ঙসি প্রধান মন্ত্রী শ্রী নরেন্দ্র মোদীনা মহারাস্ত্রাগী পালঘরদা তোঙান-তোঙানবা চাউখৎ-থৌরাংগী প্রোজেকশিং শঙ্গাখ্রে অমসুং উরেপ-উয়ুং তমখ্রে। ঙসি উরেপ-উয়ুং তমখিবা প্রোজেকশিংগী মনুংদা লুপা করোর ৭৬,০০০ রোমগী বধবন হিথাংফম অমসুং লুপা করোর ১,৫৬০ রোমগী ফিসরিজ প্রোজেক ২১৮ শঙ্গাবা অমসুং উরেপ-উয়ুং তম্বা য়াওখি। শ্রী মোদীনা লুপা করোর ৩৬০ রোম চঙনা শেমগৎপা ভেসেল কম্মুনিকেসন অমসুং সপোর্ত সিস্তেম লৈবাক শীনবা থুংনা হৌদোকখ্রে। ঙা ফানবগী হিথাংফমশিং ফগৎহনবা অমসুং মতমগা চুনবা মওংদা শেমগৎপা, ঙা থুংলফমশিং অমসুং ঙাগী কৈথেলশিং শেমগৎপা য়াওনা তোঙান-তোঙানবা ফিসিরি ইনফ্রাস্ত্রকচর প্রোজেকশিংশু প্রধান মন্ত্রীনা উরেপ-উয়ুং তমখি। মহাক্না ঙামী বেনিফিসরিশিংদা ত্রান্সপোন্দর সেতশিং অমসুং কিষান ক্রেদিত কার্দশিং য়েন্থোকখ্রে।
সান্ত সেনাজি মহারাজগী পুন্যা তিথিদা মহাক্কী মফমদা ইকায়খুম্নবা উৎতুনা প্রধান মন্ত্রীনা মহাক্কী ৱা ঙাংবা হৌদোকখি। ২০১৩দা প্রধান মন্ত্রী ফমগীদমক মহাক খন্নখিবা অদু শ্রী মোদীনা নিংশিংখি অমসুং ছত্রপতি সিবাজী মহারাজগী সমাধিদা খুরুম্নবা রাইগর ফোর্ততা চৎখিবা অদু পনখি। মহাক্না হায়খি লৈবাক অসিগী সেবা তৌনবা অনৌবা খোঙচৎ অমা হৌনবা মহাক্না মহাক্কী ওজাদা চঙজখিবা অদুগা চপ মান্নবা ‘ভক্তি ভাব’ অমা মহাক্না ফাওখি।
সিন্ধুবর্গতা থোকখিবা লাইবক থিবা থৌদোক অদু পল্লদুনা, প্রধান মন্ত্রীনা হায়খি সিবাজী মহারাজ শুপ্নগী মমিং অমা, অচৌবা নিংথৌ অমা নত্ত্রগা অচৌবা মীওই অমা নত্তে, মহাক ঈশ্বর অমনি। শ্রী সিবাজী মহারাজগী মখোঙদা খুরুমদুনা মহাক্না সিবাজী মফমদা লাল্লে হায়না হায়জখি অমসুং মহাক্না হায়খি মদুদি মহাক্কী হৌরকফম অমসুং মহাক্কী নাতনা মরম ওইদুনা লমদম অসিগী অচৌবা মীওই বীর সবারকর ইকায়বা পীনবা হোৎনরিবা অমসুং মরৈবাক নুংশিবগী ৱাখল্লোন খোঙনেৎনরিবা মীওইশিংগা মহাক্কা খেন্নবা লৈরি। প্রধান মন্ত্রীনা হায়খি বীর সরবারকর ইকায়বা পীরিবা মীওইশিংদগী মহারাস্ত্রাগী মীয়াম চেকশিনগদবনি অমসুং মসিদা নিংঙমদবা ফাওরোইদবনি। শ্রী মোদীনা হায়খি মহারাস্ত্রাদা থুংলবগা ঐনা অহানবা পাংথোকখিবা থবক অসি ঐগী শেংলবা ঈশ্বর ছত্রপতি সিবাজী মহারাজগী মফমদা ঐগী কোক নোনবনি অমসুং নুমিৎ খরনিগী মমাঙদা সিন্ধুবর্গতা থোকখিবা থৌদোক অদুগীদমক ঙাকপীনবা হায়জখি। সিবাজী মহারাজ নিংজরিবা মীওইশিংদা ঙাকপীনবশু মহাক্না হায়জখি।
নুমিৎ অসি রাজ্য অমসুং লৈবাক অনিমক্কী চাউখৎ-থৌরাংগী খোঙচৎকী পুৱারি ওইরবা নুমিৎ অমনি হায়না থাগৎলদুনা, প্রধান মন্ত্রীনা হায়খি হৌখিবা চহি ১০ অসিদা মহারাস্ত্রা চাউখৎনবা মহাক্কী সরকারনা মরুওইবা থবক কয়া পায়খৎলে। বিকসিত মহারাস্ত্রা অসি বিকসিত ভারতকী ৱাশক্কী খ্বাইদগী মরুওইবা শরুকনি। রাজ্য অসিগী পুৱারিগী সমুদ্রগী ললোন-ইতিক্কী থবকশিং পল্লদুনা, শ্রী মোদীনা হায়খি রাজ্য অসি সমুদ্রগা নক্না লৈবদগী চাউখৎনবা তৌবা ঙম্বা অমসুং লন-থুম কয়া লৈরি অমসুং তুংগী খুদোংচাবা কয়া মরাংকাইনা লৈরি। বধবন হিথাংফম লৈবাক অসিদা খ্বাইদগী চাউবা কন্তেন্নর পোর্ত ওইরগনি অমসুং মালেমদা খ্বাইদগী ঈশিং লুবা হিথাংফমশিংগী মনুংদা য়াওরগনি। মসি মহারাস্ত্রা অমসুং ভারতকী ললোন-ইতিক অমসুং উদ্যোগ চাউখৎনবা মফম অমা ওইরগনি। বধবন হিথাংফম প্রোজেক্কীদমক প্রধান মন্ত্রীনা মহারাস্ত্রাগী পালঘরগী মীয়াম অমসুং লৈবাক শীনবা থুংবদা হরাওবা ফোঙদোকখি।
দিঘি পোর্ত ইন্দস্ত্রিএল এরিয়া শেমগৎনবা হন্দক সরকারনা ৱারেপ লৌখিবা অদু নিংশিংলদুনা, প্রধান মন্ত্রীনা হায়খি মসি মহারাস্ত্রাগী মীয়াম শরুক অনি হরাওনবা থৌরম অমনি। ছত্রপতি সিবাজী মহারাজগী লৈবাক্কী কোনুং ওইখিবা রাইগর ইন্দস্ত্রিএল এরিয়া ওইনা শেমগৎলগনি। মরম অদুনা, দিঘি হিথাংফম মহারাস্ত্রাগী শক্তম অমা ওইরগনি অমসুং ছত্রপতি সিবাজী মহারাজগী মঙলানশিংগী খুদম অমনি। প্রোজেক অসিনা তুরিজম অমসুং ইকো-স্পোর্ত চাউখৎহনগনি।
অপুনবা ঙামী ফুরুপ থাগৎলদুনা, প্রধান মন্ত্রীনা হায়খি ঙসি ঙামীশিংগা মরী লৈনবা লুপা করোর ৭০০ হেনবগী প্রোজেকশিং উরেপ-উয়ুং তম্লে অমসুং লৈবাক শীনবা থুংনা লুপা করোর ৪০০ হেনবগী প্রোজেকশিংশু শঙ্গারে। প্রোজেকশিংগী মনুংদা বধবন হিথাংফম, দিঘি পোর্ত ইন্দস্ত্রিএল এরিয়া শেমগৎপা অমসুং ফিসরিজগী তোঙান-তোঙানবা স্কিমশিং য়াওরি। চাউখৎ-থৌরাংগী থবকশিং অশি মাতা মহালক্ষমী দেবী, মাতা জিবদানি অমসুং ভাগবন তুঙ্গারেশ্বরগী থৌজালশিংদগী ওইথোকপনি।
ভারতনা মপান ফরিঙৈগী মতম নিংশিংলদুনা, প্রধান মন্ত্রীনা হায়খি লৈবাক অসিগী সমুদ্রগী তৌবা ঙম্বশিংনা মরম ওইদুনা মতম অমদা খ্বাইদগী মপাঙ্গল কনবা অমসুং নুংঙাই য়াইফবা লৈবাকশিংগী মনুংদা ভারত লৈবাক অমা ওইরমখি। মসিগী তৌবা ঙম্বা অসি মহারাস্ত্রাগী মীয়াম্না নিংথিনা খঙলে। মহাক্কী থৌশিলশিং অমসুং লৈবাক অসি চাউখৎনবা অকনবা ৱারেপশিংগা লোয়ননা ছত্রপতি সিবাজী মহারাজনা ভারতকী সমুদ্রগী তৌবা ঙম্বা শক্তিশিং অনৌবা থাকশিংদা পুখৎলমখি। অপুনবা ইস্ত ইন্দিয়া কম্পেনি ফাওবা দারয়া সরাং কনহোজি য়াগান্তিগী মমাংদা লেপ্পা ঙমখিদে। প্রধান মন্ত্রীনা হায়খি মমাঙগী সরকারশিংনা ভারতকী ইনাকখুল্লবা হৌখ্রবা মতম অদু পুক্নিং চঙখিদে। মসি অনৌবা ভারতনি। অনৌবা ভারতনা পুৱারিদগী তম্লে অমসুং লৈবাক অসিগী তৌবা ঙম্বা অমসুং চাউথোকপা মশক খঙলে। মীনাই ওইরিঙৈ মতমগী খোঙ্গুল খুদিংমক তুংওইনরম্লগা অনৌবা ভারতনা মেরিতাইম ইনফ্রাস্ত্রকচরদা অনৌবা মাইপাকপা কয়া পুরকপা ঙম্লে।
প্রধান মন্ত্রীনা হায়খি হৌখিবা চহি ১০ দা হান্না ওইখিদ্রিবা মওংগী খোঙজেলদা ভারতকী সমুদ্র মপানশিং শেমগৎলে। হিথাংফমশিং মতমগা চুনবা মওংদা শেমগৎলে, ঈশিং লম্বীশিং শেমগৎলে অমসুং ভারত্তা জহাজ শাবা পুক্নিং থৌগৎনবা থবকশিং পায়খৎলে। হিরম অসিদা লুপা করোর লাখ কয়া থাদরে। মসিগী ফলশিং ভারতকী হিথাংফম অয়াম্বা থবক তৌবা ঙম্বা শরুক অনি হেনগৎলকপা, লনাই ওইনা শেন থাদবা হেনগৎলকপা অমসুং জহাজশিংগী চৎথোক-চৎশিনগী মতম হন্থরকপা অসিগী খুৎথাংদা উবা ফংলগনি। শেন চঙহন্দবগা লোয়ননা নহারোলশিংগীদমক অনৌবা খুদোংচাবশিং শেমদুনা মসিনা উদ্যোগশিং অমসুং ললোনবশিংদা কান্নবা পীরগনি। হিরোয়শিংগী খুদোংচাবশিংশু হেনগৎলে। প্রধান মন্ত্রীনা হায়খি ঙসিদি মালেম শীনবা থুংনা বধবন হিথাংফমলোমদা য়েংলক্লে। বধবন হিথাংফমগী মিতর ২০ লুবা অসি মালেমদা হিথাংফম খর খক্তনা চাংদম্নবা ঙমগনি। রেলৱে অমসুং হায়ৱেগা শম্নদুনা হিথাংফম অসিনা লমদম অসিগী শেন্মিৎলোন্দা অচৌবা অওনবা অমা পুরক্লগনি। মসিনা দেদিকেতেদ ৱেস্তর্ন ফ্রেদ কোরিদোরগা শম্নদুনা অমসুং দিল্লি-মুম্বাই এক্সপ্রেসৱেগা নক্নদুনা মসিনা অনৌবা ললোন-ইতিক অমসুং পোৎ-চৈ থমফমগী খুদোংচাবশিং পীরগনি। চহি চুপ্পা লমদম অসিদগী কার্গো পুথোক-পুশিন তৌদুনা মহারাস্ত্রাগী মীয়ামদা কান্নবা পীরগনি।
প্রধান মন্ত্রীনা হায়খি মহারাস্ত্রা চাউখৎহনবা হায়বসি ঐগী অচৌবা মরুওইবা থবক অমনি। মহারাস্ত্রানা মেক ইন ইন্দিয়া অমসুং অত্মানির্ভর ভারত অভিয়ান থৌরমশিংদগী কান্নবা কয়া ফংলে। ভারত চাউখৎহনবা মহারাস্ত্রানা মরুওইবা থৌদাং লৌরি। অদুবু মীওই খরনা চাউখৎপা থিন্থনবা থবকশিং পায়খৎলিবা অসি লাইবক থিবনি।
মমাঙগী সরকারশিংনা চহি ৬০ হেন্না বধবন হিথাংফম প্রোজেক পন্দুনা থম্লমখিবা অদুদা নুংঙাইতবা ফোঙদোক্লদুনা, প্রধান মন্ত্রীনা হায়খি সমুদ্রগী ললোন-ইতিক্কীদমক ভারতনা অনৌবা অমসুং চাউখৎলবা হিথাংফম দরকার ওইরে। অদুবু হিরম অসিদা ২০১৬ ফাওবা থবক অমতা পায়খৎখিদে। দেবেন্দ্র ফদনাবিসনা সরকার পায়রক্লবা মতুংদা প্রোজেক অসি থৱায় য়াওনা পায়খৎলকপনি অমসুং সরকার অসিনা পালঘরদা হিথাংফম শেমগৎনবা ২০২০ দা ৱারেপ লৌখিবনি। অদুবু, সরকার হোংখিবদগী প্রোজেক অসি চহি ২.৫ নমশীন্দুনা থমখি। প্রোজেক অসি পায়খৎপা মতমদা লুপা করোর লাখ কয়া থাদবা দরকার ওই হায়না পানখি অমসুং মসিনা রাজ্য অসিদা থবক লাখ ১২ রোম পীগনি হায়না পানখি। হৌখিবা সরকারশিংনা প্রোজেক অসি মখা তানা পায়খৎনবা থবক পায়খৎখিদে।
প্রধান মন্ত্রীনা হায়খি সমুদ্রগা মরী লৈনবা খুদোংচাবশিং লাকপা মতমদা ভারতকী ঙামীশিং অসি খ্বাইদগী মরুওইবা মরুপনি। মহাক্না প্রধান মন্ত্রী সম্পদা স্কিমগী বেনিফিসরিশিংগা ৱারি শান্নরে অমসুং সরকারগী স্কিমশিং অমসুং সরকারগী থবক তৌনিংবগী থৌনা অসিনা মরম ওইদুনা হৌখিবা চহি ১০ অসিদা সেক্তর অসিদা অচৌবা অওনবা কয়া পুরকখ্রে। ভারত মালেমদা ঙা খ্বাইদগী য়াম্না পুথোকপা অনিশুবা লৈবাক্নি। ২০১৪ দা লৈবাক অসিদা ঙা তোন লাখ ৮০ পুথোকখিবা অদুগা চাংদম্নবদা ঙসি ঙা তন লাখ ১৭০ পুথোক্লে। হৌখিবা চহি ১০দা ঙা পুথোকপা শরুক অনিদা হেনগৎলে। ভারতনা মপান লৈবাকশিংদা সমুদ্রগী পোৎথোকশিং থাদোকপা হেনগৎলক্লি অমসুং চহি ১০গী মমাঙদা লুপা করোর লিশিং ২০গী খজিং মপান্দা থাদোকখিবা অদুগা চাংদম্নবদা ঙসিদি লুপা করোর লিশিং ৪০ হেনবগী খজিং মপান্দা থাদোক্লে। ঙসিদি মপান্দা খজিং থাদোকপা শরুক অনিদা হেনগৎলে। মসি ব্লু রিভোলুসন মাইপাকপগী ওইরকপনি অমসুং মসিনা অনৌবা থবক লাখ কয়া ফংহনবদা মতেং পাংলে।
ফিসরিজ সেক্তরদা নুপীশিং শরুক য়াবা হেনগৎহন্নবা সরকারনা পায়খৎলিবা থবকশিং পল্লদুনা, প্রধান মন্ত্রীনা হায়খি পি.এম মতস্যা সম্পদা য়োজনাগী মখাদা নুপী লিশিং কয়া মতেং পাংলে। সেক্তর অসিদা অৱাংবা থাক্কী তেক্নোলোজিশিং অমসুং সেতেল্লাইতশিং শীজিন্নরে অমসুং ঙসি ভেসেল কম্মুনিকেসন সিস্তেম হৌদোক্লিবা অসিনা ঙামীশিংগী বর অমা ওইরগনি। মখোয়গী ইমুং-মনুংগী মীওইশিং, হি মপুশিং, ফিসরিজ দিপার্তমেন্ত অমসুং কোস্ত গার্দশিংগা অতৎ-অখম লৈতনা পাউ ফাউনবা ঙম্নবা ঙামীশিংগী ভেসেলশিংদা ত্রান্সপোন্দর লাখ ১ পান্নবা সরকারগী থৌরাং লৈরে। মসিনা ঙামীশিংনা অৱাবা তারকপা মতমদা, নোংলৈ-নুংশিৎ লাকপদা অমসুং পামদবা থৌদোকশিং থোরকপা মতমদা সেতেল্লাইগী খুৎথাংদা পাউ ফাওন্নবা ঙামীশিংগী মতেং পাংগনি। অৱাবা তারকপা মতমদা থৱায় কয়া কনবা হায়বসি সরকারগী মরুওইবনি।
প্রধান মন্ত্রীনা হায়খি ঙামীশিংগী ভেসেলশিং অশোই-অঙাম য়াওদনা হল্লক্নবা ঙামীশিংগী হিথাংফম অমসুং লেন্দিং সেন্তর ১১০ হেন্না শেমগৎলে। কোল্দ চেন, প্রোসেসিংগী খুদোংচাবশিং, হি লৈনবা লোনগী স্কিমশিং অমসুং পি.এম মতস্যা সম্পদা য়োজনা পায়খৎলে। সমুদ্র মপানগী খুঙ্গংশিং শেমগৎপদা সরকারনা মীৎয়েং চঙলে। হৌজিক পাল্লিবা সরকার অসিনা লায়রবশিংগী য়াইফনবা থবক পায়খৎলে অমসুং খুদোংচাবা কয়া পীরে, অদুগা মমাঙগী সরকারশিংনা ঙামীশিং অমসুং ত্রাইবেলশিং য়েঙশিন্দনা থমখি অমসুং লৈবাক অসিদা ত্রাইবেলশিংনা তাবা পাক-চাউরবা লম কয়া লৈরবসু ত্রাইবেলশিংগী য়াইফনবা দিপার্তমেন্ত অমা ফাওবা লৈখিদে। ঐখোয়গী সরকারনা ঙামীশিং অমসুং ত্রাইবেলশিংগী তোখায়বা মিনিস্ত্রিশিং লিংখৎলে। ঙসিদি মীরাইদুনা লাক্লবা ত্রাইবেগী লমদমশিং পি.এম জনমন য়োজনাগী কান্নবশিং ফংলে অমসুং ঐখোয়গী লৈবাক চাউখৎনবা ঐখোয়গী ত্রাইবেলশিং অমসুং ঙামীশিংনা য়াম্না চাউনা মতেং পাংলে।
প্রধান মন্ত্রীনা হায়খি নুপীশিংনা মাংজিল থাবা চাউখৎ-থৌরাংগী থবকশিং রাজ্য সরকারনা পায়খৎলিবা অসি থাগৎনিঙাইনি অমসুং লৈবাক অসিগী নুপীশিংদা শক্তি পীনবা লম্বী মহারাস্ত্রানা শেম্লি। মহারাস্ত্রাদা অৱাংবা থাক্কী ফম কয়া নুপীশিংনা শিংথাবা য়ানা থবকশিং পাংথোক্লে। রাজ্য অসিগী পুৱারিদা অহানবা ওইনা সুজাতা সৌনিক্না রাজ্য অসিগী চীফ সেক্রেতরি ওইনা থবক তৌরি, দি.জি.পি রসমি সুক্লানা রাজ্যগী পুলিস ফোর্স লুচিংলি, সোমিতা বিশ্বাসনা রাজ্যগী ফোরেস্ত ফোর্সকী লুচিংলি অমসুং রাজ্যগী লো দিপার্তমেন্তগী মকোক ওইনা সুবরনা কেৱালেনা থৌদাং লৌরি।
মহাক্না হায়খি জয়া ভাগতনা রাজ্য অসিগী প্রিন্সিপাল একাউন্তেন্ত জেনেরেল ওইরি, প্রাচি শ্বারুপনা মুম্বাইদা কস্তুমস দিপার্তমেন্ত লুচিংলিং অমসুং অশ্বিনি ভিদেনা মুম্বাই মেত্রোগী এম.দি ওইরি। অৱাংবা থাক্কী মহৈ-মশিংগী লমদা মহারাস্ত্রাগী নুপীশিংগী থৌদাং পল্লদুনা প্রধান মন্ত্রীনা হায়খি মহারাস্ত্রা হেল্থ য়ুনিভর্সিতিগী ভাইস চান্সেল্লর লেফতনেন্ত জেনেরেল দোক্তর মধুরি কনিতকারনা ওইরি অমসুং দোক্তর অপুরবা পালকারনা মহারাস্ত্রাগী স্কিল য়ুনিভর্সিতিগী অহানবা ভি.সি ওইরি। হায়রিবা নুপীশিং অসিগী মাইপাকপা অসিনা ২১শুবা চহিচাদা নুপীশিংগী থৌনা অসি খুন্নাইগী অনৌবা মাইকৈ অমা তাক্নবা থৌরাং তৌদুনা লৈরি হায়বগী খুদম ওইরে। মসিগী নারী শক্তি অসি বিকসিত ভারতকী অকনবা য়ুম্ফমনি।
লোইশিল্লকপদা, প্রধান মন্ত্রীনা হায়খি সবকা সাথ, সবকা বিকাস, সবকা বিশ্বাসকী থাজবগা লোয়ননা সরকার অসিনা থবক পায়খৎলি। মহারাস্ত্রাগী মীয়ামগী মতেংগা লোয়ননা রাজ্য অসি চাউখৎপগী অনৌবা থাকশিংদা য়ৌবা ঙম্লগনি।
থৌরম অদুদা শরুক য়াখিবশিংগী মনুংদা, মহারাস্ত্রাগী রাজ্যপাল শ্রী সি পি রাধাকৃষ্ণন, মহারাস্ত্রাগী চীফ মিনিস্তর শ্রী একনাথ সিন্দে, মহারাস্ত্রাগী দিপুতি চীফ মিনিস্তরশিং, শ্রী দেবেন্দ্র ফদনাবিস অমসুং শ্রী অজিত পৱার, পোর্তস, সিপ্পিং অমসুং ৱাতরৱেজগী য়ুনিয়ন মিনিস্তর শ্রী সর্বানন্দা সোনোৱাল অমসুং ফিসরিজ, এনিলেম হসবেন্দরি অমসুং দাইরিয়িংগী য়ুনিয়ন মিনিস্তর শ্রী রজিব রঞ্জন সিংহ য়াওখি।
নুঙগীৱারোল
প্রধান মন্ত্রীনা বধবন হিথাংফম উরেপ উয়ুং তমখ্রে। প্রোজেক্ত অসিগী অপুনবা শেনফম অসি চাউরাক্না লুপা করোর ৭৬,০০০ নি। অচৌবা কন্তেনরগী জহাজশিং, দীপ দ্রাফ্তশিং অমসুং য়াম্না চাউবা কার্গো জহাজশিং থম্বা য়াহন্দুনা লৈবাক অসিগী ললোন-ইতিক অমসুং শেন্মিৎলোন চাউখৎহনগদবা মালেমগী থাক্কী মেরিতাইম গেৎৱে অমা শেমগৎনবা পান্দম থম্লি।
পালঘর জিলাগী দাহানু সহরগী মনাক্তা লৈবা বধবন হিথাংফম অসি ভারতকী খ্বাইদগী চাউবা দীপ ৱাতর পোর্তশিংগী মনুংদা অমা ওইগনি অমসুং মসিনা ত্রান্সিৎকী মতম অমসুং শেনফম হন্থহন্দুনা ইন্তর্নেস্নেল শিপ্পিং রুতশিংদা হকথেংননা শম্নবা ঙমহল্লগনি। স্তেৎ-ওফ-আর্ত তেক্নোলোজী অমসুং ইনফ্রাস্ত্রকচরগা লোয়ননা পোর্ত অসিদা দীপ বার্থশিং, অফবা কার্গো হেন্দলিং ফেসিলিতীশিং, অমসুং মোদর্ন পোর্ত মেনেজমেন্ত সিস্তেমশিং য়াওগনি। পোর্ত অসিনা থবক ফংহন্নবা অচৌবা খুদোংচাবশিং ফংহল্লগনি, লোকেল বিজিনেসশিং পুক্নিং থৌগৎকনি অমসুং লমদম অসিগী অপুনবা শেন্মিৎলোন চাউখৎহনবদা মতেং পাংগনি হায়না পানরি। বধবন পোর্ত প্রোজেক্ত অসিদা অকোইবগী ফীভমদা শাফু পীবা হন্থহন্নবা অমসুং অকনবা ইকোলোজিকেল স্তেন্দর্দশিং ঙাক্না চৎনবদা মীৎয়েং থমদুনা সস্তেনেবল দিবেলপমেন্ত প্রাক্তিসশিং য়াওহল্লিন। পোর্ত অসি ওপরেস্নেল ওইরবা মতুংদা, ভারতকী মেরিতাইম কন্নেক্তিবিতী হেনগৎহল্লগনি অমসুং গ্লোবেল ত্রেদ হব অমা ওইনা আগী থাক অসি হেন্না মপাঙ্গল কনখৎহল্লগনি।
লৈবাক শিনবা থুংনা সেক্তর অসিগী ইনফ্রাস্ত্রকচর অমসুং প্রদক্তিবিতী হেনগৎহন্নবা পান্দম থম্লিবা লুপা করোর ১৫৬০ গী ফিশরীজ প্রোজেক্ত ২১৮ শঙ্গাখ্রে অমসুং উরেপ উয়ুং তমখ্রে। খোঙথাংশিং অসিনা ফিশরীজ সেক্তরদা থবক লাখ মঙা হেনবগী খুদোংচাবা পীগনি হায়না পানরি।
প্রধান মন্ত্রীনা চাউরাক্না লুপা করোর ৩৬০ চংনা নেস্নেল রোল আউৎ ওফ ভেসেল কম্ম্যুনিকেসন এন্দ সপ্পোর্ত সিস্তেম হৌদোকখ্রে। প্রোজেক্ত অসিগী মখাদা, সমুদ্র মপালগী রাজ্য অমসুং য়ুনিয়ন তেরিতোরী ১৩ দা লৈরিবা মেকানাইজ অমসুং মোতোরাইজ ফিশিং ভেসিলশিংদা তাঙ্কক নাইনা ত্রান্সপোন্দর লাখ ১ ইনস্তোল তৌগনি। ভেসেল কম্ম্যুনিকেসন অমসুং সপ্পোর্ত সিস্তেম অসি ইসরোনা শাবা লমদমসিগী ওইবা তেক্নোলোজীনি। মসিনা ঙামীশিং সমুদ্রদা লৈরিঙৈ মতমদা নাকল অনিগী ওইবা কম্ম্যুনিকেসন অমা শেমগৎপদা মতেং পাংগনি অমসুং ঐখোয়গী ঙামীশিংগী রেস্ক্যু ওপরেসনশিং লোয়ননা শাফনা লৈহনবদা মতেং পাংগনি।
প্রধান মন্ত্রীনা হৌদোকখিবা অতোপ্পা থৌশিলশিংগী মনুংদা রিসর্ক্যুলেতরী এক্বাকলচর সিস্তেম অমসুং বাইওফ্লোককুম্বা এদভান্স তেক্নোলোজী শীজিন্নবগী মথক্তা ফিশিং হার্বরশিং অমসুং ইন্তিগ্রেতেদ এক্বা পার্কশিং শেমগৎপা য়াওরি। প্রোজেক্তশিং অসি রাজ্য কয়াদা পায়খৎকনি অমসুং ঙাগী পোত্থোক হেনগৎহন্নবা, লৌরোক মতুংগী মেনেজমেন্ত ফগৎহন্নবা অমসুং ঙাগী সেক্তরদা শরুক য়াবা মীওই মিলিয়ন কয়াগীদমক তুং কোইনা হিংনবগী লম্বী শেম্নবগীদমক মরু ওইবা ইনফ্রাস্ত্রকচর অমসুং হায়-ক্বালিতী ইনপুতশিং ফংহল্লগনি।
প্রধান মন্ত্রীনা ফিশিং হার্বরশিং, ঙা য়োকপগী সেন্তরশিং অমসুং ঙাগী কৈথেলশিং শেমগৎপা, অপগ্রেদ তৌবা অমসুং মোদর্নাইজ তৌবা য়াওনা মরুওইবা ফিশরী ইনফ্রাস্ত্রকচর প্রোজেক্তশিংগীদমক উরেপ উয়ুংসু তমখ্রে। মসিনা ঙা অমসুং সমুদ্রগী পোৎলমশিংগী পোস্ত-হর্ভেস্ত মেনেজমেন্তকীদমক মথৌ তাবা ফেসিলিতীশিং অমসুং হায়জিনিক কন্দিসনশিং ফংহল্লগনি হায়না থাজনরি।
Click here to read full text speech
विकसित महाराष्ट्र, विकसित भारत के संकल्प का सबसे अहम हिस्सा है। pic.twitter.com/aHSa9tlaDe
— PMO India (@PMOIndia) August 30, 2024
महाराष्ट्र के पास विकास के लिए जरूरी सामर्थ्य भी है, संसाधन भी हैं। pic.twitter.com/Z48DaY1EKn
— PMO India (@PMOIndia) August 30, 2024
छत्रपति शिवाजी महाराज... उन्होंने समुद्री व्यापार को, समुद्री शक्ति को एक नई ऊंचाई दी थी।
— PMO India (@PMOIndia) August 30, 2024
उन्होंने नई नीतियाँ बनाईं, देश की प्रगति के लिए फैसले लिए: PM @narendramodi pic.twitter.com/8VIOsbW6W3
गुलामी की बेड़ियों के हर निशान को पीछे छोड़ते हुए नया भारत समुद्री इनफ्रास्ट्रक्चर में मील के नए पत्थर लगा रहा है। pic.twitter.com/bqq4kVAlCo
— PMO India (@PMOIndia) August 30, 2024
