প্রধান মন্ত্রী, শ্রী নরেন্দ্র মোদীনা ঙসি কর্নাতকাগী চিক্কাবল্লাপুরদা লৈবা শ্রী মধুসুদন সাই ইন্সতিত্যুত ওফ মেদিকেল সাইন্স অমসুং রিসর্চ শঙ্গাখ্রে। এস.এম.এস.আই.এম.এস.আর.না মেদিকেল এজুকেসন অমসুং ক্বালিতী মেদিকেল কেয়রবু মীপুম খুদিংদা লেম্না পীগনি। ইন্সতিত্যুত অসিদা একাদমিক চহি ২০২৩দগী মহৈ তম্বা হৌগনি।
প্রধান মন্ত্রীনা ঙসি তিনখিবা মীয়ামদা ৱা ঙাংবদা চিক্কাবল্লাপুর অসিদি মোদর্ন ইন্দিয়াগী আর্কিতেক্ত, সর এম.এম. বিশ্বেশ্বরায়গী পোক্নফম লমদম্নি অমসুং মহাক্কী সমাধীদা চৎপা অমসুং মহাক্কী ম্যুজিয়মদা চৎপা ফংবা অসি লাইবক ফবনি হায়না মহাক্না ফোংদোকখি। “মসিগুম্বা য়াইফরবা লমদম অসিগী মমাংদা ঐহাক্না কোক নোঞ্জরি”, প্রধান মন্ত্রীনা হায়খি। অনৌবা থৌওং কয়াগী ৱাখল্লোঙ্গা লোয়ননা লৌমী অমসুং মীচম মীয়ামগী ইঞ্জিনিয়রিংগী অনৌবা প্রোজেক্ত কয়া পুথোক্নবা সর বিশ্বেশ্বরায়গী মফমদা ইথিল পীখিবা অসিদি চিক্কাবল্লুপুরগী লমদম অসিননি হায়না মহাক্না মীয়ামগী পুক্নিং চিংশিনখি।
প্রধান মন্ত্রীনা সত্যা সাই গ্রাম্বু সেবা তৌবগী য়াম্না ফজরবা মোদেল অমনি হায়খি। ইন্সতিত্যুসন অসিনা এজুকেসন অমসুং হকশেলগী থৌওংগী খুত্থাংদা পায়খৎপা মিসন কয়াবু থাগৎপা ফোংদোকখি। ঙসি মেদিকেল কোলেজ শঙ্গারিবা অসিনা মখোয়গী মিসনবু মখা তানা মপাঙ্গল হাপ্লে হায়না মহাক্না ফোংদোকখি।
লৈবাক অসিনা অমৃত কালগী মনুংদা চাউখৎপা লৈবাক অমা ওইনবা ৱারেপ লৌবা অমসুং মসিগুম্বা অচৌবা ৱারেপ অসিবু তেল্লবা মতমদা করম্না পাংথোকপা ঙমগনি হায়না মীয়াম্না খঙনিংবা পোক্লিবা অসিগী মতাংদা প্রধান মন্ত্রীনা ৱাফম থমখি। “মসিগী ওইনা শুপ্নগী পাউখুম অমখক লৈ, মপাঙ্গল লৈবা, ৱাফম চেৎপা অমসুং ৱাহন্থোক য়াম্না লৈবা পাউখুম অমা, মদুদি সবকা প্রয়াস হায়বসিনি। লৈবাক মীয়াম খুদিংনা হোৎনমিন্নবদগী মসিগী থৌওং অসি শোইদনা মায় পাক্কদৌরিবনি”, প্রধান মন্ত্রীনা হায়খি।
‘চাউখৎপা ভারত’ অমসুং লাইনীংবা, আশ্রম অমসুং মৎশিংগী নিংথীরবা চৎনবী অসি ফংবগী খোঙচত্তা খুন্নাই অমসুং ধর্মগী ইন্সতিত্যুসনশিংনা লৌগদৌরিবা থৌদাংগী মতাংদা মহাক্না মীয়ামগী পুক্নিং চিংশিনখি। মসিগুম্বা খুন্নাই অমসুং ধর্মগী লুপশিং অসিনা থাজবা অমসুং স্পিরিচুএল ওইবা ৱাফম কয়াগা লোয়ননা লাইরবা, শোত্থরবা, মশিং য়ামদবা অমসুং ত্রাইবেলশিংগী মপাঙ্গল হাপ্তুনা লাক্লি। “অদোমগী ইন্সতিত্যুসন অসিনা পাংথোকখিবা থবক খুদিংনা সবকা প্রয়াসকী ইথিলবু হেন্না মপাঙ্গল লৈহল্লি”, প্রধান মন্ত্রীনা হায়খি।
প্রধান মন্ত্রীনা শ্রী সত্যা সাই য়ুনিভর্সিতীগী মোত্তো – “য়োগাহ কর্মাসু কৌশলম” অসিগী মতাংদা শন্দোক্না তাকখি। মসিনা হায়বদি থবক তৌবদা হৈ-শিংবা হায়বসিদি য়োগনি হায়বনি। শ্রী মোদীনা সরকারনা মেদিকেলগী লমদা পাংথোকখিবা থবকশিং শিজিন্নদুনা মসিগী খুদম পীখি। ইং ২০১৪গী মমাংদা লৈবাক অসিদা মেদিকেল কোলেজ ৩৮০দগী তানা লৈরম্মি অদুবু মসিগী মশিং অসি ঙসিদি ৬৫০ য়ৌরে হায়না প্রধান মন্ত্রীনা পাউদমখি। মতম অমদা চাউখৎপগী মঙাল শুকফং ফংলমদবা লৈবাক্কী এস্পিরেস্নেল দিস্ত্রিক্তশিংদা ঙসিদি মেদিকেল কোলেজ ৪০ শাখ্রে হায়না মহাক্না ফোংদোকখি।
হৌখিবা চহি ৯ অসিদা লৈবাক্কী মেদিকেল কোলেজ মশিংনা শরুক অনি হেনগৎখি হায়না প্রধান মন্ত্রীনা হায়খি। মথংগী চহিদা লৈবাক অসিনা পুথোক্কদৌরিবা দাক্তর মশিংনা লৈবাক অসিনা নিংতম্বা হেক ফংবদগী পুথোকখিবা দাক্তর মশিংগা মান্নরগনি হায়না মহাক্না হায়খি। লৈবাক অসিনা পায়খৎলিবা চাউখৎ থৌরাংগী খোঙথাংশিং অসিদগী কর্নাতকাসু কান্নবা ফংলি হায়বা ৱাফম থম্লদুনা, প্রধান মন্ত্রীনা রাজ্য অসিদা লৈবাক্কী মেদিকেল কোলেজ চাউরাক্না ৭০মুক লৈ অমসুং চিক্কাবল্লুপুরদা শঙ্গারিবা মেদিকেল কোলেজ অসিনা দবল ইঞ্জিন সরকারগী হোৎনজমনগীখুদম অমসু ওইরি হায়না ফোংদোকখি। হন্দক্কী চহিগী বজেৎকী শরুক অমা ওইনা লৈবাক অসিদা নর্সিং ইন্সতিত্যুসন ১৫০ হেন্না লিংখৎনবা ৱারেপ লৌখিবগী মতাংদা মহাক্না পাউদমখি অমসুং মসিনা নর্সিং সেক্তরদা নহাশিংগী খুদোংচাবা কয়া পীগনি হায়খি।
মেদিকেল এজুকেসন্দা লোলগী শিংনবা লৈরিবা অসিগী মতাংদা প্রধান মন্ত্রীনা পল্লদুনা মেদিকেল এজুকেসন্দা লোকেলগী লোল হৌদোকপগী থবক অমত্তা মমাংদা পায়খৎলমদবা অসিদি তসেংনা লাইবক থীবনি হায়না মহাক্না হায়খি। খুঙ্গং অমসুং শোত্থবা মফমগী নহাশিংনা মেদিকেল অমসুং ইঞ্জিনিয়রিংগী থবক্তা মশাগী মফম কঞ্জবা ঙম্বগী ফিভম অসি হায়রিবা রাজনিতী দলশিং অসিনা পাম্লমদে হায়না মহাক্না হায়খি। “ঐখোয়গী সরকারনা লাইরবশিংগী য়াইফনবা থবক তৌই। মসিনা কন্নর য়াওনা ভারতকী লোল খুদিংদা মেদিকেল এজুকেসন তম্বগী অপাম্বা খলহল্লি”, প্রধান মন্ত্রীনা হায়খি।
লাইরবশিংবু ভোত বেঙ্ক খক্তমক ওইনা উবগী রাজনিতীগী চৎনবী অমা লৈবাক অসিদা মতম কয়াদগী চৎনদুনা লাকখিবা অসিদা প্রধান মন্ত্রীনা নুংঙাইতবা ফোংদোকখি। “ঐখোয়গী সরকারনা লাইরবগী সেবা তৌববু খ্বাইদগী থাক ৱাংবা ইথৌনি হায়না খল্লি। ঐখোয়না লাইরবা অমসুং মিদ্দল ক্লাসকী মীওইশিংগী হকশেল ফবদা অহানবা মিৎয়েং চঙলি”, শ্রী মোদীনা হায়খি। মহাক্না জন ঔশধী কেন্দ্র নত্ত্রগা হিদাক মমল হোঙনা ফংহনবা হায়বসিগী খুদম পীখি অমসুং লৈবাক অসিদা ঙসিদি জন ঔশধী কেন্দ্র ১০,০০০ মুক লৈরে অমসুং মখোয়শিং অসিগী মনুংদগী ১০০০ হেনবদি কর্নাতকাদা লৈ হায়না মহাক্না পাউদমখি। মসিগুম্বা খোঙথাং অসিনা লাইরবশিংনা হিদাক লাংথক লৈবদা লুপা করোর কয়া কনবা ঙমহনখি হায়না মহাক্না ফোংদোকখি।
লাইরবশিংনা শেল লৈতবদগী হোস্পিতালদা লাইয়েংবা ঙমখিদবা থাইনগী মতমশিং প্রধান মন্ত্রীনা নৌহৌননা নিংশিংখি। মসিগুম্বা লাইরবশিংনা থেংনবা খুদোংচাদবা অসিবু হৌজিক্কী সরকারনা শকখঙখি অমসুং অয়ুশমান ভারত য়োজনানা মসিগী ৱারোইশিন পুরকখি অমসুং লাইরবশিংগীদমক্তা হোস্পিতালগী থোং হাংদোকপীখি হায়না মহাক্না মীয়ামগী পুক্নিং চিংশিনখি। কর্নাতকাগী মীওই লাখ কয়ানা মসিগী কান্নবা ফংখ্রে হায়বা ৱাফম পল্লদুনা, প্রধান মন্ত্রীনা হায়খি, “সরকারনা লাইরবশিংগী মফমদা লুপা লাখ ৫ ফাওবগী লেম্না লাইয়েংবগী খুদোংচাবা শোইদনা ফংহনখি”। হার্ত সর্জরী, নি রিপ্লেসমেন্ত অমসুং দাইলাইসীসনচিংবা শেল য়াম্না চঙবা সর্জরীগী থৌওংশিংবু খুদম ওইনা পীরদুনা, সরকারনা মসিগুম্বা শেল য়াম্বা ফী হন্থহন্নবা পায়খৎফম থোকপা থবক পায়খৎখি হায়না মহাক্না হায়খি।
“ঐখোয়না হকশেলগা মরী লৈনবা পোলিসী খুদিংদা ইমা অমসুং ইচে-ইচলশিংদা অহেনবা অমসুং অহানবা মিৎয়েং চঙলি”, প্রধান মন্ত্রীনা হায়খি। ঐখোয়গী ইমাশিংগী হকশেল ফগৎলকপা অমসুং মখোয়না মচি ওইবা চিঞ্জাক ফংলকপা মতমদা অপুনবা চারোন-শুরোনগী হকশেলসু ফগৎলি হায়বা ৱাফমদা মিৎয়েং চঙলদুনা, প্রধান মন্ত্রীনা সরকারনা মাইকৈ অসিদা অখন্নবা মিৎয়েং চঙলি হায়না ফোংদোক্লদুনা অমাংশঙ শাবা, গ্যাস কন্নেক্সন লেম্না পীবা, য়ুম্থোং খুদিংদা তোতি ঈশিং ফংহনবা, সেনিতরী পেদ লেম্না য়েন্থোকপা অমসুং মচি ওইবা চিঞ্জাক ফংহন্নবগীদমক্তা বেঙ্ক একাউন্ততা হকথেংননা শেল হাপ্পগী স্কিম কয়াগী খুদম পীখি। ব্রেস্ত কেন্সরগী মতাংদা সরকারনা অখন্নবা মিৎয়েং চঙলিবা অসিগী মতাংদা প্রধান মন্ত্রীনা পল্লদুনা মসিগুম্বা লাইনাশিংবু অঙনবা থাক্তা খঙদোক্নবগীদমক্তা খুঙ্গংশিংদা হেল্থ অমসুং ৱেলনেস সেক্তর কয়া হাংদোক্তুনা হোৎনরি হায়না মহাক্না মরু ওইনা পাউদমখি। প্রধান মন্ত্রীনা বোম্মাজী অমসুং মহাক্কী তীম্বু রাজ্যসিদা হেল্থ অমসুং ৱেলনেস সেন্তর ৯০০০ হেন্না হাংদোকপগীদমক্তা থাগৎপা ফোংদোকখি।
প্রধান মন্ত্রীনা কর্নাতকা সরকারবু এ.এন.এম. অমসুং আশাগী থৌমীশিংগী মপাঙ্গল হেনগৎহনবগীদমক্তা থাগৎপা ফোংদোকখি। এ.এন.এম. অমসুং আশাগী থৌমী লিশিং ৫০ অমসুং কর্নাতকাগী রেজিস্তর তৌরবা নর্স অমসুং হকশেলগী থৌমী লাখ ১না মোদর্ন গেজেতশিং ফংলি অমসুং মখোয়গী মফমদা খুদোংচাবা পুম্নমক পীনবগীদমক্তা দবল ইঞ্জিন সরকার অসিনা কন্না হোৎনরি হায়না মহাক্না হায়খি।
দবল ইঞ্জিন সরকার অসিনা হকশেলখক্তা নত্তনা, নুপীশিংগী শেন্মিৎলোনগী মপাঙ্গল হেনগৎহনবগী মতাংদসু অহেনবা মিৎয়েং চঙলি হায়না প্রধান মন্ত্রীনা হায়খি। কর্নাতকাবু শঙ্গোম অমসুং মুগা ফীগী লমদম হায়না কৌরদুনা, প্রধান মন্ত্রীনা শা-শন লোইবা লৌমীশিংগী কিসান রেদিত কার্দ অমসুং শা-শনগীদমক্তা তীকা কাপথোকপগী লুপা করোর লিশিং ১২গী চাউরবা ভেক্সিনেসন দ্রাইবকী মতাংদা পাউদমখি। দাইরী কোওপরেতিবশিংদা নুপীশিংনা শরুক য়াবা হেনগৎহন্নবা চত্থরিবা খোঙথাং অসিসু দবল ইঞ্জিন সরকার অসিগী থবক্নি। খুঙ্গংগী নুপীশিংগী সেল্ফ হেল্প গ্রুপশিংসু মপাঙ্গল হাপ্লে হায়না প্রধান মন্ত্রীনা হায়খি। “লৈবাক অসিনা মশা-মউ ফরবা অমসুং সবকা প্রয়াস অসিনা চাউখৎ থৌরাংগীদমক্তা খোঙফম চেৎলবদি, ঐখোয়না চাউখৎপা ভারত অমা ফংবগী পান্দম থম্লিবা অসিসু খোঙজেল য়াঙনা ফংবা ঙমগনি”, প্রধান মন্ত্রীনা মখা তাখি।
অকোনবদা, প্রধান মন্ত্রীনা ভগ্বান সাই বাবা অমসুং সংস্থান অসিগা মহাক্কা লৈনবা অনকপা মরীবু অমুক্কা হন্না নিংশিংখি। “ঐহাক মফমসিদা মীথুংলেন অমা নত্তে, ঐহাক্তি মফম অমসুং লমদম অসিগী শরুক অমনি। ঐহাক্না মফমসিদা লাকপা খুদিংদা, মরী অসি অমুক্কা হন্না নৌথোকই অমসুং হেন্না চেৎপা মরী লৈনিংবগী ইথিল অমা থম্মোইনুংদা ফাওরকই”, মহাক্না হায়খি।
কর্নাতকাগী মুখ্য মন্ত্রী, বাসবরাজ বোম্মাই, শ্রী সত্যা সাই সঞ্জীবনি সেন্তর ফোর চাইল্দ হার্ত কেয়রগী চেয়রমেন, দাঃ সি. স্রিনিবাস অমসুং সদগুরু মধুসুদন সাইসু ঙসিগী থৌরম অসিদা অতোপ্পা কয়াগা লোয়ননা শরুক য়াখি।
বেকগ্রাউন্দ
লমদম অসিদা অনকপদা অমসুং মমল হোঙনা অনা-লায়য়েংগী খুদোংচাবা ফংহন্নবা অমসুং অনৌবা খুদোংচাবশিং ফংনবা মহৈরোয়শিং মতেং পাংনবা থৌরাং অমা ওইনা, প্রধান মন্ত্রীনা শ্রী মধুসুদন সাই ইন্সতিতুৎ ওফ মেদিকেল সাইন্সেস এন্দ রিছর্স(এস এম এস আই এম এস আর) শঙ্গাগনি। মসি সত্য সাই গ্রামা, মুদেনাহাল্লি, চিক্কাবাল্লাপুরদা লৈবা শ্রী সত্য সাই য়ুনিভর্সিতি ফোর হুমেন এক্সলেন্সনা লিংখৎপনি। সেন্তর অসি খুঙ্গংদা লৈরি অমসুং মেদিকেল ইজুকেসন অমসুং অনা-লায়য়েংদা শেন্দোং তানবা তোক্নবা পান্দমদা লিংখৎপনি অমসুং মসিনা মগুন লৈবা মেদিকেল ইজুকেসন লেম্না পীগনি। মহৈলোয়শঙ অসি ২০২৩দগী তম্বা হৌগনি।
PM @narendramodi pays tributes to Sir M. Visvesvaraya. pic.twitter.com/0E1p6Ug6T5
— PMO India (@PMOIndia) March 25, 2023
With 'Sabka Prayaas', India is on the path of becoming a developed nation. pic.twitter.com/v4g8Z9EJqk
— PMO India (@PMOIndia) March 25, 2023
Our effort has been on augmenting India's healthcare infrastructure. pic.twitter.com/NGI6IepxkG
— PMO India (@PMOIndia) March 25, 2023
We have given priority to the health of the poor and middle class. pic.twitter.com/Bwl9VerK2a
— PMO India (@PMOIndia) March 25, 2023
