প্রধান মন্ত্রী, শ্রী নরেন্দ্র মোদীনা ঙসি ভুতানগী থিম্ফুদা লৈবা চাংলিমেথাং সেলেব্রেসন গ্রাউন্দদা মীয়ামগী মীতিন অমদা ৱা ঙাংখ্রে। প্রধান মন্ত্রীনা ভুতানগী নিংথৌ, হিস মেজেস্তী, জিগমে খেসার নামগ্যেল ৱাংচুক অমসুং মরিশুবা নিংথৌ, হিস মেজেস্তী, জিগমে সিংগ্যে ৱাংচুকতা নুংঙাইবা ফোংদোকখি। মহাক্না ভুতানগী নিংথৌরেলগী ইমুংগী ইকাই খুম্নরবা মেম্বরশিং, ভুতানগী প্রধান মন্ত্রী, হিস এক্সেলেন্সী শ্রী শেরিং তোবগয়, অমসুং মফম অদুদা তিল্লিবা অতোপ্পা অঙম-অথৌশিংবুশু থাগৎপা ফোংদোকখি।
প্রধান মন্ত্রীনা হায়খি মদুদি ঙসি অসি ভুতানগীদমক, ভুতানগী নিংথৌগী ইমুংগীদমক অমসুং মালেমগী শান্তিদা থাজবা থম্লিবা মীওই পুম্নমক্কীদমক মরুওইবা নুমিৎ অমনি। ভারত অমসুং ভুতানগী মরক্তা চহী চা কয়াদগী লৈরক্লবা অচেৎপা ইমোস্নেল অমসুং কলচরেলগী ওইবা মরীশিং মহাক্না পনখি অমসুং মহাক্না হায়খি মদুদি অসিগুম্বা মরুওইবা থৌরম অসিদা শরুক য়াবা অসি ভারত অমসুং মহাক মশামক অনিমক্কী অচেৎপা থৌদাং অমনি। অদুম ওইনমক, শ্রী মোদীনা হায়খি মদুদি মহাক থমোইদা অৱাবা পোৎলুম অমগা লোইননা ভুতানদা লাকখি, মরমদি দিল্লীদা ঙরাং নুমিদাং থোকখিবা নুংঙাইতবা থৌদোক অদুনা মীপুম খুদিংমকপু য়াম্না ৱাহল্লে। মহাক্না শোকহল্লবা ইমুংশিংগী অৱাবা অদু খঙবগা লোয়ননা লৈবাক মীয়াম পুম্বনা মখোয়গা লোয়ননা লৈপ্লি হায়না ফোঙদোকখি। প্রধান মন্ত্রীনা হায়খি মদুদি থৌদোক অদুগী থিজিনবদা য়াওরিবা এজেন্সী পুম্নমক্কা লেপ্তনা পাউ-ই ফাওনখি। মহাক্না হায়খি মদুদি ভারতকী এজেন্সীশিংনা কন্সপিরেসী অদুবু মপুং ফানা থিজিন্দুনা ফোংদোক্কনি অমসুং এতেক অদুগী কন্সপিরেতরশিং অদু লেম্না খক থারোই হায়না থাজবা পীখি। প্রধান মন্ত্রীনা হায়খি, “মসিদা চেন্নরিবা খুদিংদমক মতিক চাবা ৱায়েল পীরগনি”, হায়না প্রধান মন্ত্রীনা লাউথোকখি।
ঙসি গুরু পদ্মসম্বভৱগী থৌজালগী মখাদা, শ্রী মোদীনা হায়খি মদুদি ভুতান্দা গ্লোবেল পীস প্রেয়র ফেস্তিবল পাংথোক্লি, মসিগা লোয়ননা ভগবান বুদ্ধগী পিপ্রহৱাগী রেলিকশিংসু উবা ফংলি। মহাক্না হায়খি মদুদি মসিগী থৌরম অসিনা হিস মেজেস্তী, মরিশুবা নিংথৌগী ৭০শুবা মপোক কুমওনসু পাংথোক্লি, মীশিং য়াম্লবা মীওই কয়া শরুক য়াবা অসিনা ভারত-ভুতানগী মরীগী মপাঙ্গল অদু উৎলি।
ভারতনা “বাসুধৈব কুতুম্বকম”- মালেম অসি ইমুং অমত্তনি হায়বা অরিবা ৱাখল্লোনদগী ইথিল লৌরি হায়বা ৱাফম থম্লদুনা প্রধান মন্ত্রীনা “সর্ভে ভৱন্তু সুখিনাহ”গী মন্ত্রগী খুত্থাংদা মালেম পুম্বগী য়াইফনবা ভারতনা হায়জরিবশিং অদু অমুক হন্না ফোংদোকখি। মহাক্না স্বর্গ, স্পেস, পৃথিবী, ঈশিং, হর্বস, ভেজেতেসন অমসুং অহিংবা জিব পুম্নমক্তা শান্তি লৈহন্নবা হায়জরিবা বেদিক্কী লাইরিকশিং অদুসু পনখি। মহাক্না হায়খি মদুদি ৱাখল্লোনশিং অসিগা লোইননা, ভারতনা ভুতানগা গ্লোবেল পীস প্রেয়র ফেস্তিবেলদা শরুক য়াখি, মসিদা মালেমগী মফম কয়াদগী লাকপা সেন্তশিংনা মালেমগী শান্তিগীদমক পুন্না লাই খুরুম্লি, অমসুং অসিগুম্বা ময়াম অপুনবগী ওইবা ৱখল্লোনশিং অসিদা ভারত মচা করোর ১৪০না থৌনিজদুনা শরুক য়াখি। শ্রী মোদীনা হায়খি মদুদি মহাক্কী পোক্নফম গুজরাতকী ভাদনগর অসি বৌদ্ধগী চৎনবীগা মরী লৈনবা শেংলবা মফম অমনি অমসুং উত্তর প্রদেশকী বরানসী, মহাক্কী থবক মফম অসি বুদধিস্তশিংনা য়াম্না ইকাই খুম্নবা শেংলবা মফম অমনি। মহাক্না পনখি মদুদি থৌরম অসিদা শরুক য়াবা অসি মশাগী ওইবা ৱাহন্থোক লৈ অমসুং শান্তিগী মঙালনা ভুতান অমসুং মালেমগী য়ুমথোং খুদিংমক্তা মঙাল পীবা ওইরসনু হায়না মহাক্না ফোংদোকখি।
ভুতানগী মরিশুবা নিংথৌবু ইকায় খুম্নবা উৎলদুনা, মহাক্কী পুন্সি অসি লৌশিং, চম্না হিংনা, থৌনা অমসুং লৈবাক অসিগীদমক্তা কত্থোকপদনা থল্লবা পুন্সি অমনি হায়না পল্লদুনা, শ্রী মোদীনা হায়খি মদুদি নিংথৌনা মশাগী চহী ১৬ শুবদা অচৌবা থৌদাং অমা লৌখি অমসুং লৈবাক অসিবু মপাগী ওইবা মীনুংশি অমসুং তুংগী ওইবা অথাপ্পা মীৎয়েং অমগা লোইনা লমজিংখি। প্রধান মন্ত্রীনা হায়খি মদুদি মহাক্কী চহি ৩৪গী লৈঙাক্কী মতমদা, হিস মেজেস্তীনা চাউখৎপা পুরকপগা লোয়ননা ভুতানগী হেরিতেজ ঙাক্না থম্বনা ভুতানবু মাংলোমদা পুখৎখি। দেমোক্রেতিক ইনস্তিত্যুসনশিং লিংখৎলকপদগী হৌরগা ঙমখৈগী লমশিংদা শান্তি পুরকপদা, হিজ মেজেস্তীনা মরু ওইবা থৌদাং অমা লৌখি। প্রধান মন্ত্রীনা মখা তারদুনা হায়খি মদুদি হিস মেজেস্তীনা হৌদোকখিবা "গ্রোস নেস্নেল হেপিনেস"কী ৱাখল্লোন অসি চাউখৎপা মশক তাক্নবা মালেমগী ওইনা শকখঙনরবা পেরামিতর অমা ওইরে। মহাক্না হায়খি মদুদি হিস মেজেস্তীনা লৈবাক শেমগৎপা হায়বসি জি.দি.পি. খক্তদা নত্তে, অদুবু মীওইবা খুন্নাইগী য়াইফ-থৌরাংগী মতাংদসুনি।
শ্রী মোদীনা হায়খি মদুদি হিস মেজেস্তী, ভুতানগী মরিশুবা নিংথৌনা ভারত অমসুং ভুতানগী মরক্তা মরুপ ওইবগী মরীবু মপাঙ্গল কনখৎহনবদা য়াম্না মরুওইবা থৌদাং লৌখি। মহাক্না হায়খি মদুদি হিজ মেজেস্তীনা থমখিবা ফাউন্দেসন অসিনা লৈবাক অনিগী মরক্তা লৈনরিবা মরী অসি মখা তানা মপাঙ্গল কনখৎহল্লি। ভারত মচা পুম্নমক্কী মায়কৈদগী প্রধান মন্ত্রীনা হিস মেজেস্তীবু থমোই শেংনা থাগৎপা ফোংদোকখি অমসুং মহাক্কী হকচাং ফনা লৈনবা অমসুং পুন্সি শাংনা হিংনবা য়াইফ-পাউজেল পীখি।
“ভারত অমসুং ভুতান অসি ঙমখৈ খক্তনা শম্নবা নত্তে, মখোয় অসি নাৎশিংনা শম্নৈ। ঐখোয়গী মরী অসি ভেল্যুশিং, ইমোসনশিং, শান্তি অমসুং প্রোগ্রেসকী মরী অমনি।" প্রধান মন্ত্রীনা ২০১৪দা ওফিস পায়রবা মতুংদা ভুতানদা মহাক্কী অহানবা মপান লমগী খোঙচৎ অদু নীংশিংলদুনা মহাক্না হায়খি মদুদি খোঙচৎ অদুগী নীংশিংবশিংনা মহাকপু য়াম্না পুক্নিং নুংঙাইহল্লি। মহাক্না ভারত-ভুতানগী মরীগী মপাঙ্গল অমসুং মগুন অদু পনখি। লৈবাক অনিমক্না অরুবা মতমদা পুন্না লেপমিন্নখি, পুন্না অৱাবা মায়োক্নখি, অমসুং হৌজিক্তি চাউখৎপা অমসুং চাউখৎপগী লম্বীদা পুন্না মাংলোমদা চংশিল্লি। শ্রী মোদীনা হায়খি মদুদি হিস মেজেস্তী দি কিংনা ভুতানবু অনৌবা অৱাংবা থাক্তা পুখৎলি। ভারত অমসুং ভুতানগী মরক্তা থাজবা অমসুং চাউখৎপগী পার্তনরশিপ অসি লমদম পুম্নমক্কী মরুওইবা মোদেল অমা ওইরি।
ভারত অমসুং ভুতাননা খোঙজেল য়াংনা খুমাং চাউশিল্লকপদা, মখোয়গী ইনর্জী পার্তনরশিপ অসিনা চাউখৎপা অসিদা মতেং পাংলি হায়না পল্লদুনা, প্রধান মন্ত্রীনা হায়খি মদুদি হিস মেজেস্তী মরিশুবা নিংথৌগী লুচিং মখাদা ভারত-ভুতান হাইদ্রোপাৱর কোলাবোরেসনগী ফাউন্দেসন থমখি। হিস মেজেস্তী মরিশুবা নিংথৌ অমসুং মঙাশুবা নিংথৌ অনিমক্না ভুতান্দা তুংকোইনা চৎনগদবা চাউখৎ-থৌরাং অমসুং অকোইবগী ফিভমদা মরুওইবা মীৎয়েং থমবা হায়বা ভিজন অসিবু শৌগৎখি। শ্রী মোদীনা হায়খি মদুদি ভিজনরী ফাউন্দেসন অসিনা ভুতানবু মালেমগী অহানবা কার্বন নেগেতিব লৈবাক ওইহনখ্রে। মসি ময়ামদগী থোইদোজক-হেন্দোকপা মাইপাকপা অমনি। মহাক্না মখা তাখি মদুদি ভুতান অসি মালেমগী ওইনা পর-কেপিতা রিন্যুৱেবল ইনর্জী পুথোকপদা খ্বাইদগী ৱাংবশিং মনুংদা অমনি অমসুং হৌজিক মখোয়গী ইলেক্ত্রিসিতীগী ১০০% দি রিন্যুৱেবল সোর্সশিংদগী পুথোক্লি। মসিগী কেপাসিতী অসি মখা তানা পাকথোক চাউথোকহন্দুনা, মেগাৱাত ১০০০দগী হেনবা অনৌবা হাইদ্রোইলেক্ত্রিক প্রোজেক্ত অমা ঙসি হৌদোক্লে, মসিনা ভুতানগী হাইদ্রোপাৱর কেপাসিতী চাদা ৪০ হেনগৎহনগনি। মসিগী মথক্তা, মতম শাংনা লেপ্লম্লবা অতোপ্পা হায়দ্রোইলেক্ত্রিক প্রোজেক্ত অমগী থবক অমুক হন্না হৌরে। প্রধান মন্ত্রীনা য়াম্না মরুওইনা পনখি মদুদি পার্তনরশিপ অসি হায়দ্রো-ইলেক্ত্রিক পাৱর খক্তদা অকক্নবা ওইদে, ভারত অমসুং ভুতাননা ঙসি মরুওইবা এগ্রীমেন্তশিংদা খুৎয়েক পীনদুনা সোলর ইনর্জীগী লমদসু মরুওইবা খোংথাং কয়া পুন্না লৌখৎলি।
ইনর্জী কোওপরেসনগী মথক্তা, ভারত অমসুং ভুতাননা কনেক্তিবিতী হেঙ্গৎহনবদা মীৎয়েং চংলি হায়না পল্লদুনা শ্রী মোদীনা হায়খি মদুদি "কনেক্তিবিতীনা খুদোংচাবা পী, অমসুং খুদোংচাবনা চাউখৎপা পুরকই।" অমসুং মসিগী ভিজন অসিগী মখাদা, গেলেফু অমসুং সামতসে শহরশিং অসি ভারতকী পাক চাউরবা রেলৱে নেতৱর্ককা শম্নহন্নবা ৱারেপ লৌখ্রে। প্রধান মন্ত্রীনা হায়খি মদুদি প্রোজেক্ত অসি লোইরবা মতুংদা ভুতানগী ইন্দস্ত্রীশিং অমসুং লৌমীশিংনা ভারতকী অচৌবা কৈথেলদা য়ৌহনবা ঙম্লগনি। রেল অমসুং লম্বীগী কনেক্তিবিতীগী মথক্তা, লৈবাক অনিমক্না ঙমখৈগী ইনফ্রাস্ত্রকচরদা খোঙজেল য়াংনা খুমাং চাউশিল্লি হায়না মহাক্না মখা তাখি। হিজ মেজেস্তিনা হৌদোকখিবা ভিজনরী গেলেফু মাইন্দফুলনেস সিতী ইনিসিয়েতিবকী মতাংদা পল্লদুনা, প্রধান মন্ত্রীনা মসিগী চাউখৎ-থৌরাংগীদমক ভারতনা মপুং ফানা মতেং পাংগনি হায়না থাজবা পীখি। মহাক্না লমকোয়বশিং অমসুং ইনভেস্তরশিংদা হেন্না খুদোংচাবা ফংহন্নবা ভারতনা অথুবা মতমদা গেলেফুগী মনাক্তা ইমিগ্রেসন চেক পোস্ত অমা লিংখৎলগনি হায়না লাউথোকখি।
প্রধান মন্ত্রীনা হায়খি, "ভারত অমসুং ভুতানগী চাউখৎপা অমসুং নুংঙাই-য়াইফবা অসি য়াম্না মরী লৈনৈ।" মসিগী ৱাখল্লোন অসিদা, ভারত সরকারনা মমাং চহিদা ভুতানগী চহি মঙাগী থৌরাংগীদমক লুপা করোর ১০,০০০গী মতেং পেকেজ অমা লাউথোকখি। মহাক্না ফোংদোকখি মদুদি ফন্দ অসি সেক্তর পুম্নমক্তা শীজিন্নরি। লম্বী-থোংদগী হৌরগা লৌউ-শিংউ ফাওবা, শেল থাদবা অমসুং হকশেলগী লমদসু শীজিন্নরি। মসিনা ভুতানগী প্রজাশিংগী পুন্সি মহিংদা অহেনবা খুদোংচাবা ফংহল্লি। শ্রী মোদীনা মখা তারদুনা হায়খি মদুদি ভুতানগী মীয়ামদা তঙাইফদবা পোৎলমশিং লেপ্পা লৈতনা ফংহন্নবা ভারতনা খোঙথাং কয়া অমা লৌখৎলি। ভুতানদা য়ু.পি.আই. পেমেন্তকী লম পাকথোক চাউথোরক্লি অমসুং ভুতানগী নাগরিকশিংনা ভারত্তা লাকপা মতমদা য়ু.পি.আই. সর্বিসশিং শিজিন্নবা বানবা কন্না হোৎনরি হায়না মহাক্না মখা তাখি।
ভারত-ভুতানগী চাউরবা পার্তনরশিপকী খ্বাইদগী অচৌবা বেনিফিসরিশিং অসি লৈবাক অনিগী নহারোলশিংনি হায়না পল্লদুনা, শ্রী মোদীনা নেস্নেল সর্ভিস, ভোলুন্তরী সর্ভিস অমসুং ইনোবেসন প্রমোৎ তৌবদা মহারাজকী খুদম-চাংদম ওইরবা শিংথানিঙাই ওইরবা থবকশিংবু থাগৎপা ফোংদোকখি অমসুং তেক্নোলোজীগী খুত্থাংদা নহারোলশিংবু শক্তি পীনবা মহারাজগী ভিজনরি ওইবা থবকশিং অদুসু মহাক্না পনখি। প্রধান মন্ত্রীনা হায়খি মদুদি ভুতানগী নহারোলশিংবু ভিজন অসিনা য়াম্না পুক্নিং থৌগৎলি অমসুং ভারত অমসুং ভুতানগী নহারোলশিংগী মরক্তা এজুকেসন, ইনোবেসন, স্কিল দিবেলপমেন্ত, স্পোর্তস, স্পেস অমসুং কলচর য়াওনা সেক্তর কয়াদা তেংবাং পীনবা হেনগৎলক্লি। লৈবাক অনিমক্কী নহাশিংনা হৌজিক সেতেলাইত অমা শেমগৎনবা পুন্না থবক তৌমিন্নরি হায়না মহাক্না হায়খি, মসি ভারত অমসুং ভুতানগী ওইনা য়াম্না মরু ওইবা মাইপাকপা অমনি হায়না মহাক্না হায়খি।
প্রধান মন্ত্রী, শ্রী মোদীনা হায়খি মদুদি ভারত-ভুতানগী মরীশিংগী মরুওইবা মপাঙ্গল অসি লৈবাক অনিগী মীয়ামগী মরক্তা লৈনরিবা অচেৎপা ইমোস্নেল বোন্দশিংদা লৈ। মহাক্না ইকুই কুইদ্রিঙৈদা ভারতকী রাজগিরদা রোয়েল ভুতানীজ তেমপল শঙ্গাবগী থৌরম অদু পনখি অমসুং মসিগী থৌরাং অসি হৌজিক লৈবাক অসিগী অতোপ্পা মফমশিংদা শন্দোরক্লি হায়না পনখি। ভুতানগী মীয়ামগী অপাম্বা অদুগী পাউখুম ওইনা প্রধান মন্ত্রীনা হায়খি মদুদি ভারত সরকারনা বরানসীদা ভুতানগী লাইশঙ অমসুং গেস্ত হাউস অমা শাবগীদমক মথৌ তাবা লম পীরি। লাইশঙশিং অসিনা ভারত অমসুং ভুতানগী মরক্তা লৈনরিবা মমল য়াম্লবা অমসুং পুৱারী ওইরবা কলচরেল লিঙ্কশিংবু হেন্না চেৎশিলহল্লি হায়না মহাক্না য়াম্না মরুওইনা পনখি। মহাক্কী ৱারোল লোইশিল্লকপদা, লৈবাক অনিমক্না শান্তি, চাউখৎপা অমসুং চাউখৎপগী লম্বীদা মখা তানা চত্থখিগনি হায়না প্রধান মন্ত্রীনা মহাক্কী থাজবা ফোংদোকখি। লৈবাক অনিমক্তা ভগবান বুদ্ধ অমসুং গুরু রিনপোচেগী থৌজাল পিনবীবা ওইরসনু হায়না মহাক্না থৌনিজখি।
