ঙসি প্রধান মন্ত্রী শ্রী নরেন্দ্র মোদীনা অসামগী দারংদা লুপা করোর ৬,৫০০ রোমগী চাউখৎ-থৌরাংগী থবকশিং উরেপ-উয়ুং তমখ্রে, শঙ্গাখ্রে। থৌরম অদুদা তিনখিবা মীয়ামদা ৱা ঙাংবদা, অসামগী চাউখৎপগী খোঙচত্ত পুৱারি ওইরবা নুমিৎ অসিদা অসামগী মীয়াম অমসুং দারংগী মীয়ামদা প্রধান মন্ত্রীনা য়াইফ পাউজেল পীখি অমসুং থাগৎপা ফোঙদোকখি।
প্রধান মন্ত্রীনা হায়খি ওপরেসন সিন্দুর মাইপাক্লবা মতুংদা অহানবা ওইনা ঙরাং মহাক অসামদা লাকপনি। মা কমাখ্যাগী থৌজালশিংদগী ওপরেসন অসি মাইপাকপনি অমসুং ইমাগী শেংলবা লমদম অসিদা লাকপদা থৱায় অসি অপেনবা ফাওই। অসামদা জন্মষ্টামি থৌরম পাংথোকপদা মহাক্না মীয়ামদা য়াইফ পাউজেল পীখি। লাল কিলাদগী মহাক্না ৱা ঙাংখিবা অদু অমুক হন্না পল্লদুনা, প্রধান মন্ত্রীনা হায়খি ভারতকী সেকুরিতিগী লাল্লোংদা মহাক্না ‘সুদর্শন-চক্র’গী ৱাখল্লোন হৌদোক্লে। মঙ্গলদোই অসি নাৎ, পুৱারিগী চাউথোকচবা অমসুং তুংগী থাজবগী ইতিনফমনি। লমদম অসি অসামগী শক্তমগী মরুওইবা খুদম অমনি। ইথিল অমসুং থৌনা থল্লিবা লমদম অসিদা মীয়ামগা উনবা অমসুং ৱারি শানবগী খুদোংচাবা ফংবদা মহাক অপেনবা ফাওই।
প্রধান মন্ত্রীনা হায়খি নুমিৎ খরগী মমাঙদা, লৈবাক অসিনা ভারত রত্ন অমসুং শক্নাইরবা শৈশকপা ভুপেন হজারিকাগী মপোক কুমওন পাংথোকখ্রে। মহাক ইকায়খুম্নবা উৎপা ওইনা ঙরাং পাংথোকপা অচৌবা থৌরম অমা শরুক য়ানবগী খুদোংচাবা ফংখ্রে। অসামগী মহাকগুম্বা শক্নাইরবা মপারিশিং অমসুং ঐখোয়গী ইপা-ইপুশিংগী মঙলানশিং কেন্দ্র অমসুং রাজ্যদা লৈরিবা মখোয়গী সরকারশিংনা পুকচেল শেংনা থবক তৌদুনা মঙফাওনহল্লে।
প্রধান মন্ত্রীনা হায়খি অসামগী নাৎ অমসুং চৎনবীশিং ঙাক-শেনবা অমসুং য়োকখৎপা অমসুং রাজ্য অসি য়াংনা চাউখৎহনবা হায়বসি কেন্দ্র অমসুং রাজ্যদা লৈরিবা মখোয়গী সরকারশিংগী মরুওইবনি। সরকার অমসুং অসামগী মীয়ামগী অপুনবা থবকশিংনা, রাজ্য অসি হৌজিক জাতি অমসুং মালেমগী থাক্ত শিংথানিঙাই ওইরবা মমি অমা তারে।
প্রধান মন্ত্রীনা হায়খি হৌজিক মালেমদা ভারত খ্বাইদগী য়াংনা চাউখৎলিবা লৈবাক অমনি অমসুং লৈবাক অসিগী ওইনা য়াংনা চাউখৎলক্লিবা রাজ্যশিংগী মনুংদা অসাম য়াওরে। চাউখৎপগী মতাংদা অসাম মনিংদা লৈহৌবা অমসুং লৈবাক অসিগী অতৈ মফমশিংগা চৎমিন্নবা হোৎনবদা খুদোংচাদবা থেংনবা মতম অমা লৈরমখি। অদুবু ঙসিদি অসাম চাউখৎপগী চাং চাদা ১৩ গা লোয়ননা মাঙলোমদা চঙশিল্লি। মসি অচৌবা মাইপাকপা অমনি অমসুং মাইপাকপা অসি অসামগী মীয়াম অমসুং কেন্দ্র অমসুং রাজ্য সরকারশিংগী অপুনবা থবকশিংনা ওইহনবনি। মসিগী মরী অসি অসামগী মীয়াম্না মখা তানা মপাঙ্গল কনখৎহনবদা হরাওই। মরম অদুনা চীফ মিনিষ্টর হিমান্ত বিশ্বা শর্মা অমসুং মহাক্কী কাংবু মীখল খুদিংমক্ত মীয়াম্না শৌগৎলিবনি। হন্দক পাংথোকখিবা পঞ্চয়ত মীখলশিংদা, অসাম পুৱারি ওইনা মাইপাকখি অমসুং মীয়ামগী থৌজালশিং ফংখি।
অসামনা ভারত চাউখৎনবগী ইঞ্জিন অমা ওইহন্নবা পান্দম অমগা লোয়ননা মখোয়গী সরকারনা থবক পায়খৎলিবা অদু পল্লদুনা, প্রধান মন্ত্রীনা হায়খি ঙসিগী থৌরম অসি পীরিবা থাজবা অসিগী শরুক অমনি। ঙাইহাক্কী মমাঙদা, ফম্বাক অসিদগী চাউরাক্না লুপা করোর ৬,৫০০ রোমগী চাউখৎ-থৌরাংগী প্রোজকশিং শঙ্গাখ্রে। কেন্দ্র অমসুং রাজ্য সরকারশিংনা অসাম লম্বী-থোঙ খ্বাইদগী ফবা রাজ্য অমা ওইনা অমসুং মাংজিল থাবা অনা-লায়য়েংগী মফম অমা ওইনা শেমগৎলে। প্রোজেকশিং অসিনা মখা তানা ঐখোয়গী ৱাশক মপুংফাহনগনি। দারং মেদিকেল কোলেজ অমসুং হোস্পিতাল, হায়ৱে অমসুং রিং রোদকীদমক প্রধান মন্ত্রীনা মীয়ামদা থাগৎপা অমসুং হরাওবা ফোঙদোকখি।
প্রধান মন্ত্রীনা হায়খি ঙসি, বিকসিত ভারত অমা শেমগৎনবগীদমক লৈবাক শীনবা থুংনা অমতা ওইনা মাঙলোমদা চঙশিল্লি; নহারোলশিংগীদমক, বিকসিত ভারত অমা শেমগৎপা হায়বসি মঙলান অমা খক নত্তে, ৱাশক অমসুনি অমসুং মসিগী ৱাশক অসি ঙাক্নবা অৱাং-নোংপোক্না মরুওইবা থৌদাং অমা লৌগনি। নিংতম্বা ফংলবা মতুংদা অচৌবা সহরশিং, অচৌবা ইকোনোমিশিং, অমসুং উদ্যোগকী মফমশিং মরুওইনা নোংচুপ অমসুং খা ভারতকী মফমশিংদা শেমগৎখি, অদুগা নোংপোক ভারতকী পাক-চাউরবা মফম অমসুং মীওইশিং চাউখৎপগী লমজেলদা মনিংদা লৈহৌখি। ফিবম অসি অহোংবা পুরক্নবা হৌজিক মখোয়গী সরকারনা থবক পায়খৎলি। ২১ শুবা চহিচাগী চহি ২৫ হৌখ্রে অমসুং চহিচা অসিগী মথংগী পন্দুব নোংপোক অমসুং অৱাং-নোংপোক্কীনি। ভারত চাউখৎপগী ৱারিদা মাঙজিল থানবা অসাম অমসুং অৱাং-নোংপোক্কী মতম লাক্লে।
প্রধান মন্ত্রীনা হায়খি লমদম অমদা য়াংনা চাউখৎনবা অফবা লম্বী-থোঙ দরকার ওই, মরম অদুনা অৱাং-নোংপোক্কী চৎথোক-চৎশিন ফগৎহন্নবা ঐখোয়গী সরকারনা অকনবা থবক পায়খৎলিবনি। লম্বী, রেল অমসুং এয়র ইনফ্রাষ্ট্রকচরগী খুৎথাংদা চৎথোক-চৎশিন ফগৎহল্লে অমসুং ৫-জি ইন্তরনেত অমসুং ব্রোদবেন্দগী খুৎথাংদা দিজিতেলগী শম্নবা ফগৎহল্লে। চাউখৎলক্লিবশিং অসিনা, মীয়ামদা হেন্না খুদোংচাহল্লে, হিংবদা লাইহল্লে অমসুং ললোন-ইতিক্কী থবকশিং নুংঙাইহল্লে। লম্বী-থোঙ ফগৎলকপা অসিনা চৎথোক-চৎশিন হেন্না নুংঙাইরে, তুরিজম চাউখৎলে অমসুং লমদম অসিগী নহারোলশিংগী অনৌবা থবক অমসুং হিংনবগী খুদোংচাবশিং পীরে।
প্রধান মন্ত্রীনা হায়খি লৈবাক শীনবা থুংনা পায়খৎলিবা কন্নেক্তিবিতি কেম্পেনগী কান্নবা অসামনা চাউনা ফংলে। দিল্লিদা ওপোজিসন্না চহি ৬০ অমসুং অসামদা চহি কয়া সরকার পায়রম্লবসু, চহি ৬০-৬৫ দা ব্রাহ্মপুত্র মথক্ত শুপ্নগী থোঙ অহুম খক শারমখি। মখোয়গী সরকারনা চহি ১০ গী মনুংদা অচৌবা থোঙ তরুক শাখি। কুরুয়া-নারেঙ্গি থোঙ শানবা উরেপ-উয়ুং তম্লে অমসুং মসিনা গুৱাহাতিদ অমসুং দারংগী মরক্ত মিনিত খরগী মনুংদা চৎথোক-চৎশিন তৌবা য়ারগনি। থোঙ অসিনা মীচম মীয়ামগী মতম অমসুং শেন কল্লগনি অমসুং চৎথোক-চৎশিনগী ভারা হেন্না হোংলগনি, মতম হন্থরগনি অমসুং মী চিনবা ফরগনি।
প্রধান মন্ত্রীনা হায়খি অনৌবা রিং রোদনা মীয়ামদা কান্নবা পীরগনি। মসি শেমগৎপা হেক লোইবদা, অপ্পর অসাম তম্না লাকপা গারিশিং মখা তানা সহর চঙবা দরকার ওইররোই, সহরদা মী চিনবা হন্থহল্লগনি। রিং রোদ অসিনা নেসনেল হায়ৱে মঙা, ষ্টেৎ হায়ৱে অনি, এয়রপোর্ত অমা, রেলৱে ষ্টেসন অনি অমসুং ইনলেন্দ ৱাতর তর্মিনেল অমা শম্নহনগনি। মসিনা অসামগী অহানবা সিমলেস মল্তি-মোদাল কন্নেক্তিবিতি নেতৱার্ক ওইরগনি।
প্রধান মন্ত্রীনা হায়খি লৈবাক অসিনা নুমিৎ খরগী দরকার ওইবশিংগী থৌরাং তৌবা খক নত্তনা মথং চহি ২৫ দগী চহি ৫০ ফাওবগী দরকার ওইবশিংগী শেম-শারি। মহাক্না লাল কিলাদগী তুংগী মীরোলগী জি.এস.তিগী অহোংবশিং পুরক্নবা লাউথোকখ্রে অমসুং হায়রিবা অহোংবশিং অসি হৌজিক চৎনবা হৌরে। ঙসিদগী নুমিৎ হৌরগা নুমিৎ মাপনগী মতুংদা, নবরাত্রি মনুংদা, জি.এস.তি রেতশিং হন্থরগনি। মসিনা অসামগী ইমুং খুদিংমক কান্নবা ফংলগনি, পোৎ-চৈ খুদিংমক মমল হোংনা ফংলগনি। সিমেন্তগী তেক্স হন্থরে অমসুং মসিনা য়ুম শারিবশিংগী চাদিং হন্থরগনি। কেন্সরগুম্বা অরুবা লায়নাশিংগী মমল তাংবা হিদাকশিং হোংলগনি অমসুং ইন্সুরেন্স প্রেমিয়মশিংগী মমলসু হন্থরগনি। অনৌবা মোতরসাইকলশিং নত্ত্রগা কারশিং লৈনবা থৌরাং তৌরিবশিং মমল হোংনা ফংলগনি। কান্নবশিং অসি মোতর কম্পেনিশিংনা মাঙজৌননা এদভর্তাইজ তৌবা হৌখ্রে। ইমাশিং, ইচলশিং, নহারোলশিং, লৌমীশিং অমসুং দুকান ফম্লিবশিং ৱারেপ অসিগী কান্নবা ফংলগনি। মসিগী অওনবা অসিনা মীয়ামগী কুহ্মৈগী নুংঙাইবা হেনগৎহল্লগনি।
প্রধান মন্ত্রীনা হায়খি কুহ্মৈ লাকপদা মীয়াম্না লৈবাক অসিদা শাজবা পোৎথোকশিং লৈগদবনি, ভারতকী পোৎথোকশিং খুদোলপোৎশিং ওইনা পীগদবনি অমসুং দুকান ফম্লিবশিংনা ভারত্ত শাবা পোৎথোকশিং য়োনগদবনি। মীওই খুদিংমক লমদম অসিগী পোৎথোক শীজিন্নগদবনি অমসুং মাইকৈ অসিদা থাংজিনবা থবক খুদিংমক্না লৈবাক অসি মপাঙ্গল কনখৎহনগনি।
প্রধান মন্ত্রীনা হায়খি মমাংঙৈদা হোস্পিতালশিং অচৌবা সহরশিং খক্ত লৈরমখি অমসুং লায়য়েংবদা শেন য়াম্না চঙখি। মসি কোক্নবা, ঐখোয়গী লৈবাক্কী মফম খুদিংমক্ত এ.আই.আই.এম.এসগী নেতৱার্ক অমসুং মেদিকেল কোলেজশিং মশিং হেনগৎহল্লে, মরুওইনা অসামদা, অখন্নবা কেন্সর হোস্পিতালশিংসু লিংখৎলে। হৌখিবা চহি ১১ দা, ভারতকী মেদিকেল কোলেজ মশিং শরুক অনি হেনগৎলে অমসুং নিংতম্বা ফংলবা মতুং চহি ৬০-৬৫ লিংখৎখিবা অদুগা মশিং মান্নরে। ২০১৪ গী মমাঙদা অসামদা মেদিকেল কোলেজ তরুক খক লৈরমখি। দারং মেদিকেল কোজেল শাবা লোইরকপগা, রাজ্য অসিদা হৌজিক কোলেজ ২৪ লৈরগনি। মেদিকেল কোলেজশিং লিংখৎপনা অনা-লায়য়েংগী মচাকশিং ফগৎহনবতা নত্তনা নহারোলশিং দোক্তরশিং ওইরক্নবা খুদোংচাবশিং পীরে। মমাঙদা মেদিকেল সিতশিং লৈতদবদগী, দোক্তর ওইনিংবা কয়া ওইবা ঙমখিদে। হৌখিবা চহি ১১ অসিদা, লৈবাক অসিদা মেদিকেল সিত মশিং শরুক অনি হেনগৎলে। মথং চহি ৫ দা সরকারনা অনৌবা মেদিকেল সিত লাখ ১ হাপচিন্নবা পান্দম থম্লি।
প্রধান মন্ত্রীনা হায়খি অসাম লৈবাকনিংবা মীওইশিংগী লমদম অমনি অমসুং মপান লৈবাক্কী মীওইশিংনা লান্দারকপদা লৈবাক অসি ঙাকথোক্নবা অসামগী অথৌবশিংনা মরুওইবা থৌদাং লৌখি অমসুং নিংতম লালহৌ মনুংদা থৱায় কৎখি। পাথারুঘাতকী পুৱারি ওইরবা লৌমীশিংগী সত্যগ্রহগী মফম অদু ঙসি মীয়াম পুল্লিবা মফম অসিদগী য়াম্না নক্লে। থৱায় কৎখ্রবা অথৌবশিংগী শেংলবা মফম অসিদগী ওপোজিসনগী অতোপ্পা থবক অমা ফোঙদোকপা দরকার ওইরে। ওপোজিসনগী পামজবা, মসিগা চৎমিন্নরিবা লনাই মীওইশিং অমসুং ৱাখল্লোনশিং অসি ভারতকী মায়োক্তনি। ওপরেসন সিন্দুরগী মতমদা ফাওবা অসিগুম্বা ৱাখল্লোন উবা ফংখি। ওপোজিসন্না সরকার পায়রিঙৈদা লৈবাক অসি তেরোরিজমগী অৱাবা মায়োক্নখি অমসুং ওপোজিন্না তুমিন্না লৈখি। ঙসিদি, সরকার অসিগী মখাদা, ভারতকী লান্মীনা সিন্দুরগুম্বা ওপরেসনশিং পাংথোক্লে,পাকিস্তান লানশিন্দুনা তেরর শৌগৎপশিং মাঙহল্লে। ভারত লান্মীগী মীচঙদা লৈবগী মহুত্ত ওপোজিসন্না পাকিস্তান লান্মীগী মীচঙদা লৈখি অমসুং তেরোরিষ্টশিং চঙজফম পীরিবশিংগী ৱাখল্লোন শৌগৎখি। মীয়াম্না ওপোজিসনদগী মীকুপ-নাহুম শিংনা লৈগদবনি।
প্রধান মন্ত্রীনা হায়খি লৈবাক্কী য়াইফনবা খনবগী মহুত্ত ওপোজিসন্না মসিগী ভোৎ বেঙ্কতা থৱায় য়াওখি। হৌজিক ওপোজিসন্না লৈবাক্কী মায়োক্ত লৈবশিং অমসুং নারোন্দা চঙলকপশিং ঙাক-শেন্দুনা লৈরে। মখোয়না সরকার পায়রিঙৈদা, ওপোজিসন্না নারোন্দা চঙলকপা পুক্নিং থৌগৎখি অমসুং হৌজিক নারোন্দা চঙলকখিবশিং অদু ভারত্ত লেংদনা লৈগে হায়রক্লে। মতম অমদা মঙ্গলদোইদা অসামগী শক্তম ঙাক্নবা অমসুং আইন্না য়াদনা চঙলকপশিং থিংনবা অচৌবা ইহৌ অমা লৈখি। মমাঙগী ওপোজিসন্না লুচিংবা সরকারনা ইহৌ অসিদা শরুক য়াখিবা মীওইশিং চৈরাক পীখি। লৌমীশিং অমসুং ত্রাইবেলশিংগী লাইনিংগী মফমশিং অমসুং লমশিং খোপচিনবা ওপোজিসন্না য়াহনখি।
প্রধান মন্ত্রীনা হায়খি মখোয়গী সরকার শেম্লবা মতুংদা ফিবম অসি হন্দোক্লে। চীফ মিনিষ্টর হিমান্ত বিশ্বা শর্মাগী লমজিং মখাদা, অসামদা লম বিঘা লাখ কয়া নারোন্দা চঙলকপশিংদগী লৌশিল্লে। ওপোজিসনগী মতমদা নারোন্দা চঙলকপশিংগী মখাদা লৈরম্বা গুরুখুতি হৌজিক অমুক লৌশিল্লে। অমুক লৌশিল্লবা লম অসিদা হৌজিক গুরুখুতি এগ্রিকলচর প্রোজেক পায়খৎলে অমসুং কৃষি সৈনিকশিং ওইনা নহারোলশিং থবক তৌরি অমসুং হঙ্গাম, চুজাক, উরাদ, সিসাম অমসুং মাইরেল থারে। মতম অমদা নারোন্দা চঙলকপশিংগী ওইরম্বা লম হৌজিক অনৌবা লৌউ-শিংউগী মফম অমা ওইরে।
প্রধান মন্ত্রীনা হায়খি নারোন্দা চঙলকপা মীওশিংনা ভারতকী লন-থুম লৌশিনবা মখোয়গী সরকারনা য়ারোই। ফিবম অমদা হেক্ত ভারতকী লৌমীশিং, নহারোলশিং অমসুং ত্রাইবেলশিংগী হকশিং শন্তাইনবা তৌরোই। নারোন্দা চঙলক্তুনা ঙমখৈগী লমদমশিংদা ফুরুপ অমগী মীওই মশিং হেনগৎহন্নবা লৌতুনবা অমা লৈখি অমসুং মসিনা লৈবাক্কী সেকুরিতিদা অচৌবা শিংনবা অমা ওইখি, মরম অদুনা, হৌজিক লৈবাক শীনবা থুংনা দেমোগ্রাফিক মিসন হৌদোক্লে। লৈবাক অসি নারোন্দা চঙলকপশিংদগী ঙাক-শেনগনি অমসুং মখোয় ভারতকী লৈহাওদগী মপুংফানা তান্থোক্কনি।
প্রধান মন্ত্রীনা হায়খি অসামগী হেরিতেচ ঙাকপা অমসুং রাজ্য অসি য়াংনা চাউখৎহনবা হায়বসি অপুনবা থৌদাং অমনি অমসুং মসি ফংনবা পুন্না থবক তৌমিন্নবা তঙাইফদে। অসাম অমসুং অৱাং-নোংপোক অওনবা পুরকপা অসিনা বিকসিত ভারত অমগী শাফু ওইগনি।
থৌরম অদুদা শরুক য়াখিবা অতোপ্পা শক্নাইরবা মীওইশিংগী মনুংদা অসামগী চীফ মিনিষ্টর শ্রী হিমান্ত বিশ্বা শর্মা, য়ুনিয়ন মিনিষ্টর শ্রী সর্বনন্দ সোনোৱাল য়াওখি।
নুঙগীৱারোল
দারংদা, প্রধান মন্ত্রীনা প্রোজেক্ত কয়া অমগী উরেপ উয়ুংসু তমখ্রে। প্রোজেক্তশিং অদুদা দারং মেদিকেল কোলেজ অমসুং হোস্পিতাল অমসুং জি.এন.এম. স্কুল অমসুং বি.এস.সি. লমদম অসিদা মেদিকেল এজুকেসন অমসুং হেল্থকেয়র দেলিভরী মপাঙ্গল কনখৎহন্নবা নর্সিং কোলেজ; অর্বান মোবিলিতী হেঙ্গৎহন্নবা, ত্রাফিক হন্থহন্নবা অমসুং কোনুং শহর অমসুং মসিগী অকোইবদা কনেক্তিবিতী ফগৎহন্নবা গুৱাহাতি রিং রোদ প্রোজেক্ত; অমসুং লমদম অসিদা কনেক্তিবিতী ফগৎহন্নবা অমসুং সোসিও-ইকোনোমিক দিবেলপমেন্ত প্রমোৎ তৌনবা ব্রহ্মপুত্র তুরেলগী মথক্তা কুরুৱা-নারেঙ্গি ব্রিজ য়াওখি।
ৱা ঙাংখিবগী মপুংফাবা ৱারোল পানবা মসিদা নম্বীয়ু
आज भारत, दुनिया का सबसे तेज़ी से grow करने वाला देश है... वहीं असम भी देश के सबसे तेज़ी से grow करने वाले राज्यों में एक बन गया है: PM @narendramodi
— PMO India (@PMOIndia) September 14, 2025
पूरा देश आज विकसित भारत के निर्माण के लिए एकजुट होकर आगे बढ़ रहा है।
— PMO India (@PMOIndia) September 14, 2025
खासतौर पर हमारे जो नौजवान साथी हैं...उनके लिए विकसित भारत सपना भी है और संकल्प भी है।
इस संकल्प की सिद्धि में हमारे नॉर्थ ईस्ट की बहुत बड़ी भूमिका है: PM @narendramodi
21वीं सदी के 25 साल बीत चुके हैं।
— PMO India (@PMOIndia) September 14, 2025
अब 21वीं सदी का ये अगला हिस्सा...ईस्ट का है...नॉर्थ ईस्ट का है: PM @narendramodi
किसी भी क्षेत्र के तेज विकास के लिए तेज connectivity बहुत जरूरी है।
— PMO India (@PMOIndia) September 14, 2025
इसलिए हमारी सरकार का बहुत अधिक focus नॉर्थ ईस्ट में connectivity पर रहा है: PM @narendramodi
हमने एम्स का, मेडिकल कॉलेजों का नेटवर्क देश के कोने-कोने तक फैला दिया।
— PMO India (@PMOIndia) September 14, 2025
यहां असम में तो विशेष तौर पर कैंसर के हॉस्पिटल भी बनाए गए: PM @narendramodi
घुसपैठियों के माध्यम से बॉर्डर के इलाकों में डेमोग्राफी बदलने की साजिशें चल रही हैं... ये राष्ट्रीय सुरक्षा के लिए बहुत बड़ा खतरा है।
— PMO India (@PMOIndia) September 14, 2025
इसलिए, अब देश में एक डेमोग्राफी मिशन शुरु किया जा रहा है: PM @narendramodi
