প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী খুত্থাংদা পাঙথোকপা দিফেন্সকী খুৎলায় শাবগী হীরমদা আত্মানির্ভর ভারত ওইবগী সেমিনারদা ৱা ঙাংখ্রে। দিফেন্সকী খুৎলায় শাবগী হীরমদা আত্মানির্ভর ওইবগী তঙাই ফদবশিংদা মিৎয়েং চংলদুনা প্রধান মন্ত্রীনা ঐখোয়গী পান্দমদি দিফেন্সকী পোত্থোক পুথোকপা, অনৌবা তেক্নোলোজী পুথোকপা হেনগৎপা অমসুং দিফেন্স সেক্তরদা প্রাইবেৎ প্লেয়ারশিংদা মশক থোকপা থৌদাং শিন্নবা অসিনি হায়খি।
ঙাকশেল মন্ত্রী শ্রী রাজনাথ সিংহ অমসুং মহাক্কী কাংবু অপুনবনা মিসন মোদতা লেপ্পা লৈতনা থবক পায়খৎপা অসিবু থাগৎপা ফোঙদোক্লদুনা প্রধান মন্ত্রীনা হায়খিবদা ঙসিগী সেমিনার অসিগী মতুংদগী দিফেন্সকী পোত্থোক পুথোকপদা মরোমদোম লেপচবা ঙম্বগী পান্দম অসি হেন্না চেৎশিল্লগনি হায়খ্রে।
প্রধান মন্ত্রীনা হায়খিবদা ভারতনা নিংতম্বা ফংলবা মতুংদা লৈবাক অসিদা দিফেন্সকী পোত্থোক পুথোকপগী মতিক অমসুং ইকোসীস্তেম নীংথিজনা লৈরম্মি অদুবু দিকেদ খরদগীদি মসিগী মতাংদা অরুবা থবক পায়খৎখিদ্রে হায়খি। হৌজিক্তি ফিভম অসি হোংলক্লে অমসুং সেক্তর অসিদা শেমদোকপগী থৌওং পাঙথোক্নবা লেপ্তনা থবক চত্থরি হায়না প্রধান মন্ত্রীনা হায়খি। লাইসেন্স তৌবগী থৌওংশিংদা ফগৎহনবা, খল মান্ননা থবক তৌমিন্ননবা ফিভম শেম্বা অমসুং মপান্দা পোত্থোক থাদোকপগী থৌওংদা লাইহনবনচিংবা মশক থোকপা থবক কয়া সেক্তর অসিগী মনুংদা থবক পায়খৎপগী মতাংদা মহাক্না ৱাফম কয়া ফোঙদোকখি।
প্রধান মন্ত্রীনা মতমগা চান্নবা অমসুং মরোমদোম লেপচবা ঙম্বা ভারত অমা শেম্বা ঙম্নবগীদমক্তা দিফেন্স সেক্তরদা ইশানা ইশাবু থাজবগী মওং অমগী তঙাই ফদবা লৈ হায়খি। দিকেদ কয়াদগী পন্দুনা লাক্লবা সি.দি.এস. খনবগী ৱারেপ হৌজিক্তি লৌরে অমসুং মসিনা অনৌবা ভারতকী মমি তাহল্লে। চীফ ওফ দিফেন্স স্তাফ খনখিবা অসিনা ভারতকী লৈরিবা ফোর্স অহুমগী মরক্তা তেংবাংনবা হেনগৎহল্লে অমসুং দিফেন্সকী পোত্থোকশিং লৈবদসু হেনগৎহল্লে। মসিগা মান্ননা ওতোমেতিক রুতকী খুত্থাংদা দিফেন্স সেক্তরদা এফ.দি.আই.গী শরুক ৭৪%গী অয়াবা পীবা অসিনা অনৌবা ভারতনা মশাদা থাজবগী থৌওং অদু তাক্লি হায়না মহাক্না মিৎয়েং চংখি।
লৈবাক অসিদগী পোত্থোকশিং লৈনবা কেপিতেল বজেৎকী শরুক কাইথোকপা অমসুং লৈবাক অসিদগী লৈগদবা পোত্থোক ১০১ মশক খঙদোকপগী খোঙথাংশিং অসিনা লৈবাক অসিগী দিফেন্স ইন্দস্ত্রীশিংদসু নৌহৌননা তেংবাংলগনি হায়না প্রধান মন্ত্রীনা হায়খি। মহাক্না হায়খিবদা সরকারনা পোৎ লৈবদা থুজিন্নবা, চাংয়েং তৌবগী পথাপশিং পরিং নাইহনবগী থবক পায়খৎলি হায়খি। ওর্দিনান্স ফেক্তরিশিংবু কোর্পোরেৎ ওলহনবগী মতাংদা প্রধান মন্ত্রীনা হায়খিবদা থৌওং অসি হেক লোইশিনবগা মসিনা মসিগী থৌমীশিং অমসুং দিফেন্স সেক্তরবু মপাঙ্গল হাপকনি হায়খি।
হৌজিক্কী মতমগা চান্নবা পোত্থোক পুথোকপদা মরোমদোম লেপচবা ঙম্নবা তেক্নোলোজী ফগৎহনবগী তঙাই ফদবা লৈবগী মতাংদা প্রধান মন্ত্রীনা হায়খিবদা দি.আর.দি.ও.গী মথক্তা সরকারনা প্রাইবেৎ সেক্তরগা লোয়ননা একাদমিক ইন্সতুত্যসনশিংদসু রিসর্চ অমসুং অনৌবা থৌওং পাঙথোকপদা পুক্নিং থৌগৎলি হায়খি। হৌজিক মিৎয়েং চংলিবা অসি ফোরেনগী পার্ত্নরশিংগা খুৎশম্নবগী খুত্থাংদা মখোয়গা খুৎশম্নদুনা পোত্থোক পুথোকপগী হীরমদনি হায়না প্রধান মন্ত্রীনা মখা তাদুনা হায়খি।
সরকারনা শেমদোকপা, পাঙথোকপা অমসুং ওন্থোকপগী লাইশোল অসিদা থবক চত্থরি হায়রদুনা প্রধান মন্ত্রীনা মরু ওইবা অচৌবা শেমদোকপগী থৌওং কয়া ইন্তেলেকচুএল প্রোপর্তী, তেক্সেসন, ইন্সোল্বেন্সী অমসুং বেঙ্ক্রপসি, স্পেস অমসুং এতোমিক ইনর্জীগী লমশিংদা পাঙথোকপা হৌরে হায়খি।
ইনফ্রাস্ত্রকচরগী খোঙথাংশিংগী ওইনদি প্রধান মন্ত্রীনা উত্তর প্রদেশ অমসুং তমিল নাদুদা পায়খৎলিবা দিফেন্সকী কোরিদোর অনিগী মরমদা ৱা ঙাংখি। মতমগা চান্নবা ইনফ্রাস্ত্রকচর অসি উত্তর প্রদেশ অমসুং তমিল নাদু সরকারগা খুৎশম্নদুনা শেম শারি হায়খি। থবক অসিগীদমক্তা লাক্লিবা চহি ৫দা লুপা কোতি লিশিং ২০গী শেনফম থাদনবা পান্দম থম্লি হায়না মহাক্না মখা তানা হায়খি।
প্রধান মন্ত্রীনা হায়খিবদা এম.এস.এম.ই. অমসুং স্তার্ত-অপশিংগা মরু ওইনা খুৎশম্নবা ওন্তোপ্রিনরশিপশিংবু পুক্নিং থৌগৎনবা হৌদোকখিবা আই.দি.ই.এক্স.কী খোঙথাং অসিনসু অপাম্বা মহৈ পীরি হায়খি। প্লেৎফোর্ম অসিগী খুত্থাংদা মিলিতরীনা শিজিন্ননবা স্তার্ত-অপ ৫০ হেনবনা তেক্নোলোজী কয়া অমা পুথোকখ্রে হায়না মহাক্না ফোঙদোকখি।
প্রধান মন্ত্রীনা হায়খিবগী মতুং ইন্না থৌওংশিং অসিগী মপুং ওইবা পান্দমদি তৌবা ঙম্বা ভারত অমা শেমদুনা মালেমগী শেন্মিৎলোনবু হান্নদগী হেন্না নীংহন্নবা লৈহন্দবা, হেন্না তংদু লৈতাবা অমসুং মালেমদা শান্তি পুরকপনি। মসি দিফেন্সকী পোত্থোক পুথোকপদা আত্মানির্ভরতা ওইবগী ৱাখল্লোন্নি। ভারতনা লৈবাক অসিগা অফবা মরী লৈবা লৈবাকশিংদা দিফেন্সকী পোত্থোক পীবা ঙম্বা থাজবা য়াবা খোঙলোই ওইবা ঙম্বগী মতিক লৈ। মসিনা ভারতকী স্ত্রেতজিক পার্ত্নরশিপকী মওংবু হেন্না মপাঙ্গল কনখৎহনগনি অমসুং ইন্দিয়ন ওসিনগী মফমশিংদা “মপুং ওইবা সেক্যুরিতী পীবগী থৌদাং” অসিবুসু হেন্না খোঙফম চেৎশিনহনগনি হায়না প্রধান মন্ত্রীনা হায়খি।
দিফেন্স প্রদক্সন অমসুং এক্সপোর্ত প্রোমোসন পোলিসী দ্রাফৎনা ফংখিবা ফীদবেক অমসুং পাউতাকশিং অসিনা মসিগী পোলিসী অসিবু অথুবা মতমদা থবক পাঙথোকহনবদা তেংবাংগনি হায়না মহাক্না হায়খি।
প্রধান মন্ত্রীনা ৱা ঙাংবা লোইশিনবা ওইনা পুন্না হোৎনমিন্নবনা ঐখোয়না আত্মানির্ভর ভারত, মরোমদোম লেপচবা ঙম্বা ভারত ওইহনবা য়াম্না তেংবাংগনি হায়খি।
