প্রধান মন্ত্রী শ্রী নরেন্দ্র মোদীনা ঙসি ভিদিও মেসেজকী খুত্থাংদা কেরলাদা পাংথোকপা আর্য় বৈদ্য সালা চেরতিবেল হোস্পিতালনা চহি চাম্মা মপুং ফারকপগী নুংঙাইবা ফোংদোকপগী থৌরমদা ৱা ঙাংখ্রে। প্রধান মন্ত্রীনা থৌরম অসিদা ৱা ঙাংবদা ঙসিগী য়াইফরবা থৌরম অসিদা মীয়ামগা পুনবা ফংবা হায়বসি নুংঙাইবা ৱাখল্লোন অমনি হায়না ফোংদোকখি। আর্য় বৈদ্যসালানা আয়ুর্বেদবু য়োকখৎপা, ঙাক-শেনবা অমসুং খুমাং চাউশিলহনবদা মশক থোকপা থৌদাং লৌরগা লাক্লি হায়না মহাক্না মীয়ামগী পুক্নিং চিংশিনখি। ইন্সতিত্যুসন অসিগী চহি ১২৫গী খোঙচৎ অসিদা মসিনা আয়ুর্বেদবু লাইয়েংবগী পাঙ্গল লৈরবা পথাপ অমা ওইহল্লে হায়না শ্রী মোদীনা মখা তাখি। আর্য় বৈদ্যসালাবু হৌদোক্লম্বা বিদ্যারত্নম পি.এস. ভরিয়রনা লৌরম্বা থৌদাং কয়াবু মহাক্না অমুক হন্না নীংশিংলদুনা মহাক্না মীয়ামগীদমক্তা কত্থোকপা অসিনা মীয়ামদা ঙসিশু ইথিল পীরি হায়না মহাক্না পনখি।
কেরলাগী আর্্য বৈদ্যসালা অসিদি চহি চা কয়াগী মীওই খুন্নাইবু তেংবাংদুনা লাক্লবা ভারতকী অনা লাইয়েংবগী অহিংবা খুদম অমা ওইরি হায়না প্রধান মন্ত্রীনা পল্লদুনা ভারত্তা আয়ুর্বেদ অসি শুপ্নগী য়ুগ অমা নত্ত্রগা মফম অমদা অকক্নরগা লৈতে, মসিগী অরিবা মতমগী হিদাক লাংথক্কী পথাপ অসিনা পুন্সি খঙবা, খল ঙাকপা, অমসুং মহৌশাগা লোয়ননা হিংমিন্নবগী লম্বী তাক্তুনা লাক্লি হায়না ফোংদোকখি। আর্য় বৈদ্যসালানা আয়ুরবেদগী হিদাক ৬০০ হেন্না পুথোকখ্রে অমসুং মীরম লৈবাক ৬০ গা লোয়ননা লৈবাক অসিগী তোঙান-তোঙানবা মফমদা লৈবা হোপ্সিতাল কয়ানা আয়ুর্বেদগী খুত্থাংদা অনাবা কয়া অমা লাইয়েংলি হায়না মহাক্না হায়খি। আর্য় বৈদ্যসালানা মখোয়গী থবক্কী খুত্থাংদা মীয়ামগী থাজবা ফংলে অমসুং মীয়াম্না ৱারকপা মতমদা ইন্সতিত্যুসন অসিনা মখোয়গী চঙজফম ওইরি হায়না মহাক্না হায়খি।
“আর্য় বৈদ্যসালাগী ওইনা মীয়ামগী সেবা হায়বসি শুপ্নগী ৱাখল্লোন অমখক নত্তে, মখোয়গী থবক, থৌওং অমসুং ইন্সতিত্যুসন অসিদা উরিবা মখোয়গী কত্থোকপগী মতৌনি”, শ্রী মোদীনা হায়খি। ইন্সতিত্যুসন অসিগী চেরিতেবল হোস্পিতাল অসিনা হৌখিবা চহি ১০০দগী মীয়ামগী সেবা লেপ্তনা তৌদুনা লাক্লি হায়না শ্রী মোদীনা ফোংদোক্লদুনা হোস্পিতাল অসিনা পাংথোকখিবা থবক কয়াবু নীংশিংখি। মহাক্না বৈদ্য, দাক্তর, নর্সিং স্তাফ অমসুং হোস্পিতাল অসিগা মরী লৈনবা মীওই খুদিংদা য়াইফ পাউজেল অমসুং চেরিতেবল হোস্পিতাল অসিগী চহি ১০০গী খোঙচৎ অসিগীদমক্তা থাগৎপা ফোংদোকখি। কেরলাগী মীয়াম্না আয়ুর্বেদগী চৎনবীবু চহি চা ক্যা য়োকখত্তুনা লাক্লি অমসুং হৌজিকশু মসিবু হেন্না খুমাং চাউশিনহল্লি হায়না মহাক্না পনখি।
লৈবাক অসিদা অরিবা মতমগী হিদাক লাংথক্কী চৎনবী অসি মীয়াম্না কাওনবগুম তৌরুরে, অদুবু মমাংগী চহি ১০-১১ অসিদা থৌওং অসিদা অচৌবা অহোংবা অমা উবা ফংলক্লে হায়না প্রশান মন্ত্রীনা হায়খি। হেল্থকেয়রগী ৱাখল্লোন অসি হৌজিক্তি অপুনবা মিৎয়েং অমদা য়েংনরে অমসুং আয়ুর্বেদ, উনানি, হোমিওপেথী, সিদ্ধা অমসুং য়োগ অসি হৌজিক ছাতিন অমগী মখাদা পুরক্লে অমসুং মসিগীদমক্তা আয়ুশ মন্ত্রালয়শু হৌদোকখিবনি হায়না মহাক্না হায়খি। সরকারনা নেস্নেল আয়ুশ মিসন হৌদোক্তুনা অমসুং য়োগ, প্রিভেন্তিব কেয়র অমসুং কম্ম্যুনিতী সর্ভিসশিং পীবা আয়ুশ ৱেলনেস সেন্তর ১২০০০ হেন্না হাংদোক্তুনা প্রিভেন্তিব হেল্থতা লেপ্তবা মিৎয়েং চঙদুনা লাক্লি হায়না শ্রী মোদীনা হায়খি। লৈবাক অসিগী হোস্পিতালশিংশু আয়ুশ সর্ভিস্কা মরী লৈনহল্লে অমসুং আয়ুশকী হিদাক ৱাত্তনা পীনবা মিৎয়েং চঙলি হায়না মহাক্না পনখি। পুম্নমক অসিগী ময়েক শেংবা পান্দমদি ভারতকী মৈহৌরোলদগী চৎনরক্লবা হিদাক লাংথক্কী লৌশিং অসি লৈবাক অসিগী কাচিন কোয়া খুদিংমক্তা লৈবা মীয়ামদা য়ৌহনবনি হায়না প্রধান মন্ত্রীনা ফোংদোকখি।
আয়ুশ মেন্যুফেকচরিং সেক্তরনা শাহৌ য়াঙনা লৌখৎলকপা অমসুং পাকথোক চাউথোক্লকপগা লোয়ননা আয়ুশ সেক্তরদা সরকারগী পোলিসীশিংনা পাংবা মতেং অসি ময়েক শেংনা উবা ফংলে হায়না শ্রী মোদীনা পল্লদুনা ভারতকী ত্রেদিস্নেল ৱেলনেস অসিবু মালেমদা য়ৌহন্নবা সরকারনা ফজবা রিজল্ত হান্নদগী উৎলগা লাক্লবা আয়ুশকী পোত্থোকশিংবু মালেমগী কৈথেলদা য়ৌহনবগী পান্দমগা লোয়ননা আয়ুশ এক্সপোর্ত প্রোমোসন কাউন্সিল শেম্লে হায়না ফোংদোকখি। ইং ২০১৪দা ভারতনা লুপা করোর ৩০০০গী শেনফম ওইগদবা আয়ুশ অমসুং হর্বেলগী পোত্থোক মীরমদা থাদোকখি অমসুং মসিগী মশিং অসি হৌজিক্তি লুপা করোর ৬৫০০ য়ৌরে অমসুং মসিনা লৈবাক্কী লৌমীশিংদা কান্নবা য়াম্না পীরি হায়না মহাক্না হায়খি।
ভারত অসি আয়ুশ্তা য়ুম্ফম ওইবা মেদিকেল ভেল্যু ত্রাভেলগী থাজনরবা পন্থুংফম অমা ওইরক্লি হায়না শ্রী মোদীনা পল্লদুনা আয়ুশ ভিজা হৌদোকপগুম্বা খোঙথাংশিং অসিনা মীরম লৈবাক্কী মীয়াম্না আয়ুর্বেদগী হেন্না ফবা খুদোংচাবা কয়া লৌবা ফংহল্লি হায়না মখা তাখি।
আয়ুর্বেদবু হেন্না খুমাং চাউশিলহন্নবা সরকারনা মসিবু প্লেতফোর্ম খুদিংদা শক্তাক্লি হায়না প্রধান মন্ত্রীনা হায়খি। মহাক্না আয়ুর্বেদবু হোলসিতিক হেল্থকী পাম্বৈ অমনি হায়না ব্রিক্স নত্ত্রগা জি২০ সম্মিত্তা পাউদমখিবগী ৱাফমশু মহাক্না ফোংদোকখি। গুজরাতকী জাম্নগরদা ৱর্ল্দ হেল্থ ওর্গনাইজেসনগী গ্লোবেল ত্রেদিস্নেল মেদিসিন সেন্তর অমা শারি অমসুং মফম অসিদা ইন্সতিত্যুত ওফ তিচিং এন্ড রিসর্চ ইন আয়ুর্বেদগী থবকশু হৌখ্রে হায়না মহাক্না হায়খি। আয়ুর্বেদগী হিদাক্কী য়ামখৎলক্লবা দিমান্দশিং থেংনবা ঙম্নবা মেদিসিন ফার্মিংগী পুক্নিং থৌগৎলি অমসুং মসিমক গঙ্গা তুরেলগী তোর্বান্দা পায়খৎলি হায়না মহাক্না মখা তাখি।
অতোপ্পা মায় পাকপা অমগী মতাংদা শ্রী মোদীনা পল্লদুনা, য়ুরোপিয়ন য়ুনিয়নগা লোয়ননা হন্দক্তা লাউথোকখিবা ত্রেদ এগ্রীমেন্তনা ভারতকী নাৎকী হিদাক লাংথক থাবগী সেবা অমসুং মসিবু থবক্তা ওন্থোক্লিবা মীওইশিংদা মসিনা কান্নবা চাউনা পীগনি হায়না পনখি। রেগ্যুলেসন লৈত্রিবা ই.য়ু. মেম্বর লৈবাকশিংদা আয়ুশ প্রেক্তিশ্নরশিংনা ভারত্তা ফংখিবা প্রোফেস্নেল ক্বালিফিকেসন্দা য়ুম্ফম ওইরগা মখোয়গী সর্ভিস মফমদুদা পীবা ইয়ারগনি অমসুং মসিনা আয়ুর্বেদ অমসুং য়োগগা মরী লৈনবা নহাশিংদা কান্নবা চাউনা পীগনি হায়না মহাক্না হায়খি। মসিগী এগ্রীমেন্ত অসিনা য়ুরোপ্তা আয়ুশ ৱেলনেস সেন্তর হাংদোকপদা তেংবাংগনি হায়না পল্লদুনা আয়ুর্বেদ অমসুং আয়ুশকা মরী লৈনবা মশক নাইবা মীওই খুদিংদা মায় পাকপা অসিগীদমক্তা মহাক্না থাগৎপা ফোংদোকখি।
ভারতনা আয়ুর্বেদগী খুত্থাংদা মীয়াম্বু চহি চা কয়াদগী লাইয়েংদুনা লাক্লি অদুবু লৈবাক অসিদা অমসুং মীরম লৈবাক্তা আয়ুর্বেদগী মরু ওইবা তাকপগী মথৌ তাবা অমা হৌজিক ফাওবা লৈরিবা অসি লাইবক থীবনি হায়না প্রধান মন্ত্রীনা হায়খি। মসিগী মরু ওইবা মরম অমদি খুদমদা য়ুম্ফম ওইবা রিসর্চ ৱাৎপা, রিসর্চ পেপর লৈতবননি হায়না মহাক্না পল্লদুনা আয়ুর্বেদগী থৌওং অসি সাইন্সকী ৱাখল্লোন শিজিন্নদুনা চাংয়েং তৌবা মতমদা মীয়াম্না মসিদা থাজবা হেনগৎলি হায়না মহাক্না মখা তাখি। আর্য় বৈদ্যসালানা সাইন্স অমসুং রিসর্চতা য়ুম্ফম ওইরগা আয়ুর্বেদগী থৌওংশিংবু লেপ্তনা চাংয়েং তৌরগা লাকপা অমসুং সি.এস.আই.আর., আই.আই.তি.গুম্বা ইন্সতিত্যুসন কয়াগা থবক তৌমিন্নবা অসিদা শ্রী মোদীনা নুংঙাইবা ফোংদোকখি। ইন্সতিত্যুত অসিনা দ্রগ রিসর্চ, ক্লিনিকেল রিসর্চ অমসুং কেন্সর কেয়রদা মিৎয়েং চঙলি অমসুং আয়ুশ মন্ত্রালয়গী তেংবাংদগী কেন্সর রিসর্চকী সেন্তর ওফ এক্সলেন্স অমা হাংদোকপা অসিনা মায়কৈ অসিদা থাংজিনবা অচৌবা খোঙথাং অমা ওইরি হায়না মহাক্না হায়খি।
হোংলক্লিবা মতমগা লোয়ননা আয়ুর্বেদনা মোদর্ন তেক্নোলোজী অমসুং এ.আই. শিজিন্নবা হেনগৎপা হায়বসিনা হৌজিক্কী মিৎয়েং ওইগদবনি অমসুং মসিনা লাইনা নাবা য়াবগী ওইথোকপা লৈবশিং মাংজৌননা হায়বা ঙমগনি অমসুং লাইয়েংবগী তোঙান-তোঙানবা থৌওং কয়া পীবা ঙমগনি হায়না প্রধান মন্ত্রীনা হায়রদুনা আর্য় বৈদ্যসালানা ত্রেদিসন অমসুং মোদর্নিতী অসি খুৎশম্নরগা চৎমিন্নবা য়াই তাক্লে অমসুং মীয়ামগী পুন্সিদা হেল্থকেয়রনা থাজবা পুরকপগী ফম্বাক অমা ওইবা ইয়ারগনি হায়না মখা তাখি। ইন্সতিত্যুসন অসিনা হৌজিক মতমগী তঙাই ফদবা মশক খঙদোক্লগা, লাইয়েংবগী থৌওং পথাপ নাইহন্দুনা অমসুং অনাবশিংবু লাইয়েংদুনা আয়ুর্বেদগী অরিবা লৌশিং অসি য়োকখত্তুনা থম্লি হায়না শ্রী মোদীনা হায়খি। মসিগুম্বা ইথিল পীনিংঙাই ওইরবা খোঙচৎ অসিগীদমক্তা মহাক্না আর্য় বৈদ্যসালাবু থাগৎলদুনা লাক্লিবা মতমদা ইন্সতিত্যুসন অসিনা চপ মান্নবা কত্থোকপা অমসুং সেবাগা লোয়ননা মীয়ামগী পুন্সিদা অহোংবা পুরক্কনি হায়বগী থাজবা থম্লি হায়না প্রধান মন্ত্রীনা ফোংদোকখি।
ঙসিগী থৌরম অসিদা তিনখিবা মীথুংলেনশিংগী মরক্তা কেরলাগী রাজ্যপাল শ্রী রাজেন্দ্র অর্লেকরশু য়াওখি।
