফম খুদিংদা ইং-তপ্পবু শিংনৈ। মরম অদুননি ভারতনা মতম কুইনা ইং-তপ্পা অমদি রিজনেলগী মরা চেৎপা ফীভম পুরক্নবা থৌরাং খুদিংদা ঙাক্লৌ পীরিবা।
চহি খরগী মমাঙদা অদোম্না অব্রাহম একোর্দ মপুং ফাহনখিবদা ঐখোয়না অদোমগী লিংজেল অমদি মীৎয়েঙবু থাগৎখি। মদু মতম শাংনা খুদোংথিবা নংলবা মফম অমগী অনৌবা মঙলানগী মীৎকুপ অমনি। মদুদগী হৌনা, ফীভম অসি ফনা নীংথিনা হোংলে। লম্বী অসি হেন্না শিংনবনা থল্লক্লি। অদুম ওইনমক মঙলান অদু কায়হন্দনা থম্বা মরু ওই।
য়ু.এন. সিক্যুরিতী কাউন্সিলনা শৌগৎলিবা গাজা পীস ইনিসিএতিব অসিনা লম্বী অমা পীরি। ভারতনা থৌশিল অসিদা খোঙফম চেৎনা শৌগৎকনি হায়না ফোঙদোকখ্রে। মসিনা পেলেস্তাইনগী ৱাফম ৱাখৈবগা লোয়ননা মফম পুম্নমক্কী মীয়ামদা মীচঙ মীখায় নাইদবা অমদি তুং কোইগদবা ইং-তপ্পা ফংহনগনি হায়না ঐখোয়গী থাজৈ।
ঐখোয়না হোৎনরিবা পুম্নমক লৌশিং, থৌনা অমদি মীওইবগী মীনুংশিনা লমজিংবা ওইসনু। ইং-তপ্পগী লম্বী অসি মতম পুম্বদা অরায়বা ওইদে। অদুবু ভারতনা অদোম অমদি মালেম অসিগা লোয়ননা লমদম অসিদা ৱারী-ৱাতায় শানবা, ইং-তপ্পা অমদি মরা চেৎপা পুরক্নবগীদমক শরুক য়ারি।
ইকায়খুম্নরবা মেম্বরশিং,
ভারত্তা ইজ্রেলগী খোঙফম, থৌনা অমদি মায় পাকপশিংবু য়াম্না খোয়দানৈ। ঐখোয়না অনৌবা মতমগী লৈবাকশিং ওইনা মরী শেমগৎত্রিঙৈ মতম কুইনগী মমাঙদগী ঐখোয়গী মরক্তা চহি লিশিং অনি হেল্লবা মরীনা শম্নদুনা লাক্লি। বুক ওফ এস্থরদা ভারতপু হোদু হায়না পল্লি। তালমুদতা ভারতকা অরিবা মতমদা লল্লোন ইতিক্কী মরী লৈনরম্বগী ৱাফম ইদুনা য়াওরি।
জিউ লল্লোনবশিংনা মেদিতরেনিয়নবু ইন্দিয়ন ওসীনগা শম্নহনবা সমুদ্রগী লম্বী থুংনা চৎখি। মখোয়না খুদোংচাবা অমদি ইকায়খুম্নবা থিদুনা লাকখি। অমদি ভারত্তা মখোয়না ঐখোয়গী ইরক্তা তিনখি।
জিউ ফুরুপ্না ভারত্তা ওৎপি-নৈবিবা অমদি অচান মীরান নাইবগী অকিবা লৈতনা লৈরক্লি। মখোয়না মখোয়গী লাইনিং ঙাক্না চৎলি অমদি খুন্নাইদা মপুং ফানা শরুক য়ারি। মসি ঐখোয়গী চাউথোকচনিংঙাইগী ৱাফম্নি।
ইকায়খুম্নরবা মেম্বরশিং,
মহারাস্ত্রগী বেনে ইজ্রেল, কেরলমগী কোচিনি জিউ, কোলকতা অমদি মুম্বাইগী বাগদাদি জিউ, অমদি অৱলং নোংপোক্কী বেনি মেনাসেনা ভারতপু মশক থোকহল্লি। ঐগী পোক্নফম গুজরাত্তা বেনে ইজ্রেলগী ইমুং মিস্তর অমদি মিসস বেস্তনা লিংখৎপা স্কুল অমা লৈ। মদু য়াম্না ফবা স্কুল অমনি, অমদি স্কুলদুগী মমিং বেস্ত স্কুল কৌই।
ইদ্বীন মাইয়রনা ফিল্ম দিভিজন ওফ ইন্দিয়াগী মশক লেপ্লমখি অমদি ভারতকী সিনেমাগী পুৱারীদা মশক নাইবা মীওই অমনি। দোক্তর রিউবেন দেবিদ অহমদবাদতা লৈবা কনকারিয়া জু লিংখৎলম্বা মীওইনি। এক্তর দেবিদ অব্রাহম চিউলকর, নৎত্রগা অঙ্কল দেবিদ লৈবাক থুংনা শকখঙনবা মীশক ওইখি। ৱাল্তর কোফমেন্না ওল ইন্দিয়া রেদিওগী সিগ্নেচর ত্যুন শৈবাল্লম্বনি। দেবিদ সাসুন্না হৌজিক ফাওবা ভারত খুন্নাইগী থৌগল তৌরিবা ইন্সতিত্যুসন কয়া লিংখৎলম্মি।
অদুগা অমুকসু লেফ্তনেন্ত জেনেরেল জে.এফ.আর. জেকববনা ১৯৭১ গী পাকিস্তানগা শোক্নখিবা লান্দা লৌরম্বা থৌদাং পাক শন্না খঙনরি। মহাক্না থবক্তগী পোত্থারবা মতুংদা মহাক্কা নক্ননা থবক তৌমিন্নবগী খুদোংচাবা ঐনা ফংখি। ঐখোয়না অতৈ হীরম কয়াগা লোয়ননা ইন্দিয়া-ইজ্রেলগী মরীগী মতাঙদা চা কয়া থকমিন্নদুনা খন্নখি। অসিগুম্বা মশিং থিঙমদ্রবা থৌদাং কয়া ভারতকী ইনাক খুল্লবা পুন্সিগী মচত্তা চনশিন্দুনা য়াওখ্রবনি।
ইকায়খুম্নরবা মেম্বরশিং,
ভারত্তগী ইজ্রেলদা চৎনখিবগী খোঙচৎ অমসু লৈখি, মদুদা ভারতকী জিউ কয়া কুনশুবা চহিচাগী ময়ায় চল্লকপা মতমদা ইজ্রেলদা হোংখি। ঙসিদি মশক মচু থোক্লবা ভারত্তগী হৌখিবা জিউ কাঙলুপ অমা মফমসিদা লৈরি। মখোয়না লেবোরেতরী অমদি হোস্পিতালদা, ক্লাসরুমদা অমদি লান্ফমদসু মতমসিগী ইজ্রেল শেমগৎনবগীদমক থৌদাং য়ারি। মখোয়না ইজ্রেলবু মপা লৈবাক অমা ওইনা অমদি ভারতপুনা মমা লৈবাক অমা ওইনা চেৎনা থাগোন্নরি। ঐখোয়না মখোয়গীদমক চাউথোকচৈ।
ইকায়খুম্নরবা মেম্বরশিং,
ভারতকা লমদম অসিগা লৈনরিবা মরী অসি ঈ অমদি কত্থোকপশিংনসু হকখিবনি। মালেমগী অহানবা লাঞ্জাও মনুংদা, ভারতকী লান্মী লিশিং মরি হেনবনা লমদম অসিদা মথ্ৱায় কৎখি। সেপ্তেম্বর ১৯১৮ দা হাইফাদা খোঙ লান্মীনা লান্দাখিবা লান্মীগী পুৱারীদা শিংথানিংঙাই ওইরবা পন্দুপ অমা ওইনা লৈরি।
হাইফাগী হীরোনি হায়না নীংশিংনরিবা মেজর থাকুর দলপত সিংহনা অপুনবা পুৱারীগী খুদম ওইরি। ঐহাক্না মমাঙদা লাক্লম্বা মতমদা ভারতকী লান্মীশিংগীদমক লৈরিবা হাইফা মেমোরিএলদা ইকায়খুম্নবা উৎপদা পুক্নিং নুংশিবা ফাওখি।
ইকায়খুম্নরবা মেম্বরশিং,
মমাঙ থাদ, মালেম অসিনা ইন্তরনেস্নেল হোলোকাস্ত রিমেমব্রেন্স দে থৌরম পাঙথোকখি। হোলোকাস্ত অসি মীওইবা খুন্নাইগী খ্বায়দগী অমম্বা পন্দুপ অমা ওইনা লেপ্লি। অদুগুম্বলবা শিংনবনা থল্লবা চহিশিং অদুদা মীওইবগী মীনুংশিগী ওইবা থৌওং খরা তোপ তোপ্না লৈখি। জাম সাহেব হায়নশু খঙনবা গুজরাতকী নৱানগরগী নীংথৌরেলনা চঙজফম লৈত্রবা জিউ অঙাংশিং য়াওনা পোলিস অঙাংশিংদা চঙজফম পীখি। মোসব নেবাতিমদা হন্দক্তা জাম সাহেবগী মীতম মায়খুম হাংদোকখ্রে হায়না ঐঙোন্দা পাউ তম্মি।
অদোমবু থাগৎচরি। অসুম্না ইকায়খুম্নবিবা অমদি নীংশিংবিবগীদমক অদোমবু থাগৎচরি।
ইকায়খুম্নরবা মেম্বরশিং,
ভারতনা নীং তম্লবা মতুংদা ভারতকী লুচিংবা কয়ানা ইজ্রেলগী মীয়ামগা নক্নবা মরী অমা লৈবগুম ফাওখি। ১৯৫০গী মতমদা ভারতকী পার্লিয়ামেন্ততা য়েৎনখিবা ৱাফমশিং ইজ্রেলনা লৈকংলাদা লৌউ-শিংউগী থবক পায়খৎনবা হোৎনববু শিংথানবগী খুদম চাংদম ওইরি। ইজ্রেলগী কিবুত্জ ইহৌনা অচার্য় বিনোবা ভাবে অমদি লোকনায়ক জয়প্রকাস নারায়নগুম্বা ঐখোয়গী লুচিংবশিংবু পুক্নিং থৌগৎখি। অহানবা ওইনা ঐগী পোক্নফম লমদম গুজরাত্তা, অমদি হৌজিক্না ভারত পুম্বদা লৌউ-শিংউগী লমদা “পর দ্রোপ, মোর ক্রোপ”না অঙকপা মহৈ পুরকপা ঐহাক্না উবা ফংলি।
ঐনা ইজ্রেলদা অহানবা লাকখিবসি ২০০৬ তা গুজরাতকী মুখ্য মন্ত্রী ওইনা লাকখিবনি। তুংদা, ২০১৭ দা ঐনা প্রধান মন্ত্রী ওইনা ইজ্রেলদা লাকপা মতমদা ঐখোয়গী লৈবাক অনিনা লৈনরিবা মরীবু স্ত্রেতেজিক পার্তনরসিপকী মরীগী থাক্তা থাঙ্গৎখি। মদুদগী হৌনা ঐখোয়না তোৎন-তিন্নরকপা হেন্না পাকথোক চাউথোরক্লি। অমদি ঐখোয়না মরী অসি তোঙান তোঙানবা সেক্তরশিংদা হেন্না চেৎশিলহন্নবা ফিরেপ লৌরি।
ইকায়খুম্নরবা মেম্বরশিং,
হৌখিবা চহি খরসিদা ভারতনা মালেমগী খ্বায়দগী খোঙজেল য়াঙনা চেনখৎলক্লিবা অচৌবা শেন্মিৎলোন ওইরি। অথুবদা ঐখোয়না মালেমগী মকোক থোংবা শেন্মিৎলোন অহুমগী মনুং চল্লগনি। অদুগা ইজ্রেলনা ইনোভেসন অমদি তেক্নোলোজিগী লমদা লুচিংলিবা পৱারহাউস অমনি। মসিনা মাঙদা মীৎয়েঙ থম্বা খোঙবুগী মশান তাজবা য়ুম্ফম অমা থোল্লি।
ঐখোয়না লল্লোন ইতিক পাকথোক চাউথোকহন্নবা, ইনভেস্তমেন্তকী ইচেল মপাঙ্গল কনখৎহন্নবা, অমদি পুন্না ইনফ্রাস্ত্রকচর শেমগৎমিন্নবগী থৌওং য়োকখৎনবা ফিরেপ লৌরি। মমাঙ চহিদা খুৎয়েক পীনখিবা বাইলেতরেল ইনভেস্তমেন্ত ত্রীতী অসিনা ঐখোয়গী বিজিনেস্তা থাজবা অমদি করি থোক্কনি হায়বা ঙম্বা ফীভম ফংহনগনি।
হৌখিবা চহি খরসিদা ভারতনা অতোপ্পা লৈবাকশিংগা মরুওইবা লল্লোন ইতিক্কী য়ানচে কয়া খুৎয়েক পীনখ্রে। অদোমগী নোংচুপ্লোমদা য়ুরোপিয়ন য়ুনিয়ন, অমদি য়ু.কে.। অদোমগী নোংপোক্লোমদা য়ু.এ.ই. অমদি ওমন য়াওরি।
ঐখোয়গী নাকল অনিগী পোত্থোকশিংগী লল্লোন ইতি হৌখিবা চহি খরসিদা শরুক কয়া হেনগৎলক্লে। অদুবু মসিদা লৈরিবা খুদোংচাবশিং মপুং ফানা মমি তাবদি নত্তে। মরম অদুননি ঐখোয়গী কাঙবুশিংনা মঙলান চাউরবা ফ্রী ত্রেদ এগ্রীমেন্ত পুরক্নবা কন্না হোৎনরিবা। মসিন ঐখোয়গী লল্লোন ইতিক্কী মরীদা লৈরিবা পাক চাউরবা লোকশিনদ্রিবা মতিংশিং অসি ফুদোকহল্লক্কনি।
ঐখোয়না ইন্দিয়া-মিদ্দল ইস্ত-য়ুরোপ ইকনমিক কোরিদোর অমদি ভারত, ইজ্রেল, য়ু.এ.ই. অমদি য়ু.এস.কী মরক্তা লৈনরিবা I2U2 ফ্রেমৱর্ককুম্বা তোঙান তোঙানবা মওং মতৌশিংদসু নক্ননা থবক তৌমিন্নগনি। দিফেন্স অমদি সিক্যুরিতী অসিসু ঐখোয়গী খোঙবুগী অতোপ্পা মরুওইবা য়ুম্বী অমনি। মমাঙ চহিগী নবেম্বরদা ঐখোয়না দিফেন্স কোওপরেসনগী MoU অমা খুৎয়েক পীনখি। ঙসিগী তম্বা ঙমদবা মালেম অসিদা ভারত অমদি ইজ্রেলগুম্বা থাজনিংঙাই ওইরবা খোঙবুশিংগী মরক্তা অকনবা দিফেন্সকী খোঙবু অমা থম্বা হায়বসি মরুওইবা ৱাফম অমনি।
ইকায়খুম্নরবা মেম্বরশিং,
ইজ্রেলবু “স্তার্ত-অপ নেসন” হায়না হেক হেক কৌনৈ। হৌখিবা চহি খরসিদা ঐখোয়না ঐখোয়গী নহাশিংগী মফমদা লৈরিবা ইনোভেসন অমদি ক্রিএতিবিতীগী মতিং ফুদোকহন্নবা থবক পায়খৎলি। ২০১৮ দা প্রাইম মিনিস্তর নেতনয়াহু অমদি ঐহাক্না ভারত্তা আইক্রিএত তেক্নোলোজী বিজিনেস ইনক্যুবেতর শঙ্গামিন্নখিবা ঐ নীংশিংলি। মদুদগী হৌনা মসিনা স্তার্ত-অপ ৯০০ লোম ঙাক্লৌ পীখ্রে।
মমাঙগী চয়োলদা ঐখোয়না লৈবাক ১০০ হেনবগী মীহুৎশিং শরুক য়াদুনা মালেমগী খ্বায়দগী চাউবা অমদি খ্বায়দগী দিমোক্রেতাইজ তৌবা AI ইম্পেক্ত সম্মিত পাঙথোকখি। ঐখোয়না তাল্লিবা পান্দমগী ৱাখল্লোন মহৌশানা ইজ্রেলগী ইনোভেতিব ইকোসিস্তেমগা চূশিন্নৈ। ঐহাক্না ক্বান্তম তেক্নোলোজী, সেমিকন্দক্তর, অমদি অর্তিফিসিএল ইন্তলিজেন্সকী লমদা ইচঙ থৌবা মরী কয়া উবা ফংখি। ঐখোয়না ঐখোয়গী দিজিতেল পব্লিক ইনফ্রাস্ত্রকচর শীজিন্নদুনা ক্রোস-বোর্দর ফাইনেন্সিএল লিঙ্কেজ শেমগৎনবা ইজ্রেলগা পুন্না থবক তৌমিন্নরি।
ইকায়খুম্নরবা মেম্বরশিং,
লৈকাংলাদা ইজ্রেলনা লৌউ-শিংউগী অঙকপাথবকশিং কয়াদা পুক্নিং থৌগৎনিংঙাই ওই হায়বা ঐহাক্না পঞ্জখি। পান্দম চুম্বা ঈথৈ-লৌখোং অমদি ঈশিং শিন-লাংবগী লমদা ইজ্রেলদা লৈরিবা হৈথোই-শিংথোইবা অসিনা ভারত্তা লৌউ-শিংউগী থৌওংশিংদা অওনবা কয়া পুরকখ্রে।
ঐখোয় পুন্না ভারত পুম্বদা সেন্তর ওফ এক্সেলেন্স ৪৩ লিংখৎখ্রে, মখোয়না লৌমী মিলিয়ন তঙ্খায় হেনবদা ত্রেনিং ফংহল্লি। লৌমী অমদি ঙামী মিলিয়ন কয়াদা কান্নবা অসি ফংহন্নবগীদমক ঐখোয়না হৌজিক সেন্তর ১০০ শুহন্নবা পান্দম অমা থমগদবনি।
ইকায়খুম্নরবা মেম্বরশিং,
ইন্দিয়া-ইজ্রেল খোঙবুগী মরুমদা ঐখোয়গী মীয়ামগী লৈনরিবা মরী অসি লৈরি। ঐহাক্না ইজ্রেলদা অহানবা ওইনা ২০০৬ তা লাকপা মতমদা ইজ্রেলদা য়োগ সেন্তর খরতমক লৈরম্মি। ঙসিদি য়োগ লৈকায় লৈকায় খুদিংদা শান্নবগুম তৌরে।
ইজ্রেলদা অয়ুর্বেদবু পাম্নমসু হেনগৎলক্লি হায়না ঐঙোন্দা পাউদম্মি। ঐহান্না ইজ্রেল নহা মশিং য়াম্না ভারত্তা লাক্নবা পাউজেঞ্জরি। মখোয়না ঐখোয়গী খন্নাইগী ইচঙ থৌবা মতৌ উবা ফংগনি, অমদি পুম্নমক কোনশিন্বা মশা মউ ফবগী কাঙলোন্না পুক্নিং অমদি হকচাঙদা করি তৌবা ঙমবগে হায়বদু মখোয়না খঙগনি।
ঙসিগী চীং লেম্লবা হাউস অসিদা ভারতকী পার্লিয়ামেন্তনা ইজ্রেলগী পার্লিয়ামেন্তরী ফ্রেন্দসিপ গ্রুপ অমা লিংখৎলে হায়না পাউদম্বদা ঐহাক নুংঙাইবা ফাওই। ঐহাক্না ময়াম পুম্নমকপু ভারত্তা লাক্নবা পাউজেঞ্জরি অমদি ঐখোয়গী পার্লিয়ামেন্তকী মেম্বরশিংগা হেন্না ৱারী ৱাতায় তাননবা মীৎয়েঙ থমজরি।
ভারতকী কেয়রগিভর অমদি হৈ-শিংলবা শিন্মীশিংনা ইজ্রেলগী ইমুং অমদু ফুরুপশিংদা চাউনা মতেং পাংলি হায়বা ঐ খঙই। মখোয়না ওক্তোবর ৭ য়াওনা লাংফমগী মতমদা শিংথানিংঙাই ওইরবা লিংজেল অমদি মথৌদা পুক্নিং লুপ্পগী মতৌ উৎখি।
জিউগী পাজেলশিংনা ঐখোয়দা নীংশিংহল্লি, “পুন্সি অমা কল্লিবা মীশক্তু মালেম পুম্বা কল্লিবনি”। মখোয়গী থৌগলদা ঐখোয়গী তেংবাংনবগী মরীগী মরুমদা লৈরিবা মীওইবগী অচেৎপা মরীগী মমি তারি। ঐখোয়না লৈবাক অনিমক্তা কান্নমিন্নগদবা সেক্তরশিংদা শিন্মী অমদি প্রোফেস্নেলশিং চত্থোক চৎশিনদা মখা তানা মতেঙ পাংগনি।
ইকায়খুম্নরবা মেম্বরশিং,
ঐখোয় অনিমক অরিবা মতমগী খুন্থোকশিংনি। অমদি ঐখোয়গী খুন্থোক্লোনগী চৎনবীনা মান্নবা ৱাংউলোন উৎলকপা ঙক্নিংঙাই ওইদে। ইজ্রেলদা তিক্কুন ওলমগী পরম্না মালেম অসিবু ফগৎহন্নবা ৱাফম পল্লি। ভারত্তা বসুদৈব কুতুম্বকমনা মালেম অসি ইমুং অমনি হায়রি। ৱাখল্লোন অনিমক্না মীৎনা উরিবা ঙমখৈ ৱাংমা লান্না তৌবা য়াবশিং উৎলি। মখোয়না খন্নাইগী মফমদা মীনুংশি অমদি অচুম্বগী লিংজেলগা লোয়ননা থবক তৌনবা ৱাফম থম্লি।
জুদাইজম্না হলাখাদা মীৎয়েঙ থমদুনা কাঙলোন অমদি থৌওংগী খুত্থাঙদা মীওইবগী মচৎ লমজিংলি। হিন্দু ৱাংউলোন্না থৌদাং অমদি অচুম্বা থৌওংগী পরম তাক্লিবা ধর্মগী ৱাফম পল্লি। চৎনবী অনিমক্তা ফিদম্নফম ওইবা পুন্সিনা থবক্কী খুত্থাঙদা হিংলি, অমদি মখোয়না তৌথোরকপশিংদা লাইনিংগী মচৎ ফোঙদোকই।
ঐখোয়গী কুমহৈ-হরাওদসু য়াম্না মান্নবা শক্তম উবা ফংলি। অদোম্না কেন্দল থান্দুনা হনুক্কাহ পাঙথোকই। মদুগা মান্নবা মতমদা ঐখোয়না থাউমৈগী মেঙলবা মঙালদা মৈগী কুমহৈ দিৱালী পাঙথোকই। মতম খরা লৈরগা ভারতনা নুংঙাইবা অমদি মচু-মমেন্না থল্লবা হোলি কুমহৈ পাঙথোক্লগনি। অদুগা হায়রিবা মতম অদুদা ইজ্রেলনা হরাও তয়াম্বগা লোয়ননা পুরিম কুমহৈ পাঙথোক্কনি।
ইকায়খুম্নরবা মেম্বরশিং,
ঐখোয়গী মান্নবা ফিদমশিং অসিনা ঐখোয়গী মতমসিগী খোঙবু ওইবগী মরীদা থৌনা হাপ্লিববা অচেৎপা য়ুম্ফম ওইরি। ঐখোয় পুৱারীনা শেমবা অমদি তুংলমচত্তা মীৎয়েঙ থম্বা দিমোক্রেসীশিংনি। ঐখোয়গী খোঙবু ওইবগী মরী অসি মান্নবা এক্সপিরিএন্স অমদি মান্নবা অপাম্বশিংদা য়ুম্ফম ওইবনি। ঐখোয়গী অকনবা খোঙবু ওইবগী মরী অসিনা লৈবাক্কী ইন্তরেস্ত ঙাকপদা নত্তনা মালেমগী ওইবা মরা চেৎপা অমদি নুংঙাই য়াইফবদসু থৌদাং য়ারি।
ভারত অমদি ইজ্রেলগী মরক্তা লৈনরিবা মরুপ মপাং ওইবগী মরী অসি তম্বা ঙমদবা মালেম অসিদা থৌনাগী হৌরকফম অমা ওইনা থম্নবা ঐখোয় হোৎনমিন্নসি।
অঢ় য়িজ্রেল চাই।
জয় হিন্দ।
ময়ামবু থাগৎচরি।
