প্রধান মন্ত্রী শ্রী নরেন্দ্র মোদী রাজস্থানগী জয়পুরদা রাজ্য সরকার চহি অমা মপুংফারকপগী থৌরম ‘এক ৱর্স-পরিনাম উতকর্স’ থৌরম শরুক য়াখ্রে

ঙসি প্রধান মন্ত্রী শ্রী নরেন্দ্র মোদী রাজস্থানগী জয়পুরদা রাজ্য সরকার চহি অমা মপুংফারকপগী থৌরম ‘এক ৱর্স-পরিনাম উতকর্স’ থৌরম শরুক য়াখ্রে। থৌরম অদুদা তিনখিবা মীয়ামদা ৱা ঙাংবদা, রাজ্য সরকার চহি অমা মপুংফারকপদা মহাক্না রাজস্থান সরকার অমসুং রাজস্থানগী মীয়াম থাগৎপা ফোঙদোকখি। মহাক্না হায়খি থৌরম অসিদা তিনখিবা মীওই লাখ কয়াগী থৌজাল ফংবা অসি মহাক্কী লাইবক ফবনি। রাজস্থান চাউখৎনবা অমসুং অনৌবা মাইকৈ অমা তাক্নবা রাজস্থানগী চীফ মিনিস্তর অমসুং মহাক্কী কাংবুগী থবক অসি থাগৎনিঙাইনি। অহানবা চহি অসিদা তুংগী চহি কয়াগী চাউখৎ-থৌরাংগী য়ুম্ফম থোল্লে। ঙসিগী থৌরম অসি শুপ্নগী সরকার চহি অমা মপুংফারকপগী থৌরম নত্তে, মসিনা রাজস্থানগী অরংবা মঙালগী খুদমনি অমসুং রাজস্থানগী চাউখৎ-থৌরাংগী কুহ্মৈ অমনি। হন্দক মহাক্না রাইজিং রাজস্থান সম্মিৎ ২০২৪ শরুক য়াখ্রে। থৌরম অদুদা মালেম শীনবা থুংবগী ইনভেস্তর কয়া শরুক য়াখি অমসুং ঙসিনা লুপা করোর ৪৬,৩০০ হেনবগী প্রোজেক কয়া শঙ্গারে। হায়রিবা প্রোজেকশিং অসিনা রাজস্থান্দা ঈশিংগী অৱাবশিং কোকহনগনি অমসুং রাজস্থান ভারতকী মনুংদা খ্বাইদগী লম্বী-থোং লৈনবা রাজ্য অমা ওইহনগনি। চাউখৎ-থৌরাংগী থবকশিং অসিনা ইনভেস্তরশিং হেন্না লাকহনগনি, থবক কয়া ফংহনগনি, তুরিজম চাউখৎহনগনি অমসুং রাজস্থানগী লৌমীশিং, নুপীশিং অমসুং নহারোলশিং কান্নবা কয়া ফংগনি। 

প্রধান মন্ত্রীনা হায়খি কেন্দ্র অমসুং রাজ্যদা লৈরিবা সরকারশিং ঙসি অফবা লৈবাক্কী খুদম অমা ওইরে। মখোয়গী সরকারনা থাজবা পীখিবা থবকশিং মখোয়না মাইপাক্না পাংথোক্কনি। ঙসিদি মীয়াম্না মহাক্কী দল অসি অফবা লৈঙাক্কী খুদম অমনি হায়না ফোঙদোক্লে অমসুং মসি রাজ্য কয়াদগী মীয়ামগী মতেং ফংবদগী ওইথোকপনি। থংন-থংননা মীয়ামগী সেবা তৌনবা মখোয়দা খুদোংচাবা পীবগীদমক ভারতকী মীয়াম থাগৎপা ফোঙদোকচরি। হৌখিবা চহি ৬০ অসিদা দল অমনা অহুমলক কেন্দ্র সরকার অমা শেম্বা লৈখিদ্রি। মীয়াম্না মহারাস্ত্রা অমসুং হরিয়ানাদা মখোয় অনিরকশুবা ওইনা খল্লে অমসুং মীয়ামদা মখোয়দা থাজবা থম্লিবা হায়বা মসিনা তাক্লে।

চাউখৎপগী অকনবা য়ুম্ফম অমা থোনবগী রাজস্থানগী মমাঙগী সরকারশিং অমসুং অফবা লৈঙাক্কী চৎনবী অমা মাঙলোমদা পুখৎলকপগীদমক শ্রীমতি বসুন্ধারা রাজে সিন্দিয়া থাগৎলদুনা, প্রধান মন্ত্রীনা হায়খি অফবা লৈঙাক্কী চৎনবী অমা মখা তানা মপাঙ্গল কনখৎহন্নবা শ্রী ভজনলাল শর্মাগী সরকার অসিনা অকনবা থবক কয়া পায়খৎলে। হৌখিবা চহি অমদা পায়খৎখিবা থবকশিংদা মসিগী মমি তারে। লায়রবা ইমুংশিং, নুপীশিং, শিন্মীশিং, বিশ্বাকর্মাশিং অমসুং নোমেদিক ত্রাইবশিংগী য়াইফনবা ৱারেপ কয়া লৌরে। প্রধান মন্ত্রীনা হায়খি পেপর লিক, থবক হাপ্পগী ৱাথোকশিং অসি হৌখিবা সরকারশিংগী শক্তম ওইখী। নহারোলশিং অৱাবা মায়োক্নখি অমসুং হৌজিক হৌখিবা সরকারনা পাংথোক্লম্বা থবকশিং চুমথোক্নবা থবক পায়খৎলে। হৌখিবা চহিদা রাজস্থান থবক লিশিং কয়া পীনবা খুদোংচাবশিং পীখ্রে অমসুং থবকশিং হাপ্নবা অরোন-অথুপশিং লৈতনা থবক লৌনবা চাংয়েংশিং পাংথোকখ্রে।

প্রধান মন্ত্রীনা হায়খি হৌখিবা সরকারশিংগী মনুংদা রাজস্থানগী মীয়াম্না অতোপ্পা রাজ্যশিংগী মীওইশিংদগী পেত্রোল অমসুং দিজলগী মমল হেন্না পীখি। হৌজিক মীয়াম্না পাল্লিবা সরকার অসিগী মখাদা পেত্রোল অমসুং দিজলগী মমল তানা ফংলে। হন্দক কেন্দ্র সরকারনা পি.এম কিষান সম্মান নিধি য়োজনাগী মখাদা লৌমীশিংগী বেঙ্ক একাউন্তশিংদা হকথেংননা শেন হাপচিনখ্রে অমসুং লৌমীশিং মতেং পাংনবা রাজস্থান সরকারনা অহেনবা শেন হাপচিনখ্রে। লৈঙাক অসিগী ৱাশকশিং থবক ওইনা পাংথোক্তুনা কেন্দ্র অমসুং রাজ্য সরকারশিংনা ইনফ্রাস্ত্রকচর প্রোজেকশিং য়াংনা পায়খৎলে অমসুং ঙসিগী থৌরম অসি ৱাশক অদুগী শরুক অমনি।

প্রধান মন্ত্রীনা হায়খি মদুদি রাজস্থানগী মীয়ামগী থৌজালগা লোয়ননা, হৌখিবা চহি ১০ অসিদা কেন্দ্রদা মহাক্কী সরকারনা শক্তি পায়রে। হৌখিবা চহি ১০ দা মীয়ামগী পুন্সিদা থেংনরিবা অৱাবশিং হন্থহন্নবা ঐখোয়না লৈবাক অসিগী মীয়ামদা খুদোংচাবশিং ফংহন্নবা থবক কয়া পায়খৎলে। নিংতম্লবা মতুংদা চহি ৫০-৬০ মমাঙগী সরকারশিংনা পাংথোকখিবা থবকশিং অদুদগী হেন্না হৌখিবা চহি ১০ অসিদা মহাক্কী সরকারনা থবকশিং পাংথোক্লে। রাজস্থান্দগী মফম কয়াদা ইকংগী অৱাবা মায়োক্নখি অদুগা অতোপ্পা মফমশিংদা তুরেলশিং শীজিন্নদনা সমুদ্রদা তিনখি। মসিগী অৱাবা অসি কোক্নবা তুরেলশিং শম্ননবা অতল বিহারি বাজপায়না মঙলান অমা মঙখি অমসুং মসিগীদমক অখন্নবা কম্মিতি অমা শেমখি। থবক অসিগী পান্দমদি তুরেলশিংগী অহেনবা ঈশিং ইকং থোক্লিবা মফমশিংদা পুরকপনি, ঈশিং ইচাউ অমসুং ইকংগী অৱাবা অনিমক কোকহনবনি। থবক অসি সু্প্রিম কোর্তনশু শৌগৎখি অদুবু হৌখিবা সরকারশিংনা ঈশিংগী অৱাবশিং কোকহন্নবা হোৎনখিদে অমসুং মসিগী মহুত্ত রাজ্যশিংগী মরক্ত ঈশিংগী খৎনবা পুক্নিং থৌগৎখি। থৌশিল অসিদগী রাজস্থান অচৌবা অৱাবা মায়োক্নখি, নুপীশিং অমসুং লৌমীশিং শাথিনা শোকহনখি। মহাক্না গুজরাতকী চীফ মিনিস্তর ওইরিঙৈদা নরমাদা তুরেলগী ঈশিং গুজরাত অমসুং রাজস্থানগী মফম কয়াদা পুনবা মহাক্না থবক পায়খৎখি, অদুবু মতম অদুগী সরকারনা মদু থিংনবা হোৎনখি। মহাক্না লেপ্তনা থবক পায়খৎপগী মহৈ রাজস্থান্না ফংলে অমসুং মহাক্কী থবক অদু শ্রী ভাইরোন সিংহ সেখাৱাত অমসুং শ্রী জসৱান্ত সিংহগুম্বা লুচিংবশিংনা থাগৎপা ফোঙদোকখি। হৌজিক জালোর, বারমর, চুরু, ঝুনঝুনু জোধপুর নাগৌর, হনুমানগরগুম্বা জিলাশিংদা নরমাদা তুরেলগী ঈশিং ফংলে।

ইস্তর্ন কেনেল প্রোজেক (ই আর সি পি) থেংদবগী মতাংদা, প্রধান মন্ত্রীনা হায়খি মদুদি অথিংবা অমসুং অপনবা পীবগী মহুত্তা মহাক্কী সরকারনা মতেং পাংনবদা থাজবা থমখি। মহাক্কী সরকারনা ই.আর.সি.পি অয়াবা পীখি অমসুং শাংদোকখি। মধ্য প্রদেস অমসুং রাজস্থান্দা মখোয়গী সরকারশিং লাকপদগী, চম্বল তুরেল অমসুং মসিগী মশাশিং হায়বদি পার্বতি, কালিসিন্ধ, কুনো, বনাস, রুপারেল, গম্ভিরি অমসুং মেজ তুরেলশিং শম্ননবা পর্বতি-কালিসিন্ধ-চম্বল লিঙ্ক প্রোজেক য়ানবা অমা পুরক্লে। রাজস্থান্দা ঈশিংগী অৱাৎপা লৈতবা, রাজস্থানগী চাউখৎ-থৌরাংগী ঈশিং মরাংকাইনা লৈবা নুমিৎ অদু উনবা ঐনা পান্দম থম্লি। পর্বতি-কালিসিন্ধ-চম্বল লিঙ্ক প্রোজেক অসিনা রাজস্থান অমসুং মধ্য প্রদেস অনিমক চাউখৎপা য়াংখৎহনবগা লোয়ননা রাজস্থানগী জিলা ২১ দা ইথৈ অমসুং থক্নবা ঈশিং পীগনি।

ঙসি ইসারদা লিঙ্ক প্রোজেক উরেপ-উয়ুং তমখিবা অসিগী মতাংদা, প্রধান মন্ত্রীনা হায়খি হরিয়ানা অমসুং রাজস্থান অনিমক কান্নবা পীনবা তাজেৱালাদগী সেখাৱাতিদা ঈশিং পুরক্নবা য়ানবা অমা পুরক্লে। অথুবা মতমদা রাজস্থানদা য়ুমথোং চাদা ১০০ তোতি ঈশিং ফংলগনি। ২১শুবা চহিচাগী ভারত্ত নুপীশিংদা শক্তি পীবা অসি য়াম্না মরুওই। সেল্ফ হেল্প গ্রুপকী ইহৌ অসিনা নুপীশিংগী থৌনাগী খুদম অমা ওইরে অমসুং হৌখিবা চহি ১০ দা হায়রিব গ্রুপশিং অসিদা রাজস্থানদগী নুপী লাখ কয়া য়াওনা লৈবাক শীনবা থুংবগী নুপী করোর ১০ হেন্না শরুক য়াখ্রে। গ্রুপশিং অসিগা বেঙ্কশিংগা শম্নহন্দুনা মখোয়গী মপাঙ্গল কনখৎহন্নবা মখোয়গী সরকারনা চোকথবা নাইদনা হোৎনরি,  গ্রুপশিং অসিদা পীবা শেন্থং লুপা লাখ ১০ দগী লুপা লাখ ২০ দা হেনগৎলে অমসুং লুপা করোর লাখ ৮ গী মতেং পাংখ্রে।  খুঙ্গংগী শেন্মিৎলোন্দা শিংথানিঙাই ওইবা শাফু অমা ওইহন্দুনা, নুপীশিংগী গ্রুপশিং অসিগী পোৎথোকশিংগী অনৌবা কৈথেলশিং ফংহন্নবা অমসুং মখোয়দা ত্রেনিং পীনবা সরকারনা থৌরাং তৌরে। সেল্ফ হেল্প গ্রুপশিংদগী নুপী করোর অহুম “লাখপতি দিদি” ওইনা শেমগৎনবা হৌজিক সরকারনা থবক পায়খৎলি অমসুং নুপী করোর ১.২৫ মাঙজৌননা লাখপতি দিদি ওইখ্রে অমসুং চহি অমদা লুপা লাখ ১ হেন্না তাল্লে। নুপীশিংদা শক্তি পীনবা স্কিম কয়া পায়খৎলে। নমো দ্রোন দিদি স্কিমগী মখাদা নুপী লিশিং কয়া দ্রোন পাইলোতশিং ওইনা ত্রেন তৌরে। গ্রুপ লিশিং কয়া দ্রোনশিং ফংখ্রে অমসুং নুপীশিংনা দ্রোনশিং লৌ উবদা অমসুং শেন তানবদা শীজিন্নরে। স্কিম অসি খুমাঙচাউশিন্নবা রাজস্থান সরকারনা শিংথানিঙাই ওইবা থবকশিং পায়খৎলে।

প্রধান মন্ত্রীনা হায়খি হন্দক নুপীশিংগী বিমা শখি য়োজনা কৌবা স্কিম অমা হৌদোকখ্রে। হায়রিবা স্কিম অসিগী মখাদা খুঙ্গংশিংগী নুপীশিং ইন্সুরেন্সকী থবক শরুক য়াগনি অমসুং ত্রেনিং ফংগনি। স্কিম অসিনা মখোয়দা শেন্থোক লৈহনগনি অমসুং লৈবাক্কী থবক তৌনবা অতোপ্পা খুদোংচাবা অমা পীগনি। বেঙ্ক শখিশিংনা লৈবাক অসিগী মফম কয়া বেঙ্কগী থবকশিং ফংহল্লে অমসুং বেঙ্ক একাউন্ত হাংদোকপা, মীয়ামদা লোনগী খুদোংচাবশিং ফংহনবদা মখোয়না মতেং পাংলি। হৌজিক বিমা শখিশিংনা ভারতকী ইমুং খুদিংমক ইন্সুরেন্সগী থবকশিংগা শম্নবদা মতেং পাংগনি। বিকসিত ভারত অমা শেমগৎপদা তঙাইফদবা অমা ওইরিবা খুঙ্গংশিংগী শেন-থুমগী ফিবম ফগৎনবা ঐখোয়গী সরকারনা লেপ্তনা হোৎনরি। খুঙ্গংদা শেন্থোক লৈহন্নবা অমসুং থবক ফংহন্নবা থবক খুদিংমক মখোয়না মীৎয়েং চঙলি। ইলেক্ত্রিসিতি সেক্তরদা রাজস্থান সরকারনা থবক কয়া পায়খৎলে অমসুং মখোয়না নমদুনা অহিংদা ঈশিং চনবগী থবকশিং তোকহন্নবা অয়ুক-নুংথিলগী মতমদা লৌমীশিংদা ইলেক্ত্রিসিতি পীনবা রাজস্থান সরকারনা থবক পায়খৎলে।

প্রধান মন্ত্রীনা হায়খি রাজস্থান্দা সোলার ইনর্জিগী খুদোংচাবা কয়া মরাংকাইনা লৈরি, হিরম অসিদা রাজ্য অসিনা লৈবাক অসিদা মাঙজিল থাবা ঙমগনি। ইলেক্ত্রিসিতি বিল জিরোদা হন্থহন্নবা সরকারনা সোলার ইনর্জি অসি পাম্বৈ অমা ওইহল্লে। কেন্দ্র সরকারনা পি.এম সুর্য়াঘর ফ্রি ইলেক্ত্রিসিতি স্কিম পায়খৎতুনা য়ুম মথক্ত সোলার পেনেলশিং থম্নবা লুপা ৭৮,০০০ পীরে। মসিগী ফংলকপা সোলার ইনর্জি অদু য়ুমশিংনা শীজিন্নগনি অমসুং অহেনবা অদুনা সরকারনা লৈগনি। স্কিম অসিগীদমক ইমুং করোর ১.৪ রেজিস্তার তৌরে অমসুং ইমুং লাখ ৭ রোম সোলার পেনেলশিং খিনখ্রে। রাজস্থানদা ইমুং ২০,০০০ রোম স্কিম অসিদা শরুক য়ারে অমসুং হায়রিবা য়ুমশিং অদুআন সোলার পৱার পুথোকপা হৌরে অমসুং মখোয়গী ইলেক্ত্রিসিতিগী বিলশিং কনবা ঙম্লে। য়ুম মথক্ত সোলার পেনেলশিং থম্বদা শেনগী মতেং পীবা খক নত্তনা লৌবুকশিংদা থম্বদশু সরকারনা মতেং পীরি। পি.এম কুসুম স্কিমগী মখাদা, তুংদা অনৌবা সোলার প্লান্ত কয়া লিংখৎনবা রাজস্থান সরকারনা থৌরাং তৌরে। ইমুং খুদিংমক অমসুং লৌমী খুদিংমক ইনর্জি পুথোকপা ওইরকপা মতমদা, ইমুং খুদিংমক ইলেক্ত্রিসিতিদগী শেন ফংলগনি অমসুং মখোয়গী শেন্থোক হেনগৎলগনি।

প্রধান মন্ত্রীনা হায়খি মদুদি রাজস্থান লম্বী, রেল অমসুং এয়রগী খুদোংচাবা খ্বাইদগী য়াম্না লৈবা রাজ্য ওইনবা ঐখোয়না থবক পায়খৎলে। অচৌবা উদ্যোগকী মফমশিং হায়বদি দিল্লি, বদোদারা অমসুং মুম্বাইগী মরক্ত রাজস্থান লৈরি অমসুং মসি রাজ্য অসিগী মীয়াম অমসুং নহারোলশিংগী অচৌবা খুদোংচাবা অমনি। হায়রিবা সহর অহুম অসিগা রাজস্থানগা শম্নবা অনৌবা এক্সপ্রেসৱে লৈবাক অসিদা খ্বাইদগী ফবা অমা ওইরগনি। মেজ তুরেলদা অনৌবা থোং অমা শাবা অসিনা সাৱাই মাধোপুর, বুন্দি, তোঙ অমসুং কোতা জিলাশিংদা কান্নবা পীরগনি। থোং অসিনা হায়রিবা জিলাশিং অসিগী লৌমীশিং দিল্লি, মুম্বাই অমসুং বদোদারাগী কৈথেলশিং য়াম্না লাইনা য়ৌহল্লগনি। মসিনা লমকোয়বা মীওইশিংনা জয়পুর অমসুং রনথাম্বোর তাইগর রিজার্ব য়ৌবদা খুদোংচাহল্লগনি। সরকারগী মরুওইবা পান্দমদি মীয়ামগী মতম চঙহন্দবা অমসুং মখোয়গী খুদোংচাবা হেনগৎহনবনি। জামনগর-অমৃতশর ইকোনোমিক কোরিদোরনা দিল্লি-অমৃতশর-কাত্রা এক্সপ্রেসৱেগা শম্নবা মতমদা, মসিনা রাজস্থানগা বাইসনো দেবী লাইফমগা শম্নহনগনি। লম্বী অসিনা অৱাং ভারতকী ইন্দস্ত্রিশিং কন্দলা অমসুং মুন্দ্রা হিথাংফমশিংগা শম্নহগনি, অচৌবা পোৎ-চৈ থমফমশিং লিংখৎতুনা রাজস্থানদা ত্রান্সপোর্ত সেক্তর কান্নবা পীগনি, নহারোল কয়া থবক ফংগনি। জোধপুর রিং রোদনা জয়পুর, পালি, বারমর, জয়সালমর, নাগৌর অমসুং মালেমগী ঙমখৈদা লম্বী-থোংগী ফিবম ফগৎহল্লগনি। মসিনা সহরদা লম্বী চিনবা হন্থহনগনি, লমকোয়বা মীওইশিং, ললোনবশিং জোধপুরদা চৎপদা হেন্না লাইহল্লগনি।

প্রধান মন্ত্রীনা হায়খি ঈশিং তুংশিনবা, ঈশিং মরিক অমা ফাওবা শীজিন্নবা অসি সরকার খক্তগী থৌদাং নত্তে, মসি অপুনবা খুন্নাইগী থৌদাংনি। মীয়াম্না মাইক্রো-ইরিগেসন, দ্রিপ ইরিগেসন শীজিন্নগদবনি অমসুং অমৃত সরোভরশিং শেমজিন-শাজিনগদবনি অমসুং ঈশিং তুংশিনবগী মতাংদা ৱাখল তাবা হেনগৎহনগদবনি। লৌমীশিংনা মহৌশাগী লৌউ পায়খৎপদা পু্ক্নিং থৌগৎকদবনি। ইমাশিং অমসুং মালেম ইমা ইকায়খুম্নবা উৎনবা “এম পের মা কে নাম” কেম্পেন পায়খৎলে। মীয়াম্না সোলার ইনর্জি শীজিন্নবগী মতাংদা অমসুং পি.এম সু্র্যঘর কেম্পেনগী মতাংদা ৱাখল তাবা হেনগৎহনগদবনি। খোঙজং অমগী অচুম্বা ৱাখল্লোন খঙলবা মতমদা অমসুং মদুগী থৌসিল অদু খঙলবা মতমদা মীয়াম্না কেম্পেন অদু শরুক য়াই অমসুং মসি ঐখোয়না শ্বাছ ভারত অভিয়ান অমসুং বেতি বচাউ, বেতি পরাউ কেম্পেনশিংদা উবা ফংলে। মসিগা চপ মান্নবা মাইপাকপশিং মহৌশাগী অকোয়বগী ফিবম কনবদা ফংবা ঙমগনি।

প্রধান মন্ত্রীনা হায়খি মদুদি রাজস্থানদা পায়খৎলিবা অনৌবা চাউখৎ-থৌরাং অমসুং ইনফ্রাস্ত্রকচর প্রোজেকশিংগী কান্নবা হৌজিক অমসুং তুংগী মীরোলশিংনা ফংগনি। হায়রিবা থবকশিং অসিনা চাউখৎলবা রাজস্থান অমা শেমগৎকনি, মসিনা ভারতকী চাউখৎপা য়াংশিনহনগনি। লাক্লিবা চহিশিংদা, কেন্দ্র অমসুং রাজ্যগী সরকারশিংনা চাউখৎপগী খোঙজেল য়াংখৎনবা থবক তৌগনি অমসুং রাজস্থানগী চাউখৎ-থৌরাংগী থবকশিংদা কেন্দ্র সরকারনা পাংবা য়াবা থবকশিং পাংগনি।

থৌরম অদুদা শরুক য়াখিবশিংগী মনুংদা রাজস্থানগী রাজ্যপাল শ্রী হরিবাবু কিষানরাও বাগরে, জল শক্তিগী য়ুনিয়ন মিনিস্তর শ্রী সি.আর পতিল, রাজস্থানগী চীফ মিনিস্তর শ্রী ভজনলাল শর্ম, মধ্য প্রদেসকী চীফ মিনিস্তর দোক্তর মোহন যাদব অমসুং অতোপ্পা শক্নাইরবা মীওইশিং য়াওখি।

নুঙগীৱারোল

প্রধান মন্ত্রীনা কেন্দ্র সরকারগী প্রোজেক্ত ৭ অমসুং রাজ্য সরকারগী প্রোজেক্ত ২ য়াওনা লুপা করোর ১১,০০০ হেনবগী প্রোজেক্ত ৯ প্রধান মন্ত্রীনা শঙ্গাখ্রে। কেন্দ্র সরকারগী প্রোজেক্ত ৯অমসুং রাজ্য সরকারগী প্রোজেক্ত ৬য়াওনা লুপা করোর ৩৫,৩০০ হেনবগী প্রোজেক্ত ১৫ গী উরেপ উয়ুংসু তমখ্রে।

থৌরম অদুদা শঙ্গাখিবা প্রোজেক্তশিং অদুদি নভনেরা বারেজ, স্মার্ত ইলেক্ত্রিসিতী ত্রান্সমিসন নেৎৱার্ক অমসুং এসেৎ মেনেজমেন্ত সিস্তেম প্রোজেক্তশিং, ভিল্দী-সমদারি-লুনি-জোধপুর-মেরতা রোদ-দেগানা-রতনগর সেক্সনগী রেলৱে ইলেক্ত্রিফিকেসন অমসুং দিল্লী-ভদোদরা গ্রীন ফিল্দ এলাইনমেন্ত (এন.ঐচ-১৪৮এন) গী পেকেজ ১২ (মেজ তুরেলগী মথক্তা এস.ঐচ-৩৭এগী জংশন ফাওবা মরু ওইবা থোং) প্রোজেক্তশিং অসিনি। প্রোজেক্তশিং অসিনা মীয়ামদা লায়না চৎথোক-চৎশিন তৌবদা মতেং পাংগনি অমসুং প্রধান মন্ত্রীগী গ্রীন ইনর্জীগী ভিজনগী মতুং ইন্না রাজ্য অসিগী ইনর্জীগী মথৌ তাবশিং মপুং ফাহনগনি।

প্রধান মন্ত্রীনা লুপা করোর ৯,৪০০ হেন্না চংগদবা রামগর বারেজ অমসুং মহলপুর বারেজ শাবগী থবকশিং অমসুং চম্বল তুরেলগী এক্বেদক্তকী খুত্থাংদা নবনেরা বারেজতগী বিসালপুর দাম অমসুং ইসরদা দামদা ঈশিং ত্রান্সফর তৌনবা সিস্তেম শানবগী থবক্কী উরেপ উয়ুং তমখ্রে।

প্রধান মন্ত্রীনা লুপা করোর ৯,৪০০ হেন্না চংগদবা রামগর বারেজ অমসুং মহলপুর বারেজ শাবগী থবকশিং অমসুং চম্বল তুরেলগী এক্বেদক্তকী খুত্থাংদা নবনেরা বারেজতগী বিসালপুর দাম অমসুং ইসরদা দামদা ঈশিং ত্রান্সফর তৌনবা সিস্তেম শানবগী থবক্কী উরেপ উয়ুং তমখ্রে।

প্রধান মন্ত্রীনা সরকারগী ওফিস বিল্দিংদা রুফতোপ সোলর প্লান্তশিং ইন্সতোল তৌনবা, পুগল (বিকানর) দা মেগাৱাৎ ২০০০গী সোলর পার্ক অমা অমসুং মেগাৱাৎ ১০০০গী সোলর পার্ক্কী ফেজ অনি শেমগৎনবা অমসুং সাইপৌ (ধোলপুর) দগী ভারতপুর-দীগ-কুমহের-নগর-কমন অমসুং পাহারি অমসুং চম্বল-ধোলপুর-ভারতপুর রেত্রোফোতিং ৱার্ক ফাওবদা থক্নবা ঈশিং ত্রান্সমিসন লাইনগী উরেপ উয়ুংসু তমখ্রে। লুনি-সমদারী-ভিল্দী দবল লাইন, অজমের-চন্দেরিয়া দবল লাইন অমসুং জয়পুর-সাৱাই মাধোপুর দবল লাইন রেলৱে প্রোজেক্তকা মরী লৈনবা থবকশিং অমসুং অতোপ্পা ইনর্জী ত্রান্সমিসনগা মরী লৈনবা প্রোজেক্তশিংগীদমক উরেপ উয়ুং তমখ্রে ।

Click here to read full text speech