ঙসি প্রধান মন্ত্রী শ্রী নরেন্দ্র মোদীনা বিহারদা লুপা করোর ১২,১০০ রোমগী তোঙান-তোঙানবা চাউখৎ-থৌরাংগী প্রোজেকশিং শঙ্গাখ্রে, উরেপ-উয়ুং তমখ্রে অমসুং মীয়ামদা কৎথোকখ্রে। চাউখৎ-থৌরাংগী প্রোজেকশিংগী মনুংদা হকশেল, রেল, লম্বী, পেত্রোলিয়ম অমসুং নেচরেল গ্যাস সেক্তরশিং য়াওরি।
থৌরম অদুদা তিনখিবা মীয়ামদা ৱা ঙাংবদা, প্রধান মন্ত্রীনা হায়খি য়ুম্লোন্নরিবা রাজ্য ঝারখন্দদা ভোৎ থাদনরি অমসুং বিকসিত ভারত অমগীদমক রাজ্য অসিগী মীয়াম মখোয়গী ভোৎ থাদরি। ঝারখন্দগী মীয়াম মশিং য়াম্না থোক্লক্কদবনি। প্রধান মন্ত্রীনা লৈখিদ্রবা সর্দা সিনহা জিগী মফমদা ইকায়খুম্নবা উৎখি অমসুং মহাক্কী ঈশৈশিং, চাথ মহাপর্বগী মহাক্কী কম্পোজিসনশিংগী থাগৎপা ফোঙদোকখি।
প্রধান মন্ত্রীনা হায়খি মদুদি বিহার রাজ্যগা লোয়ননা ভারত শীনবা থুংনা অচৌবা চাউখৎ-থৌরাংগী পান্দমশিং ফংবা উরে। মমাঙঙৈদা স্কিমশিং অমসুং প্রোজেকশিং চে খক্তদা উরম্বা অদুগা মান্নদবা মওং অমদা, ঙসিদি মখোয় তশেংনা থবক ওইনা পাংথোক্লে। ঐখোয় বিকসিত ভারত অমগী মাইকৈদা য়াম্না য়াংনা চঙশিল্লি। পান্দম ফংনবা থবক তৌবগা লোয়ননা বিকসিত ভারত অমা উরগদবা মরম্না ঐখোয়গী হৌজিক্কী মীরোল অসি লাইবক য়াম্না ফরে।
মীয়াম য়াইফনবা অমসুং লৈবাক্কী সেবা তৌনবা সরকারনা পায়খৎলিবা থবকশিং অমুক হন্না পল্লদুনা, প্রধান মন্ত্রীনা হায়খি ঙসিগী লুপা করোর ১২,০০০ রোমগী চাউখৎ-থৌরাংগী প্রোজেকশিং অসিদা হকশেল, রেল, লম্বী, পেত্রোলিয়ম অমসুং নেচরেল গ্যাস সেক্তরশিং য়াওরি। দরভঙ্গাদা এ.আই.আই.এম.এস শানবা মঙলান মঙফাওনবা ঙম্নবা ঙসি শিংথানিঙাই ওইবা খোঙথাং অমা থাংজিনবা অসিনা বিহারদা হকশেলগী লমদা অচৌবা অহোংবশিং লাক্লগনি। মিথিলা, কোসি অমসুং তিরহুতকী লমদমশিংগী মথক্তা নোংচুপ বেঙ্গল অমসুং অনকপা মফমশিং হোস্পিতাল অসিগী কান্নবা ফংলগনি অমসুং মসিনা নেপালদগী ভারত্তা লায়েংবা লাকপা অনাবশিংশিং খুদোংচাবা পীরগনি। থবক ফংনবা অমসুং মশানা মশাবু থবক পীজনবা খুদোংচাবশু পীরগনি। ঙসিগী চাউখৎ-থৌরাংগী প্রোজেকশিং অসিগীদমক মিথিলা, দরভঙ্গা অমসুং অপুনবা বিহারগী মীয়ামদা হরাওবা ফোঙদোকচরি।
প্রধান মন্ত্রীনা হায়খি লৈবাক অসিগী অপুনবা মীশিংগী অয়াম্বা শরুক লায়রবা অমসুং মিদল ক্লাস মীওইশিং ওইরি। হায়রিবা মীওই কাংলুপশিং অসিনা খ্বাইদগী হেন্না লায়ননা শোকহল্লি অমসুং মসিনা লায়েংনবা য়াম্লবা শেনফম চাদিং তৌহল্লি। করিগুম্বা ইমুং অমদা কনাগুম্বা অমা লায়না অমনা নাবা মতমদা কমদৌনা ইমুং হুপ্না অৱাবা তাহনবগে হায়বা মহাক নিংথিনা খঙই। হোস্পতালশিং অমসুং দোক্তরশিং ৱাৎপা, হিদাক-লাংথকশিং মমল তাংবা অমসুং দাইগ্নোস্তিক অমসুং রিছার্স সেন্তরশিং মশিং য়াম্না লৈতবদগী মমাংঙৈদা মেদিকেল ইনফ্রাস্ত্রকচরগী ফিবম য়াম্না শোকখি। মতিক চাদবা হকশেলগী ইনফ্রাস্ত্রকচর অমসুং লায়রবশিংনা মায়োক্নরিবা অৱাবশিংনা মরম ওইদুনা লৈবাক অসি চাউখৎপা থিন্থখি। মরম অদুনা, অরিবা ৱাখল্লোন অমসুং থৌরাং হোঙদোক্লে।
প্রধান মন্ত্রীনা হায়খি মদুদি হকশেলগী লমদা সরকারনা অচুম্বা থৌরাং পায়খৎলে। অহানবদা লায়নাশিং মাঙজৌননা ঙাকথোক্নবা মীৎয়েং চঙলে; অনিশুবদা অনাবশিং ফজনা লাইওং খঙদোক্নবা; অহুমশুবদা লেম্না নত্ত্রগা মমল হোংনা হিদাক-লাংথকশিং অমসুং লায়েংবা ফংহন্নবা; মরিশুবদা অপীকপা সহরশিংদা অফবা মেদিকেলগী খুদোংচাবশিং ফংহনবা; অমসুং মঙাশুবদা হকশেলগী লমদা তেক্নোলোজি শীজিন্নবা হেনগৎহন্নবা সরকারনা মীৎয়েং চঙলে।
শ্রী মোদীনা হায়খি য়োগ, অয়ুর্বেদ, মচি ওইবা চীঞ্জাক্কী মগুন, ফিত ইন্দিয়া মুভমেন্তদা সরকারনা মীৎয়েং চঙলে। মচি ওইদবা চীঞ্জাকশিং চাবা অমসুং হকচাং শোক্নিংঙাই ওইবা পুন্সি মহিং অমনা লায়নাশিং থোকহনবনি। সরকারনা শ্বাছ ভারত কেম্পেন পায়খৎলে, য়ুম খুদিংদা তোইলেতশিং শাদুনা অমসুং তোতি ঈশিং ফংহন্দুনা লু-নান্না লৈবা হেনগৎহন্নবা অমসুং লায়নাশিং হন্থহন্নবা পান্দম থম্লি। হৌখিবা নুমিৎ খরনি অসিদা দরভঙ্গাদা লু-নানবগী থবকশিং পাংথোকখিবদা চীফ সেক্রেতরি, মহাক্কী কাংবু অমসুং রাজ্য অসিগী মীয়াম প্রধান মন্ত্রীনা থাগৎপা ফোঙদোকখ্রে। লু-নানবগী থবকশিং অসি মখা তানা নুমিৎ খরনি শাংদোক্নবা মহাক্না তকশিনখি।
প্রধান মন্ত্রীনা হায়খি করিগুম্বা ঙল্লিঙৈদা খঙদোকহৌরবদি লায়না কয়াগী অরুবা ফিবমশিং হন্থহনবা ঙমগনি। অদুবু দাইগ্নোস্তিক অমসুং রিছার্সকী মমল য়াম্না ৱাংবদগী মীয়াম্না ঙল্লিঙৈদা খঙদোকপা ঙমখিদে। ঐখোয়না লৈবাক অসিদা অয়ুস্মান অরোগ্যা মন্দির লাখ ১.৫ হেন্না থবক হৌরে। মসিনা লায়নাশিং ঙল্লিঙৈদা ঙাকথোকপদা মতেং পাংগনি। হৌজিক ফাওবদা অয়ু্স্মান ভারত স্কিমগী মখাদা অনাবা মীওই করোর ৪ হেন্না লায়েংখ্রে। স্কিম অসি লৈরমদ্রবদি অনাবা কয়া হোস্পিতালদা মিং চনবা ফাওবা ফংলম্লোই। অয়ুস্মান ভারত স্কিমনা মরম ওইদুনা লায়রবা মীওই কয়াগী অৱাবশিং কোকহল্লে। অয়ুস্মান স্কিমনা মরম ওইদুনা ইমুং করোর কয়া লুপা করোর লাখ ১.২৫ রোম কনবা ঙম্লে অমসুং স্কিম অসিগী মখাদা অনাবশিং সরকার অমসুং লনাই হোস্পিতাল অনিমক্তা লায়েংলে।
প্রধান মন্ত্রীনা হায়খি অয়ুস্মান ভারত স্কিমগী মখাদা চহি ৭০ গী মথক্তা লৈবা মীওইশিং কোনশিন্নবা মহাক্না মীখল মনুংদা থাজবা পীখি। মসিগী থাজবা অসি থবক ওইনা পাংথোক্লে। ইমুং অমগী শেন্থোক থিদনা চহি ৭০ গী মথক্তা লৈবা মীওইশিং লেম্না লায়েংলে। বেনিফিসরিশিং অথুবা মতমদা অয়ুস্মান বয়া বন্দনা কার্দ অমা ফংলগনি। জন ঔসাধি কেন্দ্রশিংনা হিদাক-লাংথকশিং মমল য়াম্না হোংনা পীরে।
ভারত্তা হকশেলগী থবকশিং ফগৎহন্নবা অপীকপা সহরশিংদা অফবা মেদিকেলগী খুদোংচাবশিং অমসুং দোক্তরশিং ফংহন্নবা মরিশুবা খোঙথাং অদুগী মতাংদা, প্রধান মন্ত্রীনা হায়খি মদুদি নিংতম্বা ফংবদগী চহি ৬০ ফাওবদা লৈবাক শীনবা থুংনা এ.আই.আই.এম.এস অমা খক লৈরমখি অমসুং হৌখিবা সরকারশিংনা অনৌবা এ.আই.আই.এম.এসশিং লিংখৎনবা থৌরাংশিং লোইশিল্লমখিদে। হৌজিক পাল্লিবা সরকার অসিনা অনাবশিং য়েংশিনবা খক নত্তনা লৈবাক শীনবা থুংনা অনৌবা এ.আই.আই.এম.এসশিং লিংখৎলে, হৌজিক এ.আই.আই.এম.এস ২৪ রোম লৈরে। হৌখিবা চহি ১০ দা মেদিকেল কলেজশিং শরুক অনি হেনগৎতুনা দোক্তরশিং মশিং হেনগৎলে। বিহার অমসুং লৈবাক অসিগী সেবা তৌনবা দরভঙ্গা এ.আই.আই.এম.এসনা অনৌবা দোক্তর কয়া পুথোক্কনি।
প্রধান মন্ত্রীনা হায়খি মদুদি মমালোলদা অৱাং থাক্কী লাইরিক তম্নবা থবক পায়খৎপা হৌরে অমসুং মসি কারপুরি থাকুর জিগী মঙলানশিংদা পীবা খ্বাইদগী চাউবা ইকায়খুম্নবনি। হৌখিবা চহি ১০ দা অনৌবা মেদিকেল সিত লাখ ১ হেন্না হাপচিল্লে অমসুং মথং চহি ৫ দা অতোপ্পা সিত ৭৫,০০০ হাপচিন্নবা থবকশিং পায়খৎলি। হিন্দি অমসুং অতোপ্পা লোলশিংদা মেদিসিন তম্নবা খুদোংচাবা লৈরে।
কেন্সর থেংন্নবা সরকারনা পায়খৎলিবা থবকশিংগী মতাংদা, প্রধান মন্ত্রীনা হায়খি মুজাফরপুরদা শেমগৎলিবা কেন্সর লায়েংনবগী খুদোংচাবা অসিনা বিহারগী কেন্সর অনাবশিংদা কান্নবা পীরগনি। মসিগী অমতা ঙাইরবা খুদোংচাবা অসিনা তোঙান-তোঙানবা মখলগী কেন্সরশিং লায়েংগনি অমসুং অনাবশিং দিল্লি নত্ত্রগা মুম্বাইদা চৎপা দরকার ওইদ্রে। বিহারদা অথুবা মতমদা অনৌবা মীৎ লায়েংনবা হোস্পিতাল অমা লৈরগনি। হন্দক বারানসীদা সঙ্কারা আই হোস্পিতাল হাংদোকখিবা অদুগুম্না বিহারদা মীৎকী হোস্পিতাল অমা শানবা মহাক্না কাঞ্চি কামাকোতি শ্রী সঙ্করচার্য়াদা হায়জখ্রে অমসুং থবক পায়খৎপা হৌরে।
অফবা লৈঙাক্কী নমুনা অমা শেমগৎপগীদমক বিহারগী চীফ মিনিস্তর থাগৎলদুনা, প্রধান মন্ত্রীনা হায়খি মদুদি দবল ইঞ্জিন সরকার অসিনা বিহারদা চাউখৎপগী খোঙজেল য়াংখৎহল্লে অমসুং অপীকপা লৌমীশিং অমসুং উদ্যোগশিং ফগৎনবা লম্বী অমা শেম্লে। ইনফ্রাস্ত্রকচশিং, এয়রপোর্তশিং অমসুং এক্সপ্রেসৱেশিং শেমগৎলকপদগী বিহারগী মমি ফগৎলক্লে। উরান স্কিমগী মখাদা দরভঙ্গাদা অনৌবা এয়রপোর্ত অমা শেমগৎলে। ঙসিগী চাউখৎ-থৌরাংগী প্রোজেকশিংগী মনুংদা লুপা করোর ৫,৫০০ রোমগী এক্সপ্রেসৱেশিং অমসুং লুপা করোর ৩,৪০০ রোমগী দিতি গ্যাস দিস্ত্রিবুসন(সি জি দি) নেতৱার্কশিং য়াওরি। বিহারদা পায়খৎলিবা চাউখৎপগী মহাজ্ঞ্যা অনৌবা থাকশিং য়ৌরে। অনৌবা থবকশিং ফংনবা খুদোংচাবশিং পীরে।
প্রধান মন্ত্রীনা হায়খি লমদম অসিদা লৌমীশিং, মাখানা পুথোক্লিবশিং অমসুং ঙা য়োকপগী থবকশিং চাউখৎনবা সরকারনা মরুওইনা লৌরে। মিথিলাগী লৌমীশিং য়াওনা বিহারগী লৌমীশিংনা পি.এম কিষান সম্মান নিধিগী মখাদা লুপা করোর ২৫,০০০ হেন্না ফংখ্রে। জিলা অমা পোৎথোক অমা য়োজনাগী মখাদা মাখানা পুথোক্লিবশিং কান্নবা ফংলে, মাখানা রিছার্স সেন্তর লৈবাক্কী লোয়শঙ অমা ওইনা শকখঙলে, মাখানাশিং জি.আই তেগ ফংলে। ঙা মচা পুথোক্লিবা ঙামীশিং কিষান ক্রেদিত কার্দ অমসুং মতস্যা সম্পদা য়োজনাগী কান্নবশিং ফংলে। মালেমদা ভারতনা ঙা য়াম্না মপান লৈবাকশিংদা থাদোকপা লৈবাক অমা ওইহন্নবা সরকারনা পান্দম থম্লি।
প্রধান মন্ত্রীনা হায়খি মদুদি কোসি অমসুং মিথিলাদা য়াম্না তোইনা ঈশিং ইচাউ থোকপদগী মীয়াম অৱাবা নংলিবা অসি কোকহন্নবা সরকারনা থবকশিং পায়খৎলে। বিহারদা ইচাউ থেংন্নবা অপুনবা থৌরাং অমা চহি অসিগী বজেত্তা লাউথোক্লে। নেপালগী মতেংগা লোয়ননা ঈশিং ইচাউ কোক্নবা পাম্বৈ অমা ফংলগনি হায়বগী থাজবা লৈরে অমসুং লুপা করোর ১১,০০০ হেনবগী মরি লৈনবা শেমগৎ-শাৎপগী থবকশিং হৌজিক পায়খৎলি।
প্রধান মন্ত্রীনা হায়খি মদুদি বিহার ভারতকী হেরিতেচগী খ্বাইদগী চাউবা মফমনি। মসিগী পুক্কৈ অসি য়োকখৎপা হায়বসি ঐখোয় খুদিংমক্কী থৌদাংনি। মরম অদুনা, সরকারনা “বিকাস ভি, বিরাসাত ভি” লাইৱা পায়খৎলে। মতম কয়া মাঙলুরবা মসিগী মিংচৎ অমুক হঞ্জিল্লক্নবা ঙসি নালান্দা য়ুনিভর্সিতি থবক পায়খৎলে। লোলশিং ঙাক-শেনবগী তঙাইফদবা পল্লদুনা, প্রধান মন্ত্রীনা হায়খি মদুদি ভগবান বুদ্ধনা তম্বীখিবা পাউতাকশিংগী পালি লোল অমসুং বিহারগী হৌখিবা মতমগী মিংচৎ ওইখিবা অসি ক্লাসিকেল লোল ওইনা শকখঙলে। হৌজিক পাল্লিবা সরকার অসিনা মাইথিলি লোল ভারত সংবিধানগী ৮শুবা সেদুলদা হাপচিনখিবনি। মাইথিলি লোল অসি ঝারখন্দ রাজ্যগী অনিশুবা লোল ওইরে।
প্রধান মন্ত্রীনা হায়খি মদুদি দরভঙ্গা অসি লৈবাক অসিদা রামায়ন সর্কুইগা লোয়ননা শম্নবা সহর ১২ হেনবগী মনুংদা অমনি, মরম অদুনা সহর অসি তুরিজম চাউখৎলে। দরভঙ্গা-সিতামারহি-অয়োধ্যা রুত্তা চেল্লিবা অমৃত ভার ত্রেন অসিনা মীয়ামদা য়াম্না চাউনা কান্নবা পীরে।
নিংতম্বা মমাঙ অমসুং মতুংদা শিংথাবা য়ারবা থবক কয়া পাংথোক্লম্বা দরভঙ্গা স্তেৎকী মহারাজ শ্রী কামেশ্বর সিংহ জিগী মফমদা প্রধান মন্ত্রীনা ইকায়খুম্নবা উৎখি। মহাক্না হায়খি মহারাজ শ্রী কামেশ্বর সিংহ জিগী খুন্নাইগী থবক অসি দরভঙ্গাগী চাউথোকচবনি অমসুং মসিনা মীওই খুদিংমক্তা ইথিল অমা পীরে। মহাক্কী অফবা থবকশিং কাসিদশু য়াম্না তোইনা ঙাংনৈ। মীয়াম কান্নবশিং খ্বাইদগী য়াম্না ফংনবা রাজ্য অমসুং কেন্দ্র সরকারনা থবকশিং পায়খৎলি অমসুং মীয়াম অমুক্কা হন্না থাগৎপা ফোঙদোকচরি।
থৌরম অদুদা শরুক য়াখিবশিংগী মনুংদা বিহারগী রাজ্যপাল শ্রী রাজেন্দ্র অরলেকার, বিহারগী চীফ মিনিস্তর শ্রী নিতিস কুমার অমসুং ফুদ প্রোসেসিং ইন্দস্ত্রিগী য়ুনিয়ন মিনিস্তর শ্রী চিরাগ পাসৱান য়াওখি।
নুঙগীৱারোল
লমদম অসিদা হকশেলগী মচাক-মথুমশিং য়াম্না চাউনা ফগৎলকপা অমা ওইনা, প্রধান মন্ত্রীনা লুপা করোর ১২৬০ রোম চঙনা এ.আই.আই.এম.এস, দরভঙ্গা শানবা উরেপ-উয়ুং তমখ্রে। মসিদা সুপর-স্পিলিএলিতি হোস্পিতাল অমা/অয়ুস ব্লোক, মেদিকেল কলেজ, নর্শিং কলেজ, অহিং লেকফম অমসুং লৈফমশিং য়াওগনি। মসিনা বিহার অমসুং মসিগা নক্নবা মফমশিংদা অৱাংবা থাক্কী অনা-লায়েংগী খুদোংচাবশিং পীগনি।
লমদম অসিদা লম্বী অমসুং রেলগী অনৌবা প্রোজেকশিং পায়খৎতুনা চৎথোক-চৎশিনগী খুদোংচাবা হেনগৎহন্নবা প্রোজেকশিংদা অখন্নবা মীৎয়েং অমা চঙলে। প্রধান মন্ত্রীনা বিহারদা লুপা করোর ৫,০৭০ রোমগী তোঙান-তোঙানবা নেসনেল হায়ৱে প্রোজেকশিং শঙ্গাখ্রে অমসুং উরেপ-উয়ুং তমখ্রে।
মহাক্না নেসনেল হায়ৱে-৩২৭ই গী গালগালিয়া-অরারিয়া সেক্সনগী লেন-৪ শঙ্গাখ্রে। কোরিদোর অসিনা গালগালিয়াদা ইস্ত-ৱেস্ত কোরিদোর (এন.ঐচ-২৭) দা অরারিয়াদগী য়ুম্লোন্নরিবা রাজ্য নোংচুপ বেঙ্গলদা চৎনবা অতোপ্পা লম্বী অমা পীগনি। মহাক্না নেসনেল হায়ৱে-৩২২ অমসুং নেসনেল হায়ৱে-৩১ দা রেল ওভর ব্রিজ (আর ও বি) অনিশু শঙ্গাখ্রে। মখা তানা প্রধান মন্ত্রীনা নেসনেল হায়ৱে-১১০ দা বন্ধুগঞ্জদা জেহনাবাদ অমসুং বিহারসরিফ শম্নগদবা অচৌবা থোং অমা শঙ্গাখ্রে।
প্রধান মন্ত্রীনা নেসনেল হায়ৱে প্রোজেক ৮ উরেপ-উয়ুং তমখ্রে, উরেপ-উয়ুং তমখিবা প্রোজেকশিংগী মনুংদা রামনগরদগী রোসেরা ফাওবা পেপ সোলজরগা লোয়ননা লেন অনিগী লম্বী শেমগৎপা, নেসনেল হায়ৱে-১৩১এ গী বিহার-নোংচুপ বেঙ্গল ঙমখৈদগী মনিহারি সেক্সন, মাহনার অমসুং মোহিউদ্দিন ফাওরগা হাজিপুরদগী বাছৱারা ফাওবা, সরৱান-চাকাই সেক্সন য়াওরি। মহাক্না নেসনেল হায়ৱে-৩২৭ই দা রানিগঞ্জ বাইপাস; নেসনেল হায়ৱে-৩৩৩এ দা কাতোরিয়া, লাখপুরা, বঙ্কা অমসুং পঞ্জৱারা বাইপাস অমসুং নেসনেল হায়ৱে-৮২ দগী নেসনেল হায়ৱে-৩৩ দা লেন মরিগী লিঙ্ক রোদকী উরেপ-উয়ুং তমখ্রে।
প্রধান মন্ত্রীনা লুপা করোর ১৭৪০ রোমগী রেলৱে প্রোজেকশিং মীয়ামদা কৎথোকখি অমসুং উরেপ-উয়ুং তমখ্রে। মহাক্না বিহারগী ঔরাঙ্গবাদ জিলাদা লুপা করোর ২২০ রোমগী চিরালাপোতুদগী বাঘ বিষ্ণুপুর ফাওবা সোনেনগর বাইপাস রেলৱে লাইনগী উরেপ-উয়ুং তমখ্রে।
মহাক্না লুপা করোর ১৫২০ হেনবগী রেলৱে প্রোজেকশিং মীয়ামদা কৎথোকখি। হায়রিবা প্রোজেকশিং অসিগী মনুংদা ঝানঝারপুর-লাউকাহা বাজার রেল সেক্সনগী গেজ ওনখৎপা, দরভঙ্গা জঙ্কসন্দা রেলৱে ত্রাফিক চিনবা ফনবা দরভঙ্গা বাইপাস রেলৱে লাইন, লমদম অসিদা চৎথোক-চৎশিন হেন্না নুংঙাইনবা রেলৱে লাইন প্রোজেকশিং দবল ওইহনবা য়াওরি।
প্রধান মন্ত্রীনা ঝানঝারপু-লাউকাহা বাজার সেক্সনদা ত্রেনশিংশু লমথাখি। সেক্সন অসিদা মেমু ত্রেনশিং চেনবা হৌদোকপা অসিনা অনকপদা লৈরিবা তাউনশিং অমসুং সহরশিংদা থবক ফংবা, লাইরিক-লাইশু তম্বা অমসুং অনা-লায়েংগী খুদোংচাবশিং লাইনা ফংহনগনি।
প্রধান মন্ত্রীনা লৈবাক শীনবা থুংবগী রেলৱে স্তেসনশিংদা জন ঔসাধি কেন্দ্র ১৮ কৎথোকখ্রে। হায়রিবা কেন্দ্রশিং অসিনা রেলৱে স্তেসনশিংদা পেসেঞ্জরশিংদা অহোংবা মমলদা হিদাক-লাংথকশিং ফংহনগনি। মসিনা জেনেরিক মেদিসিনশিং মীয়ামদা খঙহনবা অমসুং শীজিন্নবা হেনগৎহন্দুনা অনা-লায়েংদা চঙবা শেনফম হন্থহনগনি।
প্রধান মন্ত্রীনা লুপা করোর ৪০২০ হেনবগী পেত্রোলিয়ম অমসুং নেচরেল গ্যাস সেক্তরগী তোঙান-তোঙানবা থবকশিং উরেপ-উয়ুং তমখ্রে। য়ুমথোংশিংদা পাইপতা নেচরেল গ্যাস ফংহন্নবা অমসুং ললোন-ইতিক অমসুং উদ্যোগশিংদা মৈখু থাংদবা ইনর্জি ফংহন্নবা পান্দমদা, ভারত পেত্রোলিয়ম কোর্পোরেসন লিমিতেদনা বিহারগী মরুওইবা জিলা মরি হায়বদি দরভঙ্গা, মধুবানি, সুপাউল, সিতামারহি অমসুং সিওহারদা সিতি গ্যাস দিস্ত্রিবুসন (সি জি দি) শেমগৎনবা প্রধান মন্ত্রীনা উরেপ-উয়ুং তমখ্রে। মহাক্না ইন্দিয়ান ওইল কোর্পোরেসনগী বরাউনি রিফাইনরিগী বিতুমেন পুথোক্নবা য়ুনিত অমশু উরেপ-উয়ুং তমখ্রে অমসুং মসিনা লৈবাক অসিদা বিতুমেন পুথোক্তুনা মপান লৈবাকশিংদগী পুশিল্লকপগী মখা পোনবা হন্থহনবদা মতেং পাংগনি।
Click here to read full text speech
दरभंगा AIIMS के निर्माण से बिहार के स्वास्थ्य क्षेत्र में बहुत बड़ा परिवर्तन आएगा। pic.twitter.com/OHVMAoo5YB
— PMO India (@PMOIndia) November 13, 2024
हमारी सरकार देश में स्वास्थ्य को लेकर होलिस्टिक अप्रोच के साथ काम कर रही है: PM @narendramodi pic.twitter.com/KEs5GlaJaY
— PMO India (@PMOIndia) November 13, 2024
हमने पाली भाषा को शास्त्रीय भाषा का दर्जा दिया है: PM @narendramodi pic.twitter.com/Atbr8fbMov
— PMO India (@PMOIndia) November 13, 2024
